ᐄᑉᕈᐃᓄᑦ 11
11
ᐅᒃᐱᕐᓂᖃᕐᓂᖅ
1ᐅᒃᐱᕐᓂᖅ ᖁᓚᖏᓐᓂᐅᕗᖅ ᓂᕆᐅᒋᔭᒃᓴᓂᒃ, ᓱᓕᔪᕐᓴᕐᓂᐅᓪᓗᓂᓗ ᑕᑯᒃᓴᐅᖏᑦᑐᓂᒃ. 2ᐅᒃᐱᕐᓂᑯᑦ ᓯᕗᓪᓕᐅᓚᐅᕐᑐᑦ ᒎᑎᒧᑦ ᓈᒻᒪᒋᔭᐅᔪᒥᒃ ᐃᓅᓯᖃᕐᓂᕋᕐᑕᐅᕗᑦ.
3 #
ᒨᓯᓯ ᓯᕗᓪᓖᑦ 1:1; ᐃᓐᖏᕈᑦ 33:6,9; ᔪᐊᓇᓯ 1:3. ᐅᒃᐱᕐᓂᑯᑦ ᑐᑭᓯᕗᒍᑦ ᓯᓚᕐᔪᐊᖅ ᐱᓐᖑᕐᑎᑕᐅᓯᒪᖕᒪᑦ ᒎᑎᐅᑉ ᐅᖃᐅᓯᖓᓄᑦ, ᑕᑯᒃᓴᐅᔪᑦ ᐱᓐᖑᕐᑎᑕᐅᓯᒪᖕᒪᑕ ᑕᑯᒃᓴᐅᖏᑦᑐᒥᑦ.
4 #
ᒨᓯᓯ ᓯᕗᓪᓖᑦ 4:3-10. ᐅᒃᐱᕐᓂᑯᑦ ᐂᐱᓕ ᒎᑎᒧᑦ ᑐᓂᕐᕈᓯᓚᐅᕐᐳᖅ ᑐᓂᕐᕈᓯᐅᑎᒃᓴᒥᒃ ᐱᐅᒋᔭᐅᓂᕐᓴᒥᒃ ᑬᓂᐅᑉ ᑐᓂᕐᕈᑎᖓᓂᑦ, ᐅᒃᐱᕐᓂᖓᓄᑦ ᐃᓗᐊᕐᑑᓂᕋᕐᑕᐅᕗᖅ, ᒎᑎᐅᓪᓗ ᓈᒻᒪᒋᓚᐅᕐᐹ ᐂᐱᓕᐅᑉ ᑐᓂᕐᕈᑎᖓ; ᐅᒃᐱᕋᒥᓗ ᓱᓕ ᐅᖃᓪᓚᒃᐳᖅ, ᑐᖁᖓᓕᕋᓗᐊᕐᓗᓂ.
5 #
ᒨᓯᓯ ᓯᕗᓪᓖᑦ 5:21-24. ᐅᒃᐱᕐᓂᑯᑦ ᐃᓅᑭ ᕿᓚᓕᐊᕐᑎᑕᐅᓚᐅᕐᐳᖅ ᑐᖁᒥᒃ ᖃᐅᔨᓇᓂ; ᓇᓂᔭᐅᓚᐅᓐᖏᓚᕐᓗ, ᒎᑎᐅᑉ ᐊᐅᓪᓚᕈᑎᓚᐅᕐᒪᒍ. ᕿᓚᓕᐊᕐᑎᑕᐅᓚᐅᕐᑎᓐᓇᒍ ᓇᓗᓁᕐᑕᐅᓯᒪᕗᖅ ᒎᑎᒧᑦ ᖁᕕᐊᒋᔭᐅᓂᖓᓂᒃ. 6ᐅᒃᐱᕐᓂᖃᖏᓪᓗᓂ ᒎᑎᒧᑦ ᖁᕕᐊᒋᔭᐅᓂᖅ ᐊᔪᕐᓇᕕᒃᐳᖅ. ᒎᑎᒧᐊᕈᒪᔪᖅ ᒎᑎᖃᕐᑐᒥᒃ ᐅᒃᐱᕐᑐᒃᓴᐅᕗᖅ ᑖᓐᓇ ᕿᓂᕐᑎᒥᓄᑦ ᐊᑭᓖᔪᓐᓇᕐᒪᑦ.
7 #
ᒨᓯᓯ ᓯᕗᓪᓖᑦ 6:13-22. ᐅᒃᐱᕐᓂᑯᑦ ᓄᐊ, ᒎᑎᒧᑦ ᖃᐅᔨᑎᑕᐅᓕᕋᒥ ᓯᕗᓂᒃᓴᒥᒃ ᓱᓕ ᑕᑯᒃᓴᐅᖏᑦᑐᓂᒃ, ᒎᑎᒥᒃ ᓈᓚᒡᓗᓂ ᐅᒥᐊᕐᔪᐊᕐᒥᒃ ᓴᓇᓚᐅᕐᐳᖅ ᐃᒡᓗᒥᐅᖃᑎᖏᑕ ᐱᐅᓕᔭᐅᕕᒃᓴᖓᓂᒃ; ᑕᒪᑐᒨᓇᓗ ᓯᓚᕐᔪᐊᕐᒥᐅᑦ ᐃᖅᑲᕐᑐᕐᐰᑦ ᑭᖑᕐᖑᑦᔨᑎᑕᐅᓪᓗᓂᓗ ᐃᓗᐊᕐᓯᑎᑕᐅᓂᕐᒥᒃ ᐅᒃᐱᕐᓂᒥᑦ ᐱᔪᒥᒃ. 8#ᒨᓯᓯ ᓯᕗᓪᓖᑦ 12:1-5.ᐅᒃᐱᕐᓂᑯᑦ ᐂᑉᕋᕼᐋᒻ ᓈᓚᓚᐅᕐᐳᖅ ᐊᐅᓪᓚᖁᔭᐅᓕᕋᒥ ᓄᓇᒃᓴᒧᑦ ᑭᖑᕐᖑᑎᔭᒃᓴᒥᓄᑦ; ᐊᐅᓪᓚᓚᐅᕐᐳᖅ ᓇᒧᓐᖓᐅᓂᐊᕐᓂᕐᒥᓂᒃ ᖃᐅᔨᒪᖏᒃᑲᓗᐊᕐᓗᓂ. 9#ᒨᓯᓯ ᓯᕗᓪᓖᑦ 35:27.ᐅᒃᐱᕐᓂᑯᑦ ᓄᓇᖃᓚᐅᕐᐳᖅ ᐊᖏᕈᑕᐅᓯᒪᔪᒥ, ᓄᓇᑐᖃᖃᖏᒃᑲᓗᐊᕐᓗᓂ, ᑐᐱᑐᐃᓐᓇᕐᒥ ᐊᖏᕐᕋᖃᕐᓗᓂ ᐂᓴᑭᓗ ᔧᑯᓗ ᑍᒫᒃ ᐱᓚᐅᕆᕘᒃ, ᑖᒃᑯᐊᒃ ᐊᖏᕈᑕᐅᓯᒪᔪᒥᒃ ᑭᖑᕐᖑᑦᔨᖃᑕᐅᔫᒃ. 10ᐃᒡᓗᒐᓴᖕᓂᒃ ᐅᑕᖅᑭᓚᐅᕐᐳᖅ ᑐᓐᖓᕕᖃᕐᑐᓂᒃ ᐊᐅᓚᑦᔭᒃᑕᐅᔪᓐᓇᖏᑦᑐᓂᒃ ᐃᓪᓗᒃᓴᓕᐊᖑᓯᒪᔪᑦ ᒎᑎᐅᑉ ᐃᓱᒪᒋᔭᖓᓂᒃ ᓴᓇᔭᐅᓯᒪᓪᓗᑎᒃ.
11 #
ᒨᓯᓯ ᓯᕗᓪᓖᑦ 18:11-14; 21:2. ᓵᕋᑦᑕᐅᖅ ᐅᒃᐱᕋᒥ ᓄᑕᕋᒃᓴᕐᑖᕈᓐᓇᕐᓯᓚᐅᕐᐳᖅ, ᓄᑕᕋᕐᑖᕈᓐᓇᕐᓂᖓ ᐊᓂᒍᕐᓯᒪᓕᕋᓗᐊᕐᑎᓪᓗᒍ, ᑖᑦᓱᒪ ᐊᖏᕈᑎᖃᕐᑑᑉ ᐅᒃᐱᕆᔭᒃᓴᐅᓂᖓᓂᒃ ᐃᓱᒪᖃᓚᐅᕋᒥ. 12#ᒨᓯᓯ ᓯᕗᓪᓖᑦ 15:5; 22:17; 32:12.ᑍᒤᒻᒪᑦ ᐊᖑᒻᒥᑦ ᐊᑕᐅᓯᕐᒥᑦ ᑭᑐᕐᖓᕐᑖᑎᑦᓯᔪᓐᓇᕐᓂᖓ ᑐᖁᖓᓕᕐᑐᒥᒃ, ᑭᖑᕚᕐᑖᕈᓐᓇᕐᓯᓯᒪᕗᖅ ᐅᓄᕐᑐᕐᔪᐊᓂᒃ ᐅᓪᓗᕆᐊᑎᑐᑦ ᕿᓚᖕᒥ ᐅᓄᕐᑎᒋᔪᓂᒃ ᓯᐅᖅᑲᑎᑐᓪᓗ ᐃᒪᐅᑉ ᓯᓈᓂᑦᑐᑎᑐᑦ ᓈᓴᒐᒃᓴᐅᓐᖏᑎᒋᔪᓂᒃ.
13 #
ᒨᓯᓯ ᓯᕗᓪᓖᑦ 23:4; ᑯᕉᓂᑲ ᓯᕗᓪᓖᑦ 29:15; ᐃᓐᖏᕈᑦ 39:12. ᑍᒃᑯᐊᓕᒫᑦ ᐅᒃᐱᕐᓂᒃᑰᕐᓗᑎᒃ ᑐᖁᓚᐅᕐᐳᑦ, ᐊᖏᕈᑕᐅᓯᒪᔪᒥᒃ ᐱᓚᐅᕋᑎᒃ, ᐅᖓᓯᒋᔮᓂᓪᓕ ᑭᓯᐊᓂ ᑕᑯᓐᓇᓚᐅᕐᐹᑦ ᖁᕕᐊᓲᑎᒋᓪᓗᒍᓗ, ᓇᓗᓁᕐᓯᓚᐅᕐᐳᓪᓗ ᑕᒫᓂᒥᐅᑕᐅᖏᓐᓂᕐᒥᖕᓂᒃ ᓄᓇᒋᓐᖏᑕᒥᓃᓐᓂᕐᒥᓂᒡᓗ ᑕᕝᕙᓂ ᓄᓇᕐᔪᐊᕐᒥ. 14ᑖᒃᑯᐊ ᑍᒤᑦᑐᒥᒃ ᐅᖃᕐᑐᑦ ᓇᓗᓁᕐᓯᑦᓯᐊᕐᐳᑦ ᓇᖕᒥᓂᖅ ᓄᓇᒋᓪᓚᕆᖕᓂᐊᕐᑕᒥᓂᒃ ᕿᓂᓚᐅᕐᒪᑕ. 15ᓄᓇᒥᖕᓂᒃ ᕿᒪᓚᐅᕐᑕᒥᖕᓂᒃ ᐃᓱᒪᖃᓚᐅᕈᑎᒃ, ᐱᕕᒃᓴᖃᕈᓐᓇᓚᐅᕐᐳᑦ ᐅᑎᕈᓐᓇᕐᓗᑎᒃ. 16ᓄᓇᒥᒡᓕ ᐱᐅᓂᕐᓴᒥᒃ ᐅᐸᒍᒪᔭᖃᓚᐅᕋᒥᒃ, ᑕᕝᕙ ᕿᓚᖕᒦᑦᑐᒥᒃ. ᑍᒤᒻᒪᑦ ᒎᑎᐅᑉ ᑲᓐᖑᓲᑎᒋᓚᐅᓐᖏᓛ, ᐋᖅᑭᒃᓱᐃᓯᒪᒐᒥ ᐃᒡᓗᒐᓴᒡᔪᐊᒃᓴᖏᓐᓂᒃ.
17 #
ᒨᓯᓯ ᓯᕗᓪᓖᑦ 22:1-14. ᐅᒃᐱᕐᓂᑯᑦ ᐂᑉᕋᕼᐋᒻ, ᐃᕐᓂᕐᒥᓂᒃ ᐂᓴᑭᒥᒃ ᑐᓂᕐᕈᓯᕋᓱᐊᓚᐅᕐᐳᖅ, ᒎᑎᒧᑦ ᖃᐅᔨᓴᕐᑕᐅᓪᓗᓂ, ᐊᖏᕐᕕᐅᓯᒪᒐᓗᐊᕐᓗᓂ ᐃᕐᓂᑐᐊᓂ ᑐᓂᕐᕈᓯᐅᑎᑐᐃᓐᓇᕆᐊᖃᓕᓚᐅᕐᐹ. 18#ᒨᓯᓯ ᓯᕗᓪᓖᑦ 21:12.ᐅᖃᐅᑦᔭᐅᓯᒪᒐᓗᐊᕐᓗᓂ, “ᐂᓴᑭᒃᑯᑦ ᑭᖑᕚᒃᓴᑎᑦ ᐱᔪᒫᕐᐳᑦ.” 19ᐃᓱᒪᖃᓚᐅᕋᒥ ᒎᑎ ᑐᖁᖓᔪᓂᑦ ᐊᒡᓛᑦ ᒪᑭᑎᑦᓯᔪᓐᓇᕆᕗᖅ; ᑍᒤᒻᒪᑦ ᐅᖃᐅᓯᕆᔪᓐᓇᕐᐸᕗᑦ, ᑐᖁᒥᑦ ᐃᓛᒃ ᐅᑎᕐᑎᓚᐅᕐᐹ.
20 #
ᒨᓯᓯ ᓯᕗᓪᓖᑦ 27:27-29,39,40. ᐂᓴᑭᑦᑕᐅᖅ ᐅᒃᐱᕐᓂᑯᑦ ᐊᖏᕈᑎᖃᓚᐅᕐᐳᖅ ᔧᑰᓪᓗ ᐄᓴᐅᓪᓗ ᓮᒻᒪᕐᑎᑕᐅᓛᕐᓂᖏᖕᓂᒃ.
21 #
ᒨᓯᓯ ᓯᕗᓪᓖᑦ 48:1-20;
ᒨᓯᓯ ᓯᕗᓪᓖᑦ 47:31. ᔧᑯ ᐅᒃᐱᕐᓂᑯᑦ, ᓮᒻᒪᕐᑎᑦᓯᓚᐅᕐᐳᖅ ᔫᓯᐱᐅᑉ ᐃᕐᓂᖏᖕᓂᒃ ᒪᕐᕉᖕᓂᒃ ᑐᖁᑐᐃᓐᓇᕆᐊᖃᓕᕐᓗᓂ, ᐊᔭᐅᑉᐱᐊᓂ ᐊᔭᑉᐸᒡᕕᒋᓪᓗᓂᐅᒃ ᐅᑯᓪᓗᓂ ᑐᒃᓯᐊᓚᐅᕐᐳᖅ.
22 #
ᒨᓯᓯ ᓯᕗᓪᓖᑦ 50:24,25; ᒨᓯᓯ ᐂᑉᐸᖏᑦ 13:19. ᔫᓯᐱᑦᑕᐅᖅ ᐅᒃᐱᕐᓂᑯᑦ, ᐃᓅᔪᓐᓃᕆᐊᕕᓕᕐᓗᓂ ᐅᖃᐅᑦᔨᓚᐅᕐᐳᖅ ᐃᓴᕆᐊᓕᒥᐅᑦ ᐊᐅᓪᓚᕈᒫᕐᓂᖏᓐᓂᒃ ᐄᑦᔨᑉᑎᒥᑦ, ᐅᖃᐅᑦᔨᓚᐅᕐᐳᕐᓗ ᐃᓗᕕᕐᑕᐅᕕᒋᓛᕈᒪᔭᒥᓂᒃ.
23 #
ᒨᓯᓯ ᐂᑉᐸᖏᑦ 2:2;
ᒨᓯᓯ ᐂᑉᐸᖏᑦ 1:22. ᒨᓯᓯᑕᐅᖅ ᐅᒃᐱᕐᓂᑯᑦ, ᐊᖓᔪᖅᑳᖏᓐᓂᑦ ᐃᕐᓂᐊᖑᕋᑖᕐᑎᓪᓗᒍ ᐃᔨᕐᑐᐊᖑᓚᐅᕐᐳᖅ ᑕᖅᑭᓂᒃ ᐱᖓᓱᓂᒃ, ᑕᑯᓪᓗᒍ ᐱᐅᒋᓗᐊᕋᒥᑦᔪᒃ; ᐊᖓᔪᖅᑳᕐᔪᐊᑉ ᐱᖁᔭᖓᓂᒃ ᒪᓕᖏᒃᑲᓗᐊᕈᑎᒃ ᓯᕘᕋᔪᓐᓃᓚᐅᕐᐴᒃ.
24 #
ᒨᓯᓯ ᐂᑉᐸᖏᑦ 2:10-12. ᒨᓯᓯ ᐃᓄᒻᒪᕆᐅᓕᕋᒥ ᐅᒃᐱᕐᓂᑯᑦ, ᐊᖓᔪᖅᑳᕐᔪᐊᑉ ᐰᕉᑉ ᐸᓂᖓᑕ ᐃᕐᓂᖓᓂᒃ ᑍᔭᐅᔪᒪᔪᓐᓃᓚᐅᕐᐳᖅ, 25ᒎᑎᐅᓪᓕ ᐃᓄᖁᑎᖏᑦᑕ ᐱᑦᓯᐊᕐᑕᐅᖏᓐᓂᖏᓐᓄᑦ ᐃᓚᐅᖔᕈᒪᓚᐅᕐᐳᖅ, ᐊᓐᓂᕆᓂᕐᓴᕆᓪᓗᒍ ᐊᔪᕐᓂᕐᒥᒃ ᖁᕕᐊᓲᑎᖃᕋᓱᐊᕐᓂᕐᒥᑦ ᐊᓂᒍᕐᓴᕅᑦᑐᒥᑦ. 26ᐃᓱᒪᖃᓚᐅᕋᒥ ᐱᑦᓯᐊᕐᑕᐅᖏᓐᓂᖅ ᒥᑕᐅᑕᐅᓂᕐᓗ ᙭ᔅᑑᓯ ᐱᑦᔪᑎᒋᓪᓗᒍ ᐊᖏᓂᕐᓴᒥᒃ ᐊᔪᕐᓴᖏᑦᔪᑎᒃᓴᐅᓇᓱᒋᓪᓗᒍ ᐄᑦᔨᑉᑎᒥᐅᑦ ᐱᖁᑎᕐᔪᐊᖏᓐᓂᑦ, ᓯᕗᓂᒃᓴᒥ ᐊᑭᓕᐅᑕᐅᔪᒫᕐᓂᖅ ᐃᓱᒪᒋᓪᓗᓂᐅᒃ.
27ᐅᒃᐱᕐᓂᑯᑦ ᐄᑦᔨᑉᑎ ᕿᒪᓚᐅᕐᐹ, ᐊᖓᔪᖅᑳᕐᔪᐊᑉ ᓂᓐᖓᐅᒪᓂᖓ ᓯᕘᕋᒋᓇᓂᐅᒃ; ᑕᑯᒃᓴᐅᖏᑦᑐᖅ ᒎᑎ ᑕᑯᓐᓇᕐᑕᒥᑐᑦ ᑍᒤᓪᓗᓂᐅᒃ ᐅᑎᕈᒪᔪᓐᓃᓚᐅᕐᐳᖅ. 28#ᒨᓯᓯ ᐂᑉᐸᖏᑦ 12:21-30.ᐅᒃᐱᕐᓂᑯᑦ ᖄᖏᕐᑕᐅᕕᖕᒥᒃ ᐱᒋᐊᕐᑎᑦᓯᓚᐅᕐᐳᖅ; ᐃᒡᓘᓪᓗ ᐅᒃᑯᐊᖏᑦ ᐊᐅᒃᑎᕐᑕᐅᖁᓪᓗᓂᒋᑦ, ᐃᕐᓂᐊᖑᖅᑳᕐᓯᒪᔪᑦ ᐊᖑᑎᑦ ᑐᖁᑕᐅᖁᓇᒋᑦ ᐃᓴᕆᐊᓕᒥᐅᓂ, ᑐᖁᕅᔭᕐᑐᕐᑐᒧᑦ.
29 #
ᒨᓯᓯ ᐂᑉᐸᖏᑦ 14:21-31. ᐅᒃᐱᕐᓂᑯᑦ ᐃᓴᕆᐊᓕᒥᐅᑦ ᐃᑳᕈᓐᓇᓚᐅᕐᐳᑦ ᐃᒪᒃᑯᑦ ᐊᐅᐸᓗᒃᑕᒃᑯᑦ ᓄᓇᑐᑦ ᐸᓂᕐᑐᒃᑯᑦ ᐃᖏᕐᕋᔪᑎᑐᑦ; ᐄᑦᔨᑉᑎᒥᐅᑦᑕᐅᖅ ᐆᒃᑐᕋᓱᐊᓚᐅᕋᓗᐊᕐᐳᑦ, ᐃᒪᕐᔪᐊᕐᒥᓕ ᐃᐱᓚᐅᕐᐳᑦ.
30 #
ᔮᓱᐊ 6:12-21. ᐅᒃᐱᕐᓂᑯᑦ ᔨᕆᑰᑉ ᐊᕙᓗᕐᔪᐊᖏᑦ ᐅᕐᕈᓚᐅᕐᐳᑦ ᐊᕙᑖᒍᑦ ᑬᕙᑕᐅᓚᐅᖅᑳᕐᓗᑎᒃ ᐅᓪᓗᓂᒃ 7ᓂᒃ. 31#ᔮᓱᐊ 6:22-25; ᔮᓱᐊ 2:1-21.ᐅᒃᐱᕐᓂᑯᑦ ᕅᕼᐋᐱ ᐊᖑᓐᓂᐊᕐᑎ ᑐᖁᑕᐅᖃᑕᐅᓚᐅᓐᖏᓚᖅ ᒎᑎᒥᒃ ᓈᓚᖏᑦᑐᑦ ᑐᖁᑕᐅᓕᕐᑎᓪᓗᒋᑦ, ᐃᓴᕆᐊᓕᒥᐅᑦ ᐃᔨᕋᕐᑐᕐᓗᑎᒃ ᖃᐅᔨᓴᕆᐊᕐᓯᒪᔪᖁᑎᖏᓐᓂᒃ ᑐᓐᖓᓱᒃᑎᑦᓯᓚᐅᕐᓂᖓᓄᑦ.
32 #
ᐃᓗᐊᕐᓮᔩᑦ 6:11—8:32;
ᐃᓗᐊᕐᓮᔩᑦ 4:6—5:31;
ᐃᓗᐊᕐᓮᔩᑦ 13:2—16:31;
ᐃᓗᐊᕐᓮᔩᑦ 11:1—12:7;
ᓴᒧᐃᓕ ᓯᕗᓪᓖᑦ 16:1—ᐊᑕᓃᑦ ᓯᕗᓪᓖᑦ 2:11;
ᓴᒧᐃᓕ ᓯᕗᓪᓖᑦ 1:1—25:1. ᖃᓄᖅ ᓱᓕ ᐅᖃᒃᑲᓐᓂᕆᐊᖃᕐᐳᖔ? ᐱᕕᒃᓴᑭᓗᐊᕐᐳᖓ ᐅᖃᐅᓯᖃᕋᓱᐊᕋᔭᕈᒪ ᒋᑎᐅᓂᒥᒃ, ᐸᕌᒃᒥᒃ, ᓵᒻᓲᓂᒥᒃ, ᔨᑉᑕᒥᒃ, ᑍᕕᑎᒥᒃ ᓴᒧᐃᓕᒥᒡᓗ ᓇᓚᐅᑦᑍᔪᓂᒃᓗ 33#ᑖᓂᐊᓕ 6:1-27.ᐅᒃᐱᕐᓂᑯᑦ ᓵᓚᖃᓚᐅᕐᐳᑦ ᐊᖓᔪᖅᑲᐅᕕᖕᓂᒃ, ᐃᓗᐊᕐᑐᒥᒡᓗ ᐱᓂᐊᕐᓂᖃᓚᐅᕐᐳᑦ, ᐊᖏᕈᑕᐅᓯᒪᔪᓂᒡᓗ ᐱᓚᐅᕐᐳᑦ, ᓔᔧᓪᓗ ᐃᕐᓯᓇᕐᑐᑦ ᖃᓂᖏᑦ ᐃᑦᔭᕈᓯᓚᐅᕐᐰᑦ, 34#ᑖᓂᐊᓕ 3:1-30.ᐃᑯᐊᓚᔪᕐᔪᐊᓂᒡᓗ ᖃᒥᑦᓯᓚᐅᕐᐳᑦ, ᓴᕕᒡᔪᐊᒥᑦ ᐊᓐᓇᓚᐅᕐᐳᑦ, ᓴᓐᖐᓐᓂᕐᒥᑦ ᐱᔪᓐᓇᕐᓂᕐᑖᓚᐅᕐᐳᑦ; ᐅᓇᑕᕐᓂᕐᒥ ᐊᔪᖏᑦᑐᕐᔪᐊᖑᓚᐅᕐᐳᑦ, ᓄᓇᑐᖃᖃᖏᑦᑐᑦ ᐅᓇᑕᕐᑐᒃᓴᖏᑦ ᕿᒫᑎᓪᓗᒋᑦ. 35#ᐊᑕᓃᑦ ᓯᕗᓪᓖᑦ 17:17-24; ᐊᑕᓃᑦ ᐂᑉᐸᖏᑦ 4:25-37.ᐊᕐᓁᑦ ᑐᖁᔨᐊᒥᖕᓂᒃ ᐅᑎᕐᑎᑦᓯᕕᐅᓚᐅᕐᐳᑦ ᒪᑭᑎᑕᐅᓪᓗᑎᒃ.
ᐊᓯᖏᓪᓕ ᒪᓂᑐᐃᓐᓇᓚᐅᕐᐳᑦ ᐊᓐᓇᒋᐊᕐᕕᒃᓴᒥᒃ ᕿᓂᕋᑎᒃ, ᒪᑭᕝᕕᒃᓴᒥᒃ ᐱᐅᓂᕐᓴᒥᒃ ᓂᕆᐅᒋᔭᖃᕋᒥᒃ. 36#ᐊᑕᓃᑦ ᓯᕗᓪᓖᑦ 22:26,27; ᑯᕉᓂᑲ ᐂᑉᐸᖏᑦ 18:25,26; ᔨᕆᒤᐊ 20:2; 37:15; 38:6.ᐃᓚᖏᓪᓕ ᒥᑕᐅᑎᒋᔭᐅᓚᐅᕐᐳᑦ ᑏᒐᕐᑐᕐᑕᐅᓪᓗᑎᒡᓗ, ᐃᓚᖏᓪᓗ ᐊᕐᓵᕐᑑᔭᓄᑦ ᐊᑦᓱᖏᐅᓯᕐᑕᐅᓚᐅᕐᐳᑦ ᑎᒍᔭᐅᓯᒪᕕᖕᒧᐊᕐᑕᐅᓪᓗᑎᒡᓗ. 37#ᑯᕉᓂᑲ ᐂᑉᐸᖏᑦ 24:21.ᐅᔭᖅᑲᓄᑦ ᒥᓪᓗᕐᑕᐅᓚᐅᕐᐳᑦ, ᑭᓪᓘᑎᓄᓪᓗ ᑭᓪᓗᕐᑕᐅᓚᐅᕐᐳᑦ ᒪᕐᕉᓕᔭᐅᓪᓗᑎᒃ, ᓴᕕᒡᔪᐊᒧᓪᓗ ᑐᖁᑕᐅᓚᐅᕐᐳᑦ; ᓇᒧᑐᐃᓐᓈᕐᑎᑕᐅᓚᐅᕐᐳᑦ ᓰᐲᑦ ᒎᑦᓰᓪᓗ ᐊᒥᖏᓐᓂᒃ ᐊᓐᓄᕌᕐᑎᑕᐅᓪᓗᑎᒃ, ᐊᔪᕐᓴᕐᓗᑎᒃ ᐊᑭᕋᕐᑐᕐᑕᐅᓪᓗᑎᒃ, ᐱᑦᓯᐊᕐᑕᐅᓇᑎᒡᓗ; 38ᓄᓇ ᓇᔪᕆᐊᖓ ᐱᐅᒋᔭᐅᖏᓐᓂᕐᓴᐅᓚᐅᕐᐳᖅ; ᑍᒤᒻᒪᑦ ᓄᓇᖃᖏᑦᑐᑎᑐᑦ ᓇᓂᑐᐃᓐᓈᖃᑦᑕᓚᐅᕐᐳᑦ ᓱᓇᖃᔪᐃᑦᑐᒥ ᖃᖅᑲᓂᓗ, ᕾᕈᓱᖕᓂᓗ ᓄᓇᐅᓪᓗ ᖁᖕᓈᖏᓐᓂ ᐃᓂᖃᖃᑦᑕᓚᐅᕐᐳᑦ.
39ᑖᒃᑯᐊᓗ ᑕᒪᕐᒥᒃ, ᐅᒃᐱᕐᓂᑯᑦ ᓵᓚᖃᓚᐅᕐᑐᑦ ᐅᓂᒃᑲᐅᓯᐅᕗᑦ, ᒎᑎᐅᓪᓕ ᐊᖏᕈᑎᒋᓯᒪᔭᖓᓂᒃ ᐱᔪᖃᓚᐅᓐᖏᓚᑦ, 40ᒎᑎᐅᑉ ᐱᐅᓂᕐᓴᒥᒃ ᓯᕗᓂᖓᒍᑦ ᐋᖅᑭᒃᓱᐃᑦᔪᑎᓚᐅᕐᒪᑎᒍᑦ, ᐱᑦᔪᑎᒃᓴᖃᓚᐅᕐᒪᑦ ᐅᕙᒍᑦ ᐃᓚᒋᔭᐅᑎᓪᓗᑕ ᑭᓯᐊᓂ ᑖᒃᑯᐊ ᓈᒻᒪᒃᓯᑎᑕᐅᖁᓪᓗᒋᑦ.
Currently Selected:
ᐄᑉᕈᐃᓄᑦ 11: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
