ᕼᐆᓯᐊᑉ ᐊᒡᓚᖏᑦ 4
4
ᐊᑕᓂᐅᑉ ᓈᒻᒪᒃᓴᖏᓐᓂᖓ ᐃᓴᕆᐊᓕᒥᐅᓂᒃ
1ᐊᑕᓂᐅᑉ ᐅᖃᐅᓯᖓᓂᒃ ᑐᓴᕆᑦᓯ, ᐃᓴᕆᐊᓕᒥᐅᖑᔪᓯ: “ᐊᑕᓂᖅ ᓈᒻᒪᒃᓴᖏᒻᒪᑦ ᐃᓄᖕᓂᒃ ᑕᒫᓂ ᓄᓇᖃᕐᑐᓂᒃ. ᐅᒃᐱᕐᓇᕐᑐᖃᕈᓐᓃᕐᒪᑦ ᓂᑲᒍᓱᖕᓂᖃᕈᓐᓃᕐᓗᓂᓗ, ᖃᐅᔨᒪᔪᖃᕈᓐᓃᕐᓗᓂᓗ ᒎᑎᒥᒃ ᑕᒫᓂ ᓄᓇᒥ; 2ᐅᖃᕕᒃᓗᑎᒃ ᐊᖏᒻᒪᕆᒃᐸᒃᑲᓗᐊᕐᐳᑦ, ᓴᒡᓗᖃᑦᑕᕐᐳᑦ, ᑐᖁᕅᕗᑦ, ᑎᒡᓕᒐᕐᐳᑦ, ᐊᓯᓐᓂᐊᕐᓗᑎᒡᓗ; ᐱᕋᔭᖕᓃᓪᓗ ᑭᒡᓕᖃᕈᓐᓃᕐᐳᑦ, ᑐᖁᕅᑐᐃᓐᓇᓕᕐᐳᑦ ᑐᖓᓕᕇᒥᒃ. 3ᑍᒤᒻᒪᑦ ᓄᓇ ᕿᒃᓵᓕᕐᐳᖅ, ᑕᒫᓂᓗ ᐃᓂᖃᕐᑐᓕᒫᑦ ᓂᐹᓕᕐᐳᑦ, ᐆᒪᔪᐃᓪᓗ ᓇᑎᕐᓇᒦᑦᑐᑦ, ᑎᖕᒥᐊᓪᓗ ᖃᖓᑕᕙᒃᑐᑦ; ᐃᖃᓗᐃᓪᓗ ᐊᒡᓛᑦ ᓄᖑᑕᐅᓕᕐᐳᑦ.”
ᐊᑕᓂᐅᑉ ᓈᒻᒪᒃᓴᖏᓐᓂᖓ ᑐᓂᕐᕈᓯᕐᑎᑦᓯᔨᓂᒃ
4ᐊᑕᓂᖅ ᐅᖃᕐᐳᖅ, “ᑭᓇᓘᓐᓃᑦ ᐃᓄᖕᓂᒃ ᐸᓯᒃᓯᕐᑍᓕᓕ, ᐅᕝᕙᓗ ᐅᖃᐅᑦᔭᐅᒋᐊᕐᑍᓕᓕ, ᐃᓱᐊᕐᓴᓐᖏᓚᖓᓕ ᐃᓕᑦᓯᓐᓂᒃ ᑐᓂᕐᕈᓯᕐᑎᑦᓯᔨᓂᒃ. 5ᐅᓪᓗᒃᑯᑦ ᐹᓪᓚᒍᒫᕐᐳᓯ, ᐱᔪᖃᓛᕐᑐᒥᒡᓗ ᐅᖃᕐᑏᑦ ᐅᓐᓄᒃᑯᑦ ᐹᓪᓚᒍᒫᕆᕗᑦ; ᐊᓈᓇᓯᓗ ᐃᓴᕆᐊᓕ ᐊᓯᕈᕐᓂᐊᕐᐸᕋ. 6ᐃᓄᖁᑎᒃᑲ ᐊᓯᕈᓕᕐᐳᑦ ᐅᕙᓐᓂᒃ ᖃᐅᔨᒪᖏᓐᓂᕐᒧᑦ; ᐃᓕᑦᓯ ᑐᓂᕐᕈᓯᕐᑎᓯᔨᐅᔪᓯ ᖃᐅᔨᔪᒪᓚᐅᖏᓐᓇᑦᓯ, ᑍᒤᒻᒪᑦᑕᐅᖅ ᓇᕐᕈᒋᓕᕐᐸᑦᓯ ᑐᓂᕐᕈᓯᕐᑎᑦᓯᔨᐅᓂᐊᕈᓐᓃᕐᐳᓯ ᐅᕙᓐᓄᑦ. ᒎᑎᑦᓯ ᐱᖁᔭᖏᓐᓂᒃ ᐃᓱᒪᔪᓐᓃᓚᐅᕋᑦᓯ, ᕿᑐᕐᖓᓯᑦᑕᐅᖅ ᐃᓱᒪᒋᓂᐊᕈᓐᓃᕆᕙᒃᑲ.
7“ᑐᓂᕐᕈᓯᕐᑎᓯᔩᑦ ᐅᓄᕐᓂᕐᓴᐅᓕᑐᐊᕐᒪᑕ, ᐊᔪᕐᑐᓕᓂᖏᑦ ᐅᕙᓐᓄᑦ ᐊᖏᓂᕐᓴᐅᕗᑦ; ᑍᒤᒻᒪᑦ ᐅᐱᓐᓇᕐᓂᓯ ᑲᓐᖑᓇᕐᓯᑎᓐᓂᐊᕐᐸᕋ. 8ᐊᒃᓱᐃᓕᕗᓯ ᐃᓄᖁᑎᒪ ᐊᔪᕐᓂᖏᓐᓄᑦ; ᑖᒃᑯᐊᓗ ᑲᔪᖏᓛᕐᐳᑦ ᐊᔪᕐᑐᓕᓂᕐᒧᑦ. 9ᐃᓕᑦᓯᑦᑕᐅᖅ ᐊᒃᓱᕈᕐᓇᕐᑐᒃᑰᕐᓂᐊᕐᐳᓯ ᐃᓄᐃᑦ ᓱᒋᐊᕐᑕᐅᓂᖏᑎᑐᑦ ᓱᒋᐊᕐᑕᐅᓗᓯ, ᐊᑭᓕᕐᑕᐅᓂᐊᕐᐳᓯᓗ ᐊᔪᕐᑐᓕᓂᓯ ᐱᓪᓗᒋᑦ. 10ᓂᕆᓂᐊᕐᐳᑦ, ᐊᕿᐊᑦᑐᕐᓂᐊᓐᖏᓚᓪᓕ; ᐊᓯᓐᓂᐊᕐᓂᐊᕐᐳᑦ, ᕿᑐᕐᖓᕐᑖᕐᓂᐊᓐᖏᓚᓪᓕ; ᐊᑕᓂᕐᒥᒃ ᕿᒤᓯᒪᖕᒪᑕ ᐊᓯᓐᓂᐊᕐᓂᖅ ᒎᑎᓐᖑᐊᓄᑦ ᐱᑦᔪᑎᒋᓪᓗᒍ.”
ᐊᑕᓂᐅᑉ ᐃᓂᕐᑎᕆᓂᖓ ᒎᑎᓐᖑᐊᓄᑦ ᑐᒃᓯᐊᖃᑦᑕᖁᔨᓇᓂ
11“ᐃᓄᖁᑎᒃᑲ ᕔᓂᒧᑦ ᓄᑕᐅᖏᑦᑐᓄᑦ ᓄᑖᓄᓪᓗ, ᑐᑭᓯᔪᓐᓇᕐᓂᖏᑦ ᐊᓯᕈᕐᑕᐅᓕᕐᐳᑦ. 12ᐃᓄᖁᑎᒃᑲ ᖃᐅᔨᑎᑕᐅᔪᒪᕙᒃᐳᑦ ᕿᔪᖕᒧᑦ, ᐊᔭᐅᑉᐱᐊᓄᓪᓗ ᖃᐅᔨᔪᒪᔭᖏᓐᓂᒃ ᖃᐅᔨᑎᑕᐅᕙᒃᓱᑎᒃ. ᐊᓯᓐᓂᐊᕐᓂᕐᒧᑦ ᐊᑐᒐᐅᓕᕐᑑᑉ ᐊᓂᕐᓂᖓᓄᑦ ᑕᒻᒪᕐᑎᑕᐅᕗᑦ, ᒎᑎᒥᖕᓂᒃ ᕿᒤᕗᑦ ᐊᓯᓐᓂᐊᕐᓂᕐᒧᑦ. 13ᑐᓂᕐᕈᓯᖃᑦᑕᕐᐳᑦ ᐃᑯᐊᓚᑦᓯᓪᓗᑎᒃ ᖃᖅᑲᐅᑉ ᖄᖏᓐᓂ, ᐱᖑᐃᓪᓗ ᖄᖏᓐᓂ ᐃᑭᑦᓯᕙᒡᓗᑎᒃ ᑎᐱᑦᓯᐊᕆᒃᑐᓂᒃ, ᓇᐹᕐᑑᑉ ᐆᒃᒥᒃ ᐊᑎᓕᐅᑉ ᓯᑕᒃᑕᐅᑉ ᐊᑖᓂ, ᑖᓪᓕᓂᖏᓐᓂ, ᓴᓂᕋᖏᑦᑕ ᐱᐅᓂᖏᑦ ᐱᑦᔪᑎᒋᓪᓗᒋᑦ.
“ᑍᒤᒻᒪᑦ ᐸᓂᓯ ᐊᑐᒐᐅᓕᕐᐳᑦ ᐊᑭᓕᕐᑐᕐᑕᐅᓪᓗᑎᒃ, ᐅᑯᐊᓯᓗ ᐊᓯᓐᓂᐊᕐᐸᓕᕐᓱᑎᒃ.
14“ᑍᒤᒃᑲᓗᐊᕐᑎᓪᓗᒋᑦ ᐸᓂᓯ ᓱᒋᐊᕐᓂᐊᓐᖏᓚᒃᑲ, ᐅᑯᐊᓯᓗ ᐊᓯᓐᓂᐊᖃᑦᑕᕐᓂᖏᑦ ᓱᒋᐊᕐᓂᐊᖏᓐᓂᕙᒃᑲ; ᐊᖑᑎᑦ ᐃᒻᒥᖕᓂᒃ ᐂᑦᑑᑎᒋᖃᑦᑕᕐᒪᑕ ᐊᑐᒐᕐᓄᑦ, ᑐᓂᕐᕈᓯᖃᑦᑕᕐᓗᑎᒡᓗ ᒎᑎᓐᖑᐊᓖᑦ ᐊᑐᒐᖁᑎᖏᓐᓄᑦ, ᐃᓄᐃᓪᓗ ᑐᑭᓯᓯᒪᖏᑦᑐᑦ ᐊᓯᕈᕐᑕᐅᔪᒫᕐᐳᑦ.
15“ᐃᓴᕆᐊᓕᒥᐅᖑᔪᓯ ᐊᑐᒐᕐᓄᑦ ᐊᓯᓐᓂᐊᕐᓯᒪᒐᓗᐊᕐᑎᓪᓗᓯ, ᔫᑕᒃᑯᑦ ᐸᓯᔭᒃᓴᐅᓕᕐᑍᓕᓕᑦ ᐃᓕᑦᓯᑐᑦ. ᑐᒃᓯᐊᕐᑍᓕᒋᑦᓯ ᒋᐅᓪᒐᐅᓪᒥ, ᐅᕝᕙᓗ ᐱᑦᐂᕕᓐᒧᐊᕐᑍᓕᒋᑦᓯ, ᐅᖃᕕᒡᓗᓯᓗ ᐊᖏᕐᑍᓕᒋᑦᓯ, ‘ᐊᑕᓂᐅᑉ ᐆᒪᔫᑉ ᐊᑎᖓᓂ.’ 16ᐃᓴᕆᐊᓕᒥᐅᑦ ᓯᐅᑎᖁᕐᑐᔪᑎᑐᑦ ᐱᔭᕐᓃᑦᑑᑎᒋᕗᑦ; ᖃᓄᕐᓕ ᐊᑕᓂᕐᒧᑦ ᓂᕆᑎᑕᐅᔪᓐᓇᕐᐸᑦ ᓰᐲᑦ ᓄᕐᕋᖏᑎᑐᑦ ᓂᕿᒃᓴᓕᖕᒦᑦᑐᑎᑐᑦ? 17ᐃᕗᕅᒥᐅᑦ ᒎᑎᓐᖑᐊᓂᒃ ᒎᑎᖃᓕᕐᐳᑦ, ᐃᓱᒪᕐᓱᓕᕐᓕᑦ. 18ᐃᒥᓗᐊᓚᐅᕐᓗᑎᒃ ᕔᓂᒥᒃ, ᐃᒻᒥᖕᓂᒃ ᐂᑦᑑᑎᒋᕗᑦ ᐊᑐᒐᕐᓄᑦ; ᐱᓇᓱᐊᕈᒪᓂᕐᓴᐅᕗᑦ ᑲᓐᖑᓇᕐᑐᓂᒃ ᐅᐱᓐᓇᕐᓂᖅ ᐱᔪᒪᓇᒍ. 19ᐊᐅᓪᓚᐅᑦᔭᐅᕗᑦ ᐊᓄᕆᒧᑦ ᐅᓕᒃᑕᐅᓪᓗᑎᒃ, ᑲᓐᖑᓲᑎᖃᓕᕈᒫᕐᐳᑦ ᑐᓂᕐᕈᓯᖃᑦᑕᓚᐅᕐᓂᕐᒥᖕᓂᒃ ᒎᑎᓐᖑᐊᓄᑦ.”
Currently Selected:
ᕼᐆᓯᐊᑉ ᐊᒡᓚᖏᑦ 4: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
