ᐂᓮᐊᓯᐅᑉ ᐊᒡᓚᖏᑦ 14
14
ᐊᐅᓪᓚᕈᑦᔭᐅᓂᑯᐃᑦ ᐅᑎᕐᑎᑕᐅᓂᖓᑦ
1ᐊᑕᓂᖅ ᓂᑲᒍᓱᓕᒃᑲᓐᓂᕈᒫᕆᕗᖅ ᔧᑰᑉ ᑭᖑᕚᖏᓐᓂᒃ ᐃᓴᕆᐊᓕᒥᐅᓪᓗ ᓂᕈᐊᕐᓯᒪᓕᕈᒫᕆᓪᓗᒋᑦ, ᓄᓇᑐᖃᖏᓐᓄᓪᓗ ᓇᖕᒥᓂᖏᓐᓄᑦ ᐃᓕᔪᒫᕆᕔᑦ, ᓄᓇᖃᑎᑐᖃᕆᓐᖏᑕᖏᓪᓗ ᔧᑰᑉ ᑭᖑᕚᖏᓐᓂᒃ ᐃᓚᕾᓐᓇᕈᒪᔪᒫᕐᐳᑦ. 2ᐃᓅᖃᑎᒌᒡᔪᐊᑦ ᔫᑎᐅᖏᑦᑐᑦ ᐃᓴᕆᐊᓕᒥᐅᓂᒃ ᐃᑲᔪᓕᕈᒫᕐᐳᑦ ᓄᓇᑐᖃᖏᓐᓄᑦ ᐅᑎᕐᑎᐅᕋᕐᓗᒋᑦ, ᐊᑕᓂᐅᑉ ᓄᓇᖁᑎᖓᓂ ᐊᖑᑎᑦ ᐊᕐᓁᓪᓗ ᓯᐊᓛᕆᓗᒋᑦ; ᑎᒍᓯᓯᒪᓕᕈᒫᕐᐳᑦ ᑎᒍᔨᒋᓚᐅᕐᑕᒥᖕᓂᒃ, ᐊᖓᔪᖅᑳᖑᕕᒋᓕᕐᓗᒋᓪᓗ ᓵᓚᒋᔨᒋᓯᒪᓚᐅᕐᑕᑎᒃ.
ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᑐᖁᖓᔪᑦ ᐃᓂᖓᓄᐊᕐᑕᐅᓂᖓ
3ᐊᑕᓂᐅᑉ ᐋᓐᓂᐊᓂᕆᓚᐅᕐᑕᑦᓯᓐᓂᑦ ᐅᖁᒤᑦᑐᒥᒡᓗ ᐃᓅᓯᖃᕐᓂᕆᓚᐅᕐᑕᑦᓯᓐᓂᑦ ᑕᕾᕐᓯᕐᑎᓕᕐᐹᓯ, ᐊᒃᓱᕈᕐᓗᓯᓗ ᐱᔨᑦᓯᕐᑎᑕᐅᑦᔪᑎᒋᓚᐅᕐᑕᑦᓯᓐᓂᑦ. 4ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓂᒃ ᒥᑕᐅᑎᒋᓗᒍ ᐅᖃᕈᒫᕐᐳᓯ:
“ᐊᑦᑕᕈᓱᖃᓚᐅᖏᑦᑐᖅ ᐊᔪᓕᕆᕗᖅ! ᐊᒃᓱᕈᕐᑎᑦᓯᕙᖕᓂᖓ ᐃᓱᓕᑉᐳᖅ! 5ᐊᑕᓂᐅᑉ ᓇᐱᓯᒪᕔᑦ ᐱᐅᖏᑦᑐᓕᔪᑦ ᐊᔭᐅᑉᐱᐊᖏᑦ, ᐊᖓᔪᖅᑳᕐᔪᐊᓪᓗ ᐱᖁᔨᔪᓐᓇᐅᑎᒥᓄᑦ ᑎᒃᑯᐊᕐᓯᑦᔪᑎᖏᑦ. 6ᓂᓐᖓᐅᒪᓂᕐᒥᖕᓄᑦ ᐃᓄᖕᓂᒃ ᐊᓇᐅᓕᕐᓯᕙᓚᐅᕐᑐᑦ ᓄᖅᑲᓚᐅᕐᓯᒪᓇᑎᒃ, ᐃᓅᖃᑎᒌᒡᔪᐊᓂᒡᓗ ᓵᓚᒋᓯᒪᔭᒥᖕᓂᒃ ᐊᖓᔪᖅᑲᐅᕕᖃᖃᑦᑕᓚᐅᕐᑐᑦ ᐊᑭᕋᕐᑐᕐᓗᒋᑦ ᓄᖅᑲᐅᑦᔨᓚᐅᕐᓯᒪᓇᑎᒃ. 7ᓄᓇᕐᔪᐊᓕᒫᖅ ᑕᕾᕐᓯᕐᓇᕐᓯᕗᖅ ᓂᐰᑦᑑᓕᕐᓗᓂ; ᐃᓄᐃᑦ ᖁᕕᐊᓱᖕᓂᕐᒧᑦ ᐃᓐᖏᕈᒫᕐᐳᑦ. 8ᓇᐹᕐᑐᑦ ᓮᐳᕋᓯᒥᒃ ᑍᔭᐅᔪᑦ ᐃᓕᖕᓂᒃ ᖁᕕᐊᓲᑎᖃᓕᕐᐳᑦ, ᓇᐹᕐᑐᓪᓗ ᓰᑕᕆᓂᒃ ᑍᔭᐅᔪᑦ ᓕᐸᓇᓂᐅᑉ ᓄᓇᖓᓃᑦᑐᑦ, ᐅᖃᕈᒫᕐᐳᑦ, ‘ᒥᑭᒡᓕᑎᑕᐅᓯᒪᓕᕐᑎᓪᓗᓯ, ᓇᐹᕐᑐᓂᒃ ᓇᑲᑎᕆᔭᕐᑐᕐᑐᓂᑦ ᑎᑭᑕᐅᓚᐅᕐᓯᒪᔪᓐᓃᕐᐳᒍᑦ.’
9“ᑐᖁᖓᔪᑦ ᓇᔪᒐᖓ ᐅᓇᓃᑦᑐᖅ ᐸᕐᓇᓕᕐᐳᖅ ᐃᓕᖕᓂᒃ ᐸᕐᕆᐊᕈᒪᓪᓗᓂ ᕾᓕᕈᕕᑦ, ᑐᖁᖓᔪᑦ ᑕᕐᓂᖏᑦ ᑐᐹᕐᓴᓕᕐᐰᑦ, ᐊᖓᔪᖅᑳᕐᔪᐊᕕᓃᑦ ᓄᓇᕐᔪᐊᕐᒥ; ᐃᒃᓯᕙᐅᑕᕐᔪᐊᒥᖕᓂᑦ ᓂᑯᕕᐅᖅᑲᓕᕐᐳᑦ, ᐃᓅᖃᑎᒌᒡᔪᐊᑦ ᐊᖓᔪᖅᑳᕐᔪᐊᕕᓂᖏᑦ. 10ᐃᓘᓐᓇᑎᒃ ᐅᖃᓕᕈᒫᕐᐳᑦ ᐃᓕᖕᓄᑦ ᐃᒤᓕᓗᑎᒃ: ‘ᐅᕙᑦᑎᑐᑦ ᓱᓇᐅᔪᓐᓃᕆᕗᑎᑦ! ᐅᕙᑦᑎᑐᑦ ᑍᒤᓕᕐᐳᑎᑦ! 11ᐅᐱᒋᔭᐅᓪᓗᑎᑦ ᑯᑭᑦᑕᐸᐅᑎᓄᑦ ᓂᓪᓕᐊᑎᑦᓯᕕᐅᕙᓚᐅᕐᐳᑎᑦ, ᑕᑯᒋᑦ ᒫᓐᓇ ᑐᖁᖓᔪᑦ ᐃᓂᖓᓐᓃᓕᕐᐳᑎᑦ; ᓇᓪᓚᖓᕗᑎᑦ ᕿᑎᕈᓪᓕᖕᓂᒃ ᐊᓪᓕᓂᖃᕐᓗᑎᑦ ᐅᓕᖃᕐᓗᑎᓪᓗ ᖁᐱᕐᕈᓂᒃ.’
12 #
ᑕᑯᑎ 8:10; 9:1. “ᕿᓚᖕᒥᑦ ᑲᑕᖕᓂᑰᕗᑎᑦ, ᓘᓯᕙᕐ, ᐅᓪᓘᑉ ᐅᓪᓗᕆᐊᕆᕚᑎᑦ ᖃᐅᕙᓪᓕᐊᓯᐅᑎᐅᑉ ᐃᕐᓂᕆᕚᑎᑦ! ᓄᓇᒧᑦ ᐃᒋᑕᐅᓯᒪᕗᑎᑦ. ᐃᓅᖃᑎᒌᒡᔪᐊᓂᒃ ᒥᑭᒡᓕᑎᕆᕙᓚᐅᕐᑐᑎᑦ! 13#ᒫᑎᐅᓯ 11:23; ᓘᑲᓯ 10:15.ᐆᒻᒪᑎᖕᓂ ᐅᖃᓚᐅᕐᐳᑎᑦ, ‘ᕿᓚᖕᒧᑦ ᖁᒻᒧᐊᖕᓂᐊᕐᐳᖓ ᒎᑎᐅᑉ ᐅᓪᓗᕆᐊᖁᑎᖏᑕ ᐅᖓᑖᓄᑦ; ᐃᒃᓯᕙᐅᑕᕐᔪᐊᕋ ᖁᑦᓯᖕᓂᕐᐹᒧᑦ ᐃᓕᔪᒪᕙᕋ; ᐃᒃᓯᕚᕈᒪᓪᓗᖓᓗ ᑲᑎᒪᔪᕐᔪᐃᑦ ᖃᖅᑲᖏᑕ ᖄᖓᓂ, ᖃᖅᑬᑦ ᓵᕘᓂᐅᑉ ᐳᕐᑐᓂᕐᐹᖓᓂ; 14ᓄᕗᔧᑦ ᐳᕐᑐᓂᕐᐹᖓᑦᑕ ᐅᖓᑖᓄᐊᕐᓂᐊᕐᐳᖓ, ᖁᑦᓯᖕᓂᕐᐹᖅ ᐊᑦᔨᒋᔪᒪᕙᕋ.’ 15ᑲᑕᒃᑎᑕᐅᓯᒪᕗᑎᓪᓕ ᑐᖁᖓᔪᑦ ᐃᓂᖓᓐᓄᑦ, ᐃᑎᕐᓵᓘᑉ ᐃᑎᓂᕐᐹᖓᓄᑦ.
16“ᐃᓕᖕᓂᒃ ᑕᑯᔪᑦ ᑕᑯᓐᓈᕈᒫᕐᐹᑎᑦ, ᐃᓱᒪᒋᓗᑎᓪᓗ, ‘ᑖᓐᓇ ᑕᕝᕚ ᓄᓇᕐᔪᐊᕐᒥᒃ ᓴᔪᒃᐱᓗᒃᑎᑦᓯᕙᓚᐅᕐᑐᖅ, ᐊᖓᔪᖅᑲᐅᕕᒡᔪᐊᓂᒡᓗ ᑲᑉᐱᐊᓱᒃᑎᑦᓯᓂᕐᒧᑦ ᓴᔪᒃᑎᑦᓯᕙᓚᐅᕐᑐᖅ, 17ᓄᓇᕐᔪᐊᕐᒥᒃ ᓯᐅᕅᓐᓇᕐᑎᑐᑦ ᐃᓄᖃᖏᑦᑐᑐᑦ ᑍᒤᑎᑦᓯᕙᓚᐅᕐᑐᖅ, ᐃᒡᓗᒐᓴᒡᔪᐊᓂᒃ ᐊᓯᕈᐃᕙᓚᐅᕐᑐᖅ, ᑎᒍᓯᒪᔭᒥᓂᒡᓗ ᐊᖏᕐᕋᕐᑎᑦᓯᕙᓚᐅᖏᑦᑐᖅ?’
18“ᐃᓅᖃᑎᒌᒡᔪᐊᓕᒫᑦ ᐊᖓᔪᖅᑳᕐᔪᐊᖏᑦ ᑐᖁᔭᕌᖓᒥᒃ ᐱᐅᔪᓂᒃ ᐃᓂᖃᓲᖑᕗᑦ, ᐊᑐᓂᑦ ᐃᓗᕕᕐᒥᖕᓂ; 19ᐃᕝᕕᓪᓕ ᐊᓂᑕᐅᑐᐃᓐᓇᕐᓯᒪᕗᑎᑦ, ᐃᓗᕕᕐᓯᒪᓇᒡᓘᓐᓃᑦ, ᑎᒥᕕᓃᑦ ᑕᒫᓂᑐᐃᓐᓈᕐᑐᖅ ᓇᖁᔭᕐᓇᕐᐳᖅ, ᐅᓇᑕᕐᑐᓂ ᑐᖁᑕᐅᔪᕕᓃᑦ ᐊᓐᓄᕌᕕᓂᖏᑎᑐᑦ, ᓴᕕᒡᔪᐊᒧᑦ ᑲᐱᔭᐅᓯᒪᔪᑎᑐᑦ, ᐃᑎᕐᓵᓘᑉ ᐅᔭᕋᖏᓐᓄᑦ ᐃᒋᑕᐅᑐᐃᓐᓇᖃᑕᐅᓯᒪᒐᒥ, ᑎᒥᕕᓂᕐᑐᑦ ᑐᓪᓕᕋᕐᑕᐅᑐᐃᓐᓇᕐᑐᑎᑐᑦ. 20ᐃᓚᒋᓂᐊᓐᖏᓚᑎᑦ ᐃᓗᕕᕐᑕᐅᖃᑎᒋᓗᒋᑦ, ᓄᓇᖁᑏᑦ ᐊᓯᕈᓚᐅᕋᕕᐅᒃ, ᐃᓄᖁᑎᑎᓪᓗ ᑐᖁᕋᓚᐅᕋᕕᒋᑦ. ᐱᐅᖏᑦᑐᓕᔪᑦ ᑭᖑᕚᖏᑦ ᐊᑎᖃᕐᑎᑕᐅᒃᑲᓐᓂᕆᐊᖃᓐᖏᓚᑦ! 21ᑐᖁᕅᓂᖅ ᐃᕐᓂᖏᓐᓂᑦ ᐸᕐᓇᐅᑕᐅᓕᕐᓕ ᓯᕗᓕᖏᑕ ᐸᓯᔭᒃᓴᐅᓂᕐᖏᑦ ᐱᑦᔪᑎᒋᓗᒋᑦ, ᑖᒃᑯᐊ ᒪᑭᓪᓗᑎᒃ ᓄᓇᕐᔪᐊᕐᒥᒃ ᓇᖕᒥᓂᕐᑖᖁᓇᒋᑦ, ᓄᓇᕐᔪᐊᖅ ᐃᒡᓗᒐᓴᒡᔪᐊᓕᐊᖏᓐᓄᑦ ᑕᑕᑕᐅᖁᓇᒍ.”
ᐹᐱᓘᓂᒥᐅᑦ ᒎᑎᒧᑦ ᐊᓯᕈᕐᑕᐅᔪᒫᕐᓂᖓᑦ
22ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕐᐳᖅ, “ᐅᓇᑕᕆᐊᕈᒫᕐᐸᒃᑲ ᐹᐱᓘᓂᐅᓪᓗ ᐊᑎᖓ ᓇᑲᑦᓱᒫᕐᐸᕋ ᐊᒥᐊᒃᑯᖃᕐᑎᖏᓪᓗᒋᑦ, ᕿᑐᕐᖓᖏᓪᓗ ᑭᖑᕚᒃᓴᖏᓪᓗ, ᐊᑕᓂᖅ ᐅᖃᕐᐳᖅ. 23ᐃᒡᓗᒐᓴᖃᕐᕕᕕᓂᖓ ᐃᓂᒋᔭᐅᓕᕐᑎᑦᓱᒫᕐᐸᕋ ᐆᒪᔪᓄᑦ ᕼᐊᑦᔨᕼᐋᓄᑦ, ᐅᒃᐱᒡᔪᐊᓄᓪᓗ, ᐃᒪᕐᓱᓐᖑᕐᑎᑦᓱᒫᕐᓗᒍᓗ, ᓴᓂᐅᑎᒧᑦ ᐊᓯᕈᐃᔪᒧᑦ ᓴᓂᕈᒫᕐᐸᕋ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕐᐳᖅ.”
ᐊᓯᕆᐊᒥᐅᑦ ᒎᑎᒧᑦ ᐊᓯᕈᕐᑕᐅᔪᒫᕐᓂᖓᑦ
24 #
ᐂᓮᐊᓯ 10:5-34; ᓇᕼᐅᒥ 1:1—3:19; ᔨᐸᓁᐊ 2:13-15. ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕕᒡᓗᓂ ᐊᖏᕐᓯᒪᖕᒪᑦ: “ᐃᓱᒪᓕᐅᕇᕐᓯᒪᒐᒪ, ᑍᒤᑦᓱᒫᕐᓗᓂᓗ, ᐋᖅᑭᒃᓱᕇᕐᓯᒪᒐᒃᑯ ᓴᖑᓂᐊᓐᖏᓚᖅ. 25ᐊᓯᕆᐊᒥᐅᑦ ᐊᓯᕈᕈᒫᕐᐸᒃᑲ ᓄᓇᖁᑎᓐᓂᑦ; ᖃᖅᑲᖁᑎᓐᓃᑦᑐᑦ ᑐᓪᓕᕋᕈᒫᕐᐸᒃᑲ, ᐃᓄᖁᑎᒃᑲ ᓴᒃᑯᑕᐅᑎᑦᓱᒫᕐᐸᒃᑲ ᐅᖁᒤᒃᓴᕐᑎᑕᐅᓂᖏᓐᓂᓪᓗ ᐲᕐᑎᓪᓗᒋᑦ. 26ᐋᖅᑭᒃᓯᒪᔭᕋ ᐃᒤᑉᐳᖅ ᓄᓇᕐᔪᐊᓕᒫᖅ ᐱᓪᓗᒍ; ᑕᓕᕋ ᑕᕝᕙ ᐃᓴᒃᓯᒪᔪᖅ ᐃᓅᖃᑎᒌᒡᔪᐊᓕᒫᓄᑦ. 27ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᑍᒫᒃ ᐱᓇᓱᐊᕈᒪᕗᖅ, ᑭᓇᒧᑦ ᓄᖅᑲᕐᑎᑕᐅᔪᓐᓇᕐᐹ? ᐊᒡᒐᓂ ᐃᓴᒻᒥᓕᕐᐰᑦ ᑭᐊ ᐊᒻᒧᒃᑎᑦᓱᓐᓇᕐᐰᑦ?”
ᐱᓕᔅᑎᐊᒥᐅᑦ ᒎᑎᒧᑦ ᐊᓯᕈᕐᑕᐅᔪᒫᕐᓂᖓᑦ
28 #
ᐊᑕᓃᑦ ᐂᑉᐸᖏᑦ 16:20; ᑯᕉᓂᑲ ᐂᑉᐸᖏᑦ 28:27. ᐊᕐᕌᒍᒥ ᐊᖓᔪᖅᑳᕐᔪᐊᖅ ᐂᕼᐊᓯᐅᑉ ᐃᓅᔪᓐᓃᕈᑖᓂ ᐅᖃᐅᓰᑦ ᑕᒪᒃᑯᐊ ᐅᖃᐅᓯᕆᔭᐅᓚᐅᕐᐳᑦ: 29#ᔨᕆᒤᐊ 47:1-7; ᐃᓯᑭᐊᓕ 25:15-17; ᔪᐃᓕ 3:4-8; ᐂᒨᓯ 1:6-8; ᔨᐸᓁᐊ 2:4-7; ᓴᑲᕅᐊ 9:5-7.“ᖁᕕᐊᓱᒋᐊᖃᓐᖏᓚᓯ, ᐱᓕᔅᑎᐊᒥᐅᑕᐅᔪᓯ ᐃᓕᑦᓯᓐᓂᒃ ᐊᓇᐅᓕᕈᑕᐅᓚᐅᕐᑐᖅ ᓇᐱᓯᒪᖕᒪᑦ, ᖁᒡᓗᒋᐊᕐᔪᐊᖅ ᑐᖁᒐᓗᐊᕐᐸᑦ ᑭᖑᕚᖃᕈᒫᕐᐳᖅ ᖁᒡᓗᒋᐊᒥᒃ ᑐᖁᓐᓇᕐᑐᓕᖕᒥᒃ, ᓴᖅᑭᑎᑦᓯᓗᓂᓗ ᖁᒡᓗᒋᐊᒥᒃ ᖃᖓᑕᔪᓐᓇᕐᑐᒥᒃ. 30ᐊᒃᓗᔪᓂᑦ ᐊᔪᕐᓴᕐᓂᕐᐹᑦ ᐃᕐᓂᐊᖑᖅᑳᕐᑐᖁᑎᖏᑦ ᓂᕆᓇᓱᐊᕈᒫᕐᐳᑦ, ᐊᔪᕐᓴᕐᑐᓪᓗ ᓇᓚᔪᒫᕐᐳᑦ ᓯᕘᕋᒋᔭᖃᖏᓪᓗᑎᒃ; ᑐᓐᖓᕕᒃᓯᓕ ᑐᖁᑦᓱᒫᕐᐸᒃᑲ ᑳᖕᓇᕐᑐᕐᔪᐊᒧᑦ, ᐊᒥᐊᒃᑯᖏᓪᓗ ᑐᖁᕋᕈᒫᕐᐸᒃᑲ. 31ᓂᐱᖃᕐᓗᓯ ᕿᐊᓕᕆᑦᓯ, ᐃᑎᕐᑕᕐᕕᐅᔪᓯ ᐃᒡᓗᒐᓴᒡᔪᐊᓄᑦ, ᕿᐊᒋᑦᓯ ᐃᒡᓗᒐᓴᒡᔪᐊᖑᔪᓯ; ᓯᕘᕋᓕᕆᑦᓯ, ᐱᓕᔅᑎᐊᒥᐅᖑᔪᓯ, ᐳᔪᖅ ᐅᓐᓄᐊᓪᓗᐊᑉ ᓇᓛᓂᑦ ᓴᖅᑭᑦᓱᒫᕐᐳᖅ, ᐅᓇᑕᕐᑐᒃᓴᒐᓴᒡᔪᐊᑦ ᓯᕘᕋᒋᔭᖃᖏᑦᑐᑦ ᐳᔫᕐᑎᑕᖓᑦ.” 32ᖃᓄᕐᓕ ᑭᐅᔭᐅᓂᐊᓕᕐᐹᑦ ᐱᓕᔅᑎᐊᒥᑦ ᑐᓴᕐᑎᑦᓯᔭᕐᑐᕐᑐᑦ? “ᐅᖃᐅᑎᔪᒫᕐᐸᕗᑦ ᐊᑕᓂᖅ ᐃᓂᖃᕐᓂᕋᕐᓗᒍ ᓮᐅᓂᒥ ᐃᓄᖁᑎᖏᓪᓗ ᐊᒃᓱᕈᕐᑎᑕᐅᓯᒪᔪᑦ ᓮᓕᓇᕐᑐᒥᒃ ᐃᓂᒃᓴᕐᓯᔪᒫᕐᐳᑦ ᑍᑲᓂ.”
Currently Selected:
ᐂᓮᐊᓯᐅᑉ ᐊᒡᓚᖏᑦ 14: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
