ᔨᕆᒤᐊᐅᑉ ᐊᒡᓚᖏᑦ 22
22
ᔨᕆᒤᐊᐅᑉ ᐅᖃᐅᓯᖏᑦ ᔫᑕᐅᑉ ᐊᖓᔪᖅᑳᕐᔪᐊᖏᓐᓄᑦ
1ᐃᒫᒃ ᐊᑕᓂᖅ ᐅᖃᕐᐳᖅ, “ᔫᑕᐅᑉ ᐊᖓᔪᖅᑳᕐᔪᐊᖓᑦᑕ ᐃᒡᓗᖓᓄᐊᕐᓗᑎᑦ ᐅᑯᓂᖓ ᐅᖃᓪᓚᒡᕕᒋᒃᑭᑦ, 2ᐅᖃᕐᓗᑎᑦ, ‘ᐊᑕᓂᐅᑉ ᐅᖃᐅᓯᖏᑦ ᑐᓴᒃᑭᑦ, ᔫᑕᐅᑉ ᐊᖓᔪᖅᑳᕐᔪᐊᖓ ᑍᕕᑎᐅᑉ ᐊᖓᔪᖅᑳᕐᔪᐊᖑᓂᖓᓂ ᐊᖓᔪᖅᑳᖑᔪᑎᑦ, ᐊᖓᔪᖅᑳᖁᑎᑎᓪᓗ ᐃᓄᑯᑎᑎᓪᓗ ᑐᓴᖃᑎᒋᓗᒋᑦ ᐃᑎᖃᑦᑕᕐᑐᑦ ᐃᑎᕐᑕᕐᕕᒃᑯᑦ. 3ᐃᒫᒃ ᐊᑕᓂᖅ ᐅᖃᕐᐳᖅ: ᐊᑦᔨᒌᒃᑎᑦᓯᓂᕐᒥᒃ ᐃᓱᐊᕐᑐᓕᓂᕐᒥᒡᓗ ᐱᓇᓱᐊᕆᑦᓯ, ᓴᐳᑦᔨᓯᒪᓇᓱᐊᕐᐸᒡᓗᓯᓗ ᑎᒡᓕᒡᕕᐅᓯᒪᔪᓂᒃ; ᓄᓇᑦᓯᓐᓂᒥᐅᑕᐅᖏᑦᑐᓂᒡᓗ ᐱᑦᓯᐊᖃᑦᑕᕐᓗᓯ, ᐱᓂᕐᓗᐃᑦᑍᓕᒋᑦᓯ ᐊᑖᑕᖃᖏᑦᑐᓂᒃ ᐅᐃᒡᒐᕐᓂᕐᓂᒡᓗ, ᐸᓯᔭᒃᓴᐅᖏᑦᑐᓂᒡᓗ ᑐᖁᑕᐅᑎᑦᓯᕙᖏᓪᓗᓯ ᑕᒫᓂ ᓄᓇᑦᓯᓐᓂ. 4ᐱᖁᔭᒃᑲ ᑖᒃᑯᐊ ᒪᓕᑦᓯᐊᕈᑦᓯᐅᒃ, ᑕᕝᕙ ᑍᕕᑎᐅᑉ ᐊᖓᔪᖅᑳᕐᔪᐊᖑᓂᖓᓂ ᐃᒃᓯᕙᐅᑕᕐᔪᐊᖃᕐᑐᑦ, ᐊᖓᔪᖅᑳᖁᑎᖏᓪᓗ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖏᑎᒍᑦ ᐊᕙᒻᒧᒐᕈᒫᕐᐳᑦ ᕿᒧᒃᓯᐅᑎᒃᑯᑦ ᐊᒃᓴᓗᐊᓕᒃᑯᑦ ᕿᒻᒥᕐᔪᐊᒃᑯᓪᓗ, ᓯᐊᓛᖏᑦ ᐃᓄᖁᑎᖏᓪᓗ ᐃᓚᒋᓗᒋᑦ. 5#ᒫᑎᐅᓯ 23:28; ᓘᑲᓯ 13:35.ᓈᓚᖏᒃᑯᑦᓯᐅᒡᓕ ᑖᒃᑯᐊ, ᐅᖃᕕᒃᓗᓂ ᐃᒻᒥᓄᑦ ᐊᑕᓂᖅ ᐅᖃᕐᐳᖅ, ᐃᒡᓗᒐᓴᒡᔪᐊᑦ ᑖᒃᑯᐊ ᓱᓁᕈᑎᔪᒫᕐᐳᑦ ᓄᓇᓕᕕᓂᑐᐃᓐᓇᐅᓕᕐᓗᑎᒃ.
6“‘ᐃᒫᒃ ᐊᑕᓂᖅ ᐅᖃᕐᒪᑦ ᔫᑕᐅᑉ ᐊᖓᔪᖅᑳᕐᔪᐊᖓᑕ ᐃᒡᓗᖓᓃᑦᑐᓄᑦ: ᑕᑯᒥᓇᕋᓗᐊᕐᐳᑎᑦ ᒋᓕᐊᑎᐅᑉ ᓄᓇᖓᑎᑐᑦ, ᓕᐸᓇᓂᐅᓪᓗ ᖃᖅᑲᖏᑎᑐᑦ, ᓱᓇᖃᔪᐃᑦᑑᑉ ᓄᓇᖓᑐᑦ ᑍᒤᑦᑐᓐᖑᕐᑎᑦᓱᒫᕐᐸᑦᓯ, ᓄᓇᓕᖃᖏᑦᑐᑎᑐᑦ. 7ᐊᓯᕈᐃᔪᒃᓴᓂᒃ ᑎᑭᑎᑦᓯᔪᒫᕋᒪ ᐃᓕᑦᓯᓐᓄᑦ, ᐊᑐᓂᑦ ᐅᓇᑕᐅᑎᖃᑦᓯᐊᕐᑐᓂᒃ; ᑖᒃᑯᐊ ᐅᕐᕈᑎᑦᓯᔪᒫᕐᐳᑦ ᓱᑲᖁᑎᑦᓯᓐᓂᒃ ᓰᑕᕆᓂᒃ ᐱᐅᓂᕐᐹᓂᒃ, ᐃᑯᒪᒧᓪᓗ ᐃᑯᐊᓪᓚᒡᓗᒋᑦ.
8“‘ᐃᓅᖃᑎᒌᒡᔪᐊᓪᓗ ᐊᖅᑯᓵᓕᕈᑎᒃ ᐃᒡᓗᒐᓴᒡᔪᐊᓄᑦ, ᐃᓅᖃᑎᒥᖕᓄᑦ ᐅᖃᕐᐸᓕᕈᒫᕐᐳᑦ, “ᓱᖕᒪᑦ ᐊᑕᓂᐅᑉ ᐃᒡᓗᒐᓴᒡᔪᐊᑦ ᐱᔪᓐᓇᕐᓂᕐᐹᖑᔪᑦ ᑍᒤᓕᐅᓚᐅᕐᐰᑦ?” 9ᑭᐅᔭᐅᔪᒫᕐᐳᓪᓗ, “ᐊᑕᓂᐅᑉ ᒎᑎᒥᑕ ᐊᖏᖃᑎᒌᒍᑎᒋᓯᒪᔭᖓᓂᒃ ᕿᒤᓚᐅᕐᒪᑕ, ᑐᒃᓯᐊᕐᕕᖃᖔᓕᕐᓗᑎᒡᓗ ᐱᔨᑦᓯᖔᓕᕐᓗᑎᒃ ᒎᑎᓐᖑᐊᓂᒃ.”’”
ᔨᕆᒤᐊᐅᑉ ᐅᖃᐅᓯᖃᕐᓂᖓ ᔪᐊᕼᐊᔅᒥᒃ
10ᕿᐊᑦᔪᑎᒋᑦᑍᓕᓯᐅᒃ ᑐᖁᖓᔪᖅ, ᕿᒃᓴᐅᑎᒋᓇᒍᓗ,
ᕿᐊᑦᔪᑎᖃᖔᕐᑐᒃᓴᐅᕗᓯᓕ ᐊᐅᓪᓚᕈᑦᔭᐅᓯᒪᔪᓂᒃ,
ᐅᑎᕐᓂᐊᕈᓐᓁᕐᒪᑕ ᓄᓇᑐᖃᕐᒥᖕᓂᒃ ᑕᑯᓂᐊᕈᓐᓁᕐᒪᑕ.
11 #
ᐊᑕᓃᑦ ᐂᑉᐸᖏᑦ 23:31-34; ᑯᕉᓂᑲ ᐂᑉᐸᖏᑦ 36:1-4. ᐊᑕᓂᖅ ᐃᒫᒃ ᐅᖃᕐᐳᖅ ᓴᓗᒻᒧᑦ ᔫᓮᐊᐅᑉ ᐃᕐᓂᖓᓄᑦ ᔫᑕᐅᑉ ᐊᖓᔪᖅᑳᕐᔪᐊᖓᓄᑦ, “ᑖᓐᓇ ᐊᖓᔪᖅᑳᕐᔪᐊᓐᖑᕈᒫᕐᒪᑦ ᐊᑖᑕᖓᑕ ᐃᓂᖓᓂ, ᐃᓂᒃᓴᒥᓃᑦᓱᒫᓐᖏᓚᕐᓕ ᐊᐅᓪᕈᑦᔭᐅᔪᒫᕐᒪᑦ ᐅᑎᕈᒫᕋᓂᓗ. 12ᑐᖁᔪᒫᕐᒪᑦ ᑎᒍᔭᐅᓯᒪᕕᒋᔭᒥᓃᓪᓗᓂ, ᓄᓇᒥᒡᓗ ᑕᒪᑐᒥᖓ ᑕᑯᒃᑲᓐᓂᕈᓐᓇᕐᓯᔪᒫᓐᖏᓚᖅ.”
ᔨᕆᒤᐊᐅᑉ ᐅᖃᐅᑦᔨᓂᖓ ᔨᕼᐅᐃᐊᑭᒻ ᐱᑦᔪᑎᒋᓪᓗᒍ
13“ᑲᑉᐱᐊᓇᕐᑐᒦᑉᐳᖅ ᐃᓱᐊᕐᑐᓕᓂᒃᑰᖏᑦᑐᖅ ᐊᖓᔪᖅᑲᐅᕕᒃᑖᕐᑐᖅ,
ᓈᒻᒪᓈᕐᓯᒪᑦᓯᐊᕐᓂᕐᓗ ᐊᑐᕐᓇᒍ,
ᐃᒡᓗᓕᐅᕐᑐᕐᓗ ᖁᓕᕇᒥᒃ ᐃᒡᓗᕈᓯᖃᐅᕐᑐᒥᒃ;
ᐃᓅᖃᑎᒥᓂᒃ ᓴᓇᑎᑦᓯᓯᒪᔪᖅ ᐊᑭᖃᖏᑦᑐᒥᒃ,
ᐊᑭᓖᓚᐅᕋᓂᓗ ᓴᓇᑎᑕᒥᓂᒃ;
14ᐅᖃᕐᑐᖅ, ‘ᐊᑭᑐᔪᒃᓴᔭᒥᒃ ᐃᒡᓗᓕᐅᕈᒪᕗᖓ ᐃᒡᓗᒃᓴᓐᓂᒃ,
ᐃᒡᓗᐊᕈᓯᖃᕐᑐᒥᒃ ᓂᕈᑐᔪᓂᒃ ᖁᓕᕇᓂᒃ.’
ᐃᒐᓛᖏᑦ ᐊᖏᔫᑕᐅᑎᓪᓗᒋᑦ,
ᕿᔪᑦᓯᐊᕙᐅᓂᕐᐹᓂᒃ ᓰᑕᕆᓂᒃ ᑐᓐᖓᕕᖃᕐᑎᑉᐹ ᓴᐅᓂᖃᕐᑎᓪᓗᒍᓗ,
ᐊᐅᐸᕐᑐᒥᒡᓗ ᒥᖑᐊᕈᑎᖃᕐᑎᓪᓗᒍ.
15ᐊᖓᔪᖅᑳᕐᔪᐊᓐᖑᕈᓐᓇᕐᑐᕆᕖᑦ
ᕿᔪᑦᓯᐊᕙᐅᓂᕐᐹᓂᒃ ᓰᑕᕆᓂᒃ ᐊᑐᕐᓂᕐᓄᑦ?
ᐊᑖᑕᓯ ᐃᓅᓯᖃᑦᓯᐊᓚᐅᓐᖏᓛᑦ?
ᓂᕆᔭᒃᓴᖃᕐᓂᕐᒥᖕᓄᑦ ᓈᒻᒪᒋᓪᓗᒍ
ᐊᑐᖁᔭᐅᔪᕐᓗ ᐊᑐᕐᓗᒍ ᐃᓅᓚᐅᐳᑦ.
16ᐊᒃᓱᔪᓂᒃ ᐃᑲᔪᕐᑕᐅᔭᕆᐊᓕᖕᓂᒡᓗ ᓴᐳᑦᔨᓯᒪᓂᕐᓴᐅᓚᐅᕐᐳᑦ;
ᐱᓇᓱᐊᑦᓯᐊᕋᒥᒃ ᓈᒻᒪᑦᓯᐊᕐᑐᒥᒃ ᐃᓅᓚᐅᕐᐳᑦ.
ᐊᑕᓂᕐᒥᒃ ᖃᐅᔨᒪᓪᓗᓂ ᐃᓅᓯᖃᕐᓂᖅ
ᑍᒤᑦᑐᒥᒃ ᐱᑎᑦᓯᓐᖏᓛᖅ? ᐊᑕᓂᖅ ᐅᖃᕐᐳᖅ.
17ᑕᐅᑐᒃᑕᓯ ᐃᓱᒪᓯᓗ ᖃᑭᔪᒪᓃᓐᓇᕐᒥᒃ
ᐱᔪᒪᔭᑐᐊᖃᒧᑦ ᓯᓔᕐᕆᒃᓯᕐᓗᓯ ᖃᑭᕙᒃᐳᓯ,
ᐸᓯᔭᒃᓴᐅᖏᑦᑐᓂᒃ ᑐᖁᑎᑦᓯᕙᒃᓗᓯ,
ᐅᖁᒤᑦᑐᒦᑎᑦᓯᕙᒡᓗᓯᓗ ᐃᓄᖁᑎᑦᓯᓐᓂᒃ.”
18 #
ᐊᑕᓃᑦ ᐂᑉᐸᖏᑦ 23:36—24:6; ᑯᕉᓂᑲ ᐂᑉᐸᖏᑦ 36:5-7. ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ ᔨᕼᐅᐃᐊᑭᒻ ᐱᑦᔪᑎᒋᓪᓗᒍ ᔫᑕᒧᑦ ᐊᖓᔪᖅᑳᕐᔪᐊᖑᔪᖅ ᔫᓮᐊᐅᑉ ᐃᕐᓂᖓ,
“ᑐᖁᒃᐸᑦ ᕿᒃᓵᒍᑕᐅᔪᒫᓐᖏᓚᖅ
ᖃᑕᓐᖑᑎᖏᓐᓄᑦ ᓇᔭᖏᓐᓄᓪᓗ ᐅᒡᒍᐊᕐᓇᕋᔭᕋᓗᐊᕐᐳᖅ,
ᕿᐊᑦᔪᑕᐅᓐᖏᓚᕐᓕ,
ᐊᖓᔪᖅᑳᕐᔪᐊᖃᕐᑐᓄᑦ ᐅᒡᒍᐊᕐᓇᕋᓗᐊᕐᐳᖅ,
ᐊᖓᔪᖅᑳᕐᔪᐊᖑᓂᖓ ᐱᑦᔪᑎᒋᓪᓗᒍ.
19ᐃᓗᕕᕐᑕᐅᓂᖓ ᓯᐅᑎᖅᑯᕐᑐᔪᑎᑐᑦ ᐱᔭᐅᔪᒫᕐᐳᖅ,
ᐅᓂᐊᕐᑕᐅᓪᓗᓂ ᐃᒋᑕᐅᑐᐃᓐᓇᕐᓗᓂ ᒪᓂᖅᑲᒧᑦ
ᔨᕉᓴᓕᐅᑉ ᐃᑎᕐᑕᕐᕕᖏᑕ ᓯᓚᑖᓄᑦ.”
ᔨᕆᒤᐊᐅᑉ ᐅᖃᐅᓯᖃᕐᓂᖓ ᔨᕉᓴᓕᒥᒃ
20“ᒪᔪᕋᕆᑦ ᓕᐸᓇᓂᒧᑦ,
ᕾᒐᓛᕆᑦ ᐹᓴᓂᒥ, ᕾᒐᓛᕆᓪᓗ ᐊᐸᕅᒥ,
ᐃᑲᔪᕐᑎᒋᓂᐊᕋᓱᒋᓚᐅᕐᑕᑎᑦ ᓄᖑᑕᐅᖕᒪᑕ.
21ᐃᓂᕐᑎᕋᓱᓚᐅᕋᓗᐊᕐᐸᒋᑦ ᐊᔪᕐᓴᕐᓇᖏᑦᑐᒦᑎᓪᓗᑎᑦ,
ᓈᓚᑦᔮᖏᓐᓂᕋᓚᐅᕐᐳᑎᓪᓕ ᑕᒪᓐᓇᓗ ᐃᓕᖅᑯᓯᕇᓐᓇᕋᕕᐅᒃ
ᐃᓅᓱᒃᑑᓂᕐᓂᑦ ᐅᕙᓐᓂᒃ ᓈᓚᒍᓐᓇᓚᐅᖏᓐᓇᕕᑦ.
22ᐰᕐᓯᔨᖁᑎᓯ ᐊᓄᕆᒧᑦ ᑎᒃᑕᐅᕋᕐᓂᐊᕐᐳᑦ,
ᑕᐱᕆᕙᒃᑕᓯᓗ ᑎᒍᔭᐅᓗᑎᒃ ᐊᐅᓪᓚᕈᑦᔭᐅᔪᒫᕐᐳᑦ,
ᖁᕕᐊᓇᖏᑦᑐᒥᒃ ᑲᓐᖑᓇᕐᑐᒥᒡᓗ ᑕᕝᕙ ᐊᑐᕐᓂᐊᕐᐳᑎᑦ,
ᐱᐅᖏᑦᑐᓕᓂᓯ ᐱᑦᔪᑎᒋᓪᓗᒋᑦ.
23ᓕᐸᓇᓂᒥᐅᑕᐅᔪᓯ ᐃᒡᓗᖃᐅᑦᓯᐊᕐᑐᓯ
ᕿᔪᑦᓯᐊᕙᖕᓂᒃ ᓰᑕᕆᓂᑦ ᓴᓇᓯᒪᔪᓂᒃ,
ᐅᒡᒐᕐᓱᕈᒫᕐᐳᓯᓕ ᐋᓐᓂᐊᓇᕐᑐᒧᑦ
ᑎᑭᑕᐅᓕᕈᑦᓯ, ᐊᕐᓇᑐᑦ ᐃᕐᓂᓱᒃᑐᑎᑐᑦ.”
ᒎᑎᐅᑉ ᐃᖅᑲᕐᑐᐃᓂᖓ ᔨᕼᐅᐃᐊᑭᓐᒥᒃ
24 #
ᐊᑕᓃᑦ ᐂᑉᐸᖏᑦ 24:8-15; ᑯᕉᓂᑲ ᐂᑉᐸᖏᑦ 36:9,10. ᐊᑕᓂᖅ ᐅᖃᕐᐳᖅ, “ᒎᑎᐅᓪᓗᖓ ᐆᒪᒐᒪ, ᑯᓂᐊ#22:24 ᑯᓂᐊ ᑕᕝᕙ ᔨᕼᐅᐃᐊᑭᓐ ᔨᕼᐅᐃᐊᑭᐅᑉ ᐃᕐᓂᖓ, ᔫᑕᒥ ᐊᖓᔪᖅᑳᕐᔪᐊᖑᔪᖅ, ᑕᓕᕐᐱᓐᓂ ᓇᒡᒍᐊᕐᒥᒋᒐᓗᐊᕈᒃᑭᑦ#22:24 ᓇᒡᒍᐊᕐᒥᒃ ᐅᕝᕙᓗ ᕿᑎᕐᓯᕐᒥᒃ ᓱᓕ ᐲᕈᓐᓇᕐᐸᒋᑦ. 25ᐃᓕᖕᓂᒃ ᑐᖁᑦᓯᔪᒪᔪᓄᑦ ᐱᔭᐅᑎᑦᓱᒫᕐᐸᒋᑦ, ᑲᑉᐱᐊᒋᔭᕐᓄᑦ, ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐃᓄᖏᓐᓄᓪᓗ ᑲᐅᓪᑎᐊᒥᐅᓄᑦ. 26ᐊᓈᓁᓪᓗ ᐊᐅᓪᓚᕈᑦᔭᐅᑎᑦᓱᒫᕐᐸᑦᓯᒃ ᓄᓇᑦᓯ ᐊᓯᐊᓄᑦ, ᐃᓅᕕᒋᓚᐅᓐᖏᑕᕐᓄᑦ ᑕᒪᑦᓯᒡᓗ ᑖᕙᓂ ᑐᖁᔪᒫᕐᐳᓯᒃ. 27ᐅᑎᕈᓐᓇᕈᒫᓐᖏᓚᓯ ᓄᓇᒧᑦ ᐅᑎᕐᓯᕐᕕᒌᓐᓇᕐᑕᑦᓯᓐᓄᑦ.
28“ᑯᓂᐊ ᑖᓐᓇᐅᕚ ᓇᕐᕈᒋᔭᐅᔪᖅ, ᒪᕐᕋᐅᔭᖅ ᓯᖁᒥᓯᒪᔪᖅ, ᐃᒃᐱᒋᔭᐅᖏᑦᑐᖅ? ᓱᖕᒪᑦ ᕿᑐᕐᖓᓂ ᐃᓚᒋᓪᓗᒋᑦ ᐃᒋᑕᐅᔪᒃᓴᐅᕚᑦ ᓄᓇᒧᑦ ᖃᐅᔨᒪᓐᖏᑕᖓᓐᓄᑦ?
29ᓄᓇ, ᓄᓇ, ᓄᓈ!
ᐊᑕᓂᐅᑉ ᐅᖃᐅᓯᖓ ᑐᓴᕈᒃ!
30ᐊᑕᓂᖅ ᐃᒫᒃ ᐅᖃᕐᒪᑦ,
‘ᐊᖑᑦ ᑖᓐᓇ ᑎᑎᕋᕐᓯᒪᓂᐊᕐᐸᓯ ᕿᑐᕐᖏᓱᐃᑦᑑᓂᕋᕐᓗᒍ,
ᐱᔪᓐᓇᕐᓯᓐᓂᖏᑦᑐᖅ ᐃᓅᓪᓗᓂ,
ᑭᖑᕚᖏᑦ ᒪᑭᑦᑐᓐᓇᕐᓯᔪᖃᕈᒫᓐᖏᓚᑦ,
ᑍᕕᑎᐅᑉ ᐊᖓᔪᖅᑲᐅᓂᖓᑕ ᐃᒃᓯᕙᐅᑕᕐᔪᐊᖓᓂ
ᐊᖓᔪᖅᑳᕐᔪᐊᓐᖑᕐᑐᖃᕐᓂᐊᓐᖏᓚᑦ,
ᐊᐅᓚᑦᓯᔪᕐᑕᖃᕐᓂᐊᕋᓂᓗ ᔫᑕᒥ.’”
Currently Selected:
ᔨᕆᒤᐊᐅᑉ ᐊᒡᓚᖏᑦ 22: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
