ᐃᓗᐊᕐᓮᔩᑦ ᐊᒡᓚᖏᑦ 16
16
ᓵᒻᓲᓂᒃᑯᒃ ᑎᓔᓚᒃᑯᒃ
1ᓵᒻᓲᓂ ᒑᓴᒧᐊᕐᐳᖅ, ᑍᑲᓂᓗ ᑕᑯᓪᓗᓂ ᐊᕐᓇᒥᒃ ᐊᑐᒐᕐᒥᒃ, ᑖᓐᓇᓗ ᐅᐸᒃᓗᒍ ᐃᓐᓇᖓᖃᑎᒋᕚ. 2ᒑᓴᒥᐅᑦ ᐅᖃᐅᑎᔭᐅᓚᐅᕐᐳᑦ, “ᓵᒻᓲᓂ ᑕᒪᐅᖓ ᑎᑭᑉᐳᖅ!” ᓇᔪᕐᑕᖓ ᐅᖓᓗᕚᑦ ᐃᔨᕐᓯᒪᓪᓗᑎᒡᓗ ᐅᑕᖅᑭᓪᓗᒍ ᐅᓐᓄᐊᓕᒫᖅ ᐃᒡᓗᒐᓮᑦ ᐃᑎᕐᑕᕐᕕᖓᓂ. ᐅᓐᓄᐊᓕᒫᖅ ᓂᐱᖃᓚᐅᓐᖏᓚᑦ, ᐃᒫᒃ ᐅᖃᖃᑦᑕᐅᑎᓪᓗᑎᒃ, “ᐅᓪᓛᒃᑯᑦ ᖃᐅᒻᒪᓕᕐᐸᑦ, ᑐᖁᓐᓂᐊᕐᐸᕗᑦ.” 3ᓵᒻᓲᓂᓗ ᓇᓚᕗᖅ ᐅᓐᓄᐊᑉ ᕿᑎᕋᓕᕐᓂᖓ ᑎᑭᓪᓗᒍ, ᒪᑭᓐᓇᒥᓗ ᐅᓐᓄᐊᒃᑯᑦ ᕿᑎᕋᓕᕐᑎᓪᓗᒍ, ᐃᒡᓗᖓᓮᑦ ᐃᑎᕐᑕᕐᕕᖓᑕ ᐅᒃᑯᐊᖓ ᑎᒍᕚ ᐊᕙᓗᖏᒡᓗ ᒪᕐᕉᒃ ᓄᓱᒡᓗᒋᑦ ᐲᕐᐰᑦ, ᐃᕐᓱᒡᓗᒋᓪᓗ ᖃᖅᑲᐅᑉ ᖄᖓᓄᐊᕈᑎᕔᑦ ᕼᐃᐸᕋᓐᒧᑦ ᓵᓐᖓᔪᒧᑦ.
4ᑕᒪᑐᒪ ᑭᖑᕐᖓᒍᑦ ᐅᖓᒋᔭᖃᓕᕐᐳᖅ ᐊᕐᓇᒥᒃ ᓱᕆᒃ ᓇᕐᓴᖓᓂᒥᐅᑕᕐᒥᒃ, ᐊᑎᓕᖕᒥᒃ ᑎᓔᓚᒥᒃ. 5ᐱᓕᔅᑍᓂᒥᐅᓪᓗ ᐊᖓᔪᖅᑳᖏᑦ ᑖᑦᓱᒧᖓ ᐅᐸᒍᑎᕗᑦ ᐅᖃᐅᑎᓪᓗᒍ, “ᓯᓔᕐᕆᓚᐅᕈᒃ ᖃᐅᔨᓇᓱᐊᕐᓗᑎᓪᓗ ᖃᓄᖅ ᓴᓐᖏᔪᐊᓘᓂᖓᓂᒃ, ᖃᓄᕐᓗ ᓵᓚᒋᔪᓐᓇᕐᒪᖔᑦᑎᒍᑦ, ᐊᑦᓱᖏᕐᓂᐊᕋᑦᑎᒍᑦ ᓵᓚᒋᓗᒍᓗ; ᑕᕝᕙ ᑐᓂᓂᐊᕐᐸᑦᑎᒋᑦ 1,100ᓂᒃ ᓯᐅᓪᕕᕆᓂᒃ.” 6ᑕᕝᕙ ᑎᓔᓚᐅᑉ ᓵᒻᓲᓂ ᐅᖃᐅᑎᕚ, “ᐅᖃᐅᑎᓚᐅᓐᖓ ᖃᓄᐊᓗᒃ ᓴᓐᖏᔫᑎᑕᐅᖕᒪᖔᕐᐱᑦ, ᖃᓄᕐᓗ ᕿᓚᒃᓱᕐᑕᐅᔪᓐᓇᕐᒪᖔᕐᐱᑦ ᓵᓚᐅᓗᑎᑦ.” 7ᓵᒻᓲᓂᐅᓪᓗ ᐅᖃᐅᑎᕚ, “ᐊᑦᓱᖏᕐᑕᐅᒍᒪ ᐱᓯᒃᓰᑦ ᓄᖃᕐᑎᖏᓐᓄᑦ 7ᓄᑦ ᓄᑖᓄᑦ ᐸᓂᓚᐅᖏᑦᑐᓄᑦ, ᓴᓐᖐᑦᑑᓕᕐᓂᐊᕐᐳᖓ ᐃᓄᑐᐃᓐᓇᑎᑐᑦ.” 8ᑕᕝᕙ ᐱᓕᔅᑍᓂᒥᐅᑦ ᐊᖓᔪᖅᑳᖏᑦ ᑐᓂᓯᕗᑦ ᑖᑦᓱᒧᖓ ᐱᓯᒃᓯᐅᑉ ᓄᖃᕐᑎᖏᓐᓂᒃ 7ᓂᒃ, ᓄᑖᓂᒃ ᓱᓕ ᐸᓂᓚᐅᖏᑦᑐᓂᒃ, ᑖᑦᓱᒪᓗ ᐊᑦᓱᖏᕐᓱᕐᐹ ᑖᒃᑯᓄᖓ. 9ᐊᖑᑏᑦ ᐅᑕᖅᑭᓚᐅᕐᐳᑦ ᐊᕐᓇᐅᑉ ᐃᒡᓗᕈᓯᖓᓂ. ᐊᕐᓇᐅᓪᓗ ᐅᖃᐅᑎᕚ, “ᓵᒻᓲᓂ ᐱᓕᔅᑍᓂᒥᐅᑦ ᐅᐸᒃᐹᑎᑦ!” ᐱᑎᒃᓯᐅᑉ ᓄᖃᕐᑎᖏᑦ ᕿᒃᑐᕋᕐᐰᑦ ᐃᕙᓗᑎᑐᑦ ᐃᑯᒪᒧᑦ ᐊᒃᑐᕐᑕᐅᔪᑎᑐᑦ. ᓴᓐᖏᓂᖓᑕ ᓇᓗᓇᕐᓂᖓ ᖃᐅᔨᔭᐅᓚᐅᓐᖏᓚᖅ. 10ᑎᓔᓚᐅᑉ ᐅᖃᐅᑎᕚ ᓵᒻᓲᓂ, “ᑕᑯᒋᑦ, ᒥᑕᐅᑎᒋᓚᐅᕐᐸᕐᒪ ᓴᒡᓗᓚᐅᕐᐳᑎᑦ ᐅᕙᓐᓄᑦ; ᒫᓐᓇᓕ ᐅᖃᐅᑎᓚᐅᓐᖓ ᓱᓇᒧᑦ ᐊᑦᓱᖏᕐᑕᐅᔪᓐᓇᕐᒪᖔᕐᐲᑦ.” 11ᐅᖃᐅᑎᕚ, “ᕿᓚᒃᓱᕐᑕᐅᒍᒪ ᐊᒃᓱᓈᓄᑦ ᐊᑐᓚᐅᕐᓯᒪᖏᑦᑐᓄᑦ, ᓴᓐᖐᓕᒐᔭᕐᐳᖓ, ᐃᓄᑐᐃᓐᓇᑎᑑᓕᕐᓗᖓ.” 12ᑍᒤᒻᒪᑦ ᑎᓔᓚ ᐊᑦᓱᓈᓂᒃ ᓄᑖᓂᒃ ᐱᓚᐅᕐᐳᖅ ᐊᑦᓱᖏᕐᓗᒍᓗ ᐅᖃᐅᑎᕚ, “ᓵᒻᓲᓂ, ᐱᓕᔅᑍᓂᒥᐅᑦ ᐅᐸᒃᐹᑎᑦ!” ᐊᖑᑏᑦ ᐅᑕᖅᑭᓚᐅᕐᐳᑦ ᐊᕐᓇᐅᑉ ᐃᒡᓗᕈᓯᖓᓂ. ᐊᒃᓱᓈᓪᓕ ᑖᒃᑯᐊ ᑕᓕᕐᒥᓂᑦ ᕿᒃᑐᕋᕐᐰᑦ ᐃᕙᓗᑎᑐᑦ. 13ᑎᓔᓚᐅᑉ ᓵᒻᓲᓂ ᐅᖃᐅᑎᕚ, “ᒫᓐᓇᒧᑦ ᒥᑕᐅᑎᒋᓚᐅᕐᐸᕐᒪ ᓴᒡᓗᓚᐅᕐᐳᑎᓪᓗ ᐅᕙᓐᓄᑦ. ᐅᖃᐅᑎᓚᐅᓐᖓ ᓱᓇᒧᑦ ᐊᑦᓱᖏᕐᑕᐅᔪᓐᓇᕐᐲᑦ.” ᐅᖃᐅᑎᕚ, “ᓄᔭᒃᑲ 7ᓕᖅᑲᖓᔪᑦ ᓄᕕᕐᓴᕈᕕᒋᑦ ᓱᑲᓪᓗᒋᑦ ᓄᕕᕐᓴᐅᑎᐅᑉ ᓱᑲᑎᕈᑎᖓᓄᑦ ᓄᕕᕐᓴᕐᕕᖕᒧᑦ ᐊᑦᓱᖏᕐᓗᒋᑦ, ᓴᓐᖐᓕᒐᔭᕐᐳᖓ ᐃᓄᑐᐃᓐᓇᕐᑎᑑᓕᕐᓗᖓ.” 14ᐊᓱᐃᓛᒃ ᓄᕕᕐᓴᓚᐅᕐᐰᑦ ᓱᑲᓪᓗᒋᑦ ᓄᕕᕐᓴᐅᑎᐅᑉ ᓱᑲᑎᕈᑎᖓᓄᑦ ᓄᕕᕐᓴᕐᕕᖕᒧᑦ ᐊᑦᓱᖏᕐᓗᒋᑦ, ᐅᖃᐅᑎᓪᓗᒍᓗ, “ᓵᒻᓲᓂ ᐱᓕᔅᑍᓂᒥᐅᑦ ᑎᑭᑉᐹᑎᑦ!” ᑐᐸᒃᑲᒥᓗ ᒪᑭᑉᐳᖅ ᓄᔭᓂᓗ ᐲᕐᐰᑦ ᓄᕕᕐᓴᐅᑎᒥᑦ. 15ᐊᕐᓇᐅᑉ ᐅᖃᐅᑎᕚ, “ᖃᓄᖅ ᐅᖃᕈᓐᓇᕐᐲᑦ, ‘ᓇᒡᓕᒋᕙᒋᑦ,’ ᐆᒻᒪᑏᑦ ᐅᕙᓐᓃᓐᖏᑎᓪᓗᒍ? ᒥᑕᐅᑎᒋᓚᐅᕋᕕᓐᖓ ᐱᖓᓱᐊᕐᑎᕐᓗᑎᑦ, ᐅᖃᐅᑎᓚᐅᖏᓐᓇᕕᓐᖓᓗ ᖃᓄᖅ ᓴᓐᖏᔪᐊᓘᖕᒪᖔᕐᐱᑦ.” 16ᒪᑐᒪ ᑭᖑᕐᖓᒍᑦ, ᐊᒃᓱᕈᕐᑎᓕᕐᐹ ᐅᖃᐅᓯᕐᒥᓄᑦ ᖃᐅᑕᒫᑦ; ᐅᖃᖁᓪᓗᒍ, ᑕᕐᓂᖓ ᕿᒃᓵᓕᕐᐳᖅ ᑐᖁᓕᕐᑐᑐᑦ, 17ᐅᖃᐅᑎᓕᕐᐹᓗ ᖃᐅᔨᒪᔭᒥᓂᒃ ᑕᒤᓐᓂᒃ, ᐅᖃᐅᑎᓪᓗᒍ, “ᓄᔭᒃᑲ ᑭᑦᔭᐅᑎᒧᑦ ᑭᐱᔭᐅᓚᐅᕐᓯᒪᓐᖏᓚᑦ ᐊᓈᓇᒪ ᐃᒡᓕᐊᖓᓂᑦ ᐊᓂᒐᒪ ᒎᑎᒧᑦ ᑐᓂᕐᕈᑕᐅᓯᒪᕗᖓ ᓈᓴᕅᖑᖁᓪᓗᖓ. ᓄᔭᒃᑲ ᑭᐱᔭᐅᒃᐸᑕ ᓴᓐᖏᓂᕋ ᐱᕐᓂᐊᕐᐳᖅ, ᓴᓐᖐᑦᑑᓕᕐᓗᖓᓗ ᐃᓄᑐᐃᓐᓇᕐᑎᑐᑦ.” 18ᑎᓔᓚ ᖃᐅᔨᒐᒥ ᓱᓕᓂᖓᓂᒃ, ᕾᖁᔨᕗᖅ ᐱᓕᔅᑍᓂᒥᐅᑦ ᐊᖓᔪᖅᑳᖏᓐᓂᒃ, ᐅᖃᐅᑎᓪᓗᒋᓪᓗ, “ᕾᓂᐊᕐᐳᓯ ᐊᑕᐅᓯᐊᒃᑲᓐᓂᕐᓗᓯ, ᓱᓕᔪᒥᒃ ᐅᖃᐅᑎᖕᒪᖓ.” ᐊᓱᐃᓛᒃ ᐱᓕᔅᑍᓂᒥᐅᑦ ᐊᖓᔪᖅᑳᖏᑦ ᐂᕗᑦ ᑖᑦᓱᒧᖓ ᐊᑭᓕᕐᓗᒍᓗ ᑮᓇᐅᔭᓂᒃ. 19ᓯᓂᓕᕐᑎᑉᐹᓗ ᓰᖅᑯᒥᓂ; ᕾᖁᔨᓪᓗᓂᓗ ᐊᖑᒻᒥᒃ, ᑖᑦᓱᒪᓗ ᓄᔭᖏᑦ 7ᐃᓕᓪᓗᒋᑦ ᑭᑦᔭᕐᐰᑦ ᓂᐊᖁᐊᓂᑦ. ᐸᒡᕕᓴᓕᕐᐹᓗ ᐊᕐᓇᐅᑉ, ᓴᓐᖏᓂᖓᑕᓗ ᕿᒪᒃᐹ. 20ᐊᕐᓇᐅᑉ ᐅᖃᐅᑎᕚ, “ᐱᓕᔅᑍᓂᒥᐅᑦ ᑎᑭᑉᐹᑎᑦ, ᓵᒻᓲᓂ!” ᓯᓂᖕᓂᕐᒥᓂᑦ ᒪᑭᓐᓇᒥ ᐅᖃᕐᐳᖅ, “ᑍᒤᑉᐸᓚᐅᕋᒪ ᑍᒤᓐᓂᐊᕆᕗᖓ, ᐊᑦᓱᖏᐅᑎᑦ ᓱᕋᖕᓂᐊᕐᐸᒃᑲ!” ᑭᓯᐊᓂᓕ ᖃᐅᔨᒪᓚᐅᓐᖏᓚᖅ ᐊᑕᓂᐅᑉ ᕿᒪᖕᒪᒍ. 21ᐱᓕᔅᑍᓂᒥᐅᑦ ᑎᒍᕚᑦ, ᐃᔨᖏᒡᓗ ᖃᕐᓗᒋᒃ, ᐂᑎᑉᐹᓗ ᒑᓴᒧᑦ, ᕿᓚᒃᓱᕐᓗᒍᓗ ᑲᓐᓄᔭᓄᑦ ᐊᕐᓵᕐᑑᔭᓄᑦ; ᓯᖃᓪᓕᑎᑦᓯᕕᖕᒥᓗ ᑎᒍᔭᐅᓯᒪᕕᖕᒥ ᓯᖃᓪᓕᑎᑦᓯᔨᐅᑎᑕᐅᓕᕐᐳᖅ. 22ᓂᐊᖁᖓᓂᓕ ᓄᔭᖏᑦ ᐱᕈᓕᕆᕗᑦ ᓴᓕᔭᐅᓚᐅᕐᑐᑦ.
ᓵᒻᓲᓂᐅᑉ ᑐᖁᓂᖓ
23ᐱᓕᔅᑍᓂᒥᐅᑦ ᐊᖓᔪᖅᑳᖏᑦ ᑲᑎᓚᐅᕐᐳᑦ ᐱᕕᒡᔪᐊᒥᖕᓂᒃ ᑐᓂᕐᕈᓯᕆᐊᕐᑐᕐᓗᑎᒃ ᒎᑎᒥᖕᓄᑦ ᑍᒐᓂᒧᑦ, ᖁᕕᐊᓱᒋᐊᕐᑐᕐᓗᑎᒡᓗ ᐅᖃᓚᐅᕋᒥᒃ, “ᒎᑎᑦᑕ ᐊᑭᕋᕗᑦ ᓵᒻᓲᓂ ᑐᓂᓚᐅᕐᐹ ᐅᕙᑦᑎᓐᓄᑦ!” 24ᐃᓄᐃᓪᓗ ᑕᑯᒐᒥᑦᔪᒃ ᒎᑎᒥᖕᓂᒃ ᓂᕐᑐᐃᓕᕐᐳᑦ ᐅᖃᕐᓗᑎᒃ, “ᒎᑎᑦᑕ ᐊᑭᕋᕗᑦ ᑐᓂᓚᐅᕐᐰᑦ ᐅᕙᑦᑎᓐᓄᑦ, ᓄᓇᑦᑎᓐᓂᒃ ᐊᓯᕈᐃᓚᐅᕐᑐᖅ ᑐᖁᕅᓚᐅᕐᑐᕐᓗ ᐃᓅᖃᑎᑦᑎᓐᓂᒃ ᐅᓄᕐᑐᓂᒃ.” 25ᑍᒤᓚᐅᕐᐳᖅ ᐃᒥᕐᓂᕐᒧᑦ ᖁᕕᐊᓱᓕᕋᒥᒃ ᐅᖃᕐᐳᑦ, “ᓵᒻᓲᓂ ᕾᖁᔭᐅᓚᐅᕐᓕ, ᑕᑯᕋᓐᓈᕐᑎᓐᓂᐊᕐᒪᑎᒍᑦ.” ᑕᕝᕙ ᓵᒻᓲᓂ ᐂᔭᐅᕗᖅ ᑎᒍᔭᐅᒪᕕᖕᒥᑦ, ᑕᑯᕋᓐᓈᕐᑎᑉᐰᓪᓗ. ᓇᖏᕐᑎᑕᐅᓪᓗᓂᓗ ᓱᑬᑦ ᓇᐸᔪᑦ ᐊᑯᕐᖓᓐᓂ; 26ᓵᒻᓲᓂᓗ ᓄᑲᑉᐱᐊᒧᑦ ᑕᓯᐅᕐᑎᒥᓄᑦ ᐅᖃᕐᐳᖅ, “ᐂᑎᓚᐅᓐᖓ ᐊᒃᑐᐃᑎᓪᓗᖓᓗ ᑐᒃᓯᐊᕐᕕᐅᑉ ᑐᓐᖓᕕᖏᑕ ᓇᐸᔪᖏᓐᓂᒃ, ᐄᒐᖓᕝᕕᒋᔪᒪᒐᒃᑭᑦ.” 27ᑐᒃᓯᐊᕐᕕᒡᓗ ᑕᑕᑉᐳᖅ ᐊᖑᑎᓂᒃ ᐊᕐᓇᓂᒡᓗ. ᐱᓕᔅᑍᓂᒥᐅᓪᓗ ᐊᖓᔪᖅᑳᖏᓐᓂᒃ, ᐊᓯᖏᓪᓗ ᐊᖑᑏᑦ ᐊᕐᓁᓪᓗ ᖄᖓᓃᑦᑐᑦ 3,000 ᓵᒻᓲᓂᒥᒃ ᑕᑯᓐᓇᕐᑐᑦ ᑕᑯᓐᓇᕐᑎᑦᓯᑎᓪᓗᒍ. 28ᓵᒻᓲᓂ ᓂᓪᓕᐊᕗᖅ ᐊᑕᓂᕐᒧᑦ ᐅᖃᕐᓗᓂ, “ᐆ ᐊᑕᓃᖅ ᒎᑏ, ᐃᖅᑲᐅᒪᓚᐅᓐᖓ, ᑐᒃᓯᐊᕐᐳᖓ! ᓴᓐᖏᓂᕐᑖᕐᑎᓚᐅᓐᖓ, ᑐᒃᓯᐊᕐᕕᒋᕙᒋᑦ, ᓱᓕ ᐊᑕᐅᓯᐊᒃᑲᓐᓂᕐᓗᑎᑦ, ᐆ ᒎᑏ, ᐱᒋᐊᕐᓗᖓ ᐊᑕᐅᓯᐊᕐᓗᖓ ᐊᑭᔪᓐᓇᖁᓪᓗᖓ ᐱᓕᔅᑍᓂᒥᐅᓂᒃ ᐃᔩᒃᑲᒃ ᐱᓪᓗᒋᒃ!” 29ᓵᒻᓲᓂᐅᓪᓗ ᓱᑬᑦ ᓇᐸᔪᑦ ᐊᒃᑐᕐᐰᑦ ᑐᒃᓯᐊᕐᕕᐅᑉ ᑐᓐᖓᕕᖏᒃ, ᐊᒃᑐᐊᑦᓯᐊᕐᓗᒋᒡᓗ, ᐂᑉᐹ ᑕᓕᕐᐱᖕᒥᓄᑦ ᐂᑉᐹᓗ ᓴᐅᒥᖕᒥᓄᑦ. 30ᓵᒻᓲᓂᓗ ᐅᖃᕐᐳᖅ, “ᐱᓕᔅᑍᓂᒥᐅᑦ ᑐᖁᖃᑎᒋᓚᐅᕐᓚᒃᑲ!” ᐅᑯᓪᓗᓂᓗ ᐱᔪᓐᓇᕐᓂᓕᒫᒥᓄᑦ, ᐊᔭᒃᐹᒃ, ᐃᒡᓗᓗ ᑲᑕᒃᐳᖅ ᐱᓕᔅᑍᓂᒥᐅᑦ ᐊᖓᔪᖅᑳᖏᓐᓄᑦ ᐃᓄᓕᒫᓄᓪᓗ ᑕᕝᕙᓃᑦᑐᓄᑦ. ᑐᖁᒥᓂ ᑐᖁᑦᓯᓂᖓ ᐅᓄᕐᓂᕐᓴᐅᓚᐅᕐᐳᖅ ᐃᓅᓯᓕᒫᒥᓂ ᑐᖁᑦᓯᓂᕆᓚᐅᕐᑕᒥᓂᑦ. 31ᖃᑕᓐᖑᑎᖏᑕ ᐊᑖᑕᖓᑕᓗ ᐃᒡᓗᒥᐅᖃᑎᓕᒫᖏᓐᓂᑦ ᐂᔭᐅᕗᖅ, ᐃᓗᕕᕐᐹᓪᓗ ᔫᕋᐅᑉ ᐃᔅᑕᐅᓪᓗ ᐊᑯᓐᓂᖓᓄᑦ ᐊᑖᑕᖓᑕ ᒪᓄᐊᑉ ᐃᓗᕕᖓᓂ. ᐊᕐᕌᒍᓂᒃ 20ᓂᒃ ᐃᓴᕆᐊᓕᒥᐅᓄᑦ ᐊᖓᔪᖅᑳᖑᓚᐅᕐᐳᖅ.
Currently Selected:
ᐃᓗᐊᕐᓮᔩᑦ ᐊᒡᓚᖏᑦ 16: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
