ᔨᕆᒤᐊᐅᑉ ᐊᒡᓚᖏᑦ 1
1
ᔨᕆᒤᐊᒥᒃ ᓇᓗᓁᕐᓯᔪᑦ
1ᑕᒪᑦᔭ ᔨᕆᒤᐊᐅᑉ ᐅᖃᐅᓯᖏᑦ ᕼᐃᓪᑬᐊᐅᑉ ᐃᕐᓂᖓᑕ, ᑐᓂᕐᕈᓯᕐᑎᑦᓯᔨᐅᔫᑉ ᐃᓚᖓᑦᑕ ᓄᓇᓕᖕᓂ ᐊᓇᑑᑎᒥ ᐱᓐᔭᒥᓂᒥᐅ ᓄᓇᖓᓂ. 2#ᐊᑕᓃᑦ ᐂᑉᐸᖏᑦ 22:3—23:27; ᑯᕉᓂᑲ ᐂᑉᐸᖏᑦ 34:8—35:19.ᐊᑕᓂᖅ ᔨᕆᒤᐊᒧᑦ ᐅᖃᓚᐅᕐᐳᖅ ᔫᓮᐊᐅᑉ ᐋᒪᓐᓇᐅᑉ ᐃᕐᓂᖓᑕ ᔫᑕᒥ ᐊᖓᔪᖅᑲᐅᓂᖓᑕ 13ᒋᓕᕐᑕᖓᓂ, 3#ᐊᑕᓃᑦ ᐂᑉᐸᖏᑦ 23:36—24:7; ᑯᕉᓂᑲ ᐂᑉᐸᖏᑦ 36:5-8; ᐊᑕᓃᑦ ᐂᑉᐸᖏᑦ 24:18—25:21; ᑯᕉᓂᑲ ᐂᑉᐸᖏᑦ 36:11-21.ᐊᑕᓂᕐᓗ ᐅᖃᓚᐅᕆᕗᖅ ᔫᓮᐊᐅᑉ ᐃᕐᓂᖓ ᔨᕼᐅᐃᐊᑭᒻ ᐊᖓᔪᖅᑳᕐᔪᐊᖑᓕᕐᑎᓪᓗᒍ, ᐊᒻᒪᓗ ᑭᖑᓂᖓᒍᑦ ᐊᑕᓂᖅ ᐅᖃᖃᑦᑕᓚᐅᕆᕗᖅ ᔨᑎᑬᐊ ᔫᓮᐊᐅᑉ ᐃᕐᓂᖓᑕ ᐊᖓᔪᖅᑲᐅᓂᖓᑕ 11ᖓᓐᓄᑦ ᑎᑭᓪᓗᒍ. ᑖᑦᓱᒪᓗ ᐊᕐᕌᒎᑉ ᑕᖅᑭᖏᑕ ᑕᓪᓕᒪᖓᓐᓂ ᔨᕉᓴᓕᒥᐅᑦ ᐃᓄᖏᑦ ᐊᐅᓪᓚᕈᑦᔭᐅᓂᖏᑕ ᓄᓇᒋᓐᖏᑕᒥᖕᓄᑦ ᑎᑭᓪᓗᒍ.
ᔨᕆᒤᐊᐅᑉ ᕾᖁᔭᐅᓂᖓ
4ᑕᕝᕙ ᐊᑕᓂᖅ ᐅᕙᓐᓄᑦ ᐅᖃᕐᐳᖅ, ᐅᖃᕐᓗᓂ: 5“ᓄᑕᕋᒃᓴᓐᖑᓚᐅᕐᑎᓐᓇᒃ ᓱᓕ ᓂᕈᐊᓚᐅᕐᐸᒋᑦ; ᐃᓅᓕᖅᑳᕐᑎᓐᓇᒡᓗ ᐃᑦᔪᕐᓁᑎᓚᐅᕐᐸᒋᑦ; ᑎᓕᓚᐅᕐᐸᒋᑦ ᐱᔪᖃᓛᕐᑐᒥᒃ ᐅᖃᕐᑎᒋᔪᒪᓪᓗᑎᑦ ᐃᓅᖃᑎᒌᒡᔪᐊᓄᑦ.”
6ᑕᕝᕙ ᑭᐅᕙᕋ, “ᑕᑯᒋᑦ ᐊᑕᓃᖅ ᒎᑏ! ᖃᓄᖅ ᐅᖃᓪᓚᒋᐊᒃᓴᖅ ᓇᓗᔪᖓ, ᐅᕕᒃᑲᐅᓗᐊᕋᒪ.”
7ᐊᑕᓂᐅᓪᓕ ᐅᖃᐅᑎᕚᖓ, “ᐅᕕᒃᑲᐅᓗᐊᕐᓂᕋᕐᑍᓕᒋᑦ, ᐂᔪᒃᓴᐅᕗᑎᑦ ᑕᒤᓐᓄᑦ ᐂᕕᒋᔭᐅᖁᔭᓐᓄᑦ, ᐅᖃᕐᕕᒋᓗᒋᓪᓗ ᐅᖃᐅᓯᕆᔭᐅᖁᔭᓐᓂᒃ. 8ᑲᑉᐱᐊᒋᑦᑍᓕᑭᑦ, ᐃᓚᒋᓂᐊᕐᐸᒋᑦ ᓴᐳᑎᓯᒪᓗᑎᑦ, ᐅᕙᖓ ᐊᑕᓂᐅᓪᓗᖓ ᐅᖃᕐᐳᖓ!”
9ᐊᑕᓂᕐᓗ ᐃᓴᒃᓗᓂ, ᖃᓂᕋ ᐊᒃᑐᕐᐹ, ᐅᖃᕐᓗᓂᓗ, “ᑕᑯᒋᑦ ᐅᖃᐅᓯᒃᑲ ᖃᓂᕐᓄᑦ ᐃᓕᕙᒃᑲ. 10ᐅᓪᓗᒥ ᐱᔪᓐᓇᕐᓯᑎᑉᐸᒋᑦ ᐱᔪᓐᓇᕐᓂᖃᓕᖁᓪᓗᑎᑦ ᐃᓅᖃᑎᒌᒡᔪᐊᓄᑦ ᐊᖓᔪᖅᑲᐅᕕᖕᓄᓪᓗ, ᐊᒫᖏᑎᒍᑦ ᓄᓱᒃᓯᖁᓪᓗᑎᑦ ᐅᕐᕈᑎᑦᓯᖁᓪᓗᑎᓪᓗ, ᐊᓯᕈᐃᖁᓪᓗᑎᑦ ᐃᒋᑦᓯᖁᓪᓗᑎᓪᓗ, ᐋᖅᑭᒃᓱᐃᖁᓪᓗᑎᑦ ᐱᕈᕐᑎᑦᓯᖁᓪᓗᑎᓪᓗ.”
ᔨᕆᒤᐊᐅᑉ ᑕᑯᑎᑕᐅᓂᖓ ᒪᕐᕉᖕᓂᒃ
11ᐊᑕᓂᐅᑉ ᐊᐱᕆᕚᖓ, “ᔨᕆᒤᐊ ᓱᓇᒦᒃ ᑕᑯᕕᑦ?”
ᑭᐅᕙᕋᓗ, “ᓇᐹᕐᑑᑉ ᐊᕙᓚᖓᔪᖓᑕ ᐃᓚᖓᓂᒃ ᑕᑯᕗᖓ.”
12ᐊᑕᓂᐅᑉ ᑭᐅᕚᖓ, “ᓱᓕᕗᑎᑦ, ᖃᐅᔨᓴᕐᐳᖓ ᐅᖃᐅᓯᒃᑲ ᓇᓚᐅᑦᓯᓂᐊᕐᒪᖔᑕ.”
13ᐊᑕᓂᐅᑉ ᐅᖃᐅᑎᓕᕆᕚᖓ, “ᓱᓇᒥᒃ ᑕᑯᒃᑲᓐᓂᕐᐲᑦ?”
ᑭᐅᕙᕋ, “ᑕᑯᕗᖓ ᐅᓐᓄᐊᓪᓗᐊᑉ ᓇᓛᓂ ᐅᒃᑯᓯᖕᒥᒃ ᑎᕐᑎᑦᑐᒥᒃ, ᒥᒃᓯᒧᓪᓗ ᐅᕐᕈᓕᒑᔪᒥᒃ.”
14ᐊᑕᓂᐅᑉ ᐅᖃᐅᑎᕚᖓ, “ᐅᓐᓄᐊᓪᓗᐊᑉ ᓇᓛᓂᑦ ᐊᓯᕈᕐᑕᐅᓐᓇᕐᑐᖅ ᑎᑭᑦᓱᒫᕐᐳᖅ ᓄᓇᒧᑦ ᑕᒪᑐᒧᖓ, 15ᐅᓐᓄᐊᓪᓗᐊᑉ ᓇᓛᓃᑦᑐᑦ ᐃᓅᖃᑎᒌᒡᔪᐊᑦ ᑕᒪᐅᖓ ᑎᑭᖁᔪᒫᕋᒃᑭᑦ ᐊᖓᔪᖅᑳᕐᔪᐊᖏᓪᓗ ᐊᖓᔪᖅᑲᐅᕕᒃᑖᖁᓂᐊᕐᐸᒃᑲ ᔨᕉᓴᓕᐅᑉ ᐃᑎᕐᑕᕐᕕᒃᔪᐊᖏᓐᓂ, ᐊᕙᓗᕐᔪᐊᖏᑕᓗ ᐊᕙᑖᓂ, ᔫᑕᐅᓪᓗ ᐃᒡᓗᒐᓴᒡᔪᐊᖁᑎᖏᑕ ᐊᕙᑖᓂ. 16ᐃᓄᖁᑎᒃᑲ ᓱᒋᐊᕐᓂᐊᕋᒃᑭᑦ ᐊᔪᕐᑐᓕᓂᕆᓚᐅᕐᑕᖏᑦ ᐱᓪᓗᒋᑦ, ᐅᕙᓐᓂᒃ ᕿᒤᓯᒪᖕᒪᑕ, ᐆᒪᔪᓂᒡᓗ ᑐᓂᕐᕈᓯᖃᑦᑕᓕᕐᓗᑎᒃ ᒎᑎᓐᖑᐊᓄᑦ, ᒎᑎᓐᖑᐊᓄᓪᓗ ᓴᓇᓯᒪᔭᒥᖕᓄᑦ ᑐᒃᓯᐊᕐᕕᖃᖃᑦᑕᓕᕐᒪᑕ. 17ᔨᕆᒤᐋ ᐅᐸᓗᖕᒊᔭᓕᕆᑦ, ᐂᓗᑎᓪᓗ ᐅᖃᐅᑎᔭᕐᑐᓕᒃᑭᑦ ᑕᒤᓐᓂᒃ ᐅᖃᐅᓯᕆᔭᐅᖁᔭᓐᓂᒃ. ᓯᕘᕋᒋᑦᑍᓕᒃᑭᑦ, ᓯᕘᕋᒍᕕᓪᓕ ᓯᕘᕋᑎᓐᓂᕐᓴᐅᔪᓐᓇᕐᐸᒋᑦ ᐱᖃᑎᒋᓕᕈᕕᒋᑦ. 18ᔨᕆᒤᐊ ᑕᑯᒋᑦ, ᓄᓇᒥ ᑕᒫᓂ ᐃᓅᔪᑦ ᔫᑕᒥᐅᑉ ᐊᖓᔪᖅᑳᕐᔪᐊᖏᑦ, ᐊᖓᔪᖅᑳᖑᑎᑕᐅᔪᓪᓗ ᑖᒃᑯᓄᖓ, ᑐᓂᕐᕈᓯᕐᑎᑦᓯᔨᐅᔪᓪᓗ, ᐃᓄᐃᓪᓗ, ᐃᓕᖕᓂᒃ ᐊᑭᕋᕐᑐᕐᓂᐊᕐᐳᑦ. 19ᑖᒃᑯᐊ ᐅᓇᑕᕈᒫᕐᐹᑎᑦ; ᓵᓚᒋᔭᐅᓂᐊᓐᖏᓚᑎᓪᓕ, ᐅᕙᖓ ᐱᖃᑎᒋᓂᐊᕋᒃᑭᑦ ᓴᐳᑎᓯᒪᓗᑎᑦ. ᐅᕙᖓ ᐊᑕᓂᐅᔪᖓ ᐅᖃᕐᐳᖓ ᑕᒪᑐᒥᖓ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 1: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
