ᔨᕆᒤᐊᐅᑉ ᐊᒡᓚᖏᑦ 20
20
ᔨᕆᒤᐊᐅᑉ ᐊᑭᕋᕐᑑᑎᖃᑎᖃᕐᓂᖓ ᑐᓂᕐᕈᓯᕐᑎᑦᓯᔨᒥᒃ ᐸᓴᕐᒥᒃ
1ᑐᓂᕐᕈᓯᕐᑎᑦᓯᔨ ᐸᓱᕼᐅᕆ ᐃᒥᕆᐅᑉ ᐃᕐᓂᖓ ᐊᑕᓂᐅᑉ ᐃᒡᓗᖓᓂ ᐊᖓᔪᖅᑳᖑᖃᑕᐅᔪᖅ ᑐᓴᕋᒥ ᔨᕆᒤᐊᐅᑉ ᐅᖃᐅᓯᕆᔭᖏᓐᓂᒃ. 2ᑕᕝᕙ ᐸᓱᕼᐅᕆᐅᑉ ᔨᕆᒤᐊ ᐋᓐᓂᕐᓯᕐᑕᐅᑎᑉᐹ, ᐊᑦᓱᖏᕐᑕᐅᑎᓪᓗᒍᓗ ᐊᕐᓵᕐᑑᔭᓄᑦ, ᐃᑎᕐᑕᕐᕕᐅᑉ ᐱᓐᔭᒥᓂᒥᒃ ᑍᔭᐅᔫᑉ ᓴᓂᐊᓄᐊᕐᑕᐅᑎᑉᐹ ᖁᕝᕙᓯᖕᓂᕐᓴᒧᑦ ᐊᑕᓂᐅᑉ ᐃᒡᓗᖓᓄᑦ. 3ᖃᐅᑎᓪᓗᒍ ᐸᓱᕼᐅᕆᐅᑉ ᑎᒍᔭᐅᓯᒪᕕᖕᒥᑦ ᐊᓂᑎᑉᐹ, ᔨᕆᒤᐊᐅᑉ ᐅᖃᐅᑎᕚ, “ᐊᑕᓂᐅᑉ ᑍᔭᐅᖁᔪᓐᓃᕐᐹᑎᑦ ᐸᓱᕼᐅᕆᒥᒃ, ᐊᑎᖃᖁᓕᕐᐹᑎᓪᓕ ᑲᑉᐱᐊᓇᕐᑐᖃᕐᑎᑦᓯᔪᒥᒃ ᓇᓂᑐᐃᓐᓇᖅ. 4ᐃᒫᒃ ᐊᑕᓂᖅ ᐅᖃᕐᐳᖅ; ᑕᑯᒋᑦ, ᑲᑉᐱᐊᓇᕐᑐᒥᒃ ᓇᖕᒥᓂᕐᓄᑦ ᑎᑭᑎᑦᓯᕕᒋᓂᐊᕐᐳᑎᑦ ᐃᓚᓐᓇᕆᔭᕐᓄᓪᓗ. ᓇᖕᒥᓂᖅ ᑕᑯᓐᓇᕈᒫᕋᕕᒋᑦ ᐅᓇᑕᕐᑐᓂ ᑐᖁᕋᕐᑕᐅᓕᕐᑎᓪᓗᒋᑦ ᐊᑭᕋᑦᓯᓐᓄᑦ, ᔫᑕᒥᐅᓕᒫᑦ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᓐᓄᑦ ᐱᔭᐅᑎᑦᓱᒫᕐᐸᒃᑲ; ᑖᑦᓱᒪᓗ ᐊᐅᓪᓚᕈᑎᔪᒫᕐᐰᑦ ᐹᐱᓘᓂᒧᑦ, ᑐᖁᓪᓗᒋᓪᓗ. 5ᐊᑭᕋᑦᓯᓐᓄᑦ ᐊᔪᕐᓴᖏᑦᔪᑎᓯ ᐱᑖᕆᔭᐅᔪᒫᕐᐳᑦ, ᓴᖅᑭᑎᑕᕕᓂᖏᓪᓗ ᑲᑎᕐᓱᐊᖏᓪᓗ ᐱᒃᑯᒥᓇᕐᑐᑦ ᔫᑕᒥᐅᑦ ᐊᖓᔪᖅᑳᕐᔪᐊᖏᑕ ᐱᕕᓂᖏᑦ, ᓇᒡᕚᕐᑖᕆᓗᓂᑦᔪᒃ ᐊᖏᕐᕋᐅᑎᔪᒫᕐᐰᑦ ᐹᐱᓘᓂᒧᑦ. 6ᐃᕝᕕᓪᓕ ᐸᓱᕼᐅᕆ ᐃᒡᓗᒥᐅᖃᑎᓕᒫᑎᓪᓗ, ᐊᐅᓪᓚᕈᑦᔭᐅᔪᐃᓐᓇᐅᔪᒫᕐᐳᓯ ᐹᐱᓘᓂᒧᑦ; ᑍᑲᓂᓗ ᑐᖁᔪᒫᕐᐳᑎᑦ ᐃᓗᕕᕐᑕᐅᓗᑎᓪᓗ, ᐃᓚᓐᓇᕆᔭᓕᒫᑎᓪᓗ ᐃᓚᒋᓗᒋᑦ, ᓱᓕᖏᑦᑐᓂᒃ ᐅᖃᕐᕕᒋᕙᓚᐅᕐᑕᑎᑦ.”
ᔨᕆᒤᐊᐅᑉ ᓈᒻᒪᒃᓴᖏᓪᓗᓂ ᐅᖃᕐᓂᖓ ᐊᑕᓂᕐᒧᑦ
7ᐊᑕᓃᖅ ᐅᐃᕕᕐᕆᒐᕕᖓ ᐅᐃᕕᕐᕆᔭᐅᓯᒪᕗᖓ;
ᐱᔪᓐᓇᕐᓂᕐᓴᐅᒐᕕᑦ ᓵᓚᒋᕙᕐᒪ,
ᐅᓪᓗᓕᒫᖅ ᐱᓐᖑᐊᕆᔭᐅᕗᖓ, ᒥᑕᐅᑎᒋᔭᐅᓪᓗᖓᓗ.
8ᐅᖃᓪᓚᒋᐊᕋᒪ ᑍᒪᓐᖓᑦ ᕾᒐᓛᕐᐳᖓ
ᑲᑉᐱᐊᓇᕐᑐᓂᒃ ᐊᓯᕈᕐᑕᐅᓂᕐᒥᒡᓗ,
ᐅᖃᐅᓯᕆᖁᔭᑎᑦ ᐱᐅᒋᔭᐅᖏᑦᔪᑎᒋᕙᒃᑲ
ᐅᖃᕐᓂᕐᓗᒡᕕᐅᑦᔪᑎᒋᓪᓗᒋᓪᓗ ᐅᓪᓗᓕᒪᖅ.
9ᐅᖃᕋᓗᐊᕋᒪ, “ᐊᑕᓂᖅ ᐅᖃᐅᑎᒋᓂᐊᕈᓐᓃᕐᐸᕋ
ᐅᕝᕙᓘᓐᓃᑦ ᐅᖃᕐᑕᐅᖁᔭᖏᓐᓂᒃ ᐅᖃᕐᐸᖕᓂᐊᕈᓐᓃᕐᐳᖓ,”
ᑕᕝᕙ ᐃᓗᓐᓂ ᐃᑯᐊᓚᔪᑎᑐᑦ ᑍᒤᑦᑐᖃᓕᕐᐳᖅ,
ᓄᖅᑲᖓᑎᑕᒃᓴᐅᖏᑦᑐᓂᒃ, ᓄᖅᑲᖓᔭᕆᐊᒃᓴᕐᓗ ᐊᔪᓕᕐᐳᖓ.
10ᐅᖃᐅᓯᐅᓂᓐᓂᒃ ᑐᓴᖃᑦᑕᕐᐳᖓ,
ᐅᕙᓐᓂᒃ ᐊᕙᑎᓕᒫᓐᓂᑦ ᑲᑉᐱᐊᓵᕆᔪᓂᒃ,
ᐅᖃᐅᓯᐅᖁᔨᔪᑦ ᐅᖃᐅᓯᖃᕈᒪᔪᓪᓗ,
ᐃᓚᓐᓇᕆᔭᓕᒫᒃᑲ ᐅᑕᖅᑭᕗᑦ ᑕᒻᒪᕐᓂᐊᕐᒪᖔᕐᒪ,
ᐅᖃᕐᓗᑎᒃ, “ᐃᒻᒪᖄ ᓯᓔᕐᕆᔭᐅᓂᐊᕐᐳᖅ,
ᐋᖅᑭᒋᐊᕐᓂᐊᕐᐸᕗᑦ ᑕᕝᕙ.”
11ᐊᑕᓂᕐᓕ ᐅᕙᓐᓃᑉᐳᖅ ᐅᓇᑕᕐᑎᑎᑐᑦ ᓵᓚᐅᔪᓐᓇᖏᑦᑐᑎᑐᑦ,
ᑍᒤᒻᒪᑦ ᐅᕙᓐᓂᒃ ᐊᑭᕋᕐᑐᕋᓱᒃᑑᒐᓗᐊᑦ ᐹᓪᓚᖕᓂᐊᕐᐳᑦ, ᓵᓚᖃᕐᓂᐊᕋᑎᒡᓗ.
ᑲᓐᖑᓇᕐᑐᕐᔪᐊᕐᒦᑦᓱᒫᕐᐳᑦ ᑲᔪᓯᓂᐊᖏᓐᓇᒥᒃ.
ᐅᐱᓐᓇᖏᓐᓂᖏᓪᓗ ᐃᓱᖃᖏᑦᑐᒧᑦ ᐳᐃᒍᕐᑕᐅᓂᐊᓐᖏᓚᑦ.
12ᐊᑕᓃᖅ ᖁᑦᓯᖕᓂᕐᐹᖑᔪᑎᑦ, ᐃᓱᐊᕐᑐᒦᑦᑐᑦ ᑲᐅᔨᒪᑦᓯᐊᕋᕕᒋᑦ,
ᐃᓱᒪᒥᐅᑕᓂᒃ ᐆᒻᒪᒻᒥᐅᑕᓂᒡᓗ ᑕᑯᓐᓇᕐᑐᑎᑦ,
ᑕᑯᔪᒪᕗᖓ ᐊᑭᓂᐊᕐᕕᖃᕐᓂᕐᓂᒃ ᑖᒃᑯᓄᖓ,
ᐃᓕᖅᑯᓯᕆᔭᓕᒫᒃᑲ ᐃᓕᖕᓄᑦ ᑐᓂᓯᒪᒐᒃᑭᑦ.
13ᐊᑕᓂᖅ ᐃᓐᖏᕐᕕᒋᓯᐅᒃ, ᓂᕐᑐᕐᓗᒍᓗ ᐊᑕᓂᖅ,
ᓴᐳᑦᔨᔪᓐᓇᕐᒪᑦ ᐃᑲᔪᕐᑕᐅᔭᕆᐊᓕᖕᓂᒃ
ᐱᐅᖏᑦᑐᓕᔪᑦ ᐱᓇᓱᐊᕐᓂᖏᓐᓂᑦ.
14 #
ᔫᐱ 3:1-19. ᐃᓅᓕᕐᓂᕕᓂᕋ ᓇᕐᕈᒋᕙᕋ
ᐃᕐᓂᐊᕆᔭᐅᓂᕕᓂᕋᓗ ᐊᓈᓇᓐᓄᑦ, ᓮᒻᒪᕐᑎᑕᐅᖁᓐᖏᓚᕋ.
15ᐱᐅᒋᓐᖏᓚᕋ ᐊᑖᑕᓐᓂᒃ ᑐᓴᕐᑎᑦᓯᔭᕐᑐᓚᐅᕐᑐᕕᓂᖅ, “ᐃᕐᓂᕐᑖᕐᐳᑎᑦ,”
ᐊᑖᑕᒪᓗ ᖁᕕᐊᓱᓚᐅᕐᓂᖓ.
16ᑍᓐᓇ ᐊᖑᑦ ᐃᒡᓗᒐᓴᒃᑎᑐᑦ ᐊᑕᓂᕐᒧᑦ
ᓇᒡᓕᖕᓂᖃᕐᕕᐅᓇᑎᒃ ᐃᒋᑕᐅᓂᐊᕐᑐᑎᑐᑦ ᑍᒤᑕᐅᖁᕙᕋ,
ᑍᒪᑐᖅ ᕿᐊᔪᓂᒃ ᑐᓴᒐᒃᓴᑐᐊᖃᕈᒫᕐᐳᖅ ᐅᓪᓛᑕᒫᑦ,
ᐅᓇᑕᕆᐊᕐᑐᓂᒡᓗ ᑐᓴᒐᒃᓴᑐᐊᖃᕐᐸᒡᓗᓂ ᐅᓪᓘᑉ ᕿᑎᖓᓂ.
17ᑐᖁᑉᐸᒌᕐᓂᕐᐸᖓᓕ ᓄᑕᕋᒃᓴᕆᔭᐅᑎᓪᓗᖓ,
ᐊᓈᓇᒪ ᐃᒡᓕᐊᖓ ᐃᓗᕕᓕᐅᑎᑐᐃᓐᓇᕋᔭᓚᐅᕐᐸᕋ,
ᐃᒡᓕᐊᖓᓗ ᐃᓂᒃᓴᑦᓯᐊᖑᒐᔭᕐᐳᖅ ᐃᓱᖃᖏᑦᑐᒧᑦ.
18ᓱᖕᒪᒃᑭᐊᖅ ᐃᕐᓂᐊᖑᓐᓂᕆᕗᖓ,
ᖁᕕᐊᓇᖏᑦᑐᓂᒃ ᑕᑯᔭᒃᓴᑐᐊᖃᖁᓪᓗᖔ?
ᐃᓅᓯᕐᒪᓗ ᐃᓱᐊᓂ ᐱᔪᒥᓇᖏᑦᑐᐃᓐᓈᓗᖕᓂᒃ
ᑲᓐᖑᓇᕐᑐᒥᒡᓗ ᐃᓱᓕᓐᓂᖃᕈᒫᕐᑎᓪᓗᖔ?
Currently Selected:
ᔨᕆᒤᐊᐅᑉ ᐊᒡᓚᖏᑦ 20: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
