ᕼᐆᓯᐊᑉ ᐊᒡᓚᖏᑦ 5
5
1“ᐅᓇ ᓈᓚᒃᓯᐅᒃ, ᑐᓂᕐᕈᓯᕐᑎᑦᓯᔨᐅᔪᓯ! ᓈᓚᑦᓯᐊᓚᐅᕆᑦᓯ, ᐃᓴᕆᐊᓕᒥᐅᑦ ᑭᖑᕚᖏᑦ! ᓈᓚᒋᑦᓯ, ᐊᖓᔪᖅᑳᕐᔪᐊᑉ ᑭᖑᕚᖏᑦ! ᐋᖅᑭᒃᓱᐃᔨᐅᔪᒃᓴᐅᓪᓗᓯ ᐊᑦᔨᒌᒃᑎᑦᓯᓂᕐᒧᑦ ᐱᔭᒃᓴᖃᕋᓗᐊᕐᐳᓯ; ᒥᑭᒋᐊᖑᓕᕐᐳᓯᓕ ᒥᔅᐸᒥ, ᓄᓗᐊᑐᑦ ᐃᓯᕕᓯᒪᔪᑎᑐᑦ ᖃᖅᑲᒥ ᑍᐸᕆᒥ. 2ᐃᑎᕐᓴᕐᔪᐊᓕᐅᕐᓯᒪᕗᑦ ᓯᑎᒻᒥᑎᑐᑦ ᑐᖁᑦᓯᕕᒃᓴᒥᖕᓂᒃ; ᐃᓘᓐᓇᖏᓪᓕ ᓱᒋᐊᕐᓂᐊᕐᐸᒃᑲ. 3ᐃᕗᕅᒥ ᖃᐅᔨᒪᕙᕋ, ᐃᓴᕆᐊᓕᒥᐅᓪᓗ ᐃᔨᕐᓯᒪᓐᖏᓚᑦ ᐅᕙᓐᓄᑦ; ᒫᓐᓇ ᐃᕗᕅᒥ ᐊᑭᓕᕐᑕᐅᓪᓗᑎᒃ ᐊᑐᒐᕐᓄᑦ ᐱᓕᕆᓯᒪᕗᑎᑦ, ᐃᓴᕆᐊᓕᒥᐅᓪᓗ ᐅᕙᓐᓄᑦ ᓇᕐᕈᓇᕐᓯᕗᑦ.”
ᕼᐆᓯᐊᑉ ᐃᓂᕐᑎᕆᓂᖓ ᒎᑎᓐᖑᐊᓕᖕᓂᒃ
4ᐱᐅᖏᑦᑐᒥᒃ ᐱᓇᓱᕐᓂᕐᒥᖕᓄᑦ ᐅᑎᕈᓐᓁᓪᓕᕗᑦ ᒎᑎᒥᖕᓄᑦ. ᐊᓯᓐᓂᐊᕐᓂᐅᑉ ᐊᓂᕐᓂᖓᓄᑦ ᓇᔪᕐᑕᐅᒐᒥᒃ, ᐊᑕᓂᕐᒥᒃ ᐃᓕᑕᕐᓯᓐᖏᓚᑦ. 5ᐃᓴᕆᐊᓕᒥᐅᑦ ᐱᐅᔪᕆᓂᖏᑕ ᑖᑦᓱᒪ ᑮᓇᖓ ᐊᑭᕋᕐᑐᕐᐹᑦ; ᐃᕗᕅᒥ ᐸᓯᔭᒃᓴᐅᓂᕐᒥᓄᑦ ᐹᓪᓚᒍᒫᕐᐳᖅ ᐅᕐᕈᓗᓂ; ᔫᑕᐅᓪᓗ ᐃᓄᖏᑦ ᐅᕐᕈᖃᑕᐅᔪᒫᕐᐳᑦ ᑖᒃᑯᓄᖓ. 6ᓰᐱᖁᑎᒥᖕᓂᒃ ᐆᒪᔪᖁᑎᒥᖕᓂᒡᓗ ᐂᑦᑐᐃᕗᑦ ᑐᓂᕐᕈᓯᕐᓗᑎᒃ ᐊᑕᓂᕐᒧᑦ, ᓇᒡᕚᕐᓂᐊᓐᖏᓚᓪᓕ ᑖᑦᓱᒥᖓ; ᑖᑦᓱᒪ ᕿᒪᒃᓯᒪᓕᕐᒪᒋᑦ. 7ᐅᒃᐱᕐᓇᕈᓐᓁᕐᓯᒪᖕᒪᑕ ᐊᑕᓂᕐᒧᑦ; ᕿᑐᕐᖓᖏᑦ ᑖᒃᑯᓄᖓ ᐱᒋᔭᐅᔪᓐᓁᕐᐳᑦ. ᒫᓐᓇᓕ ᑕᖅᑭᓂᕋᑖᒥ ᓄᓇᖁᑎᖏᑦ ᐊᓯᕈᕐᑕᐅᔪᒫᓕᕐᐳᑦ ᐱᖁᑎᓕᒫᖏᓪᓗ.
ᐅᓇᑕᕐᓃᑦ ᔫᑕᒃᑯᓐᓂ ᐃᓴᕆᐊᓕᒥᐅᓂᓗ
8ᑎᑦᑐᓚᐅᑏᑦ ᓂᓪᓕᕐᑎᓕᕐᓯᐅᒃ ᒋᐱᐊ, ᐅᐸᓗᖎᔭᕐᑐᕐᓯᐅᑦ ᓂᓪᓕᕐᑎᓕᕐᓯᐅᒃ ᕌᒪ. ᐅᓇᑕᕆᐊᕐᓂᕐᒥᒃ ᓂᓪᓕᓕᕆᑦᓯ ᐱᑦᐂᕕᓐ; ᐅᓇᑕᕆᐊᓕᕆᑦᓯ ᐱᓐᔭᒥᓂᐅᑉ ᐃᓄᖏᑦ! 9ᐃᕗᕅᒥᐅᑉ ᐅᓪᓗᖓ ᓱᒋᐊᕐᑕᐅᕕᒃ ᕾᓕᕐᒪᑦ; ᐃᓴᕆᐊᓕᒥᐅᓪᓗ ᐊᓯᕈᕐᑕᐅᔪᒫᕐᐳᑦ ᐃᓄᖏᑦ, ᑕᒪᓐᓇ ᑲᔪᓯᓪᓚᕆᖕᓂᐊᕐᐳᖅ.
10“ᓂᓐᖓᐅᒪᕗᖓ ᔫᑕᐅᑉ ᐃᓄᖏᓐᓄᑦ ᐃᓴᕆᐊᓕᒥᐅᑦ ᓄᓇᖁᑎᖏᑕ ᑭᒡᓕᖏᑕ ᓇᓗᓁᒃᑯᑕᖏᓐᓂᒃ ᐲᕐᓯᓯᒪᔪᑎᑐᑦ ᑍᒤᒻᒪᑕ; ᓂᓐᖓᐅᓯᓐᓂᒃ ᑯᕕᓯᕕᒋᓂᐊᕐᐸᒃᑲ ᐃᒫᓄᑦ ᐅᓗᑦᔭᐅᔪᑎᑐᑦ. 11ᐃᕗᕅᒥ ᐊᒃᓱᕈᕐᓇᕐᑐᒃᑰᓕᕐᐳᖅ; ᓄᓇᖁᑎᒋᓚᐅᕐᑕᒥᓂᒃ ᐊᓯᐅᔨᖕᒪᑦ, ᐱᓇᓱᐊᕋᓱᓚᐅᕐᒪᑕ ᐊᑑᑎᖃᖏᑦᑐᓄᑦ. 12ᑍᒤᒻᒪᑦ ᐃᕗᕅᒥᒥᐅᑦ ᖃᓪᓗᓈᕐᑕᓂᒃ ᓂᕆᓲᑎᑐᑦ ᓱᒃᑯᑎᓐᓂᐊᕐᐸᒃᑲ; ᔫᑕᐅᓪᓗ ᐃᓄᖏᑦ ᓂᒃᑯᑦᑐᑎᑐᑦ ᐸᓂᕐᓂᐊᕐᐳᑦ.
13“ᐃᕗᕅᒥ ᐃᒻᒥᓂᒃ ᑕᑯᒐᒥ ᖃᓄᖅ ᖃᓂᒪᑎᒋᓂᕐᒥᓂᒃ, ᔫᑕᐅᓪᓗ ᐃᑭᖏᑦ ᑕᑯᒐᒥᒋᑦ, ᑕᕝᕙ ᐃᕗᕅᒥ ᐂᓚᐅᕐᐳᖅ ᐊᓯᕆᐊᑉ ᐊᖓᔪᖅᑳᕐᔪᐊᖓᓄᑦ ᐃᑲᔪᕆᐊᕐᑕᐅᔪᒪᓪᓗᓂ, ᐃᑲᔪᕈᓐᓇᓚᐅᓐᖏᓚᕐᓕ ᐅᕝᕙᓗ ᐋᖅᑮᔪᓐᓇᓚᐅᓐᖏᓚᖅ ᐃᑭᖏᓐᓂᒃ. 14ᐃᕗᕅᒥᐅᑉ ᐃᓄᖏᑦ ᐅᓇᑕᕐᓂᐊᕐᐸᒃᑲ ᓛᔭᑎᑐᑦ, ᔫᑕᐅᓪᓗ ᑭᖑᕚᖏᑦ ᓛᔭᑎᑐᑦ ᐅᕕᒃᑲᑎᑐᑦ. ᐅᕙᖓ ᓇᖕᒥᓂᖅ ᐊᓕᒃᑐᕈᒫᕐᐸᒃᑲ ᕿᒪᒡᓗᒋᓪᓗ. ᐅᓂᐊᕐᓗᒋᑦ ᐊᐅᓪᓚᐅᑎᔪᒫᕐᐸᒃᑲ, ᑭᓇᒧᓪᓘᓐᓃᑦ ᓴᐳᑦᔭᐅᔪᓐᓇᕈᒫᓐᖏᓚᑦ.
15“ᐃᓄᖁᑎᒃᑲ ᕿᒪᒃᓯᒪᓂᐊᕐᐸᒃᑲ ᐸᓯᔭᒃᓴᐅᓂᕐᒥᖕᓂᒃ ᖃᐅᔨᓚᐅᖏᓐᓂᖏᓐᓂ ᐅᕙᓐᓂᒡᓗ ᕿᓂᓕᓚᐅᖏᓐᓂᖏᓐᓂ, ᐃᒻᒪᖄᓕ ᐊᒃᓱᕈᓕᕈᑎᒃ ᐅᕙᓐᓂᒃ ᕿᓂᓕᕈᒫᕐᐳᑦ.”
Currently Selected:
ᕼᐆᓯᐊᑉ ᐊᒡᓚᖏᑦ 5: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
