ᐂᓮᐊᓯᐅᑉ ᐊᒡᓚᖏᑦ 22
22
ᐅᖃᐅᓰᑦ ᔨᕉᓴᓕᒥᐅᓂᒃ ᐃᓂᕐᑎᕆᔪᑦ
1ᐅᖃᐅᓰᑦ ᑖᒃᑯᐊ ᐃᓂᕐᑎᕆᔪᑦ ᐱᑦᔪᑎᖃᕐᐳᑦ ᓇᕐᓴᕐᒥᒃ ᑕᑯᑎᑕᐅᕕᖕᒥᒃ, ᖃᓄᐃᒻᒪᑦ ᒪᔪᕐᓯᒪᕕᓯ, ᐃᓘᓐᓇᓕᒫᓯ ᐃᒡᓗᐃᑦ ᖄᖏᓐᓄᑦ? 2ᓂᐱᖅᑯᕐᑐᔪᐊᓘᓕᕋᑦᓯ, ᐅᐃᒪᔮᕐᑐᑦ ᐃᒡᓗᒐᓴᒡᔪᐊᕐᒥᐅᑦ ᓂᐱᖏᑎᑐᑦ, ᖁᕕᐊᓱᕕᒡᔪᐊᕐᑐᑎᑐᑦ ᓄᓇᓕᒡᔪᐊᒥ, ᑐᖁᑕᐅᓯᒪᔪᑦ ᐃᓕᑦᓯᓐᓂᑦ ᓴᕕᒡᔪᐊᒧᑦ ᑐᖁᕋᕐᑕᐅᓐᖏᓚᑦ ᐅᓇᑕᕐᓂᕐᒧᓪᓘᓐᓃᑦ ᑐᖁᕋᕐᑕᐅᓐᓂᓐᖏᓚᑦ. 3ᐊᖓᔪᖅᑳᓯ ᑲᑎᓐᖓᓪᓗᑎᒃ ᕿᒫᓯᒪᕗᑦ, ᐱᑎᒃᓯᓕᔭᖏᑦᑐᓄᓪᓗ ᑎᒍᔭᐅᓯᒪᓪᓗᑎᒃ, ᐃᓘᓐᓇᑎᒃ ᓇᓂᔭᐅᓪᓗᑎᒃ ᑎᒍᔭᐅᓚᐅᕐᐳᑦ, ᐅᖓᓯᒃᑐᒧᑦ ᕿᒫᓯᒪᒐᓗᐊᕐᑎᓪᓗᒋᑦ. 4ᑍᒤᒻᒪᑦ ᐃᒫᒃ ᐅᖃᓚᐅᕐᐳᖓ: “ᐊᓚᕆᑦᓯ ᐅᕙᓐᓂᒃ, ᐃᓱᒪᕐᓱᕐᓗᖓ ᕿᐊᓚᖓ; ᓮᒻᒪᕐᓴᕐᑕᐅᓇᓱᐊᕈᒪᓐᖏᓚᖓ ᐃᓅᖃᑎᒃᑲ ᑐᖁᑕᐅᓚᐅᕐᑐᑦ ᐱᓪᓗᒋᑦ.” 5ᐊᑕᓂᖅ ᕿᓚᖕᒥᐅᒐᓴᒡᔪᐃᑦ ᒎᑎᖓᑦ ᐅᓪᓗᖃᕐᑎᑦᓯᖕᒪᑦ ᐅᐃᒻᒪᒃᓯᒪᓂᕐᒥᒃ ᑐᓪᓕᕋᖃᑦᑕᐅᑎᓂᕐᒥᒡᓗ ᓇᓗᓕᕐᓯᒪᓂᕐᒥᒡᓗ ᓇᕐᓴᒥ ᑕᑯᑎᑕᐅᕕᖕᒥ, ᐃᒡᓗᒐᓴᒡᔪᐊᑦ ᐊᕙᓗᕐᔪᐊᖏᓐᓂᒃ ᓯᖁᑦᑎᕆᓂᕐᒥᒃ, ᕾᒐᓛᕐᓂᕐᒥᒡᓗ ᐃᑲᔪᕐᑕᐅᔪᒪᓂᕐᒥᒃ ᖃᖅᑲᓄᑦ. 6ᐃᓛᒻᒥᒥᐅᑦ ᖃᕐᔪᐃᑦ ᐴᖓᓂᒃ ᓇᒃᓴᕐᓯᕗᑦ ᕿᒻᒥᕐᔪᐊᓪᓗ ᐃᑭᒪᕕᖏᓐᓂᒃ ᐊᒃᓴᓗᐊᓕᖕᓂᒃ ᕿᒻᒥᕐᔪᐊᒥᓗ ᐃᑭᒪᔪᓂᒃ, ᑭᕆᒥᐅᑦ ᓴᐴᓗᑍᑦ ᓴᖅᑭᑎᑉᐰᑦ. 7ᓇᕐᓮᑦ ᓂᕈᐊᕐᓯᒪᔭᓯ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ ᐅᓂᐊᕐᑐᓂᒃ ᑕᑕᓚᐅᕐᐳᑦ, ᐅᓇᑕᕐᑐᒃᓮᓪᓗ ᕿᒻᒥᕐᔪᐊᒃᑰᕐᑐᑦ ᓇᖏᓕᕐᓗᑎᒃ ᐃᑎᕐᑕᕐᕕᑦᓯᓐᓂ. 8ᔫᑕᒥᐅᑦ ᐱᔭᐅᑦᔧᕐᓯᒪᑦᔪᑎᒋᓇᓱᒃᑕᓕᒫᖏᑦ ᓯᖁᒥᑦᓱᒫᕐᐰᑦ.
ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᕿᕕᐊᓕᕈᒫᕐᐳᓯ ᐅᓇᑕᐅᑎᑖᕋᓱᐊᓕᕐᓗᓯ ᓇᐹᕐᑐᓕᖕᒥᐅᑦ ᑭᖑᕚᖑᖃᑎᒌᖏᓐᓄᑦ. 9ᑕᑯᓚᐅᕐᐳᓯ ᑍᕕᑎᐅᑉ ᐃᒡᓗᒐᓴᒡᔪᐊᖏᑦ ᐅᓄᕐᑐᓂᒃ ᑭᓪᓚᖃᕐᒪᑕ, ᑲᑎᕐᓱᐃᓚᐅᕐᐳᓯ ᐃᒥᕐᑕᕐᕕᐅᑉ ᐊᒃᐸᓯᖕᓂᕐᓴᐅᑉ ᐃᒪᖓᓂᒃ. 10ᔨᕉᓴᓕᐅᓪᓗ ᐃᒡᓗᖏᑦ ᓈᓴᓚᐅᕐᐸᓯ, ᐃᒡᓗᓂᒃ ᓯᖁᑦᑎᕆᔭᕆᐊᖃᓚᐅᕐᐳᓯ ᐊᕙᓗᕐᔪᐊᒧᑦ ᐃᓛᕐᑑᑎᒋᔪᒪᓪᓗᒋᑦ. 11ᐃᒥᕐᑕᕐᕕᒡᔪᐊᓕᐅᕐᐳᓯ ᐊᕙᓗᕐᔪᐊᑉ ᐃᑭᐊᖓᒍᑦ ᐃᒥᕐᑕᕐᕕᑐᖃᕐᒥᑦ ᐃᒻᒥᕐᐸᓪᓕᐊᔪᓐᓇᖁᓪᓗᒍ, ᐃᓱᒪᖃᓚᐅᓐᖏᓚᓯᓕ ᐱᓇᓱᐊᕐᑎᑦᓯᓚᐅᕐᑐᒥᒃ, ᑕᑯᓴᓚᐅᓐᖏᓚᓯᓘᓐᓃᑦ ᐃᓱᒪᓕᐅᕆᓚᐅᕐᑐᒥᒃ ᓯᕗᓂᑐᖃᖓᓂᑦ ᑍᒤᓕᖓᖁᓪᓗᒍ. 12ᑕᒪᓐᓇ ᐅᓪᓗᖅ ᓇᓪᓕᐅᑎᒃᐸᑦ ᐊᑕᓂᖅ ᕿᓚᖕᒥᐅᒐᓴᒡᔪᐃᑦ ᒎᑎᖓᑦ ᕿᐊᔪᒃᓴᐅᓂᕅᓛᕐᐳᖅ ᐃᓕᑦᓯᓐᓂᒃ ᕿᒃᓵᒃᑐᒃᓴᐅᓂᕅᓪᓗᓂᓗ, ᓄᔧᔭᕐᓯᒪᔪᒃᓴᐅᓂᕅᓛᕐᐳᖅ ᐊᓐᓄᕌᕐᓯᒪᔪᒃᓴᐅᓂᕅᓪᓗᓂᓗ ᕿᒃᓵᒃᑐᕐᓯᐅᑎᓂᒃ. 13#1 ᑯᕆᓐᑎ 15:32.ᖁᕕᐊᓱᒡᓗᓯᓕ ᐊᓕᐊᓁᒍᓱᓚᐅᕐᐳᓯ, ᓂᕆᕕᒡᔪᐊᕐᓂᐊᕐᑕᑦᓯᓐᓂᒃ ᓰᐱᓂᒃ ᐃᒻᒧᒃᓯᐅᒐᕐᓂᒡᓗ ᑐᖁᑦᓯᓚᐅᕐᐳᓯ, ᓂᕆᓪᓗᓯ ᐃᒥᕐᓗᓯᓗ ᕔᓂᒥᒃ: ᐅᖃᕐᓗᓯ, “ᓂᕆᓚᐅᕐᑕ ᐃᒥᕐᓗᑕᓗ, ᖃᐅᒃᐸᑦ ᑐᖁᓂᐊᓕᕋᑦᑕ!” 14ᑕᕝᕙ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᐅᖃᐅᑎᓚᐅᕐᐹᖓ, “ᑕᒪᓐᓇ ᐊᔪᕐᑐᓕᓂᖅ ᐃᓱᒪᒋᔪᓐᓁᕐᑕᐅᑦᔪᑎᒋᓂᐊᓐᖏᓛᑦ ᐃᓅᓂᓕᒫᖏᓐᓂ,” ᐊᑕᓂᖅ ᕿᓚᖕᒥᐅᒐᓴᒡᔪᐃᑦ ᒎᑎᖓᑦ ᐅᖃᕐᐳᖅ.
ᓯᑉᓇᐅᑉ ᐃᓂᕐᑎᕐᑕᐅᓂᖓ
15ᐊᑕᓂᖅ ᕿᓚᖕᒥᐅᒐᓴᒡᔪᐃᑦ ᒎᑎᖓᑦᑕ ᐅᖃᐅᑎᓚᐅᕐᐹᖓ, “ᓯᑉᓇᓕᐊᖁᓪᓗᖓ, ᐊᖓᔪᖅᑳᕐᔪᐊᑉ ᐃᒡᓗᒥᐅᖃᑎᖏᓐᓄᑦ ᑲᒪᔨᒻᒪᕆᐅᑎᑕᐅᔪᖅ ᐅᖃᐅᑎᔭᕐᑐᓗᒍ, 16‘ᖃᓄᖅ ᐃᓕᖕᓂᒃ ᐃᓱᒪᒋᕖᑦ? ᑭᓇᒧᑦ ᐱᔪᓐᓇᕐᑎᑕᐅᓪᓗᑎᑦ ᖃᖅᑲᐅᑉ ᐊᑭᓐᓇᖓᒍᑦ ᕾᕈᓱᓕᐅᓚᐅᕐᐱᑦ ᐃᓗᕕᕐᑕᐅᕕᒃᓴᕐᓂᒃ? 17ᐱᓪᓚᕆᐊᓘᒐᓗᐊᕐᑎᓪᓗᑎᑦ, ᐊᑕᓂᐅᑉ ᑭᕕᒡᓗᓂᑎᑦ ᐃᒋᑦᓱᒫᕐᐹᑎᑦ. 18ᑭᕕᒡᓗᓂᑎᑦ ᐊᕐᓴᕐᑎᑐᑦ ᐃᒋᑦᓱᒫᕐᐹᑎᑦ ᓄᓇᒧᑦ ᓄᓇᖃᕐᕕᒋᔭᑦᓯᓐᓂᑦ ᐊᖏᓂᕐᓴᒧᑦ; ᑍᑲᓂᓗ ᑐᖁᔪᒫᕐᐳᑎᑦ ᐊᒃᓴᓗᐊᓕᖁᑎᕕᑦ ᕿᒧᒃᓯᐅᑎᓄᑦ ᐅᓂᐊᕐᑕᐅᓲᑦ ᐅᐱᒋᓂᕐᐹᕆᔭᕕᑦ ᓴᓂᐊᓂ, ᐊᖓᔪᖅᑳᕕᑦ ᐃᒡᓗᖓᓂ ᑕᓗᕈᒃᑯᓐᓇᕐᓯᒐᕕᑦ.#22:18 ᑕᓗᕈᒃᑯᓐᓇᕐᓯᒐᕕᑦ ᐅᕝᕙᓗ ᐃᓕᕋᒃᑯᓴᐅᑎᐅᓕᕋᕕᑦ 19ᐊᑕᓂᐅᑉ ᑲᒪᔨᒻᒪᕆᐅᓂᕆᔭᕐᓂᑦ ᐲᕐᑎᑦᓱᒫᕐᐹᑎᑦ ᐱᒻᒪᕆᐅᑎᕐᕕᒋᔭᕐᓂᑦ ᐊᓂᑕᐅᑎᑦᓱᒫᕐᐹᑎᑦ. 20ᐊᑕᓂᐅᑉ ᓯᑉᓇ ᐅᖃᐅᑎᕚ, ᑍᒤᑕᐅᕕᒃᓮᑦ ᓇᓪᓕᐅᑎᒃᐸᑦ, ᑭᒡᒐᕋ ᐃᓔᐊᑭᒻ ᕼᐃᓪᑬᐊᐅᑉ ᐃᕐᓂᖓ ᑎᓕᔪᒫᕐᐸᕋ. 21ᐊᓐᓄᕌᕐᓂᒃ ᐊᓐᓄᕌᕐᑎᑦᓱᒫᕐᐸᕋ, ᑕᑦᓯᕈᑎᖕᓂᒡᓗ ᐊᑎᑎᓪᓗᒍ, ᐱᔪᓐᓇᕐᓂᕆᕙᓚᐅᕐᑕᕐᓂᒡᓗ ᐱᔪᓐᓇᕐᓂᕐᑖᕐᑎᓪᓗᒍ, ᔨᕉᓴᓕᒥᐅᓄᑦ ᔫᑕᒥᐅᓄᓪᓗ ᐊᑖᑕᒋᔭᐅᔪᑎᑐᑦ ᑍᒤᑎᑦᓱᒫᕐᐸᕋ. 22#ᑕᑯᑎ 3:7.ᐱᔪᓐᓇᕐᓂᕆᔭᕆᐊᖃᕐᑕᓕᒫᖏᓐᓂᒃ ᐱᑎᑦᓱᒫᕐᑕᕋ ᐊᖓᔪᖅᑳᕐᔪᐊᑦ ᐊᑖᓂ ᑍᕕᑎᐅᑉ ᑭᖑᕚᖓ, ᑲᒪᔨᓪᓚᕆᐅᓂᕐᒥᓄᑦ ᐱᔪᓐᓇᐅᑎᖃᕐᓂᐊᕐᐳᖅ ᑕᒤᓐᓄᑦ ᐅᒃᑯᐃᕐᑕᖏᑦ ᐊᓯᐊᓄᑦ ᐅᒃᑯᐊᕐᑕᐅᔪᓐᓇᕐᓂᐊᓐᖏᓚᑦ, ᐅᒃᑯᐊᕐᑕᖏᓪᓗ ᐊᓯᐊᓄᑦ ᐅᒃᑯᐃᕐᑕᐅᔪᓐᓇᖏᓪᓗᑎᒃ. 23ᐲᒐᒃᓴᐅᔪᓐᓃᕐᑎᓐᓂᐊᕐᐸᕋ ᐃᓂᒋᔭᖓᓂᑦ ᐸᐅᒍᐊᕐᑎᑐᑦ ᒪᖒᒪᔪᑎᑐᑦ, ᐃᒡᓗᒥᐅᖃᑎᖏᑕᓗ ᐅᐱᒋᔭᐅᔪᑎᒃᓴᕆᓂᐊᕐᐹᑦ. 24ᑭᓯᐊᓂ ᐃᓚᒋᔭᓂ ᑲᒪᒋᔭᓂᓗ ᐅᖁᒤᒃᓴᕈᑎᒋᕙᒍᒫᕐᐰᑦ, ᐃᓚᒋᔭᒥᓄᑦ ᐊᑕᕕᐅᓪᓚᕆᒍᒫᕐᒪᑦ ᓲᕐᓗ ᖃᑦᑍᑦ ᐃᐳᐊᓖᓪᓗ ᓂᕕᖓᕕᖕᒥᖕᓂ ᓂᕕᖓᕙᖕᒪᑕ! 25ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕐᐳᖅ, ᓂᕕᓐᖓᕕᒃ ᐊᑦᓱᖏᕐᓯᒪᓚᐅᕐᑐᖅ ᐸᓚᓐᖓᒃᑯᓂ ᑲᑕᒍᒫᕐᐳᖅ, ᑖᑦᓱᒧᖓᓗ ᓂᕕᖓᓚᐅᕐᑐᑦ ᓂᕕᓐᖓᕕᒃᓮᕈᑎᔪᒫᕐᐳᑦ. ᐊᑕᓂᖅ ᐅᖃᕐᐳᖅ.’”
Currently Selected:
ᐂᓮᐊᓯᐅᑉ ᐊᒡᓚᖏᑦ 22: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
