ᐃᓗᐊᕐᓮᔩᑦ ᐊᒡᓚᖏᑦ 20
20
ᐃᓴᕆᐊᓕᒥᐅᑦ ᐅᓇᑕᕆᐊᕐᓂᖏᑦ
1ᐃᓄᓕᒫᑦ ᐃᓴᕆᐊᓕᒥᐅᑦ ᐊᐅᓪᓚᕐᐳᑦ, ᓄᓇᒥᑦ ᑖᓐᒥᑦ ᐱᒋᐊᕐᓗᑎᒃ ᐱᐊᕐᓯᐸ ᑎᑭᓪᓗᒍ ᒋᓕᐊᑎᓪᓗ ᓄᓇᖓᓂᑦ, ᐃᓄᒋᐊᒃᑐᕐᔪᐊᓪᓗ ᑲᑎᓚᐅᕐᐳᑦ ᐊᑕᓂᐅᑉ ᓵᖓᓂ, ᒥᔅᐸᒥ. 2ᐃᓴᕆᐊᓕᐅᑉ ᑭᖑᕚᖏᑕ ᓯᕗᓕᕐᑎᓕᒫᖏᑦ ᐃᓚᐅᕗᑦ, ᒎᑎᐅᑉ ᐃᓄᖁᑎᖏᑦ ᑲᑎᒪᑎᓪᓗᒋᑦ, ᑕᕝᕙᓂᓗ 400,000ᐃᑦ ᐱᓱᒃᑏᑦ ᐅᓇᑕᕐᑐᒃᓮᑦ ᓴᕕᒡᔪᐊᖃᕐᑐᑦ ᑕᕝᕙᓃᓪᓗᑎᒃ. 3ᑍᒤᑎᓪᓗᒋᑦ ᐱᓐᔭᒥᓂᐅᑉ ᑭᖑᕚᖏᑦ ᑐᓴᕋᒥᒃ ᐃᓴᕆᐊᓕᒥᐅᑦ ᑲᑎᓐᓂᖏᓐᓂᒃ ᒥᔅᐸᒥ.
ᐃᓴᕆᐊᓕᒥᐅᑦ ᐊᐱᕆᓚᐅᕐᐳᑦ, “ᐅᖃᐅᑎᑎᒍᑦ, ᖃᓄᖅ ᑕᒪᓐᓇ ᐱᐅᖏᑦᑐᓕᓂᖅ ᐱᓚᐅᕐᐹ?” 4ᑍᓐᓇ ᓕᕔᑎ ᐊᕐᓇᐅᑉ ᑐᖁᑕᐅᓚᐅᕐᑑᑉ ᐅᐃᖓ ᑭᐅᓕᕐᐳᖅ, “ᒋᐱᐊᒨᓚᐅᕐᐳᒍᑦ ᐱᓐᔭᒥᓂᐅᑉ ᓄᓇᖁᑎᖓᓄᑦ ᓄᓕᐊᒃᑲᓐᓂᕋᓗ ᓯᓂᒃᑕᕆᐊᕐᓗᓄᒃ. 5ᒋᐱᐊᒥᐅᑦ ᐊᖑᑎᖏᑦ ᕾᓚᐅᕐᐳᑦ ᐅᕙᓐᓂᒃ ᐂᓯᕐᓗᑎᒃ, ᐃᒡᓗᓗ ᐊᕙᑕᖏᕐᓗᒍ. ᐅᕙᓐᓂᒃ ᑐᖁᑦᓯᔪᒪᓚᐅᕐᐳᑦ; ᓄᓕᐊᒃᑲᓐᓂᕋᓕ ᖁᓄᔪᕐᓂᐊᕐᑕᐅᓚᐅᕐᐳᖅ, ᑐᖁᑕᐅᓪᓗᓂᓗ. 6ᑎᒥᖓ ᐱᓚᐅᕐᐸᕋ ᐊᒡᒍᕐᓗᒍ, ᐂᑦᑐᕐᑑᑎᒋᓚᐅᕐᐸᕋᓗ ᐃᓴᕆᐊᓕᒥᐅᑦ ᑭᖑᕚᖏᓐᓄ 12ᓄᑦ; ᑖᒃᑯᐊ ᐃᓄᐃᑦ ᐱᐅᖏᑦᑐᒻᒪᕆᐊᓗᖕᒥᒃ ᐱᓇᓱᐊᕐᒪᑕ ᐊᑐᕆᐊᖃᖏᒻᒪᕆᒃᑐᒥᒃ ᐊᑯᓐᓇᑦᑎᓐᓂ. 7ᑕᑯᒋᑦ ᐃᓅᖃᑎᒌᖑᔪᓯ ᐃᓴᕆᐊᓕᒥᐅᖑᓪᓗᓯ ᐃᓘᓐᓇᓯ, ᐃᓱᒪᓕᐅᖃᑎᒌᓕᕆᑦᓯ ᑲᑎᒪᓗᓯ.”
8ᐃᓄᓕᒫᑦ ᓂᑯᕕᓚᐅᕐᐳᑦ ᐅᖃᕐᓗᑎᒡᓗ, “ᓇᓕᕐᐳᑦ ᑐᐱᕐᒥᓄᑦ ᐅᑎᕐᓂᐊᓐᖏᓚᖅ, ᐃᒡᓗᒥᓄᓪᓘᓐᓃᑦ ᐊᖏᕐᕋᕐᓂᐊᓐᖏᓚᖅ. 9ᐃᒫᒃ ᐱᓇᓱᐊᕐᓂᐊᕐᐳᒍᑦ ᒋᐱᐊᒥᐅᓄᑦ: ᓇᓚᐅᑦᑖᕈᑎᒃᑯᑦ ᓂᕈᐊᕐᓂᐅᕐᐳᒍᑦ ᐊᖑᑎᓂᒃ ᐅᓇᑕᕆᐊᖁᓗᒋᑦ ᒋᐱᐊᒥᒃ. 10ᐃᓚᖏᑦ 100ᐃᑦ ᑕᓪᓕᒪᐅᔪᕐᑐᖏᑦ ᐃᓴᕆᐊᓕᒥᐅᑦ ᑭᖑᕚᓕᒫᖏᓐᓂᑦ, 100ᐃᓪᓗ 1,000ᓂᑦ, 1,000ᓗ 10,000ᓂᑦ ᓂᕈᐊᕐᓂᐊᕐᐸᕗᑦ ᓂᕿᖃᕐᑎᑦᓯᓂᐊᕐᐳᑦ ᐅᓇᑕᕐᑐᒃᓴᓂᒃ, ᐊᓯᖏᓪᓗ ᓱᒋᐊᕆᐊᕐᑐᕐᓂᐊᕐᐳᑦ ᒋᐱᐊᒥᒃ ᐱᓐᔭᒥᓂᐅᑉ ᑭᖑᕚᖏᓐᓂᒃ; ᐱᐅᖏᑦᑐᒥᒃ ᐱᓂᐊᕐᓂᕆᓚᐅᕐᑕᖏᑦ ᐱᓪᓗᒋᑦ ᐃᓴᕆᐊᓕᐅᑦ ᐃᓗᐊᓂ.” 11ᑍᒤᒻᒪᑦ ᐃᓴᕆᐊᓕᒥᐅᓕᒫᑦ ᑲᑎᓚᐅᕐᐳᑦ ᐊᑕᐅᓯᕐᒥᒃ ᐱᑦᔪᑎᖃᕐᓗᑎᒃ ᐅᓇᑕᕆᐊᕈᒪᓪᓗᑎᒃ ᓄᓇᓕᖕᒥᒃ.
12ᐃᓴᕆᐊᓕᒥᐅᑦ ᑭᖑᕚᖏᑦ ᑎᓕᓯᓚᐅᕐᐳᑦ ᐊᖑᑎᓂᒃ, ᐱᓐᔭᒥᓂᐅᑉ ᑭᖑᕚᖏᑕ ᓄᓇᖁᑎᖓᓃᑦᑐᓕᒫᓄᑦ, ᐃᒫᒃ ᐅᖃᐅᑎᓪᓗᒋᑦ, “ᓱᓇᒦᒃ ᐱᐅᖏᑦᑐᒥᒃ ᐊᑯᓐᓇᑦᓯᓐᓂ ᐱᔪᖃᓚᐅᕐᐸ? 13ᑍᒃᑯᐊ ᐃᓄᐃᑦ ᒋᐱᐊᒥ ᕾᓚᐅᕐᓯᐅᒃ, ᐱᐅᖏᑦᑐᐊᓗᖕᒥᒃ ᐱᓂᐊᕐᓂᖃᕐᑐᕕᓃᑦ, ᑐᖁᓐᓂᐊᕋᑦᑎᒍ, ᐱᐅᖏᑦᑐᕐᓗ ᐲᕐᓂᐊᕋᑦᑎᒍ ᐃᓴᕆᐊᓕᒥᑦ.” ᐱᓐᔭᒥᓂᐅᓪᓕ ᑭᖑᕚᖏᑦ ᓈᓚᓚᐅᓐᖏᓚᑦ, ᖃᑕᓐᖑᑎᒥᖕᓂᒃ ᐃᓴᕆᐊᓕᒥᐅᑦ ᐃᓄᖏᓐᓂᒃ. 14ᐱᓐᔭᒥᓂᐅᑉ ᑭᖑᕚᖏᑦ ᐃᒡᓗᒐᓴᓕᒫᖏᓐᓂᑦ ᐱᔪᑦ ᑲᑎᓚᐅᕐᐳᑦ ᒋᐱᐊᒥ ᐅᓇᑕᕆᐊᕐᓗᑎᒃ ᐃᓴᕆᐊᓕᒥᐅᓂᒃ. 15ᐱᓐᔭᒥᓂᐅᑉ ᑭᖑᕚᖏᑦ ᕾᖁᔨᓚᐅᕐᐳᑦ 26,000ᓂᒃ ᐅᓇᑕᕐᑐᒃᓴᓂᒃ ᓴᕕᒡᔪᐊᖃᕐᑐᓂᒃ, ᐃᒡᓗᒐᓴᓕᒫᒥᖕᓂᑦ, ᐅᓪᓗᒥ ᑍᑦᓱᒪᓂ ᐊᓯᐊᒍᓪᓗ ᒋᐱᐊᒥᐅᓂᒃ, ᕾᖁᔨᓚᐅᕆᕗᑦ 700ᓂᒃ ᓂᕈᐊᕐᑕᒥᖕᓂᒃ. 16ᑖᒃᑯᐊ 700 ᓂᕈᐊᕐᑕᐅᔪᓕᒫᑦ ᓴᐅᒥᐅᓚᐅᕐᐳᑦ; ᐃᓪᓘᕆᐊᕈᓐᓇᕐᑐᑦ ᓄᔭᕐᒥᒃ ᐅᔭᕋᖕᒧᑦ ᓴᓂᖅᑯᖏᓪᓗᒍ. 17ᐱᓐᔭᒥᓂᐅᑉ ᑭᖑᕚᖏᑦ ᐃᓚᐅᑎᓐᓇᒋᑦ, ᐃᓴᕆᐊᓕᒥᐅᑦ ᕾᖁᔨᓚᐅᕐᐳᑦ 400,000ᓂᒃ ᐅᓇᑕᕐᑐᒃᓴᓂᒃ ᓴᕕᒡᔪᐊᖃᕐᑐᓂᒃ; ᐃᓕᓐᓂᐊᕐᓯᒪᔪᓂᒃ ᐅᓇᑕᕐᓂᕐᒥᒃ.
ᐅᓇᑕᕐᓃᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ
18ᐃᓴᕆᐊᓕᒥᐅᑦ ᑐᒃᓯᐊᕆᐊᕐᑐᓚᐅᕐᐳᑦ ᐱᑎᓕᒧᑦ, ᑍᑲᓂᓗ ᒎᑎ ᐊᐱᕐᓱᕐᐹᑦ, “ᓇᓪᓕᕗᑦ ᑭᖑᕚᖑᖃᑎᒌᓂᑦ ᓯᕗᓪᓕᕐᐸᐅᓗᑎᒃ ᐅᓇᑕᕆᐊᕐᑐᒃᓴᐅᕚᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ?”
ᐊᑕᓂᐅᑉ ᑭᐅᕔᑦ, “ᔫᑕᐅᑉ ᑭᖑᕚᖏᑦ.”
19ᐃᓴᕆᐊᓕᒥᐅᑦ ᐊᓱᐃᓛᒃ ᐊᐅᓪᓚᓚᐅᕐᐳᑦ ᐅᓪᓛᒃᑯᑦ ᖃᐅᒻᒪᒃᑎᓪᓗᒍ, ᑕᖕᒫᕐᓗᑎᒡᓗ ᐃᒡᓗᒐᓮᑦ ᒋᐱᐊᑉ ᖃᓂᒋᔮᓐᓄᑦ. 20ᐃᓄᐃᑦ ᐃᓴᕆᐊᓕᒥᐅᑦ ᐅᓇᑕᕆᐊᓚᐅᕐᐳᑦ ᐱᓐᔭᒥᓂᐅᑉ ᑭᖑᕚᖏᑕ ᐅᓇᑕᕐᑐᒃᓴᖂᑎᖏᓐᓂᒃ, ᐅᓇᑕᕐᑐᒃᓮᓪᓗ ᒋᐱᐊᒧᑦ ᓵᓐᖓᓪᓗᑎᒃ ᓴᓂᓕᕇᓚᐅᕐᐳᑦ. 21ᐱᓐᔭᒥᓂᐅᑉ ᑭᖑᕚᖏᑕ ᐅᓇᑕᕐᑐᒃᓴᖁᑎᖏᑦ ᐃᒡᓗᒐᓴᖕᓂᑦ ᒋᐱᐊᒥᑦ ᐊᓂᓚᐅᕐᐳᑦ, ᐅᓪᓗᕐᓗ ᓈᓚᐅᕐᑎᓐᓇᒍ ᑐᖁᑦᓯᓚᐅᕐᐳᑦ 22,000ᓂᒃ ᐃᓴᕆᐊᓕᒥᐅᓂᒃ. 22ᐃᓄᒋᐊᒃᑐᕐᔪᐊᓪᓕ ᐊᖑᑎᑦ ᐃᓴᕆᐊᓕᒥᐅᑦ, ᓯᕘᕋᓇᑎᒃ ᓱᓕ ᐅᓇᑕᕐᓂᕐᒧᑦ ᓴᓂᓕᕇᓕᓚᐅᕆᕗᑦ ᑕᒫᓂᑦᓮᓐᓇᖅ ᓴᓂᓕᕇᒡᕕᒋᓚᐅᕐᑕᒥᖕᓂ ᐅᓪᓗᐃᑦ ᓯᕗᓪᓕᕐᐹᖓᓂ. 23ᐃᓄᒋᐊᒃᑐᕐᔪᐊᓪᓗ ᐃᓴᕆᐊᓕᒥᐅᑦ ᐂᓚᐅᕐᐳᑦ ᐊᑕᓂᐅᑉ ᓵᖓᓄᑦ ᕿᐊᓪᓗᑎᒡᓗ ᐅᓐᓄᒧᑦ ᑎᑭᓪᓗᒍ; ᐊᑕᓂᕐᒧᓪᓗ ᐊᐱᕆᓪᓗᑎᒃ, “ᐅᓇᑕᕆᐊᒃᑲᓐᓂᕆᐊᖃᕐᐱᑖ ᖃᑕᓐᖑᑎᑦᑎᓐᓂᒃ ᐱᓐᔭᒥᓂᐅᑉ ᑭᖑᕚᖏᓐᓂᒃ?”
ᐊᑕᓂᐅᑉ ᑭᐅᕔᑦ, “ᐅᓇᑕᕆᐊᓕᕐᓯᐅᒃ.” 24ᐃᓴᕆᐊᓕᒥᐅᑦ ᐅᓇᑕᕐᑐᒃᓴᖁᑎᖏᑦ ᐅᓇᑕᕆᐊᓕᓚᐅᕆᕗᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ ᐅᓪᓘᑉ ᐂᑉᐸᖓᓂᒃ. 25ᐱᓐᔭᒥᓂᐅᑉ ᑭᖑᕚᖏᑦ ᑖᒃᑯᓂᖓ ᐅᓇᑕᕆᐊᓕᓚᐅᕆᕗᑦ ᐊᓂᓪᓗᑎᒃ ᒋᐱᐊᒥᑦ, ᑕᒪᑐᒪᓂ ᑐᖁᑦᓯᓚᐅᕐᐳᑦ 18,000ᓂᒃ ᐃᓴᕆᐊᓕᒥᐅᑦ ᐅᓇᑕᕐᑐᒃᓴᖁᑎᖏᓐᓂᒃ; ᑖᒃᑯᐊ ᐃᓄᓕᒫᑦ ᓴᕕᒡᔪᐊᓕᔭᕐᑐᑦ. 26ᑕᕝᕙ ᐃᓄᒋᐊᒃᑐᕐᔪᐊᑦ ᐃᓴᕆᐊᓕᒥᐅᓕᒫᑦ ᐅᓇᑕᕐᑐᒃᓮᑦ ᐂᕗᑦ ᐱᑎᓕᒧᑦ ᕿᐊᓪᓗᑎᒡᓗ; ᑍᑲᓂ ᐃᒃᓯᕙᕗᑦ ᐊᑕᓂᐅᑉ ᓵᖓᓂ ᓂᕆᑦᑍᓕᓪᓗᑎᒃ ᐅᓐᓄᒃ ᑎᑭᓪᓗᒍ. ᑐᓂᕐᕈᓯᓚᐅᕐᐳᑦ ᐃᑯᐊᓚᑎᑕᒃᓴᓂᒃ ᑐᓂᕐᕈᑎᓂᒡᓗ ᐃᑯᐊᓚᒋᐊᓕᖕᓂᒃ ᐃᓚᒌᑦᓯᐊᕐᓂᕐᒧᓪᓗ ᑐᓂᕐᕈᑎᓂᒃ ᐊᑕᓂᐅᑉ ᓵᖓᓂ. 27ᐃᓄᒋᐊᒃᑐᕐᔪᐊᑦ ᐊᐱᕆᓚᐅᕐᐳᑦ ᐊᑕᓂᕐᒥᒃ, (ᑍᑦᓱᒪᓂ ᐃᒃᓯᕐᕕᒃ ᐊᖏᖃᑎᒌᒍᑎᑕᓕᒃ ᒎᑎᐅᑉ ᐱᖓ ᑕᕝᕙᓃᓚᐅᕐᒪᑦ ᐅᓪᓗᓂ ᑍᒃᑯᓇᓂ. 28ᐱᓂᕼᐋᓯᓗ, ᐃᓕᓯᕆᐅᑉ ᐃᕐᓂᖓ ᐂᕉᓂᐅᑉ ᐃᕐᖑᑕᖓ, ᑲᒪᔨᐅᓚᐅᕐᐳᖅ ᐅᓪᓗᓂ ᑍᒃᑯᓇᓂ), ᐅᖃᕐᓗᓂ, “ᐅᓇᑕᕆᐊᒃᑲᓐᓂᕆᐊᖃᕐᐱᑖ ᖃᑕᓐᖑᑎᑦᑎᓐᓂᒃ ᐱᓐᔭᒥᓂᐅᑉ ᑭᖑᕚᖏᓐᓂᒃ, ᐅᕝᕙᓘᓐᓃᑦ ᓄᖅᑲᕆᐊᖃᓕᕐᐱᑖ?”
ᐊᑕᓂᐅᑉ ᑭᐅᕔᑦ, “ᐅᓇᑕᕆᐊᓕᕆᑦᓯ, ᖃᐅᒃᐸᑦ ᓵᓚᖃᕐᑎᓐᓂᐊᕐᐸᑦᓯ.”
29ᑍᒤᒻᒪᑦ ᐃᓴᕆᐊᓕᒥᐅᑦ ᐅᓇᑕᕐᑐᒃᓴᓂᒃ ᐃᔨᕐᓯᓚᐅᕐᐳᑦ ᒋᐱᐊᒥᐅᑦ ᐊᕙᑖᓄᑦ. 30ᐃᓄᖏᐊᒃᑐᕐᔪᐊᓪᓗ ᐃᓴᕆᐊᓕᒥᐅᑦ ᐅᓇᑕᕆᐊᓚᐅᕐᐳᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ ᐅᓪᓗᐃᑦ ᐱᖓᔪᒋᓕᕐᑕᖓᓂᒃ ᐅᓇᑕᕐᑐᒃᓴᖁᑎᑎᒡᓗ ᐋᖅᑭᒃᓱᕐᓗᒋᑦ ᓵᓐᖓᓪᓗᑎᒃ ᒋᐱᐊᒧᑦ, ᑍᒫᑦᓮᓐᓇᖅ ᐱᖃᑦᑕᕋᒥᒃ. 31ᐱᓐᔭᒥᓂᐅᑉ ᑭᖑᕚᖏᑦ ᐊᓂᓚᐅᕐᐳᑦ ᐅᓇᑕᕆᐊᕐᓗᑎᒃ ᐃᓄᒋᐊᒃᑐᕐᔪᐊᓂᒃ, ᕿᒤᑎᑕᐅᓪᓗᑎᒡᓗ ᐃᒡᓗᒐᓴᖕᓂᒃ. ᑍᒤᓕᐅᓚᐅᕐᒥᒐᒥᒃ ᑐᖁᕅᓕᓚᐅᕐᐳᑦ ᐃᓴᕆᐊᓕᒥᐅᑦ ᐃᓚᖏᓐᓂᒃ, ᓄᓇᓖᑦ ᐊᓯᖏᓐᓅᖓᔪᑦ ᐊᖅᑯᑎᖏᓐᓂ, ᐊᖅᑯᒻᒥ ᐱᑎᓕᒨᖓᔪᒥ ᐊᖅᑯᑎᒥᓗ ᒋᐱᐊᒨᖓᔪᒥ. ᑐᖁᑦᓯᓚᐅᕐᐳᑦ ᐃᒻᒪᖄ ᐃᓴᕆᐊᓕᓂᒃ 30ᓂᒃ. 32ᐱᓐᔭᒥᓂᐅᑉ ᑭᖑᕚᖏᑦ ᐅᖃᓚᐅᕐᐳᑦ, “ᕿᒫᑎᓐᓂᐊᕐᐸᕗᑦ ᑍᒫᒃ ᐱᕙᒃᑲᑦᑎᒍᑦ.”
ᐃᓴᕆᐊᓕᒥᐅᓪᓕ ᐅᖃᕐᐳᑦ ᕿᒫᓚᐅᕐᑕ, ᐅᖓᓯᒃᓯᑎᓐᓂᐊᕋᑦᑎᒍ ᐃᒡᓗᒐᓴᖕᓂᑦ ᐊᖅᑯᑎᓄᑦ. 33ᐃᓴᕆᐊᓕᒥᐅᑦ ᐅᓇᑕᕐᑐᒃᓴᓪᓚᕆᖁᑎᖏᑦ ᐅᑎᓚᐅᕐᐳᑦ ᐅᑕᖅᑭᓕᕐᓗᑎᒡᓗ ᐰᓕ-ᑕᒪᕆᒥ, ᐃᓄᐃᑦ ᐃᓴᕆᐊᓕᒥᐅᑦ ᑍᒃᑯᐊ ᒋᐱᐊᑉ ᓴᓂᐊᓃᑦᑐᑦ ᐃᔨᕐᓯᒪᕕᖕᒥᓂᑦ ᒪᑭᑉᐳᑦ ᒋᐸᒥᑦ. 34ᐅᓇᑕᕆᐊᓚᐅᕐᐳᑦ ᒋᐱᐊᒧᑦ 10,000ᐃᑦ ᐊᖑᑏᑦ ᓂᕈᐊᕐᑕᐅᓯᒪᔪᑦ ᐃᓴᕆᐊᓕᓂᑦ, ᐅᓇᑕᕐᑐᓪᓗ ᐊᒃᓱᕈᒻᒪᕆᓚᐅᕐᐳᑦ; ᐱᓐᔭᒥᓂᐅᑉ ᑭᖑᕚᖏᑦ ᑲᐅᔨᒪᓚᖏᒻᒪᑕ ᓵᓚᐅᓂᐊᕐᓂᕐᒥᓂᒃ. 35ᐊᑕᓂᐅᑉ ᐃᓴᕆᐊᓕᒥᐅᑉ ᓵᓚᖃᕐᑎᑉᐰᑦ ᐱᓐᔭᒥᓂᐅᑉ ᑭᖑᕚᖏᑕ ᐅᓇᑕᕐᑐᒃᓴᖁᑎᖏᓐᓂᒃ; ᐃᓴᕆᐊᓕᒥᐅᑦ ᑐᖁᑦᓯᓚᐅᕐᐳᑦ 25,100ᓂᒃ ᐱᓐᔭᒥᓂᐅᑉ ᑭᖑᕚᖏᓐᓂᒃ ᑍᑦᓱᒪᓂ ᐅᓪᓗᒥ; ᑍᒃᑯᐊᓕᒫᑦ ᓴᕕᒡᔪᐊᓕᔭᕐᑎᐅᕗᑦ. 36ᐱᓐᔭᒥᓂᐅᑉ ᑭᖑᕚᖏᑦ ᖃᐅᔨᓚᐅᕐᐳᑦ ᓵᓚᐅᓂᕐᒥᖕᓂᒃ.
ᖃᓄᖅ ᐃᓴᕆᐊᓕᒥᐅᑉ ᓵᓚᖃᕐᓂᕐᒪᖔᑕ
ᐃᓴᕆᐊᓕᒥᐅᑦ ᐅᓇᑕᕐᑎᒻᒪᕆᖏᑦ ᕿᒫᓚᐅᕐᐳᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ, ᑕᑎᖃᓚᐅᕋᒥᒃ ᐊᖑᑎᓂᒃ ᐃᔨᕐᓯᒪᔪᓂᒃ ᒋᐱᐊᑉ ᓴᓂᐊᓂ. 37ᑖᒃᑯᐊ ᐊᖑᑏᑦ ᐃᔨᕐᓯᒪᕕᖕᒥᖕᓂᑦ ᑐᐊᕕᕐᓗᑎᒃ ᒋᐱᐊᒧᐊᕐᐳᑦ, ᐊᖑᑏᑦ ᐃᔨᕐᓯᒪᔪᕕᓃᑦ ᐃᒡᓗᒐᓴᖕᓃᑦᑐᑦ ᑐᖁᑉᐰᑦ ᓴᕕᒡᔪᐊᓄᑦ. 38ᓇᓗᓁᒃᑯᑕᖃᕐᑎᑦᓯᓚᐅᕐᐳᑦ ᐃᓴᕆᐊᓕᐅᑉ ᐅᓇᑕᕐᑐᒃᓴᖏᑦ ᐅᓇᑕᕐᑐᒃᓮᓪᓗ ᐃᔨᕐᓯᒪᔪᑦ ᐃᓯᕐᓗᐊᓗᖕᒥᒃ ᑕᑯᒍᑎᒃ ᐃᒡᓗᒐᓴᒡᔪᐊᓂᑦ ᐱᔪᒥᒃ, 39ᐃᓴᕆᐊᓕᒥᐅᑦ ᐅᓇᑕᕐᕕᖕᒦᑦᑐᑦ ᐅᑎᕆᐊᖃᓚᐅᕐᐳᑦ, ᐱᓐᔭᒥᓂᐅᓪᓕ ᑭᖑᕚᖏᑦ ᑐᖁᕅᓕᕐᑎᓪᓗᒋᑦ ᐃᓴᕆᐊᓕᓂᒃ 30ᓂᒃ; ᐃᒻᒥᖕᓄᓪᓗ ᐅᖃᖃᑎᒌᓚᐅᕐᐳᑦ, “ᐃᓛᒃ, ᓵᓚᒋᓕᕐᐸᕗᑦ ᑍᒫᒃ ᓵᓚᒋᓚᐅᕋᑦᑎᒍ.” 40ᑕᕝᕙᓂᓗ ᓇᓗᓁᒃᑯᑕᖅ ᓴᖅᑭᑉᐳᖅ, ᐃᓯᕐᓗᒃ ᑕᑯᒃᓴᐅᓕᕐᐳᖅ ᐃᒡᓗᒐᓴᒡᔪᐊᓂᑦ, ᐱᓐᔭᒥᓂᐅᑉ ᑭᖑᕚᖏᑦ ᐅᑎᒧᑦ ᑕᑯᓴᕋᒥᒃ; ᑕᑯᓕᕐᐳᑦ ᐃᒡᓗᒐᓴᖕᓂᒃ ᐃᑯᐊᓚᔪᓂᒃ ᕿᓚᖕᒧᑦ ᐳᔫᕐᑐᓂᒃ. 41ᐃᓴᕆᐊᓕᓪᓗ ᐅᑎᒧ ᓵᓚᐅᕐᐳᑦ, ᐱᓐᔭᒥᓂᐅᑉ ᑭᖑᕚᖏᑦ ᐅᐃᒻᒪᒃᑎᑕᐅᓪᓗᑎᒃ, ᖃᐅᔨᒐᒥᒃ ᓵᓚᐅᓂᐊᕐᓂᕐᒥᓂᒃ. 42ᕿᒪᒃᓯᓚᐅᓐᐳᓪᓗ ᐃᓴᕆᐊᓕᓂᒃ ᐅᓚᒃᓯᓪᓗᑎᒃ ᐃᓄᖃᖏᑦᑐᒧᑦ, ᐅᓇᑕᕐᑐᒃᓴᓂᓪᓕ ᐊᖑᔭᐅᓪᓗᑎᒃ ᐃᒡᓗᒐᓴᒡᔪᐊᓂᑦ ᐱᔪᓂᑦ ᓄᖑᑕᐅᕗᑦ. 43ᐱᓐᔭᒥᓂᐅᑉ ᑭᖑᕚᖏᑦ ᐃᓴᕆᐊᓕᒥᐅᑦ ᒪᓕᓚᐅᕐᐰᑦ, ᓄᖅᑲᓚᐅᕋᑎᒃ ᓅᕼᐊᒥᑦ ᒋᐱᐊᑉ ᐊᑭᐊᓄᑦ ᑎᑭᓪᓗᒍ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒧᑦ. 4418,000ᐃᑦ ᐱᓐᔭᒥᓂᐅᑉ ᑭᖑᕚᖏᑦ ᐱᓯᑎᐅᓂᕐᐹᖏᑦ ᐅᓇᑕᕐᑐᒃᓮᑦ ᑐᖁᑕᐅᓚᐅᕐᐳᑦ. 45ᐊᓯᖏᓪᓗ ᕿᒫᕗᑦ ᓄᓇᑐᐃᓐᓇᒧᑦ ᕆᒪᓐ ᖃᖅᑲᖏᓐᓄᑦ. 5,000ᐃᑦ ᑐᖁᑕᐅᓚᐅᕐᐳᑦ ᐊᖅᑯᑎᒥ. ᐃᓴᕆᐊᓕᒥᐅᑦ ᑲᔪᓯᓚᐅᕐᐳᑦ ᒪᓕᒡᓗᑎᒃ ᐃᓚᖏᓐᓂᒃ ᒋᑑᒻᒧᑦ, ᑕᒫᓂ 2,000ᐃᑦ ᑐᖁᑕᐅᓚᐅᕆᕗᑦ. 46ᑲᑎᓕᒫᕐᓗᑎᒃ 25,000ᐃᑦ ᐱᓐᔭᒥᓂᐅᑉ ᑭᖑᕚᖏᑦ ᑐᖁᑕᐅᓚᐅᕐᐳᑦ ᐅᓪᓗᒥᒃ ᑍᑦᓱᒪᓂ ᓴᕕᒡᔪᐊᖃᕐᑐᓕᒫᑦ ᓯᕘᕋᖏᑦᑑᓪᓗᑎᒃ ᐅᓇᑕᕐᑐᒃᓴᐅᓚᐅᕐᐳᑦ.
47ᑭᓯᐊᓂ 600ᐃᑦ ᐊᖑᑏᑦ ᕿᒪᒃᓯᓚᐅᕐᐳᑦ ᐃᓄᖃᖏᑦᑐᒧᑦ ᕆᒪᓐ ᖃᖅᑲᖏᓐᓄᑦ, ᕾᕐᑐᓂ ᐃᓂᖃᓚᐅᕐᐳᑦ ᕆᒪᒥ ᑕᖅᑭᓂᒃ ᓯᑕᒪᓂᒃ. 48ᐃᓴᕆᐊᓕᒥᐅᑦ ᐅᑎᓚᐅᕐᐳᑦ ᐱᓐᔭᒥᓂᐅᑉ ᑭᖑᕚᖏᑦ ᐅᑎᓕᕐᓗᑎᒃ ᐊᒥᐊᒃᑯᑦ ᑕᑯᔭᑎᒃ ᑐᖁᓚᐅᕐᐰᑦ ᓴᕕᒡᔪᐊᒧᑦ ᐃᓄᐃᑦ ᐆᒪᔪᖁᑎᖏᑦ ᐊᒡᓛᑦ, ᓄᓇᓕᓕᒫᓪᓗ ᖃᓂᒋᔮᓃᑦᑐᑦ ᐃᑯᐊᓪᓚᒃᓗᒋᑦ.
Currently Selected:
ᐃᓗᐊᕐᓮᔩᑦ ᐊᒡᓚᖏᑦ 20: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
