ᐂᓮᐊᓯᐅᑉ ᐊᒡᓚᖏᑦ 66
66
ᐊᑕᓂᐅᑉ ᐃᖅᑲᕐᑐᐃᓂᖓ ᐃᓅᖃᑎᒌᒡᔪᐊᓂᒃ
1 #
ᒫᑎᐅᓯ 5:34; 23:22;
ᒫᑎᐅᓯ 5:35. #
ᐋᐴᓯᑕᓖᑦ 7:49,50. ᐊᑕᓂᖅ ᐃᒫᒃ ᐅᖃᕐᐳᖅ: “ᕿᓚᒃ ᐃᒃᓯᕙᐅᑕᕐᔪᐊᕆᒐᒃᑯ, ᓄᓇᓗ ᐃᑎᒐᓐᓄᑦ ᐃᑯᕐᕋᕆᓪᓗᒍ, ᓇᐅᒡᓕ ᑍᒪ ᐃᒡᓗᒃᓴᕋ? ᓇᓂᓗ ᐃᓂᖃᕈᓐᓇᕐᐳᖓ? 2ᑕᒪᒃᑯᐊ ᓴᖅᑭᑎᑕᐅᓯᒪᔪᓕᒫᑦ ᐊᒡᒐᖕᒪ ᓴᓇᓯᒪᕔᑦ, ᑕᒪᕐᒥᓕᒫᕐᓗ ᐱᒋᕙᒃᑲ, ᐊᑕᓂᖅ ᐅᖃᕐᐳᖅ. ᐅᓇ ᑕᕝᕙ ᐃᓄᒃ ᑕᑯᓐᓇᕐᓂᐊᕐᑕᕋ, ᒥᑭᒡᓕᑎᕐᓯᒪᔪᖅ ᓯᖁᒥᓯᒪᔪᕐᓗ ᐊᓂᕐᓂᕐᒥᒍᑦ, ᐅᖃᐅᓯᓐᓂᒡᓗ ᑐᓴᕐᓗᓂ ᓴᔪᒃᑐᖅ.
3“ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᑐᖁᑦᓯᔪᖅ ᐊᑦᔨᖃᕐᐳᖅ ᐃᓄᖕᒥᒃ ᑐᖁᑦᓯᔪᒥᒃ; ᓰᐱᐅᑉ ᓄᕐᕋᖓᓂᒃ ᑐᓂᕐᕈᓯᕐᑐᖅ ᕿᒻᒥᐅᑉ ᖁᖓᓯᖓᓂᒃ ᓇᑲᑦᓯᔪᑎᑐᑦ ᑍᒤᑉᐳᖅ; ᓂᐊᖂᔭᒃᓮᑦ ᐱᕈᕐᑐᖏᓐᓂᒃ ᑐᓂᕐᕈᓯᕐᑐᖅ ᑰᒃᑰᓯᐅᑉ ᐊᐅᖓᓂᒃ ᑐᓂᕐᕈᓯᕐᑐᑎᑐᑦ ᑍᒤᑉᐳᖅ; ᐳᔫᕐᑎᑕᒐᕐᓂᒡᓗ ᑐᓂᕐᕈᓯᕐᑐᖅ ᒎᑎᓐᖑᐊᒥᒃ ᑐᒃᓯᐊᕐᕕᖃᕐᑐᑎᑐᑦ ᑍᒤᒃᑭᓪᓗᓂ, ᑖᒃᑯᐊ ᓇᖕᒥᓂᖅ ᐊᑐᕈᒪᔭᒥᖕᓂᒃ ᐊᑐᑐᐃᓐᓇᕐᒪᑕ, ᑕᕐᓂᖏᓪᓗ ᖁᕕᐊᒋᔭᖃᕐᓗᑎᒃ ᓇᕐᕈᓇᐅᑎᒃᓴᓂᒃ. 4ᓂᕈᐊᓛᕆᕗᖓ ᐋᓐᓂᐊᑎᑕᐅᑦᔪᑎᒃᓴᖏᓐᓂᒃ, ᑲᑉᐱᐊᒋᔭᖏᓐᓂᒃ ᑎᑭᕝᕕᐅᑎᑦᓱᒫᕐᐸᒃᑲ; ᕾᖁᔨᑎᓪᓗᖓ ᓇᓪᓕᐊᓐᓂᒡᓘᓐᓃᑦ ᑭᐅᔪᖃᓚᐅᖏᒻᒪᑦ, ᐅᖃᓪᓚᒃᑎᓪᓗᖓ ᓈᓚᓚᐅᖏᒻᒪᑕ; ᐱᐅᖏᑦᑐᒥᒡᓕ ᑕᑯᓐᓇᕐᑕᒃᑯᑦ ᐱᓇᓱᐊᖔᑐᐃᓐᓇᓚᐅᕐᐳᑦ, ᐊᑐᕋᓱᖔᕐᓗᑎᒡᓗ ᖁᕕᐊᒋᓐᖏᑕᓐᓂᒃ.
5“ᐊᑕᓂᐅᑉ ᐅᖃᐅᓯᖓ ᑐᓴᓕᕐᓯᐅᒃ, ᐃᓕᑦᓯ ᐅᖃᐅᓯᖓᓄᑦ ᓴᔪᒃᑐᓯ; ᖃᑕᓐᖑᑎᓯ ᐃᓕᑦᓯᓐᓂᒃ ᐆᒥᓱᖕᒪᑕ, ᐃᓕᑦᓯᓐᓂᒃ ᓇᕐᕈᓕᕐᓯᒪᔪᑦ ᐊᑎᕋ ᐱᓪᓗᒍ ᐅᖃᕐᒪᑕ, ‘ᐊᑕᓂᖅ ᓂᕐᑐᕐᑕᐅᓕ, ᑕᑯᓂᐊᕋᑦᑕ ᖁᕕᐊᓱᒃᑎᓪᓗᓯ’; ᑭᓯᐊᓂᓕ ᑖᒃᑯᐊ ᑲᓐᖑᓱᒃᑎᑕᐅᔪᒫᕐᐳᑦ. 6ᓈᓚᒋᑦᓯ, ᓂᐱᐊᓗᖕᓂᒃ ᐃᒡᓗᒐᓴᒡᔪᐊᓂᑦ ᑐᓵᕗᓯ, ᓂᓪᓕᐊᔪᓂᒃ ᑐᒃᓯᐊᕐᕕᒡᔪᐊᒥ! ᐊᑕᓂᐅᑉ ᓂᐱᒋᕚ, ᐊᑭᕋᕐᑐᕐᑎᒥᓂᒃ ᐊᑭᓂᐊᕐᕙᓪᓛᓂᖓ!
7 #
ᑕᑯᑎ 12:5. “ᐃᕐᓂᓱᒡᕕᒃᓴᖓ ᑎᑭᓚᐅᕐᑎᓐᓇᒍ ᓄᑕᕋᕐᑖᕐᐳᖅ, ᐃᕐᓂᓱᖕᓂᐅᑉ ᐋᓐᓂᐊᓇᕐᓂᖓ ᑎᑭᓚᐅᕐᑎᓐᓇᒍ ᐃᕐᓂᕐᑖᕐᓗᓂ. 8ᑭᓇ ᑍᒤᑦᑐᒥᒃ ᑐᓴᓚᐅᕐᓯᒪᕚ? ᑭᓇᓗ ᑍᒤᑦᑐᒥᒃ ᑕᑯᓚᐅᕐᓯᒪᕙ? ᓄᓇ ᐃᕐᓂᐊᖑᔪᓐᓇᕐᐹ ᐅᓪᓗᐃᓐᓇᖅ? ᐃᓅᖃᑎᒌᒡᔪᐊᕐᑕᖃᓕᕈᓐᓇᕐᐸᓗ ᑕᕝᕙᑦᓴᐅᑎᒋ? ᓮᐅᓂ ᐃᕐᓂᓱᓕᕐᓗᓂᓗ ᐃᕐᓂᕐᑖᕐᑐᕐᐳᖅ. 9ᐃᕐᓂᓱᖕᓂᕐᒧᑦ ᑎᑭᑎᑦᓯᑐᐃᓐᓇᕐᓂᐊᕐᐳᖓ ᕿᑐᕐᖓᕐᑖᕐᑐᖃᖏᓪᓗᓂ? ᐊᑕᓂᖅ ᐅᖃᕐᐳᖅ; ᐅᕙᖓ ᕿᑐᕐᖓᕐᑖᕐᑎᑦᓯᔪᖓ ᐃᕐᓂᖏᓮᓐᓇᕐᑎᑦᓯᔪᓐᓇᕐᐳᖔ? ᒎᑎᓯ ᐅᖃᕐᐳᖅ.
10ᔨᕉᓴᓕᒻ ᖁᕕᐊᓲᑎᒋᓯᐅᒃ, ᐊᓕᐊᓁᒍᓲᑎᒋᓗᒍ ᐃᓕᑦᓯ ᐅᖓᒋᔭᖃᕐᑐᓯ ᔨᕉᓴᓕᒥᒃ;
ᐊᖏᔪᒥᒃ ᖁᕕᐊᓱᒍᑎᒋᓕᕐᓯᐅᒃ ᐃᓗᑦᓯᒍᑦ ᖁᕕᐊᓱᒡᓗᓯ,
ᕿᒃᓵᒍᑎᖃᖃᑦᑕᓚᐅᕐᑐᓯ ᑖᑦᓱᒥᖓ;
11ᐊᒫᒪᒃᑐᑎᑐᑦ ᐱᔪᒫᕋᑦᓯ ᓈᒻᒪᒃᓯᓗᓯᓗ ᐃᕕᐊᖏᖏᖕᓂᑦ ᓮᒻᒪᕐᓮᔫᖕᓂᑦ;
ᒥᓪᓗᐊᕐᓗᓯ ᐃᒻᒧᖃᓗᐊᕐᓴᕐᑐᑎᑐᑦ ᖁᕕᐊᒋᓗᒍ ᓂᕐᑐᕐᓇᕐᓂᖓᑕ ᐊᒥᒐᖏᓐᓂᖓᓂᑦ.”
12ᐊᑕᓂᖅ ᐃᒫᒃ ᐅᖃᕐᐳᖅ: “ᑕᑯᒋᑦ, ᐊᔪᕐᓴᖏᓐᓂᖅ ᐊᖏᔪᕈᕐᑎᑦᓱᒫᕐᐸᕋ ᑰᒃᑎᑐᑦ ᑯᕕᓕᕈᒫᕐᒪᑦ, ᐃᓅᖃᑎᒌᒡᔪᐊᓪᓗ ᐊᒡᓗᐃᓂᖏᑦ ᑰᒐᓛᑎᑐᑦ ᑕᑕᓯᒪᔪᑎᑐᑦ ᑰᓕᕈᒫᕐᐳᑦ, ᐊᒫᒪᒍᒫᕐᐳᓯ ᓴᕐᓕᐊᕐᑕᐅᓗᓯ, ᐊᐅᓚᑲᑦᑖᕐᑎᑕᐅᔪᒫᕐᐳᓯᓗ ᖁᒃᑐᕋᖏᒃᑕ ᖄᖓᓂ. 13ᐊᓈᓇᐅᑉ ᕿᑐᕐᖓᓂ ᓮᒻᒪᕐᓴᕐᐸᖕᒪᒍ, ᑍᒫᒃ ᓮᒻᒪᕐᓴᕈᒫᕐᐸᑦᓯ; ᔨᕉᓴᓕᒥ ᓮᒻᒪᕐᓴᕐᑕᐅᔪᒫᕐᐳᓯ. 14ᑕᒪᓐᓇ ᑕᑯᓕᕈᑦᓯᐅᒃ, ᐆᒻᒪᑎᓯ ᖁᕕᐊᓱᒃᑐᐊᓘᔪᒫᕐᐳᑦ; ᑎᒥᓯᓗ ᐱᕈᑦᓯᐊᕈᒫᕐᐳᑦ ᐃᕕᒃᓱᒐᕐᑎᑐᑦ; ᖃᐅᔨᒪᔭᐅᓕᕈᒫᕐᒪᑦ ᐊᑕᓂᐅᑉ ᐊᒡᒐᖕᒥᓄᑦ ᐱᔨᓂ ᓇᔪᕐᒪᒋᑦ, ᓂᓐᖓᕕᒡᔪᐊᕐᓂᐊᓗᐊᓗ ᓴᖅᑭᔮᕈᒫᕆᕗᖅ ᐊᑭᕋᕐᑐᕐᑎᖏᓐᓄᑦ.
15“ᑕᑯᒋᑦᓯ, ᐊᑕᓂᖅ ᑎᑭᑦᓱᒫᕐᐳᖅ ᐃᑯᐊᓚᔪᒦᓪᓗᓂ, ᕿᒧᒃᓯᐅᑎᖁᑎᖏᓪᓗ ᐊᒃᓴᓗᐊᓕᖕᓂᒃ ᐅᓂᐊᕐᑐᑦ ᐅᓚᓗᔨᕋᕐᑐᑎᑐᑦ ᑍᒤᑦᓱᒫᕐᐳᑦ, ᐊᑭᓖᔭᕐᑐᕐᓗᓂ ᓂᓐᖓᕕᒡᔪᐊᕐᓯᒪᓂᕐᒧᑦ, ᑖᑦᓱᒪᓗ ᓱᐊᖕᓂᖓ ᐃᑯᒪᐅᓗᓂ ᐃᑯᐊᓚᔪᖅ. 16ᐃᑯᒪᒧᑦ ᐱᓂᐊᕐᓂᖃᕈᒫᕐᐳᖅ ᐃᖅᑲᕐᑐᐃᓂᕐᒥᒃ, ᓴᕕᒡᔪᐊᒥᓄᓪᓗ ᐃᓅᔪᓕᒫᓂᒃ ᐱᓇᓱᐊᕐᕕᖃᕈᒫᕐᐳᖅ; ᑐᖁᑕᐅᔪᓪᓗ ᐊᑕᓂᕐᒧᑦ ᐅᓄᕐᑐᐊᓘᔪᒫᕐᐳᑦ.
17“ᐃᒻᒥᖕᓂᒃ ᐃᑦᔪᕐᓁᓕᑎᕐᐸᒃᑐᑦ ᓴᓗᒻᒪᕐᓴᕐᐸᒃᑐᓪᓗ ᐱᕈᕐᓰᕕᖕᓄᑦ ᐂᓂᐊᓕᕌᖓᒥᒃ, ᒪᓕᒡᓗᑎᒃ ᕿᑎᖓᓃᑦᑐᒥᒃ ᒎᑎᓐᖑᐊᒥᒃ, ᓂᕆᓪᓗᑎᒡᓗ ᑰᒃᑰᓯᕕᓂᕐᓂᒃ ᓇᕐᕈᓇᕐᓂᕋᕐᑕᐅᔪᓂᒃ ᐊᕕᓐᖓᓂᒡᓗ, ᑖᒃᑯᐊ ᑲᑎᒪᓗᑎᒃ ᐊᑕᐅᑦᓯᒃᑯᑦ ᑐᖁᑕᐅᔪᒫᕐᐳᑦ,” ᐊᑕᓂᖅ ᐅᖃᕐᐳᖅ. 18“ᐱᓂᐊᕐᓂᖏᑦ ᐃᓱᒪᒋᔭᖏᓪᓗ ᖃᐅᔨᒪᒐᒃᑭᑦ, ᑎᑭᑦᓱᒫᕐᐳᖓᓗ ᐃᓅᖃᑎᒌᒡᔪᐊᑦ ᐅᖃᐅᓯᖃᑎᒌᖏᑦᑐᓪᓗ ᑕᒪᕐᒥᒃ ᑲᑎᑎᑦᓴᕐᑐᕐᓗᒋᑦ; ᕾᒍᑎᒡᓗ ᓂᕐᑐᕐᓇᕐᓂᕐᔪᐊᕋ ᑕᑯᔪᒫᕐᐹᑦ. 19ᓇᓗᓁᒃᑯᑕᖃᕐᑎᑦᓯᔪᒫᕐᐳᖓᓗ ᑖᒃᑯᓇᓂ.
“ᑖᒃᑯᓇᓐᖓᓪᓗ ᐊᒥᐊᒃᑰᔪᓂᒃ ᐊᐅᓪᓚᕈᑦᔭᐅᑎᑦᓯᔪᒫᕐᐳᖓ, ᓄᓇᓕᖕᓄᑦ ᑖᕐᓯᓯᒧᑦ, ᓄᓇᓕᖕᓄᓪᓗ ᐴᓕᒧᑦ, ᓗᑦᒧᓪᓗ, ᐱᑎᒃᓯᒥᖕᓂᒃ ᐅᕐᓕᕐᑐᕐᑐᓄᑦ ᑐᐸᐅᓪᒥᐅᓄᑦ, ᔭᕚᓇᒥᐅᓄᓪᓗ, ᐃᒪᐅᓪᓗ ᓯᓈᓂᒥᐅᓄᑦ ᐅᖓᓯᒃᑐᒦᑦᑐᓄᑦ, ᐅᖃᐅᑎᒋᔭᐅᓂᓐᓂᒃ ᑐᓴᓚᐅᕐᓯᒪᖏᑦᑐᓄᑦ ᓂᕐᑐᕐᓇᕐᓂᕐᔪᐊᓐᓂᒡᓗ ᑕᑯᓚᐅᕐᓯᒪᖏᑦᑐᓄᑦ; ᑖᒃᑯᐊᓗ ᓂᕐᑐᕐᓇᕐᓂᕐᔪᐊᕋ ᐅᖃᐅᑎᒋᔪᒫᕐᐹᑦ ᐃᓅᖃᑎᒌᒡᔪᐊᓄᑦ. 20ᐃᓅᖃᑎᓯᓗ ᑕᒪᕐᒥᒃ ᐊᖏᕐᕋᐅᑎᑦᓱᒫᕐᐰᑦ ᐃᓅᖃᑎᒌᒡᔪᐊᓂᑦ ᑐᓂᕐᕈᑎᒥᒃᑎᑐᑦ ᐊᑕᓂᕐᒧᑦ, ᕿᒥᕐᔪᐊᒃᑰᕐᓗᑎᒃ ᑲᓕᒐᓕᒃᑯᑦ ᐅᓂᐊᒐᕐᑎᒍᑦ, ᓯᐅᑎᖅᑯᕐᑐᔪᑎᒍᓪᓗ ᑳᒥᓕᑯᓪᓗᒃ, ᖃᖅᑲᖁᑎᓐᓄᑦ ᐃᑦᔪᕐᓁᑦᑐᒧᑦ ᔨᕉᓴᓕᒦᑦᑐᒧᑦ, ᐊᑕᓂᖅ ᐅᖃᕐᐳᖅ, ᐃᓴᕆᐊᓕᒥᐅᓪᓗ ᓂᐊᖂᔭᒃᓴᓂᒃ ᑐᓂᕐᕈᑎᒃᓴᒥᖕᓂᒃ ᓴᓗᒪᑦᓯᐊᕐᑐᓂᒃ ᐴᕐᓯᒪᔪᓂᒃ ᑐᓂᓯᔭᕐᑐᕐᐸᖕᒪᑕ ᐊᑕᓂᐅᑉ ᐃᒡᓗᖓᓄᑦ. 21ᐃᓚᖏᓪᓗ ᑐᓂᔪᒫᕐᐸᒃᑲ ᑐᓂᕐᕈᓯᕐᑎᑦᓯᔨᓄᑦ ᓕᕔᑎᓄᓪᓗ, ᐊᑕᓂᖅ ᐅᖃᕐᐳᖅ.
22 #
ᐂᓮᐊᓯ 65:17; 2 ᐲᑦᑐᕉᓯ 3:13; ᑕᑯᑎ 21:1. “ᓲᕐᓗ ᕿᓚᒃ ᓄᑖᖅ ᓄᓇᕐᔪᐊᕐᓗ ᓄᑖᖅ ᓴᓇᔪᒫᕐᑕᒃᑲ ᑍᒤᓕᖎᓐᓇᕈᒫᕐᒪᑕ ᓵᓐᓂ, ᐊᑕᓂᖅ ᐅᖃᕐᐳᖅ; ᑍᒫᒃᑕᐅᖅ ᐊᑎᕐᓯ ᑭᖑᕚᓯᓗ ᑍᒤᓕᖎᓐᓇᕈᒫᕆᕗᑦ. 23ᑕᖅᑮᓚᓪᓗᐊᒥᑦ ᑕᖅᑮᓚᓪᓗᐊᒧᑦ ᓇᓪᓕᐅᓐᓂᕐᓯᐅᕐᓂᖃᕐᐸᖕᒪᑦ, ᓴᐸᑎᒥᑦ ᓴᐸᑎᒧᑦ ᑎᑭᓪᓗᒍ, ᑍᒫᒃᑕᐅᖅ ᐃᓄᓕᒫᑦ ᐅᕙᓐᓄᑦ ᑐᒃᓯᐊᕆᐊᖃᑦᑕᕈᒫᕐᐳᑦ; ᓵᓐᓄᑦ ᐹᒻᒪᒃᑎᕆᐊᕐᑐᕐᓗᑎᒃ, ᐊᑕᓂᖅ ᐅᖃᕐᐳᖅ. 24#ᒫᑯᓯ 9:48.ᐊᓂᒍᑎᒡᓗ ᑕᑯᔪᒫᕐᐳᑦ ᐅᕙᓐᓂᒃ ᐊᑭᕋᕐᑐᕐᑐᑦ ᑎᒥᕕᓂᖏᓐᓂᒃ ᑐᖁᖓᔪᓂᒃ; ᖁᐱᕐᕈᖏᓪᓗ ᑐᖁᔪᒫᓐᖏᓚᑦ, ᐃᑯᐊᓚᔪᒦᓪᓗᑎᒡᓗ ᖃᒥᑕᒃᓴᐅᖏᑦᑐᓂ, ᐃᓅᖃᑎᒌᒡᔪᐊᓄᑦ ᑕᒪᓐᓇ ᑕᑯᒥᓁᑦᑐᕐᔪᐊᖑᔪᒫᕐᐳᖅ.”
Currently Selected:
ᐂᓮᐊᓯᐅᑉ ᐊᒡᓚᖏᑦ 66: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
