ᐃᓗᐊᕐᓮᔩᑦ ᐊᒡᓚᖏᑦ 9
9
ᐊᐱᒥᓕᒃ
1ᐊᐱᒥᓕᒃ ᔨᕈᐸᐅᓕᐅᑉ ᐃᕐᓂᖓ ᓄᓇᓕᖕᓄᐊᓚᐅᕐᐳᖅ ᓯᑭᒻᒧᑦ ᐊᓈᓇᖓᑕ ᖃᑕᓐᖑᑎᖏᓐᓄᑦ ᐅᖃᐅᑎᓪᓗᒋᓪᓗ ᐊᓈᓇᖓᑕ ᑭᖑᕚᓕᒫᖏᑦ, 2“ᐊᐱᕆᓚᐅᕐᓯᐅᒃ ᓯᑭᒻᒥ ᓄᓇᖃᕐᑐᑦ, ‘ᐃᓕᑦᓯᓐᓄᑦ ᓇᓪᓕᐊᑦ ᐱᐅᓂᕐᓴᐅᕙ? ᔨᕈᐸᐅᓕᐅᑉ#9:2 ᔨᕈᐸᐅᓕᐅᑉ ᐅᕝᕙᓗ ᒋᑎᐅᓂᐅᑉ ᐃᕐᓂᖏᓐᓄᑦ 70ᓄᑦ ᐊᐅᓚᑕᐅᓗᓯ, ᐅᕝᕙᓘᓐᓃᑦ ᐊᖑᒻᒧᑦ ᐊᑕᐅᓯᕐᒧᑦ? ᐃᖅᑲᐅᒪᒋᑦᓯ ᐅᕙᖓ ᓇᖕᒥᓂᖅ ᑎᒥᖃᑎᒋᒐᑦᓯᓐᖓ ᐊᐅᖃᑎᒋᓪᓗᖓᓗ.’” 3ᐊᓈᓇᖓᑕ ᐃᓚᖏᑦ ᐅᖃᖃᑎᖃᓚᐅᕐᐳᑦ ᓯᑭᒻᒥᐅᓂᒃ ᑖᑦᓱᒪ ᐅᖃᐅᓯᐅᖁᔭᖏᓐᓂᒃ ᑐᓴᕋᒥᒃ, ᑕᕝᕙ ᐃᓄᓕᒫᑦ ᓯᑭᒻᒥᐅᑦ ᒪᓕᒍᒪᓚᐅᕐᐳᑦ ᐊᐱᒥᓕᒃᒥᒃ, ᐅᖃᕐᓗᑎᒃ, “ᖃᑕᓐᖑᑎᕗᓄᓇ.” 4ᑐᓂᕚᓪᓗ 70ᓂᒃ ᐅᖁᒤᓐᓂᓕᖕᓂᒃ ᓯᐅᓪᕕᕆᓂᒃ ᐰᓕ-ᐱᕆᑎᒧᑦ ᑐᒃᓯᐊᕐᕕᖕᒥᑦ ᐱᔪᓂᒃ, ᐊᐱᒥᓕᑭᓗ ᑖᒃᑯᓇᓐᖓᑦ ᑮᓇᐅᔭᕐᑖᕆᔭᒥᓂᑦ ᐱᓇᓱᐊᕐᑎᑖᓚᐅᕐᐳᖅ ᐃᓄᑦᓯᐊᕙᐅᖏᑦᑐᓂᒃ ᐃᒃᐱᒍᓱᑦᓯᐊᖏᑦᑐᓂᒡᓗ, ᒪᓕᒃᑎᑖᕆᓪᓗᒋᑦ. 5ᐊᑖᑕᒥᑕᓗ ᐃᒡᓗᖓᓄᐊᕐᐳᖅ ᐅᐸᕋᒦᑦᑐᒧᑦ, ᐅᔭᕋᒥ ᐊᑕᐅᓯᕐᒥ ᐊᑎᓕᖕᒥ ᖃᑕᓐᖑᑎᓂ 70 ᑐᖁᑉᐰᑦ ᔨᕈᐸᐅᓕᐅᑉ ᐃᕐᓂᖏᑦ, ᓄᑲᕐᓯᕐᐹᖅ ᔨᕈᐸᐅᓕᐅᑉ ᐃᕐᓂᖓ ᔫᑕᒻ, ᐃᔨᕋᒥ ᑐᖁᑕᐅᓚᐅᓐᖏᓚᖅ. 6ᓯᑭᒻᒥ ᐱᑦ-ᒥᓗ ᓄᓇᖃᕐᑐᓕᒫᑦ ᑲᑎᕗᑦ ᓇᐹᕐᑐᕐᔪᐊᑉ ᐆᒃ ᓴᓂᐊᓂ ᓇᐸᔪᐊᓗᖕᒥ ᓯᑭᒻᒥ, ᑕᕝᕙᓂ ᐊᐱᒥᓕᒃ ᓂᐊᖂᓯᕐᐹᑦ ᐊᖓᔪᖅᑳᕐᔪᐊᓐᖑᕐᑎᓪᓗᒍ.
7ᔫᑕᒻᓗ ᑕᒪᑐᒥᖓ ᐅᖃᐅᑎᔭᐅᒐᒥ, ᐂᕗᖅ ᖃᖅᑲᒧᑦ ᒋᕆᔨᐅᑉ ᖄᖓᓂ ᓇᖏᕐᓗᓂ ᕾᒐᓛᕐᕕᒋᕔᑦ, “ᓈᓚᒃᓯᓐᖓ ᓯᑭᒻᒥᐅᑕᐅᔪᓯ ᒎᑎᒧᑦ ᓈᓚᒃᑕᐅᔪᓐᓇᖁᓪᓗᓯ! 8ᑍᑦᓱᒪᓂ ᓇᐹᕐᑐᐃᑦ ᐅᕐᓱᒧᑦ ᒥᖑᐊᕐᓯᓪᓗᑎᒃ ᐊᖓᔪᖅᑳᕐᔪᐊᕆᔪᒪᔭᒥᖕᓂᒃ. ᐅᖃᕐᓗᑎᒃ, ᓇᐹᕐᑐᓄᑦ ᐅᕐᓱᒃᓴᓕᖕᓄᑦ, ‘ᐊᖓᔪᖅᑳᕐᔪᐊᕐᑖᕆᓚᐅᕐᓚᑦᑎᒋᑦ.’ 9ᓇᐹᕐᑐᖅ ᐅᕐᓱᒃᓴᓕᒃ ᑭᐅᕗᖅ, ‘ᐅᕐᓱᖅ ᐅᕙᓐᓂᑦ ᐱᔪᖅ ᓴᒃᑯᑕᒃᓴᕆᕙᕌ, ᑕᒪᑐᒨᓇ ᒎᑏᑦ ᐃᓄᐃᓪᓗ ᐅᐱᒋᔭᐅᑦᔪᑎᒃᓴᕆᕚᑦ, ᓇᐹᕐᑐᐃᑦ ᖁᓛᑦᑎᒍᑦ ᑕᑯᒃᓴᐅᖁᓪᓗᒍ ᐊᓄᕆᒧᑦ ᐊᐅᓚᔪᖅ?’ 10ᓱᓕ ᓇᐹᕐᑐᑦ ᐅᖃᕆᕗᑦ ᓇᐹᕐᑐᒧᑦ ᐱᒋᓕᒃᓴᒧᑦ, ‘ᕾᓗᑎᑦ ᐊᖓᔪᖅᑳᓐᖑᓚᐅᕆᑦ ᐅᕙᑦᑎᓐᓄᑦ.’ 11ᓇᐹᕐᑐᕐᓕ ᐱᒋᓕᖕᓂᒃ ᐸᐅᕐᖓᓕᒃ ᑭᐅᕗᖅ, ‘ᐸᐅᕐᖓᒃᑲ ᒪᒪᕐᑐᑦ ᓰᕐᓇᕐᑐᓪᓗ ᑐᓂᔭᕆᐊᖃᕐᐸᒃᑳ ᓇᐹᕐᑐᑦ ᖄᖏᑎᒍᑦ ᐊᓄᕆᒧᑦ ᐊᐅᓚᑎᑕᐅᓗᖓ?’ 12ᑍᒤᒻᒪᑦ ᓇᐹᕐᑐᓕᒫᑦ ᐅᖃᕆᕗᑦ ᐱᕈᕐᑐᓄᑦ ᕔᓂᒃᓴᓕᖕᓄᑦ, ‘ᕾᓗᑎᑦ ᐊᖓᔪᖅᑳᕐᔪᐊᕐᑖᕆᓚᐅᕐᓚᑦᑎᒋᑦ.’ 13ᕔᓂᒃᓴᓕᒡᓕᒃ ᑭᐅᕗᖅ, ‘ᕔᓂᓕᐅᕐᓂᕐᒥᒃ ᓄᖅᑲᕆᐊᖃᕋᔭᕐᐳᖓ, ᖁᕕᐊᓱᒃᑎᑦᓯᔪᒥᒃ ᑕᒤᓐᓂᒃ ᒎᑎᓂᒃ ᐃᓄᖕᓂᒡᓗ, ᓇᐹᕐᑐᑦ ᖄᖏᑎᒍᑦ ᐊᓄᕆᒧᑦ ᐊᐅᓚᓗᖔ?’ 14ᑕᕝᕙ ᓇᐹᕐᑐᓕᒫᑦ ᐅᖃᕆᕗᑦ ᐅᕐᐱᒐᕐᓄᑦ, ‘ᕾᓕᕆᑦ ᐊᖓᔪᖅᑳᕐᔪᐊᑖᕆᓕᕐᓚᑦᑎᒋᑦ.’ 15ᐅᕐᐱᒊᑦ ᐅᖃᕐᐳᑦ ᓇᐹᕐᑐᓄᑦ, ‘ᐱᖁᓪᓚᕆᒃᑯᑦᓯᓐᖓ ᐅᕐᓱᒧᑦ ᒥᖑᐊᕐᓗᖓ ᐊᖓᔪᖅᑳᕐᔪᐊᓐᖑᑎᒃᑯᑦᓯᓐᖓ ᐃᓕᑦᓯᓐᓄᑦ, ᐊᑏ ᕾᓕᕆᑦᓯ ᐃᔨᕐᓯᒪᓗᓯ ᑕᕐᕋᓕᓂᓐᓂ; ᑍᒤᓐᖏᑐᐊᕈᑦᓯ ᐃᑯᒪᒥᒃ ᓄᐃᑎᑦᓯᓂᐊᕐᐳᖓ ᐅᕐᐲᑦ ᐃᑯᐊᓪᓚᒡᓗᒋᑦ ᓕᐸᓇᓂᐅᑉ ᓇᐹᕐᑐᖏᑦ ᓰᑕᕇᑦ ᓯᑎᔪᔧᑦ.’”
16“ᒫᓐᓇᓕ ᑕᕝᕙ, ᓱᓕᑦᓯᐊᕐᓗᓯ ᐅᐱᓐᓇᑦᓯᐊᕐᓗᓯᓗ ᐱᓂᐊᕐᓂᑦᓯᒍᑦ ᐊᐱᒥᓕᒃ ᐊᖓᔪᖅᑳᕐᔪᐊᓐᖑᕐᑎᒍᑦᓯᐅᒃ ᔨᕈᐸᐅᓕᐅᓪᓗ ᐃᓚᖏᑦ ᐱᓂᐊᕐᕕᒋᑦᓯᐊᕐᓗᒋᑦ, ᐱᓇᓱᐊᑦᓯᐊᕐᓂᕆᓚᐅᕐᑕᖏᑕ ᐊᑭᓕᕐᑕᐅᔭᕆᐊᖃᕐᓂᖏᑦ ᒪᓕᒡᓗᒋᑦ- 17ᐊᑖᑕᒪ ᐅᓇᑕᐅᑎᓚᐅᕐᐹᓯ ᐃᒻᒥᓂᒡᓗ ᐊᑦᑕᕐᓇᕐᑐᒃᑰᕐᑎᓚᐅᕐᐳᖅ, ᓴᐳᑎᓪᓗᓯᓗ ᒥᑎᐊᓂᒥᐅᑦ ᐱᔪᓐᓇᕐᓂᖏᓐᓂᑦ. 18ᐅᓪᓗᒥᓕ ᐊᑖᑕᒪ ᐃᓚᖏᓐᓂᒃ ᐊᑭᕋᕐᑐᓕᕐᐳᓯ ᐃᕐᓂᖏᑦ ᑐᖁᓚᐅᕋᑦᓯᐅᒃ 70 ᐊᖑᑏᑦ ᐅᔭᕋᐅᑉ ᐊᑕᐅᓯᐅᑉ ᖄᖓᓂ, ᐊᐱᒥᓕᒃ, ᐃᕐᓂᕆᖕᒪᒍ ᐊᕐᓇᒃᑯᑦ ᐱᔨᒃᑯᑦ, ᐊᖓᔪᖅᑳᕐᔪᐊᓐᖑᕐᑎᓐᓇᑦᓯᐅᒃ ᓯᑭᒻᒥ ᓄᓇᖃᕐᑐᓄᑦ, ᐅᐱᓐᓇᕋᓂ ᐃᓚᒋᒐᑦᓯᐅᒃ. 19ᓱᓕᑦᓯᐊᕐᓗᓯ, ᐅᐱᓐᓇᑦᓯᐊᕐᓗᓯᓗ ᐱᓂᐊᕐᓂᑦᓯᒍᑦ ᔨᕈᐸᐅᓕᐅᑉ ᑭᖑᕚᖏᓪᓗ ᐱᓂᐊᕐᕕᒋᑦᓯᐊᓚᐅᕈᑦᓯᐅᒃ ᐅᓪᓗᒥ, ᖁᕕᐊᒋᑦᓯᐊᓕᕐᓯᐅᒃ ᐊᐱᒥᓕᒃ, ᖁᕕᐊᒋᔭᖃᑦᓯᐊᓕᕐᓕᓗ ᐃᓕᑦᓯᓐᓂᒃ. 20ᑍᒤᖏᑉᐸᓪᓕ, ᐃᑯᒪ ᐊᓂᓕᕐᓕ ᐊᐱᒥᓕᒃᒥᑦ ᐃᑯᐊᓪᓚᒡᓗᒋᓪᓗ ᓯᑭᒻᒥᐅᑦ ᐱᔅᒥᐅᓪᓗ. ᐃᑯᒪᓗ ᐊᓂᓕᕐᓕ ᓯᑭᒻᒥᑦ ᐱᔅᒥᓪᓗ ᐃᑯᐊᓪᓚᒡᓗᒍ ᐊᐱᒥᓕᒃ.” 21ᑕᕝᕙ ᔫᑕᒻ ᐅᓪᓚᒡᓗᓂ ᕿᒫᕗᖅ ᐂᓪᓗᓂᓗ ᐱᐊᕐᒧᑦ ᑕᕝᕙᓂ ᓄᓇᖃᓕᕐᓗᓂ, ᐊᖓᔪᒥᓂᒃ ᐊᐱᒥᓕᒃᒥᒃ ᑲᑉᐱᐊᓱᖕᓂᕐᒧᑦ.
22ᐊᐱᒥᓕᒃ ᐊᐅᓚᑦᓯᓚᐅᕐᐳᖅ ᐃᓴᕆᐊᓕᒥᐅᓂᒃ ᐊᕐᕌᒍᓂᒃ ᐱᖓᓱᓂᒃ. 23ᒎᑎᓕ ᑎᓕᓯᓚᐅᕐᐳᖅ ᐊᓂᕐᓂᕐᓗᖕᒥᒃ ᐊᐱᒥᓕᑭᐅᑉ ᓯᑭᒻᒥᐅᓪᓗ ᐊᑯᓐᓂᖓᓄᑦ; ᐃᓄᐃᑦ ᓯᑭᒻᒥᐅᑦ ᑐᖁᑦᓯᔪᒪᓂᕐᒧᑦ ᐊᑭᕋᕐᑐᓕᕐᓗᑎᒃ ᐊᐱᒥᓕᒃᒥᒃ. 24ᑕᒪᓐᓇ ᑐᖁᕅᓂᖅ ᔨᕈᐸᐅᓕᐅᑉ ᐃᕐᓂᖏᓐᓂᒃ 70ᓂᒃ ᐊᑭᓕᐅᑕᐅᖁᓪᓗᒍ ᐊᐅᖏᑕ ᑯᕕᔭᐅᓂᖏᓐᓄᑦ ᐸᓯᔭᒃᓴᐅᖁᓪᓗᒍ ᐊᐱᒥᓕᒃ ᑍᒃᑯᐊ ᖃᑕᓐᖑᑎᖓᑦ, ᑖᒃᑯᓂᖓ ᑐᖁᑦᓯᓚᐅᕐᑐᖅ, ᓯᑭᒻᒥᐅᓪᓗ ᐱᓂᐊᕐᓂᕐᓗᖕᓂᖏᓐᓄᑦ, ᐃᑲᔪᓚᐅᕐᒪᑕ ᖃᑕᓐᖑᑎᒥᓂᒃ ᑐᖁᕅᑎᓪᓗᒍ. 25ᓯᑭᒻᒥᐅᑦ ᐊᖑᑎᑦ ᑖᑦᓱᒥᖓ ᐅᐸᓗᐃᓐᓂᔪᒃᓴᓂᒃ ᐸᕐᓇᓚᐅᕐᐳᑦ ᖃᖅᑲᐃᑦ ᖄᖏᓐᓂ, ᐊᖅᑯᓵᕐᑐᓪᓗ ᑖᒃᑯᓂᖓ ᑎᒡᓕᒡᕕᒋᕙᒃᓗᒋᑦ ᑕᒫᓂ ᐊᖅᑯᒻᒥ; ᐊᐱᒥᓕᑭᓗ ᐅᖃᐅᑦᔭᐅᓚᐅᕐᐳᖅ ᑕᒪᑐᒥᖓ.
26ᓱᓕ ᒐᐅᓪ ᐃᐱᑎᐅᑉ ᐃᕐᓂᖓ ᓯᑭᒻᒧᑦ ᓄᒃᑎᓚᐅᕐᐳᖅ ᑭᖑᕚᖑᖃᑎᓂ ᐃᓚᒋᓪᓗᒋᑦ, ᓯᑭᒻᒥᐅᓪᓗ ᐃᓄᖏᑕ ᐅᒃᐱᕆᓕᕐᐹᑦ. 27ᑕᕝᕙᓐᖓᑦ ᐊᓂᕗᑦ ᐱᕈᕐᓰᕕᖕᓄᑦ, ᕔᓂᒃᓴᓂᒃ ᑲᑎᕐᓱᐃᓪᓗᑎᒃ ᕔᓂᒃᓴᓕᐅᕐᕕᖕᒥᖕᓂᑦ ᐃᑦᓰᔭᕐᓗᒋᓪᓗ, ᖁᕕᐊᓲᖃᑎᒌᒡᓗᑎᒃ. ᑐᒃᓯᐊᕐᕕᖕᒥᖕᓄᐊᕐᐳᓪᓗ ᒎᑎᓐᖑᐊᒥᖕᓄᑦ, ᑕᕝᕙᓂᓗ ᓂᕆᕗᑦ, ᐃᒥᕐᓗᑎᒡᓗ ᐃᔪᕿᑕᐅᑎᒋᕚᓪᓗ ᐊᐱᒥᓕᒃ. 28ᒐᐅᓪ ᐃᐱᑎᐅᑉ ᐃᕐᓂᖓ ᐅᖃᕐᐳᖅ, “ᖃᓄᐃᑦᑑᕙ ᐊᐱᒥᓕᒃ, ᖃᓄᐃᑦᑑᕕᑕᓗ ᐊᖑᑕᐅᔪᒍᑦ ᓯᑭᒻᒥ? ᓱᖕᒪᑦ ᑭᒡᒐᕐᑐᕆᐊᖃᕐᐸᕗᑦ? ᔨᕈᐸᐅᓕᐅᑉ ᐃᕐᓂᖓ ᔨᐳᓪᓗ ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖓ ᐱᔨᑦᓯᓚᐅᓐᖏᓚᖅ ᕼᐊᒧᕆᐅᑉ ᐃᓄᖏᓐᓂᒃ ᑖᓐᓇ ᓄᓇᑖᕐᑎᑦᓯᓚᐅᕐᑐᖅ ᓯᑭᒻᒥᒃ? ᐅᕙᒍᓪᓕ ᓱᖕᒪᑦ ᑭᒡᒐᕐᑐᕆᐊᖃᕐᐱᑖ ᑖᑦᓱᒥᖓ? 29ᐊᐅᓚᑦᓯᒍᒪ ᐃᓄᖕᓂᒃ ᑖᒃᑯᓂᖓ! ᐲᕐᑎᒃᑲᔭᕐᐸᕋ ᐊᐱᒥᓕᒃ! ᐅᖃᐅᑎᒐᔭᕐᐸᕋ, ‘ᐅᓇᑕᕐᑐᒃᓴᖁᑎᑎᑦ ᐸᕐᓇᒃᓗᒋᑦ, ᕾᓕᕆᑦ ᐅᓇᑕᕆᐊᕐᑐᕐᓗᑎᑦ!’” 30ᔨᐳᓪ ᐃᒡᓗᒐᓴᖕᓂᒃ ᐊᐅᓚᑦᓯᔪᖅ, ᑐᓴᕋᒥ ᒐᐅᓕᐅᑉ ᐃᐱᑎᐅᑉ ᐃᕐᓂᖓᑕ ᐅᖃᐅᓯᖏᓐᓂᒃ ᓂᓐᖓᒃᐳᖅ. 31ᐅᖃᕆᐊᕐᑐᕐᑐᓂᒡᓗ ᑎᓕᓯᕗᖅ ᐊᐱᒥᓕᑭᒧᑦ ᐊᕈᒪ-ᒦᑎᓪᓗᒍ, ᐅᖃᕐᓗᓂ, “ᒐᐅᓪ ᐃᐱᑎᐅᑉ ᐃᕐᓂᖓ ᐃᓚᖏᓪᓗ ᓯᑭᒻᒧᑦ ᑎᑭᓯᒪᖕᒪᑕ, ᐃᒡᓗᒐᓴᖕᓃᑦᑐᓪᓗ ᐃᓕᖕᓂᒃ ᐃᑎᖁᔨᖏᓪᓗᑎᒃ ᐊᑭᕋᕐᑐᓕᕐᑎᑉᐰᑦ. 32ᒫᓐᓇᓕ, ᐅᓐᓄᐊᒃᑯᑦ ᐅᓇᑕᕐᑐᒃᓴᖁᑎᑎᓪᓗ ᐃᓚᒋᔭᑎᑦ, ᐱᕈᕐᓰᕕᖕᓂ ᐃᔨᕐᓯᒪᓗᓯ ᐅᑕᖅᑭᔭᕐᑐᕆᑦᓯ. 33ᐅᓪᓛᖑᓕᕐᐸᑦ ᓯᕿᓂᖅ ᓄᐃᓕᕐᑎᓪᓗᒍ, ᐅᓪᓛᕈᕐᓗᓯ ᒪᑭᓪᓗᓯ ᐃᒡᓗᒐᓴᖕᒥᐅᑦ ᐅᐸᓗᐃᓗᒋᑦ ᐅᓇᑕᕆᐊᓛᕐᐸᓯ; ᒐᐅᓪ ᐅᓇᑕᕐᑐᒃᓴᖁᑎᖏᓪᓗ ᐊᓂᒃᐸᑕ ᐅᓇᑕᕆᐊᓕᕐᓗᑎᒃ ᐃᓕᑦᓯᓐᓂᒃ, ᐱᕕᒃᓴᕆᔪᓐᓇᕐᑕᑦᓯᓐᓄᑦ ᖃᓄᑐᐃᓐᓇᖅ ᐱᓂᐊᕐᕕᒋᓯᐅᒃ!”
34ᐊᐱᒥᓕᒃ ᐅᓇᑕᕐᑐᒃᓴᖁᑎᓕᒫᖏᓪᓗ ᓇᔪᕐᑎᖏᑦ ᒪᑭᑉᐳᑦ ᐅᓐᓄᐊᒥ, ᐃᔨᕐᓗᑎᒡᓗ ᓯᑭᒻᒥᐅᑉ ᓯᓚᑖᓄᑦ ᓯᑕᒤᖑᓪᓗᑎᒃ. 35ᒐᐅᓕ ᐃᐱᑎᐅᑉ ᐃᕐᓂᖓ ᐊᓂᖕᒪᑦ ᐃᒡᓗᒐᓮᑦ ᐃᑎᕐᑕᕐᕕᖓᓃᓕᕐᓗᓂ; ᐊᐱᒥᓕᑭᓗ ᐅᓇᑕᕐᑐᒃᓴᖁᑎᓂᓗ ᐃᓚᒋᔭᖏᑦ ᒪᑭᑉᐳᑦ ᐃᔨᕐᓯᒪᕝᕕᒋᔭᒥᖕᓂᑦ. 36ᒐᐅᓕᐅᓪᓕ ᐅᓇᑕᕐᑐᒃᓮᑦ ᑕᑯᒐᒥᒋᑦ, ᔨᐳᓪᒧᑦ ᐅᖃᕐᐳᖅ, “ᑕᑯᒃᑭᑦ, ᐃᓄᐃᑦ ᐊᖅᑲᕐᑎᕐᑐᑦ ᖃᖅᑬᑦ ᖄᖏᓐᓂᑦ!” ᔨᐴᓕᐅᑉ ᐅᖃᐅᑎᕚ, “ᖃᖅᑬᑦ ᖄᖏᑕ ᑕᕐᕋᖏᓐᓂᒃ ᑕᑯᓐᓇᕐᑐᑎᑦ ᐃᓅᔮᕐᑐᓂᒃ.”
37ᒐᐅᓕ ᐅᖃᒃᑲᓐᓂᕐᐳᖅ, “ᑕᑯᒋᑦ, ᐃᓄᐃᑦ ᐅᑯᐊ ᐊᖅᑲᕐᑎᕐᑐᑦ ᓄᓇᑦᑕ ᐊᑯᓐᓂᖓᓂᑦ ᐱᔪᑦ, ᐊᓯᖏᓪᓗ ᕾᔪᑦ ᐊᖅᑯᑎᒃᑯᑦ ᓇᐹᕐᑐᑦ ᐆᒃᒥᒃ ᐊᑎᓕᐅᑉ ᓯᕗᓂᒃᓴᒥᒃ ᓇᓚᐅᑦᑍᕕᐅᑉ ᓇᓛᓂᑦ!”
38ᑕᕝᕙ ᔨᐳᓕᐅᑉ ᐅᖃᐅᑎᕚ, “ᐅᖃᐅᓯᕐᔪᐊᕌᓗᒡᑎᓪᓕ ᓇᐅᒃ? ᐅᖃᓚᐅᕋᕕᑦ, ‘ᐊᐱᒥᓕᒃ ᓱᓇᐅᖕᒪᑦ, ᓱᖕᒪᓪᓗ ᑭᒡᒐᕐᑐᕆᐊᖃᕐᐱᑎᒎ.’ ᑖᒃᑯᐊᖑᓐᖏᓛᑦ ᐃᓄᐃᑦ ᒥᑕᐅᑎᒋᓚᐅᕐᑕᑎᑦ. ᒫᓐᓇ ᐂᓕᕆ ᐅᓇᑕᖃᑎᒋᔭᕐᑐᕐᓗᒋᑦ.” 39ᑕᕝᕙ ᒐᐅᓪ ᐊᓂᕗᖅ ᐅᓇᑕᕐᑐᒃᓴᖁᑎᓂ ᓯᑭᒻᒥᐅᑦ ᓯᕗᓕᕐᓗᒋᑦ, ᐅᓇᑕᕆᐊᓕᕐᓗᑎᒃ ᐊᐱᒥᓕᒃᒥᒃ. 40ᑕᕝᕙ ᐊᐱᒥᓕᑭᐅᑉ ᒪᓕᒃᓴᕐᐰᑦ, ᑖᑦᓱᒥᖓᓗ ᕿᒪᒃᓯᓪᓗᑎᒃ; ᐅᓄᕐᑐᑦ ᐃᑭᓕᕐᑕᐅᕗᑦ, ᐃᒡᓗᒐᓮᑦ ᐃᑎᕐᑕᕐᕕᖓ ᑎᑭᓪᓗᒍ ᐊᒡᓛᑦ. 41ᐊᐱᒥᓕᒃ ᓄᓇᖃᓚᐅᕐᐳᖅ ᐊᕈᒪ-ᒥ; ᔨᐳᓕᐅᓪᓗ ᒐᐅᓪ ᐃᓚᖏᓪᓗ ᐊᐅᓪᓚᕐᑎᓚᐅᕐᐰᑦ ᐃᒡᓗᒐᓴᖕᓂᑦ, ᓯᑭᒻᒥᓗ ᑕᕝᕙᓂ ᓄᓇᖃᕈᓐᓁᕐᑎᓪᓗᒋᑦ.
42ᖃᐅᑎᓪᓗᒍ ᐅᓇᑕᕐᑐᒃᓮᑦ ᐂᒋᕗᑦ ᐱᕈᕐᓰᕕᖕᓄᑦ, ᐊᐱᒥᓕᒃ ᑕᒪᑐᒥᖓ ᑐᓴᕐᑎᑕᐅᒋᓪᓗᓂ, 43ᐅᓇᑕᕐᑐᒃᓴᖁᑎᓂ ᐊᒡᒍᕐᐰᑦ ᐱᖓᓲᓕᓪᓗᒋᑦ, ᐃᔨᕐᓯᒪᓪᓗᑎᒃ ᐅᑕᖅᑭᖁᓪᓗᒋᑦ ᐱᕈᕐᓰᕕᖕᓂ; ᐃᓄᐃᓪᓗ ᑕᑯᒐᒥᒋᑦ ᐃᒡᓗᒐᓴᖕᓂᑦ ᐊᓂᔪᑦ, ᐃᔨᕐᓯᒪᕝᕕᖕᒥᖕᓂᑦ ᒪᑭᑉᐳᑦ ᑐᖁᓪᓗᒋᓪᓗ. 44ᐊᐱᒥᓕᒃ ᐅᓇᑕᕐᑐᒃᓴᖁᑎᖏᓪᓗ ᑐᐊᕕᕐᓗᑎᒃ ᐅᐸᒃᑐᓕᕐᐳᑦ ᐃᒡᓗᒐᓮᑦ ᐃᑎᕐᑕᕐᕕᖓᓄ ᐂᓪᓗᑎᒃ, ᐃᓚᖏᑦᑕ ᐊᓯᖏᑦ ᒪᕐᕈᐃᑦ ᐅᓇᑕᕆᐊᕐᐳᑦ ᐱᕈᕐᓰᕕᖕᒦᑦᑐᓂᒃ ᑐᖁᑍᓐᓇᕆᓪᓗᒋᑦ. 45ᐊᐱᒥᓕᒃᑯᑦ ᐅᓇᑕᕐᐳᑦ ᐅᓪᓗᓕᒫᖅ ᐃᒡᓗᒐᓴᒡᔪᐊᕐᒥᐅᓂᒃ, ᐃᒡᓗᒐᓮᑦ ᓵᓚᒋᓪᓗᒋᑦ, ᓄᓇᖃᕐᑐᑦ ᑐᖁᑉᐰᑦ; ᐃᒡᓗᒐᓮᓪᓗ ᓯᖁᑦᑎᕐᓗᒋᑦ, ᓄᓇᓗ ᑕᕆᐅᕐᒥᒃ ᑲᓐᖓᕐᑎᕐᕕᒋᓪᓗᒍ.
46ᐃᓄᓕᒫᓪᓕ ᓯᑭᒻᒥᐅᑦ ᓇᐸᔪᕐᔪᐊᒦᑦᑐᑦ ᑕᒪᑐᒥᖓ ᑐᓴᕋᒥᒃ, ᕿᒫᕕᖕᒧᑦ ᐃᑎᕐᐳᑦ ᑐᒃᓯᐊᕐᕕᖕᒦᑦᑐᒧᑦ ᐰᓕᒧᑦ ᒎᑎᓐᖑᐊᖃᕐᕕᖕᒧᑦ. 47ᐊᐱᒥᓕᒃ ᐅᖃᐅᑦᔭᐅᕗᖅ ᐃᓄᐃᑦ ᓯᑭᒻᒥᐅᑉ ᓇᐸᔪᕐᔪᐊᖓᓃᑦᑐᒧᑦ ᕿᒫᓯᒪᓕᕐᓂᖏᓐᓂᒃ. 48ᑕᕝᕙ ᐊᐱᒥᓕᒃ ᒪᔪᕋᕐᐳᖅ ᖃᖅᑲᐅᑉ ᔭᓪᒧᓐᒧᑦ, ᐅᓇᑕᕐᑐᒃᓴᖁᑎᓂ ᓇᔪᕐᑎᒋᔭᓂ ᐃᓚᒋᓪᓗᒋᑦ; ᐊᐱᒥᓕᒃᓗ ᐅᓕᒪᐅᒻᒥᒃ ᑎᒍᓯᓪᓗᓂ ᓇᐹᕐᑑᑉ ᐊᕙᓚᖓᔪᖏᓐᓂᒃ ᓇᑲᑦᓯᕗᖅ, ᑎᒍᓪᓗᒋᑦ ᐃᕐᓱᓕᕐᐰᑦ. ᐅᓇᑕᕐᑐᒃᓴᖁᑎᓂ ᐃᓚᒋᔭᓂ ᐅᖃᐅᑎᕔᑦ, “ᐅᕙᓐᓂᒃ ᑕᑯᓐᓇᕋᑦᓯ, ᑍᒫᑦᓮᓐᓇᖅ ᑐᐊᕕᕐᓗᓯ ᐱᒋᑦᓯ.” 49ᐃᓄᓕᒫᓪᓗ ᓇᑲᑦᓯᕗᑦ ᓇᐹᕐᑐᑦ ᐊᕙᓚᖓᔪᖏᓐᓂᑦ; ᐊᐱᒥᓕᑭᒥᒡᓗ ᒪᓕᒡᓗᑎᒃ, ᑲᑎᑉᐰᓪᓗ ᕿᔪᐃᑦ ᕿᒫᓯᒪᕕᒋᔭᖓᓐᓄᑦ. ᐃᑯᐊᓪᓚᒃᐹᓪᓗ, ᐃᓄᐃᑦ ᓯᑭᒻᒥ ᐳᕐᑐᔪᒦᑎᓪᓗᒋᑦ, ᐃᓄᓕᒫᖏᓪᓗ ᑕᕝᕙᓃᑦᑐᑦ ᑐᖁᕗᑦ; ᐃᒪᖄ 1,000 ᐊᖑᑎᑦ ᐊᕐᓁᓪᓗ.
50ᐊᐱᒥᓕᒃ ᐂᒋᕗᖅ ᑎᐱᔾᒧᑦ, ᐃᒡᓗᒐᓴᖏᓪᓗ ᓵᓚᒋᓪᓗᒋᑦ ᑎᒍᕔᑦ. 51ᑍᑲᓂᓗ ᓇᐸᔪᕐᔪᐊᖃᕐᐳᖅ ᐊᑦᑕᕐᓇᖏᑦᑐᒥᒃ, ᑕᕝᕙᓃᑦᑐᓪᓗ ᐊᖑᑏᑦ ᐊᕐᓁᓪᓗ ᐃᒡᓗᒐᓴᖕᓃᑦᑐᑦ ᑕᕝᕗᖓ ᕿᒫᕗᑦ, ᐅᒃᑯᐊᖓᓗ ᐊᑦᓱᖏᕐᓗᒍ; ᐊᐱᒥᓕᒃᑯᓪᓕ ᑕᕝᕗᓐᖓᕋᒥᒃ ᖃᖓᓄᐊᕐᐳᑦ. 52ᐊᐱᒥᓕᒃᓗ ᑕᕝᕗᓐᖓᕐᓗᓂ ᓇᐸᔪᐊᓗᖕᒧᑦ, ᐅᓇᑕᖃᑎᒋᕔᑦ, ᐹᖓᓄᐊᕐᐳᓪᓗ ᐃᑯᐊᓪᓚᒍᒪᓪᓗᒍ. 53#ᓴᒧᐃᓕ ᐂᑉᐸᖏᑦ 11:21.ᐊᕐᓇᐅᓪᓕ ᓯᖃᓪᓕᓯᕕᐅᑉ ᖄᖓᓃᑦᑐᒧᑦ ᐅᔭᕋᖕᒧᑦ ᐊᐱᒥᓕᑭ ᒥᓗᕐᐹ ᓂᐊᖁᐊᒍᑦ, ᓂᐊᖁᖓᑕᓗ ᓴᐅᓂᖓ ᓯᖁᒻᒪᑖᕐᐹ. 54ᑐᐊᕕᕐᓗᓂ ᐃᓅᓱᒃᑐᖅ ᐅᓇᑕᐅᑎᖏᓐᓂᒃ ᐊᒡᔭᕐᓯᔪᖅ ᕾᖁᕚ, ᐅᖃᐅᑎᓪᓗᒍᓗ, “ᓴᕕᒡᔪᐊᑦ ᐊᒧᓗᒍ ᑐᖁᓚᐅᓐᖓ, ᐅᖃᐅᓯᐅᖃᑦᑕᕈᒪᖏᓐᓇᒪ ᐊᕐᓇᒧᑦ ᑐᖁᑕᐅᓂᕋᕐᑕᐅᓗᖓ.” ᐊᓱᐃᓛᒃ ᐃᓅᓱᒃᑑᑉ ᑲᐱᕚ ᑐᖁᓪᓗᓂᓗ. 55ᐃᓴᕆᐊᓕᒥᐅᑦ ᑕᑯᒐᒥᒃ ᐊᐱᒥᓕᒃ ᑐᖁᖕᒪᑦ, ᐊᖏᕋᕐᑐᐃᓐᓇᐅᕗᑦ.
56ᑍᒤᒻᒪᑦ ᒎᑎᐅᑉ ᐊᑭᓂᐊᓚᐅᕐᐹ ᐊᐱᒥᓕᒃ ᐱᕋᔭᖕᓂᕆᓚᐅᕐᑕᖓᓄᑦ ᐊᑖᑕᒥᓄᑦ, ᑐᖁᑦᓯᓚᐅᕐᒪᑦ ᖃᑕᓐᖑᑎᒥᓂᒃ 70ᓂᒃ. 57ᒎᑎᐅᑦᑕᐅᖅ ᓯᑭᒻᒥᐅᑦ ᐊᒃᓱᕈᕐᓇᕐᑐᒃᑰᕐᑎᓚᐅᕐᐰᑦ ᐱᐅᖏᑦᑐᒥᒃ ᐱᓇᓱᐊᓚᐅᕐᓂᖏᓐᓄᑦ ᔫᑕᒻ, ᔨᕈᐸᐅᓕᐅᑉ ᐃᕐᓂᖓᑕ ᐅᖃᐅᓯᕆᓚᐅᕐᑕᖓᑐᑦ ᐅᖃᕐᓂᕐᓗᕕᒋᓚᐅᕐᒪᒋᑦ.
Currently Selected:
ᐃᓗᐊᕐᓮᔩᑦ ᐊᒡᓚᖏᑦ 9: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
