ᐂᓮᐊᓯᐅᑉ ᐊᒡᓚᖏᑦ 43
43
ᒎᑎᐅᑉ ᓴᐳᑦᔨᓂᐊᕐᓂᕋᕐᓂᖓ ᐃᓄᖁᑎᒥᓂᒃ
1ᒫᓐᓇᓕ ᐊᑕᓂᖅ ᐅᖃᕐᐳᖅ, ᐃᓕᑦᓯᓐᓂᒃ ᐱᓐᖑᕐᑎᑦᓯᓚᐅᕐᑐᖅ ᔧᑰᑉ ᑭᖑᕚᖏᓐᓂᒃ, ᓴᓇᓚᐅᕐᑐᕐᓗ ᐃᓴᕆᐊᓕᒥᒃ: “ᓯᕘᕋᓇᒃ ᐱᐅᓕᓯᒪᒐᒃᑭᑦ; ᕾᖁᓚᐅᕐᐸᖏᑦ ᐊᑏᑦ ᑍᓪᓗᒍ, ᐱᒋᒐᒃᑭᑦ. 2ᐃᒪᒃᑰᕋᓗᐊᕈᕕᑦ ᐱᖃᑎᒋᓂᐊᕐᐸᒋᑦ; ᑰᒃᑰᕋᓗᐊᕈᕕᓪᓗ ᓴᕐᕙᐅᓂᐊᓐᖏᓚᑎᑦ. ᐃᑯᒪᒃᑰᕋᓗᐊᕈᕕᑦ ᐃᑯᐊᓪᓚᒃᑕᐅᓂᐊᓐᖏᓚᑎᑦ, ᐃᑯᒪᒧᓪᓗ ᐆᑕᐅᓂᐊᓐᖏᓚᑎᑦ. 3ᐅᕙᖓ ᐊᑕᓂᐅᒐᒪ ᒎᑏᑦ, ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᑦ ᐱᐅᓕᔩᑦ; ᐄᑦᔨᑉᑎ ᑐᓂᕙᕋ ᐃᓕᖕᓄᑦ ᐊᑭᓕᐅᑎᒋᓪᓗᒍ, ᐃᑎᐅᐱᐊᓗ ᓰᐸᓗ ᐃᓕᖕᓄᑦ ᑕᐅᕐᓰᑦᔪᑎᒋᓪᓗᒋᒃ. 4ᐃᓪᓕᕐᓇᕐᑐᐊᓘᒐᕕᑦ ᑕᑯᓪᓗᑎᑦ, ᐅᐱᓐᓇᕐᓗᑎᑦ, ᓇᒡᓕᒋᓪᓗᑎᓪᓗ; ᑍᒤᒻᒪᑦ ᐃᓄᐃᑦ ᑐᓂᓂᐊᕐᐸᒃᑲ ᐃᓕᖕᓄᑦ, ᐃᓄᐃᓪᓗ ᑕᐅᕐᓯᐅᑎᓗᒋᑦ ᐃᓅᓯᕐᓄᑦ. 5ᐃᕐᓯᓇᒃ, ᐱᖃᑎᒋᒐᒃᑭᑦ; ᑭᖑᕚᑎᑦ ᑎᑭᑎᑦᓱᒫᕐᐸᒃᑲ ᓯᕿᓂᐅᑉ ᓄᐃᕕᐊᑕ ᓇᓛᓂᑦ, ᑲᑎᑎᕐᓗᓯᓗ ᓯᕿᓂᐅᑉ ᓂᐱᕕᐊᑕ ᓇᓛᓂᑦ. 6ᐅᓐᓄᐊᓪᓗᐊᑉ ᓇᓛᓃᑦᑐᑦ ᐅᖃᐅᑎᔪᒫᕐᐸᒃᑲ, ‘ᓴᒃᑯᓕᕐᓯᐅᒃ.’ ᐅᓪᓗᓪᓗᐊᓪᓗ ᓇᓛᓂᕐᒥᐅᑦ ᐅᖃᐅᑎᓗᒋᑦ, ‘ᐅᓂᒃᑎᓯᒪᑦᑍᓕᓯᒋᒃ.’ ᐃᕐᓂᒃᑲ ᓄᓇᓂ ᐅᖓᓯᒃᑐᓃᑦᑐᑦ ᕾᑎᑕᐅᓕᑦ, ᐸᓂᒃᑲᓗ ᓄᓇᕐᔪᐊᑉ ᑭᒡᓕᖓᓃᑦᑐᑦ ᕾᑎᑕᐅᓗᑎᒃ. 7ᑕᒪᕐᒥᒃ ᐊᑎᒃᑯᑦ ᕾᖁᔭᐅᓯᒪᔪᑦ, ᐱᓐᖑᕐᑎᓚᐅᕐᑕᒃᑲ ᓂᕐᑐᕐᑕᐅᑦᔪᑎᒃᓴᓐᓄᑦ; ᐋᖅᑭᒃᓱᓚᐅᕋᒃᑭᑦ, ᐃᓄᓕᐊᕆᓪᓗᒋᓪᓗ.”
ᐃᓴᕆᐊᓕᒥᐅᑦ ᑕᐅᑐᖏᓐᓂᖓᑦ ᑐᓵᖏᓐᓂᖓᓪᓗ
8ᕾᑦᔪᑎᓕᕐᓯᐅᒃ ᐃᔨᖃᕋᓗᐊᕐᓗᑎᒃ ᑕᐅᑐᖏᑦᑐᑦ, ᓯᐅᑎᖃᕋᓗᐊᕐᓗᑎᒡᓗ ᑐᓵᖏᑦᑐᑦ. 9ᐃᓅᖃᑎᒌᒡᔪᐊᓕᒫᑦ ᓇᑭᑐᐃᓐᓇᖅ ᑲᑎᖃᑎᒌᓚᐅᕐᓕᑦ, ᐃᓄᐃᓪᓗ ᑲᑎᒪᓚᐅᕐᓕᑦ, ᑲᑎᒪᔪᑦ ᓇᓪᓕᐊᑦᑕ ᑕᒪᓐᓇ ᓇᓗᓁᕈᓐᓇᕐᐸᐅᒃ, ᑕᑯᑎᓪᓗᑕᓗ ᐊᑐᓚᐅᕐᑐᓂᒃ ᐊᓂᒍᕐᓯᒪᓕᕐᑐᓂᒃ? ᖃᐅᔨᓯᒪᔪᑦ ᓱᓕᑦᓯᐊᕐᓂᖏᑦ ᓇᓗᓇᕈᓐᓃᕐᑎᑕᐅᖁᓪᓗᒋᑦ, ᑐᓴᕐᑎᓯᐅᒃ ᐅᖃᕈᓐᓇᕐᓯᖁᓪᓗᒋᑦ, “ᑕᒪᓐᓇ ᓱᓕᕗᖅ.” 10ᐊᑕᓂᖅ ᐅᖃᕐᐳᖅ, “ᐃᓕᑦᓯ ᖃᐅᔨᓯᒪᔪᖁᑎᒋᕙᑦᓯ, ᐱᔨᒋᓪᓗᓯᓗ ᓂᕈᐊᕐᓯᒪᒐᑦᓯ, ᐅᕙᓐᓂᒃ ᖃᐅᔨᒪᖁᓪᓗᓯ ᐅᒃᐱᕆᓗᖓᓗ, ᑐᑭᓯᖁᓪᓗᓯᓗ ᐅᕙᖓᐅᒐᒪ, ᓯᕗᓂᓐᓂᒃ ᒎᑎᑕᖃᕐᓯᒪᖏᒻᒪᑦ, ᑭᖑᓂᕐᒥᓗ ᒎᑎᑕᖃᕐᓂᐊᖏᓐᓂᕗᖅ. 11ᐅᕙᖓ, ᐅᕙᖓᐅᕗᖅ ᐊᑕᓂᖅ, ᓴᓂᒃᑯᑦ ᐊᓯᓐᓂᒃ ᐱᐅᓕᔨᑕᖃᓐᖏᓚᖅ. 12ᓇᓗᓁᕐᓯᓚᐅᕐᐳᖓ ᐱᐅᓕᒃᓯᓪᓗᖓᓗ, ᐅᖃᐅᓯᖃᕐᓗᖓᓗ, ᐊᓯᓐᓂᒃ ᒎᑎᒋᔭᐅᔪᓂᒃ ᒎᑎᑕᖃᖏᒻᒪᑦ ᐃᓕᑦᓯᓐᓂ; ᑕᒪᑐᒥᖓ ᖃᐅᔨᓯᒪᔪᖁᑎᒋᕙᑦᓯ,” ᐊᑕᓂᖅ ᐅᖃᕐᐳᖅ. 13“ᒎᑎᐅᒐᒪ, ᐅᓪᓗᐃᑦ ᐱᒋᐊᓚᐅᕐᑎᓐᓇᒋᑦ ᓱᓕ ᐅᕙᖓᐅᕗᖓ ᑖᓐᓇᑦᓮᓐᓇᖅ; ᓇᓪᓕᐊᓪᓘᓐᓃᑦ ᑎᒍᒥᐊᕐᑕᓐᓂᒃ ᐲᕐᓯᔪᓐᓇᓐᖏᓚᖅ; ᐱᓇᓱᐊᕐᓂᒃᑲᓗ ᑭᓇᒧᓪᓘᓐᓃᑦ ᐊᒡᕕᐊᕐᑕᐅᔪᓐᓇᕋᑎᒃ.”
ᐹᐱᓘᓂᒥᐅᓄᑦ ᐱᔭᐅᑦᔮᖏᓐᓂᕅᓂᖓ
14ᐃᒫᒃ ᐊᑕᓂᖅ ᐅᖃᕐᐳᖅ, ᓴᐳᑦᔨᔨᓯ, ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᑦ: “ᐱᑦᔪᑎᒋᓗᓯ ᐹᐱᓘᓂᒧᑦ ᑎᓕᓯᔪᒪᕗᖓ, ᓵᓚᒋᔭᐅᑎᓪᓗᒋᑦ ᕿᒫᑎᑕᐅᖁᓪᓗᒋᑦ, ᑲᐅᓪᑎᐊᒥᐅᑦ ᐅᒥᐊᕐᔪᐊᖁᑎᒥᖕᓂᒃ ᖁᕕᐊᓲᑎᖃᕐᐸᒃᑐᑦ ᐅᒡᒍᐊᕈᑎᖃᓕᖁᓪᓗᒋᑦ. 15ᐅᕙᖓᐅᕗᖅ ᐊᑕᓂᖅ, ᐃᑦᔪᕐᓁᑦᑐᖁᑎᓯ, ᐃᓴᕆᐊᓕᒥᐅᓂᒃ ᐱᓐᖑᕐᑎᑦᓯᓚᐅᕐᑐᖅ, ᐊᖓᔪᖅᑳᕐᔪᐊᓯ.” 16ᐊᑕᓂᖅ ᐃᒫᒃ ᐅᖃᕐᐳᖅ, “ᐊᖅᑯᑎᑖᕐᑎᑦᓯᓚᐅᕐᑐᖅ ᐃᒪᒃᑯᑦ, ᐃᒪᕐᔪᐊᓪᓗ ᐃᓗᐊᒍᑦ ᐱᓱᒡᕕᒋᓂᐊᕐᑕᑦᓯᓐᓂᒃ ᐋᖅᑭᒃᓯᓚᐅᕐᑐᖅ. 17ᕿᒻᒥᕐᔪᐊᓃᑦᑐᓂᒃ ᐊᒃᓴᓗᐊᓕᖕᓃᑦᑐᓂᒡᓗ, ᐅᓇᑕᕐᑎᓂᒃ ᐱᔪᓐᓇᕐᓂᕐᔪᐊᖃᕐᑐᓂᒡᓗ; ᑖᒃᑯᐊ ᐅᕐᕈᑎᒻᒪᒋᑦ, ᒪᑭᑦᓵᓚᐅᓐᖏᓚᑦ, ᓄᖑᑕᐅᓚᐅᕐᐳᑦ ᖁᓪᓕᐅᑉ ᒪᓂᖓᑐᑦ ᖃᒥᑕᐅᔪᑎᑐᑦ. 18ᐊᑐᓚᐅᕐᑕᓯ ᐊᓂᒍᕐᓯᒪᔪᑦ ᐃᖅᑲᐅᒪᔪᓐᓁᕐᓯᒋᑦ, ᖄᖏᕐᓯᒪᓕᕐᑐᓪᓗ ᑎᒍᒥᐊᕋᓱᐊᕈᓐᓁᕐᓗᒋᑦ. 19ᑕᑯᒋᑦ, ᓄᑖᒥᒃ ᐱᓇᓱᐊᓕᕐᐳᖓ; ᒫᓐᓇ ᓴᖅᑭᖃᑦᑕᓕᕐᐳᖅ, ᑕᑯᓯᒪᖏᑉᐱᓯᐅᒃ? ᐊᖅᑯᑎᓕᐅᕐᓂᐊᕐᐳᖓ ᐃᓄᖃᖏᑦᑐᒥ ᑰᓕᐅᕐᓗᖓᓗ ᓯᐅᕅᓐᓇᕐᒥ. 20ᐆᒪᔪᓄᑦ ᓄᔪᐊᕐᑐᓄᑦ ᐅᐱᒋᔭᐅᔪᒫᕐᐳᖓ, ᑎᕆᒐᓂᐊᖓᔪᓄᑦ ᔮᑯᓄᑦ ᑎᖕᒥᐊᕐᔪᐊᓄᓪᓗ ᐋᔅᑐᕆᑦᓯᓄᑦ; ᐃᒪᕐᑖᕐᑎᑦᓯᔪᒫᕋᒪ ᓄᓇᒥ ᐃᓄᖃᖏᑦᑐᒥ, ᑰᓕᐅᕐᓗᖓᓗ ᓯᐅᕅᓐᓇᕐᒥ, ᐃᓄᖁᑎᓐᓄᑦ ᓂᕈᐊᕐᓯᒪᔭᓐᓄᑦ ᐃᒥᕆᔭᐅᔪᒫᕐᑐᒥᒃ. 21ᑖᒃᑯᐊ ᐃᓄᖁᑎᓕᐊᕆᓚᐅᕋᒃᑭᑦ ᐅᕙᓐᓄᑐᐊᖅ ᐱᒋᔭᐅᖁᓪᓗᒋᑦ; ᑖᒃᑯᐊᓗ ᓂᕐᑐᕐᓇᕐᓂᕋ ᐅᖃᐅᓯᕆᔪᒫᕐᐹᑦ. 22ᐃᓕᑦᓯᓕ ᐅᕙᓐᓄᑦ ᑐᒃᓯᐊᓚᐅᓐᖏᓚᓯ ᔧᑰᑉ ᑭᖑᕚᖏᑦ; ᐅᕙᓐᓂᒡᓗ ᐃᓗᖏᕐᑐᕈᑎᖃᓚᐅᕋᓯ, ᐃᓴᕆᐊᓕᒥᐅᖑᔪᓯ! 23ᓰᐱᓂᒃ ᐃᑯᐊᓪᓚᒡᓗᒋᑦ ᑐᓂᕐᕈᓯᕈᑎᒃᓴᑦᓯᓐᓂᒃ ᕾᑦᓯᓚᐅᓐᖏᓚᓯ, ᐅᐱᒋᓚᐅᓐᖏᓚᑦᓯᓐᖓᓗ ᑐᓂᕐᕈᓯᕐᓂᑦᓯᒍᑦ ᐆᒪᔪᒥᒃ ᑐᖁᑦᓯᓗᓯ, ᓂᐊᖂᔭᒃᓴᓂᒃ ᑐᓂᓯᖁᔨᓗᖓ ᐅᖁᒤᒃᓴᕐᑎᑦᓯᓚᐅᖏᓐᓇᒪ ᐃᓕᑦᓯᓂᒃ, ᐅᕝᕙᓘᓐᓃᑦ ᑎᐱᑦᓯᐊᕆᒃᑐᓂᒃ ᑐᓂᕐᕈᓯᖁᔨᓂᓐᓄᑦ ᐃᕿᐊᓐᖑᕐᑎᓚᐅᓐᖏᓚᑦᓯ. 24ᓂᐅᕕᓚᐅᓐᖏᓚᓯ ᑎᐱᑦᓯᐊᕆᒃᑐᓂᒃ ᓰᕐᓇᕐᑐᓂᒃ ᐅᕙᓐᓄᑦ ᑐᓂᕐᕈᑎᒃᓴᓂᒃ, ᐆᒪᔪᓪᓗ ᑐᓂᕐᕈᑎᒋᕙᒃᑕᓯ ᑐᓐᓄᖏᓐᓂᒃ ᖁᕕᐊᒋᔭᓐᓂᒃ ᑐᓂᕐᕈᓯᕐᕕᒋᓚᐅᓐᖏᓚᑦᓯᓐᖓ, ᑭᓯᐊᓂᓕ ᐅᖁᒤᑦᑐᒦᑎᑉᐸᑦᓯᓐᖓ ᐊᔪᕐᑐᓕᓂᑦᓯᓐᓄᑦ, ᐱᔭᒃᓴᕆᓐᖏᑕᑦᓯᓐᓂᒃ ᐱᓇᓱᐊᖃᑦᑕᕐᓂᑦᓯᓐᓄᑦ ᐃᕿᐊᓐᖑᕐᑎᖔᕐᐸᑦᓯᓐᖓ. 25ᐅᕙᖓ, ᓇᖕᒥᓂᖅ ᐅᕙᖓᐅᕗᖅ ᐊᔪᕐᑐᓕᓂᓯ ᐲᔭᓚᐅᕐᐸᒃᑲ ᐅᕙᖓ ᓇᖕᒥᓂᖅ ᐱᑦᔪᑎᒋᓪᓗᖓ, ᐃᖅᑲᐅᒪᓂᐊᕈᓐᓃᕐᐸᒃᑲᓗ ᐊᔪᕐᓂᓯ. 26ᐊᑏ ᐃᖅᑲᐅᒪᓚᐅᕐᓯᓐᖓ, ᐃᖅᑲᕐᑐᐃᕕᖕᒧᐊᕐᓗᑕ ᐃᖅᑲᕐᑐᕐᑎᒌᓚᐅᕐᑕ; ᓈᒻᒪᒃᓴᖏᑦᔪᑎᓯ ᐅᖃᐅᓯᕆᓚᐅᕐᓯᐅᒃ, ᓱᓕᓂᓯ ᓴᖅᑭᖁᓪᓗᒋᑦ. 27ᓯᕗᓕᑦᓯ ᓯᕗᓪᓕᕐᐹᕕᓂᖓᑦ ᐊᔪᕐᑐᓕᓚᐅᕐᐳᖅ, ᐃᑲᔪᕐᑎᒋᔭᓯᓗ ᐊᔪᕐᑐᓕᓚᐅᕐᐳᑦ ᐅᕙᓐᓄᑦ. 28ᑍᒤᒻᒪᑦ ᐊᖓᔪᖅᑳᓯ ᓇᕐᕈᓇᕐᓯᑎᑦᓯᓚᐅᕐᒪᑕ ᑐᒃᓯᐊᕐᕕᒡᔪᐊᖁᑎᓐᓂᒃ: ᔧᑰᑉ ᑭᖑᕚᖏᑦ ᓄᖑᕋᕐᑕᐅᔪᒃᓴᓐᖑᕐᑎᓚᐅᕐᐸᒃᑲ, ᐃᓴᕆᐊᓕᒥᐅᓪᓗ ᐆᒥᒋᔭᒃᓴᓐᖑᕐᑎᓪᓗᒋᑦ.”
Currently Selected:
ᐂᓮᐊᓯᐅᑉ ᐊᒡᓚᖏᑦ 43: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
