ᐃᓗᐊᕐᓮᔩᑦ ᐊᒡᓚᖏᑦ 15
15
ᓵᒻᓲᓂᐅᑉ ᓵᓚᖃᕐᓂᖓ ᐱᓕᔅᑍᓂᒥᐅᓂᒃ
1ᑕᒪᑐᒪ ᑭᖑᓂᑲᓪᓚᖓᒍᑦ, ᓂᐊᖂᔭᒃᓴᓂᒃ ᑲᑎᕐᓱᐃᕕᒃ ᓇᓪᓕᐅᑎᑎᓪᓗᒍ, ᓵᒻᓲᓂ ᐳᓛᕆᐊᓚᐅᕐᐳᖅ ᓄᓕᐊᒥᓄᑦ ᒎᑦᓯᐅᑉ ᓄᕐᕋᖓᓂᒃ ᓇᒃᓴᕐᓗᓂ. ᐅᖃᕐᓗᓂ, “ᓄᓕᐊᕋ ᑕᑯᔭᕐᑐᕋᒃᑯ ᐃᒡᓗᕈᓯᖓᓄᑦ.” ᐊᕐᓇᐅᓪᓕ ᐊᑖᑕᖓᑕ ᐱᖁᓐᖏᓛ. 2ᐊᕐᓇᐅᓪᓕ ᐊᑖᑕᖓᑕ ᐅᖃᐅᑎᕚ, “ᐆᒥᓱᓪᓚᑦᑖᕋᓱᒋᓕᓚᐅᕐᐸᒋᑦ ᑖᑦᓱᒥᖓ; ᑍᒤᒻᒪᑦ ᑐᓂᓚᐅᕐᐸᕋ ᐱᖃᑎᖕᓄᑦ. ᓄᑲᖔ ᐱᐅᓂᕐᓴᐅᓐᖏᓛᖅ? ᑖᓐᓇ ᐱᖔᓚᐅᕈᒃ.” 3ᓵᒻᓲᓂᐅᑉ ᐅᖃᐅᑎᕚ, “ᒫᓐᓇ ᐸᓯᔭᒃᓴᐅᓂᐊᓐᖏᓚᖓ ᐱᓕᔅᑍᓂᒥᐅᓄᑦ ᐱᕋᔭᒃᑲᓗᐊᕈᒃᑭᑦ!” 4ᑕᕝᕙᓐᖓᓪᓗ ᓵᒻᓲᓂ ᐊᐅᓪᓚᕐᐳᖅ ᓂᒐᕐᑎᑦᓯᓪᓗᓂᓗ 300ᓂᒃ ᑎᕆᒐᓂᐊᓂᒃ, ᑖᒃᑯᐊ ᓇᒃᓴᕐᐰᑦ ᑎᒍᓯᓪᓗᓂ ᕿᔪᖕᓂᒃ ᓇᓂᕈᐊᓂᒃ, ᑎᕆᒐᓂᐊᓪᓗ ᒪᕐᕉᓈᕐᑎᕐᓗᒋᑦ ᐸᒥᐅᖏᑦ ᕿᓚᒃᓱᕐᐰᑦ, ᐸᒥᐅᖓᑕᓗ ᐊᑯᓐᓂᖏᑎᒍᑦ ᕿᔪᐃᑦ ᕿᓚᒃᓱᕐᓗᒋᑦ. 5ᕿᔪᐃᓪᓗ ᐃᑭᑎᓐᓇᒥᒋᑦ ᑎᕆᒐᓂᐊᑦ ᐊᐅᓪᓚᕐᑎᑉᐰᑦ ᐱᓕᔅᑍᓂᒥᐅᑦ ᓂᐊᖂᔭᒃᓴᖁᑎᖏᓐᓄᑦ ᒪᑭᑕᔪᓄᑦ, ᓂᐊᖂᔭᒃᓮᓪᓗ ᑲᑎᕐᓱᕐᓯᒪᔪᑦ ᒪᑭᑕᔪᓪᓗ ᐃᑯᐊᓪᓚᒃᐳᑦ, ᓇᐹᕐᑐᐃᓪᓗ ᐅᕐᓱᒃᓴᓖᑦ ᐱᖃᓯᐅᑎᓪᓗᒋᑦ. 6ᐱᓕᔅᑍᓂᒥᐅᑦ ᐅᖃᓕᕐᐳᑦ, “ᑭᓇᐅᑉ ᒪᓐᓇ ᐱᓂᐊᕐᓂᖔ?” ᑭᐅᔭᐅᕗᑦ, “ᓵᒻᓲᓂᐅᑉ, ᑎᒻᓁᑎᐅᑉ ᓂᖓᐅᖓᑕ, ᓄᓕᐊᖓ ᑐᓂᓚᐅᕐᒪᒍ ᐱᖃᑎᖓᓄᑦ.” ᑍᒤᒻᒪᑦ ᐱᓕᔅᑍᓂᒥᐅᑦ ᑖᑦᓱᒧᖓ ᐂᕗᑦ ᐊᕐᓇᕐᓗ ᐊᑖᑕᖓᓗ ᐃᑯᐊᓪᓚᒡᓗᒋᑦ. 7ᓵᒻᓲᓂᐅᑉ ᐅᖃᐅᑎᕔᑦ, “ᑍᒤᓕᐅᕈᑦᓯ, ᓴᖑᑎᓐᓂᐊᓐᖏᑕᓐᓂᒃ ᐊᖏᕐᐳᖓ ᐊᑭᒋᐊᓛᕐᐸᑦᓯ, ᑭᖑᓂᐊᒍᓪᓗ ᓄᖅᑲᓛᕐᐳᖓ.” 8ᑍᒤᒻᒪᑦ ᑐᖁᕋᕐᐰᑦ ᓂᑲᒍᓱᒐᓂ ᐅᓄᕐᑐᐊᓗᐃᑦ ᑐᖁᓪᓗᓂᒋᑦ, ᑭᖑᓂᐊᒍᑦ ᕾᕈᓱᖕᒧᐊᕐᐳᖅ ᐄᑖᒻᒦᑦᑐᒧᑦ ᕾᕐᑐᒧᑦ ᑕᕝᕙᓂᓗ ᐃᓂᖃᓕᕐᓗᓂ.
ᓵᒻᓲᓂᐅᑉ ᓵᓚᖃᕐᓂᖓ ᐱᓕᔅᑍᓂᒥᐅᓂᒃ
9ᐱᓕᔅᑍᓂᒥᐅᓪᓗ ᐅᓇᑕᕆᐊᓚᐅᕐᐳᑦ ᑕᑉᐸᐅᖓ ᑕᖕᒫᕐᓗᑎᒡᓗ ᔫᑕᒥ, ᑲᑎᓪᓗᑎᒃ ᐅᓇᑕᕆᐊᕐᐳᑦ ᓕᕼᐃᒥᒃ. 10ᔫᑕᐅᓪᓗ ᐃᓄᖏᑦ ᐅᖃᕐᐳᑦ, “ᖃᓄᐃᒻᒪᑦ ᐅᕙᑦᑎᓐᓂᒃ ᐅᓇᑕᕆᐊᕐᐱᓰ?” ᑖᒃᑯᐊ ᐅᖃᕐᐳᑦ, “ᓵᒻᓲᓂ ᕿᓚᒃᓱᕐᓗᒍ ᑎᒍᔭᕐᑐᕐᐸᕗᑦ, ᐅᕙᑦᑎᓐᓄᑦ ᐱᓂᐊᕐᓂᕆᓚᐅᑕᖓ ᒪᓕᒡᓗᒍ ᐱᓂᐊᕐᕕᒋᔪᒪᒐᑦᑎᒍ.” 11ᑕᕝᕙ ᔫᑕᐅᑉ ᐃᓄᖏᑦ 3,000ᓴᐃᑦ ᐃᑖᒻᒧᑦ ᕾᕐᑐᒧᑦ ᐂᕗᑦ, ᓵᒻᓲᓂᓗ ᐅᖃᐅᑎᓪᓗᒍ, “ᖃᐅᔨᒪᓐᖏᓚᑏᑦ ᐱᓕᔅᑍᓂᒥᐅᓄᑦ ᐊᐅᓚᑕᐅᒐᑦᑖ? ᖃᓄᐃᓕᐅᓚᐅᕐᓃᑦ ᐅᕙᑦᑎᓐᓄᑦ ᑎᑭᒻᒪᑦ?” ᐅᖃᐅᑎᕔᑦ, “ᐅᕙᓐᓄᑦ ᐱᓂᐊᕐᓂᕆᓚᐅᕐᑕᖏᑦ ᒪᓕᒡᓗᒋᑦ ᐱᓂᐊᕐᕕᒋᓚᐅᕐᐸᒃᑲ.” 12ᐅᖃᐅᑎᕚᑦ, “ᐃᓕᖕᓂᒃ ᕿᓚᒃᓱᐃᓗᑕ ᑎᒍᓯᔭᕐᑐᕐᐳᒍᑦ, ᑐᓂᓂᐊᕋᑦᑎᒋᑦ ᐱᓕᔅᑍᓂᒥᐅᓄᑦ.” ᓵᒻᓲᓂᐅᑉ ᐅᖃᐅᑎᕔᑦ, “ᐊᖏᕐᕕᒋᓯᓐᖓ ᐅᕙᓐᓂᒃ ᑐᖁᑦᓯᓂᐊᖏᓐᓂᕋᕐᓗᓯ.” 13ᐅᖃᐅᑎᕚᑦ, “ᑐᖁᓐᓂᐊᓐᖏᓚᑦᑎᒋᑦ ᕿᓚᒃᓱᑐᐃᓐᓇᕐᓂᐊᕐᐸᑦᑎᒋᑦ ᑐᓂᓗᑎᓪᓗ ᑍᒃᑯᓄᖓ, ᐃᓕᖕᓂᒃ ᑐᖁᑦᓯᓂᐊᓐᖏᓚᒍᑦ.” ᑕᕝᕙ ᕿᓚᒃᓱᕐᐹᑦ ᐊᒃᓗᓈᓄᑦ ᓄᑖᓄᑦ ᐊᐅᓪᓚᕈᑎᓪᓗᒍᓗ ᑕᕝᕙᓐᖓᑦ. 14ᓕᕼᐃᒧᐊᕋᒥᒃ ᐱᓕᔅᑍᓂᒥᐅᑦ ᐅᐸᒃᐹᑦ ᕾᒐᓛᕐᓗᑎᒃ; ᑕᕝᕙ ᐊᑕᓂᐅᑉ ᐊᓂᕐᓂᖓᑕ ᐱᔪᓐᓇᕐᓂᕐᔪᐊᖃᕐᓗᓂ ᑎᑭᑉᐹ, ᐊᒃᓗᓈᓪᓗ ᑕᓕᖏᖕᓂ ᕿᓚᒃᓱᕐᓯᒪᔪᑦ ᐃᕕᒃᑎᑐᑦ ᐃᑯᐊᓪᓚᒃᑕᐅᔪᑐᑦ ᑍᒤᓕᕐᐳᑦ, ᕿᓚᕈᑎᖏᑦ ᐊᐅᒃᓗᑎᒃ ᑕᓕᖏᖕᓂ. 15ᓇᓂᓯᕗᖅ ᓯᐅᑎᖅᑯᕐᑐᔫᑉ ᐊᒡᓕᕈᐊᓂᒃ ᓄᑖᕕᓂᕐᒥᒃ, ᑎᒍᕚᓗ ᑐᖁᑦᓯᓪᓗᓂ ᑖᑦᓱᒧᖓ ᐊᖑᑎᓂᒃ 1,000ᓂᒃ. 16ᓵᒻᓲᓂ ᐅᖃᕐᐳᖅ, “ᓯᐅᑎᖅᑯᕐᑐᔫᑉ ᐊᒡᓕᕈᐊᓄᑦ ᖃᓕᕇᑦ ᖃᓕᕇᓕᕐᐳᑦ, ᓯᐅᑎᖅᑯᕐᑐᔫᑉ ᐊᒡᓕᕈᐊᓄᑦ ᑐᖁᑦᓯᕗᖓ ᐊᖑᑎᓂᒃ 1,000ᓂᒃ!” 17ᐅᖃᕇᕋᒥᓗ, ᐊᒡᓕᕈᖅ ᐃᒋᑉᐹ, ᓄᓇᓗ ᑍᔭᐅᓕᕐᐳᖅ ᕌᒪᑎ-ᓕᕼᐃᒥᒃ. 18ᓵᒻᓲᓂᓕ ᐃᒥᕈᖕᓂᕐᒧᑦ ᖀᓕᕐᐳᖅ, ᐊᑕᓂᕐᒧᓪᓗ ᐅᖃᕐᐳᖅ, “ᐊᖏᔪᒥᒃ ᓵᓚᖃᕐᑎᓚᐅᕐᐸᕐᒪ, ᒫᓐᓇᓕ ᑐᖁᓂᐊᓕᕐᐳᖓ ᐃᒥᕈᖕᓂᕐᒧᑦ, ᑐᖁᔪᒃᓴᐅᕗᖔ ᑭᐱᔭᐅᓯᒪᖏᑦᑐᑦ ᐊᒡᒐᖏᓐᓅᑦ?” 19ᒎᑎ ᓄᓇᒥᒃ ᐃᑎᕐᓴᒥᒃ ᖁᐱᓯᕗᖅ ᓖᕼᐃᒥ, ᑕᕝᕙᓐᖓᓪᓗ ᐃᒥᖅ ᑯᕕᓕᕐᐳᖅ, ᐃᒥᕋᒥᓗ ᓄᑭᖃᑦᓯᐊᓕᕐᐳᖅ, ᖃᓄᐃᑦᑐᓐᓃᕐᓗᓂᓗ. ᑖᓐᓇᓗ ᐊᑦᓯᕐᐹ ᐃᓐ-ᕼᐊᑯᐊᕆᒥᒃ, ᓕᕼᐃᒦᑦᑐᖅ ᓱᓕ ᐅᓪᓗᒥᒧᑦ. 20ᓵᒻᓲᓂ ᓯᕗᓕᕐᑎᐅᓚᐅᕐᐳᖅ ᐊᕐᕌᒍᓂᒃ 20ᓂᒃ ᐱᓕᔅᑍᓂᒥᐅᑦ ᐅᓪᓗᖏᓐᓂ.
Currently Selected:
ᐃᓗᐊᕐᓮᔩᑦ ᐊᒡᓚᖏᑦ 15: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
