ᐂᓮᐊᓯᐅᑉ ᐊᒡᓚᖏᑦ 19
19
ᒎᑎᐅᑉ ᐄᑦᔨᑉᑎᒥᐅᓂᒃ ᓱᒋᐊᕐᓯᔪᒫᕐᓂᖓ
1 #
ᔨᕆᒤᐊ 46:2-26; ᐃᓯᑭᐊᓕ 29:1—32:32. ᐅᖃᐅᓰᑦ ᐄᑦᔨᑉᑎᒥᐅᑦ ᐱᓪᓗᒋᑦ, ᑕᑯᓕᕐᓯᐅᒃ ᐊᑕᓂᖅ ᓄᕗᔭᒥ ᓱᒃᑲᓕᔪᒥ ᐃᑭᒪᓗᓂ ᐄᑦᔨᑉᑎᒧᑦ ᑎᑭᓕᕐᑐᖅ; ᐄᑦᔨᑉᑎᒥᐅᑦ ᒎᑎᓐᖑᐊᖏᑦ ᓴᔪᒍᒫᕐᐳᑦ ᑖᑦᓱᒪ ᓇᔪᕐᑕᖓᓂ, ᐄᑦᔨᑉᑎᒥᐅᓪᓗ ᐆᒻᒪᑎᖏᑦ ᐊᐅᒃᑐᑎᑐᑦ ᑍᒤᑦᓱᒫᕐᐳᑦ ᐃᓗᖏᓐᓂ. 2ᐄᑦᔨᑉᑎᒥᐅᑦ ᓵᓐᖓᑎᑦᓱᒫᕐᐸᒃᑲ ᐃᓅᖃᑎᒥᖕᓂᒃ, ᐅᓇᑕᓕᕈᒫᕐᐳᑦ, ᐊᖑᑏᑦ ᓄᑲᕇᑦ ᐃᒻᒥᖕᓄᑦ ᐅᓇᑕᓕᕐᓗᑎᒃ, ᓯᓚᖅᑲᑎᒌᑦ ᓯᓚᖅᑲᑎᒥᖕᓄᑦ ᐅᓇᑕᓕᕐᓗᑎᒃ, ᐃᒡᓗᒐᓴᒡᔪᐊᒥᐅᑦ ᐃᒡᓗᒐᓴᒡᔪᐊᒥᐅᓂᒃ ᐊᓯᒥᖕᓂᒃ ᐅᓇᑕᓕᕐᓗᑎᒃ, ᐊᖓᔪᖅᑳᕐᔪᐊᖃᕐᕖᓪᓗ ᐊᖓᔪᖅᑳᕐᔪᐊᖃᕐᕕᖕᒥᒃ ᐊᓯᒥᖕᓂᒃ ᐅᓇᑕᓕᕐᓗᑎᒃ. 3ᐄᑦᔨᑉᑎᒥᐅᑦ ᐃᓕᖅᑯᓯᖏᑦ ᐊᑐᕈᓐᓃᕈᒫᕐᐳᑦ ᑖᒃᑯᓇᓂ, ᐱᓇᓱᐊᕈᒪᔭᖏᓐᓂᒡᓗ ᓇᓗᓕᕐᑎᑦᓱᒫᕐᐸᒃᑲ; ᒎᑎᓐᖑᐊᒥᖕᓂᒃ ᐊᖓᒃᑯᓂᒡᓗ ᐃᑲᔪᕐᑎᖃᕋᓱᐊᓕᕈᒫᕐᐳᑦ, ᑐᖁᖓᔪᓪᓗ ᐊᓂᕐᓂᖏᓐᓂᒃ ᐱᓇᓱᐊᖃᑦᑕᕐᑐᓂᒃ ᐊᖓᒃᑰᓇᓱᐊᕐᑐᓂᒡᓗ ᑕᑎᖃᕋᓱᓕᕈᒫᕐᐳᑦ. 4ᐄᑦᔨᑉᑎᒥᐅᑦ ᐊᐅᓚᑕᐅᑎᑦᓱᒫᕐᐸᒃᑲ ᐊᖓᔪᖅᑳᕐᔪᐊᕐᒧᑦ ᐊᒃᓱᕈᕐᓇᕐᑐᒦᑎᑦᓯᔪᒧᑦ; ᐊᖓᔪᖅᑳᕐᔪᐊᕐᒧᓪᓗ ᑲᑉᐱᐊᓱᒃᑎᑦᓯᔪᒧᑦ ᐊᖓᔪᖅᑲᐅᕕᐅᑎᑦᓱᒫᕐᐸᒃᑲ, ᐊᑕᓂᖅ ᐅᖃᕐᐳᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ. 5ᑰᒑᓗᒃ ᓁᓕ ᓴᓗᐊᕈᒫᕐᐳᖅ, ᑰᒃ ᐃᒤᕐᓯᒪᓕᕐᓗᓂ ᐸᓂᕐᓯᒪᓕᕈᒫᕐᐳᖅ. 6ᑰᖕᒥ ᐅᒥᐊᕐᔪᐊᓄᑦ ᐊᖅᑯᑎᓕᐊᕆᓯᒪᔪᑦ ᑎᐱᓗᓕᕈᒫᕐᐳᑦ, ᐄᑦᔨᑉᑎᐅᑉ ᑰᖓᓂ ᓁᓕᒥ ᐊᕙᓚᖓᔪᑦ ᒥᑭᔫᓕᕈᒫᕐᐳᑦ ᓴᓗᐊᕐᓗᑎᒡᓗ, ᐃᒫᓂ ᐱᕈᕐᑐᑦ ᐃᕕᒃᓱᒊᑦ ᓱᓪᓗᓕᕐᔪᐊᓪᓗ ᐸᓂᕐᓂᕐᒧᑦ ᑐᖁᓕᔪᒫᕐᐳᑦ. 7ᑰᒑᓘᑉ ᓁᓕᐅᑉ ᓴᓂᕌᓂ ᓱᓇᖃᕈᓐᓁᕈᒫᕐᐳᖅ, ᓁᓕᐅᑉ ᓯᓈ ᐸᓂᕐᑑᓕᕐᓗᓂ, ᐱᕈᕐᓯᐊᕕᓃᑦ ᓁᓕᐅᑉ ᖃᓂᒋᔭᖓᓃᑦᑐᑦ ᐸᓂᕈᒫᕐᒪᑕ, ᑎᒃᑕᐅᕋᕈᒫᕐᐳᑦ, ᐱᑕᖃᕈᓐᓃᕐᓗᑎᒃ. 8ᐃᖃᓗᒃᓯᐅᕐᑏᑦ ᕿᒃᓵᒍᒫᕐᐳᑦ; ᐃᖃᓘᔭᓂᒡᓗ ᐃᒋᑦᓯᕙᒃᑐᑦ ᓁᓕᒥ ᐅᒡᒍᐊᕈᒫᕆᕗᑦ, ᓄᓗᐊᓂᒡᓗ ᐃᒫᓄᑦ ᐃᓯᕕᑦᓯᕙᒃᑐᑦ ᖁᕕᐊᓱᒍᓐᓃᕐᓗᑎᒃ.
9ᐃᕕᒃᓱᒐᕐᓂᒃ ᖃᓪᓗᓈᕐᑕᓕᐅᕐᑏᑦ ᓴᐱᕐᓇᕐᑐᒦᑦᓱᒫᕐᐳᑦ, ᖃᑯᕐᑕᓂᒡᓗ ᖃᓪᓗᓈᕐᑕᓕᐅᕐᑏᑦ ᑲᓐᖑᓇᕐᑐᒦᓕᕐᓗᑎᒃ. 10ᖃᓪᓗᓈᕐᑕᓕᐅᕐᑏᑦ ᑐᓐᖓᕕᖏᑦ ᓯᖁᒥᑕᐅᔪᒫᕐᐳᑦ. ᑍᒤᑦᑐᓂᒡᓗ ᑮᓇᐅᔭᓕᐅᕈᑎᓖᑦ ᖁᕕᐊᓇᖏᑦᑐᒦᓕᕐᓗᑎᒃ. 11ᔪᐊᓐᒥᐅᑦ ᓯᕗᓕᕐᑎᖏᑦ ᓯᓔᑦᑐᓪᓚᕆᐅᖕᒪᑕ; ᐄᑦᔨᑉᑎᒥᐅᓪᓗ ᐊᖓᔪᖅᑳᕐᔪᐊᖓᑦᑕ ᓯᓚᑐᓂᕐᐹᑦ ᐃᓱᒪᓕᐅᕐᑎᖏᑦ ᑐᑭᖃᖏᑦᑐᓂᒃ ᐅᖃᐅᑦᔪᐃᖃᑦᑕᕐᓱᑎᒃ, ᖃᓄᖅ ᐅᖃᕈᓐᓇᕐᐲᑦ ᐰᕉᒧᑦ, “ᓯᓚᑐᔪᓂᒃ ᓯᕗᓕᖃᕐᑐᖓ, ᐊᖓᔪᖅᑳᕐᔪᐊᕕᓃᓪᓗ ᑭᖑᕚᕆᕚᖓ?” 12ᓇᐅᒡᓕ ᑍᒪ ᓯᓚᑐᔪᖁᑎᑎᑦ? ᑍᒃᑯᓇᓐᖓᑦ ᐅᖃᐅᑦᔭᐅᓕᕆᑦ ᓇᓗᔪᓐᓁᕐᑎᑕᐅᓗᑎᓪᓗ ᖃᓄᖅ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐄᑦᔨᑉᑎᒥᐅᓂᒃ ᐊᑭᕋᕐᑐᕈᑎᖃᕐᒪᖔᑦ. 13ᔪᐊᓐᒥᐅᑦ ᓯᕗᓕᕐᑎᖏᑦ ᓯᓔᑉᐳᑦ, ᒥᒻᐱᓯᒥᐅᓪᓗ ᓯᕗᓕᕐᑎᖏᑦ ᓇᓗᓪᓗᑎᒃ; ᐃᓅᖃᑎᒌᒡᔪᐊᓂᑦ ᐱᓪᓚᕆᖁᑎᒋᔭᐅᓪᓗᑎᒃ ᐄᑦᔨᑉᑎᒥᐅᓂᒃ ᑕᒻᒪᕐᑎᑦᓯᓯᒪᕗᑦ. 14ᐊᑕᓂᐅᑉ ᓇᓗᓕᕐᓇᕐᑐᒥᒃ ᐊᓂᕐᓂᕐᒥᒃ ᑯᕕᓯᕕᒋᓯᒪᖕᒪᒋᑦ; ᑍᒃᑯᐊ ᐄᑦᔨᑉᑎᒥᐅᑦ ᐅᕐᕈᔮᓕᕐᐳᑦ ᖃᓄᐃᓕᐅᕐᓂᓕᒫᒥᒃᑎᒍᑦ ᐋᖓᔮᕐᑐᑎᑐᑦ ᒥᕆᐊᒥᖕᓄᑦ ᖁᐊᔭᕿᑦᑖᕐᑐᑎᑐᑦ. 15ᐄᑦᔨᑉᑎᓕᒫᒥ ᓱᓇᒥᒡᓘᓐᓃᑦ ᐱᓪᓚᕆᒃᑕᖃᕈᓐᓃᕈᒫᕐᐳᖅ ᓯᕗᓕᕐᑎᐅᒐᓗᐊᕈᓂ ᐃᓄᑐᐃᓐᓇᐅᒐᓗᐊᕈᓂᓗ, ᓇᐹᕐᑑᑉ ᐹᒥᒥᒃ ᐊᑎᓕᐅᑉ ᐊᕙᓚᖓᔪᖓ ᐅᕝᕙᓗ ᐃᕕᒡᔪᐊᖅ ᐃᑲᔪᕐᓯᕆᐊᕈᑎᒃᓴᖃᕈᒫᓐᖏᓚᖅ.
ᐄᑦᔨᑉᑎᒥᐅᑦ ᐊᑕᓂᕐᒥᒃ ᑐᒃᓯᐊᕐᕕᖃᓕᕈᒫᕐᓂᖓᑦ
16ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐄᑦᔨᑉᑎᒥᐅᑦ ᐊᕐᓇᑎᑐᑦ ᑍᒤᓕᕈᒫᕐᐳᑦ, ᓴᔪᒍᒫᕐᐳᑦ ᑲᑉᐱᐊᓱᒡᓗᑎᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᐊᒡᒐᖕᒥᓄᑦ ᓴᔪᒃᑎᑦᓱᒫᕐᒪᒋᑦ. 17ᔫᑕᒥᐅᑦ ᐄᑦᔨᑉᑎᒥᐅᓂᑦ ᑲᑉᐱᐊᒋᔭᐅᓕᕈᒫᕐᐳᑦ; ᓇᓪᓕᐊᓐᓄᑦ ᐅᖃᐅᑎᒋᔭᐅᓕᕈᑎᒃ ᑲᑉᐱᐊᓱᓕᖃᑦᑕᕈᒫᕐᐳᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᐱᑦᔪᑎᒋᔭᖓᓄᑦ ᐃᓱᒪᓕᐅᕈᑎᒋᔭᐅᓯᒪᖕᒪᑕ. 18ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐄᑦᔨᑉᑎᒥᐅᑦ ᓄᓇᓕᒃᔪᐊᖁᑎᖏᓐᓂ ᑕᓪᓕᒤᓂ, ᑬᓇᓂᒥᐅᑎᑐᑦ ᐅᖃᐅᓯᖃᕐᓗᑎᒃ ᐊᖏᖃᑎᒌᒍᒫᕐᐳᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓂᒃ ᒪᓕᒍᒪᓗᑎᒃ; ᓄᓇᓕᒡᔪᐊᓪᓗ ᐃᓚᖓᑦ ᐊᑦᓯᕐᑕᐅᓗᓂ “ᓯᕿᓂᕐᒥᒃ.” 19ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ, ᐱᑕᖃᓕᕈᒫᕐᐳᖅ ᐊᑕᓂᕐᒧᑦ ᑐᓂᕐᕈᓯᕐᕕᖕᒥᒃ ᐄᑦᔨᑉᑎᒥᐅᑦ ᓄᓇᖓᑕ ᕿᑎᖓᓂ, ᐅᔭᕌᓗᖕᒥᒡᓗ ᓇᐸᔪᒥᒃ ᓴᓇᓯᒪᔪᕐᑕᖃᕐᒥᓗᓂ ᐄᑦᔨᑉᑎᐅᑉ ᓄᓇᖓᑕ ᑭᒡᓕᖓᓂ ᐊᑕᓂᕐᒥᒃ ᐅᐱᒍᓲᑎᒥᒃ. 20ᓇᓗᓁᒃᑯᑕᐅᔪᒫᐳᕐᓗ ᖃᐅᔨᑎᑦᓯᑦᔪᑕᐅᓗᓂ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓐᓄᑦ ᐄᑦᔨᑉᑎᒥᐅᑦ ᓄᓇᖓᓂ; ᐃᓄᖏᑦ ᐃᑲᔪᕐᑕᐅᔪᒪᓗᑎᒃ ᐊᑕᓂᕐᒧᑦ ᓂᓪᓕᐊᓕᕌᖓᑕ ᐊᑭᕋᑎᒃ ᐱᓪᓗᒋᑦ ᓴᐳᑦᔨᔨᒃᓴᖓᓐᓂᒃ ᑎᓕᓯᕕᒋᖃᑦᑕᕈᒫᕐᐰᑦ, ᓴᐳᑎᓗᒋᑦ ᐱᐅᓕᓗᒋᓪᓗ ᐊᑭᕋᖏᓐᓂᑦ. 21ᐊᑕᓂᕐᓗ ᐃᒻᒥᓂᒃ ᖃᐅᔨᒪᔭᐅᑎᑦᓱᒫᕐᐳᖅ ᐄᑦᔨᑉᑎᒥᐅᓄᑦ; ᑕᕝᕙ ᐊᑕᓂᕐᒥᒃ ᓇᓗᓁᔧᔪᒫᕐᐳᑦ ᓂᕐᑐᐃᓗᑎᒃ ᑐᓂᕐᕈᓯᕐᐸᓕᕐᓗᑎᒃ ᐃᑯᐊᓚᑎᑦᓯᓂᒃᑯᑦ ᐆᒪᔪᕕᓂᕐᓂᒃ, ᐊᑕᓂᕐᓗ ᐊᖏᕐᕕᒋᔪᒫᕐᐹᑦ ᐊᖏᕈᑎᒋᔭᒥᖕᓂᒡᓗ ᑲᔪᓯᑎᑦᓯᓗᑎᒃ. 22ᐊᑕᓂᐅᑉ ᓱᒋᐊᕈᒫᕐᐰᑦ ᐄᑦᔨᑉᑎᒥᐅᑦ, ᓱᒋᐊᕐᓗᒋᑦ ᐋᖅᑭᒃᓱᕐᓗᒋᓪᓗ; ᐊᑕᓂᕐᒧᑦ ᐅᑎᕈᒫᕐᐳᑦ, ᑐᒃᓯᐊᕐᓂᖏᓪᓗ ᑐᓴᕐᓗᒋᑦ ᐋᖅᑭᒍᒫᕐᐰᑦ. 23ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐊᖅᑯᑎᐊᓗᒃᑕᖃᓕᕈᒫᕐᐳᖅ ᐄᑦᔨᑉᑎᒥᑦ ᐊᓯᕆᐊᒥᐅᑦ ᓄᓇᖓᓐᓄᑦ, ᑖᒃᑯᐊᓗ ᓄᓇᓕᒡᔪᐊᑦ ᒪᕐᕈᐃᑦ ᐊᕙᒻᒧᑦ ᓂᐅᕐᕈᖃᑦᑕᐅᑎᕙᓕᕈᒫᕐᐳᑦ ᑕᒪᕐᒥᒡᓗ ᐊᑕᓂᕐᒥᒃ ᑐᒃᓯᐊᖃᑎᒌᒍᓐᓇᓕᕐᓗᑎᒃ. 24ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐃᓴᕆᐊᓕᒥᐅᑦ ᐱᖓᔪᒋᔭᐅᓕᕈᒫᕐᐳᑦ ᐄᑦᔨᑉᑎᒥᐅᓄᑦ ᐊᓯᕆᐊᒥᐅᓄᓪᓗ, ᓮᒻᒪᕐᑎᑦᓯᑦᔪᑕᐅᓗᑎᒃ ᓯᓚᕐᔪᐊᕐᒥᐅᓂᒃ. 25ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᓮᒻᒪᕐᑎᓪᓗᒋᑦ ᐅᖃᕈᒫᕐᐳᖅ, “ᓮᒻᒪᕐᑎᑕᐅᒋᑦᓯ ᐃᓄᖁᑎᒃᑲ ᐄᑦᔨᑉᑎᒥᐅᑦ, ᐃᓕᑦᓯᓗ ᐊᓯᕆᐊᒥᐅᑦ ᐱᓐᖑᕐᑎᓚᐅᕐᑕᒃᑲ, ᐃᓴᕆᐊᓕᒥᐅᓪᓗ ᓂᕈᐊᕐᓯᒪᓪᓗᓯ ᐃᓄᖁᑎᒋᔭᒃᑲ.”
Currently Selected:
ᐂᓮᐊᓯᐅᑉ ᐊᒡᓚᖏᑦ 19: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
