ᔨᕆᒤᐊᐅᑉ ᐊᒡᓚᖏᑦ 13
13
ᔨᕆᒤᐊᐅᑉ ᕿᑎᕐᒥᐅᑕᕐᑖᖁᔭᐅᓂᖓ
1ᐊᑕᓂᖅ ᐅᕙᓐᓄᑦ ᐃᒫᒃ ᐅᖃᕐᐳᖅ, “ᖃᓪᓗᓈᕐᑕᒥᒃ ᕿᑎᕈᑎᑖᕆᐊᕐᑐᓕᕆᑦ, ᐱᒍᕕᐅᒃ ᕿᑎᕈᓯᐅᑎᓂᐊᕐᐸᑦ, ᐃᒪᕐᒧᑦ ᒥᓱᒃᑎᑦᑍᓕᓗᒍ.” 2ᑕᕝᕙ ᕿᑎᕈᑎᑖᕆᐊᕐᑐᓚᐅᕐᐳᖓ ᐊᑕᓂᐅᑉ ᐅᖃᐅᓯᖓ ᒪᓕᒡᓗᒍ, ᐊᑎᓪᓗᒍᓗ. 3ᐊᑕᓂᐅᓪᓗ ᐅᖃᕐᕕᒋᒃᑲᓐᓂᓕᕆᕚᖓ ᐂᑉᐸᖓᓂᒃ, 4“ᕿᑎᕈᑎᑖᕆᔧᑦ ᐊᑐᓕᕐᑕᑦ, ᐃᕗᕅᑎᒧᑦ ᐃᔨᕆᐊᕐᑐᓕᕈᒃ ᕾᕐᑑᑉ ᖁᖕᓈᖓᓄᑦ.” 5ᑕᕝᕙ ᐃᔨᕆᐊᕐᑐᓚᐅᕐᐸᕋ ᐃᕗᕅᑎᒧᑦ ᐊᑕᓂᐅᑉ ᑍᒫᒃ ᐱᖁᖕᒪᖓ.
6ᐅᓪᓗᐃᑦ ᐅᓄᕐᑐᑦ ᑭᖑᓂᖓᑦᑎᒍᑦ, ᐊᑕᓂᐅᑉ ᐅᖃᕐᕕᒋᕚᖓ, “ᐃᕗᕅᑎᒧᑦ ᐂᓚᐅᕐᒥᒍᒃ ᕿᑎᕈᑏᑦ ᐃᔨᕆᐊᕐᑐᖁᓚᐅᕐᑕᕋ ᑍᑯᖓ.” 7ᐃᕗᕅᑎᒧᐊᕋᒪ, ᐃᔨᓚᐅᕐᑕᕋ ᕿᑎᕈᑎ ᐱᒋᕙᕋ ᐃᔨᕐᓯᕕᒋᓚᐅᕐᑕᓐᓂᑦ. ᑕᑯᒋᓪᓗ, ᕿᑎᕈᑎ ᐱᐅᔪᓐᓃᕐᐳᖅ; ᐊᑐᒐᒃᓴᐅᔪᓐᓃᕐᓗᓂᓗ.
8ᑕᕝᕙ ᐊᑕᓂᐅᑉ ᐅᖃᕐᕕᒋᓕᕐᐹᖓ; 9ᐅᖃᕐᓗᓂ: “ᐃᒫᒃ ᐊᑕᓂᖅ ᐅᖃᕐᐳᖅ: ᑍᒫᒃᑕᐅᖅ ᔫᑕᒥᐅᑦ ᔨᕉᓴᓕᒥᐅᓪᓗ ᐱᐅᔪᕆᓂᖏᑦ ᐱᐅᔪᓐᓃᕐᑎᑦᓱᒫᕐᐸᒃᑲ. 10ᐃᓄᐃᑦ ᐅᑯᐊ ᐱᐅᖏᑦᑐᓕᔪᑦ, ᐅᖃᐅᓯᓐᓂᒃ ᓈᓚᒍᒪᓐᖏᓚᑦ, ᐆᒻᒪᑎᒥᓗ ᓯᑎᓂᖏᓐᓄᑦ ᒎᑎᓐᖑᐊᓂᒃ ᒪᓕᒍᒪᕗᑦ ᑐᒃᓯᐊᕐᕕᖃᖃᑦᑕᕈᒪᓪᓗᑎᒃ, ᑍᒤᑦᓱᒫᕆᕗᑦ ᑖᑦᓱᑐᓇᖅ ᕿᑎᕈᑎᑐᑦ ᐊᑑᑎᒃᓴᖃᕈᓐᓃᕐᑐᑐᑦ. 11ᑍᒫᒃᑕᐅᖅ ᐊᖑᑦ ᕿᑎᕈᓯᓲᖑᖕᒪᑦ ᕿᓚᒃᓱᒍ, ᐃᓴᕆᐊᓕᒥᐅᓕᒫᑦ ᔫᑕᒥᐅᓕᒫᓪᓗ ᐅᕙᓐᓄᑦ ᕿᓚᒃᓱᕈᒫᕆᕙᒃᑲ, ᐊᑕᓂᖅ ᐅᖃᕐᐳᖅ, ᐃᓄᖁᑎᒋᔪᒪᓪᓗᒋᑦ ᓇᖕᒥᓂᕆᓗᒋᑦ ᓂᕐᑐᕐᑕᐅᑦᔪᑎᒋᓗᒋᓪᓗ, ᐅᐱᒋᔭᐅᑦᔪᑎᒋᓗᒋᓪᓗ, ᐅᕙᓐᓂᒡᓕ ᓈᓚᒍᒪᓚᐅᓐᖏᓚᑦ.”
ᕔᓂᖃᐅᑎᐅᑉ ᑐᑭᓕᐅᑦᔭᐅᓂᖓ
12“ᐅᑯᓂᖓ ᐅᖃᐅᓯᕐᓂᒃ ᐅᖃᐅᑎᒃᑭᑦ, ‘ᐃᒫᒃ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᕔᓂᖃᐅᑎᓕᒫᑦ ᕔᓂᒥᒃ ᑕᑕᑕᐅᔪᒫᕐᐳᑦ.’ ᐅᖃᐅᑎᒋᔪᒫᕐᐹᑎᓪᓗ, ‘ᑕᒪᓐᓇ ᖃᐅᔨᒪᕙᕗᑦ ᕔᓂᖃᐅᑏᑦ ᕔᓂᒥᒃ ᑕᑕᑕᐅᓲᖑᓂᖏᑦ.’ 13ᑍᒤᓕᒃᐸᑕ ᑕᕝᕙ ᐅᖃᐅᑎᓂᐊᕐᐸᑎᑦ, ‘ᐃᒫᒃ ᐊᑕᓂᖅ ᐅᖃᕐᐳᖅ, ᑕᑯᒋᑦ, ᐋᖓᔮᕐᑎᑦᓯᓂᐊᕐᐳᖓ ᓇᓂᑐᐃᓐᓇᖅ ᓄᓇᓕᖕᓂᒃ ᑕᒫᓂ: ᐊᖓᔪᖅᑳᕐᔪᐊᓂᒃ ᑍᕕᑎᐅᑉ ᐊᖓᔪᖅᑲᐅᕕᖓᓂᑦ ᐱᓯᒪᔪᓂᒃ, ᑐᓂᕐᕈᓯᕐᑎᑦᓯᔨᓂᒃ, ᒎᑎᐅᓪᓗ ᐱᔪᖃᓛᕐᑐᒥᒃ ᐅᖃᕐᑎᖏᓐᓂᒃ, ᔨᕉᓴᓕᒥᐅᓕᒫᓂᒡᓗ. 14ᐃᒻᒥᖕᓅᕐᑎᑦᓱᒫᕐᐸᒃᑲ ᓯᖁᑦᑎᖃᑦᑕᐅᑎᖁᓪᓗᖏᑦ, ᐃᕐᓂᕇᑦ ᐊᑖᑕᒋᑦ, ᐊᑕᓂᖅ ᐅᖃᕐᐳᖅ, ᓂᑲᒋᓂᐊᓐᖏᓚᒃᑲ ᓇᒡᓕᒋᓂᐊᓐᖏᓚᒃᑲᓘᓐᓃᑦ, ᐊᓯᕈᕐᑕᐅᖁᓪᓗᒋᑦ.’”
ᔨᕆᒤᐊᐅᑉ ᐃᓂᕐᑎᕆᓂᖓ ᐱᐅᔪᕆᓂᐅᑉ ᐅᓗᕆᐊᓇᕐᓂᖓᓂᒃ
15ᑐᓴᕐᓯᓐᖓ ᓈᓚᒃᓯᓐᖓᓗ, ᐱᐅᔪᕆᖏᓪᓗᓯ,
ᑍᒫᒃ ᐊᑕᓂᖅ ᐅᖃᕐᒪᑦ.
16ᐊᑕᓂᖅ ᒎᑎᓯ ᓂᕐᑐᕐᓯᐅᒃ ᑖᕐᓯᑎᑦᓯᖏᓐᓂᖓᓂ,
ᐹᓪᓚᖁᓇᓯ ᖃᖅᑬᑦ ᑕᕐᕆᑎᑕᐅᓕᕐᐸᑕ ᑖᕐᑐᒧᑦ,
ᖃᐅᒪᔪᒥᒃ ᕿᓂᕋᓗᐊᕈᑦᓯ ᑖᑦᓱᒪ ᑖᕐᓯᑎᑦᓱᒫᑉᐹ ᑖᕐᑐᕐᔪᐊᖑᓕᕐᓗᓂ.
17ᓈᓚᖕᓂᐊᖏᒃᑯᑦᓯ,
ᑕᕐᓂᒃᑯᑦ ᐃᔨᕋᕐᑐᕐᓗᖓ ᕿᐊᑦᔪᑎᒋᔪᒫᕐᐸᑦᓯ ᐱᐅᔪᕆᓂᓯ ᐱᑦᔪᑎᒋᓗᒍ;
ᖁᕝᕕᐅᕈᑎᒋᕐᔪᐊᕈᒫᕐᐸᑦᓯ, ᐊᑕᓂᐅᑉ ᐃᓅᖁᑎᖏᑦ ᑎᒍᔭᐅᔪᒫᕐᒪᑕ ᐊᐅᓪᓚᕈᑦᔭᐅᓗᑎᒃ.
18ᐊᖓᔪᖅᑳᕐᔪᐊᖅ ᐊᓈᓇᖓᓗ ᐅᖃᐅᑎᒃᑭᒃ, ᐊᖓᔪᖅᑲᐅᕕᑦᓯᓐᓂᒃ ᐲᓕᕆᑦᓯᒃ, ᐊᖓᔪᖅᑳᕐᔪᐊᕐᓯᐅᑎᓯᒃ ᓂᐊᖂᑏᒃ ᑕᑯᒥᓇᕐᑐᑦ ᓂᐊᖁᑦᓯᖕᓂᑦ ᐲᕐᑕᐅᓯᖕᒪᑕ. 19ᐃᒡᓗᒐᓴᒡᔪᐊᑦ ᓂᒋᑉᒦᑦᑐᑦ ᓇᒧᓐᖓᕐᕕᒃᓴᖃᕈᓐᓃᕐᒪᑕ, ᒪᑐᐃᕐᑕᐅᔪᓐᓇᕈᓐᓃᕐᓗᑎᒡᓗ; ᔫᑕᒥᐅᓕᒫᑦ ᐊᐅᓪᓚᕈᑦᔭᐅᕗᑦ ᐅᖓᓯᒃᑐᒧᑦ ᓄᓇᒋᓐᖏᑕᒥᖕᓄᑦ.
20“ᑕᑯᓴᓕᕆᑦᓯ ᑕᑯᓗᓯᓗ ᐅᓐᓄᐊᓪᓗᐊᑉ ᓇᓛᓂᑦ ᑎᑭᓴᕐᑐᕐᑐᓂᒃ. ᓇᐅᒡᓕᑍᒪ ᓰᐲᑦ ᑲᒪᒋᓂᐊᓚᐅᕐᑕᓯ? ᓰᐱᖁᑎᒋᓂᕋᕐᓗᒋᑦ ᐅᐱᒋᕙᓚᐅᕐᑕᓯ? 21ᖃᓄᕐᓕ ᐅᖃᕐᓂᐊᕐᐱᓰ? ᐊᖓᔪᖅᑲᕐᑖᕈᑦᓯ ᐃᑲᔪᕐᑎᒋᓂᐊᕋᓱᒋᓪᓗᒋᑦ ᐊᒡᓛᑦ ᐃᓕᓴᓚᐅᕐᑕᑦᓯᓐᓄᑦ ᑕᐱᕆᔪᒪᓪᓗᒋᑦ, ᑕᕝᕙ ᐋᓐᓂᐊᒐᔭᓐᖏᓚᓰ? ᐊᕐᓇᑎᑐᑦ ᐃᕐᓂᓱᒃᑐᑎᑐᑦ? 22ᐆᒻᒪᑎᑦᓯᓐᓂ ᐅᖃᕈᒫᕐᐳᓯ, ᓱᖕᒪᑦ ᑍᒤᑦᑐᒦᑉᐱᑖ? ᐅᓄᕐᑐᓂᒃ ᐊᔪᕐᑐᓕᓯᒪᓂᑦᓯᓐᓄᑦ ᑍᒤᑉᐳᓯ ᖁᓄᔪᕐᓂᐊᕐᑕᐅᔪᑎᑐᑦ ᐊᓐᓄᕌᑎᑦ ᐲᔭᕐᑕᐅᖕᒪᑕ ᐋᓐᓂᕐᓯᕐᑕᐅᓪᓗᑎᓪᓗ. 23ᐃᑎᐅᐱᐊᒥᐅᑕᖅ ᐅᕕᓂᖕᒥᑕ ᑕᕐᓴᖓᓂᒃ ᐊᓯᑦᔩᔪᓐᓇᕐᐹ? ᐅᕝᕙᓘᓐᓃᑦ ᓛᔭᐅᔮᕐᑑᑉ ᑕᕐᓴᓪᓛᒋᔭᓂ ᖁᐱᓴᕈᐊᑦᑐᑦ ᐲᔭᕈᓐᓇᕐᐸᒌᑦ? ᐱᐅᔪᒥᒃ ᐱᓇᓱᐊᓕᕈᓐᓇᖏᓐᓂᕗᓯ ᐱᐅᖏᑦᑐᒥᒃ ᓱᖏᐅᑎᓯᒪᓂᕐᒧᑦ. 24ᓴᓃᔭᕐᓂᑯᑎᑐᑦ ᐊᕕᐅᖅᑲᕐᑎᓐᓂᐊᕐᐸᑦᓯ ᐊᓄᕆᒧᑦ ᑎᒃᑕᐅᔪᑎᑐᑦ ᓱᓇᖃᔪᐃᑦᑐᒥᑦ ᐱᔪᒧᑦ. 25ᑖᒃᑯᐊ ᑕᕝᕙ ᓄᓇᖁᑎᓯ ᓇᓚᐅᑦᑖᕈᑎᒃᑯᑦ ᑭᒡᓕᓕᐅᕐᓯᒪᔪᑦ, ᐃᓕᑦᓯᓐᓄᑦ ᐱᔭᐅᖁᓪᓗᒋᑦ ᓇᓗᓁᕐᓯᒪᔭᒃᑲ, ᐊᑕᓂᖅ ᐅᖃᕐᐳᖅ, ᐅᕙᓐᓂᒃ ᐳᐃᒍᓚᐅᕋᑦᓯ ᑕᑎᖃᓕᕐᓗᓯᓗ ᓱᓕᖏᑦᑐᓂᒃ. 26ᐊᓐᓄᕌᓯ ᐲᔭᕐᓗᒋᑦ ᑮᓇᑦᓯᓐᓄᑦ ᒪᑑᑎᒋᔪᒫᕐᐸᒃᑲ, ᑲᓐᖑᒋᔭᓯ ᑕᑯᔭᐅᖁᓪᓗᒋᑦ. 27ᓇᕐᕈᓇᕐᑐᓕᓂᓯ ᑕᑯᓯᒪᒐᒃᑭᑦ, ᐊᓯᓐᓂᐊᕐᓯᒪᓂᓯ ᐱᔪᒪᓗᐊᕐᓂᓯᓗ, ᑲᓐᖑᓱᒐᓯ ᓄᓕᐊᕐᓃᑦ ᐱᓇᓱᐊᓚᐅᕐᑕᓯ ᑕᑯᓯᒪᕙᒃᑲ, ᖃᖅᑬᑦ ᖄᖏᓐᓂ ᓇᑎᕐᓇᓂᓗ. ᑲᑉᐱᐊᓐᓇᒦᖑᔪᓯ ᔨᕉᓴᓕᒥᐅᑦ! ᖃᓄᖅ ᐊᑯᓂᐅᑎᒋᔪᖅ ᓴᓗᒤᑦᑑᓂᐊᕐᐱᓰ?”
Currently Selected:
ᔨᕆᒤᐊᐅᑉ ᐊᒡᓚᖏᑦ 13: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
