ᐃᓗᐊᕐᓮᔩᑦ ᐊᒡᓚᖏᑦ 21
21
ᐱᓐᔭᒥᓂᐅᑉ ᑭᖑᕚᖏᑕ ᓄᓕᐊᕐᑖᖏᑦ
1ᐃᓴᕆᐊᓕᒥᐅᑦ ᑲᑎᒐᒥᒃ ᒥᔅᐸᒥ, ᐊᖏᕈᑎᖃᒻᒪᕆᓚᐅᕐᐳᑦ ᐊᑕᓂᕐᒧᑦ ᐃᒫᒃ, “ᓇᓕᕐᐳᓪᓘᓐᓃᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ ᓄᓕᐊᓂᒃᑎᑦᓯᓂᐊᕈᓐᓃᕐᐳᒍᑦ ᐸᓂᑎᓂᒃ.” 2ᑍᒤᒻᒪᑦ ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔪᐊᑦ ᐱᑎᓕᒧᐊᓚᐅᕐᐳᑦ ᑍᑲᓂᓗ ᐃᒃᓯᕙᓪᓗᑎᒃ ᒎᑎᐅᑉ ᓵᖓᓂ ᐅᓐᓄᒧᑦ ᑎᑭᓪᓗᒍ. ᓂᐱᖅᑯᕐᑐᒻᒪᕆᒃᓗᑎᒃ ᕿᐊᓚᐅᕐᐳᑦ: 3ᐃᒫᒃ ᐅᖃᕐᓗᑎᒃ, “ᐊᑕᓃᖅ ᐃᓴᕆᐊᓕᐅᑉ ᒎᑎᖓ, ᓱᖕᒪᑦ ᑍᒤᑉᐹ? ᐃᓴᕆᐊᓕᒥ? ᓱᖕᒪᑦ ᐃᓴᕆᐊᓕᐅᑉ ᑭᖑᕚᖏᑦ ᐊᑕᐅᓰᓂᒃ ᐃᓚᑰᓂᐊᓕᕐᐸᑦ?” 4ᖃᐅᑎᓪᓗᒍ ᐅᓪᓛᒻᒪᕆᒃᑯᑦ ᐃᓄᒋᐊᒃᑐᕐᔪᐊᑦ ᒪᑭᑉᐳᑦ, ᑐᓂᕐᕈᓯᕐᕕᓕᐅᕐᓗᑎᒃ, ᑐᓂᕐᕈᓯᕐᓗᑎᒡᓗ ᐃᑯᐊᓚᑎᑦᓯᓂᒃᑯᑦ ᐃᓚᒌᑦᓯᐊᕐᓂᕐᒧᓪᓗ ᑐᓂᕐᕈᑎᓂᒃ. 5ᐃᓄᒋᐊᒃᑐᕐᔪᐊᓪᓗ ᐊᐱᕆᕗᑦ, “ᓇᓪᓕᖐᑦ ᐃᓚᒌᑦ ᐃᓴᕆᐊᓕᒥᐅᑦ ᑭᖑᕚᖏᓐᓂ ᑲᑎᖃᑕᐅᔭᕐᑐᓛᓐᖏᓛᑦ ᐊᑕᓂᐅᑉ ᓵᖓᓂ ᒥᔅᐸᒥ?” ᐊᖏᕈᑎᖃᒻᒪᕆᓚᐅᕋᒥᒃ ᒥᔅᐸᒧᑦ, ᑲᑎᒋᐊᕐᑐᖏᑦᑐᑦ ᐱᓪᓗᒋᑦ, ᑐᖁᑕᒃᓴᐅᓂᖏᓐᓂᒃ. ᐅᖃᕐᓗᑎᒃ, “ᑲᑎᖃᑕᐅᖏᑦᑐᑦ ᑐᖁᑕᒃᓴᐅᕗᑦ.” 6ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔪᐊᑦ ᐅᒡᒍᐊᓕᓚᐅᕐᐳᑦ ᖃᑕᓐᖑᑎᑎᒃ ᐱᓐᔭᒥᓂᐅᑉ ᑭᖑᕚᖏᑦ ᐱᓪᓗᒋᑦ ᐅᖃᕐᓗᑎᒡᓗ, “ᐅᓪᓗᒥ ᐃᓴᕆᐊᓕᐅᑉ ᑭᖑᕚᖏᑕ ᐃᓚᖓᓐᓂᒃ ᐊᑕᐅᓰᓂᒃ ᐊᓯᐅᔨᕗᒍᑦ, 7ᖃᓄᕐᓕ ᐱᓂᐊᓕᕐᐱᑕ ᐊᖑᑎᑦ ᓄᓕᐊᕐᑖᖁᓪᓗᒋᑦ ᐱᓐᔭᒥᓂᐅᑉ ᑭᖑᕚᖏᓐᓂ ᐊᒥᐊᑰᔪᑦ? ᐊᖏᒻᒪᕆᓚᐅᕋᑦᑕ ᐊᑕᓂᕐᒧᑦ ᐸᓂᑦᑎᓐᓂᒃ ᑐᓂᓯᔪᒪᓇᑕ ᑖᒃᑯᓄᖓ.”
8ᐊᐱᕐᓱᕋᒥᒡᓗ ᐅᖃᕐᓗᑎᒃ, “ᑭᖑᕚᕇᑦ ᓇᓪᓕᖏᑦ ᐃᓴᕆᐊᓕᒥᐅᑦ ᑲᑎᒋᐊᕐᑐᓚᐅᓐᖏᓚᑦ ᒥᔅᐸᒧᑦ?” ᖃᐅᔨᕗᓪᓗ ᔭᐲᓯ ᒋᓕᐊᑎᒥᐅᓂᒃ ᐃᓚᐅᔪᖃᖏᓐᓂᖓᓂᒃ, 9ᐃᓄᒋᐊᒃᑐᕐᔪᐊᓪᓗ ᖃᐅᔨᓴᕐᑎᑕᐅᖕᒪᑕ, ᔭᐲᓯ ᒋᓕᐊᑎᒥᐅᑦ ᑕᒫᓃᑦᑐᖃᓐᖏᓚᑦ. 10ᐃᓄᒋᐊᒃᑐᕐᔪᐊᑦ ᑎᓕᓯᓚᐅᕐᐳᑦ 12,000ᓂᒃ ᐊᖑᑎᓂᒃ, ᓯᕘᕋᖏᓐᓂᕐᐹᓂᒃ ᐃᒫᒃ ᐱᖁᓪᓗᒋᑦ, “ᔭᐲᓯ-ᒋᓖᑎᒥᐅᑦ ᑐᖁᕋᕆᐊᕐᑐᓕᕐᓯᐅᒃ ᐊᕐᓁᓪᓗ ᕿᑐᕐᖓᖏᓪᓗ ᒥᑭᔪᑦ ᐱᖃᓯᐅᑎᓗᒋᑦ. 11ᐃᒫᒃ ᐱᓂᐊᕐᐳᓯ, ᐊᖑᑎᓕᒫᑦ ᐊᕐᓇᓕᒫᓪᓗ ᐊᖑᑎᓂᒃ ᐃᓐᓇᖓᖃᑎᖃᕐᓯᒪᔪᑦ ᓄᖑᓪᓗᒋᑦ ᑐᖁᕋᕐᓂᐊᕐᐸᓯ.” 12ᓇᓂᓯᓚᐅᕐᐳᓪᓗ ᐅᐃᒐᓱᖕᓂᒃ 400ᓂᒃ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᓂᒃ ᔭᐲᓯ-ᒋᓖᑎᒥᐅᑦ ᐃᓄᖏᓐᓂᑦ; ᑖᒃᑯᐊᓗ ᐋᑉᐰᑦ ᑕᖕᒫᕐᓯᒪᕕᖕᒥᓄᑦ ᓮᓗᐊᒧᑦ, ᑬᓇᓂᐅᑉ ᓄᓇᖓᓃᑦᑐᒧᑦ.
13ᑕᕝᕙ ᐃᓄᒋᐊᒃᑐᕐᔪᐊᑦ ᑎᓕᓯᕗᑦ ᑐᓴᕐᑎᑦᓯᖁᔨᓪᓗᑎᒃ ᐱᓐᔭᒥᓂᐅᑉ ᑭᖑᕚᖏᓐᓂᒃ ᕆᒪᓐᒥ ᕾᕐᑐᒦᑦᑐᓂᒃ, ᐅᓇᑕᕈᒪᔪᓐᓃᕐᓂᕐᒥᒃ ᐅᖃᐅᑎᓪᓗᒋᑦ. 14ᐱᓐᔭᒥᓂᐅᑉ ᑭᖑᕚᖏᑦ ᑍᑦᓱᒪᓂ ᐅᑎᓚᐅᕐᐳᑦ; ᑐᓂᓯᕕᐅᓪᓗᑎᒡᓗ ᐊᕐᓇᓂᒃ ᔭᐲᓯ-ᒋᓖᑎᒥᑦ ᐱᔭᐅᔪᕕᓂᕐᓂᒃ ᑐᖁᓚᐅᓐᖏᑕᒥᖕᓂᑦ; ᑖᒃᑯᐊ ᑭᓯᐊᓂ ᐊᒥᒐᓚᐅᕐᐳᑦ.
15ᐃᓄᐃᑦ ᐅᒡᒍᐊᕈᑎᖃᓕᓚᐅᕐᐳᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ ᐊᑕᓂᐅᑉ ᐃᓚᑯᓐᖑᕐᑎᓚᐅᕐᒪᒋᑦ ᐃᓴᕆᐊᓕᒥᐅᑦ ᑭᖑᕚᖑᖃᑎᒌᖕᓂᖏᑦ. 16ᐃᓄᖕᓄᑦ ᐊᖓᔪᖅᑳᖑᔪᑦ ᐅᖃᕐᐳᑦ, “ᖃᓄᕐᓕ ᐱᓂᐊᓕᕐᐱᑕ ᐊᒥᐊᒃᑯᑦ ᓄᓕᐊᒃᓴᖏᓐᓂᒃ, ᐱᓐᔭᒥᓂᐅᑉ ᑭᖑᕚᖏᓐᓂ ᐊᕐᓁᑦ ᓄᖑᑕᐅᓚᐅᕐᒪᑕ?” 17ᐅᖃᕐᓗᑎᒡᓗ, “ᐱᓐᔭᒥᓂᐅᑉ ᑭᖑᕚᖏᑕ ᐊᒥᐊᒃᑯᖏᑦ ᓄᓇᒥᒃ ᑭᖑᕐᖑᑦᔨᔭᕆᐊᖃᕐᐳᑦ, ᑭᖑᕚᖑᖃᑎᒌᑦ ᐃᓴᕆᐊᓕᒥᐅᓂᑦ ᐱᑕᖃᕈᓐᓃᕆᐊᖃᖏᒻᒪᑕ, 18ᑭᓯᐊᓂ ᓄᓕᐊᕐᑖᕐᑎᑦᓱᓐᓇᖏᓐᓇᑦᑎᒍ ᐸᓂᑦᑎᓐᓂᒃ.” ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔪᐊᑦ ᐊᖏᖃᑎᒌᒍᑎᓕᐅᓚᐅᕐᒪᑕ, “ᓇᕐᕈᓇᕐᓯᑎᑕᐅᓕ ᓇᓪᓕᐊᑦ ᐸᓂᒥᓂᑦ ᓄᓕᐊᕐᑖᕐᑎᑦᓯᔪᖅ ᐱᓐᔭᒥᓂᐅᑉ ᑭᖑᕚᖏᓐᓂᒃ.”
19ᐅᖃᓚᐅᕐᐳᑦ, “ᑕᑯᒋᑦ, ᐊᕐᕌᒍᑕᒫᑦ ᓇᓪᓕᐅᓐᓂᕐᓯᐅᕐᓂᖃᕐᐳᖅ ᐊᑕᓂᕐᒧᑦ ᓮᓗᐊᒥ, ᓮᓗᐊ ᐱᑎᓕᐅᑉ ᐅᓪᓗᓪᓗᐊᑉ ᑕᕐᕋᓕᓂᖓᓃᓚᐅᕐᐳᖅ, ᓕᐳᓇᐅᑉ ᓯᕿᓂᖓᓃᑦᑐᖅ, ᐊᖅᑯᑎᐅᓪᓗ ᐱᑎᓕᐅᓪᓗ ᓯᑭᒻᒥᐅᓪᓗ ᐊᑯᓐᓂᖓᓃᑦᑐᖅ, ᓕᐳᓇᐅᑉ ᑭᑖᓂ.” 20ᐱᖁᔨᓚᐅᕐᐳᓪᓗ ᐱᓐᔭᒥᓂᐅᑉ ᑭᖑᕚᖏᓐᓂᒃ, “ᐂᓕᕆᑦᓯ ᐃᔨᕐᓗᓯᓗ ᐱᕈᕐᓰᕕᖏᓐᓂ ᕔᓂᓕᐅᕐᕕᖕᓂ. 21ᖃᐅᔨᓴᕐᓗᓯᓗ ᐊᕐᓁᑦ ᓮᓗᐊᒥᑦ ᐊᓂᒃᐸᑕ ᑖᓂᓯᕐᓗᑎᒃ ᓇᓪᓕᐅᓐᓂᕐᓯᐅᕐᕕᖕᒥ, ᑕᕝᕙᓐᖓᑦ ᐊᓂᓗᓯ ᐱᕈᕐᓰᕕᖕᓂᑦ ᕔᓂᓕᐅᕐᕕᖕᓂᑦ, ᐃᓘᓐᓇᓯ ᑎᒍᓯᓗᓯ ᐊᕐᓇᓂᒃ ᓄᓕᐊᒃᓴᑦᓯᓐᓂᒃ ᐅᑎᖃᑎᒋᓗᒋᓪᓗ ᐱᓐᔭᒥᓂᐅᑉ ᑭᖑᕚᖏᑕ ᓄᓇᖁᑎᖓᓐᓄᑦ. 22ᐊᑖᑕᒃᑯᖏᑦ, ᐊᓂᖏᓪᓘᓐᓃᑦ ᖁᕕᐊᓱᖏᓪᓗᑎᒃ ᕾᒃᐸᑕ ᐅᕙᑦᑎᓐᓄᑦ, ᐅᖃᐅᑎᓂᐊᕐᐸᕗᑦ, ‘ᐱᑦᓯᐊᕐᕕᒋᓗᑕ ᐃᑲᔪᓚᐅᕐᑎᒍᑦ, ᐅᓇᑕᕐᓂᒃᑯᑦ ᓄᓕᐊᒃᓴᖏᓐᓂᒃ ᐱᓚᐅᖏᓐᓇᑦᑕ, ᐸᓯᔭᒃᓴᐅᓐᖏᓚᓯ, ᐸᓂᓯ ᑐᓂᓚᐅᖏᓐᓇᑦᓯᐅᒃ ᑖᒃᑯᓄᖓ.’”
23ᐱᓐᔭᒥᓂᐅᑉ ᑭᖑᕚᖏᑦ ᑍᒫᒃ ᐱᓇᓱᐊᓚᐅᕐᐳᑦ; ᐃᓘᓐᓇᑎᒃ ᓄᓕᐊᒃᓴᕐᑖᓚᐅᕐᐳᑦ ᐊᕐᓇᓂᑦ ᑕᓂᓯᓚᐅᕐᑐᓂᒃ ᓮᓘᒥ ᐊᐅᓪᓚᐅᑎᓪᓗᒋᓪᓗ. ᐅᑎᓚᐅᕐᐳᓪᓗ ᓄᓇᒥᖕᓄᑦ, ᓄᓇᓕᒥᖕᓂᓗ ᐃᒡᓗᒐᓴᒡᔪᐊᓕᐅᓚᐅᕐᐳᑦ, ᓄᓇᖃᓕᕐᓗᑎᒡᓗ. 24ᑍᑦᓱᒪᓂᑦᓮᓐᓇᖅ ᐃᓴᕆᐊᓕᒥᐅᑦ ᑕᕝᕙᓐᖓᑦ ᐊᐅᓪᓚᓚᐅᕐᐳᑦ, ᐃᓘᓐᓇᑎᒡᓗ ᐃᓚᒥᖕᓄᑦ ᑭᖑᕚᖑᖃᑎᒥᖕᓄᑦ ᐅᑎᕐᐳᑦ ᓇᖕᒥᓂᖁᑎᒥᖕᓄᑦ.
25 #
ᐃᓗᐊᕐᓮᔩᑦ 17:6. ᐅᓪᓗᓂ ᑍᒃᑯᓇᓂ ᐊᖓᔪᖅᑳᕐᔪᐊᖃᓚᐅᖏᒪ ᐃᓴᕆᐊᓕᒥᐅᓂ; ᐃᓘᓐᓇᑎᒡᓗ ᐊᑐᕈᒪᔭᒥᖕᓂᒃ ᓈᒻᒪᒐᓱᒋᔭᒥᖕᓂᒡᓗ ᐊᑐᓚᐅᕐᐳᑦ.
Currently Selected:
ᐃᓗᐊᕐᓮᔩᑦ ᐊᒡᓚᖏᑦ 21: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
