ᐂᓮᐊᓯᐅᑉ ᐊᒡᓚᖏᑦ 42
42
ᐊᑕᓂᐅᑉ ᐱᔨᖓᓂᒃ ᐅᖃᐅᓯᖃᕐᑐᑦ
1 #
ᒫᑎᐅᓯ 3:17; 17:5; ᒫᑯᓯ 1:11; ᓘᑲᓯ 3:22; 9:35. #
ᒫᑎᐅᓯ 12:18-21. “ᑕᑯᓯᐅᒃ ᐱᔨᒐ, ᑖᓐᓇ ᓴᐳᑎᓯᒪᔭᕋ, ᓂᕈᐊᕐᓯᒪᔭᕋ ᑕᕐᓂᕐᒪ ᖁᕕᐊᒋᔭᖓ, ᐊᓂᕐᓂᓐᓂᒃ ᐃᓗᒻᒥᕐᑎᓯᒪᔭᕋ; ᑖᑦᓱᒪ ᐃᓅᖃᑎᒌᒡᔪᐊᑦ ᐊᑦᔨᒌᒃᑎᑦᓯᓂᕐᒥᒃ ᑐᓂᓯᕕᒋᔪᒫᕐᐰᑦ. 2ᕾᒐᓛᕈᒫᓐᖏᓚᖅ, ᓂᐱᖅᑯᕐᑐᔪᒫᕋᓂᓗ, ᐊᖅᑯᑎᓂ ᓂᓪᓕᐊᔪᒫᓐᖏᓚᖅ. 3ᐃᕕᒐᑯᑖᒥᒃ ᓇᑲᑲᓴᒃᓯᒪᔪᒥᒃ ᓇᑲᑦᓯᔪᒫᓐᖏᓚᖅ, ᒪᓂᕐᒥᒡᓗ ᖃᒥᓕᒑᔪᒥᒃ ᖃᒥᑦᓯᔪᒫᓐᖏᓚᖅ, ᓱᓕᓂᒃᑯᑦ ᐊᑦᔨᒌᒃᑎᑦᓯᓂᕐᒥᒃ ᑎᑭᐅᑦᔨᔪᒫᕐᐳᖅ. 4ᑕᒪᐅᖎᓐᓈᕈᒫᓐᖏᓚᖅ ᓴᐱᓕᕋᓂᓗ, ᐊᑦᔨᒌᒃᑎᑦᓯᓂᕐᒥᒃ ᐊᑐᓕᕐᑎᑦᓯᖄᕋᓂ ᓄᓇᕐᔪᐊᕐᒥ; ᐃᒪᐅᓪᓗ ᓯᓈᓂ ᓄᓇᖃᕐᑐᑦ ᐊᔪᕆᕐᑐᐃᑦᔪᑎᖏᓐᓂᒃ ᓂᕆᐅᒍᒫᕐᐳᑦ.” 5#ᐋᐴᓯᑕᓖᑦ 17:24,25.ᒎᑎ ᐊᑕᓂᖅ ᐅᖃᕐᐳᖅ, ᐱᓐᖑᕐᑎᑦᓯᓯᒪᔪᖅ ᕿᓚᖕᒥᒃ ᐃᓯᕕᓪᓗᒋᓪᓗ, ᓯᐊᒻᒪᕐᑎᑦᓯᓚᐅᕐᑐᖅ ᓄᓇᕐᔪᐊᕐᒧᑦ ᑕᕝᕙᓐᖓᑦ ᐱᔪᓂᒃ, ᐃᓄᖕᓂᒃ ᐊᓂᕐᓂᖃᕐᑎᑦᓯᔪᖅ ᑕᕝᕙᓂ ᐃᓂᖃᕐᑐᓂᒃ, ᐊᓂᕐᓂᖃᕐᑎᑦᓯᓪᓗᓂᓗ ᐃᓅᔪᓂᒃ: 6#ᐂᓮᐊᓯ 49:6; ᓘᑲᓯ 2:32; ᐋᐴᓯᑕᓖᑦ 13:47; 26:23.“ᐅᕙᖓ ᐊᑕᓂᐅᔪᖓ, ᕾᖁᓚᐅᕐᐸᒋᑦ ᓇᓛᒎᕐᓂᒃᑯᑦ; ᐊᒡᒐᒃᑯᑦ ᑕᓯᐅᓚᐅᕐᐸᒋᑦ, ᑲᒪᒋᑦᓯᐊᕐᓗᑎᓪᓗ; ᑐᓂᓚᐅᕐᐸᒋᑦ ᐃᓄᖕᓄᑦ ᐊᖏᖃᑎᒌᒍᑕᐅᖁᓪᓗᑎᑦ, ᖃᐅᒪᓂᐅᖁᓪᓗᑎᓪᓗ ᐃᓅᖃᑎᒌᒡᔪᐊᓄᑦ. 7ᑕᐅᑐᖏᑦᑐᓂᒃ ᑕᐅᑐᓕᕐᑎᑦᓯᖁᓪᓗᑎᑦ, ᑎᒍᔭᐅᓯᒪᔪᓂᒃ ᐊᓂᑎᑦᓯᖁᓪᓗᑎᑦ ᑎᒍᔭᐅᓯᒪᕕᖕᒥᑦ, ᑎᒍᔭᐅᓯᒪᕕᐅᓪᓗ ᑖᕐᓂᕐᐹᖓᓃᑦᑐᓂᒃ ᐊᓂᑎᑦᓯᖁᓪᓗᑎᑦ. 8ᐅᕙᖓᐅᕗᖅ ᐊᑕᓂᖅ, ᑖᓐᓇ ᑕᕝᕙ ᐊᑎᕋ; ᐱᓐᓇᕐᓇᕐᓂᕐᔪᐊᕋ ᓇᒧᓪᓘᓐᓃᑦ ᑐᓂᓂᐊᓐᖏᓚᕋ, ᓂᕐᑐᕐᓇᕐᓂᕋᓗ ᒎᑎᓐᖑᐊᓄᑦ ᑐᓂᓂᐊᓐᖏᓚᕋ. 9ᑕᑯᒋᑦ, ᐊᑐᓚᐅᕐᑐᑦ ᐊᓂᒍᕐᓯᒪᓕᕐᐳᑦ, ᒫᓐᓇᓗ ᓄᑖᓂᒃ ᓇᓗᓁᕐᓯᕕᒋᕙᑦᓯ; ᓱᓕ ᐊᑐᓕᓚᐅᕐᑎᓐᓇᒋᑦ ᐃᓕᑦᓯᓐᓄᑦ ᐅᖃᐅᓯᕆᕙᒃᑲ.”
ᓂᕐᑐᐃᓂᖅ
10“ᐊᑕᓂᕐᒧᑦ ᐃᓐᖏᕆᑦᓯ ᐃᓐᖏᕈᒻᒥᒃ ᓄᑖᒥᒃ, ᓂᕐᑐᕐᓯᐅᒃ ᓄᓇᕐᔪᐊᑉ ᑭᒡᓕᖏᓐᓂᑦ! ᐃᒪᕕᒃ ᐃᒃᑑᓕᔮᕐᓕ ᑕᕝᕙᓂᒥᐅᑕᓕᒫᓪᓗ, ᐃᒪᐅᑉ ᑭᒡᓕᖓᓂᒥᐅᑦ ᑕᒫᓂᓗ ᓄᓇᖃᕐᑐᓯ ᓂᕐᑐᐃᖃᑕᐅᒋᑦᓯ. 11ᓱᓇᖃᔪᐃᑦᑐᖅ ᓄᓇᓕᖏᓪᓗ ᓂᓪᓕᐊᓕᕐᓕᑦ ᓂᐱᖅᑯᕐᑐᓗᑎᒃ, ᓄᓇᓖᑦ ᑭᑕᕆᒥ ᓄᓇᖃᕐᑐᑦ ᐱᖃᑕᐅᓕᑦ; ᓰᓚᒥᐅᑦ ᐃᓄᖏᑦ ᐃᓐᖏᕐᓕᑦ ᖁᕕᐊᓱᖕᓂᕐᒧᑦ, ᓂᐱᖅᑯᕐᑐᓗᑎᒃ ᓂᓪᓕᐊᓕᑦ ᖃᖅᑬᑦ ᖄᖏᓐᓂᑦ. 12ᐊᑕᓂᖅ ᓂᕐᑐᕐᓕᑦᔪᒃ, ᓂᕐᑐᕐᓇᕐᓂᖓ ᓇᓗᓁᕐᓕᑦᔪᒃ ᐃᒪᐅᑉ ᓯᓈᓂ ᓄᓇᖃᕐᑐᓄᑦ. 13ᐊᑕᓂᖅ ᐅᐸᒍᑎᓂᐊᕐᒪᑦ ᐊᖑᑎᑐᑦ ᐱᔪᓐᓇᕐᑐᕐᔪᐊᑐᑦ; ᐅᓇᑕᕐᑎᐅᑉ ᐅᓇᑕᕆᐊᕈᒪᓂᖓᑐᑦ ᑲᔪᖏᕐᓂᖃᕐᓗᓂ, ᓂᐱᖅᑯᕐᑐᓪᓗᓂ ᓂᓪᓕᐊᕗᖅ, ᓂᐱᕐᔪᐊᒧᑦ ᕾᒐᓛᕐᓗᓂ; ᐊᑭᕋᓂᓗ ᓵᓚᒋᓂᐊᕐᐰᑦ.”
ᒎᑎᐅᑉ ᐃᑲᔪᕐᓂᐊᕐᓂᕋᕐᓂᖓ ᐃᓄᖁᑎᒥᓂᒃ
14“ᐊᑯᓂ ᓂᐱᖃᓚᐅᓐᖏᓚᖓ, ᓄᖅᑲᖓᓚᐅᕐᐳᖓ ᐅᕙᓐᓂᒃ ᓄᖅᑲᖓᑎᓐᓇᓱᒃᓗᖓ; ᒫᓐᓇᓕ ᓂᐱᖅᑯᕐᑐᓗᖓ ᓂᓪᓕᐊᔪᒪᓕᕐᐳᖓ ᐊᕐᓇᑐᑦ ᐃᕐᓂᓱᖕᓂᕐᒧᑦ ᓂᓪᓕᐊᔪᑐᑦ, ᐊᒃᓱᕈᕐᓂᕐᒧᓪᓗ ᐃᐱᓂᐊᕐᓗᖓ. 15ᖃᖅᑬᑦ ᐱᖑᐃᓪᓗ ᓱᓁᕈᑎᑎᑦᓱᒪᕙᒃᑲ, ᐱᕈᕐᑐᖃᕐᓂᖏᓪᓗ ᐃᒤᕈᑎᑎᓪᓗᒋᑦ, ᑰᕕᓂᐅᒐᓗᐊᑦ ᓄᓇᕈᕐᑎᓪᓗᒋᑦ, ᑕᓯᕅᓪᓗ ᐃᒤᕈᑎᑎᓪᓗᒋᑦ. 16ᑕᐅᑐᖏᑦᑐᑦ ᑎᑭᐅᑎᑎᑦᓱᒫᕐᐸᒃᑲ ᖃᐅᔨᒪᓐᖏᑕᖏᓐᓄᑦ; ᑕᓯᐅᕈᒫᕐᐸᒃᑲ ᐊᖅᑯᑎᒃᑯᑦ ᖃᐅᔨᒪᓐᖏᑕᖏᑎᒍᑦ. ᑖᕐᑐᖅ ᓯᕗᓂᖏᓐᓃᑦᑐᖅ ᖃᐅᒪᔪᓐᖑᕐᑎᑦᓱᒫᕐᐸᕋ, ᒪᓂᕋᐅᖏᑦᑐᓪᓗ ᒪᓂᖅᑲᒃᓴᕐᓗᒋᑦ, ᑍᒤᑦᑐᓂᒃ ᐱᓇᓱᐊᕐᕕᒋᔪᒫᕐᐸᒃᑲ, ᕿᒪᖕᓂᐊᓐᖏᓚᒃᑲᓗ. 17ᑍᒃᑯᐊ ᐅᑎᕐᑎᑕᐅᔪᒫᕐᐳᑦ ᑲᓐᖑᓇᕐᑐᒦᓕᕐᓗᑎᒡᓗ, ᒎᑎᓐᖑᐊᓂᒃ ᑕᑎᖃᕋᓱᓚᐅᕐᑐᑦ, ᐅᖃᕐᐸᒃᑐᑦ ᒎᑎᓐᖑᐊᓄᑦ, ‘ᐃᓕᑦᓯᓐᓂᒃ ᒎᑎᖃᕐᐳᒍᑦ.’”
ᐃᓴᕆᐊᓕᒥᐅᑦ ᑐᑭᓯᔪᓐᓇᖏᓐᓂᖓᑦ
18“ᑐᓵᓕᕆᑦᓯ ᑐᓵᖏᑦᑐᓂᒃ ᓯᐅᑎᖃᕐᑐᓯ; ᑕᑯᓕᕆᑦᓯ ᑕᐅᑐᖏᑦᑐᓯ, ᑕᐅᑐᓕᖁᓪᓗᓯ. 19ᓇᓪᓕᐊᑦ ᑕᐅᑐᖏᑦᑑᕚ ᐱᔨᑦᑐᑦ, ᑐᓵᖏᓐᓂᕐᓴᕐᑕᖃᕐᐹ ᑎᓕᓯᒪᓪᓗᒍ ᐅᖃᕐᑎᖁᑎᓐᓂᑦ? ᑕᐅᑐᖏᓐᓂᕐᓴᕐᑕᖃᕐᐹ ᐅᕙᓐᓄᑦ ᑐᓂᓯᒪᔪᒥᑦ? ᑕᐅᑐᖏᓐᓂᕐᓴᐅᔪᖃᕆᕙᓘ ᐊᑕᓂᐅᑉ ᐱᔨᖓᓂᑦ? 20ᐅᓄᕐᑐᓂᒃ ᑕᑯᓯᒪᓕᕋᓗᐊᕐᓗᓯ ᐅᑦᔨᕈᓱᓚᐅᓐᖏᓚᓯ, ᓯᐅᑎᖃᕋᓗᐊᕐᓗᓯ ᑐᓵᔪᓂᒃ ᑐᓵᖏᑦᑐᑎᑐᑦ ᑐᑭᓯᔪᓐᓇᓐᖏᓚᓯ. 21ᐊᑕᓂᐅᑉ ᖁᕕᐊᓲᑎᒋᕚ ᓇᓛᒎᕐᓂᓂ ᐱᓪᓗᒍ; ᐱᖁᔧᑦ ᐊᖏᔪᕈᕐᑎᓐᓂᐊᕐᐰᑦ ᓂᕐᑐᕐᓇᕐᑐᓐᖑᕐᑎᓪᓗᒋᓪᓗ. 22ᑖᒃᑯᐊᓕ ᑎᒡᓕᒊᔭᐅᓂᑰᕗᑦ ᑎᒎᖅᑬᕕᐅᓂᑰᓪᓗᑎᒡᓗ; ᑕᒪᕐᒥᒡᓗ ᐃᑎᕐᓴᓄᑦ ᓂᒐᕐᑎᑕᐅᓯᒪᕗᑦ, ᑎᒍᔭᐅᓯᒪᕝᕕᖕᓂᓗ ᐃᔨᕐᓯᒪᓪᓗᑎᒃ; ᑎᒍᔭᐅᓯᒪᓕᕐᐳᑦ ᓂᕆᔭᒃᓴᐅᓪᓗᑎᒃ ᓴᐳᑦᔨᔨᒃᓴᖃᕋᑎᒡᓗ; ᑎᒡᓕᒊᔭᐅᕗᑦ ᐅᖃᐅᑦᔭᐅᓇᑎᒡᓗ, ‘ᐅᑎᕐᑎᑦᓯᕕᐅᓕᑦ!’ 23ᓇᓪᓕᑦᓯᓐᓄᑦ ᑕᒪᓐᓇ ᑐᓴᕐᑕᐅᔪᓐᓇᕐᐹ? ᑭᓇ ᓈᓚᒡᓗᓂ ᑐᓵᓇᓱᒍᓐᓇᕐᐹ ᓯᕗᓂᕐᒥ ᐱᔪᖃᓛᕐᑐᒥᒃ? 24ᑭᐊ ᔧᑰᑉ ᑭᖑᕚᖏᑦ ᐊᕐᓵᕐᑎᕆᔪᒧᑦ ᑐᓂᓚᐅᕐᐰᑦ, ᐃᓴᕆᐊᓕᒥᐅᓪᓗ ᑎᒡᓕᒃᑎᓄᑦ ᑐᓂᓪᓗᒋᑦ? ᐊᑕᓂᐅᑉ ᑍᒤᑕᐅᑎᓚᐅᓐᖏᓔᑦ? ᐊᔪᕐᑐᓕᕕᒋᓚᐅᕋᑦᑎᒍ, ᑍᑦᓱᒪᓂ ᐊᑐᕐᑕᐅᖁᔭᖏᓐᓂᒃ ᒪᓕᓚᐅᖏᒻᒪᑕ, ᐱᖁᔭᖏᓪᓗ ᓈᓚᓚᐅᕐᓇᒋᑦ. 25ᑍᒤᒻᒪᑦ ᓂᓐᖓᒡᕕᒋᒻᒪᕆᓚᐅᕐᐰᑦ, ᐅᓇᑕᕐᓂᒧᓪᓗ ᐊᒃᓱᕈᕐᑎᑕᐅᓪᓗᑎᒃ; ᖃᓂᒋᔭᓕᒫᖓᓪᓗ ᐃᑯᐊᓪᓚᒃᑎᓪᓗᒍ, ᓱᓕᓕ ᑐᑭᓯᓚᐅᓐᖏᓚᑦ; ᐃᑯᒪᒧᓪᓗ ᐆᑕᐅᓚᐅᕐᐳᑦ, ᓱᓕᓕ ᐆᒻᒪᒻᒥᐅᑕᕐᑖᕆᓚᐅᓐᖏᓛᑦ.”
Currently Selected:
ᐂᓮᐊᓯᐅᑉ ᐊᒡᓚᖏᑦ 42: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
