ᔨᕆᒤᐊᐅᑉ ᐊᒡᓚᖏᑦ 14
14
ᓄᓇᐅᑉ ᐃᒤᕈᑎᓂᖓ
1ᑕᒪᑦᔭ ᐊᑕᓂᐅᑉ ᐅᖃᐅᓯᖏᑦ ᔨᕆᒤᐊᒧᑦ ᓄᓇᐅᑉ ᐸᓂᕈᒫᕐᓂᖓ ᐱᑦᔪᑎᒋᓪᓗᒍ.
2“ᔫᑕᒥᐅᑦ ᕿᒃᓵᓕᕐᐳᑦ, ᓄᓇᖓᑦ ᐸᓂᓕᕐᒪᑦ,
ᓄᓇ ᐱᓪᓗᒍ ᐅᒡᒍᐊᕐᐳᑦ, ᔨᕉᓴᓕᒥᐅᓪᓗ ᕿᓄᓂᖏᑦ ᑐᓴᕐᓴᐅᓕᕐᐳᑦ.
3ᐊᖓᔪᖅᑳᑦ ᐱᔨᒥᖕᓂᒃ ᐃᒥᕐᓯᐅᕐᑎᑦᓯᕗᑦ ᐃᒥᕐᑕᕐᕖᓪᓕ ᐃᒪᖃᓐᖏᓚᑦ,
ᐅᑎᕐᐳᑦ ᐃᒥᕐᑕᐅᑎᖏᑦ ᐃᒪᖃᕐᑎᓐᓇᒋᑦ,
ᓇᓗᓕᕐᐳᑦ ᑲᓐᖑᓱᓕᕐᓗᑎᒃ ᑮᓇᑎᒡᓗ ᒪᑐᐊᕐᐰᑦ.
4ᓄᓇ ᐸᓂᓕᕐᐳᖅ, ᓯᓚᓗᓚᐅᕐᓯᒪᖏᓐᓂᖓᓄᑦ,
ᐱᕈᕐᓰᕕᓕᕆᔩᑦ ᑲᓐᖑᓱᓕᕐᐳᑦ, ᑮᓇᑎᒡᓗ ᒪᑐᐊᕐᐰᑦ.
5ᐊᒡᓛᑦ ᑐᒃᑐᖓᔪᑦ ᐊᕐᓇᓪᓗᖏᑦ ᓄᕐᕋᒥᓂᒃ ᕿᒤᕗᑦ ᐃᕕᒃᓱᒐᖃᖏᓐᓂᖓᓄᑦ.
6ᓯᐅᑎᖅᑯᕐᑐᔪᑦ ᓄᔪᐊᕐᑐᑦ ᖃᖅᑲᓂ ᓂᑯᕕᖓᕗᑦ,
ᐊᒪᕉᔮᕐᑐᑎᑐᓪᓗ ᑲᑦᔭᑎᑐᑦ ᐊᕐᖓᔪᖅᑭᑉᐳᑦ ᐅᖃᖏᑦ ᓄᐃᑕᓪᓗᑎᒃ
ᑕᐅᑐᑦᓯᐊᕈᓐᓃᕐᓗᑎᒡᓗ ᓂᕿᒃᓴᖃᖏᓐᓂᕐᒧᑦ.
7ᐊᔪᕐᑐᓕᓂᕗᑦ ᐸᓯᔭᒃᓴᐅᑦᔪᑎᒋᒐᓗᐊᕐᐸᕗᑦ,
ᐊᑕᓃᕐᓕ, ᐃᑲᔪᕐᑎᒍᑦ ᐊᑏᑦ ᐱᑦᔪᑎᒋᓗᒍ;
ᑲᑕᒃᓯᒪᓂᕗᑦ ᐊᖏᔫᖕᒪᑦ, ᐃᓕᖕᓄᑦ ᐊᔪᕐᑐᓕᓚᐅᕋᑦᑕ.
8ᐃᓴᕆᐊᓕᒥᐅᑦ ᓂᕆᐅᒡᕕᑐᐊᕆᖕᒪᑎᑦ,
ᐱᐅᓕᔨᑐᐊᕆᓪᓗᑎᓪᓗ ᐊᑲᐅᖏᑦᑐᖃᓕᕐᑎᓪᓗᒍ,
ᓱᖕᒪᑦ ᓂᐅᕐᕈᐊᑎᑐᑦ ᓄᓇᒥ ᑍᒤᓕᐅᕐᕕᒋᕕᑎᒎᑦ?
ᐅᓐᓄᐊᒥᒃ ᐊᑕᐅᓯᕐᒥᒃ ᓯᓂᒃᑕᕐᑐᑎᑐᑦ.
9ᓱᖕᒪᑦ ᓇᓗᓕᕐᓯᒪᔪᑎᑐᑦ ᑍᒤᖃᑕᐅᕕᑦ?
ᐅᓇᑕᕐᑎᑐᑦ ᐊᔪᖏᑦᑐᕐᔪᐊᑐᑦ ᐃᑲᔪᕈᓐᓁᓪᓕᔪᑐᑦ,
ᐃᕝᕕᓪᓕ ᐊᑕᓃᖅ ᐊᑯᓐᓇᑦᑎᓐᓃᑉᐳᑎᑦ,
ᐃᓕᖕᓄᓪᓗ ᕾᖁᔭᐅᓯᒪᕗᒍᑦ; ᐊᑏ ᕿᒪᒃᑍᓕᑎᒍᑦ.”
10ᐃᒫᒃ ᑕᕝᕙ ᐊᑕᓂᖅ ᐅᖃᕐᐳᖅ ᐃᓄᖕᓄᑦ, “ᐅᕙᓐᓂᒃ ᕿᒤᖃᑦᑕᕐᓗᑎᒃ ᖁᕕᐊᓱᓚᐅᕐᐳᑦ, ᓄᖅᑲᖓᔭᕆᐊᒃᓴᖅ ᐊᔪᓚᐅᕋᒥᒃ; ᑍᒤᒻᒪᑦ ᐊᑕᓂᐅᑉ ᐃᓚᓕᐅᕈᓐᓃᕐᐰᑦ ᐱᐅᖏᑦᑐᓕᓂᖏᑦ ᐃᖅᑲᐅᒪᔭᑐᐊᕆᓕᕐᐰᑦ ᐊᔪᕐᑐᓕᓂᖏᓪᓗ ᐱᑦᔪᑎᒋᓪᓗᒋᑦ ᓱᒋᐊᕐᓂᐊᕐᐰᑦ.”
11ᑕᕝᕙ ᐊᑕᓂᐅᑉ ᐅᖃᐅᑎᒋᕚᖓ, “ᑐᒃᓯᐅᑎᑦᑍᓕᒃᑭᑦ ᖃᓄᐃᖏᑦᓯᐊᖁᓗᒋᑦ. 12ᑐᒃᓯᐊᕋᓗᐊᕐᐸᑕ ᓂᕆᑦᑍᓕᓗᑎᒃ, ᑐᒃᓯᐊᕐᓂᖏᑦ ᑐᓴᕐᓂᐊᓐᖏᓚᒃᑲ, ᐃᑯᐊᓚᑦᓯᓗᑎᒃ ᑐᓂᕐᕈᓯᕋᓗᐊᕐᐸᑕ ᓂᐊᖂᔭᒃᓴᓂᒡᓘᓐᓃᑦ ᑐᓂᕐᕈᑎᖏᑦ ᐃᓚᓕᐅᕐᓂᐊᓐᖏᓚᒃᑲ; ᐊᓯᕈᕐᑕᐅᑎᓐᓂᐊᕐᐸᒃᑲᓕ ᐅᓇᑕᕐᓂᒃᑯᑦ, ᑳᖕᓇᕐᑐᒃᑯᑦ, ᖃᓂᒪᓇᕐᑐᑎᒍᓪᓗ.”
13ᑕᕝᕙ ᐅᖃᕐᐳᖓ, “ᐊᑕᓃᖅ ᒎᑏ, ᑕᑯᒋᑦ, ᐱᔪᖃᓛᕐᑐᓂᒃ ᐅᖃᕐᑎᓄᑦ ᐅᖃᐅᑎᔭᐅᖃᑦᑕᕐᐳᑦ, ‘ᐅᓇᑕᕐᑐᓂᒃ ᑕᑯᓂᐊᓐᖏᓚᓯ, ᑳᖕᓇᕐᑐᖃᕐᓂᐊᓐᖏᓚᕐᓘᓐᓃᑦ, ᖃᓄᐃᓐᓇᕐᑐᖃᖏᑦᑐᒥᓕ ᐃᓅᑦᓯᐊᕐᓂᐊᕐᐳᓯ.’”
14ᐊᑕᓂᐅᓪᓗ ᐅᖃᐅᑎᕚᖓ, “ᓇᓚᐅᑦᑍᔩᓂᒃᑯᐊ ᐅᖃᕐᑎᑕᐅᓂᕋᖃᑦᑕᕐᑐᑦ ᐊᑎᓐᓂ ᓴᒡᓗᓪᓗᑎᒃ; ᐅᖃᖁᓗᒋᑦ ᑎᓕᓚᐅᓐᖏᓚᒃᑲ, ᐅᖃᕐᕕᒋᓚᐅᕐᓇᒋᓪᓗ. ᐅᖃᐅᓯᖏᑦ ᓱᓕᓐᖏᓚᑦ ᑕᑯᑎᑕᐅᓂᕋᕐᓂᖏᑦ, ᓯᕗᓂᒃᓴᒥᒃ ᐱᔪᒫᕐᓂᕅᓂᖏᑦ ᐊᑑᑎᖃᓐᖏᓚᑦ, ᐃᓱᒪᒋᔭᑐᐃᓐᓇᕐᒥᖕᓂᒃ ᓯᓔᕐᕆᒃᓯᕐᓗᑎᒃ ᐅᖃᐅᓯᖃᖃᑦᑕᕐᐳᑦ. 15ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ ᑖᒃᑯᓄᖓ ᐱᔪᒫᕐᑐᒃᓴᓂᒃ ᐅᖃᕐᑎᑕᐅᓂᕋᖃᑦᑕᕐᑐᓄᑦ ᐊᑎᕋ ᐊᑐᕐᓗᒍ ᑎᓕᓚᐅᖏᒃᑲᓗᐊᕐᑕᒃᑲ, ᐅᖃᕐᐸᒃᑐᑦ, ‘ᐅᓇᑕᕐᑐᖃᕐᓂᐊᓐᖏᓚᖅ ᑳᖕᓇᕐᑐᖃᕐᓂᐊᕋᓂᓗ ᑕᒫᓂ ᓄᓇᒥ’; ᑖᒃᑯᐊ ᐱᔪᖃᓛᕐᑐᒥᒃ ᐅᖃᕐᑎᐅᓂᕋᕐᑐᑦ ᐅᕙᓐᓄᑦ ᓇᖕᒥᓂᖅ ᐅᓇᑕᕐᓂᒃᑯᑦ ᑳᖕᓇᕐᑐᕐᔪᐊᒧᓪᓗ ᓄᖑᑕᐅᔪᒫᕐᐳᑦ. 16ᐃᓄᐃᓪᓗᑦᑕᐅᖅ ᐅᖃᓪᓚᒡᕕᒋᖃᑦᑕᓚᐅᕐᑕᖏᑦ ᐃᒋᑕᐅᔪᒫᕐᐳᑦ ᔨᕉᓴᓕᐅᑉ ᐊᖅᑯᑎᖏᓐᓄᑦ, ᑐᖁᕋᕈᒫᕐᐳᑦ ᐅᓇᑕᕐᓂᒃᑯᑦ ᑳᖕᓇᕐᑐᕐᔪᐊᒧᓪᓗ, ᐃᓗᕕᕐᑎᒃᓴᖃᕈᒫᓐᖏᓚᑦ, ᓄᓕᐊᖏᑦ, ᐃᕐᓂᖏᑦ, ᐸᓂᖏᓪᓗ. ᐱᐅᖏᑦᑐᓕᓯᒪᓂᖏᓐᓄᑦ ᑎᑭᕝᕕᐅᑎᑦᓱᒫᕐᐸᒃᑲ.”
17ᒪᑯᓂᖓ ᐅᖃᐅᓯᕐᓂᒃ ᐅᖃᐅᑎᒃᑭᑦ:
“ᐃᔩᒃᑲᒃ ᖁᕝᕕᐅᕐᓂᕐᒧᑦ ᑯᕕᑐᐃᓐᓇᓕᕐᐴᒃ
ᐅᓐᓄᐊᓕᒫᖅ ᐅᓪᓗᓕᒫᕐᓗ, ᓄᖅᑲᕈᓐᓁᓪᓕᓪᓗᖓᓗ,
ᐅᐃᒡᒐᓱᒃᑎᑦᑐᑦ ᐃᓄᖁᑎᒃᑲ ᐃᑎᔪᒥᒃ ᑭᓕᕐᑕᐅᖕᒪᑕ,
ᐋᓐᓂᐊᓇᕐᑐᕐᔪᐊᕐᒧᑦ ᐋᓐᓂᕐᑕᐅᓪᓗᑎᒃ.
18ᐱᕈᕐᓰᕕᖕᒧᐊᕈᒪ,
ᑕᑯᒋᑦ, ᓇᓂᑐᐃᓐᓇᖅ ᓴᕕᒡᔪᐊᒧᑦ ᑐᖁᑕᕕᓂᕐᓂᒃ ᑕᑯᕗᖓ,
ᐃᒡᓗᒐᓴᖕᓄᐊᕋᒪᓗ, ᑕᑯᒋᑦ, ᐱᕐᓕᕋᕐᑐᕕᓂᕐᓂᒃ ᑕᑯᒋᕗᖓ,
ᓇᓚᐅᑦᑍᔪᑦ ᑐᓂᕐᕈᓯᕐᑎᑦᓯᔩᓪᓗ ᑕᒪᕐᒥᒃ,
ᑲᔪᓯᕗᑦ ᐱᓇᓱᐊᕐᑕᒥᖕᓂᒃ ᖃᐅᔨᒪᓇᑎᒃ.”
ᐃᓄᐃᑦ ᐊᒃᓱᕈᕐᓗᑎᒃ ᕿᓄᓂᖏᑦ ᐊᑕᓂᕐᒧᑦ
19ᔫᑕᒥᐅᑦ ᓇᕐᕈᒋᓪᓚᕆᓕᕐᐱᒌᑦ?
ᓮᐅᓂᓗ ᑕᕐᓂᕐᐱᑦ ᐆᒥᒋᓕᕐᐸᐅᒃ?
ᓱᖕᒪᓪᓕ ᐋᓐᓂᕐᑕᐅᑎᑉᐱᑎᒎᑦ? ᐋᖅᑭᒃᑕᐅᔪᓐᓇᖏᑦᑐᒥᒃ?
ᖃᓄᐃᓐᓇᖏᑦᑐᒥᒃ ᕿᓂᕋᓗᐊᕐᐳᒍᑦ ᐱᐅᖏᑦᑐᒧᓪᓕ ᑎᑭᑎᑕᐅᕗᒍᑦ;
ᐋᖅᑭᒃᑕᐅᓂᕐᒥᒃ ᓂᕆᐅᒃᑲᓗᐊᕐᐳᒍᑦ ᑕᑯᒋᓪᓕ ᑲᑉᐱᐊᓇᕐᑐᖔᓄᑦ ᑎᑭᑎᑕᐅᕗᒍᑦ.
20ᐊᑕᓃᖅ ᓇᓗᓁᕐᓯᓕᕐᐳᒍᑦ ᐱᐅᖏᑦᑐᓕᓯᒪᓂᑦᑎᓐᓂᒃ;
ᓯᕗᓕᑦᑕᓗ ᐸᓯᔭᒃᓴᐅᓂᖏᓐᓂᒃ, ᐄᓛᒃ ᐊᔪᕐᑐᓕᓚᐅᕐᐳᒍᑦ ᐃᓕᖕᓄᑦ.
21ᐊᑏᑦ ᐱᑦᔪᑎᒋᓗᒍ ᓇᕐᕈᒋᓕᕐᑍᓕᑎᒍᑦ,
ᐃᒃᓯᕙᐅᑕᕐᔪᐊᑦ ᐅᐱᒋᔭᐅᔪᓐᓃᕐᑎᑦᑍᓕᒍᒃ;
ᐊᖏᖃᑎᖃᕐᓯᒪᓂᑎᑦ ᐅᕙᑦᑎᓐᓄᑦ ᐳᐃᒍᕐᑍᓕᒃᑭᑦ, ᓯᖁᑦᑎᕐᑍᓕᓗᒋᓪᓗ.
22ᐃᓅᖃᑎᒌᒡᔪᐊᖑᖃᑎᑦᑕ ᒎᑎᖏᑦ ᓱᓕᖏᑦᑐᑦ ᓯᓚᓗᒃᑎᑦᓯᔪᓐᓇᕐᐹᑦ?
ᓯᓚᒥᒡᓗ ᑯᕕᑐᐃᓐᓇᕐᑎᑦᓯᔪᓐᓇᕐᐹᑦ?
ᑍᒤᑎᑦᓯᔪᓐᓇᕐᑐᖃᓐᖏᓚᖅ ᐃᕝᕕᑦ ᐊᓯᖕᓂᒃ ᐊᑕᓃᖅ ᒎᑏᒃ,
ᐃᓕᖕᓂᑦ ᓂᕆᐅᒋᔭᖃᕐᐳᒍᑦ, ᐃᕝᕕᑐᐊᖅ ᑕᒪᒃᑯᐊᓕᒫᑦ ᐊᐅᓚᓐᓇᕕᒋᑦ.
Currently Selected:
ᔨᕆᒤᐊᐅᑉ ᐊᒡᓚᖏᑦ 14: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
