ᔨᕆᒤᐊᐅᑉ ᐊᒡᓚᖏᑦ 25
25
ᐊᑭᕋᕐᑐᕐᑏᑦ ᑎᑭᓐᓂᖏᑦ ᐅᓐᓄᐊᓪᓗᐊᑉ ᓇᓛᓂᑦ
1 #
ᐊᑕᓃᑦ ᐂᑉᐸᖏᑦ 24:1; ᑯᕉᓂᑲ ᐂᑉᐸᖏᑦ 36:5-7; ᑖᓂᐊᓕ 1:1,2. ᐊᑕᓂᐅᑉ ᐅᖃᕐᕕᒋᕚ ᔨᕆᒤᐊ ᔫᑕᒥᐅᓕᒫᑦ ᐱᑦᔪᑎᒋᓪᓗᒋᑦ, ᐊᕐᕌᒍᐃᑦ ᔨᕼᐅᐃᐊᑭᒻ ᔫᓮᐊᐅᑉ ᐃᕐᓂᖓᑕ ᐊᖓᔪᖅᑳᕐᔪᐊᕆᔭᐅᓂᖓᑕ ᔫᑕᒥ ᓯᑕᒪᒋᓕᕐᑕᖓᓂ, ᓂᐱᑯᓁᓴ ᐊᕐᕌᒍᓕᒫᒥᒃ ᐊᖓᔪᖅᑳᕐᔪᐊᕆᔭᐅᓕᕐᑎᓪᓗᒍ ᐹᐱᓘᓂᒥᐅᓄᑦ. 2ᔨᕆᒤᐊ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐅᖃᓪᓚᓚᐅᕐᐳᖅ ᔫᑕᒥᐅᓕᒫᓄᑦ ᔨᕉᓴᓕᒦᑦᑐᓕᒫᓄᓪᓗ: 3“ᐊᕐᕌᒍᓂᒃ 23ᓂᒃ, ᔫᓮᐊᐅᑉ ᐋᒪᓐ ᐃᕐᓂᖓᑕ ᐊᖓᔪᖅᑳᕐᔪᐊᖑᓂᖓᑕ 13ᒋᓕᕐᑕᖓᓐᓂᑦ ᐱᒋᐊᕐᓗᒍ ᐅᓪᓗᒥᒧᑦ ᑎᑭᓪᓗᒍ ᐊᑕᓂᐅᑉ ᐅᖃᕐᑕᖏᓐᓂᒃ ᐅᕙᓐᓄᑦ ᐅᖃᕐᕕᒋᖃᑦᑕᕐᓯᒪᕙᑦᓯ ᐅᓄᕐᑐᐃᓱᕐᓗᖓ, ᓈᓚᓚᐅᕐᓯᒪᓐᖏᓚᓯᓕ. 4ᐊᑕᓂᐅᓪᓗ ᐱᔪᖃᓛᕐᑐᒥᒃ ᐅᖃᕐᑎᒥᓂᒃ ᑎᓕᓯᕕᒋᖃᑦᑕᓚᐅᕐᐹᓯ ᐅᓄᕐᑐᐃᕐᓱᕐᓗᓂ, ᑐᓴᕈᓐᓇᓚᐅᓐᖏᓚᓯᓕ ᓈᓚᓚᐅᕐᓇᒋᓪᓗ. 5ᐅᖃᖃᑦᑕᓚᐅᕐᐳᓪᓗ, ‘ᓵᒋᐊᓕᕆᑦᓯ, ᑕᒪᑦᓯ ᐊᑐᓂᑦ, ᐱᐅᖏᑦᑐᓕᓂᑦᓯᓐᓂᑦ ᐱᓂᐊᕐᓂᕆᔭᑦᓯᓐᓂᓪᓗ ᓈᒻᒪᖏᑦᑐᓂᑦ ᓄᓇᖃᑯᑖᒍᓐᓇᕐᓂᐊᕋᑦᓯ ᐊᑕᓂᐅᑉ ᓄᓇᑖᕆᔭᐅᑎᓯᒪᔭᖓᓂᒃ ᐃᓕᑦᓯᓐᓄᑦ ᓯᕗᓕᑦᓯᓐᓄᓪᓗ ᑍᑦᓱᒪᓂᐊᓗᖕᒥᑦ ᐃᓱᖃᖏᑦᑐᒧᑦ. 6ᒎᑎᓐᖑᐊᓄᑦ ᓴᖑᕕᖃᕐᑍᓕᓗᓯ ᑭᒡᒐᕐᑐᕈᒪᓗᒋᑦ ᑐᒃᓯᐊᕐᕕᒋᖃᑦᑕᕈᒪᓗᒋᓪᓘᓐᓃᑦ, ᓂᓐᖓᒃᓴᕐᑍᓕᓯᓐᖓ ᓴᓇᔭᕕᓂᑦᓯᓐᓄᑦ ᑕᕝᕙ ᐊᓯᕈᕐᑕᐅᓇᕐᑐᒧᑦ ᓱᒋᐊᕐᓂᐊᓐᖏᓚᑦᓯ.’ 7ᑭᓯᐊᓂᓕ ᓈᓚᒍᒪᓚᐅᓐᖏᓚᓯ ᐊᑕᓂᖅ ᐅᖃᕐᐳᖅ, ‘ᐊᑲᐅᒋᓐᖏᑕᓐᓂᒃ ᐱᓂᐊᕐᓯᒪᕗᓯ ᓴᓇᔭᑦᓯᒍᑦ ᐊᓯᕈᕐᑕᐅᓇᕐᑐᒧᓪᓗ ᐃᓕᑦᓯᓐᓂᒃ ᑎᑭᑎᓯᒪᕗᓯ.’
8“ᑍᒤᒻᒪᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᒫᒃ ᐅᖃᕐᐳᖅ, ‘ᓈᓚᓚᐅᖏᓐᓂᓯ ᐅᖃᐅᓯᕐᓂᒃ ᐱᑦᔪᑎᒋᓪᓗᒍ. 9ᑕᑯᒋᑦ, ᐅᓐᓄᐊᓪᓗᐊᑉ ᓇᓛᓃᑦᑐᑦ ᐃᓄᓕᒫᖏᓐᓂᒃ ᑎᓕᓯᓂᐊᕐᐳᖓ, ᑭᒡᒐᓐᓂᒡᓗ ᓂᐱᑯᓁᓴᒥᒃ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓂᒃ, ᐊᑕᓂᖅ ᐅᖃᕐᐳᖅ, ᐅᓇᑕᕆᐊᕐᑎᓐᓂᐊᕐᐸᒃᑲᓗ ᓄᓇᒧᑦ ᑕᒪᐅᖓ ᐃᓅᖃᑎᒌᒡᔪᐊᓄᑦ, ᓄᓇᓕᐅᖃᑎᒋᔭᓕᒫᓯᓗ ᐊᓯᕈᕐᑕᐅᑎᓐᓂᐊᕐᐸᒃᑲ ᑲᑉᐱᐊᓲᑎᒃᓴᓐᖑᕐᑎᓪᓗᒋᓪᓗ ᐋᖅᑭᒃᑕᐅᒃᑲᓐᓂᕐᓂᐊᕈᓐᓃᕐᑐᒥᒃ ᓄᓇᓕᕕᓂᑐᐃᓐᓇᐅᓕᕐᑎᓐᓂᐊᕐᐸᕋ. 10#ᔨᕆᒤᐊ 7:34; 16:9; ᑕᑯᑎ 18:22,23.ᖁᕕᐊᓱᒃᕙᓗᒃᑐᑦ ᑐᓴᕐᑕᐅᕙᒍᓐᓃᕈᒫᕐᐳᑦ, ᑲᑎᑎᑕᐅᕋᑖᕐᑐᑦ ᓄᓕᐊᓂᒃᑐᑦ ᐅᐃᓂᒃᑐᓪᓗ ᓂᐱᖏᑕ ᑲᑦᔮᕐᓇᕐᓂᖏᑦ ᐊᓯᐅᓗᑎᒃ, ᓯᖃᓪᓕᑦᓯᕖᓪᓗ ᓯᖃᓪᓕᑦᓯᕙᓪᓛᓂᖏᑦ ᓇᓂᕈᐊᓪᓗ ᖃᐅᒪᓂᓕᒫᖏᑦ ᐱᑕᖃᕈᓐᓃᕈᒫᕐᐳᑦ. 11#ᑯᕉᓂᑲ ᐂᑉᐸᖏᑦ 36:21; ᔨᕆᒤᐊ 29:10; ᑖᓂᐊᓕ 9:2.ᑕᒪᓐᓇ ᓄᓇᓕᒫᖅ ᓯᖁᑦᑎᕐᓯᒪᓕᕈᒫᕐᐳᖅ ᐊᑐᕐᑐᒃᓴᐅᔪᓐᓃᕐᓗᓂ, ᑖᒃᑯᐊᓗ ᐃᓅᖃᑎᒌᒡᔪᐊᑦ ᐊᐅᓚᑕᐅᓕᕈᒫᕐᐳᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐊᕐᕌᒍᓂᒃ 70ᓂᒃ. 12ᐊᕐᕌᒍᓪᓕ 70 ᓈᒃᐸᑕ, ᐊᑭᓂᐊᕕᒋᔪᒫᕐᐹᕋ ᐹᐱᓘᓂᐅᑉ ᐊᖓᔪᖅᑳᕐᔪᐊᖓ ᐃᓄᖁᑎᖏᓪᓗ ᑲᐅᓪᑎᐊᒥᐅᑦ, ᓄᓇᖓᓪᓗ ᐸᓯᔭᒃᓴᐅᓂᖏᑦ ᐱᑦᔪᑎᒋᓗᒋᑦ ᐊᑕᓂᖅ ᐅᖃᕐᐳᖅ, ᓱᓇᑕᖃᕈᓐᓃᕈᒫᕐᐳᕐᓗ ᐃᓱᖃᖏᑦᑐᒧᑦ. 13ᓇᓪᓕᐅᑎᑎᑦᓱᒫᕐᐸᒃᑲᓗ ᓄᓇᓕᖕᓄᑦ ᑖᒃᑯᓄᖓ ᓇᓪᓕᐅᑎᔪᒫᕐᓂᕋᒃᓗᒋᑦ ᐅᖃᕐᓯᒪᔭᒃᑲ ᐊᒡᓚᖕᓂ ᑖᒃᑯᓇᓂ ᑎᑎᕋᕐᑕᐅᓯᒪᔪᑦ ᔨᕆᒤᐊᐅᑉ ᐅᖃᕐᑎᒪ ᓇᓚᐅᑦᑍᑦᔪᑎᒋᓯᒪᔭᖏᑦ ᐃᓅᖃᑎᒌᒡᔪᐊᓕᒫᓄᑦ. 14ᑖᒃᑯᐊᑦᑕᐅᖅ ᐃᓅᖃᑎᒌᒡᔪᐊᓄᑦ ᐊᖓᔪᖅᑳᕐᔪᐊᓄᓪᓗ ᐱᔪᓐᓇᕐᑐᕐᔪᐊᓄᑦ ᑎᒍᔭᐅᔪᒫᕐᒥᖕᒪᑕ. ᐱᓂᐊᕐᓂᖏᑦ ᓴᓇᔭᖏᓪᓗ ᒪᓕᒡᓗᒋᑦ ᐊᑭᓂᐊᕐᕕᒋᔪᒫᕋᒃᑭᑦ.’”
ᒎᑎᐅᑉ ᐃᖅᑲᕐᑐᐃᓂᖓ ᐃᓅᖃᑎᒌᒡᔪᐊᓂᒃ
15ᐃᒫᒃ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᕙᓐᓄᑦ ᐅᖃᕐᐳᖅ, “ᖃᓪᓗᑎ ᐊᒡᒐᖕᓃᑦᑐᖅ ᓂᓐᖓᕕᒡᔪᐊᕐᓯᒪᓂᓐᓂᒃ ᐃᒪᖃᕐᑐᖅ ᑎᒍᓗᒍ ᑎᓕᓯᕕᒋᔭᓕᒫᓐᓄᑦ ᐃᓅᖃᑎᒌᒡᔪᐊᓄᑦ ᐃᒥᕐᑕᐅᑎᑦᔪᒃ. 16ᐃᒥᕈᓂᑦᔪᒃ ᓄᑭᖃᑦᓯᐊᕈᓐᓃᕐᓂᐊᕐᐳᑦ ᑐᑮᕈᑎᓗᑎᒡᓗ ᐅᓇᑕᕐᑕᐅᑎᓐᓂᐊᕋᑭᑦ.”
17ᖃᓪᓗᑎᓗ ᑎᒍᓪᓗᒍ ᐊᑕᓂᐅᑉ ᐊᒡᒐᖏᓐᓂᑦ, ᐃᓅᖃᑎᒌᒡᔪᐊᓄᑦ ᑎᓕᓯᕕᒋᔭᖏᓐᓄᑦ ᐃᒥᕐᑕᐅᑎᓚᐅᕐᐸᕋ. 18ᔨᕉᓴᓕᒧᑦ ᔫᑕᐅᓪᓗ ᓄᓇᓕᖏᓐᓄᑦ ᐊᖓᔪᖅᑳᕐᔪᐊᖏᓐᓄᑦ ᐊᖓᔪᖅᑳᖁᑎᖏᓐᓄᓪᓗ ᐊᓯᕈᕈᑎᒃᓴᐅᖁᓪᓗᒍ ᑲᑉᐱᐊᒋᔭᐅᑦᔪᑎᒃᓴᐅᓕᖁᓪᓗᒍᓗ ᐱᐅᒋᔭᐅᖏᑦᔪᑎᒃᓴᓐᖑᖁᓪᓗᒍᓗ ᐅᓪᓗᒥᒧᑦ ᑍᒤᒻᒪᑕ.
19ᐅᑯᐊ ᑕᕝᕙ ᓇᓗᓁᕐᓯᒪᔪᑦ ᑕᕝᕙᓐᖓᑦ ᐃᒥᐅᑎᒥᑦ ᐃᒥᕆᐊᖃᕐᑐᑦ:
ᐰᕉ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦ,
ᑲᒪᔨᖁᑎᖏᓪᓗ ᐊᖓᔪᖅᑳᖁᑎᖏᓪᓗ, ᐃᓄᖁᑎᖏᓪᓗ.
20ᓄᓇᓕᑐᖃᐅᖏᑦᑐᓪᓗ ᑍᑲᓃᑦᑐᑦ;
ᐊᖓᔪᖅᑳᕐᔪᐊᓕᒫᓪᓗ ᓄᓇᒥ ᐅᔾᒥ;
ᐊᖓᔪᖅᑳᕐᔪᐊᓕᒫᑦ ᐱᓕᔅᑍᓂᒥ ᐅᑯᓇᓂ,
(ᐊᓯᑭᓗᓂᒥ, ᒑᓴᒥ, ᐃᑯᕋᓂ, ᐃᓄᐃᓪᓗ ᐊᒥᐊᒃᑰᓯᒪᔪᑦ ᐋᔅᑖᑦᒥ.)
21ᐄᑐᒥᐅᑦ, ᒧᐊᐱᒥᐅᑦ, ᐋᒪᒥᐅᓪᓗ.
22ᐊᖓᔪᖅᑳᕐᔪᐊᕆᔭᐅᔪᓕᒫᑦ ᑍᕆᒥ, ᓮᑐᓂᒥᓗ,
ᐊᖓᔪᖅᑳᕐᔪᐊᓕᒫᑦ ᑕᕆᐅᕌᓗᑉ ᓯᒃᔭᖓᓃᑦᑐᓂ.
23ᑎᑖᓂᒥᐅᑦ, ᑏᒪᒥᐅᑦ, ᐳᔾᒥᐅᓪᓗ
ᑖᒃᑯᐊᓗ ᐅᖓᓯᒋᔭᖓᓂ ᓄᓇᖃᐅᕐᑐᑦ.
24ᐊᕋᐱᐊᒥᐅᓪᓗ ᐊᖓᔪᖅᑳᕐᔪᐊᓕᒫᖏᑦ,
ᓱᓇᖃᔪᐃᑦᑐᒥᓗ ᓄᓇᖃᕐᑐᑦ ᐊᖓᔪᖅᑳᕐᔪᐊᖏᑦ.
25ᔨᒻᕆᒥᐅᑦ ᐊᖓᔪᖅᑳᕐᔪᐊᓕᒫᖏᑦ, ᐃᓛᒥᐅᓪᓗ ᒥᑎᐊᒥᐅᓪᓗ.
26ᐅᓐᓄᐊᓪᓗᐊᓪᓗ ᓇᓛᓂᑦᑐᑦ ᐊᖓᔪᖅᑳᕐᔪᐊᓕᒫᖏᑦ,
ᖃᓂᑦᑐᒦᑦᑐᑦ ᐅᖓᓯᒃᑐᒦᑦᑐᓪᓗ.
ᓄᓇᕐᔪᐊᕐᒥᐅᓕᒫᑦ ᐊᖓᔪᖅᑲᐅᕕᒃᔪᐊᖏᑦ ᑖᒃᑯᐊᓕᒫᑦ, ᓯᓵᒃᒥᐅᑦ ᐊᖓᔪᖅᑳᕐᔪᐊᖓᑦ ᐃᓚᒋᔭᐅᓗᓂ ᑖᑦᓱᒥᖓ ᐃᒥᕐᑐᒃᓴᐅᕗᑦ.
27ᐅᖃᐅᑎᓪᓗᒋᓪᓗ, “ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐃᒥᓕᕆᑦᓯ ᐋᖓᔮᕐᓗᓯ ᒥᕆᐊᖃᑦᑕᕐᓗᓯᓗ, ᐅᕐᕈᓗᓯᓗ ᒪᑭᒃᑲᓐᓂᕐᓂᐊᕈᓐᓃᕐᓗᓯ ᐃᓕᑦᓯᓐᓂᒃ ᑐᖁᕅᔭᕐᑐᕐᑐᓂᒃ ᑎᑭᑎᑦᓯᓂᐊᕋᒪ. 28ᖃᓪᓗᑎᒥᑦ ᑎᒍᒥᐊᕐᑕᓐᓂᒃ ᐃᒥᕈᒪᖏᑉᐸᑕ, ᐅᖃᐅᑎᔭᒃᓴᕆᕙᑎᑦ, ‘ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᑕᕝᕙᓐᖓᑦ ᐃᒥᕐᑐᒃᓴᐅᕗᓯ. 29ᑕᑯᓕᕆᑦᓯ, ᐃᒡᓗᒐᓴᒡᔪᐊᖁᑎᒪ ᐊᓯᕈᕐᑕᐅᑦᔪᑎᒃᓴᖓᓂᒃ ᑎᑭᑎᑦᓯᕙᓪᓕᐊᓕᕐᐳᖓ, ᓱᒋᐊᕐᑕᐅᓂᐊᕋᓱᒋᖏᑉᐱᓰ? ᓱᒋᐊᕐᑕᐅᖏᑦᑑᓂᐊᓐᖏᓚᓯ, ᑐᖁᕋᕐᑕᐅᑦᔪᑎᒃᓴᓯᓐᓂᒃ ᑎᑭᑎᑦᓯᓂᐊᕋᒪ ᐃᓅᔪᓕᒫᓄᑦ ᓄᓇᒥ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.’
30“ᐅᖃᐅᓯᕆᔭᐅᖁᔭᓐᓂᒃ ᐅᖃᐅᓯᖃᕆᐊᕐᑐᓕᕆᑦ ᐅᖃᐅᑎᓗᒋᓪᓗ,
‘ᐊᑕᓂᖅ ᓂᓪᓕᐊᓕᕐᐳᖅ ᖁᑦᓯᒃᑐᒥᑦ,
ᐃᓂᒋᔭᒥᓂᑦ ᐃᑦᔪᕐᓁᑦᑐᒥᑦ ᓂᐱᖓ ᑐᓴᕐᓴᐅᕗᖅ,
ᓂᐱᕐᔪᐊᒧᓪᓗ ᓱᐊᖕᓂᐊᕐᐳᖅ ᓄᓇᖃᕐᑐᓄᑦ ᑕᒫᓂ,
ᕾᒐᓛᕐᓂᐊᕐᐳᖅ ᐸᐅᕐᖓᓂᒃ ᐃᑦᓰᔧᕝᕕᖕᒦᑦᑐᑎᑐᑦ
ᓄᓇᕐᔪᐊᒥ ᐃᓂᖃᕐᑐᓕᒫᑦ ᐊᑭᕋᕐᑐᕐᓗᒋᑦ.
31ᓂᐱᕐᔪᐊᕐᓗ ᑐᓴᕐᑕᐅᔪᒪᕐᐳᖅ
ᓄᓇᐅᑉ ᑭᒡᓕᖓᓃᑦᑐᑦ ᑎᑭᓪᓗᒋᑦ
ᐊᑕᓂᐅᑉ ᓈᒻᒪᒃᓴᖏᓐᓂᕐᒥᓂᒃ ᐃᓅᖃᑎᒌᒡᔪᐊᓕᒫᓄᑦ ᓴᖅᑭᑎᓐᓂᐊᕐᐹ
ᐃᖅᑲᕐᑐᐃᓂᖓᓗ ᐃᓅᖃᑎᒌᓄᑦ ᓄᓇᕐᔪᐊᒥ ᑎᑭᐅᒪᓂᐊᕐᒪᑦ,
ᐱᐅᖏᑦᑐᓕᔪᓪᓗ ᑐᖁᑕᐅᑎᓐᓂᐊᕐᒪᒋᑦ, ᐊᑕᓂᖅ ᐅᖃᕐᐳᖅ.’”
32ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, “ᑕᑯᒋᑦ ᐊᓯᕈᕐᑕᐅᓂᖅ ᓯᐊᒻᒪᕐᐸᓪᓕᐊᓕᕐᐳᖅ, ᐃᓅᖃᑎᒌᒡᔪᐊᓂᑦ ᐃᓅᖃᑎᒌᒡᔪᐊᓄᑦ, ᐊᓄᕆᕐᔪᐊᖅ ᓴᖅᑭᓕᕐᐳᖅ ᓯᓚᕐᔪᐊᑉ ᑭᒡᓕᖓᓂᑦ. 33ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐊᑕᓂᕐᒧᑦ ᑐᖁᕋᕐᑕᐅᔪᕕᓃᑦ ᓇᓂᑐᐃᓐᓇᖅ ᑕᑯᔭᒃᓴᐅᔪᒫᕐᐳᑦ, ᓄᓇᕐᔪᐊᑉ ᑭᒡᓕᖓᓂᑦ ᑭᒡᓕᖓᓄᑦ. ᐅᒡᒍᐊᕈᑕᐅᔪᒫᓐᖏᓚᑦ ᑲᑎᕐᓱᕐᑕᐅᔪᓐᓇᖏᓪᓗᑎᒃ, ᐃᓗᕕᕐᑕᐅᔪᓐᓇᖏᓪᓗᑎᒡᓗ, ᐊᓇᕐᑎᑐᓪᓕ ᑕᒫᓃᕐᕆᑐᐃᓐᓇᕈᒫᕐᐳᑦ ᒪᓂᖅᑲᒥ.
34“ᖁᕝᕕᐅᕆᑦᓯ ᕿᐊᓗᓯᓗ, ᐃᓕᑦᓯ ᐰᕐᓯᔨᒋᔭᐅᔪᓯ, ᐊᒃᓴᑳᖃᑦᑕᕐᓗᓯ ᐊᕐᔭᓕᓂᕐᓂ, ᐃᓕᑦᓯ ᓯᕗᓕᕐᑎᒋᔭᐅᔪᓯ ᐃᓄᖁᑎᓐᓄᑦ. ᑐᖁᕋᕐᑕᐅᕕᒃᓴᓯ ᓇᓪᓕᐅᑎᖕᒪᑦ, ᐅᕐᕈᔪᒫᕐᐳᓯ ᓯᖁᑦᑎᕐᓗᓯᓗ ᒪᕐᕋᐅᔭᕐᑎᑐᑦ. 35ᐰᕐᓯᔨᐅᔪᑦ ᕿᒫᕕᒃᓴᖃᕐᓂᐊᓐᖏᓚᑦ, ᓯᕗᓕᕐᑎᐅᔪᓪᓗ ᐃᓄᖕᓄᑦ ᐊᓐᓇᒡᕕᓴᖃᕐᓂᐊᓐᖏᓚᑦ. 36ᑐᓴᕐᓯᐅᒃ ᐰᕐᓯᔨᐅᔪᑦ ᕿᐊᕙᓗᖏᑦ, ᓯᕗᓕᕐᑎᐅᔪᓪᓗ ᕿᐊᖓᔭᒃᐸᓚᑦᓯᓂᖏᑦ! ᐊᑕᓂᐅᑉ ᓄᓇᓕᖁᑎᖏᑦ ᐊᓯᕈᕐᑎᒻᒪᒋᑦ. 37ᓇᑎᕐᓇᔮᓪᓗ ᐃᕕᒃᓱᒑᖃᐅᑦᓯᐊᕐᑐᑦ ᑭᓱᒃᓴᐅᔪᓐᓃᕐᑎᑕᐅᓯᒪᕗᑦ, ᐊᑕᓂᐅᑉ ᓂᓐᖓᕕᒡᔪᐊᕐᓯᒪᓂᕐᒥᓄᑦ ᐱᓇᓱᐊᕐᕕᒋᒪᒋᑦ. 38ᓔᔭᑎᑐᑦ ᐃᓂᓪᓚᖓᕕᖕᒥᓂᒃ ᕿᒤᔪᑎᑐᑦ; ᓄᓇᖓᑦ ᓱᓇᖃᕈᓐᓃᕈᒫᕐᐳᖅ. ᐅᓇᑕᕐᕕᐅᓯᒪᓂᕐᒥᓄᑦ, ᐅᓇᑕᕆᐊᕐᓯᒪᔪᓄᑦ, ᐊᑕᓂᐅᓪᓗ ᓂᓐᖓᕕᒡᔪᐊᕐᓯᒪᓂᖓᓄᑦ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 25: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
