ᐄᑉᕈᐃᓄᑦ 7

ᑐᓂᕐᕈᓯᕐᑎᑦᓯᔨ ᒥᓪᑭᓯᑎ

1 # ᒨᓯᓯ ᓯᕗᓪᓖᑦ 14:17-20. ᒥᓪᑭᓯᑎᒃ ᑖᓐᓇ ᐊᖓᔪᖅᑳᕐᔪᐊᖑᓚᐅᕐᐳᖅ ᓮᓕᒻᒥ ᑐᓂᕐᕈᓯᕐᑎᑦᓯᔨᐅᓪᓗᓂᓗ ᒎᑎᒧᑦ ᖁᑦᓯᖕᓂᕐᐸᐅᔪᒧᑦ. ᐂᑉᕋᕼᐋᒻ ᐅᓇᑕᕆᐊᕐᓯᒪᓚᐅᕐᓗᓂ ᐅᑎᕋᒥ ᓵᓚᖃᕐᓗᓂ ᐊᖓᔪᖅᑳᕐᔪᐊᓂᒃ ᒥᓪᑭᓯᑎᐅᑉ ᐸᕐᕆᐊᕐᓗᓂᐅᒃ ᓮᒻᒪᕐᑎᓚᐅᕐᐹ, 2ᐂᑉᕋᕼᐋᒻᓗ ᑐᓂᕐᕈᓯᕐᕕᒋᓚᐅᕐᐹ ᓵᓚᖃᕐᓗᓂ ᐱᑖᕕᓂᖏᑕ ᑕᓪᓕᒪᐅᔪᕐᑐᖏᓐᓂᒃ. ᒥᓪᑭᓯᑎᐅᓪᓗ ᐊᑎᖓ ᑐᑭᖃᕐᐳᖅ “ᐊᖓᔪᖅᑳᕐᔪᐊᖅ ᓇᓛᒎᕐᓂᕐᒧᑦ”; ᓮᓕᒻᒥᓕ ᐊᖓᔪᖅᑳᕐᔪᐊᖑᓂᕐᒥᓄᑦ ᐊᑎᖓ ᑐᑭᖃᓚᐅᕆᕗᖅ “ᐊᖓᔪᖅᑳᕐᔪᐊᖅ ᓮᒻᒪᕐᑎᑦᓯᓂᕐᒧᑦ.” 3ᒥᓪᑭᓯᑎᓕ ᐊᑖᑕᖃᓐᖏᓚᖅ ᐊᓈᓇᖃᕋᓂᓗ, ᓯᕗᓕᕕᓂᖃᖏᓐᓂᕗᖅ, ᐃᓅᓕᕐᓂᕕᓂᖓᓗ ᐅᓂᒃᑲᐅᓯᐅᓯᒪᓐᖏᓚᖅ ᑐᖁᓂᖓᓗ ᐅᓂᒃᑲᐅᓯᐅᓯᒪᓇᓂ, ᒎᑎᐅᑉ ᐃᕐᓂᖓᑐᑦ ᑍᒤᑉᐳᖅ ᑐᓂᕐᕈᓯᕐᑎᑦᓯᔨᐅᕗᖅ ᐃᓱᖃᖏᑦᑐᒧᑦ.

4ᐃᓱᒪᒃᓴᕐᓯᐅᕈᑎᒋᓯᐅᒃ ᐱᓪᓚᕆᐊᓘᓂᖓ: ᐂᑉᕋᕼᐋᒻᓗ ᓯᕗᓕᑦᑕ ᐃᓕᑕᕆᔭᐅᑦᓯᐊᕐᑑᑉ ᑐᓂᓯᕕᒋᓚᐅᕐᐹ ᐅᓇᑕᕐᓂᒃᑯᑦ ᐱᑖᕆᔭᕕᓂᕐᒥ ᑕᓪᓕᒪᐅᔪᕐᑐᖏᓐᓂᒃ. 5#ᒨᓯᓯ ᓯᑕᒪᖏᑦ 18:21.ᓕᕔᑎᒃᑯᓪᓗ ᑭᖑᕚᖏᑦ ᑐᓂᕐᕈᓯᕐᑎᑦᓯᔩᑦ, ᐱᖁᔨᑦᔪᑕᐅᓯᒪᕗᑦ ᐃᓴᕆᐊᓕᒥᐅᑦ ᐃᓄᖏᓐᓂᑦ ᑕᓪᓕᒪᐅᔪᐃᕈᑕᐅᔪᓂᒃ ᑎᒍᓯᖁᓪᓗᒋᑦ ᔫᑎᐅᖃᑎᒥᖕᓂᑦ, ᑖᒃᑯᐊᑦᑕᐅᖅ ᐂᑉᕋᕼᐋᒻ ᑭᖑᕚᕆᒐᓗᐊᕐᑎᓪᓗᓂᒋᑦ. 6ᑖᓐᓇᓕ ᒥᓪᑭᓯᑎ, ᓕᕔᑎᒃᑯᑦ ᑭᖑᕚᖏᓐᓂᑦ ᐱᓯᒪᓐᖏᓚᖅ, ᑎᒍᓯᓚᐅᕐᐳᕐᓕ ᐂᑉᕋᕼᐋᒻ ᑕᓪᓕᒪᐅᔪᕐᑐᐃᕈᑎᖏᓐᓂᒃ ᓮᒻᒪᕐᑎᓪᓗᓂᐅᒡᓗ ᑖᓐᓇ ᐊᖏᕐᕕᐅᓯᒪᔪᖅ ᒎᑎᒧᑦ. 7ᖁᓚᕐᓇᖏᑦᓯᐊᕐᐳᖅ ᑖᓐᓇ ᓮᒻᒪᕐᑎᑦᓯᔪᖅ ᐱᓪᓚᕆᐅᓂᕐᓴᐅᖕᒪᑦ ᓮᒻᒪᕐᑎᑕᐅᔪᒥᑦ. 8ᑐᓂᕐᕈᓯᕐᑎᑦᓯᔩᓪᓕ ᑕᓪᓕᒪᐅᔪᕐᑐᐃᕈᑎᓂᒃ ᑎᒍᓯᕙᓚᐅᕐᐳᑦ ᐃᓄᑐᐃᓐᓇᐅᓪᓗᑎᒃ ᑐᖁᕙᒃᓗᑎᒡᓗ; ᒥᓪᑭᓯᑎᓕ ᑕᓪᓕᒪᐅᔪᕐᑐᐃᕈᑎᓂᒃ ᑎᒍᓯᓚᐅᕐᐳᖅ ᐃᓅᖏᓐᓇᕐᓂᕋᕐᑕᐅᔪᖅ, ᐅᖃᐅᓯᐅᓯᒪᖕᒪᑦ. 9ᐃᒫᒃ ᐅᖃᕐᑐᖃᕈᓐᓇᕆᕗᖅ, ᑖᓐᓇ ᓕᕔ ᓇᖕᒥᓂᖅ, ᑕᓪᓕᒪᐅᔪᕐᑐᐃᕈᑎᓂᒃ ᑎᒍᓯᕙᒃᑐᖅ, ᑐᓂᕐᕈᓯᓚᐅᕆᕗᖅ ᑕᓪᓕᒪᐅᔪᕐᑐᐃᕐᓗᓂ ᐂᑉᕋᕼᐋᒻ ᐊᖅᑯᑎᒋᓪᓗᒍ, 10ᓕᕔᓕ ᓱᓕ ᐃᓅᓯᒪᓚᐅᖏᒻᒪᑦ ᓯᕗᓕᕕᓂᖓᑕ ᐂᑉᕋᕼᐋᒻ ᑎᒥᖓᓃᑐᐃᓐᓇᓚᐅᕋᒥ ᓱᓕ, ᐂᑉᕋᕼᐋᒻ ᐸᕐᕆᐊᕐᑕᐅᑎᓪᓗᒍ ᒥᓪᑭᓯᑎᒃᒧᑦ.

11ᓕᕔᑎᒃᑯᓪᓕ ᑐᓂᕐᕈᓯᕐᑎᑦᓯᔩᑦ ᐱᑦᔪᑎᒋᓪᓗᒋᑦ ᐱᖁᔧᑦ ᑐᓂᔭᐅᓚᐅᕐᐳᑦ ᐃᓴᕆᐊᓕᒥᐅᓄᑦ, ᓕᕔᑎᒃᑯᓪᓕ ᑐᓂᕐᕈᓯᕐᑎᑦᓯᔨᐅᓂᕐᒧᑦ ᐱᓇᓱᐊᕐᓂᕆᔭᖓ ᓈᒻᒪᑦᓯᐊᓚᐅᕐᐸᑦ, ᑐᓂᕐᕈᓯᕐᑎᑦᓯᔨᒥᒃ ᑖᒃᑯᐊ ᐊᓯᖏᓐᓂᒃ ᓴᖅᑭᑦᑐᖃᕆᐊᖃᕋᔭᓚᐅᓐᖏᓚᖅ, ᒥᓪᑭᓯᑎᑐᑦ ᑍᒤᑦᑐᒥᒃ, ᐂᕉᓂᒧᑦ ᐃᓚᒋᔭᐅᖏᑦᑐᒥᒃ. 12ᑐᓂᕐᕈᓯᕐᑎᑦᓯᔩᓪᓕ ᐊᓯᑦᔨᕐᒪᑕ, ᐱᖁᔧᑦᑕᐅᖅ ᐊᓯᑦᔨᕆᐊᖃᓚᐅᕐᐳᑦ. 13ᐊᑕᓂᕗᓪᓗ ᑍᒫᒃ ᐅᖃᕈᑕᐅᔪᖅ ᓕᕔᑎᒃᑯᑦ ᑭᖑᕚᖏᑕ ᐊᓯᐊᓂᑦ ᐱᓯᒪᕗᖅ, ᓯᕗᓕᕕᓂᖏᓪᓗ ᑐᓂᕐᕈᓯᕐᑎᑦᓯᔨᓄᑦ ᐱᔨᑦᓯᕐᑐᖃᓚᐅᕐᓯᒪᓇᑎᒃ. 14ᖃᐅᔨᒪᔭᐅᑦᓯᐊᕐᐳᕐᓗ ᔫᑕᐅᑉ ᑭᖑᕚᖏᓐᓂᑦ ᐱᓯᒪᓂᖓᓂᒃ, ᒨᓯᓯᓗ ᔫᑕᒃᑯᑦ ᑭᖑᕚᖏᓐᓂᒃ ᐅᖃᐅᓯᖃᓚᐅᓐᖏᓚᖅ ᑐᓂᕐᕈᓯᕐᑎᑦᓯᔨᐅᓂᐊᕐᑐᓂᒃ ᐅᖃᐅᓯᖃᕐᑎᓪᓗᒍ.

ᑐᓂᕐᕈᓯᕐᑎᑦᓯᔨ ᒥᓪᑭᓯᑎᒃᑐᑦ ᑍᒤᑦᑐᖅ

15ᓇᓗᓇᕈᓐᓃᒃᑲᓐᓂᕆᕗᖅ ᑐᓂᕐᕈᓯᕐᑎᑦᓯᔨᒥᒃ ᓴᖅᑭᑦᑐᖃᕐᓯᒪᖕᒪᑦ ᒥᓪᑭᓯᑎᑐᑦ ᑍᒤᑦᑐᒥᒃ, 16ᑖᓐᓇᓕ ᑐᓂᕐᕈᓯᕐᑎᑦᓯᔨᓐᖑᕐᑎᑕᐅᓯᒪᕗᖅ ᐃᓄᑐᐃᓐᓁᑦ ᑭᖑᕚᕇᒃᐸᓪᓕᐊᔪᑦ ᒪᓕᒋᐊᖃᕐᑕᖏᑕ ᐱᖁᔭᖏᑎᒎᖏᑦᑐᖅ ᐃᓅᓯᐅᓪᓕ ᓄᖑᓐᓂᐊᖏᑦᑑᑉ ᐱᔪᓐᓇᕐᓂᖓᒍᑦ. 17#ᐃᓐᖏᕈᑦ 110:4.ᐅᖃᐅᓯᐅᓯᒪᖕᒪᑦ: “ᑐᓂᕐᕈᓯᕐᑎᑦᓯᔨᐅᕗᑎᑦ ᐃᓱᖃᖏᑦᑐᒧᑦ, ᒥᓪᑭᓯᑎᐅᑉ ᑐᓂᕐᕈᓯᕐᑎᑦᓯᔨᐅᓂᖓᑐᑦ.” 18ᑕᕝᕙ ᐱᖁᔭᑐᖃᖅ ᐊᑐᕈᓐᓃᕐᑎᑕᐅᕗᖅ ᓴᓐᖏᑦᑑᓪᓗᓂ ᐊᑑᑎᒃᓴᖃᖏᒻᒪᑦ. 19(ᐱᖁᔭᑦ ᓈᒻᒪᒃᓯᑎᑦᓯᔪᓐᓇᖏᒻᒪᑕ), ᓂᕆᐅᒃᕕᒃᓴᖃᑦᓯᐊᕐᓇᕐᓂᕐᓴᒥᒡᓕ ᐱᕕᒃᓴᕐᑖᕐᑎᑕᐅᓯᒪᕗᒍᑦ, ᑕᒪᑐᒨᓇᓗ ᒎᑎᒧᑦ ᖃᓂᒡᓕᑎᑕᐅᓪᓗᑕ.

20ᒎᑎᓗ ᐅᖃᕕᒡᓗᓂ ᐊᖏᒻᒪᕆᒍᑎᖃᕐᓯᕗᖅ ᑍᒤᑦᑐᒥᒡᓕ ᐊᖏᒻᒪᕆᒃᑐᖃᕐᐸᓚᐅᓐᖏᓚᖅ ᑐᓂᕐᕈᓯᕐᑎᑦᓯᔩᑦ ᑎᓕᔭᐅᓕᕐᑎᓪᓗᒋᑦ, 21#ᐃᓐᖏᕈᑦ 110:4.ᔩᓱᓯᓕ ᑐᓂᕐᕈᓯᕐᑎᑦᓯᔨᓐᖑᓚᐅᕐᐳᖅ ᐊᖏᒻᒪᕆᖕᓂᕐᒥᒃ ᐃᓚᖃᕐᑎᓪᓗᒍ ᒎᑎᐅᑉ ᐅᖃᐅᑎᓚᐅᕐᒪᒍ:

“ᐊᑕᓂᖅ ᐊᖏᒻᒪᕆᒍᑎᖃᕐᐳᖅ

ᐃᓱᒪᓂᓗ ᓴᖑᑎᓐᓂᐊᕋᓂᐅᒃ:

‘ᑐᓂᕐᕈᓯᕐᑎᑦᓯᔨᐅᓂᐊᕐᐳᑎᑦ ᐃᓱᖃᖏᑦᑐᒧᑦ.’”

22ᑕᒪᑐᒨᓇ ᐊᖏᒻᒪᕆᖕᓂᕐᒧᑦ, ᔩᓱᓯ ᖁᓚᕐᓇᖏᑦᓯᐊᕐᑐᒥᒃ ᐱᐅᓂᕐᓴᒥᒡᓗ ᐊᖏᖃᑎᒌᒍᑕᐅᓯᒪᓂᖃᓕᕐᐳᖅ.

23ᑐᓂᕐᕈᓯᕐᑎᑦᓯᔨᐅᓚᐅᕐᑐᓪᓕ ᐅᓄᕐᑑᕗᑦ, ᑐᖂᑉ ᐱᓇᓱᐊᖏᓐᓇᕈᓐᓇᕐᑎᓚᐅᖏᒻᒪᒋᑦ. 24ᔩᓱᓯᓕ ᑐᓂᕐᕈᓯᕐᑎᑦᓯᔨᐅᕗᖅ ᑕᐅᕗᖓᓕᒫᖅ, ᐃᓅᑦᓮᓐᓇᕋᒥ ᐃᓱᖃᖏᑦᑐᒧᑦ. 25ᑍᒤᒻᒪᑦ ᑖᑦᓱᒨᓇ ᒎᑎᒧᐊᕐᑐᑦ ᑕᒪᕐᒥᒃ ᐱᐅᓕᔪᓐᓇᑦᓯᐊᕐᐰᑦ, ᐃᓅᑦᓮᓐᓇᕋᒥ ᐃᓱᖃᖏᑦᑐᒧᑦ ᑐᒃᓯᐅᑦᔩᓐᓇᕐᓗᓂ ᑖᒃᑯᓂᖓ.

26ᑍᒤᑦᑐᒥᒃ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᕆᔭᑦᑎᓐᓄᑦ ᑭᓐᖒᒪᒋᔭᑦᑎᓐᓂᒃ ᐱᑎᑕᐅᕗᒍᑦ ᑖᑦᓱᒧᖓ ᐃᑦᔪᕐᓁᑦᑐᒧᑦ, ᐸᓯᔭᒃᓴᐅᓂᖃᖏᑦᑐᒥᑦ, ᓴᓗᒪᑦᓯᐊᕐᑐᒥᑦ, ᐊᔪᕐᑐᓕᔪᓄᑦ ᐃᓚᒋᔭᐅᖏᑦᑐᒥᑦ, ᕿᓔᑦ ᐅᖓᑖᓄᑦ ᖁᒻᒧᐊᒃᑎᑕᐅᓯᒪᔪᒥᑦ. 27#ᒨᓯᓯ ᐱᖓᔪᖏᑦ 9:7.ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑲᐅᓯᒪᔪᑎᑐᑦ ᑍᒤᖏᑦᑐᒥᒃ, ᖃᐅᑕᒫᑦ ᑐᓂᕐᕈᓯᖃᑦᑕᕆᐊᖃᖏᑦᑐᒥᒃ, ᓯᕗᓪᓕᕐᒥᒃ ᓇᖕᒥᓂᖅ ᐊᔪᕐᓂᓂ ᐱᑦᔪᑎᒋᓗᒋᑦ ᑐᓂᕐᕈᓯᕐᐸᓚᐅᕐᑐᑎᑐᑦ, ᑭᖑᕐᖓᒍᑦ ᐃᓄᐃᑦ ᐊᔪᕐᓂᖏᑦ ᐱᑦᔪᑎᒋᓕᕐᓗᒋᑦ. ᐊᑕᐅᓯᐊᕐᓗᓂᓕ ᑐᓂᕐᕈᓯᓚᐅᕐᐳᖅ ᐊᔪᕐᓃᑦ ᐱᓪᓗᒋᑦ ᐃᒻᒥᓂᒃ ᑐᓂᕐᕈᑎᒋᓪᓗᓂ. 28ᐱᖁᔧᑦ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᕈᕐᑎᑦᓯᕙᓚᐅᕐᐳᑦ ᐃᓄᖕᓂᒃ ᓴᓐᖐᑦᑐᓂᒃ; ᒎᑎᐅᓪᓕ ᐅᖃᕕᒡᓗᓂ ᐊᖏᒻᒪᕆᒍᑎᖓ, ᐱᖁᔧᑦ ᑭᖑᓂᖓᑦᑎᒍᑦ ᐱᒋᐊᕐᑕᐅᔪᖅ, ᐃᕐᓂᕐᒥᒃ ᑎᓕᓯᓚᐅᕐᐳᖅ, ᓈᒻᒪᒃᓯᑎᑕᐅᓯᒪᔪᒥᒃ ᐃᓱᖃᖏᑦᑐᒧᑦ.

Currently Selected:

ᐄᑉᕈᐃᓄᑦ 7: EAIB

Highlight

Compare

Copy