ᔧᒥᓯᐅᑉ ᐊᒡᓚᖏᑦ 5
5
ᐊᔪᕐᓴᖏᓐᓂᐅᑉ ᐅᓗᕆᐊᓇᕐᓂᖓ
1ᐃᓕᑦᓯ ᒫᓐᓇ ᐊᔪᕐᓴᖏᑦᑐᐊᓘᔪᓯ, ᕿᐊᓗᓯᓗ ᓂᓪᓕᐊᓕᕆᑦᓯ ᐅᒡᒍᐊᕐᓇᕐᑐᒧᑦ ᑎᑭᑕᐅᓕᕋᑦᓯ. 2#ᒫᑎᐅᓯ 6:19.ᐊᔪᕐᓴᓐᖏᑦᔪᑎᓯ ᐊᐅᓂᐅᓕᕐᐳᑦ ᐊᓐᓄᕌᓯᓗ ᖁᐱᕐᕈᓄᑦ ᖃᓪᓗᓈᕐᑕᕐᑐᓲᓄᑦ ᓂᕆᔭᐅᓯᒪᓕᕐᓗᑎᒃ. 3ᒎᓗᓯ ᓯᐅᓪᕕᕆᓯᓗ ᒪᓐᖏᕐᑐᕆᕗᑦ, ᒪᓐᖏᕐᑐᕆᓂᖏᓪᓗ ᓇᓗᓁᒃᑯᑕᐅᓂᐊᕐᐳᑦ ᐱᒋᐊᕐᑕᐅᑦᔪᑎᒃᓴᑦᓯᓐᓄᑦ ᑎᒥᓯᓗ ᓂᕆᔭᐅᔪᒫᕐᐳᖅ ᐃᑯᒪᐅᑉ ᓄᖒᑦᓯᓂᖓᑐᑦ. ᑕᒪᑦᔭ ᑲᑎᕐᓱᕐᓯᒪᔭᓯ ᐊᔪᕐᓴᖏᑦᔪᑎᒋᓯᒋᒃ ᐅᓪᓗᐃᑦ ᑭᖑᓪᓕᖏᓐᓂ. 4#ᒨᓯᓯ ᑕᓪᓕᒪᖏᑦ 24:14,15.ᑕᑯᒋᑦ, ᐱᓇᓱᐊᕐᑐᑦ ᐱᕈᕐᓰᕕᖁᑎᑦᓯᓐᓂ ᐱᕈᕐᑐᓂᒃ ᓇᑲᑎᕆᔪᑦ ᐊᑭᓕᓚᐅᓐᖏᓚᓯ ᑮᓇᐅᔭᒃᓴᖏᓐᓂᒃ, ᓯᓔᕐᕆᒃᓯᓂᒃᑯᑦ, ᓈᒻᒪᒃᓴᕈᓐᓃᕐᓗᑎᒃ ᓂᓪᓕᐊᓂᖏᑦ ᑐᓴᓕᕐᓯᐅᒃ; ᐱᕈᕐᓰᕕᖁᑎᑦᓯᓐᓂ ᓇᑲᑎᕆᔪᑦ ᓂᓪᓕᐊᓂᖏᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᑐᓵᓕᕐᐰᑦ. 5ᒫᓂ ᓄᓇᒥ ᐊᔪᕐᓴᖏᑦᑐᐊᓘᓪᓗᓯ ᖁᕕᐊᓱᑐᐃᓐᓇᕋᓱᐊᕐᓗᓯᓗ ᐃᓅᓚᐅᕐᐳᓯ; ᐃᓕᑦᓯᓐᓂᒃ ᖁᐃᓂᔪᓐᖑᕐᑎᑉᐳᓯ ᐅᓪᓗᒧᑦ ᑐᖁᑕᐅᓂᒃᓴᑦᓯᓐᓄᑦ. 6ᑐᖁᑕᒃᓴᓐᖑᕐᑎᑦᓯᓚᐅᕐᐳᓯ, ᐸᓯᔭᒃᓴᐅᖏᑦᑐᓂᒃ ᑐᖁᖢᒋᓪᓗ; ᑖᒃᑯᐊᓗ ᐊᑭᕋᕐᑐᓚᐅᓐᖏᓛᓯ.
ᕿᓄᐃᓵᕐᓂᖅ ᑐᒃᓯᐊᕐᓂᕐᓗ
7ᑍᒤᒻᒪᑦ ᐅᒃᐱᖃᑎᒃᑲ, ᕿᓄᐃᓵᕆᑦᓯ ᐊᑕᓂᖅ ᑎᑭᑦᓯᐊᕆᓗᒍ. ᑕᑯᒋᑦ ᐱᕈᕐᓰᕕᓕᕆᔨᐅᑉ ᕿᓄᐃᓵᕐᓗᓂ ᐱᕈᕐᑐᐃᑦ ᑕᑯᒥᓇᕐᑐᑦ ᐱᕈᕐᓯᐊᕆᕔᑦ, ᕿᓄᐃᓵᕐᓗᓂ ᐅᑕᖅᑭᕗᖅ ᐅᐱᕐᖔᒃᑯᑦ ᐅᑭᐊᒃᓵᒃᑯᓪᓗ ᓯᓚᓗᖕᓂᐅᕙᒃᑐᓂᒃ. 8ᐃᓕᑦᓯᑦᑕᐅᖅ ᕿᓄᐃᓵᕐᑐᒃᓴᐅᕗᓯ. ᓂᕆᐅᖕᓂᖃᕐᓗᓯ ᐆᒻᒪᑎᑦᓯᒍᑦ ᐊᑕᓂᐅᑉ ᑎᑭᕝᕕᒃᓴᖓ ᖃᓂᑦᑑᓕᕐᒪᑦ.
9ᓈᒻᒪᒃᓴᖏᓐᓂᕐᒧᑦ ᐅᖃᕐᓂᕐᓗᖃᑦᑕᐅᑎᓂᐊᕋᓯ ᐃᓚᑦᓯᓐᓄᑦ ᐅᒃᐱᕐᑑᖃᑎᒌᑦ, ᐃᖅᑲᕐᑐᕐᑕᐅᖁᓇᓯ; ᑕᑯᒋᑦ, ᐃᖅᑲᕐᑐᐃᔨ ᖃᒡᓕᕗᖅ ᐅᒃᑯᐊᒦᓕᕐᓗᓂ. 10ᐅᒃᐱᕐᑑᖃᑎᒃᑲ, ᓇᓚᐅᑦᑍᔫᓚᐅᕐᑐᑦ ᐃᖅᑲᐅᒪᓚᐅᕐᓯᐅᒃ ᐊᑕᓂᐅᑉ ᐊᑎᖓᓂ ᐅᖃᕐᐸᓚᐅᕐᑐᑦ, ᐊᒃᓱᕈᕐᓇᕐᑐᒦᑎᑕᐅᓂᕐᒥᖕᓂ ᕿᓄᐃᓵᕈᑎᖃᕐᓗᑎᒃ ᐊᓂᒍᐃᕙᓚᐅᕐᑐᑦ. 11#ᔫᐱ 1:21,22; 2:10; ᐃᓐᖏᕈᑦ 103:8.ᑕᑯᒋᑦ, ᓮᒪᓇᕐᑐᒥᒃ ᐃᓅᓯᖃᓚᐅᕐᓂᕋᕐᐸᕗᑦ ᕿᓄᐃᓵᓚᐅᕐᓂᖏᓐᓄᑦ. ᑐᓴᐅᒪᕙᓯ ᔫᐱᐅᑉ ᕿᓄᐃᓵᕐᓂᕆᓚᐅᕐᑕᖓ, ᑭᖑᓂᖓᒍᓪᓗ ᐊᑕᓂᕐᒧᑦ ᑐᓂᓯᕕᐅᓚᐅᕐᓂᖓ, ᐊᑕᓂᖅ ᓇᓪᓕᒍᓱᒃᔪᐊᕐᒪᑦ ᓂᑲᒍᓱᖕᓂᕐᔪᐊᖃᕐᓗᓂᓗ.
12 #
ᒫᑎᐅᓯ 5:34-37. ᐊᖏᓂᕐᐹᒥᒡᓕ ᐅᒃᐱᕐᑑᖃᑎᒃᑲ, ᐊᖏᕈᑎᖃᕌᖓᑦᓯ ᓱᓕᒃᑲᓐᓂᕈᑎᖃᕋᓱᒡᓗᓯ ᐅᖃᕕᒃᑐᒃᓴᐅᓐᖏᓚᓯ ᕿᓚᖕᒥᑦ ᓄᓇᒥᓪᓗ ᑍᓯᖃᓯᐅᑦᔨᓗᓯ, ᐅᕝᕙᓘᓐᓃᑦ ᐊᓯᖏᓐᓄᑦ, ᐃᒫᒡᓕ ᐅᖃᕐᐸᒋᑦᓯ; ᐊᖏᕈᑎᖃᕐᓗᓯ ᓱᓕᓗᑎᑦ ᐊᖏᕈᕕᑦ ᐊᖏᖏᓪᓗᑎᓪᓗ ᓱᓕᓗᑎᑦ ᐊᖏᖏᒃᑯᕕᑦ, ᐃᖅᑲᕐᑐᕐᑕᐅᑦᔪᑎᒃᓴᖃᖁᓇᓯ.
13ᐃᓚᓯ ᐃᓗᐊᖏᑦᔪᑎᖃᕐᐹ? ᑖᓐᓇ ᑐᒃᓯᐊᕐᓕ. ᐃᓚᓯ ᖁᕕᐊᓱᒃᐹ? ᑖᓐᓇ ᐃᓐᖏᕐᓕ ᓂᕐᑐᐃᓗᓂ. 14#ᒫᑯᓯ 6:13.ᐃᓚᑦᓯᓐᓂᑦ ᖃᓂᒪᔪᖃᕐᐹ? ᑖᓐᓇ ᐅᒃᐱᕐᑑᖃᑎᒌᑦ ᐊᖓᔪᖅᑳᖏᓐᓂᒃ ᕾᖁᔨᓕ, ᑖᒃᑯᓄᖓ ᑐᒃᓯᐅᑦᔭᐅᖁᓪᓗᒍ, ᐸᐅᕐᖎᓪᓗ ᐅᕐᓱᖓᓄᑦ ᐅᕐᓱᕐᑎᕐᓗᒍ ᐊᑕᓂᐅᑉ ᐊᑎᖓᓂ; 15ᑐᒃᓯᐊᕐᓂᐅᓪᓗ ᐅᒃᐱᕐᓂᒃᑰᕐᑐᑉ ᖃᓂᒪᔪᖅ ᐋᖅᑭᖕᓂᐊᕐᐹ, ᐊᑕᓂᐅᓪᓗ ᒪᑭᑎᓗᒍ; ᐊᔪᕐᑐᓕᓯᒪᒃᐸᓪᓗ, ᐃᓱᒪᒋᔪᓐᓁᕐᕕᐅᓂᐊᕐᐳᖅ. 16ᑍᒤᒻᒪᑦ ᐊᔪᕐᓂᑦᓯᓐᓂᒃ ᖃᕿᐊᓕᖃᑦᑕᐅᑎᖃᑦᑕᕆᑦᓯ ᐃᓚᑦᓯᓐᓄᑦ, ᑐᒃᓯᐅᑎᖃᑦᑕᐅᑎᓗᓯᓗ, ᐋᖅᑭᒃᑕᐅᖁᓪᓗᓯ. ᐃᓗᐊᕐᑐᓕᔫᑉ ᑐᒃᓯᐊᕐᓂᖓ ᐊᖏᔪᒥᒃ ᐱᔪᓐᓇᕐᓂᖃᕐᒪᑦ ᐊᑑᑎᖃᕐᓗᓂᓗ. 17#ᐊᑕᓃᑦ ᓯᕗᓪᓖᑦ 17:1; 18:1.ᐃᓔᑦᔭᑦᑕᐅᖅ ᐅᕙᑦᑎᑐᑦ ᐃᓄᑐᐃᓐᓇᐅᓚᐅᕐᐳᖅ ᐃᓗᖏᕐᑐᕐᓗᓂ ᑐᒃᓯᐊᕐᒪᑦ ᓯᓚᓗᖁᔨᓇᓂ, ᓯᓚᓗᓚᐅᓐᖏᓚᖅ ᓄᓇᒥ ᐊᕐᕌᒍᓂᒃ ᐱᖓᓱᓂᒃ ᑕᖅᑭᓂᒡᓗ ᐱᖓᓲᔪᕐᑐᓂᒃ. 18#ᐊᑕᓃᑦ ᓯᕗᓪᓖᑦ 18:42-45.ᐊᒻᒪ ᑐᒃᓯᐊᕐᒥᖕᒪᑦ, ᕿᓚᖕᒥᑦ ᓯᓚᓗᓕᓚᐅᕐᐳᖅ, ᓄᓇᓗ ᐱᕈᕐᑐᖃᓕᓚᐅᕆᕗᖅ.
19ᐅᒃᐱᕐᑑᖃᑎᒃᑲ, ᐃᓚᑦᓯᓐᓂᑦ ᓱᓕᓂᕐᒥᑦ ᕿᒤᔪᖃᕐᐸᑦ ᐊᓯᖓᓄᓪᓗ ᐅᑎᕐᑎᑕᐅᒃᐸᑦ, 20#ᓲᓗᒨᓂ 10:12; 1 ᐲᑦᑐᕉᓯ 4:8.ᖃᐅᔨᒪᓚᐅᕐᓕ ᓇᓪᓕᐊᑦ ᐊᔪᕐᑐᓕᔫᑉ ᑕᒻᒪᕐᓂᖓᓂᑦ ᐅᑎᕐᑎᑦᓯᔪᖅ ᑕᕐᓂᖓᓂᒃ ᑐᖁᒥᑦ ᐱᐅᓕᒃᓯᖕᒪᑦ ᐊᔪᕐᑐᓕᓂᕐᓂᒡᓗ ᐊᒥᓱᓂᒃ ᐃᓱᒪᒋᔪᓐᓁᕐᑕᐅᑎᑦᓯᓪᓗᓂ.
Currently Selected:
ᔧᒥᓯᐅᑉ ᐊᒡᓚᖏᑦ 5: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
