ᔨᕆᒤᐊᐅᑉ ᐊᒡᓚᖏᑦ 26
26
ᔨᕆᒤᐊᐅᑉ ᐃᖅᑲᕐᑐᐃᕕᖕᒧᐊᕐᑕᐅᓂᖓ
1 #
ᐊᑕᓃᑦ ᐂᑉᐸᖏᑦ 23:36—24:6; ᑯᕉᓂᑲ ᐂᑉᐸᖏᑦ 36:5-7. ᔨᕼᐅᐃᐊᑭᒻ ᐊᖓᔪᖅᑳᕐᔪᐊᖑᓕᓵᕐᑎᓪᓗᒍ ᔫᓮᐊᐅᑉ ᐃᕐᓂᖓ ᔫᑕᒥᐅᖅ, ᐊᑕᓂᐅᑉ ᐅᖃᕐᕕᒋᕚ. 2“ᐊᑕᓂᖅ ᐃᒫᒃ ᐅᖃᕐᐳᖅ, ᑐᒃᓯᐊᕐᕕᒡᔪᐊᑉ ᐊᓂᕕᖓᓂ ᓇᖏᕐᓗᑎᑦ, ᔫᑕᐅᑉ ᓄᓇᓕᖁᑎᖏᑕ ᐃᓄᖏᓐᓄᑦ ᐅᖃᓪᓚᒋᑦ ᐊᑕᓂᐅᑉ ᑐᒃᓯᐊᕐᕕᒃᔪᐊᖁᑎᖓᓄᑦ ᑐᒃᓯᐊᕆᐊᕐᓯᒪᔪᓄᑦ, ᐃᓕᖕᓄᑦ ᐅᖃᐅᓯᐅᖁᔭᓕᒫᒃᑲ ᐅᖃᐅᓯᕆᒃᑭᑦ; ᐅᖃᐅᓯᐅᖁᔭᓐᓂᒃ ᐅᖃᓐᖏᑕᖃᕐᑍᓕᓗᑎᑦ. 3ᐃᒻᒪᖄ ᑐᓴᕈᓐᓇᕋᔭᕐᒪᑕ, ᓵᒋᐊᕐᓗᑎᒡᓗ ᐱᐅᖏᑦᑐᓕᓂᕐᒥᖕᓂᑦ. ᑍᒤᑉᐸᑕᓗ ᐃᓱᒪᒋᓚᐅᕐᑕᕋ ᓴᖑᑎᒃᑲᔭᕐᐸᕋ, ᐊᓯᕈᕐᑕᐅᑎᑦᓱᓐᓃᕐᓗᒋᓪᓗ ᐊᓯᕈᐃᓂᐊᕐᓂᕆᓚᐅᕐᑕᓐᓄᑦ ᐱᐅᖏᓐᓂᖏᑦ ᐱᑦᔪᑎᒋᓗᒋᑦ.”
4ᐅᖃᐅᑎᔭᒃᓴᕆᕙᑎᑦ, ᐊᑕᓂᖅ ᐃᒫᒃ ᐅᖃᕐᐳᖅ, “ᓈᓚᖏᒃᑯᑦᓯᓐᖓ ᐱᖁᔭᒃᑲᓗ ᒪᓕᖏᒃᑯᑦᓯᐅᒃ ᐃᓕᑦᓯᓐᓄᑦ ᒪᓕᒐᒃᓴᓕᐊᕆᓚᐅᕐᑕᒃᑲ. 5ᐅᖃᕐᑎᒪᓗ ᐅᖃᐅᓯᕆᔭᖏᑦ ᓈᓚᖏᒃᑯᑦᓯᐅᒃ, ᐃᓕᑦᓯᓐᓄᑦ ᑎᓕᖃᑦᑕᕐᓯᒪᔭᒪ ᐅᖃᐅᓯᖏᑦ ᓈᓚᓚᐅᖏᓐᓇᑦᓯᐅᒃ. 6#ᔮᓱᐊ 18:1; ᐃᓐᖏᕈᑦ 78:60; ᔨᕆᒤᐊ 7:12-14.ᑕᕝᕙ ᑐᒃᓯᐊᕐᕕᒃᔪᐊᖅ ᐱᓂᐊᕐᕕᒋᓂᐊᕐᐸᕋ ᓮᓗᐊᒧᑦ ᐱᓇᓱᐊᕐᓂᕆᓚᐅᕐᑕᑦᑐᑦ, ᓄᓇᓖᓪᓗ ᑖᒃᑯᐊ ᓇᕐᕈᒋᔭᐅᓕᕈᒫᕐᐳᑦ ᐃᓅᖃᑎᒌᒡᔪᐊᓄᑦ ᑕᒤᓐᓄᑦ.”
7ᑐᓂᕐᕈᓯᕐᑎᑦᓯᔩᑦ, ᓇᓚᐅᑦᑍᔪᓪᓗ, ᐃᓄᓕᒫᓪᓗ ᔨᕆᒤᐊᒥᒃ ᑐᓴᕐᐳᑦ ᐅᖃᓪᓚᒃᑎᓪᓗᒍ ᑐᒃᓯᐊᕐᕕᒃᔪᐊᕐᒥ. 8ᔨᕆᒤᐊᓕ ᐅᖃᕇᑐᐊᕐᒪᑦ ᐃᓄᖕᓄᑦ ᐊᑕᓂᐅᑉ ᐅᖃᖁᔭᖏᓐᓂᒃ ᑎᒍᔭᐅᕗᖅ ᑐᓂᕐᕈᓯᕐᑎᑦᓯᔨᓄᓪᓗ ᓇᓚᐅᑦᑍᔪᓄᓪᓗ ᐃᓄᓕᒫᓄᓪᓗ, ᐅᖃᐅᑎᓪᓗᒍᓗ, “ᑐᖁᔪᒃᓴᐅᕗᑎᑦ! 9ᓱᖕᒪᑦ ᐅᖃᐅᓯᖃᕐᐱᑦ ᐊᑕᓂᐅᑉ ᐊᑎᖓᓂ ᓮᓗᐊᑎᑐᑦ ᑍᒤᑕᐅᓂᐊᕐᓂᕋᕐᓗᒋᑦ, ᐃᒡᓗᒐᓴᒡᔪᐊᓪᓗ ᐊᓯᕈᕐᑕᐅᓂᐊᕐᓂᕋᕋᕕᒋᑦ ᐃᓄᐃᕈᑎᓂᐊᕐᓂᕋᕐᓗᒋᓪᓗ?” ᐃᓄᓕᒫᓪᓗ ᔨᕆᒤᐊ ᐃᓗᒪᕚᑦ ᐊᑕᓂᐅᑉ ᐃᒡᓗᖓᓃᓪᓗᑎᒃ.
10ᔫᑕᒥᐅᓪᓕ ᐊᖓᔪᖅᑳᕆᔭᖏᑦ ᑐᓴᕋᒥᒃ ᑕᒪᒃᑯᓂᖓ ᐊᖓᔪᖅᑳᕐᔪᐊᑉ ᐃᒡᓗᖓᓂᑦ ᐊᓂᕗᑦ ᑐᒃᓯᐊᕐᕕᒃᔪᐊᓕᐊᓕᕐᓗᑎᒃ ᑕᕝᕗᖓᓗ ᑎᑭᓐᓇᒥᒃ ᐃᖏᑉᐳᑦ ᐃᑎᕐᑕᕐᕕᖕᒧᑦ ᓄᑖᒥᒃ ᑍᔭᐅᔪᒧᑦ. 11ᑐᓂᕐᕈᓯᕐᑎᑦᓯᔩᓪᓗ, ᓇᓚᐅᑦᑍᔪᓪᓗ, ᐊᖓᔪᖅᑳᓄᑦ ᐃᓄᖕᓄᓪᓗ ᐅᖃᕐᐳᑦ, “ᐅᓇ ᐊᖑᑦ ᑐᖁᑕᒃᓴᓐᖑᕐᑐᒃᓴᐅᕗᖅ, ᓄᓇᓕᖁᑎᕗᑦ ᐊᓯᕈᕐᑕᐅᓂᐊᕐᓂᕋᕐᓗᒋᑦ ᐅᖃᐅᓯᖃᕐᒪᑦ, ᓇᖕᒥᓂᕐᓗ ᐅᖃᐅᓯᕆᔭᖏᑦ ᑐᓴᕐᐸᓯ.”
12ᔨᕆᒤᐊᐅᑉ ᐊᖓᔪᖅᑳᑦ ᐃᓄᐃᓪᓗ ᐅᖃᐅᑎᓕᕐᐰᑦ, “ᐊᑕᓂᐅᑉ ᐅᖃᕆᐊᕐᑐᖁᓚᐅᕐᒪᖓ ᑐᒃᓯᐊᕐᕕᒃᔪᐊᑉ ᓄᓇᓖᓪᓗ ᐊᓯᕈᕐᑕᐅᓂᒃᓴᖏᑦ ᐅᖃᐅᓯᕆᖁᓪᓗᓂᒋᑦ ᐅᖃᐅᓰᑦ ᑐᓴᕐᑕᓯ ᒪᓕᒡᓗᒋᑦ. 13ᐱᓂᐊᕐᓂᓯ ᐃᓕᖅᑯᓯᓯᓗ ᐋᖅᑭᒋᐊᓕᕐᓯᐅᒃ ᐊᑕᓂᕐᓗ ᒎᑎᓯ ᓂᐱᖓ ᓈᓚᒃᓯᐅᒃ, ᐊᑕᓂᐅᕐᓗ ᑕᕝᕙ ᐊᓯᕈᐃᓂᐊᕐᓂᕋᕐᓂᕐᒥᓂᒃ ᐃᓕᑦᓯᓐᓂᒃ ᑕᕝᕙ ᐊᑐᕐᑎᑦᓯᓂᐊᓐᖏᓚᖅ. 14ᐅᕙᖓᓕ ᐃᓱᒪᕐᓲᑎᒋᕙᑦᓯᓐᖓ, ᐊᑲᐅᓇᓱᒋᔭᑦᓯᓐᓂᒃ ᐊᑐᕐᓂᐊᕐᐳᓯ. 15ᖃᐅᔨᒪᒋᑦᓯᓕ, ᑐᖁᒃᑯᑦᓯᓐᖓ ᐸᓯᔭᒃᓴᑑᓂᐊᕐᐳᓯ ᑐᖁᑦᑎᓯᒪᓂᑦᓯᓐᓂᒃ ᐸᓯᔭᒃᓴᐅᖏᑦᑐᒥᒃ, ᐊᑕᓂᐅᑉ ᐅᖃᖁᓚᐅᕐᒪᖓ ᑕᒪᒃᑯᓂᖓ ᐅᖃᐅᓯᕐᓂᒃ ᑐᓵᑎᓪᓗᓯ.”
16ᑕᕝᕙ ᐊᖓᔪᖅᑳᑦ, ᐃᓄᐃᓪᓗ, ᑐᓂᕐᕈᓯᕐᑎᑦᓯᔨᓄᑦ ᓇᓚᐅᑦᑍᔪᓄᓪᓗ ᐅᖃᕐᐳᑦ, “ᐊᖑᑦ ᑖᓐᓇ ᑐᖁᑕᐅᔪᒃᓴᐅᓐᖏᓚᖅ ᐅᖃᐅᓯᖃᕐᒪᑦ ᐊᑕᓂᐅᑉ ᒎᑎᑦᑕ ᐊᑎᖓᓂ.”
17ᓄᓇᓖᓪᓕ ᐊᖓᔪᖅᑳᖏᑕ ᐃᓚᖏᑦ ᓂᑯᕕᓪᓗᑎᒃ ᑲᑎᒪᔪᓄᑦ ᐅᖃᕐᐳᑦ, 18#ᒤᑲ 3:12.“ᕼᐃᓯᑬᐊ ᐊᖓᔪᖅᑳᕐᔪᐊᖑᑎᓪᓗᒍ ᔫᑕᒥᐅᓄᑦ, ᒤᑲ ᒧᕆᓯᑎᒥᐅᖅ ᓇᓚᐅᑦᑍᓚᐅᕐᐳᖅ ᐅᖃᕐᓗᓂᓗ, ‘ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ,
ᓮᐅᓂ ᐱᕈᕐᓰᕕᒃᑎᑐᑦ ᐋᖅᑭᒃᓱᕐᑕᐅᔪᒫᕐᐳᖅ;
ᔨᕉᓴᓕᒻᓗ ᐅᔭᕋᓛᖑᓂᕐᑎᑐᑦ ᖃᑦᑎᒃᓯᓯᒪᓗᓂ,
ᑐᒃᓯᐊᕐᕕᒡᔪᐊᓪᓗ ᐃᓂᒋᔭᖓ ᐃᕕᒃᓱᒐᕐᓄᑦ
ᐱᕈᕐᕕᐅᓯᒪᓗᓂ ᓂᐊᖁᑦᑕᕕᓂᑐᐃᓐᓇᐅᓕᕈᒫᕐᐳᖅ.’
19ᕼᐃᓯᑬᐊᐅᑉ ᔫᑕᒥᐅᑦ ᐊᖓᔪᖅᑳᕐᔪᐊᖓᑕ ᐊᓯᐊᑕᓘᓐᓃᑦ ᔫᑕᒥᐅᑕᐅᔪᑦ ᒤᑲ ᑍᒤᓕᐅᕐᓂᖓᓄᑦ ᑐᖁᑕᐅᓚᐅᓐᖏᓚᖅ, ᑭᓯᐊᓂᓕ ᕼᐃᓯᑬᐊ ᐊᑕᓂᕐᒥᒃ ᐃᒃᐱᒍᓱᑦᓯᐊᓚᐅᕐᐳᖅ ᐊᑲᐅᒋᔭᖓᓂᒡᓗ ᐱᓇᓱᐊᕋᓱᐊᕐᓗᓂ, ᐊᑕᓂᐅᓪᓗ ᐃᓱᒪᒋᓚᐅᕐᑕᓂ ᓴᖑᑎᓚᐅᕐᐹ ᐊᓯᕈᐃᔪᓐᓃᕐᓗᓂ ᐊᓯᕈᕐᓂᐊᕐᓂᕋᓚᐅᕐᑕᕋᓗᐊᒥᓂᒃ, ᐅᕙᒍᓪᓕ ᑲᑉᐱᐊᓲᑎᒃᓴᒥᒃ ᐊᖏᔪᒥᒃ ᐋᖅᑭᒃᓲᑎᓕᕐᐳᒍᑦ ᓇᖕᒥᓂᖅ!”
20(ᐊᖑᑎᑕᖃᓚᐅᕆᕗᖅ ᔪᕅᐊᒥᒃ ᐊᑎᓕᖕᒥᒃ ᓯᒤᐊᐅᑉ ᐃᕐᓂᖓᓂᒃ ᑭᕆᐊᑦ-ᔨᕆᒥᐅᑕᕐᒥᒃ, ᑖᓐᓇᓗ ᐊᑕᓂᐅᑉ ᐊᑎᖓᓂ ᐅᖃᓚᐅᕐᓯᒪᒋᕗᖅ, ᐊᓯᕈᕐᑕᐅᓂᐊᕐᓂᕅᓪᓗᓂ ᐃᒡᓗᒐᓴᒡᔪᐊᓂᒃ ᐃᓅᖃᑎᒌᒡᔪᐊᓂᒡᓗ ᔨᕆᒤᐊᐅᑉ ᐅᖃᐅᓯᕆᔭᖓᑐᑦᑕᐅᖅ. 21ᐊᖓᔪᖅᑳᕐᔪᐊᑉ ᔨᕼᐅᐃᐊᑭᒻ ᐅᓇᑕᕐᑎᖁᑎᖏᑕ ᐊᖓᔪᖅᑳᖁᑎᖏᑕᓗ ᑕᒪᓐᓇ ᑐᓴᕋᒥᑦᔪᒃ ᔪᕅᐊᐅᑉ ᐅᖃᐅᓯᖏᑦ, ᐊᖓᔪᖅᑳᕐᔪᐊᑉ ᑐᖁᑕᐅᑎᓐᓇᓱᐊᓚᐅᕐᐹ, ᔪᕅᐊᓕ ᑐᖁᑕᐅᓇᓱᐊᕐᓂᕐᒥᓂᒃ ᑐᓴᕋᒥ ᑲᑉᐱᐊᓱᒡᓗᓂ ᕿᒫᓚᐅᕐᐳᖅ ᐄᑦᔨᑉᑎᒧᑦ. 22ᑭᖑᕐᖓᒍᑦ ᐊᖓᔪᖅᑳᕐᔪᐊᖅ ᔨᕼᐅᐃᐊᑭᒻ ᐄᑦᔨᑉᑎᒧᑦ ᑎᓕᓯᕗᖅ ᐃᐅᓪᓇᓴᓐᒥᒃ ᐂᒃᐹᕆᐅᑉ ᐃᕐᓂᖓᓂᒃ ᐃᓚᖃᕐᓗᑎᒃ ᐊᖑᑎᓂᒃ. 23ᔪᕅᐊᓗ ᑎᒍᕚᑦ ᐄᑦᔨᑉᑎᒥᑦ ᐅᑎᐅᑎᓪᓗᒍᓗ ᐊᖓᔪᖅᑳᕐᔪᐊᒧᑦ ᔨᕼᐅᐃᐊᑭᒧᑦ, ᑖᑦᓱᒪᓗ ᑐᖁᑕᐅᑎᑉᐹ, ᑎᒥᖓᓗ ᐃᓗᕕᕐᑕᐅᑎᓪᓗᒍ ᐃᓄᑐᐃᓐᓇᕐᓄᑦ ᐃᓗᕕᕐᓯᕕᖕᒧᑦ.)
24ᑭᓯᐊᓂᓕ ᐊᕼᐂᑲᒻ ᓴᕙᓂᐅᑉ ᐃᕐᓂᖓᑕ ᔨᕆᒤᐊ ᐃᑲᔪᕐᑐᕐᒪᒍ ᐃᓄᖕᓄᑦ ᑐᖁᑕᐅᓚᐅᓐᖏᓚᖅ.
Currently Selected:
ᔨᕆᒤᐊᐅᑉ ᐊᒡᓚᖏᑦ 26: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
