ᐂᓮᐊᓯᐅᑉ ᐊᒡᓚᖏᑦ 38
38
ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᖃᓂᒪᓂᖓ ᐋᖅᑭᒃᑕᐅᓂᖓᓗ
ᐊᑕᓃᑦ ᐂᑉᐸᖏᑦ 20:1-11; ᑯᕉᓂᑲ ᐂᑉᐸᖏᑦ 32:24-26
1ᐅᓪᓗᐃᑦ ᐃᓚᖏᓐᓂ ᐊᖓᔪᖅᑳᕐᔪᐊᖅ ᕼᐃᓯᑬᐊ ᖃᓂᒻᒪᓚᐅᕐᐳᖅ ᖁᓚᕐᓇᕐᓯᓪᓗᓂ ᐃᓅᓂᐊᕐᒪᖔᑦ, ᒎᑎᐅᓪᓗ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐂᓮᐊᓯᐅᑉ ᐂᒨᓯᐅᑉ ᐃᕐᓂᖓᑕ ᑕᑯᔭᕐᑐᕋᒥᐅᒃ, ᐅᖃᓪᓚᒡᕕᒋᕚ ᐅᖃᕐᓗᓂ, “ᐊᑕᓂᐅᑉ ᐅᖃᐅᑎᖁᖕᒪᑎᑦ ᓱᓇᓕᒫᓂᒃ ᐅᐸᓗᖎᔭᓕᕆᑦ ᐋᖅᑭᓚᐅᖏᓪᓗᑎᑦ ᐃᓅᔪᓐᓃᕐᓂᐊᓕᕋᕕᑦ.” 2ᕼᐃᓯᑬᐊᓗ ᐃᒡᓘᑉ ᐊᑭᓐᓇᖓᓄᑦ ᓵᓐᓇᒥ, ᐊᑕᓂᕐᒧᑦ ᑐᒃᓯᐊᕐᐳᖅ: 3ᐅᖃᕐᓗᓂ, “ᐊᑕᓃᖅ ᐃᖅᑲᐅᒪᒋᑦ, ᒫᓐᓇ ᐊᑕᓃᖅ ᓵᖕᓂ ᐃᓅᓚᐅᕋᒪ ᓱᖁᓯᔪᐃᑦᑐᒥᒃ ᐃᓕᖕᓂᒃ ᒪᓕᒡᓗᖓ ᐆᒻᒪᑎᒪ ᐱᔪᓐᓇᕐᑕᓕᒫᖓᓄᑦ, ᐱᓇᓱᐊᓚᐅᕐᓗᖓᓗ ᐱᔪᒪᔭᕐᓂᒃ.” ᕼᐃᓯᑬᐊᓗ ᕿᐊᓯᒐᒥ ᕿᐊᕕᒡᔪᐊᓕᕐᐳᖅ. 4ᐊᑕᓂᐅᓪᓗ ᐂᓮᐊᓯ ᐅᖃᐅᑎᕚ, 5“ᕼᐃᓯᑬᐊ ᐅᐸᒡᓗᒍ ᐅᖃᐅᑎᔭᕐᑐᓚᐅᕈᒃ, ᐊᑕᓂᖅ, ᓯᕗᓕᕕᓂᕐᐱᑦ ᑍᕕᑎᐅᑉ ᒎᑎᖓ ᐃᒫᒃ ᐅᖃᕐᐳᖅ: ‘ᑐᒃᓯᐊᕐᓂᑎᑦ ᑐᓴᕐᐸᒃᑲ, ᕿᐊᓂᕆᔧᓪᓗ ᑕᑯᓪᓗᒍ: ᐃᓅᓰᑦ ᐃᓚᒃᑲᓐᓂᕐᓂᐊᓕᕐᐸᕋ ᐊᕐᕌᒍᓂᒃ 15ᓂᒃ. 6ᓴᐳᑎᓂᐊᕐᐸᒋᑦ ᐅᑯᐊᓗ ᐃᒡᓗᒐᓴᒡᔪᐊᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓂᑦ, ᐃᒡᓗᒐᓴᒡᔪᐊᓪᓗ ᓴᐳᓐᓂᐊᕐᓂᐊᕐᐸᒃᑲ.’ 7ᐊᑕᓂᐅᑉ ᓇᓗᓁᒃᑯᑕᕐᒥᒃ ᑕᑯᑎᓐᓂᐊᕐᐹᑎᑦ ᐱᔪᖃᓛᕐᑐᒥᒃ ᐅᖃᕐᑕᖓᑕ ᓱᓕᓂᖓᓂᒃ ᖃᐅᔨᒪᐅᑎᒋᓂᐊᕐᑕᕐᓂᒃ: 8ᑕᑯᒋᑦ ᓯᕿᓂᕐᒧᑦ ᖃᐅᔨᓴᐅᑎᐅᑉ ᑕᕐᕋᖓ ᐂᕼᐊᓯᐅᑉ ᓴᓇᓚᐅᕐᑕᖓ ᐊᓪᓗᕐᓂᕐᓂᒃ ᖁᓕᓂᒃ ᐅᑎᕆᐊᕐᑎᑦᓱᒪᕙᕋ.” ᑍᒤᒻᒪᑦ ᓯᕿᓂᐅᑉ ᑕᕐᕋᖓ ᐅᑎᕆᐊᓚᐅᕐᐳᖅ ᐊᓪᓗᕐᓂᕐᓂᒃ ᖁᓕᓂᒃ ᓯᕗᒧᐊᒡᕕᒋᓚᐅᕐᑕᒥᓂᑦ. 9ᕼᐃᓯᑬᐊ ᔫᑕᒥ ᐊᖓᔪᖅᑳᕐᔪᐊᖅ ᑎᑎᕋᓚᐅᕐᐳᖅ, ᖃᓂᒪᓚᐅᕐᑐᕕᓂᐅᓪᓗᓂ ᐋᖅᑭᒃᑲᒥ, ᐃᒫᒃ: 10“ᐃᓱᒪᓚᐅᕐᐳᖓ, ᐃᓅᓯᕐᒪ ᐃᓅᔪᒥᓇᑦᓯᐊᕐᓂᖓᓂ ᐊᐅᓪᓚᕆᐊᖃᕋᓱᒋᓪᓗᖓ; ᑐᖁᖓᔪᑦ ᐃᑎᕐᑕᕐᕕᖓᒍᑦ; ᐃᓅᓯᕋ ᑭᐱᔭᐅᓂᐊᕋᓱᒋᓪᓗᒍ. 11ᐅᖃᓚᐅᕐᐳᖓ, ᐊᑕᓂᕐᒥᒃ ᑕᑯᓂᐊᕈᓐᓃᕐᐳᖓ ᐃᓄᐃᑦ ᐃᓅᔪᑦ ᓄᓇᖓᓂ; ᐃᓄᖕᓂᒃ ᑕᑯᖃᑦᑕᕐᓂᐊᕈᓐᓃᕐᐳᖓ ᓄᓇᕐᔪᐊᕐᒥ ᐃᓂᖃᕐᑐᓂᒃ. 12ᐃᒡᓗᒐ ᑎᒍᔭᐅᓪᓗᓂ ᓅᑕᐅᓚᐅᕐᒪᑦ ᐅᕙᓐᓂᑦ ᓰᐱᓕᕆᔩᑦ ᑐᐱᖏᑎᑐᑦ; ᓄᕕᕐᓴᕐᑑᑉ ᓄᕕᕐᓴᕐᑕᖓᑐᑦ ᐃᓅᓯᕋ ᐃᒧᓚᐅᕐᐸᕋ; ᑭᐱᓚᐅᕐᐹᖓ ᓄᕕᕐᓴᕐᑑᑉ ᐃᒧᓯᕝᕕᖓᓂᑦ; ᐅᓪᓗᕐᒥᑦ ᐅᓐᓄᐊᒧᑦ ᑎᑭᑦᑐᑐᑦ ᐃᓱᓕᑎᓚᐅᕐᐸᕐᒪ; 13ᓂᓪᓕᐊᓚᐅᕐᐳᖓ ᐃᑲᔪᕐᑕᐅᔪᒪᓪᓗᖓ ᐅᓪᓛᒧᑦ ᑎᑭᓪᓗᒍ; ᓛᔭᒧᑦ ᓴᐅᓂᒃᑲ ᖃᖅᑯᐊᕐᑕᐅᔪᑎᑐᑦ ᑍᒤᓚᐅᕐᐳᑦ; ᐅᓪᓗᕐᒥᑦ ᐅᓐᓄᐊᒧᑦ ᑎᑭᑦᑐᑐᑦ ᐃᓱᓕᑎᓚᐅᕐᐸᕐᒪ. 14ᖁᐸᓄᐊᑎᑐᑦ ᑕᑎᒡᒐᕐᔪᐊᑐᓪᓗ ᓂᓪᓕᐊᓕᓚᐅᕐᐳᖓ, ᑑᕕᑎᑐᑦ ᑎᖕᒥᐊᑐᑦ ᓂᑦᔮᔫᔮᓕᕐᓗᖓ, ᐃᔩᒃᑲᒡᓗ ᑕᖃᓪᓗᑎᒃ ᖁᒻᒧᑦ ᑕᑯᓇᓱᖕᓂᕐᒧᑦ, ᐊᑕᓃᖅ, ᐅᖁᒤᒃᓴᕕᒡᔪᐊᓕᕋᒪ ᓴᐳᑎᓚᐅᓐᖓ! 15ᖃᓄᖅ ᐅᖃᕈᓐᓇᕐᐳᖔ? ᐊᑕᓂᐅᑉ ᐅᖃᕐᕕᒋᖕᒪᖓ, ᑖᑦᓱᒪᓗ ᑕᒪᓐᓇ ᐱᓇᓱᐊᕐᓯᒪᖕᒪᒍ. ᓯᓂᒐ ᐅᕙᓐᓂᑦ ᕿᒫᓯᒪᖕᒪᑦ ᐆᒻᒪᑎᒃᑯᑦ ᐅᖁᒤᒃᓴᕐᓂᕋ ᐱᓪᓗᒍ. 16ᐊᑕᓃᖅ, ᑍᒤᑦᑐᒃᑰᕋᓗᐊᕐᓗᑎᒃ ᐃᓄᐃᑦ ᐃᓅᕙᒃᒪᑕ; ᑍᒤᑦᑐᓪᓗ ᑕᒪᕐᒥᒃ ᐊᓂᕐᓂᕐᒪ ᐃᓅᕕᒋᓕᕐᐸᒋᑦ, ᐊᑏ ᐋᖅᑭᒡᓗᖓ ᐃᓅᔪᓐᓇᕐᑎᓚᐅᓐᖓ. 17ᐃᓛᒃ ᐱᕚᓪᓕᕈᓐᓇᖁᓪᓗᖓ ᓂᓐᖓᐅᒪᓂᕐᔪᐊᖃᓚᐅᕐᐳᖓ; ᓇᒡᓕᖕᓂᕐᓄᓪᓕ ᓴᐳᑎᓚᐅᕐᐸᕐᒪ ᐃᑎᕐᓴᒥᑦ ᐊᓯᕈᕐᑕᐅᕕᖕᒥᑦ. 18ᑐᖁᖓᔪᑦ ᐃᓂᖓᓐᓂ ᖁᔭᓕᕕᐅᔪᓐᓇᓐᖏᓚᑎᑦ, ᑐᖂᓪᓗ ᓂᕐᑐᕈᓐᓇᓐᖏᓛᑎᑦ; ᐃᑎᕐᓴᕐᔪᐊᕐᒦᑦᑐᑦ ᓱᖁᓯᔪᐃᓐᓂᕐᓂᒃ ᓂᕆᐅᒋᔭᒃᓴᖃᕈᓐᓇᓐᖏᓚᑦ. 19ᐃᓅᔪᑦ, ᐃᓅᔪᑦ, ᖁᔭᒋᕚᑎᑦ, ᐅᕙᖓᑦᑕᐅᖅ ᐅᓪᓗᒥ ᖁᔭᒋᓕᕐᐸᒋᑦ; ᐊᑖᑕ ᕿᑐᕐᖓᒥᓂᒃ ᖃᐅᔨᑎᑦᓯᓂᐊᕐᐳᖅ ᓱᖁᓯᔪᐃᑦᑑᓂᕐᓂᒃ. 20ᐊᑕᓂᐅᑉ ᐱᐅᓕᖕᒪᖓ, ᐃᓐᖏᕐᓂᐊᕐᐳᒍᑦ ᑐᓴᕐᓂᕋᐅᑎᓄᑦ ᓄᖃᕐᑎᓕᖕᓄᑦ ᐃᓅᓂᓕᒫᑦᑎᓐᓂ, ᐊᑕᓂᐅᑉ ᐃᒡᓗᖓᓂ.” 21ᐂᓮᐊᓯᓗ ᐅᖃᓚᐅᕐᐳᖅ, “ᐸᐅᕐᖓᓂᒃ ᐱᒋᓕᒃᓴᓂᒃ ᑲᑎᓐᖓᔪᓂᒃ ᑎᒍᓯᓕᕆᑦᓯ, ᒥᖑᐊᕈᑎᒋᓗᒋᓪᓗ ᐊᔪᐊᖓᓄᑦ ᑕᕝᕙ ᐋᖅᑭᒃᑕᐅᓂᐊᕐᐳᖅ.” 22ᕼᐃᓯᑬᐊᓗ ᐊᐱᕆᓚᐅᕐᐳᖅ, “ᓱᓇᒥᒃ ᓇᓗᓁᒃᑯᑕᖃᕐᓂᐊᕐᐹ ᐊᑕᓂᐅᑉ ᑐᒃᓯᐊᕐᕕᒡᔪᐊᖁᑎᖓᓄᑦ ᐃᑎᒃᑲᓐᓂᕈᓐᓇᕐᓯᓛᕐᓂᓐᓂᒃ?”
Currently Selected:
ᐂᓮᐊᓯᐅᑉ ᐊᒡᓚᖏᑦ 38: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
