ᔨᕆᒤᐊᐅᑉ ᐊᒡᓚᖏᑦ 27
27
ᔨᕆᒤᐊᐅᑉ ᐊᑐᕐᓂᖓ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᑕ ᐊᓄᖓᓂᒃ
1 #
ᐊᑕᓃᑦ ᐂᑉᐸᖏᑦ 24:18-20; ᑯᕉᓂᑲ ᐂᑉᐸᖏᑦ 36:11-13. ᔨᑎᑬᐊ ᐊᖓᔪᖅᑳᕐᔪᐊᖑᓕᓵᕐᑎᓪᓗᒍ ᔫᑕᒥ ᔫᓮᐊᐅᑉ ᐃᕐᓂᖓ, ᐊᑕᓂᐅᑉ ᔨᕆᒤᐊ ᐅᖃᕐᕕᒋᕚ. 2ᐃᒫᒃ ᐊᑕᓂᐅᑉ ᐅᖃᕐᕕᒋᕚᖓ, “ᐃᖃᕐᑎᐅᔭᕐᒥᒃ ᐊᓄᓕᐅᕆᑦ ᕿᔪᖕᒥᒡᓗ ᐃᑳᖓᔪᒃᓴᓕᐅᕐᓗᒍ ᖁᖓᓯᕐᓄᓪᓗ ᐊᑎᓗᒍ. 3ᐅᖃᕆᐊᕐᑐᓕᕆᑦ ᐊᖓᔪᖅᑳᕐᔪᐊᓄᑦ ᐄᑐᒥ, ᒧᐊᐱᒥ, ᐋᒪᓐᒥ, ᑍᕆᒥ, ᓮᑐᓂᒥᓗ ᐱᔨᑦᓯᕐᑎᖏᑦ ᐊᖅᑯᑎᒋᓗᒋᑦ ᔨᕉᓴᓕᒧᑦ ᑎᑭᓯᒪᔪᑦ ᔫᑕᒥᐅᑦ ᐊᖓᔪᖅᑳᕐᔪᐊᖓᓂᒃ ᔨᑎᑬᐊᒥᒃ ᑕᑯᔭᕐᑐᕐᓯᒪᔪᑦ. 4ᐊᖓᔪᖅᑳᖏᓐᓄᑦ ᐅᖃᐅᓯᒃᓴᒡᒋᕐᑎᒃᑭᑦ ᐅᖃᐅᑎᓗᒋᓪᓗ, ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᑕᒪᓐᓇ ᐊᖓᔪᖅᑳᑦᓯᓐᓄᑦ ᐅᖃᐅᓯᕆᓯᐅᒃ. 5ᐱᔪᓐᓇᕐᓂᕐᔪᐊᓐᓄᑦ ᐊᐅᓚᑦᓯᓂᓐᓄᓪᓗ ᓄᓇ ᓴᓇᓚᐅᕐᐸᕋ ᐃᓄᖏᓪᓗ ᐆᒪᔪᖏᓪᓗᑦᑕᐅᖅ, ᑐᓂᑦᔪᑎᒋᓪᓗᒋᓪᓗ ᑐᓂᑦᔪᑎᒋᔪᒪᔭᓐᓄᑦ. 6ᓄᓇᖁᑎᓕᒫᓯᓗ ᑐᓂᑦᔪᑎᒋᔪᒪᓕᕐᐸᒃᑲ ᐱᔨᒋᔭᓐᓄᑦ ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐆᒪᔪᑦ ᐊᒡᓛᑦ ᑖᑦᓱᒥᖓ ᐊᖓᔪᖅᑳᖃᕐᑎᑦᓱᒪᕙᒃᑲ. 7ᐃᓅᖃᑎᒌᒡᔪᐊᓪᓗ ᐱᔨᑦᓯᕈᒫᕐᐹᑦ, ᐃᕐᓂᖏᓪᓗ ᐃᕐᖑᑕᖏᓪᓗᑦᑕᐅᖅ ᓇᖕᒥᓂᖅ ᐅᕐᕈᕕᒃᓴᖓ ᑎᑭᓚᐅᖅᑳᕐᑎᓐᓇᒍ, ᑭᖑᓂᖓᒍᓪᓗᑦᑕᐅᖅ ᐊᓯᒥᓄᑦ ᐊᐅᓚᑕᐅᓕᕈᒫᕆᕗᖅ ᐱᔪᓐᓇᕐᓂᖃᕐᓂᕐᓴᐅᔪᓄᑦ.
8“ᐃᓅᖃᑎᒌᒡᔪᐊᖑᔪᓪᓕ ᐊᐅᓚᑕᐅᓕᕈᒪᓂᐊᖏᑉᐸᑕ ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑖᒃᑯᐊ ᓱᒋᐊᕐᑕᐅᑎᑦᓱᒫᕐᐸᒃᑲ ᐅᓇᑕᕐᓂᕐᒧᑦ, ᑳᖕᓇᕐᑐᕐᔪᐊᒧᑦ ᐋᓐᓂᐊᓇᕐᑐᓄᓪᓗ ᐊᓯᕈᕐᑕᐅᖏᓐᓂᓕᒫᖏᓐᓂ ᓂᐱᑯᓁᓴᐅᑉ ᐱᔪᓐᓇᕐᓂᖓᓄᑦ. 9ᓈᓚᒃᑕᕐᓴᕆᓐᖏᓚᓯ ᓇᓚᐅᑦᑍᔪᖁᑎᓯ, ᓇᓗᓇᕐᑐᓂᒃ ᖃᐅᔨᒪᓇᓱᐊᕐᑎᖁᑎᓯ, ᓯᓐᓇᒃᑐᓂᒡᓗ ᑐᑭᓯᐅᒪᓇᓱᐊᕐᑎᖁᑎᓯ, ᐊᓂᕐᓂᓕᕆᔨᖁᑎᓯ, ᐊᖓᒃᑯᖁᑎᓯᓗ ᐅᖃᕐᐸᒃᑐᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᐱᔨᑦᓯᕈᒪᖏᓐᓂᕅᓪᓗᑎᒃ ᐃᓕᑦᓯᓐᓂᒃ. 10ᓇᓚᐅᑦᑍᓂᖏᑦ ᓱᓕᖏᒻᒪᑕ ᓄᓇᒋᔭᑦᓯᓐᓂ ᐊᐅᓪᓚᕈᑦᔭᐅᑦᔪᑎᒋᔪᒫᕐᐸᓯ ᐅᖓᓯᒃᑐᒧᑦ, ᖁᔭᓈᕐᓯᔪᒫᕋᒪ ᐃᓕᑦᓯᓐᓂᒃ ᐊᓯᕈᕈᑎᒋᔪᒫᕐᐸᓯᓗ ᑕᒪᓐᓇ. 11ᐃᓅᖃᑎᒌᒡᔪᐊᖑᔪᓪᓕ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᐅᓚᑦᓯᓂᖓᓄᑦ ᐊᐅᓚᑕᐅᔪᒪᔪᑦ ᓄᓇᑐᖃᕐᒥᖕᓂᑦ ᓄᓇᖃᕐᓂᐊᕐᐳᑦ ᐱᔨᑦᓯᕐᓗᒍᓗ ᐃᓅᕕᒋᓂᐊᕐᐹᑦ, ᐊᑕᓂᖅ ᐅᖃᕐᐳᖅ.”
12ᑍᒫᑦᓮᓐᓇᖅ ᔨᑎᑬᐊ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᐅᑎᓚᐅᕆᕙᕋ, ᐅᖃᕐᓗᖓᓗ, “ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐊᐅᓚᑕᐅᔪᒃᓴᐅᕗᑎᑦ ᐱᔨᑦᓯᕐᓗᒍᓗ ᑕᕝᕙ ᐃᓅᓂᐊᕐᐳᑎᑦ. 13ᓱᖕᒪᓪᓕ ᐃᓄᖁᑎᓯ ᐅᓇᑕᕐᑐᓄᑦ ᑐᖁᑕᐅᔪᒃᓴᐅᕚᑦ? ᑳᖕᓇᕐᑐᕐᔪᐊᒧᓪᓘᓐᓃᑦ ᐋᓐᓂᐊᓇᕐᑐᓄᓪᓘᓐᓃᑦ ᐊᑕᓂᐅᑉ ᐊᑑᑎᓂᐊᕐᓂᕋᕐᑕᖏᓐᓄᑦ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᓐᓄᑦ ᐊᐅᓚᑕᐅᔪᒪᖏᑦᑐᓅᑦ ᐃᓅᖃᑎᒌᒡᔪᐊᓄᑦ? 14ᓇᓚᐅᑦᑍᔪᑦ ᓈᓚᒃᑍᓕᓯᐅᒃ ᐅᖃᐅᑦᔨᖃᑦᑕᕐᑐᑦ ᐊᐅᓚᑕᐅᓕᕐᑐᒃᓴᐅᖏᓐᓂᕋᕐᓗᑎᒃ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᓐᓄᑦ, ᑖᒃᑯᐊ ᓱᓕᖏᑦᑐᒥᒃ ᐅᖃᐅᓯᖃᕐᐳᑦ. 15ᑖᒃᑯᐊ ᑎᓕᓯᒪᓐᖏᓚᒃᑲ ᐃᓕᑦᓯᓐᓄᑦ, ᐊᑕᓂᖅ ᐅᖃᕐᐳᖅ, ᓱᓕᖏᑦᑐᒥᒃ ᐊᑎᕋ ᐊᑐᕐᓗᒍ ᐅᖃᖃᑦᑕᕐᐳᑦ, ᑍᒤᒻᒪᑦ ᖁᔭᓈᕈᑦᓯ ᐊᓯᕈᕐᑕᐅᔪᒫᕐᐳᓯ, ᓇᓚᐅᑦᑍᔪᖁᑎᓯᓗ ᐃᓕᑦᓯᓐᓂᒃ ᐅᖃᐅᑦᔪᐃᖃᑦᑕᕐᑐᑦ.
16“ᑐᓂᕐᕈᓯᕐᑎᑦᓯᔨᓄᑦ ᐃᓄᖕᓄᓪᓗ ᐅᖃᓕᕐᐳᖓ, ᐃᒫᒃ ᐊᑕᓂᖅ ᐅᖃᕐᐳᖅ, ᓇᓚᐅᑦᑍᔪᑦ ᓈᓚᒃᑍᓕᓯᒋᒃ ᐅᖃᖃᑦᑕᕐᑐᑦ, ‘ᐊᑕᓂᐅᑉ ᐃᒡᓗᖓᑕ ᐱᖁᑎᖏᑦ ᐅᑎᕐᑎᑕᐅᔪᒫᕐᐳᑦ ᐹᐱᓘᓂᒥᑦ,’ ᓱᓕᖏᓪᓗᑎᒃ ᑍᒤᓕᐅᕐᐳᑦ. 17ᓈᓚᒃᑍᓕᓯᒋᒃ ᐹᐱᓘᓂᐅᑉ ᐊᖓᔪᖅᑳᕐᔪᐊᖓ ᐱᔨᑦᓯᕈᑦᓯᐅᒃ ᑕᕝᕙ ᐃᓅᓂᐊᕐᐳᓯ ᓱᖕᒪᑦ ᑖᒃᑯᐊ ᐃᒡᓗᒐᓴᒡᔪᐊᑦ ᓄᓇᓕᕕᓂᑐᐃᓐᓇᐅᓕᖁᕕᓯᐅᒃ? 18ᓇᓚᐅᑦᑍᔫᒍᑎᒃ ᐊᑕᓂᕐᒥᓪᓗ ᐅᖃᐅᓯᒃᓴᖃᕐᑎᑕᐅᒍᑎᒃ, ᐊᑏ ᐊᑕᓂᕐᒧᑦ ᐊᔪᒐᖃᖏᑦᑐᒧᑦ ᕿᓄᑦᔪᑎᖃᓚᐅᕐᓕᑦ ᐊᑕᓂᐅᑉ ᐃᒡᓗᖓᑕ ᐱᖁᑎᖏᓐᓂᒃ ᐊᐅᓪᓚᕈᑦᔭᐅᖁᔨᖏᓪᓗᑎᒃ ᔫᑕᐅᑉ ᐊᖓᔪᖅᑳᕐᔪᐊᖃᕐᕕᖓᓂᑦ ᔨᕉᓴᓕᒥᓪᓗ ᐹᐱᓘᓂᒧᑦ.
19“ᐃᒫᒃ ᐊᑕᓂᖅ ᐅᖃᐅᓯᒃᓴᖃᕐᐳᖅ, ᓇᐸᔪᑦ ᐱᓪᓗᒋᑦ, ᑕᓯᓕᐊᕆᓯᒪᔪᕐᓗ ᐱᓪᓗᒍ, ᐃᑯᕐᕅᓪᓗ ᐊᓯᖏᓪᓗ ᐱᖁᑎᑦ ᐃᒡᓗᒐᓴᒡᔪᐊᓂ ᐊᒥᐊᒃᑰᔪᑦ, 20ᓂᐱᑯᓁᓴᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᐅᓪᓚᕈᑎᓚᐅᓐᖏᑕᖏᑦ ᐊᐅᓪᓚᕈᑦᔨᓕᕐᓗᓂ ᔨᕼᐅᐃᐊᑭᒥᒃ ᔨᕉᓴᓕᒥᑦ ᐱᔭᐅᑎᓪᓗᒋᑦ, ᐅᑯᐊ ᔨᕼᐅᐃᐊᑭᐅᑉ ᔫᑕᐅᑉ ᐊᖓᔪᖅᑳᕐᔪᐊᖓᑦᑕ ᐃᕐᓂᖓ ᔨᑯᓁᐊ ᐊᖓᔪᖅᑳᖁᑎᓕᒫᖏᓪᓗ ᐃᓚᒋᓗᒋᑦ.
21“ᑍᒫᒃ ᑕᕝᕙ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐊᑕᓂᐅᑉ ᐃᒡᓗᖓᑕ ᐱᖁᑎᖏᑦ ᐊᒥᐊᒃᑰᔪᑦ ᐱᑦᔪᑎᒋᓪᓗᒋᑦ ᔫᑕᒥᐅᑦ ᔨᕉᓴᓕᒥᐅᓪᓗ ᐊᖓᔪᖅᑳᕐᔪᐊᖃᕐᕕᖓᓃᑦᑐᑦ; 22ᐊᐅᓪᓚᕈᑦᔭᐅᔪᒫᕐᒪᑕ ᐹᐱᓘᓂᒧᑦ ᑍᑲᓃᖏᓐᓇᓕᕐᓗᑎᒡᓗ ᐂᔭᐅᑎᑦᓯᖄᕐᑎᓐᓇᖓ ᑖᒃᑯᓂᖓ, ᐊᑕᓂᖅ ᐅᖃᕐᐳᖅ, ᐃᓂᒋᔭᖏᓐᓄᑦ ᐅᑎᕐᑎᑦᓱᒫᕐᐸᒃᑲ ᑕᒪᐅᖓ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 27: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
