ᐂᓮᐊᓯᐅᑉ ᐊᒡᓚᖏᑦ 44
44
ᐊᑕᓂᐅᑉ ᒎᑎᑐᐊᖑᓂᖓ
1“ᒫᓐᓇᓕ ᓈᓚᓕᕆᑦᓯ ᐱᔨᒋᔭᒃᑲ ᔧᑰᑉ ᑭᖑᕚᖏᑦ, ᐃᓴᕆᐊᓕ ᓂᕈᐊᕐᓯᒪᔭᕋ! 2ᐊᑕᓂᖅ ᐃᒫᒃ ᐅᖃᕐᐳᖅ ᐃᓕᖕᓂᒃ ᓴᓇᓚᐅᕐᑐᖅ, ᑖᑦᓱᒪ ᓴᓇᓚᐅᕐᒪᑎᑦ ᐃᒡᓕᐊᑉ ᐃᓗᐊᓂ, ᑖᑦᓱᒪ ᐃᑲᔪᕐᓂᐊᕐᐹᑎᑦ; ᑲᑉᐱᐊᓱᒃᑍᓕᒋᑦ, ᔧᑰ ᐱᔨᒋᒐᒃᑭᑦ; ᐃᕝᕕᓪᓗ ᔨᓱᕋᓐ#44:2 ᔨᓱᕋᓐ ᐃᓴᕆᐊᓕ ᐅᕝᕙᓗ ᐅᓪᓗᓂ ᑭᖑᓪᓕᕐᐹᓂ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᓂᕈᐊᕆᓯᒪᒐᒃᑭᑦ. 3ᐃᒥᕈᒃᑐᖅ ᐃᒪᕐᒥᒃ ᑯᕕᓯᕕᒋᔪᒫᕐᐸᕋ, ᓄᓇᓗ ᐸᓂᕐᑐᖅ ᑰᒡᕕᐅᑎᑦᓱᒫᕐᓗᒍ, ᐊᓂᕐᓂᕋ ᑯᕕᔪᒫᕐᐸᕋ ᑭᖑᕚᑦᓯᓐᓄᑦ, ᕿᑐᕐᖓᓯᓗ ᓮᒻᒪᕐᑎᑦᓱᒫᕐᐸᒃᑲ. 4ᐱᕈᕐᐸᓪᓕᐊᔪᒫᕐᐳᑦ ᐃᕕᒡᓱᒐᕐᑎᑐᑦ ᐃᒪᕐᓱᖕᒦᑦᑐᑎᑐᑦ, ᐅᕐᐱᒃᑎᑐᓪᓗ ᑰᑉ ᓯᓈᓃᑦᑐᑎᑐᑦ. 5ᐃᓚᖓᑦ ᐅᖃᕈᒫᕐᐳᑦ, ‘ᐊᑕᓂᐅᑉ ᐱᒋᕚᖓ,’ ᐊᓯᐊᓗ ᔧᑰᑉ ᐊᑎᖓᓂᒃ ᐊᑎᖃᖃᑕᐅᓂᕋᕐᓗᓂ; ᐊᓯᐊᓗ ᑎᑎᕋᕈᒫᕐᐳᖅ, ‘ᐊᑕᓂᐅᑉ ᐱᖓ,’ ᐃᓴᕆᐊᓕᒥᐅᑕᐅᓂᕋᕐᓗᓂᓗ. 6#ᐂᓮᐊᓯ 48:12; ᑕᑯᑎ 1:17; 2:8; 22:13.ᐊᑕᓂᖅ ᐃᒫᒃ ᐅᖃᕐᐳᖅ, ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ, ᓴᐳᑦᔨᔨᒋᓪᓗᒍᓗ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ: ‘ᓯᕗᓪᓕᕐᐸᐅᕗᖓ ᑭᖑᓪᓕᕐᐸᐅᓪᓗᖓᓗ; ᐊᓯᓐᓂᒃ ᒎᑎᑕᖃᓐᖏᓚᖅ. 7ᑭᓇ ᐅᕙᑦᑐᑦ ᑍᒤᑉᐸ, ᐊᑏ ᓇᓗᓁᕐᓯᓚᐅᕐᓕ? ᐅᖃᐅᓯᕆᓗᓂ ᓵᓐᓄᓪᓗ ᐱᑎᓪᓗᒍ, ᑭᓇ ᐅᖃᐅᓯᖃᕐᓯᒪᕙ ᑍᑦᓱᒪᓂᐊᓗᖕᓂᑦ ᐱᔪᒫᕐᑐᓂᒃ? ᑍᒤᓕᐅᕈᓐᓇᕐᑐᖅ ᐅᖃᓚᐅᕐᓕ ᓱᓇ ᐱᔪᒫᓕᕐᒪᖔᑦ. 8ᓯᕘᕋᓂᐊᕐᓇᒃ ᐃᕐᓯᓂᐊᕐᓇᒡᓗ ᑍᑦᓱᒪᓂᐊᓗᖕᓂᑦ ᐅᖃᐅᑎᓚᐅᓐᖏᓚᒌᑦ ᓇᓗᓁᕐᓗᒍᓗ? ᖃᐅᔨᓯᒪᔪᖁᑎᒋᒐᑦᓯ. ᐊᓯᓐᓂᒃ ᒎᑎᑕᖃᕐᐹ? ᓱᓕᓪᓚᕆᒃᐳᖓ ᕾᕐᑐᕐᑕᖃᓐᖏᓚᖅ ᐊᓯᓐᓂᒃ; ᐊᓯᓐᓂᒃ ᖃᐅᔨᒪᔭᖃᓐᖏᓚᖓ.’”
ᒎᑎᓐᖑᐊᖃᕐᓂᐅᑉ ᓇᕐᕈᓇᕐᑑᓂᖓ
9ᒎᑎᓐᖑᐊᓂᒃ ᓴᓇᔪᓕᒫᑦ ᐊᑑᑎᒃᓴᖃᓐᖏᓚᑦ, ᐱᓪᓚᕆᐅᑎᑕᕋᓗᐊᖏᓪᓗ ᐱᕙᓪᓕᕐᓇᕐᑐᕐᑕᖃᕋᑎᒃ, ᐃᒻᒥᖕᓂᒃ ᓇᓗᓁᓕᕗᑦ; ᑕᐅᑐᖏᒻᒪᑕ ᖃᐅᔨᒪᓇᑎᒡᓗ, ᑕᒪᒃᑯᐊ ᑲᓐᖑᓇᕐᑐᒦᑎᑉᐳᑦ. 10ᒎᑎᓐᖑᐊᓕᐅᕐᑐᖃᕐᐸᑦ ᐊᐅᒃᑎᑦᓯᔪᖃᕐᐸᓪᓘᓐᓃᑦ ᐃᓄᓐᖑᐊᓕᐊᕆᓗᒍ ᓱᓇᒥᒃ ᐱᕚᓪᓕᕐᓇᓐᖏᓚᖅ. 11ᑕᑯᒋᑦ ᒪᓕᖃᑎᓕᒫᖏᑦ ᑕᕝᕙ ᑲᓐᖑᓇᕐᑐᒦᖃᑕᐅᕗᑦ; ᒎᑎᓐᖑᐊᒥᒃ ᓴᓇᔪᑦ ᐃᓄᑐᐃᓐᓇᐅᖕᒪᑕ, ᑲᑎᓪᓗᑎᒃ ᐃᑲᔪᕐᑎᒌᓕᕐᐸᑕ ᐊᑕᖏᕐᓗᑎᒃ; ᓯᕘᕋᓇᕐᑐᒧᑦ ᑎᑭᒐᔭᕐᐳᑦ, ᑲᓐᖑᓇᕐᑐᕐᔪᐊᕐᒧᓪᓗ. 12ᓴᕕᕋᔭᖕᒥᒃ ᓴᓇᓐᖑᐊᕐᑎ ᓴᓇᕗᖅ ᐃᑯᒪᒧᑦ ᐅᓈᕐᓯᑎᑉᐸᒃᓗᒍ; ᓴᓇᓕᕐᐳᖅ ᑲᓱᐊᕐᓗᒍ ᒥᒃᓯᑖᕐᑎᑉᐹ, ᓴᓇᓪᓗᓂᐅᒃ ᑕᓕᖓᑕ ᓴᓐᖏᓂᖓᓄᑦ, ᓱᓕᓕ ᑳᓕᕐᐸᒃᐳᖅ, ᑕᖃᓪᓗᓂᓗ; ᐃᒥᖃᑦᑕᕈᓐᓃᑐᐊᕈᓂ ᑕᕝᕙ ᓄᑮᕈᑎᓕᕐᐳᖅ. 13ᕿᔪᖕᒥᒡᓕ ᓴᓇᔪᖅ ᕿᔪᒃ ᐆᒃᑐᕋᕐᓚᐅᕐᓗᒍ, ᐋᖅᑭᒃᓯᒪᓂᕆᓂᐊᕐᑕᖓ ᑎᑎᓚᐅᕐᓗᒍ, ᓴᓇᓐᖑᐊᓕᕐᐹ ᓴᓇᕐᕈᑎᒥᓄᑦ, ᐃᓅᓪᓗ ᐊᑦᔨᖓᓂᒃ ᐋᖅᑭᑦᓯᐊᕐᓯᒪᔪᒥᒃ ᐱᐅᔫᓪᓗᒍ ᐃᓄᓐᖑᐊᓕᐅᕐᐳᖅ ᐃᒡᓗᒥᓃᑎᑕᒃᓴᒥᓂᒃ. 14ᓇᐹᕐᑐᓂᒃ ᓰᑕᕆᓂᒃ ᓇᑲᑎᕆᕗᖅ; ᐅᕝᕙᓗ ᓂᕈᐊᕐᓗᓂ ᓇᐹᕐᑐᒥᒃ ᕼᐅᓪᒥᒥᒃ ᐊᑎᓕᖕᒥᒃ, ᐅᕝᕙᓗ ᓇᐹᕐᑐᒥᒃ ᐆᒃᒥᒃ ᓂᕈᐊᕐᓗᓂ ᐱᕈᕐᓯᐊᕆᕚ ᓇᐹᕐᑑᖃᑎᖏᑕ ᐊᑯᕐᖓᓐᓂ; ᓇᐹᕐᑐᒥᒡᓘᓐᓃᑦ ᐱᕈᕐᓰᒐᔭᕐᐳᖅ ᓯᓚᓗᖕᒧᑦ ᐃᒪᖃᕐᑎᑕᐅᖃᑦᑕᓕᕈᓂ ᐱᕈᕐᓂᐊᕐᑐᒥᒃ. 15ᓇᐹᕐᑑᑉ ᐃᓚᖓ ᐃᓅᑉ ᕿᔪᒃᓴᕆᕚ; ᐃᓚᖓ ᐃᒻᒥᓄᑦ ᐅᖅᑰᑦᔪᑎᒃᓴᕆᕚ; ᐃᒐ ᐃᑯᐊᓪᓚᒃᑲᒥᐅᒃ ᓂᐊᖂᔭᓕᐅᕐᐳᖅ; ᐃᓚᖓᓗ ᒎᑎᓕᐊᕆᓪᓗᒍ ᑐᒃᓯᐊᕐᕕᒋᕚ; ᐃᓄᓐᖑᐊᓕᐊᕆᓪᓗᒍ ᒎᑎᓐᖑᐊᓕᐅᕐᐳᖅ, ᐹᒻᒪᒃᑎᕐᕕᒋᓪᓗᒍᓗ. 16ᓇᐹᕐᑑᑉ ᓇᑉᐸᖓ ᐃᑯᐊᓚᑦᓯᑦᔪᑎᒋᕚ; ᑖᑦᓱᒧᖓ ᓇᑉᐸᖓᓄᑦ ᓂᕿᓕᐅᕐᐳᖅ; ᓂᕿᓕᐊᒥᓂᒡᓗ ᓂᕆᒐᒥ ᐊᕿᐊᑦᑐᕐᐳᖅ. ᐅᖂᑦᓯᐊᓕᕋᒥ ᐅᖃᕐᐳᖅ, “ᐅᖅᑰᑦᓯᐊᓕᕐᐳᖓ, ᐃᑯᒪᑦᓯᐊᓕᕐᒪᑦ!” 17ᐊᒥᐊᒃᑯᖓᓂᒡᓗ ᒎᑎᓕᐅᕐᐳᖅ, ᓴᓇᓪᓗᓂ ᐃᓄᓐᖑᐊᓕᐅᕐᐳᖅ. ᐅᑯᕕᒋᓪᓗᒍᓗ ᑐᒃᓯᐊᕐᕕᒋᕚ, ᑐᒃᓯᐊᕐᕕᒋᓕᕋᒥᐅᒃ ᐅᖃᐅᑎᕚ, “ᓴᐳᑎᓚᐅᓐᖓ ᒎᑎᒋᒐᒃᑭᑦ!” 18ᑍᒤᑦᑐᑦ ᖃᐅᔨᒪᓐᖏᓚᑦ ᑐᑭᓯᓯᒪᓇᑎᒡᓗ; ᑕᑯᓐᓇᕐᑍᓕᒪᒐᒥᒃ ᑕᑯᔪᓐᓇᓐᖏᓚᑦ, ᐃᓱᒪᒥᒃᑎᒍᓪᓗ ᑐᑭᓯᔪᓐᓇᕋᑎᒃ. 19ᓇᓪᓕᖏᓪᓘᓐᓃᑦ ᐃᓱᒪᒃᓴᕐᓯᐅᓐᖏᓚᑦ, ᓯᓔᓐᓂᕐᒧᑦ ᖃᐅᔨᒪᓇᓱᓐᖏᓚᑦ ᐅᖃᓐᖏᓚᓪᓘᓐᓃᑦ, “ᕿᔫᑉ ᐃᓚᖓᓄᑦ ᐃᑯᐊᓚᑦᓯᕗᖓ, ᓂᐊᖂᔭᓕᐅᕈᑎᒋᓪᓗᒍᓗ, ᓂᕿᒥᒡᓗ ᐆᔪᓕᐅᕈᑎᒋᒐᒃᑯ ᓂᕆᕗᖓ; ᕿᔪᒋᔭᒪ ᐊᒥᐊᒃᑯᖓ ᓇᕐᕈᓇᕐᑐᓕᐊᕆᔭᕆᐊᖃᕐᐸᕌ? ᐹᒻᒪᒃᑎᕆᐊᖃᕐᐳᖔ ᕿᔪᕈᓗᖕᒧᑦ?” 20ᐊᕐᔭᓕᓂᕐᓂᒃ ᓂᕆᕗᖅ; ᐆᒻᒪᑎᒥᒍᑦ ᐃᓱᒪᑦᓯᐊᖏᓐᓂᕐᒥᓄᑦ ᐅᐃᕕᕆᔭᐅᕗᖅ; ᓇᖕᒥᓂᖅ ᑕᕐᓂᕐᒥᓂᒃ ᐱᐅᓕᔪᓐᓇᓐᖏᓚᖅ, ᐅᖃᕈᓐᓇᓐᖏᓚᕐᓗ, “ᑕᓕᕐᐱᓐᓄᑦ ᑎᒍᒥᐊᕐᑕᕋ ᓱᓕᒐᓗᐊᕐᐹ?”
ᐊᑕᓂᐅᑉ ᐱᓐᖑᕐᑎᑦᓯᔨᐅᓂᖓ ᐱᐅᓕᔨᐅᓂᖓᓗ
21“ᔧᑰ ᑕᒪᒃᑯᐊ ᐃᖅᑲᐅᒪᒃᑭᑦ, ᐃᓴᕆᐊᓪ ᐱᔨᒋᒐᒃᑭᑦ; ᐱᓐᖑᕐᑎᓚᐅᕋᒃᑭᑦ ᐱᔨᒋᕙᒋᑦ; ᐄᓱᕆᐅᓪ ᐅᕙᓐᓄᑦ ᐳᐃᒍᕐᑕᐅᓂᐊᓐᖏᓚᑎᑦ. 22ᐱᐅᖏᑦᑐᓕᓂᓯ ᐊᖑᐊᓚᐅᕐᐸᒃᑲ#44:22 ᐊᖑᐊᓚᐅᕐᐸᒃᑲ ᐅᕝᕙᓗ ᓴᕿᓚᐅᕐᐸᒃᑲ ᓄᕗᔭᕐᓗᒃᑎᑐᑦ, ᐊᔪᕐᑐᓕᓂᓯᓗ ᓄᕗᔭᑎᑐᑦ ᐊᖑᐊᕐᓗᒋᑦ, ᐅᕙᓐᓄᑦ ᐅᑎᕆᑦᓯ, ᓴᑐᕐᑕᐅᕕᒃᓴᓕᐅᕐᓯᒪᓕᕋᑦᓯ.” 23ᕿᓚᖕᒥᐅᑕᐅᔪᓯ, ᐃᓐᖏᕆᑦᓯ, ᐊᑕᓂᐅᑉ ᐱᔭᕇᑦᓯᐊᕐᒪᒍ; ᕾᒐᓛᓚᐅᕆᑦᓯ ᓄᓇᐅᑉ ᐃᑎᓂᖓᓃᑦᑐᓯ; ᓂᓪᓕᐊᓂᓯ ᐃᓐᖏᕐᓂᓐᖑᕐᑎᓕᓯᐅᒃ, ᐃᓕᑦᓯ ᖃᖅᑲᐅᔪᓯ, ᓇᐹᕐᑐᒐᓴᒡᔪᐊᓪᓗ ᓇᐹᕐᑐᐃᓪᓗ ᐊᑐᓂᑦ! ᐊᑕᓂᐅᑉ ᔧᑯᒃᑯᑦ ᓂᐅᕕᐊᕆᓪᓗᒋᑦ ᐅᑎᕐᑎᒻᒪᒋᑦ, ᓂᕐᑐᕐᓇᕐᓂᕐᔪᐊᓂᓗ ᓴᖅᑭᑎᒻᒪᒍ ᐃᓴᕆᐊᓕᒥᐅᓄᑦ. 24ᐊᑕᓂᖅ ᐃᓕᖕᓂᒃ ᐅᑎᕐᑎᑦᓯᔪᖅ ᐃᒻᒥᓄᑦ, ᐃᒡᓕᐊᑉ ᐃᓗᐊᓂ ᓴᓇᓚᐅᕐᑐᖅ ᐃᓕᖕᓂᒃ; ᐃᒫᒃ ᐅᖃᕐᐳᖅ, “ᐊᑕᓂᐅᕗᖓ, ᑕᒤᓐᓂᒃ ᓴᓇᓚᐅᕐᑐᖅ, ᐃᓄᑑᑦᔨᓪᓗᖓ ᕿᓚᖕᒥᒃ ᐃᓯᕕᑦᓯᓚᐅᕐᐳᖓ, ᓄᓇᓗ ᓯᐊᒻᒪᒃᓗᒍ ᓴᓇᓚᐅᕐᐸᕋ; 25#1 ᑯᕆᓐᑎ 1:20.ᑭᐊ ᓇᓗᓕᕐᑎᑉᐰᑦ ᓱᓕᓇᑎᒃ ᓇᓚᐅᑦᑍᓇᓱᒃᑐᑦ, ᓯᕗᓂᕐᒥᒡᓗ ᖃᐅᔨᒪᓇᓱᐊᕐᑐᑦ ᓯᓔᑦᑐᓐᖑᕐᑎᓪᓗᒋᑦ; ᑭᐊ ᑎᒥᒃᑯᑦ ᓯᓚᑐᔪᑦ ᐅᑎᒧᑦ ᓵᑎᑉᐰᑦ, ᖃᐅᔨᒪᓂᖏᓪᓗ ᓯᓔᓐᓂᐅᓕᕐᑎᓪᓗᒋᑦ; 26ᑭᓇ ᓱᓕᓂᖏᓐᓂᒃ ᓇᓗᓁᕐᓯᕙᒃᐸ ᐱᔨᖏᑕ ᐅᖃᐅᓯᕆᔭᖏᓐᓂᒃ, ᐱᓇᓱᐊᕐᐸᒡᓗᓂᓗ ᑎᓕᔭᖏᑕ ᐅᖃᐅᓯᖏᓐᓂᒃ; ᑭᓇ ᔨᕉᓴᓕᒥᒃ ᐅᖃᐅᓯᖃᕐᐸ, ‘ᑖᓐᓇ ᐃᓄᖃᓕᕈᒫᕆᕗᖅ,’ ᔫᑕᐅᓪᓗ ᐃᒡᓗᒐᓴᖏᓐᓄᑦ, ‘ᐃᒡᓗᒐᓴᖏᑦ ᓴᓇᔭᐅᒃᑲᓐᓂᓕᕈᒫᕆᕗᑦ,’ ᐃᒡᓗᕕᓂᖏᓪᓗ ᓯᖁᑦᑎᕐᓯᒪᔪᑦ ᒪᑭᑎᑦᓱᒫᕐᐸᒃᑲ; 27ᑭᓇ ᐅᖃᕐᐸ ᐃᒪᕐᔪᐊᕐᒧᑦ ᐃᑎᔪᒧᑦ, ‘ᓴᓗᐊᓕᕆᑦ! ᑰᖁᑎᑎᓪᓗ ᐃᒪᖃᕈᓐᓁᕐᑎᑦᓱᒪᕙᒃᑲ’; 28#ᑯᕉᓂᑲ ᐂᑉᐸᖏᑦ 36:23; ᐄᓱᕋ 1:2.ᑭᓇ ᓮᕋᓯᒥᒃ ᐅᖃᕈᑎᖃᕐᓯᒪᕚ, ‘ᑖᓐᓇ ᐰᕐᓯᔨᖁᑎᒋᕙᕋ, ᑖᑦᓱᒪᓗ ᐱᓇᓱᐊᕐᓂᐊᕐᓯᒪᔭᒃᑲ ᑲᔪᓯᑎᑦᓱᒫᕐᐰᑦ,’ ᐅᖃᕐᓗᓂᓗ ᔨᕉᓴᓕᒧᑦ, ‘ᓴᓇᔭᐅᒃᑲᓐᓂᕈᒫᕐᐳᑎᑦ,’ ᑐᒃᓯᐊᕐᕕᒡᔪᐊᒧᓪᓗ ᐅᖃᕆᓪᓗᓂ, ‘ᑐᓐᖓᕕᒃᑎᑦ ᐋᖅᑭᒃᓱᕐᑕᐅᔪᒫᕐᐳᑦ.’”
Currently Selected:
ᐂᓮᐊᓯᐅᑉ ᐊᒡᓚᖏᑦ 44: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
