ᐃᓗᐊᕐᓮᔩᑦ ᐊᒡᓚᖏᑦ 19
19
ᓕᕔᑎ ᓄᓕᐊᖓᓗ
1ᐅᓪᓗᓂ ᑍᒃᑯᓇᓂ ᐃᓴᕆᐊᓕᒃᑯ ᐊᖓᔪᖅᑳᕐᔪᐊᖃᓚᐅᖏᒻᒪᑕ, ᓕᕔᑎᖃᓚᐅᕐᐳᖅ ᓄᓇᖃᓚᐅᕐᑐᒥᒃ ᐃᕗᕅᒥᐅᑉ ᖃᖅᑲᖏᑕ ᐃᓱᐊᓂ. ᐱᑦᓕᐊᒥᑦ ᔫᑕᒦᑦᑐᒥᑦ ᐊᕐᓇᒥᒃ ᑎᒍᓯᓚᐅᕐᐳᖅ ᓄᓕᐊᕆᒃᑲᓐᓂᕈᒪᓪᓗᒍ. 2ᐊᕐᓇᐅᓪᓕ ᓂᓐᖓᐅᑎᓚᐅᕐᐹ ᐊᓯᐊᓃᓕᕐᓗᓂ, ᐅᑎᓚᐅᕐᐳᕐᓗ ᐊᑖᑕᒃᑯᒥᑕ ᐃᒡᓗᖓᓄᑦ ᐱᑦᓕᐊᒧᑦ ᔫᑕᒦᑦᑐᒧᑦ, ᑕᕝᕙᓃᓚᐅᕐᐳᕐᓗ ᑕᖅᑭᓂᒃ ᓯᑕᒪᓂᒃ. 3ᐊᖑᓪᓗ ᐊᐅᓪᓚᓚᐅᕐᐳᖅ ᒪᓕᒃᓴᕐᓗᒍ, ᐃᓚᓐᓂᕐᓴᕐᓗᒍ ᐅᑎᕐᑎᑦᓱᒪᓪᓗᒍ, ᐱᔨᓂᓗ ᐱᖃᑎᒋᓪᓗᒍ ᒪᕐᕉᖕᓂᒡᓗ ᓯᐅᑎᖅᑯᕐᑐᔫᖕᓂᒃ ᓇᒃᓴᕐᓗᓂ ᐊᐅᓪᓚᕐᐳᖅ, ᐊᕐᓇᐅᓪᓗ ᓕᕔᑎ ᐃᑎᕐᑎᑉᐹ ᐃᒡᓗᒧᑦ, ᐊᑖᑕᖓᑕᓗ ᑕᑯᒐᒥᐅᒃ ᖁᕕᐊᓱᒡᓗᓂ ᑐᓐᖓᓱᒃᑎᑉᐹ. 4ᓴᑭᖓᑕ ᐊᕐᓇᐅᑉ ᐊᑖᑕᖓᑕ, ᑕᕝᕙᓃᖁᒻᒪᕆᓚᐅᕐᐹ, ᑍᒤᒻᒪᑦ ᐅᓪᓗᓂᒃ ᐱᖓᓱᓂᒃ ᑕᕝᕙᓃᑉᐳᖅ, ᑖᒃᑯᐊᒃ ᐂᑉᐸᕇᒃ ᓂᕆᕙᒃᓗᑎᒃ ᐃᒥᕐᐸᒃᓗᑎᒡᓗ ᓯᓂᒃᑕᕐᐴᒃ ᑕᕝᕙᓂ. 5ᐅᓪᓗᐃᓪᓕ ᓯᑕᒪᖓᓐᓂ ᐅᓪᓛᒻᒪᕆᒃᑯᑦ ᑐᐸᒃᐸᒃᑲᒥᒃ, ᐸᕐᓇᓕᓚᐅᕐᐳᖅ ᐊᐅᓪᓚᕈᒪᓪᓗᓂ, ᐊᕐᓇᐅᓪᓕ ᐊᑖᑕᖓᑕ ᓂᖓᐅᓂ ᐅᖃᐅᑎᕚ, “ᓂᕆᖅᑳᑬᓐᓇᕆᑦ, ᓄᑭᖃᑦᓯᐊᕐᓂᐊᕋᕕᑦ, ᑭᖑᓂᖓᓂ ᐊᐅᓪᓚᕈᓐᓇᕐᓂᐊᕐᐳᑎᑦ.”
6ᑖᒃᑯᐊᒃ ᐊᖑᑏᒃ ᒪᕐᕉᒃ ᐃᒃᓯᕙᖃᑎᒌᓚᐅᕐᐴᒃ ᓂᕆᖃᑎᒌᒡᓗᑎᒃ ᐃᒥᖃᑎᒌᒡᓗᑎᒡᓗ; ᐊᕐᓇᐅᓪᓗ ᐊᑖᑕᖓᑕ ᐊᖑᑦ ᐅᖃᐅᑎᕚ, “ᑐᓐᖓᓱᒡᓗᑎᑦ ᓯᓂᒃᑕᒃᑲᓐᓂᑬᓐᓇᕆᑦ ᖁᕕᐊᓱᒡᓗᑎᓪᓗ.”
7ᓕᕔᑎᓕ ᒪᑭᑉᐳᖅ ᐊᐅᓪᓚᕈᒪᓪᓗᓂ, ᓴᑭᖓᑕᓕ ᐊᔪᐃᓐᓈᕆᕚ ᓯᓂᒃᑕᒃᑲᓐᓂᖁᓪᓗᒍ, ᐊᓱᐃᓛᒃ ᓯᓂᒃᑕᒃᑲᓐᓂᓚᐅᕐᐳᖅ. 8ᐅᓪᓗᐃᓪᓕ ᑕᓪᓕᒪᒋᓕᕐᑕᖓᓂ ᐅᓪᓛᒻᒪᕆᒃᑯᑦ ᒪᑭᓐᓇᒥ ᐊᐅᓪᓚᕋᓱᐊᓕᓚᐅᕐᐳᖅ, ᐊᕐᓇᐅᓪᓕ ᐊᑖᑕᖓᑕ ᐅᖃᐅᑎᕚ, “ᓂᕆᑬᓐᓇᕆᑦ, ᐅᑕᖅᑭᓗᑎᑦ ᐅᓪᓗᑐᖃᐅᓕᕐᐸᑦ ᐊᐅᓪᓚᕐᓂᐊᕐᐳᑎᑦ”. ᐊᓱᐃᓛᒃ ᑖᒃᑯᐊᒃ ᒪᕐᕉᒃ ᐊᖑᑏᒃ ᓂᕆᖃᑎᒋᓕᕐᐴᒃ.
9ᑖᓐᓇ ᐊᖑᑦ, ᓄᓕᐊᖓᓗ, ᐱᔨᖓᓗ ᐊᐅᓪᓚᕋᓱᐊᓕᕐᑎᓪᓗᒋᑦ, ᐊᑖᑕᖓᑕ ᐅᖃᐅᑎᕚ, “ᑕᑯᒋᑦ, ᐅᓐᓄᓕᓕᕐᒪᑦ ᒫᓐᓇ; ᑕᕝᕙᓃᑐᐃᓐᓇᓕᕆᑦ ᐅᓐᓄᐊᒥ, ᑖᕐᓯᔭᕇᓚᖓᓕᕐᒪᑦ, ᑕᕝᕙᓃᑐᐃᓐᓇᓕᕆᑦ ᑐᓐᖓᓱᒡᓗᑎᑦ, ᓯᓂᒃᑕᓕᕆᑦ ᖃᐅᒃᐸᑦ ᐅᓪᓛᒻᒪᕆᒃᑯᑦ ᐊᐅᓪᓚᕐᓂᐊᕐᐳᑎᑦ ᐊᖏᕐᕋᕐᓗᑎᓪᓗ.”
10ᐊᖑᓪᓕ ᑖᓐᓇ ᐅᓐᓄᐊᒥ ᑕᕝᕙᓃᒃᑲᓐᓂᕈᒪᓐᖏᓚᖅ; ᐊᐅᓪᓚᕐᓗᑎᒡᓗ, ᑎᑭᓐᓇᒥᒃ ᔨᐳᓯᐅᑉ ᐊᑭᐊᓄᑦ (ᑖᓐᓇ ᔨᕉᓴᓕᒻ). ᓯᐅᑎᖅᑯᕐᑐᔪᖁᑎᖃᓚᐅᕐᐳᖅ ᒪᕐᕉᖕᓂᒃ ᐃᒃᓯᕙᕕᓖᖕᓂᒃ, ᓄᓕᐊᒃᑲᓐᓂᓂ ᐃᓚᒋᓪᓗᒍ. 11ᔨᐳᓯᐅᑉ ᖃᓂᒋᔭᖓᓃᓕᕐᑎᓪᓗᒋᑦ, ᐅᓪᓗᖅ ᐊᓂᒍᓕᕐᑎᓪᓗᒍ ᖃᒡᓕᒐᒥᒃ ᔨᐳᓯᒧᑦ ᐱᔨᐅᑉ ᐊᖓᔪᖅᑳᓂ ᐅᖃᐅᑎᕚ, “ᐊᑏ ᓴᖑᓚᐅᕐᑕ ᔨᐳᓮᑎᑦ ᐃᒡᓗᒐᓴᖏᓐᓄᑦ, ᑕᕝᕙᓂ ᓯᓂᒃᑕᕐᓗᑕ.”
12ᐊᖓᔪᖅᑳᖓᑕᓕ ᐅᖃᐅᑎᕚ, “ᐃᒡᓗᒐᓴᖕᓄᑦ ᓄᖅᑲᕐᓂᐊᓐᖏᓚᒍᑦ ᐃᓅᖃᑎᒋᓐᖏᑕᑦᑎᓐᓂ, ᐃᓴᕆᐊᓕᒥᐅᖑᖏᑦᑐᓂ; ᖄᖏᕐᓂᐊᕐᐳᒍᑦ ᒋᐱᐊᒧᑦ.” 13ᐱᔨᒥᓄᓪᓗ ᐅᖃᕆᓪᓗᓂ, “ᐊᑏ ᑍᒃᑯᐊ ᐃᒡᓗᒐᓮᑦ ᑎᑭᓐᓇᓱᐊᓕᕐᓚᕗᑦ ᑕᒻᒫᕆᐊᕐᑐᕐᓗᑕ ᒋᐱᐊᒥ ᐅᕝᕙᓘᓐᓃᑦ ᕌᒪᒥ.” 14ᑍᒤᒻᒪᑦ ᖄᖏᕐᐳᑦ ᔨᐸᓯᒥᒃ ᑲᔪᓯᓪᓗᑎᒃ ᐃᖏᕐᕋᓚᐅᕐᐳᑦ; ᓯᕿᓂᖅ ᓂᐱᓚᐅᕐᐳᖅ ᒋᐱᐊᒧᑦ ᖃᒡᓕᑎᓪᓗᒋᑦ ᐱᓐᔭᒥᓂᐅᑉ ᑭᖑᕚᖏᑕ ᓄᓇᖓᓄᑦ. 15ᐃᒡᓗᒐᓴᖕᓄᑦ ᓴᖑᓪᓗᑎᒃ, ᐃᑎᕐᐳᑦ ᓯᓂᒃᑕᕈᒪᓪᓗᑎᒃ ᒋᐱᐊᒥ, ᐊᖅᑯᑏᑦ ᐊᑯᓐᓂᖓᓂ ᐱᕕᑐᔪᒥ ᐃᒃᓯᕙᓕᕐᐳᑦ ᐃᒡᓗᒐᓴᖕᓂ, ᑭᓇᒧᓪᓘᓐᓂᑦ ᕾᖁᔭᐅᖏᓐᓇᒥᒃ ᐃᒡᓗᒥᓂ ᓯᓂᒃᑕᖁᔭᐅᓗᑎᒃ.
16ᑕᑯᒋᓪᓗ, ᐃᑦᑐᖅ ᕾᕗᖅ ᐱᓇᓱᐊᕐᑐᕕᓂᖅ ᐱᕈᕐᓰᕕᖕᒥᒃ ᐅᓐᓄᒃᑯᑦ; ᑖᓐᓇ ᖃᖅᑲᓕᖕᒥ ᐃᕗᕅᒥᒥ ᓄᓇᖃᕐᑐᖅ, ᒋᐱᐊᒥ. ᑕᕝᕙᓂᓕ ᐃᓄᐃᑦ ᓄᓇᖃᕐᑐᑦ ᐱᓐᔭᒥᓂᐅᑉ ᑭᖑᕚᕆᓚᐅᕐᐰᑦ. 17ᑖᓐᓇ ᐃᑦᑐᖅ ᑕᑯᓴᕋᒥ, ᓂᐅᕐᕈᐊᖅ ᑕᑯᕚ ᐃᒡᓗᒐᓮᑦ ᐊᖅᑯᑎᖓᑕ ᐱᕕᑐᓂᖓᓃᑦᑐᖅ, ᐃᑦᑑᑉ ᐊᐱᕆᕚ, “ᓇᒧᓐᖓᐅᕖᑦ? ᓇᑭᓪᓗ ᑎᑭᑉᐱᑦ?”
18ᓕᕔᑎᐅᑉ ᑭᐅᕚ, “ᐱᑦᓕᐊᒥᐅᑕᐅᕗᒍᑦ ᔫᑕᒦᑦᑐᒥ, ᐃᕗᕅᒥᒧᓪᓗ ᖃᖅᑲᓕᖕᒧᑦ ᐂᕗᒍᑦ ᑕᐅᕙᓂᒥᐅᖑᒐᒪ, ᐱᑦᓕᐊᒧᑦ ᔫᑕᒦᑦᑐᒧᑦ ᐂᓚᐅᕋᒪ; ᒫᓐᓇᓕ ᐊᖏᕐᕋᐅᓕᕐᐳᖓ; 19ᐃᕕᒃᓱᒐᖃᕐᐳᒍᑦ ᓂᕿᒃᓴᖃᕐᓗᑕᓗ ᓯᐅᑎᖅᑯᕐᑐᔪᖁᑎᑦᑎᓐᓄᑦ, ᓂᐊᖂᔭᖃᕐᓗᑕᓗ ᕔᓂᒥᒡᓗ ᓄᓕᐊᒃᑲᓐᓂᓐᓄᑦ ᐅᕙᓐᓄᓪᓗ ᐱᔨᓐᓄᓪᓗ; ᓱᓇᒥᒃ ᑭᓐᖒᒪᒃᓕᖏᒃᑲᓗᐊᕐᓗᑕ ᓱᓇᓕᒫᓂᒃ ᐱᑕᖃᕋᑦᑕ.”
20ᐃᑦᑐᕐᓕ ᐅᖃᕐᐳᖅ, “ᑐᓐᖓᓱᒋᑦᓯ ᐅᕙᑦᑎᓐᓄᑦ! ᑲᒪᒋᑦᓯᐊᕐᓂᐊᕐᐸᑦᓯ ᐱᔭᕆᐊᖃᕐᑕᑦᓯᓐᓂᒃ; ᑕᒫᓂ ᑭᓯᐊᓂ ᐱᕕᑐᓂᕐᒥ ᐊᖅᑯᑎᒥ ᓯᓂᒃᑕᕋᓱᐊᖏᓪᓗᓯ.” 21ᑕᕝᕙ ᐃᒡᓗᒥᓄᑦ ᐊᖏᕐᕋᐅᑎᕔᑦ, ᓂᕆᑎᓪᓗᒋᓪᓗ ᓯᐅᑎᖅᑯᕐᑐᔪᖁᑎᖏᑦ, ᐃᑎᒐᖏᓪᓗ ᐅᐊᓴᕐᐰᑦ ᓂᕆᑎᓪᓗᒋᓪᓗ ᐃᒥᕐᑎᑉᐰᑦ.
22 #
ᒨᓯᓯ ᓯᕗᓪᓖᑦ 19:5-8. ᖁᕕᐊᓱᖃᑎᒋᓕᕐᓗᒋᓪᓗ, ᑕᕝᕔᓐᓇᖅ ᓄᓕᐊᕐᓂᕐᒥᒃ ᐊᑐᕐᓂᕐᓗᒃᑎᓂᑦ ᐃᒡᓗᖓ ᐊᕙᑕᖏᕐᑕᐅᕗᖅ ᐅᒃᑯᐊᖓᓂᒡᓗ ᐊᑦᓴᕐᑕᕐᓗᑎᒃ; ᐊᖑᓪᓗ ᐃᑦᑐᖅ ᐅᖃᐅᑎᕚᑦ, “ᐊᖑᑦ ᑍᓐᓇ ᐊᖏᕐᕋᐅᑎᔧᑦ ᐊᓂᑎᒍᒃ! ᓄᓕᐊᕈᒪᒐᑦᑎᒍ!”
23ᑖᓐᓇᓕ ᐊᖑᑦ ᐃᑦᑐᖅ ᐃᒡᓗᖃᕐᑐᖅ ᐊᓂᕗᖅ ᐅᖃᐅᑎᓪᓗᒋᓪᓗ, “ᑍᒤᓕᐅᕋᓯ, ᖃᑕᓐᖑᑎᒃᑳ! ᑍᒫᒃ ᐱᐅᖏᑦᑐᐊᓗᖕᒥᒃ ᐱᓇᓱᐊᕋᓯ, ᑖᓐᓇ ᐊᖑᑦ ᐃᒡᓗᒥᐅᑕᕆᒐᒃᑯ. 24ᑕᑯᒋᑦ! ᑕᕝᕙ ᓄᓕᐊᒃᑲᓐᓂᖓ ᐸᓂᒐᓗ ᐅᐃᒡᒐᓱᒃ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᖅ. ᑖᒃᑯᐊᒃ ᐊᓂᑎᓐᓂᐊᕐᐹᒃᑲᒃ, ᑖᒃᑯᐊᓗ ᐱᔪᓐᓇᕐᐸᓯ. ᐃᓱᒤᓐᓇᕐᕈᑎᒋᓂᐊᕋᑦᓯᐅᒃ, ᑭᓯᐊᓂᓕ ᐱᐅᖏᑦᑐᐊᓗᖕᒥᒃ ᐱᓇᓱᐊᕐᑍᓕᒋᑦᓯ ᐊᖑᒻᒧᑦ ᑖᑦᓱᒧᖓ!” 25ᑖᒃᑯᐊᓕ ᐊᖑᑎᑦ ᓈᓚᒍᒪᓚᐅᓐᖏᓚᑦ ᑖᑦᓱᒥᖓ, ᑍᒤᒻᒪᑦ ᓕᕔᑎᐅᑉ ᓄᓕᐊᒃᑲᓐᓂᖓ ᐊᓂᑎᑉᐹ ᑖᒃᑯᓄᖓ, ᑖᓐᓇᓗ ᓄᓕᐊᕐᐹᑦ ᐱᓕᕆᐊᕆᓪᓗᒍᓗ ᐅᓐᓄᐊᓕᒫᖅ ᓄᖅᑲᓚᐅᕋᑎᒃ ᐅᓪᓛᖅ ᑎᑭᓪᓗᒍ, ᖃᐅᒻᒪᓕᕐᑎᓪᓗᒍ ᓴᒃᑯᑍᓐᓇᕐᐹᑦ.
26ᐅᓪᓛᓐᖑᓕᕐᒪᓪᓗ ᐊᕐᓇᖅ ᕾᕗᖅ ᐅᕐᕈᓪᓗᓂᓗ ᐊᖑᑎᐅᑉ ᐃᑦᑑᑉ ᐅᒃᑯᐊᖓᓄᑦ, ᐅᐃᖓᑕ ᓇᔪᕐᑕᖓᓄᑦ, ᑕᕝᕙᓃᖏᓐᓇᓚᐅᕐᐳᕐᓗ ᖃᐅᒻᒪᓕᕐᑎᓪᓗᒍ. 27ᐅᐃᖓᓗ ᒪᑭᓐᓇᒥ ᐅᓪᓛᒃᑯᑦ, ᐊᓂᓕᕐᓗᓂᓗ ᐅᒃᑯᐊᖅ ᒪᑐᐃᕋᒥᐅᒃ, ᓄᓕᐊᒃᑲᓐᓂᓂ ᑕᑯᕚ ᓇᓚᔪᖅ ᐃᒡᓘᑉ ᓯᓚᑖᓂ ᑕᓕᖏᒃ ᐃᓵᖓᔫᒃ ᐅᒃᑯᐊᒧᑦ. 28ᐅᖃᐅᑎᕚᓗ, “ᒪᑭᓕᕆᑦ, ᐊᑏ ᐊᐅᓪᓚᓕᕐᑕ.” ᑖᓐᓇᓕ ᑭᐅᓐᖏᓚᖅ. ᑕᕝᕙ ᑎᒥᖓ ᓯᐅᑎᖅᑯᕐᑐᔪᒧᐊᕐᐹ; ᐊᐅᓪᓚᕐᓗᓂᓗ ᐊᖏᕐᕋᐅᓕᕐᓗᓂ. 29#ᓴᒧᐃᓕ ᓯᕗᓪᓖᑦ 11:7.ᐊᖏᕐᕋᕋᒥᓗ ᐃᒡᓗᒥᓄᑦ ᐃᑎᕐᐳᖅ ᓴᕕᖕᒥᒡᓗ ᑎᒍᓯᓪᓗᓂ. ᓄᓕᐊᒃᑲᓐᓂᖓᑕᓗ ᑎᒥᖓ ᐊᒡᒍᕐᐹ 12ᓕᓪᓗᒍ, ᐊᐅᓪᓚᕐᑎᑉᐰᓪᓗ ᐃᓴᕆᐊᓕᐅᑉ ᑭᖑᕚᓕᒫᖏᓐᓄᑦ 12ᓄᑦ ᐊᑐᓂᑦ. 30ᐃᓘᓐᓇᑎᒃ ᑕᑯᔪᑦ ᐅᖃᕐᐳᑦ, “ᑍᒤᑦᑐᐊᓗᖕᒥᒃ ᑕᑯᓚᐅᕐᓯᒪᓐᖏᓚᒍᑦ! ᑍᒫᒃ ᐱᔪᖃᓚᐅᕐᓯᒪᓐᖏᓚᖅ ᐃᓴᕆᐊᓕᒥᐅᑦ ᐊᐅᓪᓚᓚᐅᕐᓯᒪᖕᒪᑕ ᐄᑦᔨᑉᑎᒥᑦ ᐅᓪᓗᒥᒧᑦ ᑎᑭᓪᓗᒍ, ᐃᓱᒪᒃᓴᕐᓯᐅᕆᐊᖃᓕᕐᐳᒍᑦ ᑲᑎᒪᖃᑎᒌᒡᓗᑕ ᐅᖃᖃᑎᒌᒡᓗᑕᓗ.”
Currently Selected:
ᐃᓗᐊᕐᓮᔩᑦ ᐊᒡᓚᖏᑦ 19: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
