ᐂᓮᐊᓯᐅᑉ ᐊᒡᓚᖏᑦ 45
45
ᐊᑕᓂᐅᑉ ᓂᕈᐊᕐᓂᖓ ᓮᕋᓯᒥᒃ
1“ᐊᑕᓂᖅ ᐃᒫᒃ ᐅᖃᕐᐳᖅ, ᐅᕐᓱᕐᑎᕐᓯᒪᔭᒥᓄᑦ ᓮᕋᓯᒧᑦ, ᑖᓐᓇ ᑕᓕᕐᐱᖓᒍᑦ ᑎᒍᕙᕋ ᓵᓚᖃᖁᓪᓗᒍ ᐃᓅᖃᑎᒌᒡᔪᐊᓂᒃ ᓯᕗᓂᕐᒥᓃᑦᑐᓂᒃ ᐊᖓᔪᖅᑳᕐᔪᐊᓪᓗ ᐊᖓᔪᖅᑳᕐᔪᐊᕐᓯᐅᑎᖏᓐᓂᒃ ᐲᔧᖁᓪᓗᒍ, ᐅᒃᑯᐊᕐᔪᐊᓂᒃ ᒪᕐᕉᓕᖓᔪᓂᒃ ᐅᒃᑯᐃᕐᓯᑦᔪᑎᔪᒫᕐᐸᕋ ᐃᑎᕐᑕᕐᕖᓪᓗ ᐅᒃᑯᐊᕐᑕᐅᔪᓐᓇᕐᓂᐊᓐᖏᓚᑦ. 2ᓯᕗᓂᕐᓃᓐᓂᐊᕐᐳᖓ ᖃᖅᑲᓂᒃ ᒪᓂᖅᑲᒃᓮᓗᖓ, ᐃᑎᕐᑕᕐᕕᖕᓂᒃ ᑲᓐᓄᔭᓂᒃ ᓯᖁᑦᑎᕆᓗᖓ ᐅᒃᑯᐊᓪᓗ ᓴᕕᕋᔧᑦ ᐅᕐᕉᕋᕐᑎᓪᓗᒋᑦ. 3ᐱᒃᑯᒥᓇᕐᑐᓂᒃ ᐱᑖᕐᑎᓐᓂᐊᕐᐸᒋᑦ ᑖᕐᑐᒦᑦᑐᓂᑦ ᐊᔪᕐᓴᕈᓐᓃᕈᑎᓂᒡᓗ ᐃᔨᕐᑐᕐᓯᒪᔪᓂᒃ, ᖃᐅᔨᓕᖁᓪᓗᑎᑦ ᐅᕙᖓ ᑍᒤᑎᑦᓯᒐᒪ ᐊᑕᓂᖅ, ᐃᓕᖕᓂᒃ ᕾᖁᔨᓯᒪᔪᖅ ᐊᑏᑦ ᑍᓪᓗᒍ, ᐅᕙᖓᐅᕗᖅ ᐃᓴᕆᐊᓕᒥᐅᑦ ᒎᑎᖓᑦ. 4ᔧᑯ ᐱᔨᒐ ᐱᓪᓗᒍ, ᐃᓴᕆᐊᓕᓗ ᓂᕈᐊᕐᓯᒪᔭᕋ, ᐊᑏᑦ ᑍᓪᓗᒍ ᕾᖁᓚᐅᕐᐸᒋᑦ, ᐊᑎᕐᑖᕐᑎᓚᐅᕐᐸᒋᑦ ᐅᕙᓐᓂᒃ ᖃᐅᔨᒪᓐᖏᑲᓗᐊᕐᑎᓪᓗᑎᑦ. 5ᐅᕙᖓᐅᕗᖅ ᐊᑕᓂᖅ, ᐊᓯᓐᓂᒃ ᐊᑕᓂᕐᑕᖃᓐᖏᓚᖅ; ᐊᓯᓐᓂᒡᓗ ᒎᑎᑕᖃᕋᓂ. ᕿᑎᕈᓯᓚᐅᕐᐸᒋᑦ, ᐅᕙᓐᓂᒃ ᖃᐅᔨᒪᖏᒃᑲᓗᐊᕐᑎᓪᓗᑎᑦ. 6ᑍᒤᓕᐅᓚᐅᕐᐳᖓ, ᐃᓄᐃᑦ ᑐᑭᓯᓕᖁᓪᓗᒋᑦ ᓯᕿᓂᐅᑉ ᓄᐃᓕᕐᓂᖓᓂᑦ ᓂᐱᕕᖓᓄᑦ ᐊᓯᓐᓂᒃ ᐱᑕᖃᖏᒻᒪᑦ. ᐅᕙᖓᐅᕗᖅ ᐊᑕᓂᖅ, ᐊᓯᖃᖏᑦᑐᖅ. 7ᖃᐅᒪᔪᒥᒃ ᐱᒋᐊᕐᑎᑦᓯᓚᐅᕐᐳᖓ ᑖᕐᑐᕐᓗ ᓴᖅᑭᑎᓪᓗᒍ, ᓮᒻᒪᕐᑎᑕᐅᓂᖅ ᐱᒋᐊᕐᑎᓯᒪᕙᕋ ᑲᑉᐱᐊᓇᕐᑐᒦᓐᓂᕐᓗ ᓴᖅᑭᑎᒃᑭᓪᓗᒍ, ᐅᕙᖓᐅᕗᖅ ᐊᑕᓂᖅ, ᑕᒪᒃᑯᓂᖓᓕᒫᖅ ᐱᓇᓱᐊᕐᐸᒃᑐᖅ. 8ᕿᓔᑦ ᓯᓚᓗᒡᓕᑦ, ᑕᑉᐹᓐᖓᑦ ᖁᑦᓯᒃᑐᒥᑦ, ᓯᓚ ᑯᕕᓕ ᓇᓛᒎᕐᓂᕐᒥᒃ; ᓄᓇᕐᔪᐊᕐᓗ ᐂᑦᑕᕐᓕ; ᐱᐅᓕᔭᐅᓂᖅ ᐱᕈᕐᑐᑎᑐᑦ ᓴᖅᑭᓐᓂᐊᕐᒪᑦ, ᓇᓛᒎᕐᓂᕐᓗ ᐱᕈᖃᑎᒋᓕᕐᓕᐅᒃ; ᐅᕙᖓᐅᕗᖅ ᐊᑕᓂᖅ ᐱᓐᖑᕐᑎᑦᓯᓚᐅᑐᖅ ᑖᒃᑯᓂᖓ.”
ᐊᑕᓂᖅ ᐊᑕᓂᐅᕗᖅ ᐱᓐᖑᕐᑎᑕᐅᓯᒪᔪᓄᑦ ᐱᔪᖃᓚᐅᕐᓯᒪᔪᓄᓪᓗ
9 #
ᐂᓮᐊᓯ 29:16; ᕉᒪᒥᐅᓄᑦ 9:20. “ᑲᑉᐱᐊᓐᓇᒦᒃ ᐱᓐᖑᕐᑎᑦᓯᔨᒥᓄᑦ ᐂᕙᓇᓱᒃᑐᖅ, ᒪᕐᕋᖁᑎᓕᐊᖑᔪᖅ ᒪᕐᕋᐅᔭᓕᐅᕐᑎᒧᑦ ᐅᖃᕈᓐᓇᕐᐹ, ‘ᓱᓇᓕᐅᕐᐲᑦ?’ ᐅᕝᕙᓗ ᐅᖃᕈᓐᓇᕐᐹ ᓴᓇᔨᒥᓄᑦ, ‘ᐅᓇ ᓴᓇᔧᑦ ᑎᒍᒥᐊᕐᕕᖃᖏᑦᑐᖅ?’ 10ᑲᑉᐱᐊᓐᓇᒦᒃ ᐊᑖᑕᒥᓄᑦ ᐅᖃᕐᑐᖅ, ‘ᓱᖕᒪᑦ ᕿᑐᕐᖓᕐᑖᕋᓱᐊᕐᐱᑦ?’ ᐅᕝᕙᓗ ᐊᓈᓇᒥᓂᒃ ᐅᖃᐅᑦᔨᔪᖅ, ‘ᓱᖕᒪᑦ ᐃᕐᓂᐊᕆᓐᓂᕐᐱᖓ?’” 11ᐊᑕᓂᖅ ᐃᒫᒃ ᐅᖃᕐᐳᖅ, ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᑦ, ᐱᓐᖑᕐᑎᑦᓯᔨᖓᓪᓗ: “ᓈᒻᒪᒃᓴᖏᓐᓂᕐᒧᑦ ᐊᐱᕐᓱᕈᒪᕕᓯᓐᖔ, ᕿᑐᕐᖓᓐᓂᒃ ᐱᑦᔪᑎᖃᕐᓗᓯ, ᐅᕙᓐᓂᒡᓗ ᖃᓄᐃᓕᐅᖁᔨᕕᓰ ᐊᒡᒐᓐᓄᑦ ᓴᓇᓯᒪᔭᓐᓂᒃ? 12ᐅᕙᖓ ᓄᓇᕐᔪᐊᖅ ᓴᓇᓚᐅᕐᐸᕋ, ᐃᓄᒋᓂᐊᕐᑕᖏᓐᓂᒡᓗ ᓴᖅᑭᑎᑦᓯᓪᓗᖓ; ᐊᒡᒐᓐᓄᓪᓗ ᕿᓔᑦ ᐃᓯᕕᑎᓚᐅᕐᐸᒃᑲ, ᕿᓚᖕᒦᑦᑐᓪᓗ ᐋᖅᑭᒃᓯᒪᕗᑦ ᐱᖁᔨᓂᕋ ᒪᓕᒡᓗᒍ. 13ᓮᕋᓯ ᒪᑭᑎᓯᒪᕙᕋ ᓇᓛᒎᕐᓂᓐᓄᑦ, ᐊᖅᑯᑎᒋᓂᐊᕐᑕᓕᒫᖏᓪᓗ ᑐᑭᓕᐊᕐᓯᑎᓐᓂᐊᕐᐸᒃᑲ; ᐃᒡᓗᒐᓴᒡᔪᐊᖁᑎᒃᑲ ᓴᓇᔪᒫᕐᐰᑦ ᐊᐅᓪᓚᕈᑦᔭᐅᓯᒪᔪᖁᑎᒃᑲᓗ ᑎᒍᔭᐅᓯᒪᔪᓐᓃᕐᑎᓪᓗᒋᑦ, ᐊᑭᓕᕐᑕᐅᓂᕐᒨᖏᑦᑐᖅ ᐊᑭᓕᕐᑕᐅᔪᒪᓂᕐᒨᖏᑦᑐᕐᓗ,” ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕐᐳᖅ. 14ᐊᑕᓂᖅ ᐃᒫᒃ ᐅᖃᕐᐳᖅ: “ᐄᑦᔨᑉᑎᒥᐅᑦ ᐊᔪᕐᓴᖏᑦᔪᑎᖏᑦ ᐃᑎᐅᐱᐊᒥᐅᓪᓗ ᓂᐅᕕᐊᒃᓴᖁᑎᖏᑦ, ᓴᐲᓐᒥᐅᓪᓗ ᐃᓄᖏᑦ ᐊᖏᔫᑎᐊᓗᐃᑦ, ᐃᓕᑦᓯᓐᓄᑦ ᑎᑭᑦᓱᒫᕐᐳᑦ ᐱᒋᓕᕐᓗᓯᐅᒡᓗ; ᐃᓕᑦᓯᓐᓂᒃ ᒪᓕᒍᒫᕐᐳᑦ, ᐊᑦᓱᖏᐅᑎᓄᑦ ᓴᕕᕋᔭᖕᓄᑦ ᐊᑦᓱᖏᕐᓯᒪᓗᑎᒃ; ᐃᓕᑦᓯᓐᓄᑦ ᓵᑦᓯᓐᓄᑦ ᓰᖅᑯᕐᓗᑎᒃ ᐅᖃᕐᕕᒋᔪᒫᕐᐹᓯ, ‘ᐄᓛᒃ ᒎᑎᒧᑦ ᐃᓚᒋᔭᐅᕗᓯ, ᐊᓯᐊᓂᒡᓗ ᒎᑎᑕᖃᓐᖏᓚᖅ.’” 15ᓱᓕᔪᒥᒃ ᐃᕝᕕᑦ ᒎᑎᐅᒐᕕᑦ, ᐃᒻᒥᓂᒃ ᐃᔨᕐᓯᒪᔪᑎᑦ, ᐃᓴᕆᐊᓕᒥᐅᑦ ᒎᑎᖓᑦ, ᐱᐅᓕᔨ. 16ᒎᑎᓐᖑᐊᓕᐅᕐᐸᒃᑐᓕᒫᑦ ᑲᓐᖑᓱᒃᑎᑕᐅᔪᒫᕐᐳᑦ ᐅᐱᓐᓇᕈᓐᓃᕐᑎᑕᐅᓗᑎᒡᓗ ᐊᑕᖏᕐᓗᑎᒃ; ᐊᐅᓪᓚᕈᒫᕐᐳᑦ ᐊᑕᐅᑦᓯᒃᑯᑦ ᓇᓗᓕᕐᓯᒪᓕᕐᓗᑎᒃ. 17ᐃᓴᕆᐊᓕᒥᐅᓪᓕ ᐊᑕᓂᕐᒧᑦ ᐱᐅᓕᔭᐅᔪᒫᕐᐳᑦ ᐱᐅᓕᔭᐅᓂᕐᒧᑦ ᐃᓱᖃᖏᑦᑐᒧᑦ; ᑲᓐᖑᓇᕐᑐᒦᓐᓂᐊᖏᓚᓯ ᐅᐱᓐᓇᕈᓐᓃᕐᑎᑕᐅᓂᐊᕋᓯᓗ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. 18ᐃᒫ ᑕᕝᕙ ᐊᑕᓂᖅ ᐅᖃᕐᐳᖅ, ᕿᓚᖕᒥᐅᓂᒃ ᐱᓐᖑᕐᑎᑦᓯᓚᐅᕐᑐᖅ, ᑖᓐᓇ ᒎᑎᐅᖕᒪᑦ, ᓄᓇᕐᔪᐊᖅ ᐋᖅᑭᒃᓱᓚᐅᕐᒪᒍ ᓴᓇᓪᓗᒍ ᐃᓂᓕᐅᕐᓗᒍᓗ; ᐱᓐᖑᕐᑎᓚᐅᓐᖏᓛ ᓱᓇᖃᖁᓇᒍ, ᐱᓐᖑᕐᑎᓚᐅᕐᐹᓕ ᐃᓄᖃᕐᑐᒃᓴᐅᖁᓪᓗᒍ, “ᐅᕙᖓᐅᕗᖅ ᐊᑕᓂᖅ, ᐊᓯᓐᓂᒡᓗ ᐱᑕᖃᕋᓂ. 19ᐃᔨᕋᕐᑐᕐᓗᖓ ᐅᖃᓚᐅᓐᖏᓚᖓ, ᓄᓇᐅᑉ ᑖᕐᓂᖓᓃᑦᑐᒥ; ᔧᑰᑉ ᑭᖑᕚᖏᑦ ᐅᖃᐅᑎᓚᐅᓐᖏᓚᒃᑲ, ‘ᕿᓂᕐᓯᓐᖓ ᑕᒪᐅᖎᓐᓇᖅ,’ ᐅᕙᖓ ᐊᑕᓂᖅ ᓇᓛᒎᕐᑐᒥᒃ ᐅᖃᐅᓯᖃᕐᐳᖓ, ᓈᒻᒪᓈᑦᓯᐊᕐᑐᓂᒡᓗ ᓇᓗᓁᕐᓯᓲᖑᓪᓗᖓ.”
ᓯᓚᕐᔪᐊᕐᒥᐅᓄᑦ ᐊᑕᓂᐅᔪᖅ ᐹᐱᓘᓂᒥᐅᓪᓗ ᒎᑎᓐᖑᐊᖏᑦ
20“ᑲᑎᕐᓱᕐᓗᓯ ᕾᓚᐅᕆᑦᓯ; ᖃᒡᓕᒋᐊᕐᓗᓯ ᐊᑕᐅᑦᓯᒃᑯᑦ, ᐃᓕᑦᓯ ᐊᓐᓇᒃᓯᒪᔪᓯ ᐃᓅᖃᑎᒌᒡᔪᐊᓂᑦ. ᖃᐅᔨᒪᓐᖏᓚᑦ ᒎᑎᓐᖑᐊᓂᒃ ᕿᔪᖕᓂᒃ ᓴᓇᓯᒪᔪᓂᒃ ᐊᒡᔭᕐᓯᖃᑦᑕᕐᑐᑦ, ᑐᒃᓯᐊᖃᑦᑕᕐᑐᑦ ᒎᑎᓄᑦ ᐱᐅᓕᓯᔪᓐᓇᖏᑦᑐᓄᑦ. 21ᓇᓗᓁᕐᓯᓕᕆᑦᓯ ᓱᖕᒪᑦ ᑍᒤᒻᒪᖔᑦᓯ ᐅᖃᐅᓯᖃᕐᓗᓯ, ᐊᑏ ᐅᖃᖃᑎᒌᓚᐅᕐᓕᑦ. ᑭᓇ ᓯᕗᓂᐊᓗᐊᓂ ᐱᔪᖃᓛᕐᑐᓂᒃ ᐅᖃᕐᓯᒪᕚ? ᑭᓇ ᐅᖃᕐᓯᒪᕚ ᑕᒪᑐᒥᖓ? ᐅᕙᖓᐅᓐᖏᓛᖅ ᐊᑕᓂᖅ? ᐊᓯᓐᓂᒃ ᓴᓂᓐᓂ ᒎᑎᑕᖃᖏᒻᒪᑦ, ᒎᑎ ᓇᓛᒎᕐᑐᖅ ᐱᐅᓕᔨᐅᓪᓗᓂᓗ; ᐊᓯᓐᓂᒃ ᓴᓂᓐᓂ ᐱᑕᖃᓐᖏᓚᖅ. 22ᐅᕙᓐᓄᑦ ᑕᑯᓴᓚᐅᕆᑦᓯ, ᐱᐅᓕᔭᐅᖁᓪᓗᓯ, ᓄᓇᕐᔪᐊᑉ ᑭᒡᓕᖏᓐᓂᑦ ᐱᓯᒪᔪᓯ ᑕᒪᑦᓯ! ᐅᕙᖓᐅᕗᖅ ᒎᑎ, ᐊᓯᖃᓐᖏᓚᖓ. 23#ᕉᒪᒥᐅᓄᑦ 14:11; ᐱᓕᐱ 2:10,11.ᓇᖕᒥᓂᖅ ᐅᕙᒃᑯᑦ ᐅᖃᕕᒃᓯᒪᒐᒪ ᓴᖑᑎᓐᓂᐊᓐᖏᑕᓐᓂᒃ; ᐅᖃᐅᓯᖅ ᖃᓂᒃᑯᑦ ᐊᓂᓯᒪᔪᖅ ᓇᓛᒎᕐᓂᒃᑯᑦ, ᐅᖅᑭᓐᓇᕐᓂᐊᓐᖏᓚᖅ ᐅᕙᓐᓄᑦ, ᓵᓐᓂ ᓰᖅᑯᓕᒫᑦ ᓰᖅᑯᕐᑐᒃᓴᐅᕗᑦ, ᐅᖃᓕᒫᓪᓗ ᐅᖃᕕᒃᑐᒃᓴᐅᕗᑦ. 24ᐅᖃᕐᑐᒃᓴᐅᕗᑦ, ‘ᐊᑕᓂᒃᑯᑦ ᑭᓯᐊᓂ ᓇᓛᒎᕐᓂᕐᑕᖃᕐᐳᖅ ᐱᔪᓐᓇᕐᓂᕐᑕᖃᕐᓗᓂᓗ. ᑖᑦᓱᒧᖓ ᐃᓄᓕᒫᑦ ᐅᐸᒍᑎᔪᒫᕐᐳᑦ, ᐃᓘᓐᓇᑦᓯᐊᖏᓪᓗ ᑖᑦᓱᒥᖓ ᐊᑭᕋᕐᑐᕐᑐᑦ ᑲᓐᖑᓱᒃᑎᑕᐅᔪᒫᕐᐳᑦ. 25ᐊᑕᓂᕐᒥᓕ ᐃᓴᕆᐊᓕᒥᐅᑦ ᑭᖑᕚᓕᒫᖏᑦ ᓵᓚᖃᕐᑎᑕᐅᔪᒫᕐᐳᑦ, ᓂᕐᑐᕐᓇᕐᑎᑕᐅᓗᑎᒡᓗ.’”
Currently Selected:
ᐂᓮᐊᓯᐅᑉ ᐊᒡᓚᖏᑦ 45: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
