ᔨᕆᒤᐊᐅᑉ ᐊᒡᓚᖏᑦ 11
11
ᔨᕆᒤᐊ ᐊᖏᖃᑎᒌᖕᓂᕐᓗ
1ᐅᑯᐊ ᐅᖃᐅᓰᑦ ᔨᕆᒤᐊᒧᑦ ᑎᑭᓚᐅᕐᐳᑦ ᐊᑕᓂᕐᒥᑦ, ᐅᖃᕐᓗᓂ, 2“ᑐᓴᕆᑦ ᑖᑦᓱᒪ ᐊᖏᖃᑎᒌᖕᓂᐅᑉ ᐅᖃᐅᓯᖏᓐᓂᒃ, ᐅᖃᐅᓯᕆᓗᒋᓪᓗ, ᔫᑕᒥᐅᓄᑦ ᔨᕉᓴᓕᒥᐅᓄᓪᓗ. 3ᐅᖃᐅᑎᓗᒋᓪᓗ, ᐃᒫᒃ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ: ᓇᕐᕈᓇᕐᓯᓕ ᐊᖏᖃᑎᒌᖕᓂᐅᑉ ᐅᖃᐅᓯᖏᓐᓂᒃ ᓈᓚᖏᑦᑐᖅ. 4ᓯᕗᓕᓯᓐᓂᒃ ᐱᖁᔨᓚᐅᕋᒪ ᐊᐅᓪᓚᕐᑎᓪᓗᒋᑦ ᐄᑦᔨᑉᑎᒥᑦ, ᓴᕕᕋᔭᒃᓴᒥᒃ ᐊᐅᒃᑎᑦᓯᕕᒃᑎᑐᑦ ᑍᒤᑦᑐᒦᕝᕕᒋᔭᖓᓂᑦ, ᐅᖃᕐᓗᖓᓗ, ᓂᐱᒐ ᓈᓚᒃᑕᒃᓴᕆᕙᓯ, ᐱᖁᔨᑦᔪᑎᒋᔭᓕᒫᒃᑲᓗ ᒪᓕᒡᓗᒋᑦ. ᑕᕝᕙ ᐃᓄᖁᑎᒋᓂᐊᕐᐸᑦᓯ, ᐅᕙᖓᓗ ᒎᑎᒋᓂᐊᕐᐸᑦᓯᓐᖓ. 5ᐅᖃᕕᒃᓗᖓ ᐊᖏᒻᒪᕆᒍᑎᒋᓚᐅᕐᑕᕋ ᓯᕗᓕᑦᓯᓐᓄᑦ ᓱᓕᖁᓪᓗᒍ, ᓄᓇᑖᕐᑎᑦᓱᒪᓚᐅᕋᒃᑭ ᒪᒪᕐᑐᓂᒃ ᓂᕿᒃᓴᖃᑦᓯᐊᕐᑐᒥᒃ ᐊᔪᕐᓴᕐᓇᖏᑦᑐᒥᓗ ᐅᓪᓗᒥ ᓄᓇᒋᓕᕐᑕᑦᓯᓐᓂᒃ.” ᑕᕝᕙ ᑭᐅᕙᕋ, “ᐊᑕᓃᖅ, ᑍᒤᓕᕐᓕ.”
6ᐊᑕᓂᐅᓪᓗ ᐅᖃᐅᑎᕚᖓ, “ᑕᒪᒃᑯᐊᓕᒫᑦ ᐅᖃᐅᓯᕆᒃᑭᑦ ᔫᑕᒥᐅᓂ ᔨᕉᓴᓕᒥᐅᓂᓗ; ᑐᓴᕆᑦᓯ ᐊᖏᖃᑎᒌᖕᓂᐅᑉ ᒪᓕᒃᑕᐅᖁᔭᖏᓐᓂᒃ ᓈᓚᒃᑐᒃᓴᐅᕗᓯ. 7ᑍᒪᓐᖓᑦ ᓯᕗᓕᓯ ᐊᐅᓪᓚᕐᑎᓚᐅᕋᒃᑭᑦ ᐄᑦᔨᑉᑎᒥᑦ ᐅᓪᓗᒥᒧᑦ ᑎᑭᓪᓗᒍ, ᐅᖃᐅᑎᖃᑦᑍᓐᓇᓚᐅᕐᐸᒃᑲ ᐅᓄᕐᑐᐃᓱᕐᓗᒋᑦ ᓂᐱᓐᓂᒃ ᓈᓚᒃᑐᒃᓴᐅᓂᖏᓐᓂᒃ. 8ᑐᓴᓚᐅᓐᖏᓚᓪᓕ ᓈᓚᒐᓱᐊᓚᐅᓐᖏᓚᓪᓘᓐᓃᑦ ᒪᓕᖔᓚᐅᕐᐳᓪᓕ ᐆᒻᒪᑎᒥ ᓯᑎᔫᑦᔪᑎᒋᔭᖏᓐᓂᒃ ᐱᐅᖏᑦᑐᓂᒃ. ᑍᒤᒻᒪᑦ ᑐᓂᓚᐅᕐᐸᒃᑲ ᐊᖏᖃᑎᒌᖕᓂᐅᑉ ᐅᖃᐅᓯᖏᓐᓂᒃ, ᒪᓕᒃᑕᐅᖁᓪᓗᒋᑦ ᑖᒃᑯᓄᖓ, ᒪᓕᒍᒪᓚᐅᓐᖏᓚᓪᓕ.”
9ᐊᑕᓂᐅᓪᓕ ᐅᖃᐅᑎᒃᑲᓐᓂᕆᕚᖓ, “ᐋᖅᑭᒃᓱᐃᓯᒪᔪᖃᕐᐳᖅ ᓈᒻᒪᖏᑦᑐᒥᒃ ᔫᑕᒥᐅᓂ ᔨᕉᓴᓕᒥᐅᓂᓗ. 10ᓯᕗᓕᕆᓚᐅᕐᑕᒥ ᐊᔪᕐᑐᓕᑦᔪᑎᒋᕙᓚᐅᕐᑕᖏᓐᓄᑦ ᐅᑎᕐᒪᑕ, ᓈᓚᒍᒪᕙᓚᐅᖏᑦᑐᓄᑦ ᐅᖃᐅᓯᕐᓂᒃ, ᐊᓯᓐᓂᒡᓗ ᒎᑎᖃᕋᓱᐊᕐᐳᑦ ᐱᔨᑦᓯᕈᒪᔭᒥᖕᓂᒃ; ᐃᓴᕆᐊᓕᒥᐅᑦ ᔫᑕᒥᐅᓪᓗ ᑕᒪᕐᒥᒃ ᓯᖁᒥᑦᑎᓯᒪᖕᒪᑕ ᓯᕗᓕᖏᓐᓄᑦ ᐊᖏᖃᑎᒌᒍᑎᒋᓯᒪᔭᓐᓂᒃ.” 11ᑍᒤᒻᒪᑦ ᐃᒫᒃ ᐊᑕᓂᖅ ᐅᖃᕐᐳᖅ, “ᑕᑯᒋᑦ ᐱᐅᖏᑦᑐᒧᑦ ᑎᑭᑕᐅᑎᓐᓂᐊᕐᐸᒃᑲ ᕿᒫᔪᓐᓇᕐᓂᐊᓐᖏᑕᖓᓐᓂᒃ, ᐅᕙᓐᓂᒃ ᑕᑎᖃᕋᓱᒃᑲᓗᐊᕐᐸᑕ, ᑐᓴᕐᓂᐊᓐᖏᓚᒃᑲ. 12ᔫᑕᐅᑉ ᐃᒡᓗᒐᓴᖏᑦ ᔨᕉᓴᓕᒥᐅᓪᓗ ᐃᓄᖏᑦ, ᑕᑎᖃᕋᓱᐊᕈᒫᕐᐳᑦ ᒎᑎᓐᖑᐊᓂᒃ ᑐᒃᓯᐊᕐᕕᒋᕙᒃᑕᒥᖕᓂᒃ, ᐱᐅᓕᔨᒋᔪᓐᓇᕐᓂᐊᓐᖏᓔᓪᓕ ᑲᑉᐱᐊᓇᕐᑐᒧᑦ ᑎᑭᑕᐅᒍᑎᒃ. 13ᔫᑕᒥᐅᑕᐅᔪᓯ ᒎᑎᖃᓕᕐᐳᓯ ᓄᓇᖁᑎᑦᓯᑐᑦ ᐅᓄᕐᑎᒋᔪᓂᒃ; ᑐᓂᕐᕈᓯᕐᕕᖃᐅᓕᕐᓗᓯᓗ ᔨᕉᓴᓕᒥᐅᑦ ᐊᖅᑯᑎᖏᑎᑐᑦ ᐅᓄᕐᑎᒋᔪᓂᒃ ᓇᕐᕈᓇᕐᑐᓂᒃ, ᒎᑎᓐᖑᐊᒧᑦ ᐰᓕᒧᑦ ᐃᓯᕐᓗᐊᕐᓂᑎᑦᓯᕕᑦᓯᓐᓂᒃ. 14ᑍᒤᒻᒪᑦ ᐃᓄᐃᑦ ᑖᒃᑯᐊ ᑐᒃᓯᐅᑎᑦᑍᓕᒃᑭᑦ, ᕿᓄᑦᔪᑎᒋᑦᑍᓕᒃᑭᑦ ᑐᒃᓯᐅᑎᑦᑍᓕᓗᒋᓪᓗ, ᐅᖁᒤᒃᓴᓕᕈᑎᒃ ᑐᒃᓯᐊᕋᓗᐊᕐᐸᑕ ᑐᓴᕐᓂᐊᓐᖏᓚᒃᑲ.
15“ᓱᔪᓄᑯᐊ ᓇᒡᓕᒋᔭᒃᑲ ᐃᒡᓗᓐᓃᑉᐸᑦ, ᐱᐅᖏᑦᑐᓕᔨᑐᐃᓐᓇᐅᓪᓗᑎᒃ? ᐊᖏᕈᑏᑦ ᑐᓂᕐᕈᑎᒋᔭᓯᓗ ᐆᒪᔪᐃᑦ ᑲᑉᐱᐊᓇᕐᑐᒥᒃ ᓇᓪᓕᐅᑎᔪᒃᓴᒥᒃ ᓄᖅᑲᕐᑎᑦᓯᔪᓐᓇᕋᓱᒋᕕᓯᐅᒃ? ᐱᐅᖏᑦᑐᓂᒃ ᐊᑐᕈᒪᔭᑦᓯᓐᓂᒃ ᑲᔪᓯᑐᐃᓐᓇᕐᑎᓪᓗᓯ ᐅᐱᒋᔭᐅᑦᔪᑎᒃᓴᐅᓇᓱᒋᕕᓯᐅᒃ ᑕᒪᓐᓇ? 16ᐊᑕᓂᐅᑉ ᑍᕙᓚᐅᕐᐹᓯ, ‘ᐆᒪᑦᓯᐊᕐᑐᖁᑎᒋᓂᕋᕐᓗᓂᓯ ᓇᐹᕐᑐᑎᑐᑦ ᐅᕐᓱᒃᓴᕐᑕᓕᒃᑎᑐᑦ ᐱᕈᕐᕕᐅᓯᒪᑦᓯᐊᕐᓂᕐᒥᖕᓄᑦ ᑕᑯᒥᓇᕐᑐᑎᑐᑦ’; ᑲᓪᓕᕐᒧᓪᓕ ᐃᑯᐊᓪᓚᒃᑕᐅᔪᒫᕐᐳᑦ, ᓇᐹᕐᑑᓪᓗ ᐊᕙᓚᖓᔪᖏᑎᑐᑦ ᐊᓯᕈᕐᑕᐅᓗᑎᒃ.
17“ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑕ ᐱᕈᕐᑎᓚᐅᕋᓗᐊᕐᒪᓯ, ᐃᓴᕆᐊᓕᒥᐅᓪᓕ ᔫᑕᒥᐅᓪᓗ ᐅᕙᓐᓂᒃ ᓂᓐᖓᒃᓮᓯᒪᕗᑦ ᐱᐅᖏᑦᑐᓕᓂᕐᒥᖕᓄᑦ, ᑐᓂᕐᕈᓯᕐᓗᑎᒃ ᒎᑎᓐᖑᐊᒧᑦ ᐰᓕᒧᑦ.”
ᔨᕆᒤᐊᐅᑉ ᑐᖁᑕᐅᔪᒪᓂᖓ
18ᐊᑕᓂᐅᓪᓕ ᖃᐅᔨᑎᓚᐅᕐᒪᖓ ᖃᐅᔨᓚᐅᕐᐳᖓ; ᑕᑯᑎᓚᐅᕐᒪᖓ ᐱᐅᖏᑦᑐᓂᒃ ᐱᓇᓱᐊᕈᒪᔭᖏᓐᓂᒃ. 19ᖃᐅᔨᒪᓇᖓᓕ ᓄᕐᕋᐅᔭᕐᑎᑐᑦ ᑐᖁᑕᐅᕕᒃᓴᒥᓄᑦ ᐋᑕᐅᓕᕐᑐᑎᑐᑦ ᑍᒤᓚᐅᕐᐳᖓ. ᖃᐅᔨᒪᓚᐅᓐᖏᓚᖓ ᐋᖅᑭᒃᓱᐃᓯᒪᔪᕕᓂᐅᓕᕐᑎᓪᓗᒋᑦ ᑐᖁᑦᓯᔪᒪᓪᓗᑎᒃ ᐅᕙᓐᓂᒃ, ᐅᖃᕐᓗᑎᒃ, “ᓇᐹᕐᑐᖅ ᐊᓯᕈᓚᐅᕐᓚᕗᑦ ᐱᕈᕐᑐᖏᓪᓗ ᐆᒪᔪᑦ ᓄᓇᖓᓂᑦ ᓇᑲᓚᐅᕐᓚᕗᑦ, ᐊᑎᖓᓗ ᐃᖅᑲᐅᒪᔭᐅᔪᓐᓁᖁᓪᓗᒍ.”
20ᐊᑕᓃᕐᓕ ᖁᑦᓯᖕᓂᕐᐸᐅᔪᑎᑦ, ᓈᒻᒪᓈᕐᑐᒥᒃ ᐃᖅᑲᕐᑐᐃᔪᑎᑦ, ᐃᓄᐃᓪᓗ ᐆᒻᒪᑎᖓᓃᑦᑐᓂᒃ ᐃᓱᒪᖓᓃᑦᑐᓂᒡᓗ ᖃᐅᔨᓴᕈᓐᓇᕐᑐᑎᑦ, ᐊᑭᓂᐊᕐᓂᖅ ᑖᒃᑯᓄᖓ ᐃᓕᖕᓄᑦ ᑐᓂᖔᕐᐸᕋ.
21ᑍᒤᒻᒪᑦ ᐃᒫᒃ ᐊᑕᓂᖅ ᐅᖃᕐᐳᖅ, “ᐊᖑᑎᓄᑦ ᓄᓇᒥ ᐊᓇᑑᑎᒦᑦᑐᓄᑦ, ᑐᖁᑦᓯᔪᒪᔪᓄᑦ ᐃᓕᖕᓂᒃ ᐅᖃᕐᓗᑎᒡᓗ, ‘ᐊᑕᓂᐅᑉ ᐊᑎᖓᓂ ᐅᖃᖁᔭᖏᓐᓂᒃ ᐅᖃᕐᑍᓕᒋᑦ, ᐅᖃᑐᐊᕈᕕᑦ ᑐᖁᓐᓂᐊᕐᐸᑦᑎᒋᑦ.’” 22ᑍᒤᒻᒪᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᒫᒃ ᐅᖃᕐᐳᖅ, “ᑕᑯᒋᑦ, ᓱᒋᐊᕐᓂᐊᕐᐸᒃᑲ ᐃᓅᓱᒃᑐᖁᑎᖏᑦ ᑐᖁᑕᐅᔪᒫᕐᐳᑦ ᐅᓇᑕᕐᑐᓂ; ᐃᕐᓂᖏᓪᓗ ᐸᓂᖏᓪᓗ ᑳᖕᓇᕐᑐᒧᑦ ᐱᕐᓕᕋᕈᒫᕐᐳᑦ. 23ᐊᒥᐊᒃᑯᖃᕐᓂᐊᓐᖏᓚᓪᓗ, ᐊᓇᑑᑎᒥᐅᑦ ᐃᓄᖏᑦ ᐊᓯᕈᕐᑕᐅᓇᕐᑐᒧᑦ ᑎᑭᑕᐅᔪᒫᕐᐳᑦ, ᐊᕐᕌᒍᒥ ᓱᒋᐊᕐᑕᐅᕕᒃᓴᖓᑦ ᓇᓪᓕᐅᑎᒃᐸᑦ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 11: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
