ᔨᕆᒤᐊᐅᑉ ᐊᒡᓚᖏᑦ 18
18
ᔨᕆᒤᐊᐅᑉ ᒪᕐᕋᐅᔭᓕᐅᕐᑎᒥ ᐳᓛᕐᓂᖓ
1ᐊᑕᓂᐅᑉ ᐅᖃᐅᓯᖓ ᑎᑭᑉᐳᖅ ᔨᕆᒤᐊᒧᑦ, 2“ᒪᑭᓪᓗᑎᑦ ᒪᕐᕋᐅᔭᓕᐅᕐᑎᐅᑉ ᐃᒡᓗᖓᓄᐊᓕᕆᑦ ᑍᑲᓂᓗ ᑐᓴᕐᑎᓐᓂᐊᕐᐸᒋᑦ ᐅᖃᐅᓯᓐᓂᒃ.” 3ᑕᕝᕙ ᒪᕐᕋᐅᔭᓕᐅᕐᑎᐅᑉ ᐃᒡᓗᖓᓄᐊᕐᐳᖓ, ᑬᕕᑎᑦᓯᕕᖕᒥᓗ ᓴᓇᔪᖅ ᑕᑯᕙᕋ. 4ᒪᕐᕋᐅᔭᓕᐅᕐᑎᐅᑉ ᓴᓇᔭᖓ ᐋᖅᑭᑦᓯᐊᖏᑦᑕᕌᖓᑦ, ᐊᒡᒐᖕᒥᓄᑦ ᐋᖅᑭᒋᐊᒃᑲᓐᓂᕐᓗᒍ ᐊᓯᐊᓂᒃ ᓴᓇᓕᕐᐹ, ᒪᕐᕋᐅᔭᓕᐅᕐᑎᐅᑉ ᐱᐅᒋᔭᖓ ᒪᓕᒡᓗᒍ.
5ᑕᕝᕙ ᐊᑕᓂᐅᑉ ᐅᖃᐅᑎᓕᕐᐹᖓ, 6“ᐃᓴᕆᐊᓕᒥᐅᖑᔪᓯ ᒪᕐᕋᐅᔭᓕᐅᕐᑎᑎᑐᑦ ᑍᒫᒃ ᐃᓕᑦᓯᓐᓄᑦ ᐱᓂᐊᕐᑐᒃᓴᐅᓐᖏᓚᖔ? ᐊᑕᓂᖅ ᐅᖃᕐᐳᖅ, ᑕᑯᒋᑦ, ᐃᓴᕆᐊᓕᒥᐅᖑᔪᓯ ᐊᒡᒐᓐᓃᑉᐳᓯᑦᑕᐅᖅ ᒪᕐᕋᑎᑐᑦ ᒪᕐᕋᐅᔭᓕᐅᕐᑎᐅᑉ ᐊᒡᒐᖏᓐᓃᑦᑐᑎᑐᑦ. 7ᖃᖓᑐᐃᓐᓇᒃᑯᑦ ᐅᖃᕈᒪ ᐃᓅᖃᑎᒌᒡᔪᐊᑦ ᐊᖓᔪᖅᑲᐅᕖᓪᓘᓐᓃᑦ ᓄᓱᖕᓂᐊᕐᓂᕋᕐᓗᒋᑦ ᓯᖁᒥᓐᓂᐊᕐᓂᕋᕐᓗᒋᓪᓗ ᐊᓯᕈᕐᓂᐊᕐᓂᕋᕐᓗᒋᓪᓘᓐᓃᑦ. 8ᑭᖑᓂᖓᒍᓪᓗ ᐃᓅᖃᑎᒌᒡᔪᐊᑦ ᖃᕿᐊᓕᕐᐸᑕ ᐱᐅᖏᑦᑐᓕᓂᕐᒥᖕᓂᑦ, ᐊᓯᕈᕐᑕᐅᑦᔪᑎᒃᓴᕋᓗᐊᖏᓐᓂᒃ ᑲᔪᓯᕕᐅᑎᓐᓂᐊᓐᖏᓚᒃᑲ. 9ᐅᕝᕙᓘᓐᓃᑦ ᐊᓯᐊᒍᑦᑕᐅᖅ ᐅᖃᓕᕐᒥᒍᒪ ᐃᓅᖃᑎᒌᒡᔪᐊᑦ ᐊᖓᔪᖅᑲᐅᕖᓪᓘᓐᓃᑦ ᓴᖅᑭᓐᓂᐊᕐᓂᕋᕐᓗᒋᑦ ᐱᕈᕐᓗᑎᒡᓗ. 10ᐱᐅᖏᑦᑐᓂᒡᓕ ᐱᓇᓱᐊᓕᕐᐸᑕ ᓵᓐᓂ ᓈᓚᒍᓐᓃᕐᓗᑎᒡᓗ ᐅᕙᓐᓂᒃ, ᐊᒻᒪ ᐱᐅᔪᒥᒃ ᐱᓇᓱᐊᕐᓂᐊᕐᓂᕋᓚᐅᕐᑕᕋᓗᐊᕋ ᑖᒃᑯᓄᖓ ᓴᖑᑎᑦᓱᒫᕆᕙᕋ. 11ᑍᒤᒻᒪᑦ, ᔫᑕᐅᑉ ᔨᕉᓴᓕᐅᓪᓗ ᐃᓄᖏᑦ ᐅᖃᐅᑎᒃᑭᑦ, ᐃᒫᒃ ᑕᕝᕙ ᐊᑕᓂᖅ ᐅᖃᕐᐳᖅ, ‘ᑕᑯᒋᑦ, ᑲᑉᐱᐊᓇᕐᑐᒥᒃ ᑎᑭᑦᑐᒃᓴᒥᒃ ᐃᓕᑦᓯᓐᓄᑦ ᐋᖅᑭᒃᓱᐃᓕᕐᐳᖓ, ᖃᓄᐃᓕᒋᐊᕈᑎᒃᓴᓂᒡᓗ ᐅᐸᓗᖕᒊᔭᕐᓗᖓ, ᐱᐅᖏᑦᑐᓕᓂᑦᓯᓐᓂᑦ ᓵᒋᐊᓕᕆᑦᓯ ᐊᖅᑯᑎᑦᓯᓐᓂᑦ ᐱᓂᐊᕐᓂᓯᓗ ᐋᖅᑭᒋᐊᓕᕐᓯᐅᒃ.’ 12ᑖᒃᑯᐊᓕ ᑭᐅᒃᐸᑕ, ‘ᐋᒃᑲ, ᑍᒤᑦᓱᒪᓐᖏᓚᒍᑦ, ᐱᓇᓱᐊᕈᒪᔭᑦᑎᓐᓂᒃ ᐱᓇᓱᐊᕈᒪᒐᑦᑕ, ᑕᒪᑦᑕ ᒪᓕᒍᒪᒐᑦᑕ ᐆᒻᒪᑎᑦᑕ ᐱᐅᖏᑦᑐᓕᔪᒪᓂᖏᓐᓂᑦ ᓴᖑᔪᒪᓐᖏᓚᒍᑦ.’”
ᐃᓄᐃᑦ ᐊᑕᓂᕐᒥᒃ ᖁᔭᓈᕐᓯᓂᖓᑦ
13ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ:
“ᐃᓅᖃᑎᒌᒡᔪᐊᓄᑦ ᖃᐅᔨᓇᓱᐊᓕᕆᑦ
ᑍᒫᒃ ᐅᖃᕐᑐᖃᓚᐅᕐᓯᒪᖕᒪᖔᑕᓕ
ᑍᒤᓚᐅᕐᓯᒪᖏᑦᓯᐊᕐᓗᑎᒃ ᐃᓴᕆᐊᓕᒥᐅᑦ
ᐱᔭᒃᓴᐅᖏᑦᑐᐊᓗᖕᒥᒃ ᐊᑐᓕᕐᒪᑕ.
14ᓕᐸᓇᓂᐅᑉ ᖃᖅᑲᖏᑕ ᐊᐳᑎᖓ
ᐊᓯᐅᑐᐃᓐᓇᓚᐅᕐᓯᒪᕚ?
ᑰᖏᓪᓘᓐᓃᑦ ᐅᖓᓯᒃᑐᒥᑦ ᑰᒃᑐᑦ
ᐃᒤᕈᑎᑐᐃᓐᓇᓚᐅᕐᓯᒪᕚᑦ?
15ᐃᓄᖁᑎᒪᓕ ᐳᐃᒍᕐᐹᖓ;
ᐆᑕᒃᓴᓂᒃ ᑐᓂᕐᕈᓯᕐᐸᓕᕐᐳᑦ ᒎᑎᓐᖑᐊᓄᑦ;
ᐹᓪᓚᒃᐳᑦ ᐱᓂᐊᕐᓂᑎᒃ ᒪᓕᒡᓗᒋᑦ,
ᐃᓅᓯᕆᔭᐅᖁᔭᐅᓚᐅᕐᑐᖅ ᓯᕗᓕᕐᒥᖕᓄᑦ ᒪᓕᖏᓐᓇᒥᑦᔪᒃ
ᐊᑐᕐᑕᐅᕙᖏᑦᑐᑎᒎᕋᓱᐊᕐᐳᑦ ᐊᖅᑯᓯᐊᖑᓯᒪᖏᑦᑐᑎᒍᑦ.
16ᓄᓇᖓ ᐊᑐᕐᑐᒃᓴᐅᔪᓐᓃᕐᓂᐊᕐᐳᖅ,
ᓄᓇᒋᔭᐅᔭᕆᐊᒃᓴᖅ ᓇᕐᕈᒋᔭᐅᓕᕐᓗᓂ.
ᐊᖅᑯᓵᕐᑐᓕᒫᑦ ᑲᒪᓂᐊᖃᑦᑕᕈᒫᕐᐳᑦ
ᐃᓕᕿᑕᒫᕐᓗᑎᒡᓗ.
17ᐊᓄᕆᐅᑉ ᓴᓐᖏᔫᕕᖓᓂᑦ ᐊᓄᕌᕐᕕᐅᔪᑎᑐᑦ
ᓯᐊᒻᒪᕈᒫᕐᐳᑦ ᐊᑭᕋᖏᑕ ᓵᖏᓐᓂ.
ᑲᑉᐱᐊᓇᕐᑐᓪᓗ ᓇᓪᓕᐅᑎᒃᐸᑕ ᑐᓄᒐ ᑕᑯᔪᒫᕐᐹᑦ, ᑮᓇᕋᐅᖏᑦᑐᖅ.”
ᔨᕆᒤᐊᐅᑉ ᑐᖁᑕᐅᔪᒪᓂᖓ
18ᐃᓄᐃᓪᓕ ᐅᖃᕐᐳᑦ, “ᔨᕆᒤᐊ ᖃᓄᐃᓕᐅᕈᑎᒋᓚᐅᕐᓚᕗᑦ! ᑐᓂᕐᕈᓯᕐᑎᑦᓯᔩᑦ ᐱᖁᔭᓂᒃ ᐊᔪᕆᕐᑐᐃᓂᕆᕙᒃᑕᖏᑦ ᐊᓯᐅᑎᑕᐅᔭᕆᐊᖃᖏᒻᒪᑕ, ᐃᓕᓯᒪᑦᓯᐊᕐᑐᓪᓗ ᐅᖃᐅᑦᔪᐃᓂᖏᑦ, ᐱᔪᖃᓛᕐᑐᒥᒡᓗ ᐅᖃᕐᑎᑦ ᐅᖃᐅᓯᖏᑦ. ᔨᕆᒤᐊ ᐸᓯᔭᒃᓴᓕᐊᕆᓚᐅᕐᓚᕗᑦ ᐅᖃᐅᓯᖏᓪᓗ ᓈᓚᖏᓪᓗᒋᑦ.”
19ᑕᕝᕙ ᑐᒃᓯᐊᓕᕐᐳᖓ, “ᐊᑕᓃᖅ ᓈᓚᓚᐅᓐᖓ, ᐅᕙᓐᓂᒃ ᐸᓯᔭᒃᓴᓐᖑᕐᑎᑦᓯᓇᓱᐊᕐᑐᑦ ᐅᖃᐅᓯᖏᑦ ᑐᓵᓚᐅᒃᑭᑦ! 20ᐱᑦᓯᐊᕐᓂᖅ ᐱᐅᖏᑦᑐᒧᑦ ᐊᑭᓂᐊᕐᑕᐅᑦᔪᑎᖃᕐᑐᒃᓴᐅᕚ? ᑍᒤᑦᓴᕆᐊᖃᖏᒃᑲᓗᐊᕐᑎᓪᓗᒍ ᑕᑯᒋᑦ ᐃᑎᕐᓴᓕᐅᕆᕗᑦ ᐅᕙᓐᓂᒃ ᑐᖁᑦᓯᔪᒪᓪᓗᑎᒃ. ᐃᖅᑲᐅᒪᒋᑦ ᐅᖃᕐᕕᒋᓚᐅᕋᒃᑭᑦ ᑖᒃᑯᐊ ᐱᑦᔪᑎᒋᓪᓗᒋᑦ, ᐊᓯᕈᕐᑕᐅᖁᓇᒋᑦ ᓂᓐᖓᐅᓯᕐᓄᑦ. 21ᑍᒤᒻᒪᑦ ᕿᑐᕐᖓᖏᑦ ᑳᖕᓇᕐᑐᕐᔪᐊᒧᑦ ᐱᕐᓕᕋᓕᕐᓕᑦ; ᐅᓇᑕᕐᑐᓄᓪᓗ ᑐᖁᕋᕐᑕᐅᓕᕐᓕᑦ, ᓄᓕᐊᖏᑦ ᕿᑐᕐᒊᕈᑦᔭᐅᓕᕐᓕᑦ, ᐅᐃᒡᒐᕐᓂᐅᓕᕐᓗᑎᒡᓗ, ᐊᖑᑎᖏᓪᓗ ᑐᖁᕋᕐᑕᐅᓗᑎᒃ ᐋᓐᓂᐊᓇᕐᑐᓄᑦ, ᐃᓅᓱᒃᑐᖁᑎᖏᓪᓗ ᐅᓇᑕᕐᑐᓂ ᑐᖁᕋᕐᑕᐅᓗᑎᒃ. 22ᐃᒡᓗᖏᓐᓂ ᕿᐊᕙᓗᒃᑐᑦ ᑐᓴᕐᓴᐅᓕᕐᓕᑦ, ᑎᑭᑕᐅᑲᓪᓚᒃᑎᓪᓗᒋᑦ ᓵᓚᖃᕆᐊᕐᑐᕐᑐᓂᑦ, ᐃᔪᒃᑲᕐᕕᒃᓴᓐᓂᒃ ᐃᑎᕐᓴᓕᐅᕆᓚᐅᕐᒪᑕ, ᓂᒐᕐᕕᒃᓴᓕᐅᕐᓗᓂᖓᓗ ᐃᑎᒐᒃᑯᑦ. 23ᐊᑕᓃᖅ ᑲᐅᔨᒪᔧᓐᓇᕆᕙᑎᑦ ᑖᒃᑯᐊ ᑐᖁᑦᓯᓇᓱᐊᕐᓂᖏᑦ ᐅᕙᓐᓂᒃ. ᐱᐅᖏᑦᑐᓕᓂᖏᑦ ᐃᓱᒪᒋᔪᓐᓃᕐᑍᓕᒃᑭᑦ, ᐊᔪᕐᓂᖏᓪᓗ ᐲᔭᕐᑍᓕᓗᒋᑦ ᓵᖕᓂᑦ, ᓵᓚᒋᔭᐅᑎᒃᑭᑦ ᓂᓐᖓᐅᑦᔨᓂᕆᓛᕐᑕᕐᓄᓪᓗ ᑎᑭᑕᐅᑎᒃᑭᑦ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 18: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
