ᔧᒥᓯᐅᑉ ᐊᒡᓚᖏᑦ 3
3
ᐅᖃᐅᑉ ᑲᒪᒋᔭᐅᑦᓯᐊᕆᐊᖃᕐᓂᖓ
1ᐊᒥᓲᓐᖏᑦᑐᓯᒍᑦ ᐊᔪᕆᓱᐃᔨᖑᕐᑐᒃᓴᐅᕗᓯ, ᐅᒃᐱᕐᑑᖃᑎᒃᑲ, ᖃᐅᔨᒪᒐᑦᓯ ᐅᕙᒍᑦ ᐊᔪᕆᕐᓱᐃᕙᒃᑐᒍᑦ ᓂᑲᒋᔭᐅᓐᖏᓐᓂᕐᓴᐅᓗᑕ ᐃᖅᑲᕐᑐᕐᑕᐅᔪᒫᕋᑦᑕ. 2ᑕᒪᑦᑕ ᐊᑦᔨᒌᖏᑦᑐᑎᒍᑦ ᑕᒻᒪᕐᐸᒃᑲᑦᑕ, ᓇᓪᓕᐊᓪᓗ ᐅᖃᐅᓯᕐᒥᒍᑦ ᑕᒻᒪᓚᐅᕐᓯᒪᖏᑦᑐᖅ ᑖᓐᓇ ᓈᒻᒪᑦᓯᐊᕐᑐᒥᒃ ᐃᓅᓯᖃᕐᐳᖅ, ᑎᒥᓂᓗ ᐊᔪᕐᑐᓕᓂᕐᒧᑦ ᐱᑎᑦᑍᓕᔪᓐᓇᕐᐹ. 3ᕿᒧᒃᓯᐅᑎᑦ ᖃᓂᖏᑎᒍᑦ ᓴᕕᕋᔭᖕᒥᒃ ᐃᓕᓯᕕᒋᕙᒃᐸᕗᑦ ᐅᕙᑦᑎᓐᓂᒃ ᓈᓚᑦᓯᐊᕈᓐᓇᖁᓪᓗᒋᑦ, ᐊᒡᓛᑦ ᑎᒥᓕᒫᖓ ᐅᐸᒍᒪᔭᑦᑎᓐᓄᑦ ᐊᐅᓚᑎᑦᓱᓐᓇᕐᓯᕙᒃᐸᕗᑦ. 4ᐅᒥᐊᕐᔪᐊᑦᑕᐅᖅ; ᐊᖏᔪᐊᓘᒐᓗᐊᑦ ᐊᓄᕆᕐᔪᐊᒧᓪᓗ ᐊᐅᓚᑕᐅᕙᒃᑐᑦ ᐃᖏᕐᕋᑎᑕᐅᓪᓗᑎᒃ, ᐊᖁᑕᐅᔪᓐᓇᕐᐳᑦ ᐊᖂᑎᖓᓄᑦ ᒥᑭᔪᒍᓗᖕᓄᑦ, ᐊᖁᑦᑑᑉ ᐅᐸᒍᒪᔭᖓᓄᑦ. 5ᑍᒤᒃᑭᕗᕐᑕᐅᖅ ᐅᖃᖅ ᒥᑭᔫᒐᓗᐊᖅ ᐊᖏᔪᐊᓗᖕᓂᒃ ᐊᐅᓚᑦᓯᔪᓐᓇᕆᕗᖅ.
ᓇᐹᕐᑐᐊᓗᐃᑦ ᐊᒥᓱᑦ ᐃᑯᐊᓪᓚᒃᑎᑕᐅᔪᓐᓇᕐᐳᑦ ᐃᑯᒪᒧᑦ ᒥᑭᔪᒧᑦ. 6ᐅᖃᕐᑕᐅᖅ ᐃᑯᒪᐅᕗᖅ. ᓯᓚᕐᔪᐊᖑᓪᓗᓂᓗ ᐱᐅᖏᑦᑑᓕᕐᑎᑎᑦᔪᓇᕐᖢᓂᓗᑦ. ᑎᒥᑦᑕ ᐃᓚᒋᖕᒪᒍ, ᐃᑦᓴᒃᓯᕗᖅ ᑎᒥᑦᑎᓐᓂᒃ ᐃᑯᐊᓪᓔᕗᖅ ᐃᓅᓯᓕᒫᑦᑎᓐᓂᒃ, ᑲᑉᐱᐊᓇᕐᑐᕕᐅᑉ ᐃᑯᒪᓐᖓᓄᑦ. 7ᓂᕐᔪᑎᑦ ᖃᓄᐃᑦᑐᑐᐃᓐᓁᑦ, ᑎᖕᒥᐊᑦ, ᐹᕐᖑᕐᑐᓪᓗ, ᐃᒪᕐᒥᐅᑍᓪᓗ ᓄᔪᐃᓕᕐᑎᑕᐅᔪᓐᓇᕐᐳᑦ, ᓄᔪᐃᓕᕐᑎᑕᐅᖃᑦᑕᕐᓯᒪᓪᓗᑎᒃᓗ, 8ᐃᓅᓪᓕ ᐅᖃᖓ ᑭᓇᒧᓪᓘᓐᓃᑦ ᐊᐅᓚᑕᐅᔪᓐᓇᕐᓯᔪᓇᓐᖏᓚᖅ. ᓄᖅᑲᕈᓐᓇᕋᓂ ᐱᐅᖏᑦᑐᐊᓘᓪᓗᓂ, ᓴᓐᖏᔪᕐᔪᐊᒥᒃ ᑐᖁᓐᓇᕐᑐᒥᒃ ᑕᑕᑉᐳᖅ. 9#ᒨᓯᓯ ᓯᕗᓪᓖᑦ 1:26.ᐅᖃᕗᑦ ᐊᑐᕐᓗᒍ ᖁᔭᓕᕙᒃᐳᒍᑦ ᐊᑕᓂᕐᒧᑦ ᐊᑖᑕᒧᓪᓗ, ᐅᖃᑦᑎᓐᓄᑦᑕᐅᖅ ᐃᓅᖃᑎᕗᑦ ᐅᖃᕐᓂᕐᓗᒡᕕᒋᕙᒃᐸᕗᑦ, ᒎᑎᐅᑉ ᐊᑦᔨᖓᓄᑦ ᐱᓐᖑᕐᑎᑕᐅᓯᒪᔪᖅ. 10ᖃᓂᕐᒥᑦ ᑕᕝᕙᓐᖓᑦᓮᓐᓇᖅ ᐅᖃᐅᓰᑦ ᐊᓂᕗᑦ ᖁᔭᓕᓃᑦ ᐅᖃᕐᓂᕐᓗᖕᓃᓪᓗ. ᐅᒃᐱᕐᑑᖃᑎᒃᑲ, ᑍᒤᑦᑕᕆᐊᖃᓐᖏᓚᖅ. 11ᓄᓇᐅᑉ ᐃᓗᐊᓂᑦ ᑰᒃᑐᖅ ᐊᑕᐅᑦᓯᒃᑯᑦ ᐃᒪᑦᓯᐊᒥᒃ ᑕᕆᐅᒥᒡᓗ#3:11 ᐃᒪᑦᓯᐊᖑᖏᑦᑐᖅ ᐅᕝᕙᓗ ᑕᕆᐅᖅ ᑯᕕᔪᓐᓇᕐᐹ? 12ᐅᒃᐱᖃᑎᒃᑲ, ᓇᐹᕐᑐᖅ ᐸᐅᕐᖓᓕᒃ ᐱᒋᓕᖕᓂᒃ, ᐱᕈᕐᕕᐅᔪᓐᓇᕐᐹ ᐅᕐᓱᒃᓴᕐᑕᓕᖕᓂᒃ? ᐅᐂᓂᒃᓴᓂᒡᓗ ᐱᕈᕐᕕᐅᕙᒃᑐᑦ ᐱᒋᓕᖕᓂᒃ ᐱᕈᕐᕕᐅᔪᓐᓇᕐᐹ? ᑍᒫᒃᑕᐅᖅ ᓄᓇᐅᑉ ᐃᓗᐊᓂᑦ ᑕᕆᐅᕐᒥᒃ ᑯᕕᔪᖅ ᐃᒪᑦᓯᐊᕙᖕᒥᒃ ᑯᕕᖃᓯᐅᑦᔨᔪᓐᓇᓐᖏᓚᖅ.
ᓯᓚᑐᓂᖅ ᕿᓚᖕᒥᑦ ᐱᔪᖅ
13ᑭᓇ ᓇᓪᓕᓯᓂ ᓯᓚᑐᓪᓗᓂᓗ ᑐᑭᓯᐊᕙ? ᑕᕝᕙ ᐱᓇᓱᐊᑦᓯᐊᕐᓂᕐᒥᒍᑦ ᓴᖅᑭᑎᑦᓯᔪᒃᓴᐅᕗᖅ ᐃᓅᓯᐊᕐᓂᕐᒥᒃ ᐱᐅᔪᕆᖏᓐᓂᕐᒥᒃ ᓯᓚᑐᓂᕐᒥᒡᓗ. 14ᐆᒻᒪᑎᑦᓯᒍᑦ ᐊᓐᓂᕈᑦᔨᓂᕐᒥᒃ ᐱᔪᑑᔪᒪᓂᕐᒥᒡᓗ ᐱᖃᕈᑦᓯ, ᓂᕐᑑᑎᓂᐊᕋᓯ ᓴᒡᓗᖁᓇᓯ ᓱᓕᔪᒧᑦ. 15ᓯᓚᑐᓂᖅ ᑍᒤᑦᑐᖅ ᐹᓐᖓᑦ ᐱᓐᖏᓚᖅ, ᓯᓚᕐᔪᐊᕐᒥᓪᓕ ᐱᕗᖅ, ᐅᒃᐱᕐᓂᒥᐅᓐᖏᑦᑐᖅ, ᐊᓂᕐᓂᕐᓗᖕᓂᓪᓕ ᐱᕗᖅ. 16ᓯᖕᓇᓂᖅ ᓇᖕᒥᓂᕐᓯᐅᕐᓂᕐᓘᓐᓃᑦ ᐱᑕᖃᕐᐸᑦ, ᐋᖅᑭᑦᑎᐊᕐᓯᒪᖏᓐᓂᖃᕐᓂᐊᕐᐳᖅ ᐱᐅᖏᑦᑐᐊᓗᖕᓂᒃᓗ ᐱᓂᐊᕐᓂᕐᑕᖃᕐᓗᓂ 17ᓯᓚᑐᓂᕐᓕ ᕿᓚᖕᒥᑦ ᐱᔪᖅ ᓯᕗᓪᓕᐅᑦᔨᕗᖅ ᓴᓗᒪᑦᓯᐊᕐᓂᕐᒥᒃ, ᐊᒻᒪ ᓮᓕᓂᕐᒥᒃ, ᐅᐃᒪᔮᖏᓐᓂᕐᒥᒃ, ᐱᖃᓐᓂᕐᓗᓂᓗ; ᐱᑦᔪᑎᒃᓴᑦᓯᐅᑦᓯᐊᕐᐳᖅ, ᓂᑲᒍᓱᒃᐳᖅ ᐱᐅᔪᓂᒡᓗ ᐱᕈᕐᑎᑦᓯᓪᓗᓂ, ᐊᑦᔨᒌᒃᑎᑦᓯᕗᖅ ᓱᓕᑦᓯᐊᕐᓗᓂᓗ. 18ᐃᓅᖃᑎᒌᑦᓯᐊᕈᑎᒃᓴᒥᒡᓗ ᑲᓐᖓᕐᓱᐃᕗᑦ ᓮᓕᓇᕐᑐᒥᒃ ᑖᒃᑯᐊ ᓮᓕᑎᑦᓯᔪᑦ.
Currently Selected:
ᔧᒥᓯᐅᑉ ᐊᒡᓚᖏᑦ 3: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
