ᐂᓮᐊᓯᐅᑉ ᐊᒡᓚᖏᑦ 40
40
ᐅᖃᐅᓰᑦ ᓂᕆᐅᒋᔭᐅᔪᒃᓴᓂᒃ ᐅᖃᐅᓯᖃᕐᑐᑦ
1“ᒪᓂᒍᕐᑕᐅᓕᑦ, ᐄᓛᒃ ᒪᓂᒍᕐᑕᐅᓕᑦ ᐃᓄᖁᑎᒃᑲ!” ᒎᑎᓯ ᐅᖃᕐᐳᖅ. 2“ᐅᖃᓪᓚᓕᕆᑦ ᒪᓂᒍᕐᑕᐅᓇᕐᑐᓂᒃ ᔨᕉᓴᓕᒧᑦ, ᐅᖃᓪᓚᒡᕕᒋᒃᑭᑦ ᐅᓇᑕᕐᓂᖓᑦ ᐃᓱᓕᒻᒪᑦ, ᐊᔪᕐᑐᓕᓂᖏᓪᓗ ᐃᓱᒪᒋᔪᓐᓁᕐᑕᐅᖕᒪᑕ, ᐊᑕᓂᕐᒧᑦ ᓱᒋᐊᕐᑕᐅᓯᒪᖕᒪᑕ ᐊᔪᕐᑐᓕᓂᖏᑕ ᒪᕐᕈᐃᕐᑑᑎᓪᓗᐊᖏᓐᓂᒃ.” 3#ᒫᑎᐅᓯ 3:3; ᒫᑯᓯ 1:3; ᔪᐊᓇᓯ 1:23.#ᓘᑲᓯ 3:4-6.ᓂᐱᒥᒃ ᑐᓴᕐᓴᐅᔪᖃᕐᐳᖅ ᐃᓄᖃᖏᑦᑐᒥ: “ᐊᑕᓂᐅᑉ ᐊᖅᑯᑎᒃᓴᖓ ᐋᖅᑭᒃᓱᕐᓯᐅᒃ; ᓱᓇᖃᔪᐃᑦᑐᒃᑯᑦ ᑐᑭᓕᐊᕐᑐᒥᒃ ᐊᖅᑯᑎᓕᐅᓕᕆᑦᓯ ᒎᑎᑦᑕ ᐊᑐᕐᓂᐊᕐᑕᖓᓂᒃ. 4ᓇᕐᓴᓕᒫᑦ ᓇᖓᕐᑎᕐᓗᒋᑦ, ᖃᖅᑬᓪᓗ ᐱᖑᐃᓪᓗ ᓇᓕᕆᒃᓯᓗᒋᑦ; ᓴᖑᐃᕐᓂᖏᑦ ᑐᑭᓕᐊᕐᓯᑎᓪᓗᒋᑦ ᒪᓂᕋᐅᖏᑦᑐᓪᓗ ᒪᓂᖅᑲᒃᓴᕐᓗᒋᑦ. 5ᐊᑕᓂᐅᑉ ᐱᓐᓇᕐᓇᕐᓂᕐᔪᐊᖓ ᓴᖅᑭᑦᓱᒫᕐᐳᖅ, ᐃᓄᓕᒫᓪᓗ ᐃᓘᓐᓇᖓ ᑕᑯᔪᒫᕐᐹᑦ, ᐊᑕᓂᐅᑉ ᖃᓂᕐᒥᒍᑦ ᑕᒪᓐᓇ ᐅᖃᐅᓯᕆᖕᒪᒍ.” 6#ᔧᒥᓯ 1:10,11; 1 ᐲᑦᑐᕉᓯ 1:24,25.ᓂᐱᓗ ᐅᖃᕐᐳᖅ, “ᓂᓪᓕᐊᓕᕆᑦ!” ᐅᖃᕐᐳᖓᓕ, “ᓱᓇᒥᒡᓕ ᓂᓪᓕᐊᑦᔪᑎᖃᕐᓗᖓ?” “ᐃᓄᓕᒫᑦ ᐃᕕᒃᓱᒐᕐᑎᑐᑦ ᑍᒤᑉᐳᑦ, ᑕᑯᒥᓇᕐᓂᖏᓪᓗ ᓄᓇᐅᑉ ᐱᕈᕐᑐᖏᓐᓂᒃ ᐊᑦᔨᖃᕐᐳᑦ. 7ᐃᕕᒃᓱᒊᑦ ᑐᖁᓕᕙᒃᐳᑦ, ᐱᕈᕐᑐᓪᓗ ᑐᖁᓕᕙᒃᑭᓪᓗᑎᒃ, ᐊᑕᓂᐅᑉ ᐊᓂᕐᓵᕐᕕᒋᕙᖕᒪᒋᑦ; ᐃᓛᒃ ᐃᓄᐃᑦ ᐃᕕᒃᓱᒐᕐᑎᑐᑦ ᑍᒤᓪᓚᕆᒃᐳᑦ. 8ᐃᕕᒃᓱᒊᑦ ᑐᖁᓕᕙᖕᒪᑕ ᐱᕈᕐᑐᓪᓗ ᑐᖁᓕᕙᒃᑭᓪᓗᑎᒃ; ᒎᑎᐅᓪᓕ ᐅᖃᐅᓯᖏᑦ ᑍᒤᓕᖎᓐᓇᕐᓂᐊᕐᐳᑦ ᐃᓱᖃᖏᑦᑐᒧᑦ. 9ᓮᐅᓂ, ᖃᖅᑲᐅᑉ ᐳᕐᑐᔫᑉ ᖄᖓᓄᐊᓕᕆᑦᓯ ᐅᖃᐅᓯᖃᓕᕆᑦᓯ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ, ᔨᕉᓴᓕᒻ, ᓂᐱᖅᑯᕐᑐᓗᓯ ᐅᖃᐅᓰᑦ ᑐᓴᕈᒥᓇᕐᑐᑦ ᑐᓴᕐᑕᐅᑎᓕᕐᓯᐅᒃ, ᓂᐱᖅᑯᕐᑐᓗᓯ ᓯᕘᕋᖏᓪᓗᓯ; ᔫᑕᐅᑉ ᓄᓇᓕᖁᑎᖏᑦ ᐅᖃᐅᑎᓯᒋᒃ, ‘ᑕᑯᒋᑦ, ᑕᕝᕙ ᒎᑎᓯ.’ 10#ᐂᓮᐊᓯ 62:11; ᑕᑯᑎ 22:12.ᑕᑯᒋᑦ, ᐊᑕᓂᖅ ᒎᑎ ᕾᓕᕐᐳᖅ ᐱᔪᓐᓇᕐᓂᕐᔪᐊᖃᕐᓗᓂ, ᐱᔪᓐᓇᕐᓂᕐᔪᐊᖓᑕ ᐊᐅᓚᑦᓯᑎᑉᐹ; ᑕᑯᒋᑦ, ᐅᐱᒍᓲᑎᒥᓂᒃ ᑐᓂᔭᒃᓴᖃᕐᓗᓂ, ᐊᑭᓕᐅᑎᒃᓴᒥᓂᒡᓗ ᓇᒃᓴᕐᐳᖅ. 11#ᐃᓯᑭᐊᓕ 34:15; ᔪᐊᓇᓯ 10:11.ᓰᐱᓕᕆᔨᑎᑐᑦ ᐃᓄᖁᑎᓂ ᓂᕆᑎᑦᓱᒫᕐᐰᑦ, ᓰᐲᓪᓗ ᓄᕐᕋᖏᑎᑐᑦ ᑕᓕᕐᒥᓄᑦ ᐃᕿᓯᒥᐊᕈᒫᕐᐰᑦ, ᐊᒡᔭᕐᓗᒋᑦ ᓴᒡᕕᖕᒥᓂ, ᕿᑐᕐᖓᓛᓖᓪᓗ ᐊᑦᑕᕆᓗᒋᑦ ᒪᓕᒃᑎᑦᓱᒫᕐᐰᑦ.”
ᐃᓴᕆᐊᓕᒥᐅᑦ ᒎᑎᖓᑦᑕ ᐊᑦᔨᖃᕐᑎᑕᒃᓴᐅᖏᓐᓂᖓ
12ᑭᓇᐅᑉ ᐆᒃᑐᕋᕐᓯᒪᕚ ᐃᒪᖅ ᑖᑦᓱᒪ ᐃᑎᒪᖓᓃᑦᑐᖅ, ᐅᕝᕙᓗ ᐊᒡᒐᖕᒥᓄᑦ ᐃᓵᒃᑕᕐᓗᒍ ᕿᓚᐅᑉ ᐊᖏᓂᖓ ᖃᐅᔨᓴᕐᓯᒪᕙᐅᒃ? ᓄᓇᕐᔪᐊᓪᓗ ᓯᐅᕋᖓᑕ ᐊᖏᓂᖓ ᐆᒃᑐᕋᕐᓯᒪᕙᐅᒃ ᖃᑦᑕᕐᒧᑦ? ᖃᖅᑳᓪᓗᐃᓪᓗ ᐱᖑᐃᓪᓗ ᐅᖁᒤᓐᓂᕐᓯᐅᕐᓯᒪᕔᑦ ᐅᖁᒤᓐᓂᕐᓂᐊᕈᑎᒧᑦ? 13#ᕉᒪᒥᐅᓄᑦ 11:34; 1 ᑯᕆᓐᑎ 2:16.ᑭᓇᐅᑉ ᐃᓱᒪᓕᐅᕐᓯᒪᕙᐅᒃ ᐊᑕᓂᐅᑉ ᐊᓂᕐᓂᖓ, ᑭᓇᒧᓪᓗ ᐃᓕᓮᔨᒧᑦ ᐃᓕᓴᕐᑕᐅᓯᒪᕚ? 14ᑭᓇᒥᒃ ᐊᐱᕐᓱᕐᓯᒪᕚ ᖃᐅᔨᑎᑕᐅᔪᒪᓗᓂ? ᑭᐊᓗ ᐃᓕᓴᕐᑎᓚᐅᕐᐸᐅᒃ ᐊᖅᑯᒻᒥᒃ ᐊᑦᔨᒌᒃᑎᑦᓯᔪᓐᓇᕐᓂᕐᒥᒃ? ᖃᐅᔨᒪᓂᕐᒥᒡᓗ ᐃᓕᓐᓂᐊᕐᑎᓪᓗᒍ? ᑕᑯᑎᓪᓗᒍᓗ ᑐᑭᓯᓂᐅᒃ ᐊᖅᑯᑎᖓᓂᒃ? 15ᑕᑯᒋᑦ, ᓯᓚᕐᔪᐊᕐᒥ ᐃᓅᖃᑎᒌᒡᔪᐊᑦ ᖃᑦᑕᕐᒥᑦ ᑯᓯᕐᓂᑯᑐᐃᓐᓇᕐᑐᑦ ᐃᓱᒪᓇᕐᐳᑦ, ᓯᐅᕋᒐᓛᑯᓗᑎᑐᓪᓗ ᐃᓱᒪᓇᕐᓗᑎᒃ ᐅᖁᒤᓐᓂᕐᓂᐊᕐᕕᖕᒥ, ᑕᑯᒋᓪᓗ ᕿᑭᕐᑍᑦ ᒥᑭᔪᒍᓗᒃᑎᑐᑦ ᖃᖓᑦᑕᕐᑎᑉᐰᑦ. 16ᓕᐸᓇᓂᐅᑉ ᓇᐹᕐᑐᒐᓴᒡᔪᐊᖏᑦ ᕿᔪᒋᓇᓱᐊᕈᓂᒋᑦ ᒥᑭᓗᐊᕋᔭᕐᐳᑦ, ᐆᒪᔪᓕᒫᖏᓪᓗ ᑐᓂᕐᕈᑎᒃᓴᐅᒍᑎᒃ ᐊᒥᒐᕋᔭᕐᓗᑎᒃ. 17ᐃᓅᖃᑎᒌᒡᔪᐊᑦ ᑲᑎᓪᓗᒋᑦ ᓱᓇᐅᖏᒻᒪᑕ ᑖᑦᓱᒪ ᓵᖓᓂ, ᐃᓱᒪᒋᕔᓪᓗ ᓱᓇᐅᖏᑦᑐᒥᑦ ᒥᑭᓐᓂᕐᓴᐅᔪᓂᒃ ᓱᓇᖃᖏᑦᑐᑎᑐᓪᓗ. 18#ᐋᐴᓯᑕᓖᑦ 17:29.ᓱᓇᒥᒡᓕ ᑍᒪ ᒎᑎ ᐊᑦᔨᖃᕐᑎᑦᓱᓐᓇᕐᐱᐅᒃ? ᓱᓇᒧᓪᓗ ᐊᑦᔨᐅᓕᕐᑎᑕᒃᓴᐅᒐᔭᕐᐹ? 19ᒎᑎᓐᖑᐊᒦᒃ? ᐃᓄᖕᒧᑦ ᓴᓇᓐᖑᐊᕐᑎᒧᑦ ᓴᓇᔭᐅᕙᒃᑐᓂᒃ, ᓴᕕᕋᔭᖕᒥᒃ ᓴᓇᕙᒃᑑᑉ ᓴᓇᔭᓂ ᒥᖑᐊᕐᐸᒃᐹ ᒎᓗᒥᒃ ᐃᓕᓯᕕᒋᓪᓗᒍᓗ ᐊᕐᓵᕐᑑᔭᓂᒃ ᓯᐅᓪᕕᕆᓂᒃ. 20ᐊᖑᓪᓕ ᐊᔪᕐᓴᕌᖓᒥ ᕿᔪᖕᒥᒃ ᓯᑕᒃᑕᒥᒃ ᐊᐅᓂᕈᕈᓐᓇᖏᑦᑐᒥᒃ ᓂᕈᐊᕐᓗᓂ, ᓴᓇᓐᖑᐊᕐᑎᒧᑦ ᓴᓇᔭᐅᑎᑦᓯᕙᒃᐳᖅ ᒎᑎᓐᖑᐊᒥᒃ ᐅᕐᕈᔭᖏᑦᑐᒥᒃ. 21ᖃᐅᔨᒪᓐᖏᓚᑏᑦ? ᑐᓴᓚᐅᕐᓇᒡᓗ? ᐅᖃᐅᑎᔭᐅᓯᒪᓐᖏᓚᑏᑦ ᑕᒪᑐᒥᖓ ᐱᒋᐊᕐᓂᖓᓂᑦ? ᑐᑭᓯᓚᐅᕐᓯᒪᓐᖏᓚᑏᑦ ᓄᓇᕐᔪᐊᖅ ᐱᒋᐊᕐᑎᑕᐅᓕᕐᓂᖓᓂᒃ? 22ᑖᓐᓇᐅᕗᖅ ᐃᒃᓯᕙᐅᑕᕐᔪᐊᒥᓂ ᐃᒃᓯᕙᔪᖅ ᓄᓇᕐᔪᐊᑉ ᐊᖕᒪᓗᕐᓂᖓᑕ ᖁᓛᓂ, ᐃᓄᐃᑦ ᓄᓇᒥ ᐱᒡᓕᕐᑕᐅᔮᕐᑐᑎᑐᑦ ᑍᒤᒻᒪᑕ, ᕿᓚᒃ ᐃᓯᕕᓯᒪᖕᒪᒍ ᑖᓗᑕᕐᑎᑐᑦ, ᑐᐱᕐᑎᑐᓪᓗ ᓇᑉᐸᕐᑎᓪᓗᒍ ᐃᓯᕐᓯᒪᕕᐅᔪᓐᓇᕐᓯᑎᓪᓗᓂᐅᒃ. 23ᐊᖓᔪᖅᑳᖑᔪᑦ ᓱᓇᐅᔪᓐᓂᕐᑎᑉᐰᑦ; ᓄᓇᕐᔪᐊᕐᒥᐅᓪᓗ ᐊᐅᓚᑦᓯᔨᖏᑦ ᐊᑑᑎᒃᓴᖃᕈᓐᓃᕐᑎᓪᓗᒋᑦ. 24ᐱᕈᕐᓯᐊᖑᓕᕋᑖᕐᑎᓪᓗᒋᑦ, ᐱᕈᕐᓯᐊᒃᓴᑐᑦ ᐃᓕᔭᐅᕋᑖᕐᑐᑎᑐᑦ ᓄᓇᒧᑦ, ᒪᖑᒃᓯᒪᓂᖏᑦ ᐱᕈᓕᕐᑎᓪᓗᒋᑦ ᓱᐱᖕᒪᒋᑦ ᑐᖁᓕᕗᑦ, ᐊᖅᑯᓇᕐᒧᑦ ᑎᑭᑕᐅᑲᓪᓚᒃᑲᒥᒃ ᑎᒃᑕᐅᕋᕐᐳᑦ ᑭᓪᓗᕐᑕᐅᓂᕕᓂᕐᑎᑐᑦ. 25ᑭᓇᒥᒃ ᐊᑦᔨᖃᕐᑎᑦᓱᓐᓇᕐᐱᖔ? ᓱᓇᒥᒡᓗ ᑍᒤᓪᓗᐊᖃᕐᑎᑦᓱᓐᓇᕐᐱᖔ? ᐃᑦᔪᕐᓁᑦᑐᖅ ᐅᖃᕐᐳᖅ. 26ᖁᒻᒧᑦ ᑕᑯᓴᓚᐅᕆᑦ ᕿᓚᒡᓗ ᑕᑯᓗᒍ: ᑭᐊᐸᒃᑯᐊ ᓴᓇᔭᕕᓂᖏᑦ? ᑖᑦᓱᒪ ᓴᖅᑭᑎᑦᓯᓚᐅᕐᑑᑉ ᐅᓄᕐᓂᖏᑦ ᖃᐅᔨᒪᕔᑦ, ᐃᓘᓐᓇᑎᒡᓗ ᐊᑐᓂᑦ ᐊᑎᖃᕐᑎᓪᓗᓂᒋᑦ: ᑖᓐᓇ ᐱᔪᓐᓇᕐᓂᕐᔪᐊᖃᕋᒥ, ᑖᑦᓱᒧᖓ ᓴᖅᑭᔮᖏᑦᑐᕐᑕᖃᓐᖏᓚᖅ ᐊᑕᐅᓯᕐᒥᒡᓘᓐᓃᑦ. 27ᔧᑰ ᓱᖕᒪᓪᓕ ᐅᖃᕐᐸᒃᐱᑦ, ᐃᓴᕆᐊᓪ, ᐅᖃᕐᓗᑎᑦ, “ᐱᓂᐊᕐᓂᓐᓂᒃ ᐊᑕᓂᖅ ᐃᕐᕈᑎᓯᒪᕙᕋ,#40:27 ᐃᕐᕈᑦᔨᓯᒪᔪᖅ ᐅᕝᕙᓗ ᐃᔨᕐᓯᓯᒪᔪᖅ ᐱᔭᕆᐊᖃᕐᑕᒃᑲᓗ ᑲᒪᒋᔭᐅᓇᑎᒃ ᒎᑎᓐᓄᑦ?” 28ᖃᐅᔨᒪᓐᖏᓚᑏᑦ? ᑐᓴᓚᐅᕐᓇᒡᓗ? ᐊᑕᓂᖅ ᒎᑎᐅᖕᒪᑦ ᐃᓱᖃᖏᑦᑐᒧᑦ, ᐱᓐᖑᕐᑎᑦᓯᓯᒪᔪᖅ ᓄᓇᕐᔪᐊᕐᒥᒃ ᐃᓱᐊᓃᑦ ᐃᓱᐊᓄᑦ. ᓄᑮᕈᑎᔪᓐᓇᓐᖏᓚᖅ ᑕᖃᔪᓐᓇᕋᓂᓗ, ᓯᓚᑐᓂᖓᓗ ᖃᐅᔨᔭᐅᔪᓐᓇᕋᓂ. 29ᐱᔪᓐᓇᕐᓂᕐᑖᕐᑎᑦᓯᕙᒃᑐᖅ ᓄᑮᕈᑎᔪᓂᒃ, ᐱᔪᓐᓇᕐᓂᖃᕈᓐᓃᕐᑐᓂᒡᓗ ᓄᑭᒃᑖᕐᑎᑦᓯᕙᒃᑐᖅ. 30ᐃᓅᓱᒃᑑᒐᓗᐊᑦ ᐊᒡᓛᑦ ᓄᑮᕈᑎᔪᒫᕐᐳᑦ ᑕᖃᓗᑎᒡᓗ, ᐅᕕᒃᑬᓪᓗ ᑕᖃᓂᕐᒧᑦ ᐅᕐᕈᔪᒫᕆᕗᑦ. 31ᐊᑕᓂᕐᒥᒡᓕ ᐅᑕᖅᑭᔪᑦ, ᐱᔪᓐᓇᕐᓂᖏᑦ ᓄᑖᓐᖑᕐᑎᑕᐅᔪᒫᕐᐳᑦ, ᐃᓴᕈᕐᒥᖕᓄᑦ ᑎᖏᔪᒫᕐᐳᑦ ᓇᒃᑐᕋᓕᒃᑎᑐᑦ, ᐅᓪᓚᒃᓯᔪᒫᕐᐳᑦ ᑕᖃᓂᐊᕈᓐᓃᕐᓗᑎᒃ, ᐱᓱᓕᕈᒫᕐᐳᑦ ᓅᑮᕈᑎᓂᐊᕈᓐᓃᕐᓗᑎᒡᓗ.
Currently Selected:
ᐂᓮᐊᓯᐅᑉ ᐊᒡᓚᖏᑦ 40: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
