ᐃᓗᐊᕐᓮᔩᑦ ᐊᒡᓚᖏᑦ 8
8
ᒥᑎᐊᓂᒥᐅᑦ ᑭᖑᓪᓕᕐᐹᒥᒃ ᓵᓚᐅᓂᖓᑦ
1ᐃᕗᕅᒥᐅᑦ ᐃᓄᖏᑦ ᐅᖃᕐᐳᑦ ᒋᑎᐅᓂᒧᑦ, “ᓱᖕᒪᑦ ᐅᕙᑦᑎᓐᓂᒃ ᐱᑦᓯᐊᕐᕕᖃᓚᐅᓐᖏᓚᑎᑦ, ᐅᕙᑦᑎᓐᓂᒃ ᕾᖁᔨᓚᐅᖏᓐᓇᕕᑦ ᐅᓇᑕᕆᐊᕐᓂᐊᕐᑎᓪᓗᓯ ᒥᑎᐊᓂᒥᐅᓂᒃ?” ᓈᒻᒪᒃᓴᕋᑎᒃ ᑍᒫᒃ ᐃᓕᕋᓇᕐᕕᒋᓪᓗᒍ ᓂᓪᓕᐊᕕᒋᕚᑦ.
2ᐅᖃᐅᑎᕔᓪᓕ, “ᖃᓄᖅ ᐱᓂᐊᕐᓂᕆᓚᐅᕐᑕᒃᑲ ᐊᑦᔨᓪᓗᐊᖃᕐᐹᑦ ᐱᓂᐊᕐᓂᕆᓚᐅᕐᑕᑦᓯᓐᓂᒃ? ᐃᕗᕅᒥᒥᑦ ᑲᑎᕐᓱᐃᓂᕐᓗᑯᐃᑦ ᕔᓂᒃᓴᓂᒃ ᐱᐅᓂᕐᓴᐅᓐᖏᓛᑦ ᐊᐰᔨᕆᒥ ᕔᓂᓕᐊᕆᔭᐅᓯᒪᔪᓂᑦ? 3#ᐃᓐᖏᕈᑦ 83:11.ᒎᑎᐅᑉ ᓵᓚᖃᕐᓂᕐᒥᒃ ᑐᓂᕕᒋᓚᐅᕐᐹᓯ ᒥᑎᐊᓂᒥᐅᑦ ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖏᖕᓂᒃ ᒪᕐᕉᖕᓂᒃ, ᐅᕆᑉᒥᒃ ᔩᐱᒥᒡᓗ; ᓱᓇᒥᒡᓕ ᐱᓂᐊᓚᐅᕐᐳᖓ ᐱᓂᐊᕐᓂᕆᓚᐅᕐᑕᑦᓯ ᐊᑦᔨᓪᓗᐊᖏᓐᓂᒃ?” ᑍᒫᒃ ᐅᖃᐅᑎᖕᒪᒋᑦ ᓂᓐᖓᐅᒪᓗᐊᕈᓐᓃᕐᐳᑦ.
4ᒋᑎᐅᓂ ᑎᑭᑎᓪᓗᒍ ᔪᐊᕐᑕᓂᒧᑦ ᐃᑳᕐᑎᓪᓗᒍᓗ ᐊᑭᐊᓄᑦ. ᐃᒻᒥᓂᒃ ᐊᖑᑎᓪᓗ 300ᐃᑦ ᐃᓚᒋᔭᖏᑦ ᑕᖃᓯᒪᓕᓚᐅᕐᐳᑦ, ᑳᓕᕐᓗᑎᒡᓗ. 5ᓱᑰᑎᒥᐅᓪᓗ, ᑕᕝᕙᓂ ᓄᓇᖃᕐᑐᑦ ᐅᖃᐅᑎᕔᑦ, “ᕿᓄᕗᖓ ᐃᓕᑦᓯᓐᓄᑦ ᐃᓄᖁᑎᒃᑲ ᒪᓕᒃᑐᑦ ᐅᕙᓐᓂᒃ ᓂᐊᖂᔭᒥᒃ ᑐᓂᓚᐅᕐᓯᐅᒃ ᓄᑮᓕᕐᒪᑕ, ᒪᓕᒃᑲᑦᑕ ᔩᐸᒥᒃ ᔮᓪᒨᓇᒥᒡᓗ ᒥᑎᐊᓂᒥᐅᑦ ᐊᖓᔪᖅᑳᕐᔪᐊᖏᖕᓂᒃ.”
6ᓱᑰᑎᒥᐅᓪᓕ ᓯᕗᓕᕐᑎᖏᑦ ᐅᖃᕐᐳᑦ, “ᔩᐸ ᔮᓪᒨᓇᓗ ᑎᒍᓯᒪᓕᕋᑦᓯᐅᒃ ᓱᖕᒪᓪᓕ ᓂᐊᖂᔭᓂᒃ ᑐᓂᓯᔭᕆᐊᖃᕐᐱᑖ ᐅᓇᑕᕐᑐᒃᓴᖁᑎᖕᓄᑦ?”
7ᑍᒤᒻᒪᑦ ᒋᑎᐅᓂᐅᑉ ᐅᖃᐅᑎᕔᑦ, “ᐊᑕᓂᐅᑉ ᐅᕙᑦᑎᓐᓄᑦ ᑐᓂᒃᐸᒋᒃ ᔩᐸ ᔮᓪᒨᓇᓗ, ᑎᒥᓯ ᑭᓪᓕᐊᔭᕐᑐᓛᕐᐸᕗᑦ ᑲᑭᓪᓚᐅᑎᓂᒃ ᐅᕐᐱᖕᓂᒡᓗ ᓯᐅᕋᕐᒥᐅᑕᕐᓂᒃ ᐊᑐᕐᓗᑕ!” 8ᑕᕝᕙᓐᖔᕐᓗᑎᒃ ᐱᓄᐃᓕᒧᑦ ᑎᑭᒃᑭᕗᑦ, ᑍᒫᑦᓮᓐᓇᖅ ᐊᐱᕆᒋᕔᑦ ᑕᕝᕙᓂ ᓄᓇᖃᕐᑐᑦ, ᐱᓄᐃᓕᒥᐅᓪᓕ ᑭᐅᓚᐅᕆᕗᑦ ᑍᒫᑦᓮᓐᓇᖅ ᓱᑰᑎᒥᐅᑦ ᑭᐅᑦᔪᓯᕆᓚᐅᕐᑕᖓᑎᑐᑦ. 9ᑍᒤᒻᒪᑦ ᐱᓄᐃᓕᒥᐅᑦ ᐅᖃᐅᑎᕔᑦ, “ᓵᓚᖃᕐᓗᖓ ᐅᑎᕈᒪ ᓇᐸᔪᕐᔪᐊᖁᑎᓯ ᐅᓇ ᓯᖁᒥᑦᓱᒫᕐᐸᕋ!”
10ᔩᐸᓗ ᔮᓪᒨᓇᓗ ᑳᑯᕆᒦᓚᐅᕐᐴᒃ ᐅᓇᑕᕐᑐᒃᓴᖁᑎᑎᒃ ᐃᓚᒋᓪᓗᒋᑦ. ᐅᓇᑕᕐᑐᒃᓴᖁᑎᖏᑦ 15,000ᐅᓪᓗᑎᒃ; ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐱᓯᒪᔪᑦ ᐅᓇᑕᕐᑐᒃᓮᑦ ᐊᒥᐊᒃᑯᖏᑦ; 120,000ᐃᑦ ᐅᓇᑕᕐᑐᒃᓴᖁᑎᖏᑦ ᐅᓇᑕᐅᑎᓖᑦ ᑐᖁᖓᓕᓚᐅᕐᒪᑕ. 11ᒋᑎᐅᓂᓕ ᐊᖅᑯᑎᒃᑯᑦ ᐃᖏᕐᕋᓪᓗᓂ, ᓄᓁᑦ ᓅᐸᐅᓪᓗ ᔪᒡᐱᕼᐊᐅᓪᓗ ᓯᕿᓂᖓᑕ ᓂᐱᕕᐊᒍᑦ, ᐅᓇᑕᕐᑐᒃᓮᓪᓗ ᐅᓇᑕᕐᓗᒋᑦ. ᓂᕆᐅᓐᖏᓈᓚᐅᕐᐰᑦ. 12ᔩᐸᓗ ᔮᓪᒨᓇᓗ ᕿᒪᒃᓯᕗᒃ, ᒪᓕᒡᓗᒋᒡᓗ ᑎᒍᕚᒃ, ᒥᑎᐊᓂᒥᐅᑦ ᐊᖓᔪᖅᑳᕐᔪᐊᖏᒃ ᑖᒃᑯᐊᒃ ᒪᕐᕉᒃ, ᐅᓇᑕᕐᑐᒃᓴᖁᑎᖏᓪᓗ ᐅᐃᒻᒪᒃᑎᑉᐰᑦ.
13ᒋᑎᐅᓂᓕ ᔪᐊᓯᐅᑉ ᐃᕐᓂᖓ ᐅᑎᓕᕋᒥ ᐅᓇᑕᕐᕕᖕᒥᖕᓂᑦ ᐊᖅᑲᕐᑎᓚᐅᕐᐳᖅ ᕼᐃᕆᔅ ᐊᖅᑯᑎᖓᒍᑦ, 14ᑎᒍᓯᓪᓗᓂᓗ ᐊᖑᒻᒥᒃ ᐅᕕᒃᑲᒥᒃ ᓱᑰᑎᒥᐅᑕᕐᒥᒃ, ᐊᐱᕐᓱᓚᐅᕐᐹᓗ; ᑖᓐᓇᓗ ᑎᑎᕋᓚᐅᕐᐳᖅ ᐊᑎᕐᓂᒃ 77ᓂᒃ ᓱᑰᑎᒥᐅᑦ ᓯᕗᓕᕐᑎᖏᓐᓂᒃ ᐊᖓᔪᖅᑳᖏᓐᓂᒡᓗ. 15ᒋᑎᐅᓂᓗ ᑎᑭᓐᓇᒥ ᓱᑰᑎᐅᑉ ᐃᓄᖏᑦ ᐅᖃᐅᑎᕔᑦ, “ᐅᑯᐊᒃ ᑕᕝᕙ ᔩᐸᓗ ᔮᓪᒨᓇᓗ, ᑖᒃᑯᐊᒃ ᐱᓪᓗᒋᒃ ᐅᐃᕕᓴᓚᐅᕐᑐᓯ ᐅᕙᓐᓂᒃ ᐅᖃᓚᐅᕋᑦᓯ, ‘ᑎᒍᓯᒪᓪᓗᓯᐅᒃ ᐱᓯᒪᓕᕐᐱᓯᒋᑦ ᔩᐸᓗ ᔮᓪᒨᓇᓗ, ᑍᒫᒃ ᓂᕆᑎᑦᓯᔭᕆᐊᖃᓕᕐᐱᑖ ᐅᓇᑕᕐᑐᒃᓴᖁᑎᖕᓂᒃ ᓄᑮᕈᑎᓕᕐᑐᓂᒃ?’” 16ᑕᕝᕙ ᑎᒍᓯᓚᐅᕐᐳᖅ ᑲᑭᓪᓚᐅᑎᓕᖕᓂᒃ ᐅᕐᐱᖕᓂᒡᓗ ᐃᓄᖃᖏᑦᑐᒥᑦ ᐱᔭᕕᓂᕐᒥᓂᒃ ᐋᓐᓂᕐᑎᕆᑦᔪᑎᒋᓪᓗᒋᓪᓗ ᓱᑰᑎᒥᐅᑦ ᐊᖓᔪᖅᑳᖏᓐᓂᒃ. 17ᓇᐸᔪᕐᔪᐊᕐᓗ ᐱᓄᐃᓕᒦᑦᑐᖅ ᐅᕐᕈᑎᓚᐅᕐᐹ ᑐᖁᓪᓗᒋᓪᓗ ᐃᒡᓗᒐᓴᖕᓃᑦᑐᑦ.
18ᒋᑎᐅᓂᐅᑉ ᔩᐸᓗ ᔮᓪᒨᓇᓗ ᐊᐱᕆᕚᒃ, “ᑍᒃᑯᐊᓕ ᐊᖑᑎᑦ ᑐᖁᓚᐅᕐᑕᓯ ᑍᐸᕆᒥ ᖃᓄᐃᑦᑑᕙᑦ?” ᑭᐅᕘᒡᓗ, “ᐃᓕᒃᑐᑦ ᑕᐅᑦᑐᖃᓚᐅᕐᐳᑦ ᐃᓘᓐᓇᑎᒡᓗ ᐊᖓᔪᖅᑳᕐᔪᐊᑉ ᐃᕐᓂᕆᔫᔮᓚᐅᕐᐰᑦ.”
19ᒋᑎᐅᓂᐅᑉ ᐅᖃᐅᑎᕔᑦ, “ᑍᒃᑯᐊ ᖃᑕᓐᖑᑎᒋᓚᐅᕐᐸᒃᑲ, ᐊᓈᓇᒪ ᓇᖕᒥᓂᖅ ᐃᕐᓂᖏᑦ. ᐊᖏᕈᑎᖃᒻᒪᕆᒃᐳᖓ, ᐊᑕᓂᕐᒧᑦ ᐆᒪᔪᒧᑦ, ᑐᖁᓚᐅᖏᒃᑯᑦᓯᐅᒃ, ᑐᖁᒃᑲᔭᓐᖏᓚᑦᓯᒃ.”
20ᔨᑎᕆᒧᑦ ᐅᖃᕐᐳᖅ ᐃᕐᓂᕐᒥᓄᑦ ᐊᖓᔪᒃᓕᕐᐹᒧᑦ, “ᐊᑏ ᑐᖁᓕᒃᑭᒃ!” ᔩᓴᕆᐅᓪᓕ ᓴᕕᒡᔪᐊᓂᒃ ᑎᒍᔪᒪᓚᐅᓐᖏᓚᖅ, ᑲᑉᐱᐊᓱᒃᑲᒥ ᓄᑲᑉᐱᐊᑐᐃᓐᓇᐅᒐᒥ ᓱᓕ.
21ᔩᐸᓗ ᔮᓪᒨᓇᓗ ᐅᖃᕐᐴᒃ ᒋᑎᐅᓂᒧᑦ, “ᐊᑏ, ᓇᖕᒥᓂᖅ ᑐᖁᓚᐅᕐᑎᒍᒃ. ᐊᖑᑦ ᐊᖑᑕᐅᖕᒪᑦ ᓴᓐᖏᔫᓪᓗᓂᓗ.” ᑍᒤᒻᒪᑦ ᒋᑎᐅᓂᐅᑉ ᑐᖁᑉᐹᒃ, ᑳᒥᓕᖁᑎᖏᑕᓗ ᖁᖓᓯᖏᑕ ᐱᐅᓴᐅᑎᖏᑦ ᐅᔭᒥᖏᑦ ᑎᒍᕔᑦ.
22ᑕᒪᑐᒪ ᑭᖑᓂᐊᒍᑦ, ᐃᓴᕆᐊᓕᒥᐅᑉ ᒋᑎᐅᓂᒧᑦ ᐅᖃᕐᐳᑦ, “ᐊᒐᔪᖅᑳᖑᓚᐅᕆᑦ ᐅᕙᑦᑎᓐᓄᑦ ᐃᕝᕕᑦ ᐃᕐᓂᑎᓪᓗ ᐃᕐᖑᑕᑎᓪᓗ. ᐱᐅᓕᓚᐅᕋᑦᑎᒍᑦ ᒥᑎᐊᓂᒥᐅᑦ ᐱᔪᓐᓇᕐᓂᖏᓐᓂᑦ.”
23ᒋᑎᐅᓂᐅᑉ ᑭᐅᕔᑦ, “ᐊᖓᔪᖅᑳᖑᔪᒪᓐᖏᓚᖓ ᐃᓕᑦᓯᓐᓄᑦ, ᐃᕐᓂᒃᑲᓘᓐᓃᑦ ᐊᖓᔪᖅᑳᓐᖑᕐᓂᐊᓐᖏᓚᑦ, ᐊᑕᓂᕐᓕ ᐊᖓᔪᖅᑳᖑᓂᐊᕐᐳᖅ ᐃᓕᑦᓯᓐᓄᑦ.” 24ᒋᑎᐅᓂᓗ ᐅᖃᒃᑲᓐᓂᕐᐳᖅ, “ᐱᔪᒪᔭᖃᕐᐳᖓ ᐊᑕᐅᓯᕐᒥᒃ, ᐃᓘᓐᓇᓯ ᑐᓂᓯᕕᒋᓯᓐᖓ ᑐᖁᓚᐅᕐᑕᑦᓯ ᐱᖁᑎᕕᓂᖏᓐᓂᒃ ᑎᒍᓚᐅᕐᑕᑦᓯᓐᓂᒃ ᓯᐅᑎᒥᐅᑕᕐᓂᒃ.” (ᒎᓗᓂᒃ ᓯᐅᑎᕈᑎᖃᕐᐸᓚᐅᕐᒪᑕ ᐃᓯᒤᓕᐅᑉ ᑭᖑᕚᖏᑦ.)
25ᐃᓄᐃᑦ ᑭᐅᕚᑦ, “ᖁᕕᐊᓱᖕᓂᐊᕐᐳᒍᑦ ᑐᓂᓯᕕᒋᒍᑦᑎᒋᑦ.” ᐊᓐᓄᕌᒥᒃ ᐃᓕᓯᓪᓗᑎᒃ, ᐃᓘᓐᓇᑎᒡᓗ ᐃᓕᓯᕗᑦ ᓯᐅᑎᒥᐅᑕᕐᓂᒃ ᑎᒍᓚᐅᕐᑕᒥᖕᓂᒃ. 26ᓯᐅᑎᒥᐅᑍᑦ ᒎᓗᐃᑦ ᐅᖁᒤᓐᓂᖃᓚᐅᕐᐳᑦ 1,700ᓂᒃ ᓴᑯᓪᔅᓂᒃ ᐅᖁᒤᓐᓂᕐᓯᐅᑏᑦ ᒪᓕᒡᓗᒋᑦ, ᐃᓚᒋᔭᐅᓇᑎᒃ ᖁᖓᓯᕐᒧᑦ ᐱᐅᓴᐅᑏᑦ, ᐃᑦᑎᐅᔧᓪᓗ ᑕᐅᑦᑐᖏᑦ ᐊᓐᓄᕌᑦ ᒥᑎᐊᓂᒥᐅᑦ ᐊᖓᔪᖅᑳᕐᔪᐊᖏᑕ ᐊᑐᓚᐅᕐᑕᖏᑦ, ᐅᕝᕙᓘᓐᓃᑦ ᑳᒥᓖᑦ ᖁᖓᓯᕈᑎᒋᓚᐅᕐᑕᖏᑦ. 27ᒋᑎᐅᓂ ᓴᓇᓚᐅᕐᐳᖅ ᐊᔪᕆᕐᑐᐃᔨᕐᔪᐊᑉ ᓴᒡᕕᖕᒥᐅᑕᖏᓐᓂᒃ ᒎᓗᓂᒃ ᐱᓚᐅᕐᑕᒥᓂᒃ; ᐊᖏᕐᕋᒥᓄᓪᓗ ᐃᓕᕚ ᐅᐸᕋᒥ. ᐃᓴᕆᐊᓕᒥᐅᑦ ᐃᓘᓐᓇᑎᒃ ᐊᓯᓐᓂᐊᓕᓚᐅᕐᐳᑦ ᒎᑎᒥᒃ, ᐃᓘᓐᓇᑎᒡᓗ ᐂᕗᑦ ᑐᒃᓯᐊᕆᐊᕐᑐᕐᓗᑎᒃ ᑖᑦᓱᒧᖓ. ᒋᑎᐅᓂᐅᑉ ᐃᓚᖏᑕᓗ ᐊᔪᓕᕈᑎᒋᓚᐅᕐᐹᑦ. 28ᒥᑎᐊᓂᒥᐅᑦ ᓵᓚᐅᕗᑦ ᐃᓴᕆᐊᓕᒥᐅᓄᑦ, ᓯᕘᕋᓇᕈᓃᓚᐅᕐᐳᑦ ᒪᑭᒃᑲᓐᓂᕈᓐᓃᕐᓗᑎᒡᓗ. ᓄᓇᒥᓗ ᐅᓇᑕᕐᓂᖃᕈᓐᓃᓚᐅᕐᐳᑦ ᐊᕐᕌᒍᓂᒃ 40ᓂᒃ ᒋᑎᐅᓂᐅᑉ ᑐᖁᓂᖓ ᑎᑭᓪᓗᒍ.
ᒋᑎᐅᓂᐅᑉ ᑐᖁᓂᖓ
29ᔨᕈᐸᐅᓪ ᔪᐊᓯᐅᑉ ᐃᕐᓂᖓ ᐅᑎᓚᐅᕐᐳᖅ ᓇᖕᒥᓂᖅ ᐊᖏᕐᕋᒥᓄᑦ ᑍᑲᓃᓕᕐᓗᓂᓗ. 30ᓇᖕᒥᓂᕐᒥᓂᒃ ᒋᑎᐅᓂ ᐃᕐᓂᖃᓚᐅᕐᐳᖅ 70ᓂᒃ, ᐅᓄᕐᑐᓂᒃ ᓄᓕᐊᖃᓚᐅᕋᒥ. 31ᓄᓕᐊᖃᒃᑲᓐᓂᓚᐅᕆᕗᖅ ᓯᑭᒻᒥ ᓄᓇᖃᕐᑐᒥᒃ, ᑖᓐᓇᓗ ᐃᕐᓂᕐᑖᕐᕕᒋᓚᐅᕐᐹ ᐊᑎᖃᕐᑎᓪᓗᒍᓗ ᐊᐱᒥᓕᑭᒥᒃ. 32ᒋᑎᐅᓂ ᔪᐊᓯᐅᑉ ᐃᕐᓂᖓ ᑐᖁᓚᐅᕐᐳᖅ ᐃᓄᑐᖃᒻᒪᕆᐅᓕᕐᓗᓂ. ᐃᓗᕕᕐᑕᐅᓪᓗᓂᓗ ᐊᑖᑕᖓᑕ ᔪᐊᓯᐅᑉ ᐊᐰᔭᕆᑎᐅᑉ ᑭᖑᕚᖓᑕ ᐃᓗᕕᖓᓂ, ᐅᐸᕋᒥ.
33ᒋᑎᐅᓂᐅᓪᓗ ᑐᖁᓂᖓᑕ ᑭᖑᓂᐊᒍᑦ ᐃᓴᕆᐊᓕᐅᑉ ᑭᖑᕚᖏᑦ ᐊᓯᓐᓂᐊᓕᕇᓚᐅᕆᕗᑦ ᒎᑎᒥᒃ, ᑐᒃᓯᐊᕐᐸᓕᕐᓗᑎᒃ ᐰᓕᒧᑦ, ᓴᓇᓚᐅᕐᐳᑦ ᐰᓕ-ᐱᕆᑎᒥᒃ ᒎᑎᑖᕆᓪᓗᒍᓗ. 34ᐃᖅᑲᐅᒪᔪᓐᓃᓚᐅᕐᐳᓪᓗ ᐊᑕᓂᕐᒥᒃ ᒎᑎᒥᖕᓂᒃ, ᓴᐳᑦᔨᔨᒋᕙᓚᐅᕐᑕᒥᖕᓂᒃ ᐊᑭᕋᒥᖕᓂᑦ ᖃᖓᑐᐃᓐᓇᓕᒫᖅ. 35ᔨᕈᐸᐅᓕᐅᓪᓗ ᐱᑦᓯᐊᕐᕕᒋᓚᐅᓐᖏᓔᑦ ᒋᑎᐅᓂᐅᑉ ᐃᓚᖏᑦ, ᐱᐅᔪᑦ ᐱᓂᐊᕐᓂᕆᓚᐅᕐᑕᖏᑦ ᐃᓴᕆᐊᓕᒥᐅᓄᑦ ᐱᓪᓗᒋᑦ.
Currently Selected:
ᐃᓗᐊᕐᓮᔩᑦ ᐊᒡᓚᖏᑦ 8: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
