ᐲᑦᑐᕉᓯ ᓯᕗᓪᓖᑦ 1
1
ᓇᓗᓁᕐᓯᑦᔪᑏᑦ
1ᐲᑦᑐᕉᓯᒥᑦ ᔩᓱᓯ ᙭ᔅᑑᓯᐅᑉ ᐋᐴᓯᑕᓕᖁᑎᖓᓂᑦ,
ᐃᓄᖕᓄᑦ ᒎᑎᒧᑦ ᓂᕈᐊᕐᑕᐅᓯᒪᔪᓄᑦ ᕿᒫᓯᒪᓪᓗᑎᒃ ᓯᐊᒻᒪᕐᓯᒪᔪᓄᑦ ᓄᓇᓄᑦ ᐹᓐᑕᓯᒥ, ᒐᓔᑎᐊᒥ, ᑲᐸᑑᓯᐊᒥ, ᐂᓯᐊᒥ, ᐱᑎᓂᐊᒦᑦᑐᓄᓪᓗ. 2ᓂᕈᐊᕐᑕᐅᓯᒪᕗᓯ ᒎᑎᒧᑦ ᐊᑖᑕᒧᑦ ᐱᓂᐊᕐᑕᐅᖁᔭᖓᓄᑦ ᐃᑦᔪᕐᓁᑎᑕᐅᖁᓪᓗᓯ ᐊᓂᕐᓂᖓᓄᑦ ᒪᓕᑦᓯᐊᖁᓪᓗᓯ ᔩᓱᓯ ᙭ᔅᑑᓯᒥᒃ ᐊᐅᖓᓄᓪᓗ ᓴᓗᒻᒪᕐᑎᑕᐅᓗᓯ:
ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᓮᒻᒪᕐᑎᑕᐅᓇᕐᑐᖅ ᐱᕙᓪᓕᐊᓕ ᐃᓕᑦᓯᓐᓄᑦ.
ᓂᕆᐅᒋᔭᒃᓴᖃᑦᓯᐊᕐᓂᖅ
3ᒎᑎ ᓂᕐᑐᕐᓚᕗᑦ ᐊᑕᓂᑦᑕ ᔩᓱᓯᐅᑉ ᙭ᔅᑑᓯᐅᑉ ᐊᑖᑕᖓ! ᑖᑦᓱᒪ ᓂᑲᒍᓱᖕᓂᖓᑕ ᐊᖏᔪᐊᓘᓂᖓᓄᑦ ᐃᓅᓯᕐᑖᕐᑎᒻᒪᑎᒍᑦ ᓄᑖᒥᒃ ᑕᒪᑐᒨᓇ ᓂᕆᐅᒋᔭᒃᓴᖃᑦᓯᐊᓕᕐᑎᑉᐹᑎᒍᑦ ᑐᖁᖓᔪᓂᑦ ᒪᑭᑎᑦᓯᓂᕐᒥᒍᑦ ᔩᓱᓯ ᙭ᔅᑑᓯᒥᒃ, 4ᑭᖑᕐᖑᑦᔨᖁᓪᓗᑕ ᐊᓯᕈᔪᐃᑦᑐᒥᒃ, ᐃᑦᔪᕐᓁᑦᑐᒥᒃ, ᑐᖁᓕᔪᐃᑦᑐᒥᒡᓗ, ᕿᓚᖕᒥ ᐅᑕᖅᑭᑎᑕᐅᔪᓂᒃ ᐃᓕᑦᓯᓐᓄᑦ, 5ᒎᑎᐅᑉ ᐱᔪᓐᓇᕐᓂᖓᒍᑦ ᐱᓯᒪᔭᐅᕗᑦ ᐅᒃᐱᕐᓂᑯᑦ ᐱᐅᓕᔭᐅᕕᒃᓴᖅ ᓇᓪᓕᐅᑎᒃᐸᑦ ᓴᖅᑭᑦᑐᒃᓴᐅᖁᓪᓗᒋᑦ ᐅᓪᓗᐃᑦ ᑭᖑᓪᓕᖏᓐᓂ.
6ᑕᒪᓐᓇ ᖁᕕᐊᓲᑎᒋᕙᓯ, ᒫᓐᓇᐅᓂᖓᓂ ᓯᕕᑭᑦᑐᒥᒃ ᐱᔭᕆᐊᖃᕈᑦᓯ, ᖁᕕᐊᓇᖏᑦᑐᒃᑰᖃᑦᑕᕋᓗᐊᕐᑐᓯ ᐊᒃᓱᕈᕐᓇᕐᑐᑦ ᐅᓄᕐᒪᑕ ᐊᑦᔨᒌᖏᑦᑐᑦ. 7ᑕᒪᒃᑯᐊ ᐱᑦᔪᑎᖃᕐᐳᑦ ᐅᒃᐱᕐᓂᐅᑉ ᓇᓚᒍᑦᓯᐊᕐᓂᖓᓂᒃ, ᐱᕕᐊᕐᓇᕐᓂᕐᓴᐅᓪᓗᓂ ᒎᓗᒥᑦ ᓄᖑᔪᒫᕐᑐᒥᑦ ᐃᑯᒪᒧᑦ ᖃᐅᔨᓴᕐᑕᐅᕙᒃᑐᒥᑦ, ᐅᐱᒋᔭᐅᖁᓪᓗᓯ, ᐱᓐᓇᕐᓇᕐᑎᑕᐅᓗᓯᓗ ᐅᐱᒋᔭᐅᓗᓯᓗ ᔩᓱᓯ ᙭ᔅᑑᓯᐅᑉ ᓴᖅᑭᕝᕕᒃᓴᖓᓂ. 8ᑖᓐᓇ ᑕᑯᓚᐅᕐᓯᒪᖏᒃᑲᓗᐊᕐᓗᒍ, ᓇᒡᓕᒋᕙᓯ. ᑕᑯᕙᖏᓐᑲᓗᐊᕋᑦᓯᐅᒃ, ᐅᒃᐱᕆᕙᓯ ᐃᓗᒻᒥᕐᑕᐅᓪᓗᓯᓗ ᖁᕕᐊᓱᖕᓂᕐᒧᑦ ᐊᖏᔪᕐᔪᐊᒧᑦ ᓈᒻᒪᒃᑐᒥᒃ ᐅᖃᐅᓯᕐᑕᖃᕈᓐᓇᖏᑦᑐᒧᑦ, 9ᐅᒃᐱᕐᓂᑦᓯ ᑐᕌᕐᑕᖓ ᑎᑭᓐᓇᑦᓯᐅᒃ, ᑕᕝᕙ ᑕᕐᓂᑦᓯ ᐱᐅᓕᔭᐅᓂᖓ.
10ᐱᐅᓕᔭᐅᓂᖅ ᑕᒪᓐᓇ ᐱᑦᔪᑎᒋᓪᓗᒍ, ᓇᓚᐅᑦᑍᔪᑦ ᕿᓂᓚᐅᕐᐹᑦ ᐊᒃᓱᕈᕐᓗᑎᒃ ᖃᐅᔨᓇᓱᐊᑦᓯᐊᕐᓗᒍᓗ; ᑕᕝᕙ ᐅᖃᐅᓯᕆᓕᓚᐅᕐᐹᑦ ᒎᑎᐅᑉ ᑐᓂᓯᔪᒫᕐᓂᖓ ᑕᒪᑐᒥᖓ ᐃᓕᑦᓯᓐᓄᑦ, 11ᖃᐅᔨᓇᓱᐊᓚᐅᕐᐳᑦ ᖃᖓᐅᓂᐊᕐᒪᖔᑦ ᖃᓄᕐᓗ ᓴᖅᑭᓐᓂᐊᕐᒪᖔᑦ ᙭ᔅᑑᓯᐅᑉ ᐊᓂᕐᓂᖓ ᑖᒃᑯᓇᓃᑦᑐᖅ ᑕᒪᑐᒥᖓ ᓇᓗᓁᕐᓯᓚᐅᕐᐳᖅ; ᙭ᔅᑑᓯᐅᑉ ᐋᓐᓂᐊᑎᑕᐅᓂᕐᒥᒃ ᐊᑐᕈᒫᕐᓂᖓᓂᒃ ᖁᕕᐊᓇᕐᑐᕐᔪᐊᒥᒡᓗ ᑭᖑᓂᖃᕈᒫᕐᓂᖓᓂᒃ. 12ᓴᖅᑭᑎᑦᓯᕕᐅᓚᐅᕐᐳᑦ ᓇᖕᒥᓂᖅ ᐱᕙᓪᓕᕈᑎᒃᓴᒥᖕᓄᑦ ᑍᒤᓕᐅᖏᓐᓂᖏᓐᓂᒃ ᐃᓕᑦᓯᓕ ᐱᕙᓪᓕᕈᑎᒃᓴᑦᓯᓐᓄᑦ, ᒫᓐᓇ ᐃᓕᑦᓯᓐᓄᑦ ᐅᖃᐅᓯᐅᓯᒪᓕᕐᐳᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᓪᓚᒃᑎᓄᑦ, ᐊᓂᕐᓂᖅ ᐃᑦᔪᕐᓁᑦᑐᒃᑯᑦ ᕿᓚᖕᒥᑦ ᐱᓯᒪᔪᒃᑯᑦ. ᑕᒪᓐᓇᑦᑕᐅᖅ ᐊᒡᓛᑦ ᐂᖏᓖᓄᑦ ᑐᑭᓯᔭᐅᔪᒪᕗᖅ.
ᐃᑦᔪᕐᓁᑦᑐᒥᒃ ᐃᓅᓯᖃᖁᔭᐅᓂᖅ
13ᑍᒤᒻᒪᑦ ᐃᓱᒪᑦᓯᒍᑦ ᐅᐸᓗᖕᒊᕐᓯᒪᓕᕆᑦᓯ; ᓇᖕᒥᓂᑦᓯᓐᓂᒃ ᑲᒪᑦᓯᐊᕐᓗᓯ ᐃᓅᓯᑦᓯᓐᓂᒃ; ᓂᕆᐅᖕᓂᓯ ᓱᖁᓯᕐᑍᓕᓗᒍ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᐃᓕᑦᓯᓐᓄᑦ ᑎᑭᓐᓂᐊᕐᒪᑦ ᔩᓱᓯ ᙭ᔅᑑᓯᐅᑉ ᓴᖅᑭᕝᕕᒃᓴᖓᓂ. 14ᕿᑐᕐᖓᑎᑐᑦ ᓈᓚᑦᓯᐊᖃᑦᑕᕆᑦᓯ, ᐃᓅᓯᓯᓗ ᐱᐅᖏᑦᑐᓄᑦ ᐊᐅᓚᑕᐅᓕᕐᑎᑦᑍᓕᓗᒍ ᓲᕐᓗ ᑍᑦᓱᒪᓂᑐᑦ ᖃᐅᔨᒪᖏᑦᑑᓚᐅᕈᓯᑦᓯᑐᑦ, 15ᑖᓐᓇ ᐃᓕᑦᓯᓐᓂᒃ ᕾᖁᔨᓯᒪᔪᖅ ᐃᑦᔪᕐᓁᑦᑑᖕᒪᑦ, ᑍᒤᒻᒪᑦ ᐃᑦᔪᕐᓁᑦᑑᔭᕆᐊᖃᕆᕗᓯ ᖃᓄᐃᓕᐅᕐᓂᕆᔭᓯᓂᒃ ᑕᒤᓐᓂᒃ. 16#ᒨᓯᓯ ᐱᖓᔪᖏᑦ 11:44,45; 19:2.ᐊᒡᓚᒃᓯᒪᖕᒪᑦ, “ᐃᑦᔪᕐᓁᑦᑕᕆᐊᖃᕐᐳᓯ, ᐃᑦᔪᕐᓁᑦᑑᒐᒪ.”
17ᒎᑎ ᐊᑖᑕᒋᓂᕋᕐᓗᒍ ᐅᖃᕐᕕᒋᕙᒃᑯᑦᓯᐅᒃ ᐊᑦᔨᒌᒥᒃ ᐃᓄᖕᓂᒃ ᐃᖅᑲᕐᑐᐃᓲᖅ ᐊᑐᓂᑦ ᐱᓂᐊᕐᓂᕆᔭᖏᑦ ᒪᓕᒡᓗᒋᑦ; ᑍᒤᒻᒪᑦ ᑕᒫᓂ ᐃᓅᓂᑦᓯᓐᓂ ᑖᓐᓇ ᐅᐱᒋᑦᓯᐊᕐᓗᒍ ᐃᓅᒋᑦᓯ ᓄᓇᒋᓐᖏᑕᑦᓯᓐᓃᓐᓇᑦᓯ. 18ᖃᐅᔨᒪᑦᓯᐊᕋᑦᓯ ᐊᓯᕈᕐᑐᒃᓴᒧᑦ ᓯᐅᓪᕕᕆᒧᓪᓘᓐᓃᑦ ᒎᓗᒧᓪᓘᓐᓃᑦ ᐊᑭᓕᕐᑕᐅᓯᒪᖏᓐᓇᑦᓯ ᒪᑐᒪᓐᖓᑦ ᐃᓅᓯᕐᒥᑦ ᓱᒃᓴᐅᖏᑦᑐᒥᑦ ᓯᕗᓕᑦᓯᓐᓂᑦ ᐃᓅᓯᕐᑖᕆᓯᒪᔭᑦᓯᓐᓂᑦ ᕿᓚᕈᑦᔮᕐᑕᐅᓚᐅᕐᕋᓯ, 19᙭ᔅᑑᓯᐅᑉ ᐊᐅᖓᑕ ᐊᑭᑐᔪᕐᔪᐊᑉ ᑐᓂᕐᕈᑕᐅᓂᖓᒍᑦ, ᓰᐱᐅᑉ ᓄᕐᕋᖓᑐᑦ ᐱᐅᖏᓐᓂᖃᖏᑦᑐᑐᑦ ᓇᕐᕈᓇᕐᓂᖃᖏᑐᑐᓪᓗ. 20ᑖᓐᓇ ᓂᕈᐊᕐᑕᐅᓯᒪᓚᐅᐳᖅ ᓱᓕ ᓯᓚᕐᔪᐊᖅ ᐱᓐᖑᕐᑎᑕᐅᓚᐅᖅᑳᕐᑎᓐᓇᒍ, ᐅᓪᓗᐃᓪᓕ ᑭᖑᓪᓕᖏᓐᓂ ᓴᖅᑭᑎᑕᐅᓚᐅᕐᐳᖅ ᐱᑦᔪᑎᒋᓪᓗᓯ. 21ᑖᑦᓱᒨᓇ ᒎᑎ ᐅᒃᐱᕐᕕᒋᕙᓯ, ᑖᓐᓇ ᑐᖁᒥᑦ ᒪᑭᑎᑦᓯᓚᐅᕐᑐᖅ ᑖᑦᓱᒥᖓ ᓂᕐᑐᕐᓇᕐᓯᑎᓪᓗᒍᓗ, ᑍᒤᒻᒪᑦ ᐅᒃᐱᕐᓂᑦᓯ ᓂᕆᐅᖕᓂᓯᓗ ᒎᑎᒦᑉᐳᑦ.
22ᒫᓐᓇᓕ ᓈᓚᖕᓂᑦᓯᒍᑦ ᓱᓕᔪᒧᑦ ᐆᒻᒪᑎᓯ ᓴᓗᒻᒪᕐᓯᒪᕙᓯ ᓇᒡᓕᖕᓂᕐᑖᕐᓗᓯᓗ ᓱᓕᔪᒥᒃ ᐅᒃᐱᖃᑎᑦᓯᓐᓄᑦ, ᓇᒡᓕᒃᑎᒌᒃᑐᒃᓴᐅᒐᑦᓯ ᐃᑎᔪᒥᒃ, ᐆᒻᒪᑎᒥᑦ ᐱᔪᒥᒃ. 23ᓄᑖᒥᒃ ᐃᕐᓂᐊᖑᓯᒪᒐᑦᓯ, ᐊᓯᕈᕐᓂᐊᕐᑐᒥᐅᖏᑦᑐᖅ ᕿᑐᕐᖓᕐᑖᖑᓪᓗᓯ, ᐊᓯᕈᕐᓂᐊᖏᑦᑐᒥᒡᓕ, ᒎᑎᐅᑉ ᐅᖃᐅᓯᖓᒍᑦ ᐆᒪᔪᒃᑯᑦ ᐃᓱᖃᖏᑦᑐᒃᑯᓪᓗ. 24#ᐂᓮᐊᓯ 40:6-8.ᐊᒡᓔᑦ ᐅᖃᕐᒪᑕ,
“ᐃᓄᓕᒫᑦ ᐃᕕᒃᓱᒐᕐᑎᑐᑦ ᑍᒤᑉᐳᑦ,
ᑕᑯᒥᓇᕐᓂᖏᓪᓗ ᓄᓇᕋᕐᑎᑐᑦ ᑍᒤᑦᑑᓪᓗᑎᒃ;
ᐃᕕᒃᓱᒃᑲᑦ ᐸᓂᓕᕐᐳᑦ ᐱᕈᕐᑐᓪᓗ ᑐᖁᓕᓪᓗᑎᒃ.
25ᐊᑕᓂᐅᓪᓕ ᐅᖃᐅᓯᖓ ᓱᖁᓯᕐᓂᐊᓐᖏᓚᖅ ᐃᓱᖃᖏᑦᑐᒧᑦ.”
ᐅᖃᐅᓯᕐᓗ ᑕᒪᑦᔭ ᐊᔪᕆᕐᑐᐃᑦᔪᑕᐅᓚᐅᕐᑐᖅ ᐃᓕᑦᓯᓐᓄᑦ.
Currently Selected:
ᐲᑦᑐᕉᓯ ᓯᕗᓪᓖᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
