ᔨᕆᒤᐊᐅᑉ ᐊᒡᓚᖏᑦ 10
10
ᒎᑎᓐᖑᐊᖃᕐᓂᖅ ᓱᓕᔪᒥᒡᓗ ᒎᑎᒥᒃ ᐅᒃᐱᕆᔭᖃᕐᓂᖅ
1ᑐᓴᕆᑦᓯ ᐊᑕᓂᐅᑉ ᐅᖃᐅᓯᕆᔭᖏᓐᓂᒃ ᐃᓴᕆᐊᓕᒥᐅᑕᐅᔪᓯ. 2ᐊᑕᓂᖅ ᐃᒫᒃ ᐅᖃᕐᐳᖅ:
“ᐊᓯᑦᓯ ᐃᓕᖅᑯᓯᖏᓐᓂᒃ ᒪᓕᒐᓱᐊᕐᑍᓕᒋᑦᓯ
ᑲᑉᐱᐊᓱᒃᑍᓕᒋᑦᓯᓗ ᓇᓗᓁᒃᑯᑕᕐᓂᒃ ᕿᓚᖕᒥ ᓴᖅᑭᑦᑐᖃᕐᐸᑦ,
ᐃᓅᖃᑎᒌᒡᔪᐊᓄᑦ ᐊᓯᑦᓯᓐᓄᑦ ᑲᑉᐱᐊᒋᔭᐅᒐᓗᐊᕐᐸᑕ.
3ᐊᓯᑦᓯ ᐃᓕᖅᑯᓯᖏᑦ ᓱᓕᖏᒻᒪᑕ,
ᓇᐹᕐᑐᒥᑦ ᓇᑲᑦᓯᒐᒥᒃ,
ᓴᓇᓐᖑᐊᕐᑎᐅᓪᓗ ᓴᓇᓕᕐᐹ ᓴᓇᕐᕈᑎᒥᓄᑦ.
4ᐱᐅᓴᕐᑕᐅᕗᕐᓗ ᓯᐅᓪᕕᕆᒥᒃ ᒎᓗᒥᒡᓘᓐᓃᑦ ᒥᖑᐊᕐᓗᒍ,
ᓇᑉᐸᕋᒥᑦᔪᒡᓗ ᐊᑦᓱᖏᕐᐹᑦ ᑭᑭᐊᕐᑐᕐᓗᒍ, ᑲᑕᖁᓇᒍ.
5ᐱᕈᕐᓰᕕᖕᒥ ᑎᖕᒥᐊᓄᑦ ᑲᑉᐱᐊᓵᕆᑦᔪᑎᑎᑐᑦ ᑍᒤᑉᐳᑦ,
ᒎᑎᒋᔭᐅᒐᓗᐊᕐᓗᑎᒃ ᐅᖃᕈᓐᓇᓐᖏᓚᑦ,
ᐊᒡᔭᒐᑐᐃᓐᓇᐅᕗᑦ ᐱᓱᒍᓐᓇᖏᒻᒪᑕ;
ᑲᑉᐱᐊᒋᑦᑍᓕᓯᐅᒃ ᐱᐅᖏᑦᑐᓕᔪᓐᓇᖏᒻᒪᑕ
ᐱᐅᔪᒥᒡᓗ ᐱᓂᐊᕐᓂᖃᕋᑎᒃ.”
6ᐊᑕᓃᖅ ᐊᑦᔨᖃᓐᖏᓚᑎᑦ; ᐊᔪᖏᑦᑐᕐᔪᐊᖑᕗᑎᑦ,
ᐊᑏᓪᓗ ᐊᔪᖏᑦᑐᕐᔪᐊᖑᕗᖅ ᐱᔪᓐᓇᕐᓂᖃᕐᓗᓂᓗ.
7 #
ᑕᑯᑎ 15:4. ᑭᓇᓕ ᓯᕘᕋᖏᑦᑑᔪᓐᓇᕐᐹ ᐃᓕᖕᓃᒃ?
ᐊᖓᔪᖅᑳᕐᔪᐊᖑᔪᑎᑦ ᐃᓅᖃᑎᒌᒡᔪᐊᓄᑦ ᓂᕐᑐᕐᑕᐅᔪᒃᓴᐅᕗᑎᑦ;
ᓯᓚᑐᔪᕐᔪᐊᓕᒫᑦ ᐃᓅᖃᑎᒌᒡᔪᐊᓂ
ᐊᖓᔪᖅᑲᐅᕕᓕᒫᓪᓗ ᑲᑎᓪᓗᒋᑦ ᐃᓕᒃᑐᑦ ᑍᒤᑦᑐᕐᑕᖃᓐᖏᓚᑦ.
8ᓯᓔᑦᑑᕗᑦ ᓯᓚᑐᓂᖃᕋᑎᒡᓗ;
ᐊᔪᕆᕐᑐᕐᑕᐅᓯᒪᒐᒥᒃ ᐃᓱᒪᖃᖏᑦᑐᓄᑦ
ᕿᔪᖕᓄᑦ ᒎᑎᓐᖑᐊᓄᑦ.
9ᑲᑦᔪᒃᑕᐅᓯᒪᔭᕇᕐᑐᒥᒃ ᓯᐅᓪᕕᕆᑖᖃᑦᑕᕐᐳᑦ ᑖᕐᓯᓯᒥᑦ,
ᒎᓗᑖᕐᐸᒡᓗᑎᒡᓗ ᐆᐸᔾᒥᑦ.
ᓴᓇᓐᖑᐊᕐᑎᓄᑦ ᒎᓗᒥᒡᓗ ᐋᖅᑭᒃᓱᐃᔨᓄᑦ ᓴᓇᔭᐅᔭᕇᕌᖓᑕ,
ᐊᓐᓄᕌᓕᐅᕐᑕᐅᕗᖅ ᑐᖑᑦᑐᕆᒃᑐᒥᒃ ᐊᐅᐸᓪᓚᕆᒃᑐᒥᒡᓗ
ᐱᔭᕇᕐᑕᐅᕗᑦ ᓴᓇᔭᐅᓪᓗᑎᒃ ᓴᓇᓯᑎᐅᓂᕐᐹᓄᑦ.
10ᐊᑕᓂᕐᓕ ᒎᑎᐅᓪᓗᓂ ᓱᓕᔪᑑᕗᖅ;
ᒎᑎᐅᓪᓗᓂ ᐆᒪᕗᖅ, ᐃᓱᖃᖏᑦᑐᒧᑦ ᐊᖓᔪᖅᑳᕐᔪᐊᖅ.
ᓂᓐᖓᒃᐸᑦ ᓄᓇ ᓴᔪᒃᐱᓗᒃᐳᖅ,
ᓂᓐᖓᒡᓗᓂ ᐱᓇᓱᐊᓕᕐᐸᑦ ᐃᓅᖃᑎᒌᒡᔪᐊᓄᑦ ᓵᓚᒋᔭᐅᔪᓐᓇᓐᖏᓚᖅ.
11ᐃᒫᒃ ᐅᖃᐅᑎᔭᒃᓴᕆᕙᑎᑦ, “ᒎᑎᓯ ᑕᒪᒃᑯᐊ, ᓴᓇᓚᐅᖏᓐᓇᒥᒃ ᕿᓚᖕᒥᒃ ᓄᓇᒥᒡᓗ, ᐊᓯᐅᔪᒫᕐᐳᑦ ᓄᓇᒥ ᕿᓚᐅᓪᓗ ᐊᑖᓂ.”
ᐃᓐᖏᐅᓯᖅ ᒎᑎᒥᒃ ᓂᕐᑐᐃᑦᔪᑎᖃᕐᓂᖅ
12ᑖᑦᓱᒪ ᐱᔪᓐᓇᕐᓂᕐᔪᐊᒥᓄᑦ ᓄᓇ ᐱᓐᖑᕐᑎᓚᐅᕐᐹ,
ᓯᓚᕐᔪᐊᕐᓗ ᐃᓂᑖᕐᑎᓚᐅᕐᐹ ᓯᓚᑐᓂᕐᒥᒍᑦ,
ᕿᓚᒡᓗ ᓂᕈᑐᔫᑎᑉᐹ ᖃᐅᔨᒪᓂᕐᔪᐊᒥᓄᑦ.
13ᓂᓪᓕᕌᖓᑦ ᐃᒤᑦ ᕿᓚᖕᒦᑦᑐᑦ ᐃᒃᑑᓛᕐᐳᑦ,
ᓄᕗᔭᓂᒡᓗ ᓴᖅᑭᑎᑦᓯᕙᒡᓗᓂ ᓄᓇᕐᔪᐊᑉ ᑭᒡᓕᖓᓂᑦ,
ᖃᐅᒻᒫᓪᓚᖃᕐᑎᑦᓯᓪᓗᓂᓗ ᓯᓚᓗᒃᑐᒥ,
ᐊᓄᕆᖃᕐᑎᑦᓯᓪᓗᓂᓗ ᐱᖁᑎᒃᑯᕕᖕᒥᓂᑦ.
14ᐃᓄᓕᒫᑦ ᓯᓔᒻᒪᑕ ᖃᐅᔨᒪᓇᑎᒡᓗ,
ᒎᓗᓕᕆᔨᓕᒫᑦ ᑲᓐᖑᓲᑎᓇᕐᓯᕗᑦ ᒎᑎᓐᖑᐊᒥᖕᓄᑦ;
ᓴᓇᔭᖏᑦ ᓱᓕᓐᖏᓚᑦ, ᐊᓂᕐᓂᖃᖏᒻᒪᑕ.
15ᐊᑑᑎᒃᓴᖃᓐᖏᓚᑦ, ᓇᕐᕈᓇᕐᓗᑎᒡᓗ,
ᓱᒋᐊᕐᑕᐅᕕᖓᑦ ᓇᓪᓕᐅᑎᒃᐸᑦ ᓇᓗᓇᕈᓐᓃᕈᒫᕐᐳᑦ ᓱᓇᒃᓴᐅᖏᓐᓂᖏᑦ.
16ᔧᑯᒃᑯᓐᓂᒡᓕ ᐱᒋᐊᕐᑎᑦᓯᓚᐅᕐᑐᖅ ᑍᒤᓐᖏᓚᖅ,
ᓱᓇᓕᒫᓂᒃ ᐱᓐᖑᕐᑎᑦᓯᓯᒪᖕᒪᑦ,
ᐃᓴᕆᐊᓕᒥᐅᑦ ᓴᖅᑭᑎᓯᒪᕔᑦ,
ᑭᖑᕚᕇᓐᖑᕐᓗᑎᒃ ᑭᖑᕐᖑᔨᖃᑎᒌᒃᑐᒃᓴᐅᖁᓪᓗᒋᑦ;
ᑕᒪᒃᑯᓂᖓ ᓴᖅᑭᑎᑦᓯᔪᖅ ᐊᑕᓂᐅᕗᖅ ᖁᑦᓯᖕᓂᕐᐹᒥᒃ ᐊᑎᓕᒃ.
ᓄᓇᒋᓐᖏᑕᒧᑦ ᐊᐅᓪᓚᕐᑎᑕᐅᓂᒃᓴᖅ
17ᐱᖁᑎᑦᓯᓐᓂᒃ ᑲᑎᕐᓱᐃᓕᕆᑦᓯ, ᐊᕙᓗᔭᐅᓯᒪᔪᓯ ᐊᑭᕋᑦᓯᓐᓄᑦ. 18ᐃᒫᒃ ᐊᑕᓂᖅ ᐅᖃᕐᐳᖅ: “ᑕᑯᒋᑦ, ᑕᒫᓂ ᓄᓇᖃᕐᑐᓂᒃ ᐃᒋᑦᓯᓂᐊᕐᐳᖓ ᒫᓐᓇ ᓇᓪᓕᐅᑦᑐᒥ, ᐅᖁᒤᑦᑐᒧᐊᕐᑎᓐᓂᐊᕐᐸᒃᑲᓗ ᕿᒫᕕᒃᓴᖃᕈᓐᓁᖁᓪᓗᒋᑦ.”
19ᐅᖃᕐᓂᐊᕐᐳᖅ,
“ᑲᑉᐱᐊᓐᓇᒦᒃ ᐊᖏᔪᒥᒃ ᐋᓐᓂᕐᓯᒪᔪᖓ!
ᐃᑭᓕᕐᑕᐅᓂᒃᑲ ᒪᒥᑦᑐᓐᓁᓪᓕᕗᑦ.
ᐃᓱᒪᓂᐊᕆᕗᓪᓕ, ‘ᐋᓂᐊᕆᒐᒃᑯ ᓇᖕᒥᓂᖅ ᕿᓄᐃᓵᕈᑎᒋᔭᕆᐊᖃᕐᐸᕋ.’
20ᑐᐱᕋ ᑐᖅᑭᕐᑕᐅᖕᒪᑦ, ᓄᖃᕐᑑᑎᓕᒫᖏᑦ ᕿᒃᑐᕌᕗᑦ;
ᕿᑐᕐᖓᓕᒫᒃᑲ ᐅᕙᓐᓂᒃ ᕿᒤᓯᒪᓕᕐᐳᑦ.
ᑐᑉᐸᒃᓴᕐᑎᒃᓴᖃᕈᓐᓃᕐᐳᖓ ᐅᖅᑯᐃᕝᕕᒃᓴᓐᓂᒃ.”
21ᐰᕐᓯᔨᐅᒐᓗᐊᑦ ᓯᓔᑦᑑᕗᑦ,
ᐊᑕᓂᕐᒥᒃ ᐊᐱᕐᓱᖃᑦᑕᖏᒻᒪᑕ; ᑍᒤᒻᒪᑦ ᐱᕙᓪᓕᐊᔪᓐᓃᕐᐳᑦ,
ᓰᐱᖁᑎᖏᓪᓗ ᓯᐊᒻᒪᓕᕐᐳᑦ.
22ᑕᑯᒋᑦ! ᑐᓴᒐᒃᓴᕐᑕᖃᕐᐳᖅ ᐃᓕᑦᓯᓐᓄᑦ,
ᐱᕐᐸᓗᒃᔪᐊᕐᑐᑦ ᑐᓴᕐᓴᐅᓕᕐᐳᑦ ᐅᓐᓄᐊᓪᓗᐊᑉ ᓇᓛᓂᑦ,
ᔫᑕᐅᑉ ᐃᒡᓗᒐᓴᖏᓐᓂᒃ ᓱᓁᕐᕈᑦᔨᔭᕐᑐᕐᑐᑦ,
ᐊᒪᕉᔮᕐᑐᓄᑦ ᐃᓂᒃᓴᐅᓕᖁᓪᓗᒍ.
23ᐊᑕᓃᖅ ᖃᐅᔨᒪᒐᓗᐊᕐᐳᖓ,
ᐃᓄᒃ ᓇᖕᒥᓂᖃᖏᒻᒪᑦ ᐃᓅᓯᕐᒥᓂᒃ,
ᐊᑐᕐᓂᐊᕐᑕᓕᒫᓂ ᐊᐅᓚᑍᓐᓇᕆᔪᓐᓇᖏᒻᒪᒋᑦ.
24ᐋᖅᑭᒋᐊᓚᐅᓐᖓ ᐊᑕᓃᖅ, ᐊᑲᐅᒋᔭᕐᓄᑦ;
ᓂᓐᖓᐅᑎᖏᓪᓗᖓ, ᓱᓇᐅᔪᓐᓃᖁᓇᖓ.
25ᓂᓐᖓᐅᑦᔨᓃᑦ ᑲᔪᓯᑎᓕᕈᒃ ᐃᓅᖃᑎᒌᒡᔪᐊᓄᑦ ᐃᓕᖕᓂᒃ ᖃᐅᔨᒪᖏᑦᑐᓄᑦ,
ᐊᑎᕐᓄᓪᓗ ᑐᒃᓯᐊᕐᐸᖏᑦᑐᓄᑦ, ᔧᑰᑉ ᑭᖑᕚᖏᓐᓂᒃ ᐊᓯᕈᐃᓯᒪᖕᒪᑕ;
ᓄᖑᕈᑎᑦᓯᐊᕐᓗᒍ ᓄᓇᖓᓐᓂᒡᓗ ᓄᓇᒋᔭᒃᓴᐅᔪᓐᓃᕐᑎᑦᓯᓪᓗᑎᒃ.
Currently Selected:
ᔨᕆᒤᐊᐅᑉ ᐊᒡᓚᖏᑦ 10: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
