ᐂᓮᐊᓯᐅᑉ ᐊᒡᓚᖏᑦ 16
16
ᒧᐊᐱᒥᐅᑦ ᓂᕆᐅᒋᔭᒃᓴᖃᕈᓐᓃᕐᓂᖓᑦ
1ᓰᐱᐅᑉ ᓄᕐᕋᖏᓐᓂᒃ ᑎᓕᓯᓯᒪᕗᑦ ᓄᓇᒥᒃ ᐊᐅᓚᑦᓯᖁᓪᓗᒋᑦ, ᓄᓇᓕᖕᓂᑦ ᓯᓚᒥᐅᓂᑦ, ᐃᓄᖃᖏᑦᑑᑉ ᑭᒡᓕᖓᓃᑦᑐᓂᑦ, ᓮᐅᓂᐅᑉ ᐸᓂᖓᑕ ᖃᖅᑲᖓ ᑎᑭᓪᓗᒍ. 2ᑎᖕᒥᐊᑎᑐᑦ ᐃᕙᕕᖕᒥᖕᓂᑦ ᑎᖏᑎᑕᐅᓯᒪᔪᑎᑐᑦ ᑍᒤᑦᓱᒫᕐᐳᑦ, ᒧᐊᐱᐅᑉ ᐸᓂᖏᑦ ᑰᖕᒥ ᐋᕐᓄᓂᒥ ᐅᑕᖅᑭᓗᑎᒃ ᐃᑳᕐᕕᖕᓂ.
3ᔫᑕᒥᐅᓄᑦ ᐅᖃᕐᓗᑎᒃ, “ᖃᓄᐃᓕᐅᕐᑐᒃᓴᐅᖕᒪᖔᑦᑕ ᐅᖃᐅᑎᓚᐅᕐᑎᒍᑦ, ᓴᐳᑦᔭᐅᔪᒪᒐᑦᑕ, ᓇᐹᕐᑑᑉ ᑕᕐᕋᓕᓂᖓᓂ ᓂᒡᓚᕐᓯᕐᑐᑎᑐᑦ ᐅᓪᓗᓪᓗᐊᒥ ᑭᐊᒃᓯᐅᕐᑐᑎᑐᑦ. ᓇᕐᕈᒋᔭᐅᓯᒪᔪᑦ ᐃᔨᕐᓯᒪᓚᐅᕐᓯᐅᒃ, ᐅᖃᐅᓯᕆᓂᐊᕐᓇᒋᓪᓗ ᕿᒫᓂᑯᐃᑦ. 4ᒧᐊᐱᒥᑦ ᐊᓂᑎᑕᐅᓯᒪᔪᒍᑦ ᐃᓕᑦᓯᓐᓂ ᑐᔪᕐᒥᐊᖑᑎᓚᐅᕐᑎᒍᑦ; ᓴᐳᑎᓚᐅᕐᑎᒍᑦ ᐊᓯᕈᐃᔨᒥᑦ.”
ᐊᒃᓱᕈᕐᓇᕐᑐᖅ ᐊᓯᕈᕐᑕᐅᓇᕐᑐᓪᓗ ᐃᓱᓕᑦᓱᒫᕐᐳᑦ, ᓄᓇᓂᒡᓗ ᓱᓁᕈᑦᔨᓚᐅᕐᑐᑦ ᓄᖑᑦᓱᒫᕐᐳᑦ ᓄᓇᒥᑦ. 5ᑕᕝᕙ ᑍᕕᑎᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ ᐊᖓᔪᖅᑳᕐᔪᐊᕐᑖᕈᒪᕐᐳᑦ, ᐃᓄᖁᑎᓂᓗ ᐊᐅᓚᑦᓱᒫᕐᐰᑦ ᓱᕐᕋᔪᐃᑦᑐᒥᒃ ᓇᒡᓕᖕᓂᕐᒧᑦ, ᐃᓱᐊᕐᑐᒥᒃ ᐱᓇᓱᐊᕈᒫᕐᐳᖅ ᑕᒪᕐᒥᒡᓗ ᐊᑦᔨᒌᑦᓯᐊᕐᑐᒥᒃ ᐱᓇᓱᐊᕐᕕᐅᑎᑦᓱᒫᕐᐰᑦ.
6ᑐᓴᐅᒪᕗᒍᑦ ᒧᐊᐱᒥᐅᑦ ᐱᐅᔪᕆᔪᕐᔪᐊᖑᓂᕋᕐᑕᐅᑎᓪᓗᒋᑦ, ᐱᐅᔪᕆᔪᕐᔪᐊᖑᓚᐅᕐᒪᑦ; ᓲᖑᓴᒃᑐᕐᔪᐊᖑᓪᓗᓂ, ᓇᖕᒥᓂᕐᓯᐅᕐᓗᑎᒡᓗ, ᐱᔪᓐᓇᕐᓂᕋᕐᓂᖏᓪᓕ ᐃᓗᓕᖃᓐᖏᓚᑦ.
7ᑍᒤᒻᒪᑦ ᒧᐊᐱᒥᐅᑦ ᓂᐱᖃᕐᓗᑎᒃ ᕿᐊᓕᕐᓕᑦ, ᒧᐊᐱᒥᒃ ᕿᐊᑦᔪᑎᖃᓕᕐᓕᑦ, ᐅᒡᒍᐊᕐᓕᑦ ᐊᒃᑐᕐᑕᐅᓯᒪᓗᑎᒃ, ᓂᐊᖂᔧᓪᓗ ᐸᐅᕐᖓᐅᔭᓖᑦ ᓂᕆᕙᓚᐅᕐᑕᑎᒃ ᐱᓪᓗᒋᑦ ᑭᕆ-ᕼᐃᕆᑎᒥ. 8ᕼᐃᓴᐸᓂᐅᑉ ᖃᓂᒋᔭᖓᓂ ᐆᒪᔪᒃᑯᕖᑦ ᕔᓂᒃᓴᓂᒡᓗ ᐱᕈᕐᓰᕖᑦ ᓄᓇᒥ ᓯᑉᒪᒦᑦᑐᑦ ᑕᒪᕐᒥᒃ ᐊᓯᕈᕐᑕᐅᔪᒫᕐᐳᑦ, ᕔᓂᒃᓴᓂᒃ ᑖᒃᑯᓇᓐᖓᑦ ᐱᓯᒪᔪᓂᑦ ᐃᓅᖃᑎᒌᒡᔪᐊᑦ ᐊᖓᔪᖅᑳᕐᔪᐊᖏᑦ ᐋᖓᔮᓚᕿᕙᓚᐅᕐᐳᑦ ᕔᓂᒃᓴᓂᒃ ᐱᕈᕐᓰᕖᑦ ᐅᖓᓯᒃᑐᒧᑦ ᑎᑭᐅᑎᓯᒪᕙᓚᐅᕐᐳᑦ ᔧᔨᕆᐅᑉ ᐃᒡᓗᒐᓴᒡᔪᐊᖏᑦ ᑎᑭᓪᓗᒋᑦ, ᓯᕿᓂᐅᑉ ᓄᐃᕕᐊᑕ ᓇᓛᓄᐊᖓᓂᖓ ᓱᓇᖃᔪᐃᑦᑐᒧᑦ ᑎᑭᐅᓯᒪᓪᓗᓂ, ᐊᒻᒪ ᓯᕿᓂᐅᑉ ᓂᐱᕕᐊᑕ ᓇᓛᓄᐊᖓᓂᖓ ᑕᓯᐅᑉ ᑐᖁᖓᔪᒥᒃ ᐊᑎᓕᐅᑉ ᐊᑭᐊᓄᑦ ᑎᑭᐅᓯᒪᓪᓗᑎᒃ. 9ᔧᔨᕆᒥᐅᑦ ᖁᕝᕕᐅᕐᑎᓪᓗᒋᑦ ᖁᕝᕕᐅᖃᑎᒋᔪᒪᕙᒃᑲ ᓯᑉᒪᐅᑉ ᕔᓂᒃᓴᓂᒃ ᐱᕈᕐᓰᕕᖏᑦ ᐱᓪᓗᒋᑦ; ᖁᕝᕕᓐᓄᑦ ᖃᐅᓯᓕᕐᑎᑦᓱᒪᕙᑦᓯ ᕼᐃᓴᐸᓂᒥᐅᑦ ᐃᓕᐊᓚᒥᐅᓪᓗ; ᑲᑎᕐᓱᐃᑎᓪᓗᓯ ᖁᕕᐊᓱᖕᓂᕐᒧᑦ ᓂᓪᓕᐊᓂᕆᕙᓚᐅᕐᑕᓯ ᓂᐸᖏᕐᒪᑦ. 10ᖁᕕᐊᓱᖕᓂᖅ ᐊᓕᐊᓁᒍᓱᖕᓂᕐᓗ ᐲᕐᑕᐅᓯᒪᖕᒪᑎᒃ ᐱᕈᕐᓰᕕᖕᒥᑦ ᐱᕈᑦᓯᐊᕐᕕᐅᕙᓚᐅᕐᑐᒥᑦ; ᐱᕈᕐᓰᕕᖕᓂ ᕔᓂᒃᓴᓕᐅᕐᕕᖕᓂ ᐃᓐᖏᕐᑐᖃᕈᓐᓃᕐᒪᑦ, ᕾᒐᓛᕐᓂᖃᕈᓐᓃᕐᓗᓂᓗ; ᕔᓂᒃᓴᓂᒃ ᐃᑦᑏᔧᔪᖃᕈᓐᓃᕆᕗᖅ ᕔᓂᓕᐅᕐᕕᖕᓂ; ᖁᕕᐊᓱᒡᕙᓗᒃᑐᓂᖅ ᑐᓴᕐᓴᐅᔪᖃᕈᓐᓃᕐᐳᖅ ᕔᓂᓕᐅᕐᕕᖕᓂ. 11ᑍᒤᒻᒪᑦ ᑕᕐᓂᕋ ᕿᒃᓵᖕᓂᕐᒧᑦ ᓂᓪᓕᐊᓕᕐᐳᖅ ᑭᕆ-ᕼᐃᕆᑐᑦ ᒧᐊᐱ ᐱᓪᓗᒍ. 12ᒧᐊᐱᒥᐅᑦ ᐅᐸᒍᑎᒃᐸᑕ ᒎᑎᒥᖕᓄᑦ, ᑕᖃᑐᐃᓐᓇᕐᓂᐊᓕᕐᐳᑦ ᒎᑎᓐᖑᐊᖃᕐᕕᖕᓂ ᖃᖅᑲᐅᑉ ᖃᖓᓃᑦᑐᒥ, ᑐᒃᓯᐊᕐᕕᖕᒥᖕᓄᑦ ᑐᒃᓯᐊᕆᐊᕐᑐᕐᐸᑕ ᐃᑲᔪᕐᑕᐅᕚᓪᓕᕐᓂᐊᓐᖏᓚᑦ. 13ᐊᑕᓂᖅ ᐃᒫᒃ ᐅᖃᓚᐅᕐᐳᖅ ᒧᐊᐱᒥᐅᑦ ᐱᓪᓗᒋᑦ ᑍᑦᓱᒪᓂ. 14ᒫᓐᓇᓕ ᐊᑕᓂᖅ ᐃᒫᒃ ᐅᖃᓕᕐᐳᖅ, “ᐊᕐᕌᒍᐃᑦ ᐱᖓᓱᑦ ᓈᒃᐸᑕ ᐃᖅᑲᓁᔭᕐᑎᑎᑐᑦ ᐊᕐᕌᒍᒥ ᐱᓇᓱᐊᕐᑐᑎᑐᑦ ᒧᐊᐱᒥᐅᑦ ᐱᔪᓐᓇᕐᓂᐊᓗᖏᑦ ᓄᖑᑦᓱᒫᕐᐳᑦ, ᐅᓄᕐᑐᓂᒃ ᐃᓄᖃᕋᓗᐊᕐᐳᖅ, ᐅᓄᖏᑦᑐᓂᒡᓕ ᐊᒥᐊᒃᑯᔪᒫᕐᐳᑦ, ᐊᒥᐊᒃᑰᔪᓪᓗ ᓄᑭᑭᑦᑑᓪᓗᑎᒃ.”
Currently Selected:
ᐂᓮᐊᓯᐅᑉ ᐊᒡᓚᖏᑦ 16: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
