ᐃᓗᐊᕐᓮᔩᑦ ᐊᒡᓚᖏᑦ 10
10
ᑑᓚ
1ᐊᐱᒥᓕᑭᐅᑉ ᑐᖁᓂᖓᑕ ᑭᖑᓂᐊᒍᑦ ᑑᓚ, ᐳᕙᐅᑉ ᐃᕐᓂᖓ ᑐᑑᑉ ᐃᕐᖑᑕᖓ, ᓴᐳᑦᔨᒋᐊᕐᑐᓚᐅᕐᐳᖅ ᐃᓴᕆᐊᓕᒥᐅᓂᒃ. ᑖᓐᓇ ᐃᓴᑳᕆᐅᑉ ᑭᖑᕚᖓ ᓄᓇᖃᕐᑐᖅ ᓴᒥᕆᐅᑉ ᖃᖅᑲᖓᓂ ᐃᕗᕅᒻ ᓄᓇᖓᓂ. 2ᑖᓐᓇ ᐃᓴᕆᐊᓕᒥᐅᓄᑦ ᑕᓯᐅᕐᑎᐅᓚᐅᕐᐳᖅ ᐊᕐᕌᒍᓂᒃ 23ᓂᒃ. ᑐᖁᖕᒪᓪᓗ ᐃᓗᕕᕐᑕᐅᕗᖅ ᓴᒥᕆᒥ. 3ᑑᓚᐅᑉ ᑭᖑᓂᖓᓂ ᓴᖅᑭᑉᐳᖅ ᔧᕆ ᒋᓕᐊᑎᒥᐅᑕᖅ, ᑕᓯᐅᕐᑎᐅᓚᐅᕐᐳᖅ ᐃᓴᕆᐊᓕᒥᐅᓄᑦ ᐊᕐᕌᒍᓂᒃ 22ᓂᒃ. 4ᐃᕐᓂᖃᓚᐅᕐᐳᖅ 30ᓂᒃ ᓯᐅᑎᖅᑯᕐᑐᔪᖁᑎᖃᓚᐅᕐᑐᖅ ᐃᑭᒪᕝᕕᖕᒥᓂᒃ 30ᓂᒃ. 30ᓂᒡᓗ ᐃᒡᓗᒐᓴᖃᓚᐅᕐᐳᖅ ᒋᓕᐊᑎᑦ ᓄᓇᖓᓂ, ᓱᓕ ᑍᔭᐅᔪᑦ ᔧᕆᐅᑉ ᓄᓇᓕᖁᑎᖏᓐᓂᒃ. 5ᔧᕆ ᑐᖁᓚᐅᕐᐳᖅ ᐃᓗᕕᕐᑕᐅᓪᓗᓂᓗ ᑲᒪᓐ-ᒥ.
ᔨᑉᑕ
6ᐃᓴᕆᐊᓕᒥᐅᑦ ᓱᓕ ᐊᔪᕐᑐᓕᓚᐅᕆᕗᑦ ᐊᑕᓂᕐᒧᑦ ᑐᓯᐊᕐᓂᕐᒥᖕᓄᑦ ᐰᓕᒧᑦ ᐋᔅᑕᕉᑎᒧᓪᓗ, ᒎᑎᖃᕐᓂᕐᒥᖕᓄᑦ, ᓯᕆᐊᒥᐅᓪᓗ ᒎᑎᓐᖑᐊᖏᓐᓂᒃ, ᓮᑐᓂᒥᐅᓪᓗ ᒎᑎᓐᖑᐊᖏᓐᓂᒃ, ᒧᐊᐱᒥᐅᓪᓗ ᒎᑎᓐᖑᐊᖏᓐᓂᒃ, ᐊᒧᓁᑎᒥᐅᓪᓗ ᒎᑎᓐᖑᐊᖏᓐᓂᒃ, ᐱᓕᔅᑍᓂᒥᐅᓪᓗ ᒎᑎᓐᖑᐊᖏᓐᓂᒃ. ᐊᑕᓂᕐᒥᒃ ᕿᒤᓚᐅᕐᐳᑦ ᑐᒃᓯᐊᕐᕕᒋᔪᓐᓁᕐᓗᒍᓗ. 7ᐊᑕᓂᐅᓪᓕ ᓂᓐᖓᑎᐅᓚᐅᕐᐰᑦ ᐃᓴᕆᐊᓕᒥᐅᑦ, ᐱᓕᔅᑍᓂᒥᐅᓄᓪᓗ ᐊᒧᓁᑎᓄᓪᓗ ᓵᓚᐅᑎᓚᐅᕐᐰᑦ. 8ᐊᕐᕌᒍᓂᒃ 18ᓂᒃ ᐊᒃᓱᕈᕐᑎᑉᐰᑦ ᐊᑭᕋᕐᑐᕐᓗᒋᓪᓗ ᐃᓴᕆᐊᓕᒥᐅᑦ ᓄᓇᖃᕐᑐᓕᒫᑦ ᐊᒧᕅᑎᑦ ᓄᓇᖏᓐᓂ ᔪᐊᕐᑕᓂᐅᑉ ᑰᖓᓂᑦ ᓯᕿᓂᐅᑉ ᓂᐱᕕᐊᑕ ᓇᓛᓂ ᓄᓇᖃᕐᑐᑦ ᒋᓕᐊᑎᒥ. 9ᐊᒧᓁᑎᑦ ᐊᒡᓛᑦ ᐃᑳᓚᐅᕐᐳᑦ ᔪᐊᕐᑕᓂᐅᑉ ᑰᖓᓂᒃ ᐅᓇᑕᕆᐊᕐᓗᑎᒃ ᔫᑕᐅᑉ ᑭᖑᕚᖏᓐᓂᒃ, ᐱᓐᔭᒥᓂᐅᓪᓗ ᑭᖑᕚᖏᓐᓂᒃ, ᐃᕗᕅᑎᒥᐅᓪᓗ ᑭᖑᕚᖏᓐᓂᒃ. ᐃᓴᕆᐊᓕᒥᐅᑦ ᖁᕕᐊᓇᖏᑦᑐᒃᑰᕐᑎᑕᐅᓚᐅᕐᐳᑦ.
10ᐃᓴᕆᐊᓕᒥᐅᑦ ᐃᓗᖏᕐᓱᕐᓗᑎᒃ ᑐᒃᓯᐊᕐᓂᖃᓕᓚᐅᕐᐳᑦ ᐊᑕᓂᕐᒧᑦ ᐅᖃᕐᓗᑎᒃ, “ᐊᔪᕐᑐᓕᓚᐅᕐᐳᒍᑦ ᐃᓕᖕᓄᑦ, ᕿᒤᓚᐅᕋᑦᑕ ᐃᓕᖕᓂᒃ ᐊᑕᓃᖅ, ᑐᒃᓯᐊᕐᐸᓕᕐᓗᑕ ᐰᓕᒧᑦ.”
11ᐊᑕᓂᐅᑉ ᐃᓴᕆᐊᓕᒥᐅᑦ ᑭᐅᕔᑦ ᐃᒫᒃ: “ᓴᐳᑎᓚᐅᓐᖏᓚᑦᓰ ᐄᑦᔨᑉᑎᒥᐅᓂᑦ, ᐊᒧᕅᑎᒥᐅᓂᓪᓗ, ᐊᒧᓁᑎᒥᐅᓂᓪᓗ, ᐱᓕᔅᑍᓂᒥᐅᓂᓪᓗ? 12ᓮᑐᓂᒥᐅᑦ ᐊᒻᒪ, ᐊᒪᓕᑬᑎᒥᐅᑦ ᒪᐅᓁᑎᒥᐅᓪᓗ ᐊᒃᓱᕈᕐᑎᑦᓯᓕᕐᒪᑕ ᐃᓕᑦᓯᓐᓂᒃ; ᐃᓗᖏᕐᓱᕐᓗᓯ ᓂᓪᓕᐊᓚᐅᕐᐳᓯ ᐅᕙᓐᓄᑦ. ᓴᐳᑎᓚᐅᕐᐸᑦᓯᓗ ᑍᒃᑯᓇᓐᖔᑦ? 13ᓱᓕᓕ ᕿᒤᓚᐅᕆᕗᓯ ᐅᕙᓐᓂᒃ ᒎᑎᓐᖑᐊᓄᓪᓗ ᐊᓯᓐᓄᑦ ᑐᒃᓯᐊᕐᐸᓕᕐᓗᓯ; ᑍᒤᒻᒪᑦ ᓴᐳᑎᒃᑲᓐᓂᕈᒪᔪᓐᓃᕐᐸᑦᓯ. 14ᒎᑎᓐᖑᐊᓄᑦ ᓂᕈᐊᓚᐅᕐᑕᑦᓯᓐᓄᑦ ᑐᒃᓯᐊᕆᐊᕐᑐᓕᕆᑦᓯ, ᑖᒃᑯᓇᓐᖓᑦ ᓴᐳᑎᔭᐅᔪᓐᓇᕐᒪᖔᑦᓯ ᐊᒃᓱᕈᕈᑎᒋᔮᑦᓯᓐᓂᑦ.”
15ᐃᓴᕆᐊᓕᒥᐅᓪᓕ ᑭᖑᕚᖏᑦ ᐅᖃᕐᐳᑦ ᐊᑕᓂᕐᒧᑦ, “ᐊᔪᕐᑐᓕᓚᐅᕐᐳᒍᑦ ᐅᕙᑦᑎᓐᓄᑦ ᐱᓇᓱᐊᓕᕆᑦ ᓈᒻᒪᒋᔭᕐᓂᒃ; ᑭᓯᐊᓂ ᐱᐅᓕᑎᒍᑦ, ᐃᓕᖕᓄᑦ ᑐᒃᓯᐊᕐᐳᒍᑦ ᐅᓪᓗᒥ.” 16ᑕᕝᕙ ᓄᓇᖃᑎᒋᓐᖏᑕᒥ ᒎᑎᓐᖑᐊᖏᓐᓂᒃ ᕿᒤᓚᐅᕐᐳᑦ ᑐᒃᓯᐊᓕᕐᓗᑎᒡᓗ ᐊᑕᓂᕐᒧᑦ; ᐃᓱᒪᔮᕈᑎᖃᓕᕐᐳᕐᓗ ᐃᓴᕆᐊᓕᒥᐅᑦ ᐊᒃᓱᕈᕐᓂᖏᓐᓂᒃ.
17ᐊᒧᓁᑎᒥᐅᑦ ᐅᓇᑕᕐᓂᕐᒧᑦ ᐸᕐᓇᓕᓚᐅᕐᐳᑦ, ᑕᖕᒫᕐᓗᑎᒡᓗ ᒋᓕᐊᑎᒥ; ᐃᓴᕆᐊᓕᒥᐅᓪᓗ ᐃᓄᖏᑦ ᑲᑎᓚᐅᕆᕗᑦ, ᑕᖕᒫᕐᓗᑎᒡᓗ ᒥᔅᐸᒧᑦ. 18ᑕᕝᕙᓂᓗ ᐃᓄᐃᑦ, ᒋᓕᐊᑎᒥ ᓯᕗᓕᕐᑏᑦ ᐃᒻᒥᖕᓄᑦ ᐅᖃᓕᕐᐳᑦ, “ᑭᓇ ᓯᕗᓕᕐᓂᐊᕐᐸ ᐅᓇᑕᕆᐊᕐᓗᓂ ᐊᒧᓁᑎᓂᒃ? ᑖᓐᓇ ᓯᕗᓕᕐᑐᖅ ᐅᓇᑕᕐᓂᕐᒧᑦ ᐊᖓᔪᖅᑳᓐᖑᕐᑎᓐᓂᐊᕐᐸᕗᑦ ᒋᓕᐊᑎᒥ ᓄᓇᖃᕐᑐᓕᒫᓄᑦ.”
Currently Selected:
ᐃᓗᐊᕐᓮᔩᑦ ᐊᒡᓚᖏᑦ 10: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
