ᐄᑉᕈᐃᓄᑦ 3
3
ᔩᓱᓯ ᐱᓪᓚᕆᐅᓂᕐᓴᐅᕗᖅ ᒨᓯᓯᒥᑦ
1ᑍᒤᒻᒪᑦ, ᐅᒃᐱᖃᑎᕗᑦ ᐃᑦᔪᕐᓁᑦᑐᓯ, ᒎᑎᒧᑦ ᕾᖁᔭᐅᖃᑕᐅᓯᒪᔪᓯ, ᔩᓱᓯ ᐃᓱᒪᒋᓚᐅᕐᓯᐅᒃ, ᐋᐴᓯᑕᓕᐅᔪᖅ ᑐᓂᕐᕈᓯᕐᑎᑦᓯᔨᓄᓪᓗ ᐊᖓᔪᖅᑳᖑᓪᓗᓂ ᐅᒃᐱᕐᓂᑦᑎᓐᓄᑦ. 2#ᒨᓯᓯ ᓯᑕᒪᖏᑦ 12:7.ᓱᖁᓯᔪᐃᑦᑑᓚᐅᕐᐳᖅ ᑎᓕᔨᒋᓯᒪᔭᒥᓄᑦ, ᒨᓯᓯᑕᐅᖅ ᓱᖁᓯᔪᐃᑦᑑᓚᐅᕐᒪᑦ ᐱᓇᓱᐊᕐᑕᒥᓂᒃ ᒎᑎᐅᑉ ᐃᒡᓗᖓᓂ. 3ᐃᒡᓗᓕᐅᕐᑐᖅ ᐅᐱᒋᔭᐅᓂᕐᓴᐅᓲᖑᕗᖅ ᐃᒡᓗᓕᐊᕆᔭᒥᓂᑦ ᑍᒫᒃᑕᐅᖅ ᔩᓱᓯ ᓂᕐᑐᕐᑕᐅᓂᕐᓴᐅᓚᐅᕐᐳᖅ ᒨᓯᓯᒥᑦ. 4ᐃᒡᓗᓕᒫᑦ ᓴᓇᔨᖃᓲᖑᕗᑦ ᐃᓄᖕᒥᒃ, ᓱᓇᓕᒫᓂᒡᓕ ᓴᓇᓯᒪᔪᖅ ᑕᕝᕙ ᒎᑎ. 5ᒨᓯᓯ ᓱᖁᓯᔪᐃᑦᑑᓚᐅᕐᐳᖅ ᒎᑎᐅᑉ ᐃᒡᓗᖓᓂ ᐱᔨᐅᓪᓗᓂ, ᓇᓗᓁᕐᓯᓪᓗᓂ ᑭᖑᕐᖓᒍᑦ ᐅᖃᐅᓯᕆᔭᐅᔪᒫᕐᑐᓂᒃ, 6᙭ᔅᑑᓯᓕ ᓱᖁᓯᔪᐃᑦᑑᕗᖅ ᐃᕐᓂᐅᓪᓗᓂ ᐊᖓᔪᖅᑲᐅᔪᖅ ᒎᑎᐅᑉ ᐃᒡᓗᖓᓄᑦ. ᐅᕙᒍᑦ ᑖᑦᓱᒪ ᐃᒡᓗᒋᕚᑎᒍᑦ ᓴᐱᖏᑦᔪᑎᒃᓴᖅ ᓂᕆᐅᖕᓂᕐᓗ ᓂᕐᑐᕐᓇᐅᑎᒋᔭᕗᑦ ᐱᓯᒤᓐᓇᕐᓂᐊᕈᑦᑎᒍᑦ ᐃᓱᐊᓄᑦ.
ᒎᑎᐅᑉ ᐃᓄᖁᑎᖏᑕ ᑕᕾᕐᓯᕐᕕᒃᓴᖓ
7 #
ᐃᓐᖏᕈᑦ 95:7-11. ᑍᒤᒻᒪᑦ, ᐊᓂᕐᓂᖅ ᐃᑦᔪᕐᓁᑦᑐᖅ ᐅᖃᕐᓯᒪᕗᖅ,
“ᐅᓪᓗᒥ ᓂᐱᖓ ᑐᓴᕈᑦᓯᐅᒃ,
8ᓯᑎᔫᒐᓱᐊᕐᑍᓕᒋᑦᓯ ᐊᑭᕋᕐᑐᓚᐅᕐᑐᑎᑐᑦ,
ᓱᓇᖃᔪᐃᑦᑐᒥ ᐆᒃᑐᐃᓚᐅᕐᑐᑎᑐᓪᓗ ᒎᑎᒥᒃ.
9ᑕᕝᕙᓂ ᓯᕗᓕᕕᓂᑦᓯ ᐆᒃᑐᓚᐅᕐᒪᖓ ᖃᐅᔨᓴᕐᓗᖓᓗ
ᐱᓇᓱᐊᕐᓂᑲ ᑕᑯᓚᐅᕐᐰᑦ ᐊᕐᕌᒍᓂᒃ 40ᓂᒃ.
10ᑍᒤᒻᒪᑦ ᐃᓅᖃᑎᒌᑦ ᑖᒃᑯᐊ ᓂᓐᖓᐅᑎᓚᐅᕐᐸᒃᑲ,
ᐅᖃᕐᓗᖓᓗ, ‘ᐃᓱᒪᖏᑦ ᑕᒻᒪᕐᓯᒤᓐᓇᕐᐳᑦ;
ᐱᖁᔭᒃᑲᓗ ᖃᐅᔨᓇᓱᓚᐅᓐᖏᓔᑦ.’
11ᑍᒤᒻᒪᑦ ᓂᓐᖓᒡᓗᖓ ᐅᖃᕕᓚᐅᕐᐳᖓ,
‘ᑕᕾᕐᓯᕐᕕᐅᖁᔭᓐᓄᑦ ᐃᑎᕐᑐᖃᑦᔮᓐᖏᓚᑦ.’”
12ᑲᒪᑦᓯᐊᕆᑦᓯ ᐅᒃᐱᖃᑎᒃᑲ, ᓇᓪᓕᓯ ᐃᓱᒪᖃᕐᑍᓕᓕ ᐱᐅᖏᑦᑐᒥᒃ, ᐅᒃᐱᖏᑦᑐᒥᒡᓗ ᒎᑎ ᑐᖁᓱᐃᑦᑐᖅ ᓈᓚᒍᓐᓃᕐᓗᒍ ᐱᔪᒥᒃ. 13ᖃᐅᑕᒫᓪᓕ ᐃᓕᑦᓯᓐᓄᑦ ᐃᑲᔪᕐᑎᒌᓕᕆᑦᓯ, ᐅᓇ ᐅᖃᐅᓯᐅᓂᖓᓂ, “ᐅᓪᓗᒥ,” ᓇᓪᓕᑦᓯᓐᓂᒃ ᓯᑎᔫᑎᑕᐅᔪᖃᖁᓇᒍ ᐊᔪᕐᓂᐅᑉ ᑕᒻᒪᕐᑎᑦᓯᓂᖓᓄᑦ. 14᙭ᔅᑑᓯ ᐱᓇᓱᐊᖃᑎᒋᒐᑦᑎᒍᑦ, ᐱᒋᐊᓕᕐᓗᑕ ᑕᑎᖃᕐᓂᕆᓚᐅᕐᑕᕗᑦ ᑲᔪᓯᑎᓐᓂᐊᑐᐊᕈᑦᑎᒍᑦ ᐃᓱᐊᓄᑦ.
15 #
ᐃᓐᖏᕈᑦ 95:7,8. ᑕᕝᕙ ᐃᒫᒃ ᐅᖃᕐᓯᒪᕗᖅ,
“ᐅᓪᓗᒥ ᓂᐱᖓ ᑐᓴᕈᑦᓯᐅᒃ,
ᐱᔭᕐᓂᖏᑦᑑᒐᓱᐊᕐᑍᓕᒋᑦᓯ ᐊᑭᕋᕐᑐᓚᐅᕐᑐᑎᑐᑦ.”
16 #
ᒨᓯᓯ ᓯᑕᒪᖏᑦ 14:1-35. ᑭᓇᒃᑰᓚᐅᕐᐸᑦ ᑍᒃᑯᐊ ᑐᓴᓚᐅᕐᑐᑦ ᐊᑭᕋᕐᑐᓚᐅᕐᑐᓪᓗ? ᑖᒃᑯᐊᖑᓐᖏᓛᑦ ᒨᓯᓯᐅᑉ ᐄᑦᔨᑉᑎᒥᑦ ᐊᐅᓪᓚᕈᑎᓚᐅᕐᑕᓕᒫᖏᑦ? 17ᑭᓇᒃᑯᓐᓄᓪᓕ ᒎᑎ ᓂᓐᖓᐅᒪᓚᐅᕐᐸ ᐅᑭᐅᓂᒃ 40ᓂᒃ? ᑖᒃᑯᓄᖓᐅᓐᖏᓛᖅ ᐊᔪᕐᑐᓕᓚᐅᕐᑐᓄᑦ, ᑐᖁᑎᑕᐅᓚᐅᕐᑐᓄᑦ ᓱᓇᖃᔪᐃᑦᑐᒥ? 18ᑭᓇᒃᑯᓐᓄᓪᓗ ᐅᖃᕕᓚᐅᕐᐸ ᑕᕾᕐᓯᕐᕕᐅᖁᔭᒥᓄᑦ ᐃᑎᕐᑐᖃᑦᔮᖏᓐᓂᕅᓪᓗᓂ, ᑖᒃᑯᓄᖓᐅᓐᖏᓛᖅ ᓈᓚᓚᐅᖏᑦᑐᓄᑦ? 19ᑕᕝᕙ ᑕᑯᕗᒍᑦ ᓄᓇᒃᓴᒥᓄᑦ ᐃᑎᕈᓐᓁᓕᓚᐅᕐᒪᑕ ᐅᒃᐱᖏᓐᓂᕐᒧᑦ.
Currently Selected:
ᐄᑉᕈᐃᓄᑦ 3: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
