ᐂᓮᐊᓯᐅᑉ ᐊᒡᓚᖏᑦ 15
15
ᒧᐊᐱᒥᐅᑦ ᒎᑎᒧᑦ ᐊᓯᕈᕐᑕᐅᔪᒫᕐᓂᖓᑦ
1 #
ᐂᓮᐊᓯ 25:10-12; ᔨᕆᒤᐊ 48:1-47; ᐃᓯᑭᐊᓕ 25:8-11; ᐂᒨᓯ 2:1-3; ᔨᐸᓁᐊ 2:8-11. ᐅᑯᐊ ᐅᖃᐅᓰᑦ ᐱᑦᔪᑎᖃᕐᐳᑦ ᒧᐊᐱᒥᐅᓂᒃ.
ᐋᕆᒥᐅᑦ ᑭᕆ-ᒧᐊᐱᒥᐅᓪᓗ ᐅᓐᓄᐊᖏᓐᓇᖅ ᐃᒡᓗᒐᓴᒡᔪᐊᖏᑦ ᓄᖑᑕᐅᖕᒪᑕ, ᒧᐊᐱᒥᐅᑦ ᓄᓇᓕᒫᖓ ᓂᐱᖃᕈᓐᓃᕐᐳᖅ. 2ᑎᐴᓂᒥᐅᑦ ᒎᑎᓐᖑᐊᒥᖕᓄᑦ ᑐᒃᓯᐊᕐᕕᖕᒥᖕᓄᑦ ᒪᔪᕋᕐᐳᑦ ᐱᖒᑉ ᖄᖓᓃᑦᑐᒧᑦ ᕿᐊᔭᕐᑐᕐᓗᑎᒃ; ᒧᐊᐱᒥᐅᑦ ᓂᐱᖅᑯᕐᑐᓪᓗᑎᒃ ᕿᐊᖓᔭᒃᐳᑦ ᓂᐴᒥᐅᓂᒃ ᒥᑎᐸᒥᐅᓂᒡᓗ ᐱᑦᔪᑎᖃᕐᓗᑎᒃ. ᓂᐊᖁᑎᒃ ᓴᓕᕔᑦ ᐅᓐᖏᔭᕐᓗᑎᒡᓗ ᕿᒃᓵᖕᓂᕐᒧᑦ. 3ᐃᓄᐃᑦ ᐊᖅᑯᑎᑎᒍᑦ ᐱᓱᑲᑕᒃᑐᑦ ᕿᒃᓵᒃᑐᕐᓯᐅᑎᓂᒃ ᐊᑐᓕᕐᐳᑦ; ᐃᓄᐃᑦ ᑲᑎᑦᑕᕐᕕᖏᓐᓂ ᐃᒡᓗᐃᓪᓗ ᖄᖏᓐᓂ ᓇᓂᑐᐃᓐᓇᖅ ᕿᐊᔪᕐᑕᖃᓕᕐᐳᖅ. 4ᕼᐃᓴᐸᓂᒥᐅᑦ ᐃᓕᐊᓚᒥᐅᓪᓗ ᓂᐱᖅᑯᕐᑐᓪᓗᑎᒃ ᕿᐊᖕᒪᑕ, ᕿᐊᓂᖏᑦ ᐊᒡᓛᑦ ᑐᓴᕐᓴᐅᕗᑦ ᔧᕼᐊᓯᒃᑯᓐᓄᑦ; ᐊᒡᓛᓪᓗ ᐅᓇᑕᕐᑐᒃᓮᑦ ᒧᐊᐱᒥᐅᑦ ᕿᐊᓕᕆᕗᑦ ᓂᐱᖃᕐᓗᑎᒃ; ᑕᕐᓂᖏᑦ ᓴᔪᒡᓗᑎᒃ. 5ᒧᐊᐱᒥᐅᑦ ᐆᒻᒪᑎᒃᑯᑦ ᕿᐊᑦᔪᑎᒋᕙᒃᑲ; ᐃᓄᖏᑦ ᕿᒫᕗᑦ ᔪᐊᕆᒥᐅᓄᑦ, ᐃᒡᓚᑦ-ᓯᓕᓯᔭᒧᓪᓗ, ᐃᓚᖏᓪᓗ ᐊᖅᑯᑎᒃᑯᑦ ᓗᕼᐃᑎᐅᑉ ᒪᔪᖅᑲᖓᒎᕐᓗᑎᒃ, ᕿᐊᓪᓗᑎᒃ ᐊᖅᑯᑎᒥᖕᓂ: ᐃᓚᖏᓪᓗ ᐊᓐᓇᒋᐊᕐᐳᑦ ᕼᐅᕈᓁᒥᒧᑦ ᕿᐊᓪᓗᑎᒃ; ᓂᐱᖅᑯᕐᑐᓪᓗᑎᒃ ᕿᐊᕗᑦ ᐊᓯᕈᕐᑕᐅᓂᑎᒃ ᐱᓪᓗᒍ. 6ᓂᒻᕆᒥᐅᑦ ᑰᖓ ᓴᓗᐊᕐᒪᑦ, ᓯᓈᑕᓗ ᐃᕕᒃᓱᒐᖏᑦ ᐸᓂᕐᓯᒪᓪᓗᑎᒃ; ᐃᕕᒃᓱᒐᕐᒥᒡᓘᓐᓃᑦ ᐱᕈᓕᓵᕐᑐᒥᒃ ᓄᐃᔪᖃᕈᓐᓃᕐᐳᖅ. 7ᑍᒤᒻᒪᑦ ᐊᔪᕐᓴᖏᓐᓂᕐᔪᐊᑦ ᐱᓯᒪᓚᐅᕐᑕᑎᒃ, ᑲᑎᕐᓱᓚᐅᕐᑕᑎᒡᓗ ᐊᐅᓪᓚᕈᑎᕔᑦ ᑰᑉ ᐅᕐᐱᓕᐅᑉ ᐊᑭᐊᓄᑦ. 8ᓇᓂᑐᐃᓐᓇᖅ ᒧᐊᐱᐅᑉ ᓄᓇᖓᓂ ᕿᐊᔪᑦ ᑐᓴᕐᓴᐅᕗᑦ; ᕿᐊᓂᖅ ᑐᓴᕐᓴᐅᓕᕐᐳᖅ ᐃᒡᓔᒻᒥᐅᓂ, ᕿᐊᓂᕐᓗ ᑐᓴᕐᓴᐅᒋᕗᖅ ᐱᐊᕐ-ᐃᓕᒻᒥᐅᓂ. 9ᑎᐴᓂᒥᐅᑦ ᑰᖓᑦᑕ ᐃᒪᖓ ᐊᐅᐸᕐᓯᕗᖅ ᐊᐅᖕᒧᑦ. ᓱᓕᓕ ᐊᖏᓂᕐᓴᒃᑲᓐᓂᕐᒥᒃ ᐱᔪᒪᕗᖓ ᑎᐴᓂᒥᐅᓄᑦ, ᓛᔭᓄᑦ ᒪᓕᒃᑕᐅᑎᑦᓱᒪᕙᒃᑲ ᒧᐊᐱᒥᑦ ᕿᒫᓗᑎᒃ ᐊᓐᓇᒃᑐᑦ, ᐊᒥᐊᒃᑯᑑᓕᕐᑐᓄᑦ.
Currently Selected:
ᐂᓮᐊᓯᐅᑉ ᐊᒡᓚᖏᑦ 15: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
