ᐂᓮᐊᓯᐅᑉ ᐊᒡᓚᖏᑦ 21
21
ᑕᑯᑎᑕᐅᓂᖅ ᐹᐱᓘᓂᒥᐅᑦ ᑲᑕᒍᒫᕐᓂᖓᓐᓂᒃ
1ᐅᖃᐅᓰᑦ ᐃᓄᖃᔪᐃᑦᑐᖅ ᐃᒪᕕᐅᑉ ᓴᓂᐊᓃᑦᑐᖅ ᐱᓪᓗᒍ, ᐊᓄᕆᕐᔪᐊᑎᑐᑦ ᑬᕙᑦᑐᑎᑐᑦ ᓂᒋᑉᒥᓐᖔᕐᑐᑎᑐᑦ ᓯᐅᕋᕐᔪᐊᑉ ᓄᓇᖓᒍᑦ ᐊᓯᕈᕐᑕᐅᓇᕐᑐᖅ ᑎᑭᐅᑎᔪᒫᕐᐳᖅ ᓄᓇᓂᑦ ᑲᑉᐱᐊᓇᕐᑐᓂᑦ, 2ᑕᑯᑎᑕᐅᓚᐅᕐᐳᖓ ᐃᓕᕋᓇᕐᑐᓂᒃ ᐃᒫᒃ ᐅᖃᐅᑎᔭᐅᓪᓗᖓ; ᐱᒋᔭᕕᓂᕐᓂᒃ ᑎᒎᖅᑬᔪᖅ ᑎᒎᖅᑬᓕᕐᐳᖅ, ᑐᖁᕅᔪᕐᓗ ᑐᖁᕅᓕᕐᐳᖅ, ᐃᓛᒻᒥᐅᑦ ᐅᓇᑕᕐᑐᒃᓴᖏᑦ ᐅᓇᑕᕆᐊᓕᕆᑦᓯ, ᒥᑎᐊᒥᐅᓪᓗ ᐅᓇᑕᕐᑐᒃᓴᖏᑦ ᐊᕙᑕᖏᕐᓯᓕᕆᑦᓯ ᐃᒡᓗᒐᓴᒡᔪᐊᓂᒃ; ᐹᐱᓘᓂᒥᐅᑦ ᐃᓄᖕᓂᒃ ᐊᓂᕐᓴᐅᒥᑎᑦᓯᓂᖓᑦ ᐃᓱᓕᑎᑦᓱᒪᓕᕐᐸᕋ. 3ᑍᒤᒻᒪᑦ ᓈᒃᑲᒃ ᑕᑕᑉᐳᒃ ᐃᓱᒪᔮᕐᓂᕐᒥᒃ; ᐋᓐᓂᐊᓂᕐᒧᓪᓗ ᐊᔪᓕᕐᑎᑕᐅᕗᖓ, ᐃᕐᓂᓱᒃᑑᑉ ᐋᓐᓂᐊᓂᖓᑐᑦ; ᐅᑯᖓᓕᓂᕐᒧᑦ ᑐᓵᔪᓐᓃᕐᐳᖓ, ᐃᓱᒪᔮᕐᓂᕐᒧᓪᓗ ᑕᐅᑐᒍᓐᓃᕋᒪ. 4ᓂᐊᖁᕋᓗ ᐅᐃᑦᔭᓐᖑᓕᕐᓗᓂ ᑲᑉᐱᐊᓱᖕᓂᕐᒧᓪᓗ ᓴᔪᓗᓕᕐᓗᖓ, ᐅᓐᓄᖕᓂᐊᕐᑐᖅ ᐊᑯᓂᒋᓕᓚᐅᕐᐸᕋ ᑎᑭᐅᑎᒐᓗᐊᕐᒪᓪᓗ ᐱᐅᓂᕐᓴᒦᓚᐅᓐᖏᓚᖓ ᑲᑉᐱᐊᓇᕐᑐᓄᑦ ᑎᑭᑕᐅᒃᑲᓐᓂᑐᐃᓐᓇᓚᐅᕐᐳᖓ. 5ᓵᒥᒃ ᐋᖅᑭᒃᓱᐃᕗᑦ ᓂᕆᕝᕕᖕᒥᒃ, ᓂᕈᒻᒫᒃᑯᑏᓪᓗ ᐃᒃᓯᕙᐅᑕᕆᔭᐅᓂᐊᕐᑐᑦ ᓂᕆᔭᕐᑐᕐᓯᒪᔪᓄᑦ ᐊᑐᐃᓐᓇᕈᕐᓯᒪᓕᕐᐳᑦ; ᐃᒥᕐᐳᑦ ᓂᕆᓪᓗᑎᒡᓗ, ᓂᓪᓕᕐᑐᖃᓕᕐᐳᕐᓗ, “ᐅᓇᑕᕐᑐᒃᓴᓄᑦ ᐊᖓᔪᖅᑳᖑᔪᓯ ᓴᐴᓗᑕᓯ ᑎᒍᓕᕐᓯᐅᒃ.” 6ᐊᑕᓂᐅᑉ ᐃᒫᒃ ᐅᖃᐅᑎᓕᕐᐹᖓ: “ᐅᓇᑕᕐᑐᒃᓴᒥᒃ ᖃᐅᔨᓴᕐᑎᐅᓂᐊᕐᑐᒥᒃ ᓂᑯᕕᖁᔨᓕᕆᑦ, ᑕᑯᔭᒥᓂᒡᓗ ᐅᖃᕆᐊᕐᑐᖃᑦᑕᖁᓗᒍ. 7ᑕᑯᓂᕋᕐᐸᑦ ᕿᒥᕐᔪᐊᒃᑰᕐᑐᓂᒃ ᒪᕐᕉᓈᕐᑎᕐᓗᑎᒃ ᓴᓂᓕᕇᒃᑐᓂᒃ ᓯᐅᑎᖅᑯᕐᑐᔪᓂᒡᓗ, ᑳᒥᓕᖕᓂᓗ ᐃᑭᒪᔪᓂᒃ ᑐᓵᓇᓱᐊᑦᓯᐊᕐᓕᒋᑦ ᐅᑦᔨᕐᓱᑦᓯᐊᕐᓗᓂ.” 8ᖃᐅᔨᓴᕐᑎ ᓂᓪᓕᐊᓕᕐᐸᑦ, “ᐊᑕᓃᖅ, ᖃᐅᔨᓴᕐᕕᖕᒥ ᓇᖏᓚᐅᕐᐳᖓ ᐅᓪᓗᓕᒫᖅ, ᐃᓂᒋᔭᓐᓂᓗ ᖃᐅᔨᓴᓚᐅᕐᐳᖓ ᐅᓐᓄᐊᓕᒫᖅ. 9#ᑕᑯᑎ 14:8; 18:2.ᐊᓱᐃᓛᒃ, ᑕᑯᓕᓚᐅᕐᐸᒃᑲ ᓴᖅᑭᑦᑐᑦ ᕿᒻᒥᕐᔪᐊᒃᑰᕐᑐᑦ ᒪᕐᕉᓈᕐᑎᕐᑐᑦ ᓴᓂᓕᕇᒃᓗᑎᒃ!” ᐊᑕᓂᖅ ᑭᐅᓕᕐᐳᖅ, “ᐹᐱᓘᓂ ᓵᓚᐅᕗᖅ; ᒎᑎᓐᖑᐊᓕᒫᖏᓪᓗ ᐅᕐᕉᕋᕐᑎᑕᐅᓪᓗᑎᒃ ᒪᓂᖅᑲᒧᑦ ᓯᖁᑦᑎᕐᐳᑦ. 10ᐃᕝᕕᑦ ᓂᐊᖂᔭᒃᓴᑎᑐᑦ ᐊᓇᐅᓕᕐᑕᐅᓪᓗᑎᑦ ᐃᕖᔭᕐᑕᐅᓯᒪᔪᑎᑦ, ᖃᓄᕐᓕ ᐅᖃᐅᓯᕐᒥᒃ ᑐᓴᕐᓯᒪᕗᖓ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓐᓂᑦ ᑐᓴᓚᐅᕐᑕᓐᓂᒃ ᐃᓴᕆᐊᓕᒥᐅᑦ ᒎᑎᖓᓐᓂᑦ ᐅᖃᐅᓯᒃᓴᒥᒃ ᐃᓕᖕᓄᑦ.”
ᐅᖃᐅᓰᑦ ᐄᑐᒥᒥᐅᓂᒃ ᐱᑦᔪᑎᖃᕐᑐᑦ
11ᐅᖃᐅᓰᑦ ᐅᑯᐊ ᑑᒪ ᐱᑦᔪᑎᒋᓪᓗᒍ. ᐃᓂᕐᑎᕆᔪᑦ ᓰᐊᕆᒥᑦ ᓂᐱᒥᒃ ᓂᓪᓕᐊᔪᖃᕐᐳᖅ ᐅᕙᓐᓄᑦ, “ᖃᐅᔨᓴᕐᑏᑦ ᐅᓐᓄᐊᖅ ᖃᓄᖅ ᕿᓚᒻᒥᐅᑎᒋᓂᐊᕐᐸᑦ? ᐅᖃᐅᑎᓐᖓ ᐅᓐᓄᐊᖅ ᖃᓄᖅ ᐃᓱᓕᓴᕅᑎᒋᓂᐊᕐᐹ?” 12ᑭᐅᓚᐅᕐᐸᕋ, “ᐅᓪᓛᖅ ᑎᑭᓕᕐᐳᖅ, ᑭᓯᐊᓂ ᐅᓐᓄᖕᓂᐊᕆᕗᖅ, ᐊᐱᕐᓱᕈᒪᒍᕕᖓ ᐅᑎᕐᓂᐊᕐᐳᑎᑦ ᐊᐱᕆᔭᕐᑐᕐᓗᖓ.”
ᐅᖃᐅᓰᑦ ᐊᕅᐱᐊᒥᐅᓂᒃ ᐱᑦᔪᑎᖃᕐᑐᑦ
13ᐅᖃᐅᓯᖅ ᐃᓂᕐᑎᕆᔪᖅ ᐊᕋᐱᐊᒥᐅᓂᒃ, ᑎᑖᓂᒥᐅᑕᐅᔪᓯ, ᑕᖕᒫᕐᓯᒪᕙᒃᑐᓯ ᐃᓄᖃᖏᑦᑐᒥ ᑳᒥᓕᖕᓂᒃ ᐃᖏᕐᕋᑦᔪᑎᖃᕐᓗᓯ ᐊᕅᐱᐊᑉ ᓄᓇᖓᒍᑦ. 14ᐃᒥᕈᒃᓗᑎᒃ ᐃᓕᑦᓯᓐᓄᑦ ᑎᑭᑦᑐᑦ ᐃᒥᕐᑎᖃᑦᑕᕐᓯᒋᑦ, ᐃᓕᑦᓯ ᑏᒪᒥ ᓄᓇᖃᕐᑐᓯ, ᓄᓇᒥᖕᓂ ᕿᒫᓯᒪᔪᑦ ᓂᕆᑎᖃᑦᑕᕐᓯᐅᒃ. 15ᑍᒃᑯᐊ ᕿᒫᓯᒪᖕᒪᑕ ᓴᕕᒡᔪᐊᓂᒃ ᑖᒃᑯᓂᖓ ᑐᖁᑦᓯᓇᓱᐊᕐᑐᓂᒃ, ᐱᑎᒃᓯᓂᓪᓗ ᑖᒃᑯᓄᖓ ᑐᕌᕐᑎᑕᐅᔪᓂᒃ, ᐅᓇᑕᕐᓂᕐᒧᓪᓗ ᑲᑉᐱᐊᓇᕐᑐᓂᒃ. 16ᐊᑕᓂᖅ ᐃᒫᒃ ᐅᕙᓐᓄᑦ ᐅᖃᕐᒪᑦ, “ᐊᕐᕌᒍ ᐃᓱᓕᓚᐅᕐᑎᓐᓇᒍ, ᐱᓇᓱᐊᕐᑎᐅᑉ ᐊᕐᕌᒍ ᒪᓕᒃᑕᖓ ᐊᑐᕐᓗᒍ, ᑭᑕᕆᒥᐅᑦ ᐊᔪᖏᓐᓂᕐᔪᐊᖓᑦ ᐃᓱᓕᑦᓱᒫᓕᕐᐳᖅ. 17ᑭᑕᕆᒥᐅᑦ ᐱᑎᒃᓴᕐᑎᖏᑦ ᐃᕐᓯᑐᐃᓐᓂᕐᐹᑦ, ᐅᓄᖏᑦᑐᑯᓗᐃᑦ ᑭᓯᐊᓂ ᐊᒥᐊᒃᑰᔪᒫᕐᐳᑦ, ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᑍᒫᒃ ᐅᖃᕐᐳᖅ.”
Currently Selected:
ᐂᓮᐊᓯᐅᑉ ᐊᒡᓚᖏᑦ 21: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
