ᐂᓮᐊᓯᐅᑉ ᐊᒡᓚᖏᑦ 37
37
ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᓱᒪᓯᐅᕆᓂᖓ ᐂᓮᐊᓯᒥᒃ
ᐊᑕᓃᑦ ᐂᑉᐸᖏᑦ 19:1-7
1ᐊᖓᔪᖅᑳᕐᔪᐊᖅ ᕼᐃᓯᑬᐊ ᑐᓴᕋᒥ, ᐊᓐᓄᕌᓂ ᐊᓕᒃᐰᑦ ᕿᒃᓵᒃᑐᕐᓯᐅᑎᒥᒃ ᐃᒃᐱᐊᕐᔪᒐᔭᐅᔮᕐᑐᒥᒃ ᐊᑎᓪᓗᓂ, ᐊᑕᓂᐅᓪᓗ ᐃᒡᓗᖓᓄᑦ ᐂᕗᖅ. 2ᑎᓕᓯᓪᓗᓂᓗ ᐃᓔᐊᑭᒻᒥᒃ ᐊᖓᔪᖅᑳᕐᔪᐊᑉ ᐃᒡᓗᖓᓄᑦ ᑲᒪᔨᒻᒪᕆᐅᔪᒥᒃ, ᓯᑉᓇᒥᒡᓗ ᑎᑎᕋᕐᑎᐅᔪᒥᒃ, ᑐᓂᕐᕈᓯᕐᑎᑦᓯᔩᓪᓗ ᓯᕗᓕᕐᑎᖏᓐᓂᒃ, ᑖᒃᑯᐊᓗ ᕿᒃᓵᒃᑐᕐᓯᐅᑎᒥᒃ ᐃᒃᐱᐊᕐᔪᒐᔭᐅᔮᕐᑐᒥᒃ ᐊᓐᓄᕌᕐᓯᒪᓪᓗᑎᒃ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ ᐂᓮᐊᓯᒧᑦ ᐂᒨᓯᐅᑉ ᐃᕐᓂᖓᓄᑦ ᐂᕗᑦ. 3ᐃᒫᒡᓗ ᐅᖃᕐᐳᑦ, “ᕼᐃᓯᑬᐊ ᐅᖃᖁᔨᖕᒪᑦ, ‘ᐅᓪᓗᒥ ᐅᖁᒤᒃᓴᕐᓇᕐᑑᖕᒪᑦ; ᓱᒋᐊᕐᑕᐅᒐᑦᑕ, ᑲᓐᖑᓇᕐᑐᒦᑎᑕᐅᕗᒍᑦ; ᐊᕐᓇᒥᒃ ᐃᕐᓂᓱᒃᑐᒥᒃ ᐊᑦᔨᖃᓕᕐᐳᒍᑦ ᓄᑭᖃᑦᓯᐊᕈᓐᓃᒧᑦ ᐃᕐᓂᔪᓐᓁᓪᓕᖅᑲᔪᑎᑐᑦ. 4ᐃᒻᒪᖄ, ᐊᑕᓂᐅᑉ ᒎᑎᕕᑦ ᕌᑉᓴᑭᐅᑉ ᐅᖃᐅᓯᖏᑦ ᑐᓴᕐᐰᑦ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᑎᓕᓚᐅᕐᒪᒍ ᒎᑎᒥᒃ ᐆᒪᔪᒥᒃ ᒥᑕᐅᑎᖃᖁᓪᓗᒍ, ᐃᓂᕐᑎᕆᑐᐃᓐᓇᕆᐊᖃᕐᓗᓂᓗ ᐅᖃᐅᓯᖏᓐᓂᒃ ᐊᑕᓂᐅᑉ ᒎᑎᕕᑦ ᑐᓴᕐᑕᒥᓂᒃ; ᑍᒤᒻᒪᑦ ᑐᒃᓯᐅᑎᓚᐅᒃᑭᑦ ᐃᓄᐃᑦ ᐊᒥᐊᒃᑰᔪᑦ ᐱᓪᓗᒋᑦ.’” 5ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᐱᔨᖏᑦ ᕾᖕᒪᑕ ᐂᓮᐊᓯᒧᑦ, 6ᐂᓮᐊᓯᐅᑉ ᑭᐅᑦᔪᑎᒥᓂᒃ ᐃᒫᒃ ᐅᖃᐅᑎᔭᐅᖁᕚ, “ᐊᖓᔪᖅᑳᓯ ᐅᖃᐅᑎᓯᐅᒃ, ᐊᑕᓂᖅ ᐃᒫᒃ ᐅᖃᕐᐳᖅ, ‘ᑲᑉᐱᐊᓱᖕᓂᐊᕐᓇᒃ ᐅᖃᐅᓯᖏᓐᓂᒃ ᑐᓴᕐᑕᕐᓂᒃ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑕ ᐱᔨᒥᒍᑦ ᐊᑭᕋᕐᑐᕈᑎᒋᔭᖏᓐᓂᒃ ᐅᕙᓐᓂᒃ. 7ᑕᑯᒋᑦ, ᐊᓂᕐᓂᕐᒥᒃ ᐃᓗᒻᒥᕈᒪᕙᕋ, ᑕᒫᓐᖓᑐᐃᓐᓇᖅ ᑐᓴᕐᑕᒥᓂᒃ ᐱᑦᔪᑎᖃᕐᓗᓂ, ᓄᓇᒥᖕᓄᑦ ᐅᑎᕐᓂᐊᕐᒪᑦ; ᓄᓇᖓᓄᓪᓗ ᐅᑎᕐᓯᒪᓕᕐᐹᑦ ᓴᕕᒡᔪᐊᒧᑦ ᑐᖁᑕᐅᔪᒫᕐᐳᖅ ᓄᓇᒥᓂ.’”
ᐊᓯᕆᐊᒥᐅᑦ ᓯᕘᕋᓵᕆᒃᑲᓐᓂᕐᓂᖓᑦ
ᐊᑕᓃᑦ ᐂᑉᐸᖏᑦ 19:8-19
8ᕌᑉᓴᑭ ᐅᑎᕋᒥ, ᖃᐅᔨᓕᕐᐳᖅ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᓕᑉᓇᒥᐅᓂᒃ ᐅᓇᑕᖃᑎᖃᕐᓂᖓᓂᒃ; ᑐᓴᓚᐅᕋᒥ ᐊᖓᔪᖅᑳᕐᔪᐊᖓ ᓚᑮᓯᒥᑦ ᓅᓯᒪᓕᕐᓂᖓᓂᒃ. 9ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᑐᓴᓚᐅᕋᒥ ᑎᕼᐊᑲ ᐃᑎᐅᐱᐊᒥᐅᑦ ᐊᖓᔪᖅᑳᕐᔪᐊᖓᓂᒃ ᐃᒫᒃ, “ᑍᑦᓱᒧᖓ ᓱᕐᔪᒃᑕᐅᓕᕋᕕᑦ.”#37:9 ᓱᕐᔪᒃᑕᐅᓕᕋᕕᑦ ᐅᕝᕙᓗ ᐅᓇᑕᕆᐊᕐᑕᐅᓕᕋᕕᑦ ᑕᒪᓐᓇ ᑐᓴᕋᒥᐅᑦ ᑎᓕᓯᓕᕐᐳᖅ ᕼᐃᓯᑬᐊᒧᑦ ᐅᖃᕐᓗᓂ, 10“ᐃᒫᒃ, ᐅᖃᕆᐊᖃᕐᐳᓯ ᕼᐃᓯᑬᐊᒧᑦ ᔫᑕᒥ ᐊᖓᔪᖅᑳᕐᔪᐊᕐᒧᑦ, ‘ᒎᑎᒧᑦ ᑕᑎᒋᔭᕐᓄᑦ ᐅᐃᕕᕆᔭᐅᑦᑍᓕᒋᑦ ᐅᖃᕐᓗᓂ, “ᔨᕉᓴᓕᒻ ᑐᓂᔭᐅᓂᐊᓐᖏᓚᖅ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ.” 11ᑕᑯᒋᑦ, ᑐᓴᕐᓯᒪᒐᕕᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᖃᓄᐃᓕᐅᕆᓯᒪᖕᒪᖔᑦ ᓄᓁᑦ ᐊᓯᖏᓐᓂᒃ, ᐊᓯᕈᐃᓪᓗᓂ ᐃᓘᓐᓇᖏᓐᓂᒃ, ᓱᓕ ᓴᐳᑎᔭᐅᓂᐊᕋᓱᒋᕖᑦ? 12ᐃᓅᖃᑎᒌᒡᔪᐊᑦ ᑍᒃᑯᐊ ᒎᑎᒥᖕᓄᑦ ᓴᐳᑎᔭᐅᓚᐅᕐᐹᑦ? ᓯᕗᓕᕕᓂᕐᒪ ᐊᓯᕈᓚᐅᕐᑕᖏᑦ, ᒎᔭᓂᒥᐅᑦ, ᕼᐊᕋᓐᒥᐅᑦ, ᕇᔨᑉᒥᐅᑦ, ᐄᑎᒥᐅᓪᓗ ᐃᓄᖏᑦ ᓄᓇᖃᕐᑐᑦ ᑎᓚᓴᕆᒥ. 13ᓇᐅᒡᓕ ᐊᖓᔪᖅᑳᕐᔪᐊᑦ ᕼᐊᒫᑎᒥᐅᓄᑦ, ᐋᕐᐹᑦᒥᐅᓄᓪᓗ; ᓯᑉᕼᐊᕋᕔᒥᐅᓄᓪᓗ, ᕼᐄᓇᒥᐅᓄᓪᓗ ᐂᐅᐊᒥᐅᓄᓪᓗ?’” 14ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᑎᑎᖅᑲᑦ ᐱᓪᓗᓂᒋᑦ ᑎᓕᔭᐅᔪᓂᑦ, ᐅᖃᓕᒫᕋᒥᒋᑦ, ᑐᒃᓯᐊᕐᕕᒡᔪᐊᓕᐊᕈᑎᕔᑦ ᐊᑕᓂᐅᓪᓗ ᓵᖓᓄᑦ ᐃᓕᓗᒋᑦ, 15ᕼᐃᓯᑬᐊᓗ ᑐᒃᓯᐊᓕᕐᐳᖅ ᐊᑕᓂᕐᒧᑦ ᐅᖃᕐᓗᓂ: 16#ᒨᓯᓯ ᐂᑉᐸᖏᑦ 25:22.“ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ, ᐃᓴᕆᐊᓕᒥᐅᑦ ᒎᑎᖓᑦ, ᐃᒃᓯᕙᐅᑕᕐᔪᐊᕐᒦᑦᑐᖅ ᓯᕈᐱᒻ ᖁᓛᓂ, ᐃᕝᕕᑐᐊᖅ ᒎᑎᑑᕗᑎᑦ, ᐊᖓᔪᖅᑲᐅᕕᖕᓂᒃ ᓯᓚᕐᔪᐊᕐᒥ ᑕᒤᓐᓂ; ᐱᓐᖑᕐᑎᑦᓯᓯᒪᔪᑎᑦ ᕿᓚᕐᒥᒃ ᓄᓇᕐᔪᐊᒥᒡᓗ. 17ᒫᓐᓇ ᐊᑕᓃᖅ ᓈᓚᓚᐅᕆᑦ ᑐᓴᕐᓗᑎᓪᓗ; ᐊᑕᓃᖅ ᑕᑯᓕᕆᑦ; ᑐᓵᓗᑎᓪᓗ ᓯᓇᑯᕆᐅᑉ ᐅᖃᐅᓯᖏᓐᓂᒃ ᑕᒤᓐᓂᒃ, ᑎᓕᓯᑦᔪᑎᒋᓚᐅᕐᑕᖏᑦ ᒥᑕᐅᑎᖃᕐᑐᑦ ᒎᑎᒥᒃ ᐆᒪᔪᒥᒃ. 18ᓱᓕᓪᓗᓂ ᐊᑕᓃᖅ, ᖃᐅᔨᒪᔪᐃᓐᓇᐅᕗᒍᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖏᑦ ᓄᖑᕅᖃᑦᑕᕐᓯᒪᖕᒪᑕ ᐃᓅᖃᑎᒌᒡᔪᐊᓂᒃ ᐅᓄᕐᑐᓂᒃ ᓄᓇᖁᑎᖏᓐᓂᒡᓗ ᓱᒃᑯᑎᕆᖃᑦᑕᕐᓯᒪᓪᓗᑎᒃ. 19ᒎᑎᓐᖑᐊᖏᓐᓂᒡᓗ ᐃᑯᐊᓪᓔᕙᒡᓗᑎᒃ; ᑕᒪᒃᑯᐊ ᒎᑎᓪᓚᕆᐅᖏᒻᒪᑕ, ᐃᓅᑉ ᐊᒡᒐᖏᓐᓄᑦ ᓴᓇᔭᐅᓯᒪᓪᓗᑎᒃ ᕿᔪᒥᒃ ᐅᔭᕋᖕᓂᒡᓗ; ᑍᒤᒻᒪᑦ ᓯᖁᒥᑕᐅᓚᐅᕐᐳᑦ. 20ᒫᓐᓇᓕ ᐊᑕᓃᖅ ᒎᑎᕗᑦ, ᓴᐳᑎᓚᐅᕐᑎᒍᑦ ᑖᑦᓱᒪ ᐱᔪᓐᓇᕐᓂᖓᓂᑦ, ᓯᓚᕐᔪᐊᕐᒥᐅᑦ ᐊᖓᔪᖅᑳᕐᔪᐊᖃᕐᕕᓕᒫᖏᑦ ᑐᑭᓯᓕᖁᓪᓗᒋᑦ ᐃᕝᕕᑐᐊᖅ ᐊᑕᓂᑑᒐᕕᑦ.”
ᐂᓮᐊᓯᐅᑉ ᐅᖃᐅᑦᔨᓂᖓ ᐊᖓᔪᖅᑳᕐᔪᐊᒥᒃ
ᐊᑕᓃᑦ ᐂᑉᐸᖏᑦ 19:20-37
21ᐂᓮᐊᓯ ᐂᒨᓯᐅᑉ ᐃᕐᓂᖓ ᑎᓕᓯᓕᕆᕗᖅ ᕼᐃᓯᑬᐊᒧᑦ ᐅᖃᕐᓗᓂ, “ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ; ᑐᒃᓯᐊᓚᐅᕋᕕᑦ ᐅᕙᓐᓄᑦ ᓯᓇᑯᕆᑉ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᐱᓪᓗᒍ. 22ᐊᑕᓂᖅ ᐃᒫᒃ ᐅᖃᕐᐳᖅ ᓯᓇᑭᕆᑉ ᐱᓪᓗᒍ: ‘ᐅᐃᒡᒐᓲᑉ ᓮᐅᓂᐅᑉ ᐸᓂᖓᑕ; ᐆᒥᒋᕚᑎᑦ, ᒥᑕᐅᑎᒋᓪᓗᑎᓪᓗ; ᐃᓕᕿᑕᒫᕐᓗᓂᓗ ᑐᓄᖕᓂ ᔨᕉᓴᓕᐅᑉ ᐸᓂᖓ. 23ᑭᓇᒥᒃ ᒥᑕᐅᑎᖃᓚᐅᕐᐲᑦ ᐅᖃᕐᓂᕐᓘᑎᖃᕐᓗᑎᓪᓗ? ᑭᓇᒧᑦ ᓂᐱᖅᑯᕐᑐᓪᓗᑎᑦ ᓂᓪᓕᐊᓚᐅᕐᐱᑦ ᐃᔩᒃᑭᒡᓗ ᖁᒻᒧᑦ ᕿᕕᐊᖓᓪᓗᒋᒃ ᐱᐅᔪᕆᓂᕐᒧᑦ? ᐊᑭᕋᕐᑐᕐᓗᑎᑦ ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᓐᓂᒃ! 24ᐱᔨᑎᑦ ᑎᓕᓚᐅᕋᕕᒋᑦ ᒥᑕᐅᑎᖃᕐᑎᓚᐅᕐᐸᑎᑦ ᐊᑕᓂᕐᒥᒃ, ᐅᖃᓚᐅᕐᐳᑎᓪᓗ, ᕿᒻᒥᕐᔪᐊᑦ ᐊᒃᓴᓗᐊᓕᖏᓐᓄᑦ ᖃᖅᑬᑦ ᖄᖏᓐᓄᑦ ᒪᔪᓚᐅᕐᐳᖓ, ᓕᐸᓇᓂᐅᑉ ᐳᕐᑐᓂᖏᑎᑐᑦ, ᓇᐹᕐᑐᖏᑕ ᑕᑭᓂᖏᓐᓂᒃ ᓰᑕᕆᓂᒃ ᓇᑲᑎᕆᓚᐅᕐᐳᖓ, ᓇᐹᕐᑐᕆᖕᓂᕐᐹᓂᒃ ᑎᑭᐅᑎᓯᒪᕗᖓ, ᖁᓪᓕᕐᐹᓄᑦ ᓇᐹᕐᑐᑦ ᖁᑦᓯᖕᓂᕐᐹᖏᓐᓄᑦ. 25ᐃᒥᕐᑕᕐᕕᓕᐅᕐᓯᒪᕗᖓ ᐃᒥᖃᑦᑕᕐᓗᖓᓗ ᐃᒪᖏᓐᓂᒃ, ᐄᑦᔨᑉᑎᐅᓪᓗ ᑰᓕᒫᖏᑦ ᓴᓗᐊᕐᑎᓚᐅᕐᐸᒃᑲ ᐃᑎᒐᓐᓄᑦ ᑐᓪᓕᕋᕐᓗᒋᑦ. 26ᑐᓴᓚᐅᓐᖏᓚᑏᑦ ᑕᒪᒃᑯᐊ ᑍᑦᓱᒪᓂᐊᓗᖕᓂᑦ ᐃᓱᒪᒋᓯᒪᓚᐅᕋᒃᑭᑦ? ᑍᒤᑦᑐᒃᓴᓕᐊᕆᓚᐅᕐᓗᒋᓪᓗ ᒫᓐᓇᓗ ᐊᓂᒍᕐᓯᒪᓕᕐᑐᑦ, ᐱᔪᓐᓇᕐᓂᖃᕐᑎᓐᓇᒃᑭᑦ ᑭᓯᐊᓂ ᐃᒡᓗᒐᓴᒡᔪᐊᓂᒃ ᐊᕙᓗᕐᔪᐊᖃᕐᑐᓂᒃ ᓯᖁᑦᑎᕆᖃᑦᑕᓚᐅᕐᐳᓯ. 27ᐃᓄᐃᓪᓗ ᑖᒃᑯᓇᓃᑦᑐᑦ, ᐱᔪᓐᓇᕐᓂᖃᕈᓐᓇᓚᐅᓐᖏᓚᑦ, ᑲᑉᐱᐊᓱᖃᑦᑕᓚᐅᕐᐳᑦ ᓇᓗᓕᕐᐸᒡᓗᑎᒃ, ᐱᕈᕐᓯᐊᑎᑐᑦ ᓇᑎᕐᓇᒦᑦᑐᑎᑐᑦ ᑍᒤᑉᐸᓚᐅᕐᐳᑦ ᐃᕕᒃᓱᒐᕐᑎᑐᑦ ᓇᑲᓴᕅᑦᑐᑎᑐᑦ, ᐃᕕᒃᓱᒐᕐᑎᑐᑦ ᐃᒡᓗᐃᑦ ᖄᖏᓐᓂ, ᐱᕈᕇᓚᐅᕋᑎᒃ ᑐᖁᓕᓕᕐᑐᑐᑦ. 28ᖃᐅᔨᒪᕙᕋ ᐃᓂᒋᕙᒃᑍᑦ, ᐊᓂᕕᒋᕙᒃᑍᓪᓗ ᐃᑎᕐᕕᒋᕙᒃᑍᓪᓗ, ᐅᕙᓐᓂᒡᓗ ᓂᓐᖓᐅᑦᔨᓯᒪᓪᓗᑎᑦ ᐊᑭᕋᕐᑐᕋᓱᖕᓃᑦ. 29ᐅᕙᓐᓄᑦ ᐊᒃᓱᕈᕐᓗᑎᑦ ᐊᑭᕋᕐᑐᕋᕕᑦ ᐱᐅᔪᕆᓃᓪᓗ ᓯᐅᑎᓐᓄᑦ ᑎᑭᑉᐳᖅ, ᑍᒤᒻᒪᑦ ᕿᖓᒃᑯᑦ ᓂᒃᓯᖕᓂᐊᕐᐸᒋᑦ ᖃᓂᒃᑯᓪᓗ ᕿᓪᓗᒻᒥᑦᔪᑎᑖᕐᑎᓪᓗᑎᑦ, ᐅᑎᕐᑎᓐᓂᐊᕐᐸᒋᑦ ᑕᒪᐅᓇᑦᓮᓐᓇᖅ ᑎᑭᕝᕕᒋᓚᐅᕐᑕᒃᑯᑦ.’”
30ᑕᕝᕙ ᕼᐃᓯᑬᐊ ᐅᖃᐅᑎᕚ, “ᐅᑯᐊ ᑕᕝᕙ ᓇᓗᓁᒃᑯᑕᐅᓂᐊᕐᑐᑦ ᐃᓕᖕᓄᑦ: ᐊᕐᕌᒍᒥ ᑕᕝᕙᓂ ᓂᕿᖃᕐᓂᐊᕐᐳᓯ ᐃᒻᒥᓂᒃ ᐱᕈᕐᑐᕕᓂᕐᓂᒃ, ᐊᕐᕌᒎᓪᓗ ᐂᑉᐸᖓᓂ ᓂᐊᖂᔭᒃᓴᓂᒃ ᐃᒻᒥᖕᓂᒃ ᐱᕈᕐᑐᕕᓂᕐᓂᒃ; ᐊᕐᕌᒍᐃᓪᓗ ᐱᖓᔪᐊᓐᓂ ᑲᓐᖓᕐᓱᐃᓛᕐᐳᓯ ᑲᑎᕐᓱᐃᓗᓯᓗ, ᐱᕈᕐᓰᕕᖕᓂᒃ ᕔᓂᒃᓴᓂᒃ ᐋᖅᑭᒃᓱᐃᓗᓯ ᐱᕈᕐᑐᖏᓐᓂᒡᓗ ᓂᕿᖃᕐᓗᓯ. 31ᔫᑕᐅᓪᓗ ᑭᖑᕚᖏᓐᓂ ᐊᒥᐊᒃᑰᑦ ᓱᓕ ᐊᒻᒧᑦ ᐊᒫᖃᓕᕈᒫᕐᐳᑦ, ᐆᒻᒪᕐᒥᓗᑎᒡᓗ ᐱᕈᕐᑐᖃᑦᓯᐊᓕᕈᒫᕐᐳᑦ. 32ᔨᕉᓴᓕᒥᑦ ᐊᓂᔪᒫᕐᐳᑦ ᐊᒥᐊᒃᑯᑦ, ᓮᐅᓂᐅᑉ ᖃᖅᑲᖓᓂ ᐊᓐᓇᒃᑐᑦ ᐊᓂᔪᒫᕐᐳᑦ, ᑕᒪᓐᓇ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᑲᔪᓯᑎᑦᓱᒪᒐᒥᐅᒃ ᐱᓇᓱᐊᕈᒫᕐᒪᒍ. 33ᐃᒫᒡᓗ ᐊᑕᓂᖅ ᐅᖃᕐᓯᒪᒋᕗᖅ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐱᑦᔪᑎᒋᓪᓗᒍ: ᐃᒡᓗᒐᓴᖕᓄᑦ ᑕᕝᕗᖓ ᐃᑎᕐᓂᐊᓐᖏᓚᖅ, ᖃᕐᔪᒥᒡᓘᓐᓃᑦ ᐊᑕᐅᓯᕐᒥᒃ ᐱᓯᒋᐊᕐᓂᐊᓐᖏᓚᖅ ᑖᒃᑯᓄᖓ, ᐊᒃᕖᕋᐅᓯᔭᕐᓗᓂᓘᓐᓃᑦ ᑕᕝᕗᖓ ᑎᑭᓐᓂᐊᓐᖏᓚᖅ, ᐃᒡᓗᒐᓴᒡᔪᐊᓂᒡᓗ ᐃᓗᓯᓯᒪᓗᓂ ᐱᓂᐊᓐᖏᓚᖅ. 34ᓄᓇᒥᓄᑦ ᐅᑎᕐᓂᐊᕐᐳᖅ ᑕᒪᐅᓈᕐᓗᓂ ᐊᑐᓚᐅᕐᑕᒥᒍᑦ; ᐃᒡᓗᒐᓴᒡᔪᐊᓄᑦ ᑕᕝᕗᖓ ᑎᑭᓐᓂᐊᓐᖏᓚᖅ, ᐊᑕᓂᖅ ᑍᒫᒃ ᐅᖃᕐᐳᖅ. 35ᐃᒡᓗᒐᓴᒡᔪᐊᑦ ᑖᒃᑯᐊ ᓴᐳᑎᓯᒪᓂᐊᕋᒃᑭᑦ ᐱᐅᓕᓗᒋᓪᓗ, ᐅᕙᖓ ᓇᖕᒥᓂᖅ ᐱᑦᔪᑎᒋᓪᓗᖓ, ᐱᔨᒐᓗ ᑍᕕᑎ ᐱᑦᔪᑎᒋᓪᓗᒍ.”
36ᑕᕝᕙ ᐊᑕᓂᐅᑉ ᐂᖏᓕᖁᑎᖓ ᐂᓚᐅᕐᐳᖅ, ᑐᖁᕅᓪᓗᓂᓗ ᐅᓇᑕᕐᑎᓂᒃ 185,000ᓂᒃ ᐊᓯᕆᐊᒥᐅᓂᒃ ᑕᖕᒫᕐᓯᒪᕕᒋᔭᖏᓐᓂ; ᖃᐅᒻᒪᓕᕐᑎᓪᓗᒍ ᐅᓪᓛᒃᑯᑦ, ᑎᒥᕕᓃᑦ ᑐᖁᖓᐅᓚᐅᕐᐳᑦ ᓇᓂᓕᒫᖅ. 37ᑕᕝᕙ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᓯᓇᑯᕆᑉ ᐊᐅᓪᓚᕐᐳᖅ, ᓄᓇᒥᓄᓪᓗ ᓂᓂᕕᒧᑦ ᐅᑎᕐᒥᓗᓂ. 38ᑐᒃᓯᐊᕐᑎᓪᓗᒍᓕ ᑐᒃᓯᐊᕐᕕᖕᒥᓂ ᒎᑎᒥᓄᑦ ᓂᓱᕌᒃᒧᑦ, ᐃᕐᓂᖏᒃᑕ ᒪᕐᕉᒃ ᐋᑕᕋᒥᓕᑭᐅᑉ ᓴᕆᔨᕆᐅᓪᓗ, ᓴᕕᒡᔪᐊᒥᖕᓄᑦ ᑲᐱᓪᓗᒍ ᑐᖁᑉᐹᒃ, ᕿᒫᓪᓗᑎᒡᓗ ᓄᓇᒧᑦ ᐊᕋᕌᑦᒧᑦ, ᐃᕐᓂᕆᖕᒥᔭᖓᓗ ᐃᓴᕼᐊᑕᓂ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᑭᖑᕝᕕᐅᑎᓪᓗᓂ.
Currently Selected:
ᐂᓮᐊᓯᐅᑉ ᐊᒡᓚᖏᑦ 37: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
