ᐄᑉᕈᐃᓄᑦ 4
4
1ᑍᒤᒻᒪᑦ, ᒎᑎᐅᑉ ᐊᖏᕐᕕᒋᓯᒪᕚᑎᒍᑦ ᑕᕾᕐᓯᕐᕕᒃᓴᖃᖁᓪᓗᑕ, ᐊᑏ ᑲᒪᑦᓯᐊᓕᕐᑕ ᐊᖏᕈᑕᐅᓯᒪᔪᒧᑦ ᓇᓪᓕᑦᓯᓐᓂᒃ ᐃᑎᕐᑎᑕᐅᔪᓐᓁᓪᓕᔪᖃᖁᓇᒍ. 2ᐅᕙᒍᑦᑕᐅᖅ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᑐᓴᕐᑎᑕᐅᓯᒪᒐᑦᑕ ᑍᒃᑯᑎᑐᓇᖅ; ᑍᒃᑯᐊᓕ ᑐᓴᕐᑕᒥᖕᓂᒃ ᐱᕙᓪᓕᕈᑎᖃᓚᐅᓐᖏᓚᑦ, ᑐᓴᕐᑎᓪᓗᒋᑦ ᐃᓚᓕᐅᕐᓯᓚᐅᖏᒻᒪᑕ ᐅᒃᐱᕐᓂᑯᑦ. 3#ᐃᓐᖏᕈᑦ 95:11.ᐅᕙᒍᓪᓕ ᐅᒃᐱᓚᐅᕐᑐᒍᑦ ᑕᕾᕐᓯᕐᕕᒃᓴᒧᑦ ᑕᕝᕗᖓ ᐃᑎᕐᓯᒪᕗᒍᑦ, ᐅᖃᕐᓯᒪᖕᒪᑦ,
“ᓂᓐᖓᒡᓗᖓ ᐅᖃᕕᓚᐅᕐᐳᖓ,
‘ᑖᒃᑯᐊ ᑕᕾᕐᓯᕐᕕᐅᖁᔭᓐᓄᑦ ᐃᑎᕐᑐᖃᑦᔮᓐᖏᓚᑦ,’”
ᑍᒫᒃ ᐅᖃᓚᐅᕐᐳᖅ ᐱᓇᓱᐊᕐᓂᖓ ᐱᔭᕇᕐᓯᒪᒐᓗᐊᕐᑎᓪᓗᒍ ᑍᒪᓐᖓᓂᑦ ᓯᓚᕐᔪᐊᑉ ᐱᓐᖑᕐᑎᑕᐅᓕᕐᓂᖓᓂᑦ. 4#ᒨᓯᓯ ᓯᕗᓪᓖᑦ 2:2.ᐅᖃᕐᓯᒪᖕᒪᑦ ᐅᓪᓗᐃᑦ 7ᖓᓐᓂᒃ ᐱᑦᔪᑎᓕᖕᒥᒃ, “ᒎᑎᓗ ᑕᕾᕐᓯᓚᐅᕐᐳᖅ ᐅᓪᓗᐃᑦ 7ᖓᓐᓂ ᓴᓇᔭᒥᓂᑦ ᑕᒤᓐᓂᑦ.” 5#ᐃᓐᖏᕈᑦ 95:11.ᑕᕝᕙᓂᑦᑕᐅᖅ ᐅᖃᓯᒪᒋᕗᖅ, “ᑕᕾᕐᓯᕐᕕᐅᖁᔭᓐᓄᑦ ᐃᑎᕐᑐᖃᑦᔮᓐᖏᓚᖅ.” 6ᑖᒃᑯᐊ ᑐᓴᕐᑎᑕᐅᖅᑳᓚᐅᕐᑐᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐃᑎᖁᔭᐅᓚᐅᓐᖏᓚᑦ ᑕᕾᕐᓯᕐᕕᖕᒧᑦ ᓈᓚᓚᐅᖏᒻᒪᑕ, ᐊᓯᖏᓪᓕ ᓱᓕ ᐃᑎᕐᕕᒃᓴᖃᕐᑎᑕᐅᕗᑦ. 7#ᐃᓐᖏᕈᑦ 95:7,8.ᓱᓕᓕ ᐱᕕᒃᓴᖃᕐᑎᑦᓯᒃᑲᓐᓂᓚᐅᕐᐳᖅ ᐅᓪᓘᑉ ᐊᓯᐊᓂᒃ ᑍᔭᐅᔪᒥᒃ “ᐅᓪᓗᒥ,” ᐅᖃᓚᐅᕐᐳᖅ ᑍᕕᑎᒃᑯᑦ ᐊᑯᓂᐅᓕᕐᑎᓪᓗᒍ, ᐅᖃᐅᓯᐅᔭᕇᕐᓯᒪᔪᖅ:
“ᐅᓪᓗᒥ ᓂᐱᖓ ᑐᓴᕈᑦᓯᐅᒃ,
ᐱᔭᕐᓂᖏᑦᑑᒐᓱᐊᕐᑍᓕᒋᑦᓯ.”
8 #
ᒨᓯᓯ ᑕᓪᓕᒪᖏᑦ 31:7; ᔮᓱᐊ 22:4. ᔮᓱᐊᓪᓕ ᐃᓄᐃᑦ ᑕᕾᕐᓯᕐᕕᖕᒧᐊᕐᑎᓚᐅᕐᐸᒋᑦ, ᒎᑎ ᐅᖃᒃᑲᓐᓂᕋᔭᓚᐅᓐᖏᓚᖅ ᐅᓪᓗᒃᑲᓐᓂᐅᔪᒫᕐᑐᒥᒃ. 9ᑍᒤᒻᒪᑦ, ᓱᓕ ᑕᕾᕐᓯᕐᕕᒃᓴᕐᑕᖃᕐᐳᖅ ᓴᐸᑎᑎᑐᑦ ᒎᑎᐅᑉ ᐃᓄᖁᑎᖏᓐᓄᑦ. 10#ᒨᓯᓯ ᓯᕗᓪᓖᑦ 2:2.ᓇᓪᓕᐊᑦ ᒎᑎᐅᑉ ᑕᕾᕐᓯᕐᕕᐅᖁᔭᖓᓄᑦ ᐃᑎᕐᑐᖅ ᑕᕾᕐᓯᕐᓂᐊᕐᐳᖅ ᐱᓇᓱᐊᕐᓂᕐᒥᓂᑦ ᒎᑎᑦᑕᐅᖅ ᑕᕾᕐᓯᓚᐅᕐᒪᑦ ᐱᓇᓱᐊᕐᓂᕐᒥᓂᑦ. 11ᑍᒤᒻᒪᑦ ᐱᓇᓱᐊᒻᒪᕆᓕᕐᑕ ᑕᕾᕐᓯᕐᕕᖕᒧᑦ ᑕᕝᕗᖓ ᐃᑎᕈᓐᓇᖁᓪᓗᑕ, ᓇᓪᓕᐊᓐᓂᒃ ᐃᑎᕈᓐᓁᓕᔪᖃᖁᓇᒍ ᓈᓚᖏᓐᓂᕐᒧᑦ ᑍᒃᑯᑎᑐᓇᖅ.
12ᒎᑎᐅᑉ ᐅᖃᐅᓯᖓ ᐆᒪᖕᒪᑦ ᐱᓇᓱᐊᕐᓗᓂᓗ, ᐃᒡᓗᒃᑐᑦ ᑮᓇᓕᖕᒥᑦ ᓴᕕᒡᔪᐊᒥᑦ ᐃᐱᖕᓂᕐᓴᐅᓪᓗᓂ, ᑭᓪᓕᒍᑎᔪᓐᓇᕐᐳᖅ ᑕᕐᓂᖅ ᐊᓂᕐᓂᕐᓗ ᑎᑭᓪᓗᒋᒃ, ᓇᒡᒍᐊᓪᓗ ᐸᑎᕐᓗ ᑎᑭᓪᓗᒋᒃ, ᓴᖅᑭᑎᑦᓯᔪᓐᓇᕐᓗᓂᓗ ᐃᓅᑉ ᐃᓱᒪᖓᓂᒃ ᐱᔪᒪᔭᖏᓐᓂᒡᓗ. 13ᑖᑦᓱᒪ ᓵᖓᓂ ᐱᓐᖑᕐᑎᑕᐅᓯᒪᔪᒥᒃ ᐃᔨᕐᓯᒪᔪᖃᓐᖏᓚᖅ, ᑕᒪᕐᒥᒃ ᓴᖅᑭᔮᑦᓯᐊᕐᐳᑦ ᑕᑯᒃᓴᐅᑦᓯᐊᕐᓗᑎᒃᓗ ᑖᑦᓱᒪ ᐃᔨᖏᒃᑕ ᓵᖓᓂ. ᑖᑦᓱᒧᖓ ᐅᕙᑦᑎᓐᓂᒃ ᐅᖃᐅᓯᕆᔭᕆᐊᖃᕐᐳᒍᑦ.
ᔩᓱᓯᐅᑉ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᕐᔪᐊᖑᓂᖓ
14ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᕐᔪᐊᖃᕋᑦᑕ ᒎᑎᐅᑉ ᓇᔪᒐᖓᓄᑦ ᐂᓯᒪᔪᒥᒃ ᔩᓱᓯᒥᒃ, ᒎᑎᐅᑉ ᐃᕐᓂᖓᓂᒃ, ᐅᒃᐱᕐᓂᕗᑦ ᑎᒍᒥᐊᑦᓯᐊᕐᓚᕗᑦ. 15ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᖃᖏᓐᓇᑦᑕ ᐃᓚᑦᓱᒍᓱᒍᓐᓇᖏᑦᑐᒥᒃ ᓴᓐᖐᓐᓂᑦᑎᓐᓂᒃ, ᐃᓘᓐᓈᒍᓪᓕ ᖃᓄᑐᐃᓐᓇᖅ ᐱᐅᓐᖏᑦᑐᒧᑦ ᐱᔪᒥᓵᕐᑕᐅᓯᒪᕗᖅ ᐅᕙᑦᑎᑐᑦ, ᐊᔪᕐᑐᓕᓚᐅᕋᓂᓕ. 16ᑍᒤᒻᒪᑦ ᓯᕘᕋᖏᓪᓗᑕ ᐃᒃᓯᕙᐅᑕᕐᔪᐊᖅ ᖃᒡᓕᓕᕐᓚᕗᑦ ᐱᑦᓯᐊᕐᕕᐅᓂᖅ, ᑕᕝᕙᓂ ᓂᑲᒋᔭᐅᖁᓪᓗᑕ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓄᓪᓗ ᐃᑲᔪᕐᑕᐅᖁᓪᓗᑕ ᐃᑲᔪᕐᑕᐅᔭᕆᐊᖃᕐᓂᕗᑦ ᒪᓕᒡᓗᒍ.
Currently Selected:
ᐄᑉᕈᐃᓄᑦ 4: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
