ᔨᕆᒤᐊᐅᑉ ᐊᒡᓚᖏᑦ 17
17
ᔫᑕᐅᑉ ᐊᔪᕐᓂᖓ ᓱᒋᐊᕐᑕᐅᓂᖓᓗ
1“ᔫᑕᐅᑉ ᐊᔪᕐᓂᖏᑦ ᓴᕕᕋᔭᒃᑯᑦ ᑎᑎᕋᕐᓯᒪᕗᑦ; ᐊᓕᒎᔭᕐᑐᑦ ᓯᑎᑎᒋᔪᒧᑦ ᐃᑎᕐᓴᓕᐅᕈᑎᓯᒪᓪᓗᑎᒃ ᑎᑎᕋᕐᓯᒪᕗᑦ ᐆᒻᒪᑎᖏᓐᓂ, ᑐᓂᕐᕈᓯᕐᕕᖏᑕᓗ ᓇᒡᔪᖏᖕᓂ. 2ᕿᑐᕐᖓᖏᑦ ᐊᐅᓚᔨᕗᑦ ᑐᓂᕐᕈᓯᕐᕕᖏᓐᓂᒃ ᒎᑎᓐᖑᐊᒧᑦ ᐊᓯᕋᒧᑦ, ᓇᐹᕐᑐᐃᑦ ᑐᖑᔪᐃᓐᓇᕐᑐᑦ ᓴᓂᐊᓐᓂ, ᐱᖑᐃᓪᓗ ᐳᕐᑐᔪᑦ ᖄᖏᓐᓂ. 3ᖃᖅᑲᓂ ᓄᓇᑐᐃᓐᓇᕐᒦᑦᑐᒥ, ᐊᔪᕐᓴᖏᑦᔪᑎᓯ ᑲᑎᕐᓱᐊᓯᓗ ᓇᒡᕚᕐᑕᒐᐅᑎᑦᓱᒫᕐᐸᒃᑲ ᐊᑭᓕᐅᑕᐅᓗᑎᒃ ᐊᔪᕐᓂᑦᓯᓐᓄᑦ ᓄᓇᓕᒫᑦᓯᓐᓂ. 4ᐱᓂᐊᕐᓂᓯ ᒪᓕᒡᓗᒋᑦ ᑭᖑᕐᖑᑎᔭᒃᓴᓯ ᐊᓯᐅᔨᔪᒫᕐᐸᓯ ᑐᓂᓚᐅᕐᑕᒃᑲ ᐃᓕᑦᓯᓐᓄᑦ, ᐊᑭᕋᓯᓐᓂᒃ ᐱᔨᑦᓯᕐᑎᑦᓱᒫᕐᐸᓯ ᓄᓇᒥ ᑲᐅᔨᒪᓐᖏᑕᑦᓯᓐᓂ, ᓂᓐᖓᐅᓯᕋ ᐃᑯᒪᑐᑦ ᐃᑯᐊᓪᓚᒃᑎᑕᐅᖕᒪᑦ ᐃᑯᐊᓚᔪᒫᕐᓗᓂᓗ ᐃᓱᖃᖏᑦᑐᒧᑦ.”
ᐊᑦᔨᒌᖏᑦᑐᑦ ᐅᖃᕈᓯᐅᓲᑦ
5ᐃᒫᒃ ᐊᑕᓂᖅ ᐅᖃᕐᐳᖅ:
“ᓇᕐᕈᓇᕐᐳᖅ ᐃᓄᖕᒥᒃ ᑕᑎᖃᕐᑐᖅ
ᑎᒥᐅᓪᓗ ᓴᓐᖏᓂᖓᓂᒃ ᓲᖑᓂᖃᕋᓱᒃᑐᖅ,
ᐆᒻᒪᑎᒥᒍᑦ ᕿᒤᓯᒪᔪᖅ ᐊᑕᓂᕐᒥᒃ.
6ᑖᓐᓇ ᐅᕐᐱᒐᕐᑎᑐᑦ ᓱᓇᖃᔪᐃᑦᑐᒦᑦᑐᑎᑐᑦ ᑍᒤᑉᐳᖅ,
ᐱᐅᔪᒥᒃ ᑕᑯᔭᒃᓴᖃᖏᑦᑐᑎᑐᑦ.
ᓴᓗᐊᖓᔪᒦᑦᓱᒫᕐᐳᖅ ᐃᓄᖃᔪᐃᑦᑐᒥ,
ᓄᓇᒥ ᑕᕆᐅᕐᒥ ᐃᓄᖃᖏᑦᑐᒥ.
7ᓮᒻᒪᕐᑎᑕᐅᑦᔪᑎᒃᓴᖃᕐᐳᖅ ᐊᑕᓂᕐᒥᒃ ᑕᑎᖃᕐᑐᖅ,
ᓂᕆᐅᒋᓗᒍ ᑕᑎᖃᕐᑐᖅ ᐊᑕᓂᕐᒥᒃ.
8 #
ᐃᓐᖏᕈᑦ 1:3. ᓇᐹᕐᑐᑎᑐᑦ ᑍᒤᑉᐳᖅ ᐃᒪᖃᑦᓯᐊᕐᑐᒥ ᐱᕈᕐᓯᒪᔪᑎᑐᑦ,
ᐊᒫᖏᓪᓗ ᐃᒫᓄᑦ ᑎᑭᐅᒪᑦᓯᐊᕐᑐᑎᑐᑦ,
ᓯᓚ ᐅᖅᑰᔪᐊᓘᓕᕋᓗᐊᕐᐸᑦ ᓯᕘᕋᖏᑦᑐᑎᑐᑦ,
ᐅᖃᐅᔭᖃᕐᑐᑎᑐᑦ ᑐᖑᔪᐃᓐᓇᕐᑐᓂᒃ,
ᐸᓂᕐᓇᕐᑐᖃᕋᓗᐊᕐᐸᑦ ᐃᓱᒫᓗᖏᑦᑐᑎᑐᑦ,
ᐱᕈᕐᑐᒃᓴᖁᑎᖏᑦ ᐱᕈᐃᓐᓇᐅᔭᕐᒪᑕ.
9ᐆᒻᒪᑎᓕ ᐅᐃᕖᓐᓂᕐᐹᖑᕗᖅ ᓱᓇᓕᒫᓂᑦ,
ᐱᐅᖏᑦᑐᕐᔪᐊᖑᓪᓗᓂᓗ;
ᑭᐊᓕ ᑐᑭᓯᔪᓐᓇᕐᐸᐅᒃ?
10 #
ᑕᑯᑎ 2:23;
ᐃᓐᖏᕈᑦ 62:12. ᐅᕙᖓ ᐊᑕᓂᖅ ᖃᐅᔨᓴᕈᓐᓇᕐᐳᖓ,
ᐃᓅᑉ ᐆᒻᒪᑎᖓᓂᒃ ᐃᓱᒪᖓᓂᒡᓗ,
ᑐᓂᓯᔪᓐᓇᕐᓗᖓᓗ ᐃᓅᑉ ᐱᓂᐊᕐᓂᖏᑦ ᒪᓕᒡᓗᒋᑦ,
ᐱᓂᐊᕐᓂᖏᑕ ᐱᕈᕐᑎᑕᖏᓐᓂᒃ.”
11ᐊᕿᒡᒋᐅᔭᑎᑐᑦ ᒪᓐᓂᒋᓐᖏᑕᒥᓂᒃ ᐃᕙᓕᕐᑐᑎᑐᑦ,
ᐊᖑᑦ ᓈᒻᒪᓈᖏᑦᑐᒃᑯᑦ ᐊᒃᓱᐃᓕᓯᒪᔪᖅ ᑍᒤᑦᑑᕗᖅ,
ᐃᓅᓯᖓᑕ ᐃᓚᖓᓂ ᐊᓯᐅᔨᔪᒫᕐᐳᖅ,
ᐃᓅᓯᐊᑕᓗ ᐃᓱᐊᓂ ᓯᓔᑦᑑᓂᖓ ᓇᓗᓇᕈᓐᓃᕈᒫᕐᐳᖅ.
12ᐃᒃᓯᕙᐅᑕᕐᔪᐊᖅ ᐱᓐᓇᕐᓇᕐᑐᕐᔪᐊᖅ ᐳᕐᑐᔪᓃᑉᐳᖅ,
ᐱᒋᐊᕐᓂᖓᓂᑦ ᐃᑦᔪᕐᓁᑦᑐᕕᖁᑎᑦᑕ ᐃᓂᒋᔭᖓ.
13ᐊᑕᓃᖅ ᐃᓴᕆᐊᓕᒥᐅᑦ ᓂᕆᐅᒋᔭᖃᕐᕕᒋᔭᖓᑦ,
ᐃᓕᖕᓂᒃ ᕿᒤᔪᑦ ᑲᓐᖑᓇᕐᑐᒦᑦᓱᒫᕐᐳᑦ;
ᐃᓕᖕᓂᒃ ᑐᓄᐃᔪᑦ ᐳᔪᕋᒃᑯᑦ ᐊᑎᓕᐅᕐᑕᐅᓯᒪᔪᑎᑐᑦ ᐊᓯᐅᔪᒫᕐᐳᑦ,
ᐊᑕᓂᕐᒥᒃ ᕿᒤᓚᐅᕐᒪᑕ,
ᐃᒥᕐᕕᒃᓴᒥᒃ ᐃᓅᓯᖃᕐᓇᕐᑐᒥᒃ.
ᔨᕆᒤᐊᐅᑉ ᐃᑲᔪᕐᑕᐅᔪᒪᓂᖓ ᐊᑕᓂᕐᒧᑦ
14ᐊᑕᓃᖅ ᐋᖅᑭᓚᐅᓐᖓ, ᑕᕝᕙ ᐋᖅᑭᖕᓂᐊᕐᐳᖓ; ᐱᐅᓕᓚᐅᓐᖓ ᑕᕝᕙ ᐱᐅᓕᔭᐅᓂᐊᕐᐳᖓ; ᐃᕝᕕᑐᐊᖅ ᓂᕐᑐᒐᒃᓴᕆᒐᒃᑭᑦ.
15ᑕᑯᒋᑦ, ᐅᖃᐅᑦᔭᐅᕙᒃᐳᖓ, “ᓇᐅᒡᓕ ᐊᑕᓂᐅᑉ ᐅᖃᐅᓯᖓ? ᒫᓐᓇ ᐊᑏ ᑎᑭᓕᕐᓕ!”
16ᐰᕐᓯᔨᐅᓂᓐᓂ ᓱᓕ ᕿᒤᓚᐅᕐᓯᒪᓐᖏᓚᖓ, ᐊᑕᓃᖅ ᖃᐅᔨᒪᕗᑎᑦ ᑲᑉᐱᐊᓇᕐᑐᓄᑦ ᑎᑭᑕᐅᖁᔨᓚᐅᖏᓐᓂᓐᓂ, ᐅᖃᐅᓯᕆᔭᓕᒫᒃᑲ ᖃᐅᔨᒪᕙᑎᑦ. 17ᑲᑉᐱᐊᓇᕐᑑᑦᑍᓕᒋᑦ ᐅᕙᓐᓄᑦ; ᕿᒫᕕᒃᓴᕆᒐᒃᑭᑦ ᑲᑉᐱᐊᓇᕐᑐᖃᓕᕐᐸᑦ. 18ᐊᑭᕋᕐᑐᕐᑎᒃᑲ ᑲᓐᖑᓇᕐᑐᒧᐊᕐᑎᒃᑭᑦ, ᑲᓐᖑᓇᕐᑐᒧᐊᕐᑎᓐᓇᖓ; ᓴᐱᓕᕐᑎᒃᑭᑦ ᓴᐱᕐᓇᕐᑐᒧᐊᕐᑎᓐᓇᖓ, ᐱᐅᖏᑦᑐᒧᑦ ᑎᑭᕝᕕᐅᑎᒃᑭᑦ; ᐊᓯᕈᒃᑭᑦ ᐊᓯᕈᕐᑕᐅᓇᕐᑐᒧᑦ ᒪᕐᕈᕕᓪᓗᐊᕐᑐᒧᑦ.
ᓴᐸᑎᒥᒃ ᐃᒃᐱᒍᓱᑦᓯᐊᕆᐊᖃᕐᓂᖅ
19ᐃᒫᒃ ᐊᑕᓂᐅᑉ ᐅᖃᐅᑎᕚᖓ: “ᐃᓄᐃᑦ ᐃᑎᕐᕕᒋᕙᒃᑕᖏᓐᓂ ᐃᑎᕐᑕᕐᕕᖕᒥ ᓇᖏᕆᐊᕐᑐᕆᑦ, ᔫᑕᐅᓪᓗ ᐊᖓᔪᖅᑳᕐᔪᐊᖏᑕ ᐃᑎᕐᕕᒋᕙᒃᑕᖏᓐᓂ, ᔨᕉᓴᓕᐅᓪᓗ ᐊᕙᓗᕐᔪᐊᖓᑕ ᐃᑎᕐᑕᕐᕕᓕᒫᖏᓐᓂ. 20ᐅᖃᐅᑎᓗᒋᓪᓗ, ‘ᐊᑕᓂᐅᑉ ᐅᖃᐅᓯᖏᓐᓂᒃ ᑐᓴᕆᑦᓯ, ᐊᖓᔪᖅᑳᕐᔪᐊᖑᔪᓯ ᐃᓄᑐᐃᓐᓇᐅᔪᓯᓗ ᔫᑕᒥ, ᔨᕉᓴᓕᒥᐅᑕᐅᔪᓯᓗ ᐃᑎᕐᑕᕐᕕᒃᑎᒍᑦ ᐃᑎᕐᐸᒃᑐᓯ. 21#ᓂᕼᐃᒤᐊ 13:15-22.ᐃᒫᒃ ᐊᑕᓂᖅ ᐅᖃᕐᒪᑦ: ᐅᔨᕐᓱᑦᓯᐊᕐᑐᒃᓴᐅᕗᓯ ᐃᓅᓯᓯ ᐱᓪᓗᒋᑦ, ᓴᐸᑎᒥ ᐊᒡᔭᕐᓯᔪᒃᓴᐅᖏᓐᓇᑦᓯ ᐃᑎᕐᑐᒃᓴᐅᓇᓯᓗ ᔨᕉᓴᓕᐅᑉ ᐃᑎᕐᑕᕐᕕᖏᑎᒍᑦ. 22#ᒨᓯᓯ ᐂᑉᐸᖏᑦ 20:8-10; ᒨᓯᓯ ᑕᓪᓕᒪᖏᑦ 5:12-14.ᐃᒡᓗᑦᓯᓐᓂᑦ ᐊᒡᔭᕐᓯᓗᓯ ᐊᓂᔪᒃᓴᐅᓐᖏᓚᓯ ᐱᓇᓱᐊᕐᑐᒃᓴᐅᓇᓯᓗ ᓴᐸᑎᒥ, ᓴᐸᑎᓕ ᐃᑦᔪᕐᓁᑎᑕᒃᓴᕆᕙᓯ, ᓯᕗᓕᓯ ᑍᒫᒃ ᐱᖁᓚᐅᕋᒃᑭᑦ. 23ᑖᒃᑯᐊᓕ ᓈᓚᓚᐅᓐᖏᓚᑦ ᑐᓴᓚᐅᓐᖏᓚᓪᓗ, ᓯᑎᔫᒐᓱᓚᐅᕐᐳᓪᓕ ᓈᓚᒍᒪᓇᑎᒡᓗ ᐅᖃᐅᑦᔫᓯᐊᒥᖕᓂᒃ.
24“‘ᓈᓚᑦᓯᐊᕈᑦᓯᓐᖓᓕ, ᐊᑕᓂᖅ ᐅᖃᕐᐳᖅ, ᓴᐸᑎᐅᑎᓪᓗᒍ ᐊᒡᔭᕐᓯᓗᓯ ᐊᕙᒻᒧᒐᕐᑍᓕᓗᓯ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖏᑎᒍᑦ, ᐃᑦᔪᕐᓁᑎᒃᑯᑦᓯᐅᒡᓗ ᓴᐸᑎ ᓴᓇᕕᒋᑦᑍᓕᓗᒍ. 25ᑕᕝᕙ ᐊᖓᔪᖅᑳᕐᔪᐊᕆᔭᓯ ᑍᕕᑎᐅᑉ ᑭᖑᕚᖏᓐᓂᑦ ᐱᓯᒪᔪᑦ ᐊᖓᔪᖅᑳᖁᑎᖏᓪᓗ ᐃᑎᕐᐸᖕᓂᐊᕐᐳᑦ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖏᑎᒍᑦ ᔫᑕᒥᐅᓂᒃ ᔨᕉᓴᓕᒥᐅᓂᒡᓗ ᐃᓚᖃᕐᓗᑎᒃ ᕿᒧᒃᓯᐅᑎᖁᑎᒥᒃᑎᒍᑦ, ᐃᒡᓗᒐᓴᒡᔪᐊᓪᓗ ᑖᒃᑯᐊ ᐃᓄᕾᓐᓇᕐᓂᐊᕐᐳᑦ ᐃᓱᖃᖏᑦᑐᒧᑦ. 26ᐃᓄᐃᓪᓗ ᑎᑭᑉᐸᒍᒫᕐᐳᑦ, ᔫᑕᐅᑉ ᓄᓇᓕᖁᑎᖏᓐᓂᑦ, ᓄᓇᓕᖕᓂᓪᓗ ᔨᕉᓴᓕᐅᑉ ᓴᓂᐊᓃᑦᑐᓂᑦ, ᐱᓐᔭᒥᓂᐅᓪᓗ ᓄᓇᖏᓐᓂᑦ, ᖃᖅᑲᒥᐅᓪᓗ ᑭᒡᓕᖓᓂᒥᐅᓂᑦ ᓂᒋᑉᒥᓗ ᓄᓇᖃᕐᑐᓂᑦ ᑐᓂᕐᕈᓯᕆᐊᕐᑐᕐᓗᑎᒃ ᐆᑕᒃᓴᓂᒃ, ᓂᐊᖂᔭᒃᓴᓂᒃ, ᐳᔫᕐᑎᑕᒃᓴᓂᒡᓗ ᖁᔭᓕᑦᔪᑎᒃᓴᓂᒡᓗ ᐊᑕᓂᐅᑉ ᐃᒡᓗᖓᓂ. 27ᓈᓚᖏᒃᑯᑦᓯᓐᖓᓕ ᓴᐸᑎᓗ ᐃᑦᔪᕐᓁᑎᖏᒃᑯᑦᓯᐅᒃ, ᐊᒡᔭᕐᓯᑦᑍᓕᖏᒃᑯᑦᓯᓗ ᓴᐸᑎᐅᑎᓪᓗᒍ ᔨᕉᓴᓕᐅᑉ ᐃᑎᕐᑕᕐᕕᖏᑎᒍᑦ, ᑕᕝᕙ ᐃᑎᕐᑕᕐᕕᖏᑦ ᐃᑯᐊᓪᓚᒍᒫᕐᐸᒃᑲ, ᔨᕉᓴᓕᒻ ᐊᖓᔪᖅᑳᒃᑯᕕᖓ ᓄᖑᑕᐅᔪᒫᕐᐳᖅ ᖃᒥᑕᐅᔪᓐᓇᕈᒫᓐᖏᓚᕐᓗ.’”
Currently Selected:
ᔨᕆᒤᐊᐅᑉ ᐊᒡᓚᖏᑦ 17: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
