ᔨᕆᒤᐊᐅᑉ ᐊᒡᓚᖏᑦ 23
23
ᓂᕆᐅᒋᔭᒃᓴᖃᕐᓂᖅ ᓯᕗᓂᒃᓴᒥ
1“ᑲᑉᐱᐊᓇᒦᒃ ᐰᕐᓯᔨᐅᔪᑦ ᓰᐱᓂᒃ ᐊᓯᕈᐃᔪᑦ ᓯᐊᒻᒪᕐᑎᑦᓯᔪᓪᓗ ᓇᑎᕐᓇᖁᑎᓐᓂ!” ᐊᑕᓂᖅ ᐅᖃᕐᐳᖅ. 2ᑍᒤᒻᒪᑦ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐃᒫᒃ ᐅᖃᕐᐳᖅ, ᐰᕐᓯᔨᐅᔪᓄᑦ ᐃᓄᖁᑎᓐᓂᒃ: “ᐃᓄᖁᑎᒃᑲ ᓯᐊᒻᒪᕐᑎᓐᓇᑦᓯᐅᒃ, ᐅᖓᓯᒃᓯᑎᓪᓗᒋᓪᓗ ᑲᒪᑦᓯᐊᖏᓐᓂᑦᓯᓐᓄᑦ. ᑕᑯᒋᑦ, ᓱᒋᐊᕐᑕᐅᑎᓐᓂᐊᕐᐸᑦᓯ ᐱᐅᖏᑦᑐᒥᒃ ᐱᓇᓱᐊᕐᓯᒪᓂᓯ ᐱᑦᔪᑎᒋᓗᒍ. ᐊᑕᓂᖅ ᐅᖃᕐᐳᖅ. 3ᐅᕙᖓ ᐃᓄᖁᑎᒪ ᐊᒥᐊᒃᑯᖏᑦ ᑲᑎᕐᓱᕈᒫᕐᐸᒃᑲ ᓇᒧᑐᐃᓐᓇᖅ ᐊᐅᓪᓚᕐᑎᑦᓯᕕᒋᓯᒪᓚᐅᕐᑕᓐᓂᑦ, ᐅᑎᕐᑎᓪᓗᒋᓪᓗ ᓇᑎᕐᓇᒧᑦ ᓄᓇᒋᔭᖓᓐᓄᑦ, ᕿᑐᕐᖏᐅᖁᓪᓗᒋᑦ ᐅᓄᕐᓯᕙᓪᓕᐊᓗᑎᒡᓗ. 4ᐰᕐᓯᔨᖃᕐᑎᓐᓂᐊᕐᐸᒃᑲᓗ ᑲᒪᔨᒃᓴᖏᓐᓂᒃ, ᓯᕘᕋᔪᓐᓃᖁᓪᓗᒋᑦ ᑲᑉᐱᐊᓇᕐᑐᒦᖁᓇᒋᓪᓗ ᐊᓯᐅᓯᒪᔪᖃᕈᓐᓃᕈᒫᕐᐳᓪᓗ, ᐊᑕᓂᖅ ᐅᖃᕐᐳᖅ.
5 #
ᔨᕆᒤᐊ 33:14-16. “ᑕᑯᒋᑦ, ᐅᓪᓗᑦ ᓇᓪᓕᐅᑎᔪᒫᕐᐳᑦ, ᐊᑕᓂᖅ ᐅᖃᕐᐳᖅ, ᒪᑭᑎᑦᓯᔪᒫᕋᒪ ᑍᕕᑎᐅᑉ ᑭᖑᕚᒋᓐᓂᑦ ᐃᓱᐊᕐᑐᓕᔪᒥᒃ, ᐊᖓᔪᖅᑳᕐᔪᐊᒃᓴᒥᒃ ᓯᓚᑐᓂᖃᕐᑐᒥᒃ, ᓄᓇᖁᑎᒥᓂ ᓈᒻᒪᓈᑦᓯᐊᕐᑐᒥᒃ ᐃᓱᐊᕐᑐᒥᒡᓗ ᐊᐅᓚᑦᓯᔪᒫᕐᑐᒥᒃ. 6ᑍᑦᓱᒪ ᐊᐅᓚᑦᓯᓂᖓᓂ ᔫᑕ ᐱᐅᓕᔭᐅᔪᒫᕐᐳᖅ, ᐃᓴᕆᐊᓕᒥᐅᓪᓗ ᐅᓇᑕᕐᑕᐅᓂᐊᕐᓂᕐᒥᒃ ᓯᕘᕋᖏᓪᓗᑎᒃ ᐃᓅᔪᒫᕐᐳᑦ, ᐊᑎᖃᕐᑎᑕᐅᔪᒫᕐᐳᕐᓗ: ‘ᐊᑕᓂᖅ ᐃᓱᐊᕐᓯᑦᔪᑎᒋᔭᕗᑦ.’
7“ᑍᒤᒻᒪᑦ ᑕᑯᒋᑦ, ᐅᓪᓗᐃᑦ ᓇᓪᓕᐅᑎᔪᒫᕐᐳᑦ, ᐊᑕᓂᖅ ᐅᖃᕐᐳᖅ, ᐃᓄᐃᑦ ᐅᖃᖃᑦᑕᕈᓐᓃᕈᒫᕐᓂᖓᑦ, ‘ᐊᑕᓂᖅ ᐆᒪᖕᒪᑦ, ᐊᐅᓪᓚᕐᑎᑦᓯᓚᐅᕐᑐᖅ ᐃᓴᕆᐊᓕᒥᐅᓂᒃ ᐄᑦᔨᑉᑎᒥᑦ.’ 8ᐅᖃᖔᖃᑦᑕᓕᕈᒫᕐᐳᓪᓕ ᐃᒫᒃ; ‘ᐊᑕᓂᖅ ᐆᒪᖕᒪᑦ, ᐊᐅᓪᓚᕐᑎᑦᓯᓚᐅᕐᑐᖅ ᓄᓇᒥᑦ ᐅᓐᓄᐊᓪᓗᐊᑉ ᓇᓛᓃᑦᑐᓂᑦ ᓄᓇᓂᓪᓗ ᐃᓄᖁᑎᒥᓂᒃ ᖁᔭᓈᕐᓯᕕᒋᓚᐅᕐᑕᒥᓂᑦ.’ ᑕᕝᕙ ᓄᓇᖃᓕᕈᒫᕐᐳᑦ ᓇᖕᒥᓂᖅ ᓄᓇᒥᖕᓂ.”
ᔨᕆᒤᐊᐅᑉ ᐅᖃᐅᓯᖃᕐᓂᖓ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᓐᓂᒃ
9ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑦ ᐱᓪᓗᒋᑦ: ᐆᒻᒪᑎᒐ ᐃᓗᓐᓂ ᓯᖁᒥᓯᒪᕗᖅ,
ᓴᐅᓂᒃᑲᓗ ᓴᔪᒡᐳᑦ; ᐋᖓᔮᕐᑐᑎᑐᑦ ᑍᒤᓕᕐᐳᖓ,
ᕔᓂᒥᒃ ᐃᒥᓗᐊᕐᑐᕕᓂᕐᑎᑐᑦ, ᐊᑕᓂᖅ ᐱᑦᔪᑎᒋᓪᓗᒍ
ᐅᖃᐅᓯᖏᓪᓗ ᐃᑦᔪᕐᓁᑦᑐᑦ ᐱᓪᓗᒋᑦ.
10ᓄᓇᓕᓕᒫᖅ ᓈᖕᒪᑦ ᐊᓯᓐᓂᐊᕐᑎᓂᒃ;
ᓇᕐᕈᓇᕐᓯᑎᑕᐅᓂᕐᒧᑦ ᓄᓇ ᕿᒃᓵᒃᐳᖅ,
ᓇᑎᕐᓁᓪᓗ ᐃᕕᒃᓱᒐᖏᑦ ᑐᖁᓕᕗᑦ,
ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑦ ᐱᐅᖏᑦᑐᓕᓂᕐᒥᒃ
ᐃᓅᓯᖃᓕᕐᒪᑕ ᐱᔪᓐᓇᕐᓂᑎᒡᓗ ᐊᑐᕐᓂᕐᓗᓕᕐᓗᒋᑦ.
11“ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑦ, ᑐᓂᕐᕈᓯᕐᑎᑦᓯᔩᓪᓗ ᒎᑎᖃᕈᓐᓃᕐᐳᑦ;
ᐃᒡᓗᓐᓂᓘᓐᓃᑦ ᐱᐅᖏᑦᑐᓕᓂᖏᑦ ᑕᑯᒃᓴᐅᓕᕐᐳᑦ,
ᐊᑕᓂᖅ ᐅᖃᕐᐳᖅ.
12ᑍᒤᒻᒪᑦ ᐊᖅᑯᑦ ᐊᑐᕐᑕᖓᑦ ᖁᐂᑦᑖᕐᓇᕐᓯᔪᒫᕐᐳᖅ ᑖᕐᑐᒥ,
ᐹᓪᓚᒍᒫᕐᐳᑦ ᑕᕝᕙᓂᓗ ᐃᔪᒃᑲᕐᓗᑎᒃ;
ᐊᓯᕈᕐᑕᐅᓇᕐᑐᒧᑦ ᑎᑭᑕᐅᑎᑦᓱᒫᕐᐸᒃᑲ
ᓱᒋᐊᕐᑕᐅᕕᒃᓴᖓᑦ ᓇᓪᓕᐅᑎᒃᐸᑦ.
ᐊᑕᓂᖅ ᐅᖃᕐᐳᖅ.
13ᓴᒥᐊᕆᐊᕐᒥᐅᓂᓗ ᒎᑎᒧᑦ ᐱᔪᖃᓛᕐᑐᒥᒃ ᐅᖃᕐᑎᒋᔭᐅᔪᓂᒃ
ᐱᐅᖏᑦᑐᕐᔪᐊᕌᓗᖕᒥᒃ ᑕᑯᓯᒪᕗᖓ:
ᐅᖃᓪᓚᖃᑦᑕᕐᒪᑕ ᐰᓕᒧᑦ ᐅᖃᕐᑎᑕᐅᓂᕋᕐᓗᑎᒃ
ᐃᓄᖁᑎᒃᑲᓗ ᑕᒻᒪᕐᑎᓯᒪᓕᕐᐰᑦ.
14 #
ᒨᓯᓯ ᓯᕗᓪᓖᑦ 18:20; ᐃᓯᑭᐊᓕ 16:49. ᔨᕉᓴᓕᒥᐅᓂᓗ ᒎᑎᒧᑦ ᐱᔪᖃᓛᕐᑐᒥᒃ ᐅᖃᕐᑎᐅᔪᓂᒃ
ᐱᐅᖏᓐᓂᕐᓴᓂᒃ ᑕᑯᓯᒪᕗᖓ,
ᐊᓯᓐᓂᐊᖃᑦᑕᕐᒪᑕ ᐃᓅᓯᖃᓕᕐᓗᑎᒡᓗ ᓱᓕᖏᑦᑐᒥᒃ;
ᐱᐅᖏᑦᑐᓕᔪᓂᒃ ᐃᑲᔪᕐᑐᐃᑐᐃᓐᓇᖃᑦᑕᓕᕐᐳᑦ,
ᐱᐅᖏᑦᑐᓕᓂᕐᒥᖕᓂᑦ ᓵᒋᐊᕐᑐᖃᕈᓐᓇᕈᓐᓃᕐᐳᖅ;
ᓱᑑᒪᒥᐅᓄᑦ ᐊᑦᔨᒋᔭᐅᑎᓕᕐᐸᒃᑲ,
ᐃᓄᖏᓪᓗ ᒍᒨᕋᒥᐅᑎᑐᑦ ᑍᒤᓕᕐᓗᑎᒃ.”
15ᑍᒤᒻᒪᑦ ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᑦ ᔨᕉᓴᓕᒦᑦᑐᑦ ᐱᓪᓗᒋᑦ:
“ᑕᑯᒋᑦ, ᓂᕆᑎᑦᓱᒫᕐᐸᒃᑲ ᓂᕿᒥᒃ ᖃᒃᑭᓐᓇᕐᑐᒥᒃ,
ᐃᒥᕐᑎᓪᓗᒋᓪᓗ ᐃᒪᕐᒥᒃ ᑐᖁᓐᓇᕐᑐᒥᒃ,
ᒎᑎᒧᑦ ᐱᔪᖃᓛᕐᑐᒥᒃ ᐅᖃᕐᑎᐅᔪᑦ ᔨᕉᓴᓕᒥ ᐱᒋᐊᕐᕕᐅᓪᓗᑎᒃ
ᐅᒃᐱᖏᓐᓂᖅ ᓯᐊᒻᒪᕐᐸᓪᓕᐊᓕᕐᒪᑦ ᓄᓇᓕᓕᒫᓄᑦ.”
16ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ: “ᓇᓚᐅᑦᑍᓂᕐᓗᒃᑐᑦ ᐅᖃᐅᓯᕆᔭᖏᑦ ᓈᓚᒃᑍᓕᓯᒋᒃ; ᓱᓕᖏᑦᑐᓂᒃ ᓂᕆᐅᒋᔭᒃᓴᕐᑖᕐᑎᖃᑦᑕᕐᒪᓯ ᐃᓱᒪᒋᔭᑐᐃᓐᓇᕐᒥᖕᓂᒡᓗ ᑕᑯᑎᑕᐅᓂᕋᕐᐸᒃᓗᑎᒃ ᐊᑕᓂᕐᒥᑦ ᐱᖏᑦᑐᓂᒃ. 17ᒎᑎᒥᒃ ᓇᕐᕈᒋᔭᓖᑦ ᐅᖃᐅᑎᖃᑦᑕᕐᒪᒋᑦ ᐃᒫᒃ, ‘ᐊᑕᓂᖅ ᐅᖃᕐᐳᖅ, ᖃᓄᐃᑕᐅᓇᕐᑐᒧᑦ ᑎᑭᑕᐅᑦᔮᓐᖏᓚᓯ’; ᐆᒻᒪᑎᒥ ᓯᑎᔫᓂᖏᓐᓂᒃ ᒪᓕᒃᑐᑦ ᐅᖃᕐᕕᒋᕙᒃᐰᑦ, ‘ᐊᓯᕈᕐᑕᐅᓇᕐᑐᒧᑦ ᑎᑭᑕᐅᔪᒫᓐᖏᓚᓯ.’”
18ᓇᓪᓕᐊᑕᓕ ᑖᒃᑯᐊ ᐊᑕᓂᖅ ᖃᐅᔨᒋᐊᕐᕕᒋᓚᐅᕐᓯᒪᕙᑦᔫᒃ, ᐅᖃᐅᓯᖏᓐᓂᒡᓘᓐᓃᑦ ᑐᓴᕋᓱᓚᐅᕐᓯᒪᕚᑦ? ᓈᓚᒃᑐᖃᕐᓯᒪᕚ ᐅᖃᐅᓯᖏᓐᓂᒡᓗ ᑐᓴᕐᑐᖃᕈᒪᓪᓗᓃ? 19ᑕᑯᒋᑦ, ᐊᑕᓂᐅᑉ ᓂᓐᖓᐅᒻᒪᓯᖓ ᐊᓄᕆᕐᔪᐊᑐᑦ ᑎᑭᑦᓱᒫᓕᕐᐳᖅ, ᐊᓄᕆᑎᑐᑦ ᕾᕙᒡᓗᓂ ᓄᓇᒧᑦ ᑎᑭᑦᑐᑎᑐᑦ; ᐱᐅᖏᑦᑐᓕᔪᑦ ᓂᐊᖁᖏᓐᓄᑦ ᑎᑭᑦᓱᒫᕐᐳᖅ. 20ᐊᑕᓂᐅᑉ ᓂᓐᖓᐅᒪᓂᖓ ᓴᖑᓂᐊᕈᓐᓃᕐᐳᖅ ᐱᔪᒪᔭᖓ ᐊᑑᑎᓚᐅᖏᓐᓂᖓᓂ, ᐅᓪᓗᐃᑦ ᑭᖑᓪᓕᖏᓐᓂ ᑐᑭᓯᑦᓯᐊᕈᒫᕐᐸᓯ ᑕᒪᓐᓇ.
21“ᐱᔪᖃᓛᕐᑐᒥᒃ ᐅᖃᕐᑎᐅᓂᕋᕐᑐᑦ ᑖᒃᑯᐊ ᑎᓕᓯᒪᓐᖏᓚᒃᑲ, ᐱᔪᒪᓂᕐᒥᓄᓪᓕ ᐅᖃᖃᑦᑕᕐᐳᑦ; ᐅᖃᕐᕕᒋᓚᐅᓐᖏᓚᒃᑲ, ᓱᓕᓕ ᐅᖃᓪᓚᖃᑦᑕᕐᐳᑦ. 22ᐅᕙᓐᓂᒃ ᖃᐅᔨᒋᐊᕐᕕᖃᓚᐅᕈᑎᒃ, ᐅᖃᐅᓯᕆᖁᔭᓐᓂᒃ ᐅᖃᕈᓐᓇᕋᔭᓚᐅᕐᐳᑦ ᐃᓄᖁᑎᓐᓄᑦ, ᐱᐅᖏᑦᑐᓕᓂᖏᓐᓂᓪᓗ ᓴᖑᑎᑦᓯᒐᔭᓚᐅᕐᐳᑦ, ᐃᓕᖅᑯᓯᕐᒥᖕᓂᓪᓗ ᐱᐅᖏᑦᑐᓂᑦ.
23“ᖃᓂᑦᑐᓄᑦ ᑭᓯᐊᓂ ᒎᑎᒋᔭᐅᓇᓱᒋᕕᓯᓐᖔ? ᐅᖓᓯᒃᑐᒥᐅᓄᓪᓗ ᒎᑎᒋᔭᐅᓇᖓ ᐊᑕᓂᖅ ᐅᖃᕐᐳᖅ. 24ᐃᓄᒃ ᐃᔨᕐᓯᒪᔪᓐᓇᕐᐹ ᖃᐅᔨᒪᓇᖏᑦᑐᒧᑦ ᑕᑯᔪᓐᓇᕐᓂᐊᓐᖏᑕᓐᓂᒃ? ᐊᑕᓂᖅ ᐅᖃᕐᐳᖅ. ᓇᓂᑐᐃᓐᓈᓐᖏᓚᖔ ᕿᓚᖕᒥ ᓄᓇᒥᓗ? ᐊᑕᓂᖅ ᐅᖃᕐᐳᖅ. 25ᑐᓵᖃᑦᑕᕐᐳᖓ ᐱᔪᖃᓛᕐᑐᒥᒃ ᐅᖃᕐᑎᐅᓂᕋᕐᑐᓂᒃ ᐅᕙᓐᓂᑦ ᓱᓕᓇᑎᒃ ᐅᖃᕐᑎᑕᐅᓂᕋᕐᑐᓂᒃ, ᐅᖃᕐᓗᑎᒃ, ‘ᓯᓐᓇᒃᑐᖅᑲᐅᒐᒪ, ᓯᓐᓇᒃᑐᖅᑲᐅᒐᒪ!’ 26ᖃᓄᖅ ᓯᕕᑐᑎᒋᔪᒥᒃ ᓴᒡᓗᖃᑦᑕᕐᓂᐊᕐᐹᑦ? ᐅᕙᓐᓄᑦ ᐱᔪᖃᓛᕐᑐᒥᒃ ᐅᖃᕐᑎᒋᔭᐅᓐᖑᐊᕐᓗᑎᒃ ᐅᖃᓪᓚᒃᐸᒃᑐᑦ, ᐆᒻᒪᑎᒥᒃᑎᒍᑦ ᓯᓔᕐᕆᔭᐅᓪᓗᑎᒃ ᐅᖃᓪᓚᖃᑦᑕᕐᐳᑦ. 27ᐃᓱᒪᖃᑦᑕᕐᒪᑕ ᓯᓐᓇᒃᑐᕆᔭᒥᖕᓂᒃ ᐅᓂᒃᑳᖃᑦᑕᕐᓂᕐᒥᖕᓄᑦ ᐃᓄᖁᑎᓐᓂᒃ ᐳᐃᒍᕐᑎᑦᓯᔪᓐᓇᕋᓱᒋᓪᓗᑎᒃ ᐅᕙᓐᓂᒃ, ᓯᕗᓕᕆᔭᓯᑦᑕᐅᖅ ᐅᕙᓐᓂᒃ ᐳᐃᒍᕐᑎᑕᐅᓚᐅᕐᒪᑕ ᐰᓕᒧᑦ ᑐᒃᓯᐊᖃᑦᑕᓕᕋᒥᒃ. 28ᐱᔪᖃᓛᕐᑐᒥᒃ ᐅᖃᕐᑎ ᓯᓐᓇᒃᑑᒪᓐᓂᕈᓂ ᓯᓐᓇᒃᑑᒪᒥᓂᒃ ᐅᓂᒃᑳᕐᓕ, ᐅᖃᐅᓯᓐᓂᒃᑕᐅᖅ ᐱᓯᒪᔪᖅ ᐅᖃᐅᓯᖃᕐᓕ ᑲᔪᓯᑦᓯᐊᕐᓗᓂ. ᓂᐊᖂᔭᒃᓴᖅ ᐊᑦᔨᖃᕈᓐᓇᕐᐹ ᐃᕕᒡᓱᒐᕐᒥᒃ? ᐊᑕᓂᖅ ᐅᖃᕐᐳᖅ. 29ᐅᖃᐅᓯᕋ ᐃᑯᒪᔪᑎᑐᑦ ᑍᒤᑦᑑᓐᖏᓛᖅ, ᐊᑕᓂᖅ ᐅᖃᕐᐳᖅ, ᑲᑦᔫᑎᔪᕐᔪᐊᑎᑐᓪᓗ ᐅᔭᖅᑲᒥᒃ ᓯᖁᑦᑎᕆᔪᓐᓇᕐᑐᑎᑐᑦ? 30ᑍᒤᒻᒪᑦ ᑕᑯᒋᑦ, ᐊᑕᓂᖅ ᐅᖃᕐᐳᖅ, ᐊᑭᕋᕐᑐᕐᐸᒃᑲ ᐱᔪᖃᓛᕐᑐᒥᒃ ᐅᖃᕐᑎᐅᓂᕋᕐᑐᑦ, ᐅᖃᐅᓯᒃᓴᕐᑖᖃᑦᑕᕐᑐᑦ ᐊᓯᒥᖕᓂᑦ ᐅᖃᐅᓯᕆᔭᐅᓂᕋᕐᓗᒋᓪᓗ ᐅᕙᓐᓄᑦ. 31ᑕᑯᒋᑦ, ᐊᑕᓂᖅ ᐅᖃᕐᐳᖅ, ᐊᑭᕋᕐᑐᕐᐸᒃᑲ ᐱᔪᖃᓛᕐᑐᒥᒃ ᐅᖃᕐᑎᐅᓂᕋᕐᑐᑦ, ᓇᖕᒥᓂᖅ ᐱᔪᓂᒃ ᐅᖃᕐᑍᓕᓐᖏᓗᐊᕐᑐᑦ ᐅᖃᕐᓗᑎᒃ, ‘ᐊᑕᓂᖅ ᐅᖃᕐᐳᖅ.’ 32ᑕᑯᒋᑦ, ᐊᑭᕋᕐᑐᕐᐸᒃᑲ ᐱᔪᖃᓛᕐᑐᒥᒃ ᐅᖃᕐᑎᐅᓂᕋᕐᑐᑦ ᓱᓕᖏᑦᑐᓂᒡᓗ ᓯᓐᓇᒃᑐᕐᓂᕋᖃᑦᑕᕐᑐᑦ, ᐊᑕᓂᖅ ᐅᖃᕐᐳᖅ, ᐅᖃᐅᓯᕐᒥᖕᓄᑦ ᐃᓄᖁᑎᒃᑲ ᑕᒻᒪᕐᑎᑉᐰᑦ ᓱᓕᖏᑦᑐᓂᒃ ᐅᖃᐅᓯᖃᕐᓂᕐᒥᖕᓄᑦ ᐱᐅᔪᕆᑦᔪᑎᒋᓪᓗᒋᓪᓗ, ᑎᓕᓯᒪᓐᖏᓚᒃᑲ ᐅᖃᖁᓗᒋᑦ; ᑍᒤᒻᒪᑦ ᐅᖃᓪᓚᖃᑦᑕᕐᓂᖏᑦ ᐃᓄᖁᑎᓐᓄᑦ ᐱᕚᓪᓕᕈᑕᐅᖏᑦᓯᐊᕐᐳᑦ, ᐊᑕᓂᖅ ᐅᖃᕐᐳᖅ.”
ᐊᑕᓂᐅᑉ ᐅᖁᒤᒋᔭᖏᑦ
33“ᐃᓄᐃᑦ, ᐅᖃᕐᑏᓪᓘᓐᓃᑦ, ᑐᓂᕐᕈᓯᕐᑎᑦᓯᔩᓪᓘᓐᓃᑦ ᐊᐱᕆᒃᐸᑕ, ‘ᐊᑕᓂᐅᑉ ᐅᖁᒤᒋᔭᖓ ᓱᓇᐅᕙ?’ ᐅᖃᐅᑎᔪᒫᕐᐸᑎᑦ, ‘ᐃᓕᑦᓯ ᐅᖁᒤᒋᔭᐅᕗᓯ, ᐃᒋᑦᓱᒫᕐᐸᑦᓯᓗ, ᐊᑕᓂᖅ ᐅᖃᕐᐳᖅ.’ 34ᐅᖃᕐᑎ ᑐᓂᕐᕈᓯᕐᑎᑦᓯᔨ, ᐃᓄᒡᓘᓐᓃᑦ ᐅᖃᕐᐸᑦ, ‘ᐊᑕᓂᐅᑉ ᐅᖁᒤᒋᔭᖓ,’ ᑖᓐᓇ ᓱᒋᐊᕈᒫᕐᐸᕋ ᐃᒡᓗᒥᐅᖃᑎᖏᑦ ᐱᖃᓯᐅᑎᓗᒋᑦ. 35ᐃᒫᒃ ᐅᖃᕐᑐᒃᓴᐅᕗᓯ ᐃᓚᓐᓇᕆᔭᑦᓯᓐᓄᑦ ᐃᓚᑦᓯᓐᓄᓪᓗ, ‘ᖃᓄᖅ ᐊᑕᓂᖅ ᑭᐅᕙ?’ ᐅᕝᕙᓗ ‘ᖃᓄᖅ ᐊᑕᓂᖅ ᐅᖃᕐᐸ?’ 36‘ᐊᑕᓂᐅᑉ ᐅᖁᒤᒋᔭᖓᓂᒃ,’ ᐅᖃᖃᑦᑕᕆᐊᖃᕈᓐᓃᕐᐳᓯ, ᐃᓄᐃᑦ ᐅᖁᒤᒋᔭᒥᖕᓂᒃ ᐅᖃᖃᑦᑕᕐᒪᑕ, ᑐᑮᕈᑎᑎᑦᓯᑐᐃᓐᓇᖃᑕᓕᕋᑦᓯ ᒎᑎᐅᑉ ᐆᒪᔫᑉ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑕ, ᒎᑎᑦᑕ ᐅᖃᐅᓯᖏᓐᓂᒃ. 37ᐱᔪᖃᓛᕐᑐᒥᒃ ᐅᖃᕐᑎᒧᑦ ᐊᐱᕐᓱᕐᑐᒃᓴᐅᕗᓯ, ‘ᖃᓄᖅ ᐊᑕᓂᕐᒧᑦ ᑭᐅᔭᐅᕕᑦ?’ ᐅᕝᕙᓗ ‘ᖃᓄᖅ ᐊᑕᓂᖅ ᐅᖃᕐᐸ?’ 38ᐅᖃᕈᑦᓯᓕ, ‘ᐊᑕᓂᐅᑉ ᐅᖁᒤᒋᔭᖓ,’ ‘ᐊᑕᓂᖅ ᐃᒫᒃ ᐅᖃᕐᐳᖅ,’ ‘ᑍᒫᒃ ᐅᖃᐅᓯᕐᓂᒃ ᐅᖃᕐᓂᓯ ᐱᑦᔪᑎᒋᓗᒍ, “ᐊᑕᓂᐅᑉ ᐅᖁᒤᒋᔭᖓ,” ᑍᒫᒃ ᐅᖃᕐᑐᒃᓴᐅᓐᖏᓐᓂᑦᓯᓐᓂᒃ ᐅᖃᓚᐅᕐᑎᓪᓗᖓ, “ᐊᑕᓂᐅᑉ ᐅᖁᒤᒋᔭᖓ,”’ 39ᑍᒤᒻᒪᑦ, ᑕᑯᒋᑦ, ᖁᓚᕐᓇᖏᑦᑐᒥᒃ ᐃᒋᑦᓱᒫᕐᐸᑦᓯ ᓇᔪᕐᑕᓐᓂᑦ, ᐃᒡᓗᒐᓴᒡᔪᐊᑦ ᓯᕗᓕᑦᓯᓐᓄᑦ ᑐᓂᓚᐅᕐᑕᒃᑲ ᐱᖃᓯᐅᑎᓗᒋᑦ. 40ᐃᓱᖃᖏᑦᑐᒧᓪᓗ ᓇᕐᕈᓇᕐᑎᑕᐅᓂᕐᒥᒃ ᐃᓕᑦᓯᓐᓄᑦ ᑎᑭᑎᑦᓯᔪᒫᕐᐳᖓ ᑲᓐᖑᓇᕐᑐᒦᓐᓂᕐᒥᒃ, ᐳᐃᒍᕐᑕᐅᓚᐅᕐᓯᒪᓂᐊᖏᑦᑐᒥᒃ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 23: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
