ᔨᕆᒤᐊᐅᑉ ᐊᒡᓚᖏᑦ 19
19
ᒪᕐᕋᐅᔭᖅ ᓯᖁᒥᓯᒪᔪᖅ
1ᐃᒫᒃ ᐊᑕᓂᖅ ᐅᖃᕐᐳᖅ, “ᓂᐅᕕᕆᐊᕆᑦ ᒪᕐᕋᐅᔭᓕᐅᕐᑎᒥᑦ ᒪᕐᕋᐅᔭᕐᒥᒃ, ᐱᖃᑎᖃᕐᓗᑎᑦ ᐊᖓᔪᖅᑳᓂᒃ ᑐᓂᕐᕈᓯᕐᑎᑦᓯᔨᓂᒡᓗ ᐊᖓᔪᒃᓕᓂᒃ. 2#ᐊᑕᓃᑦ ᐂᑉᐸᖏᑦ 23:10; ᔨᕆᒤᐊ 7:30-32; 32:34,35.ᐱᓐ ᕼᐃᓇᐅᑉ ᓇᕐᓴᖓᓄᐊᕐᓂᐊᕐᐳᑎᑦ ᐃᑎᕐᑕᕐᕕᒃᑯᑦ ᐹᑦᓴᑎᒥᒃ ᐊᑎᖃᕐᑐᒃᑯᑦ ᐊᓂᓗᓯ, ᑍᑲᓂᓗ ᐅᖃᐅᓯᕆᖁᔭᒃᑲ ᐅᖃᐅᓯᕆᓗᒋᑦ. 3ᐅᖃᕐᓗᑎᑦ, ‘ᐊᑕᓂᐅᑉ ᐅᖃᐅᓯᖏᑦ ᑐᓴᕐᓯᐅᒃ, ᔫᑕᒧᑦ ᐊᖓᔪᖅᑳᕐᔪᐊᖑᔪᓯ ᔨᕉᓴᓕᒥᐅᑕᐅᔪᓯᓗ, ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᑕᑯᒋᑦ, ᐊᓯᕈᕐᑕᐅᓇᕐᑐᒥᒃ ᑎᑭᑎᑦᓯᓂᐊᕐᐳᖓ ᑕᒪᐅᖓ, ᑐᓴᕐᑐᓪᓗ ᖁᐊᕐᓵᖓᓂᐊᕐᐳᑦ. 4ᐅᕙᓐᓂᒃ ᕿᒤᓚᐅᕐᒪᑕ, ᐊᓯᖏᑕᓗ ᒎᑎᒋᔭᖏᓐᓄᑦ ᓄᓇᑎᒃ ᐃᓂᑖᖑᑎᓪᓗᒍ ᓇᕐᕈᓇᕐᓯᑎᑉᐹᑦ, ᐆᑕᒃᓴᓂᒡᓗ ᑐᓂᕐᕈᓯᕐᕕᒋᕙᒃᓗᒋᑦ, ᓯᕗᓕᕕᓂᖏᑕᓘᓐᓃᑦ ᖃᐅᔨᒪᓚᐅᕐᓯᒪᓐᖏᑕᖏᓐᓂᒃ, ᔫᑕᐅᓪᓘᓐᓃᑦ ᐊᖓᔪᖅᑳᕐᔪᐊᖏᑕ ᖃᐅᔨᒪᓚᐅᕐᓯᒪᖏᒻᒥᔭᖏᑦ; ᑕᕝᕙᓂᓗ ᑐᖁᕅᕙᒃᓗᑎᒃ ᐸᓯᔭᒃᓴᐅᖏᑦᑐᓂᒃ. 5#ᒨᓯᓯ ᐱᖓᔪᖏᑦ 18:21.ᐳᕐᑐᔪᓂᒃ ᑐᓂᕐᕈᓯᕐᕕᓕᐅᕐᓯᒪᕗᑦ ᐰᓕᒧᑦ ᕿᑐᕐᖓᒥᖕᓂᒡᓗ ᐃᑯᐊᓚᔪᒧᑦ ᑐᓂᕐᕈᓯᐅᑎᓪᓗᒋᑦ ᐰᓕᒧᑦ ᑐᒃᓯᐊᕈᑎᒋᖃᑦᑕᕐᐰᑦ, ᑍᒤᓕᐅᖁᓪᓗᒋᑦ ᐅᖃᓚᐅᕐᓯᒪᓐᖏᓚᖓ ᐱᖁᔭᓕᐅᓚᐅᕐᓯᒪᓐᖏᓚᖓᓘᓐᓃᑦ, ᑍᒤᑦᑐᒥᒃ ᐃᓱᒪᓚᐅᕐᓯᒪᖏᓐᓇᒪ. 6ᑍᒤᒻᒪᑦ ᑕᑯᒋᑦ, ᐅᓪᓗᐃᑦ ᑎᑭᓕᕐᐳᑦ, ᐊᑕᓂᖅ ᐅᖃᕐᐳᖅ, ᑕᒪᓐᓇ ᓄᓇ ᐊᑎᖃᕐᑎᑕᐅᔪᓐᓃᕐᕕᒃᓴᖓ ᑐᐱᑎᒥᒃ, ᐅᕝᕙᓘᓐᓃᑦ ᐱᓐ ᕼᐃᓇᒥᐅᑦ ᓇᕐᓴᖓᓂᒃ, ᑍᔭᐅᓕᕈᒫᕐᐳᕐᓕ ᓇᕐᓴᒥᒃ ᑐᖁᕅᕕᖕᒥᒃ. 7ᔫᑕᒥᐅᓄᑦ ᔨᕉᓴᓕᒥᐅᓄᓪᓗ ᓯᕗᓂᒃᓴᓕᐊᕆᓯᒪᔭᒃᑲ ᐊᑐᕈᓐᓃᕐᑎᓐᓂᐊᕐᐸᒃᑲ, ᑐᖁᕋᕐᑕᐅᑎᓪᓗᒋᓪᓗ ᐅᓇᑕᕐᑐᓂ ᐊᑭᕋᖏᓐᓄᑦ, ᑖᒃᑯᓂᖓ ᑐᖁᕅᔪᒪᔪᓂᒃ, ᑎᒥᕕᓂᖏᓪᓗ ᓂᕆᔭᒃᓴᐅᖁᓪᓗᒋᑦ ᑎᖕᒥᐊᓄᑦ ᐆᒪᔪᓄᓪᓗ. 8ᑖᒃᑯᐊ ᐃᒡᓗᒐᓴᒡᔪᐊᑦ ᓱᕋᒃᑕᐅᑎᓐᓂᐊᕐᐸᒃᑲ ᓇᕐᕈᒋᔭᒃᓴᓐᖑᕐᑎᓪᓗᒋᓪᓗ; ᐊᖅᑯᓵᕐᑐᓪᓗ ᑲᒪᓂᐊᕐᓗᑎᒃ ᓱᕋᒃᑎᕐᓯᒪᓂᖓᓂᒃ ᖁᐊᕐᓵᖓᔪᒫᕐᐳᑦ. 9ᕿᑐᕐᖓᒥᖕᓂᒡᓗ ᓂᕿᖃᓕᕈᒫᕐᐳᑦ, ᐃᒻᒥᖕᓄᓪᓗ ᓂᕆᖃᑦᑕᐅᑎᓕᕐᑎᓪᓗᒋᑦ ᐊᑭᕋᒥᖕᓄᑦ ᐃᓗᔭᐅᓯᒪᓗᑎᒃ ᓴᐱᔭᐅᓯᒪᓂᕐᒥᖕᓄᑦ, ᐊᑭᕋᕐᒥᖕᓂᑦ ᑐᖁᑦᓯᔪᒪᔪᓂᑦ ᑍᒤᑎᑕᐅᓗᑎᒃ.’
10“ᑕᕝᕙ ᒪᕐᕋᐅᔭᖅ ᓯᖁᒥᑕᒃᓴᕆᕙᑦ ᐃᓕᖕᓂᒃ ᒪᓕᒃᓯᒪᔪᑦ ᑕᑯᓐᓇᕐᑎᓪᓗᒋᑦ. 11ᐅᖃᐅᑎᓗᒋᓪᓗ, ‘ᐃᒫᒃ ᑕᕝᕙ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ: ᑍᒫᒃ ᑕᕝᕙ ᐃᓅᖃᑎᒌᒡᔪᐊᑦ ᐃᒡᓗᒐᓴᒡᔪᐊᓪᓗ ᓯᖁᒥᑦᓱᒫᕐᐸᒃᑲ ᑖᑦᓱᑐᓇᖅ ᒪᕐᕋᐅᔭᕐᑎᑐᑦ ᓯᖁᒥᑕᐅᔪᑎᑐᑦ ᐋᖅᑭᒃᓱᒐᒃᓴᐅᔪᓐᓃᕐᓗᑎᒡᓗ ᑍᒤᑦᓱᒫᕐᐳᑦ. ᑐᐱᑎᒥ ᐃᓗᕕᕐᓯᔪᒫᕐᐳᑦ ᐊᓯᐊᓂ ᐃᓗᕕᕐᓯᕕᒃᓴᖃᕈᓐᓃᕈᒫᕐᒪᑦ. 12ᐃᒫᒃ ᐱᓇᓱᐊᕐᓂᐊᕐᐳᖓ ᐅᕙᓂ ᓄᓇᖃᕐᑐᓄᑦ, ᐊᑕᓂᖅ ᐅᖃᕐᐳᖅ, ᑖᒃᑯᐊ ᐃᒡᓗᒐᓴᒡᔪᐊᑦ ᑐᐱᑎᒥᐅᑎᑑᓕᕈᒪᕐᐳᑦ. 13ᐃᒡᓗᐃᑦ ᔨᕉᓴᓕᒦᑦᑐᑦ, ᐊᖓᔪᖅᑳᕐᔪᐊᓪᓗ ᐃᒡᓗᖏᑦ ᔫᑕᒦᑦᑐᑦ ᓇᕐᕈᓇᕐᓯᔪᒫᕐᐳᑦ ᑐᐱᑎᒥᐅᑎᑐᑦ, ᐃᒡᓗᓕᒫᑦ ᖄᖏᓐᓂ ᐃᑯᐊᓚᑦᓯᕕᐅᖃᑦᑕᕐᑐᑦ ᑐᓂᕐᕈᓯᕐᑐᓄᑦ, ᖁᑦᓯᒃᑐᒦᑦᑐᓄᑦ ᐃᒥᒐᒃᓴᓂᒡᓗ ᑐᓂᕐᕈᑕᐅᕙᒃᑐᑦ ᒎᑎᓐᖑᐊᓄᑦ ᓇᕐᕈᓇᕐᓯᑎᑕᐅᔪᒫᕐᐳᑦ ᑐᐱᑎᒥᐅᑎᑐᑦ.’”
14ᔨᕆᒤᐊ ᑐᐱᑎᒥᓐᖔᕐᓗᓂ ᐅᑎᓕᕆᕗᖅ, ᐊᑕᓂᐅᑉ ᐅᖃᖁᔭᖓᓂᒃ ᐅᖃᓪᓚᓚᐅᕐᓗᓂ, ᐊᒻᒪ ᐊᑕᓂᐅᑉ ᐃᒡᓗᖓᓂ ᐃᓄᖕᓄᑦ ᐅᖃᓪᓚᓕᕆᕗᖅ: 15“ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᐃᓴᕆᐊᓕᒥᐅᑦ ᒎᑎᖓ ᐅᖃᕐᐳᖅ, ᑕᑯᒋᑦ, ᐃᒡᓗᒐᓴᒡᔪᐊᓄᑦ ᓄᓇᓕᖕᓄᓪᓗ ᑎᑭᑎᑦᓯᓂᐊᕐᐳᖓ ᑲᑉᐱᐊᓇᕐᑐᓂᒃ ᑎᑭᓐᓂᐊᕐᓂᕋᕐᓯᒪᔭᓕᒫᓐᓂᒃ ᐃᓕᑦᓯᓐᓄᑦ, ᓯᑎᔫᓚᐅᕐᒪᑕ, ᑐᓴᕈᒪᓇᑎᒡᓗ ᐅᖃᐅᓯᓐᓂᒃ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 19: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
