ᐃᓗᐊᕐᓮᔩᑦ ᐊᒡᓚᖏᑦ 1
1
ᔫᑕᐅᑉ ᓯᒥᐅᓂᐅᓪᓗ ᑭᖑᕚᖏᑕ ᓵᓚᖃᕐᓂᖏᑦ ᐊᑐᓁ-ᐱᔨᒃᒥᒃ
1ᔮᓱᐊᑉ ᑐᖁᓂᖓᑕ ᑭᖑᓂᐊᒍᑦ ᐃᓴᕆᐊᓕᒥᐅᑦ ᐃᓄᖏᑦ ᐊᐱᕆᓕᕐᐳᑦ ᐊᑕᓂᕐᒧᑦ, “ᐃᓴᕆᐊᓕᐅᑉ ᑭᖑᕚᕇᖏᓐᓂᑦ ᓇᓪᓕᐊᑦ ᓯᕗᓪᓕᕐᐸᐅᓗᑎᒃ ᐅᓇᑕᕆᐊᕐᑐᒃᓴᐅᕚᑦ ᑬᓇᓂᒥᐅᓂᒃ, ᐅᕙᑦᑎᓐᓂᒃ ᐱᑦᔪᑦᔨᓗᑎᒃ?”
2ᐊᑕᓂᐅᑉ ᑭᐅᕔᑦ, “ᔫᑕᐅᑉ ᑭᖑᕚᖏᑦ ᓯᕗᓪᓕᕐᐸᐅᔪᒃᓴᐅᕗᑦ. ᓄᓇ ᑐᓂᔭᕇᕋᒃᑯ ᑖᒃᑯᓄᖓ.”
3ᔫᑕᒃᑯᑦ ᐅᖃᕐᐳᑦ ᓯᒥᐅᓂᒃᑯᓐᓄᑦ, “ᐱᖃᑎᒋᓚᐅᕐᑎᒍᑦ ᓄᓇᒧᑦ ᓇᓚᐅᑦᑖᕈᑎᒃᑯᑦ ᕾᑕᐅᔪᒧᑦ, ᑲᑐᑦᔨᓗᑕ ᐅᓇᑕᕐᓂᐊᕋᑦᑕ ᑬᓇᓂᒥᐅᓂᒃ; ᐅᕙᒍᑦᑕᐅᖅ ᐱᖃᑎᒋᓂᐊᕆᕙᑦᑎᒋᑦ ᓄᓇᒧᑦ ᑐᓂᔭᐅᔪᒥᒃ ᐃᓕᑦᓯᓐᓄᑦ.” ᑍᒤᒻᒪᑦ ᓯᒥᐅᓂᒃᑯᑦ ᐱᖃᑕᐅᓕᓚᐅᕐᐳᑦ. 4ᔫᑕᒃᑯᓪᓗ ᐅᓇᑕᕆᐊᓚᐅᕐᐳᑦ ᑲᑐᑦᔨᓪᓗᑎᒃ. ᐊᑕᓂᐅᑉ ᓵᓚᖃᕐᑎᓚᐅᕐᐰᑦ ᑬᓇᓂᒥᐅᓂᒃ ᐱᕆᔧᑎᒥᐅᓂᒡᓗ; ᓵᓚᖃᓚᐅᕐᐳᑦ 10,000ᓂᒃ ᓄᓇᒥ ᐲᔨᒃᒥ. 5ᑕᕝᕙᓂᓗ ᑲᑎᓯᕗᑦ ᐊᑐᓁ-ᐱᔨᒃᒥᒃ ᓄᓇᒥ ᐲᔨᒃᒥ, ᐅᓇᑕᓕᕐᐰᓪᓗ; ᓵᓚᒋᓪᓗᒋᓪᓗ ᑬᓇᓂᒥᐅᑦ ᐱᕆᔧᑎᒥᐅᓪᓗ. 6ᑕᕝᕙ ᐊᑐᓁ-ᐱᔨᒃ ᕿᒪᒃᓯᕗᖅ, ᒪᓕᒃᑲᒥᑦᔪᒃ ᐊᖑᒐᒥᑦᔪᒡᓗ, ᑯᓪᓗᖏᒃ ᐳᑐᒍᖏᒡᓗ ᓇᑲᑉᐰᑦ. 7ᐊᑐᓁ-ᐱᔨᒃᓗ ᐅᖃᕐᐳᖅ, “ᐊᖓᔪᖅᑳᕐᔪᐊᑦ 70 ᑯᓪᓗᖏᑦ ᐳᑐᒍᖏᓪᓗ ᓇᑲᓯᒪᔪᑦ ᐳᑯᖃᑦᑕᓚᐅᕐᐳᑦ ᑲᑕᒐᕐᓂᕐᓗᑯᓂᒃ ᓂᕆᕕᖕᒪ ᐊᑖᓂᑦ ᓂᕆᓂᕐᓗᑯᓂᒃ. ᑍᒤᒻᒪᑦ ᒎᑎᐅᑉ ᐱᓂᐊᕐᓂᕕᓂᓐᓄᑦ ᑍᒃᑯᓄᖓ ᐊᑭᓂᐊᕐᕕᒋᕚᖓ.” ᑕᕝᕙ ᔨᕉᓴᓕᒧᐊᕈᑎᕚᑦ, ᑕᕝᕙᓂᓗ ᑐᖁᕗᖅ.
ᔫᑕᐅᑉ ᑭᖑᕚᖏᑕ ᓴᓚᖃᕐᓂᖏᑦ ᔨᕉᓴᓕᒥᒃ ᕼᐃᐸᕋᒻᒥᒡᓗ
8ᔫᑕᐅᑉ ᐃᓄᖏᑦ ᐅᓇᑕᕆᐊᓚᐅᕐᐳᑦ ᔨᕉᓴᓕᒧᑦ, ᓵᓚᒋᓪᓗᒍᓗ. ᐃᓄᖏᓪᓗ ᑐᖁᓪᓗᒋᑦ, ᐃᒡᓗᒐᓴᖏᓪᓗ ᐃᑯᐊᓪᓚᒃᐰᑦ. 9ᑕᒪᑐᒪ ᑭᖑᕐᖓᒍᑦ ᔫᑕᒥᐅᑦ ᐅᓇᑕᕆᐊᓚᐅᕐᐳᑦ ᑬᓇᓂᒥᐅᓂᒃ ᓄᓇᖃᕐᑐᓂᒃ ᖃᖅᑲᓕᖕᒥ, ᖃᖅᑬᓪᓗ ᑭᒡᓕᖏᓐᓂ, ᓇᑎᕐᓇᒥᓗ ᓄᓇᒥ ᓯᕿᓂᐅᑉ ᓇᓛᓃᑦᑐᓂ ᓂᒋᑉᒥ. 10ᔫᑕᒥᐅᓪᓗ ᑲᔪᓯᓚᐅᕐᐳᑦ ᑬᓇᓂᒥᐅᓄᑦ ᓄᓇᓕᖕᓄᑦ ᐃᒡᓗᒐᓴᖕᓄᑦ ᕼᐃᐸᕋᓐᒥᑦ, ᓯᕗᓂᖓᒍᑦ ᑍᔭᐅᓚᐅᕐᑑᒐᓗᐊᖅ ᑭᕆᐊᑦ-ᐊᕋᐸᒥᒃ, ᓵᓚᒋᓚᐅᕐᐰᓪᓗ ᐃᓚᒌᑦ ᓯᓮᒃᑯᑦ, ᐊᕼᐂᒪᓐᑯᑦ, ᑕᓪᒤᒃᑯᓪᓗ.
ᐆᑦᓂᐅᓕᐅᑉ ᓵᓚᖃᕐᓂᖓ ᐃᒡᓗᒐᓴᖕᓂᒃ ᑎᐳᕐᒥᐅᓂᒃ
ᔮᓱᐊ 15:13-19
11ᑕᕝᕙᓐᖓᑦ ᔫᑕᐅᑉ ᑭᖑᕚᖏᑦ ᐅᓇᑕᕆᐊᓚᐅᕐᐳᑦ ᐃᒡᓗᒐᓴᖕᓄᑦ ᑎᐱᕆᒧᑦ, ᑍᑦᓱᒪᓂ ᑍᔭᐅᓚᐅᕐᑐᖅ ᑭᕆᐊᑦ-ᓯᐱᕆᒥᒃ. 12ᐃᓚᖓᑦ, ᑬᓚᐱ, ᐅᖃᕐᐳᖅ, “ᐸᓂᒐ ᐋᒃᓵ ᐂᑦᑑᑎᒋᓂᐊᕐᐸᕋ ᑲᑎᑎᑕᐅᖁᓪᓗᒍ ᐊᖑᒻᒧᑦ ᓵᓚᖃᕐᑐᒧᑦ ᑭᕆᐊᑦ-ᓯᐱᕆᒥᒃ.” 13ᐅᑎᓂ-ᐅᓕ, ᑬᓚᐱᐅᑉ ᓄᑲᖓᑕ ᑮᓇᑦᔨᐅᑉ ᐃᕐᓂᖓ, ᓵᓚᖃᓚᐅᕐᐳᖅ ᐃᒡᓗᒐᓴᖕᓂᒃ, ᑍᒤᒻᒪᑦ ᑬᓚᐱᐅᑉ ᐸᓂᓂ ᐋᒃᓵ ᑐᓂᓚᐅᕐᐸ ᑖᑦᓱᒧᖓ ᑲᑎᑎᑕᐅᖁᓪᓗᒍ. 14ᑲᑎᑎᑕᐅᕕᐊᑕᓗ ᐅᓪᓗᖓᓂ ᐊᕐᓇᐅᑉ ᐊᖑᑦ ᕿᓄᖁᓕᕐᐹ ᐊᑖᑕᒥᓂᑦ ᐱᕈᕐᓰᕕᖕᒥᒃ ᑐᒃᓯᕋᖁᓪᓗᒍ. ᑎᑭᓐᓇᒥᓕ ᐊᕐᓇᖅ ᓯᐅᑎᖅᑯᕐᑐᔪᒥᑦ ᐊᖅᑲᕐᒪᑦ, ᑬᓚᐱᐅᑉ ᐊᐱᕆᕚ ᓱᓇᒥᒃ ᐱᔪᒪᔭᖃᕐᒪᖔᑦ. 15ᐸᓂᖓᑕ ᑭᐅᕚ, “ᐳᐂᓚᕕᓕᖕᒥᒃ ᐱᑎᑕᐅᔪᒪᕗᖓ, ᓄᓇ ᕾᓚᐅᕐᑍᑦ ᓂᒋᑉ ᐸᓂᕐᑐᒦᒻᒪᑦ.” ᑍᒤᒻᒪᑦ ᑬᓚᐱᐅᑉ ᑐᓂᓚᐅᕐᐹ ᑰᖃᕐᑐᓂᒃ ᖁᑦᓯᖕᓂᕐᓴᒥ ᐊᒃᐸᓯᖕᓂᕐᓴᒥᓗ ᑰᖃᕐᑐᒥᒃ.
ᑭᖑᕚᕇᑦ ᔫᑕᒃᑯᒃ ᐱᓐᔭᒥᓂᑯᓪᓗ ᓵᓚᖃᕐᓂᖏᑦ
16ᒨᓯᓯᐅᑉ ᓴᑭᖓᑕ, ᑭᓁᑎᐅᑉ, ᑭᖑᕚᖏᑦ ᐊᐅᓪᓚᕐᐳᑦ ᔫᑕᐅᑉ ᑭᖑᕚᖏᓐᓂᒃ ᐃᓚᖃᕐᓗᑎᒃ, ᐃᒡᓗᒐᓴᖕᓂᑦ ᓇᐹᕐᑐᓕᖕᒥᑦ ᐹᒥᓂᒃ. ᓂᒋᑉᒧᑦ ᐊᕌᑎᐅᑉ ᖃᓂᒋᔮᓃᑦᑐᒧᑦ. ᑍᑲᓂᓗ ᓄᓇᖃᑎᖃᓕᕐᓗᑎᒃ ᐃᓄᖏᓐᓂᒃ. 17ᔫᑕᐅᑉ ᑭᖑᕚᖏᑦ ᐃᓚᖃᕐᓗᑎᒃ ᓯᒥᐅᓂᐅᑉ ᑭᖑᕚᖏᓐᓂᒃ, ᑲᑐᑦᔨᓪᓗᑎᒃ ᓵᓚᖃᕐᐳᑦ ᑬᓇᓂᒥᐅᓂᒃ ᓄᓇᖃᕐᑐᓂᒃ ᐃᒡᓗᒐᓴᖕᓂᒃ ᔨᐸᑎᒥ. ᒪᑭᓐᓂᐊᕈᓐᓃᕐᓗᑎᒡᓗ ᓵᓚᒋᕔᑦ, ᐃᒡᓗᒐᓮᓪᓗ ᑍᔭᐅᓕᕐᐳᑦ ᕼᐅᕐᒪᒥᒃ.#1:17 ᕼᐅᕐᒪ ᑐᑭᓕᒃ ᐊᓯᕈᕐᓂᕐᒥᒃ 18ᔫᑕᐅᑉ ᑭᖑᕚᖏᑦ ᓵᓚᖃᓚᐅᕆᕗᑦ ᓄᓇᒥᒃ ᒑᓴᒥᒃ ᖃᓂᒋᔭᖓᓃᑦᑐᓕᒫᓂᒡᓗ, ᓄᓇᒥᒡᓗ ᐊᓯᑭᓗᓂᒥᒃ ᖃᓂᒋᔭᓕᒫᖏᓐᓂᒡᓗ, ᐃᑯᕋᓂᒥᒡᓗ ᖃᓂᒋᔭᓕᒫᖏᓪᓗ. 19ᐊᑕᓂᐅᑉ ᐃᓚᒋᓚᐅᕐᐰᑦ ᔫᑕᐅᑉ ᑭᖑᕚᖏᑦ. ᓄᓇᑖᕐᓗᑎᒡᓗ ᖃᖅᑲᓕᖕᒥᒃ, ᑭᓯᐊᓂᓕ ᓯᖏᑦᓯᔪᓐᓇᓚᐅᓐᖏᓚᑦ ᐃᓄᖕᓂᒃ ᒪᓂᕋᕐᒦᑦᑐᓂᒃ ᕿᒧᒃᓯᐅᑎᓄᑦ ᑲᓕᒐᖃᓚᐅᕐᒪᑕ ᐊᒃᓴᓗᐊᓕᖕᓂᒃ ᓴᕕᕋᔭᖕᓂᒃ. 20#ᔮᓱᐊ 15:13,14.ᒨᓯᓯᐅᑉ ᐱᖁᔨᓂᕆᓚᐅᕐᑕᖓ ᒪᓕᒡᓗᒍ ᕼᐃᐸᕋᓐ ᑐᓂᔭᐅᓚᐅᕐᐳᖅ ᑬᓚᐱᒧᑦ, ᓵᓚᖃᓚᐅᕐᒪᑦ ᐊᐅᓪᓚᕐᑎᑦᓯᓪᓗᓂ ᐱᖓᓱᐃᓂᒃ ᐃᓚᒌᓂᒃ ᐊᓇᑭᐅᑉ ᑭᖑᕚᖏᓐᓂᒃ. 21#ᔮᓱᐊ 15:63; ᓴᒧᐃᓕ ᐂᑉᐸᖏᑦ 5:6; ᑯᕉᓂᑲ ᓯᕗᓪᓖᑦ 11:4.ᐱᓐᔭᒥᓂᐅᓪᓕ ᑭᖑᕚᖏᑕ ᓵᓚᒋᓚᐅᓐᖏᓔᑦ ᔨᐳᓮᑎᑦ ᓄᓇᖃᕐᑐᑦ ᔨᕉᓴᓕᒥ, ᔨᐳᓮᑎᓪᓗ ᓄᓇᖃᖃᑕᐅᕗᑦ ᐱᓐᔭᒥᓂᐅᑉ ᑭᖑᕚᖏᓐᓂ ᐅᓪᓗᒥᒧᑦ.
ᔫᓯᐱᐅᑉ ᑭᖑᕚᖏᑕ ᓵᓚᖃᕐᓂᖓ ᐱᑎᐃᓪᒥᒃ
22ᔫᓯᐱᐅᑉ ᑭᖑᕚᖏᑦ ᐅᓇᑕᕆᐊᓚᐅᕆᕗᑦ ᐃᒡᓗᒐᓴᖕᓂᒃ ᐱᑎᓕᒥᒃ, ᐊᑕᓂᐅᓪᓗ ᐃᓚᒋᓚᐅᕐᐰᑦ. 23ᔫᓯᐱᐅᑉ ᑭᖑᕚᖏᑕ ᐃᔨᕋᕐᑐᕐᓗᑎᒃ ᐃᒡᓗᒐᓮᑦ ᐱᑎᓕ ᕿᒥᕐᕈᔭᕐᑐᕐᐰᑦ. (ᑍᑦᓱᒪᓂ ᑍᔭᐅᓚᐅᕐᐳᑦ ᓚᔾᒥᒃ.) 24ᑖᒃᑯᐊᓗ ᑕᑯᔭᕐᑐᕐᓯᒪᔪᑦ ᐊᖑᒻᒥᒃ ᐃᒡᓗᒐᓴᖕᓂᑦ ᐊᓂᓕᕐᑐᒥᒃ ᑕᑯᒐᒥᒃ ᐅᖃᐅᑎᕚᑦ, “ᖃᐅᔨᑎᓚᐅᕐᑎᒍᑦ ᖃᓄᖅ ᐃᒡᓗᒐᓴᖕᓄᐊᕈᓐᓇᕐᒪᖔᑦᑕ, ᑕᕝᕙ ᐱᑦᓯᐊᕐᕕᒋᓂᐊᕐᐸᑦᑎᒋᑦ.” 25ᑕᕝᕙ ᖃᐅᔨᑎᑉᐰᑦ ᐃᒡᓗᒐᓴᖕᓄᑦ ᐃᑎᕐᑕᕐᕕᖓᓂᒃ, ᐃᑎᕋᒥᒃ ᐃᓄᖏᑦ ᓴᕕᒡᔪᐊᒧᑦ ᑐᖁᑉᐰᑦ ᐃᒡᓗᒐᓴᖕᓃᑦᑐᓕᒫᑦ, ᑭᓯᐊᓂᓕ ᑖᓐᓇ ᐊᖑᑦ ᐃᓚᓕᒪᖏᓪᓗ ᖃᓄᐃᓕᓇᒋᑦ. 26ᑖᓐᓇᓗ ᐊᖑᑦ ᕼᐃᑍᑏᑦ ᓄᓇᖓᓄᐊᓚᐅᕐᐳᖅ, ᐃᒡᓗᒐᓴᓕᐅᕐᓗᓂᓗ ᑍᑲᓂ, ᐊᑦᓯᕐᓗᒍᓗ ᓚᔾᒥᒃ, ᓱᓕ ᐊᑎᕆᕚ ᐅᓪᓗᒥᒧᑦ.
ᐃᓄᐃᑦ ᕿᒫᑎᑕᐅᓚᐅᖏᑦᑐᑦ ᐃᓴᕆᐊᓕᒥᐅᓄᑦ
27 #
ᔮᓱᐊ 17:11-13. ᒫᓇᓯᐅᑉ ᑭᖑᕚᖏᑕ ᕿᒫᑎᓚᐅᓐᖏᑕᖏᑦ ᐃᓄᐃᑦ ᐅᑯᓇᓂ ᐃᒡᓗᒐᓴᖕᓃᑦᑐᑦ, ᐱᑦ-ᓰᓐ, ᓄᓇᓕᐊᕐᔪᖁᑎᖏᓪᓗ, ᑖᓇᒃ ᓄᓇᓕᐊᕐᔪᖁᑎᖏᓪᓗ, ᑐᐊᕆ ᓄᓇᓕᐊᕐᔪᖁᑎᖏᓪᓗ, ᐃᑉᓖᒻ, ᒥᒌᑐ ᓄᓇᓖᓪᓗ ᖃᓂᒋᔭᖓᓃᑦᑐᑦ; ᑬᓇᓂᒥᐅᓪᓕ ᑕᒫᓂ ᓄᓇᖃᖃᑕᐅᔪᒪᓚᐅᕐᐳᑦ. 28ᐃᓴᕆᐊᓕᒥᐅᑦ ᓱᖑᓯᕙᓪᓕᐊᒐᒥᒃ, ᑬᓇᓂᒥᐅᑦ ᐱᓇᓱᐊᕐᑎᓕᓚᐅᕐᐰᑦ ᖁᓄᒐᓗᐊᕐᑎᓪᓗᒋᑦ, ᑭᓯᐊᓂᓕ ᐊᑕᖏᕐᓗᒋᑦ ᐊᐅᓪᓚᕐᑎᓚᐅᓐᖏᓔᑦ.
29 #
ᔮᓱᐊ 16:10. ᐃᕗᕅᒥᐅᑦ ᑭᖑᕚᖏᑕ ᕿᒫᑎᓪᓗᒋᑦ ᐊᐅᓪᓚᕐᑎᓚᐅᓐᖏᑕᖏᑦ ᑬᓇᓂᒥᐅᑦ ᓄᓇᓖᑦ ᐃᒡᓗᒐᓴᖕᓂ ᒋᔨᕆᒥ, ᑬᓇᓁᒥᐅᓪᓕ ᓄᓇᖃᖃᑕᐅᓚᐅᕐᐳᑦ ᑖᒃᑯᓇᓂ.
30ᓯᐳᓗᓂᐅᑉ ᑭᖑᕚᖏᑕ ᕿᒫᑎᓪᓗᒋᑦ ᐊᐅᓪᓚᕐᑎᓚᐅᓐᖏᑕᖏᑦ ᐃᓄᐃᑦ ᓄᓇᓖᑦ ᐃᒡᓗᒐᓴᖕᓂ ᑭᑦᕋᓐᒥ ᓇᕼᐊᓚᐅᓪᒥᓗ, ᑍᒤᒻᒪᑦ ᑬᓇᓂᒥᐅᑦ ᓄᓇᖃᖃᑕᐅᕗᑦ ᑖᒃᑯᓇᓂ ᐱᓇᓱᐊᕐᑎᒋᔭᐅᓪᓗᑎᒡᓗ ᐱᔪᒪᓐᖏᒐᓗᐊᕐᑎᓪᓗᒋᑦ.
31ᐋᓱᕆᐅᑉ ᑭᖑᕚᖏᑕ ᕿᒫᑎᓪᓗᒋᑦ ᐊᐅᓪᓚᕐᑎᓚᐅᓐᖏᑕᖏᑦ ᐃᓄᐃᑦ ᐃᒡᓗᒐᓴᖕᓂ ᐅᑯᓇᓂ, ᐊᒃᑯᒥ ᓄᓇᖃᕐᑐᑦ, ᓮᑐᓂᒥᓗ ᓄᓇᖃᕐᑐᑦ, ᐊᕼᐊᓚᑉᒥᓗ ᓄᓇᖃᕐᑐᑦ, ᐊᑲᔨᑉᒥᓗ ᓄᓇᖃᕐᑐᑦ, ᕼᐃᓪᐸᒥᓗ ᓄᓇᖃᕐᑐᑦ, ᐋᐱᒃᒥᓗ ᓄᓇᖃᕐᑐᑦ, ᕅᕼᐊᑉᒥᓗ ᓄᓇᖃᕐᑐᑦ. 32ᐊᓯᕆᐅᓪᓕ ᑭᖑᕚᖏᑦ ᓄᓇᖃᑎᖃᓚᐅᕐᐳᑦ ᑬᓇᓂᒥᐅᓂᒃ, ᑕᒫᓂ ᓄᓇᖃᕐᑐᑐᖃᕐᓂᒃ ᕿᒫᑎᓪᓗᒋᑦ ᐊᐅᓪᓚᕐᑎᓚᐅᓐᖏᓐᓇᒥᑦᔪᒃ.
33ᓈᑉᑕᓕᐅᑉ ᑭᖑᕚᖏᑕ ᕿᒫᑎᓪᓗᒋᑦ ᐊᐅᓪᓚᕐᑎᓚᐅᓐᖏᑕᖏᑦ ᐃᒡᓗᒐᓴᖕᓃᑦᑐ ᐅᑯᓇᓂ ᐱᑦ-ᓯᒥᔅᒥ ᓄᓇᖃᕐᑐᑦ, ᐱᑦ-ᐊᓇᑕᒥᓗ ᓄᓇᖃᕐᑐᑦ ᓄᓇᖃᖃᑎᖃᓚᐅᕐᐳᓪᓕ ᑬᓇᓂᒥᐅᓂᒃ, ᐱᓇᓱᐊᕐᑎᓪᓗᒋᓪᓗ ᐱᔪᒪᓐᖏᒐᓗᐊᕐᑎᓪᓗᒋᑦ.
34ᐊᒧᕅᑎᓪᓕ ᕿᒫᑎᓪᓗᒋᑦ ᐊᐅᓪᓚᕐᑎᑦᓯᓚᐅᕐᐳᑦ ᑖᓐ ᑭᖑᕚᖏᓐᓂᒃ ᓄᓇᒧᑦ ᖃᖅᑲᓕᖕᓄᑦ, ᓄᓇᒧᑦ ᐱᔪᓐᓇᕐᑎᓚᐅᖏᓐᓇᒥᑦᔪᒃ. 35ᐊᒧᕅᑎᓪᓕ ᓄᓇᕾᓐᓇᕈᒪᓚᐅᕐᐳᑦ ᕼᐊᕐ-ᕼᐃᕆᓯᒥ, ᐂᔭᓚᓐᒥᓗ ᓵ-ᐊᓪᐱᒻᒥᓗ, ᑭᓯᐊᓂᓕ ᔫᓯᐱᐅᑉ ᑭᖑᕚᖏᑕ ᐊᒃᓱᕉᑎᓚᐅᕐᐰᑦ. ᐱᔨᑖᕆᓪᓗᒋᓪᓗ ᐱᔪᒪᓐᖏᒐᓗᐊᕐᑎᓪᓗᒋᑦ.
36ᐊᒧᕅᑎᑦ ᓄᓇᖁᑎᖓ ᐱᒋᐊᕐᓂᖃᓚᐅᕐᐳᖅ ᐊᒃᕋᐱᒻ ᓯᕕᖓᓂᖓᓂᑦ ᓄᓇᒥᑦ ᓯᓚᒥᑦ ᖁᒻᒧᐊᖓᓪᓗᓂ ᓯᕕᖓᓂᖓᓄᑦ.
Currently Selected:
ᐃᓗᐊᕐᓮᔩᑦ ᐊᒡᓚᖏᑦ 1: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
