ᐄᑉᕈᐃᓄᑦ 10
10
1ᐱᖁᔭᓪᓕ ᑕᕐᕋᑐᐃᓐᓇᐅᕗᑦ ᐱᖁᑎᓄᑦ ᐱᐅᔪᓄᑦ ᐱᔪᒫᕐᑐᓄᑦ, ᑕᒪᒃᑯᐊᓪᓚᕆᐅᓇᑎᒃ, ᐊᕐᕌᒍᑕᒫᑦ ᑖᒃᑯᐊᑦᓮᓐᓁᑦ ᑐᓂᕐᕈᑕᐅᕙᓚᐅᕐᐳᑦ, ᓈᒻᒪᑦᓯᐊᕐᑐᒥᒡᓕ ᐃᓅᓯᖃᓕᕐᑎᑦᓯᔪᓐᓇᕋᑎᒃ ᒎᑎᒧᑦ ᖃᒡᓕᒋᐊᕐᑐᓂᒃ. 2ᓈᒻᒪᒃᓯᑎᑕᐅᔪᓐᓇᕈᑎᒃ ᓴᓪᓗᒻᒪᕐᑕᐅᔪᓐᓇᕈᑎᒡᓗ ᐊᔪᕐᓂᕐᒥᖕᓂᑦ ᐃᓗᒥᒍᑦ ᐃᒃᐱᒋᔪᓐᓃᕋᔭᕐᐳᑦ ᐊᔪᕐᓂᕐᒥᖕᓂᒃ, ᑐᓂᕐᕈᓯᖃᑦᑕᕐᓂᖏᓪᓗ ᓄᖅᑲᕋᔭᓚᐅᕐᐳᑦ. 3ᑐᓂᕐᕈᓯᕐᓂᒃᑯᓪᓕ ᐊᔪᕐᓂᕐᒥᒃ ᐃᖅᑬᑎᑕᐅᖃᑦᑕᓚᐅᕐᐳᑦ ᐊᕐᕌᒍᑕᒫᑦ. 4ᐃᒻᒧᓕᐅᕐᑏᓪᓕ ᐊᖑᓴᓪᓗᖏᑕ ᒎᑦᓰᓪᓗ ᐊᐅᖏᓐᓄᑦ ᐊᔪᕐᓃᑦ ᐲᔭᕐᑕᐅᔭᕆᐊᖏᑦ ᐊᔪᕐᓇᒻᒪᕆᒃᐳᑦ.
5 #
ᐃᓐᖏᕈᑦ 40:6-8. ᑍᒤᒻᒪᑦ, ᙭ᔅᑑᓯ ᓯᓚᕐᔪᐊᕐᒧᑦ ᑎᑭᓐᓇᒥ, ᐅᖃᓚᐅᕐᐳᖅ:
“ᐆᒪᔪᐃᑦ ᑐᖁᑕᐅᓂᖏᓐᓂᒃ ᑐᓂᕐᕈᓯᕐᓂᕐᒥᒡᓗ ᐱᔪᒪᓐᖏᓚᑎᑦ,
ᑎᒥᒥᒡᓕ ᐊᑐᐃᓐᓇᕈᐃᓚᐅᕐᐳᑎᑦ ᐅᕙᓐᓄᑦ;
6ᑐᓂᕐᕈᑎᓂᒃ ᐃᑯᐊᓚᔭᒃᓴᓂᒃ ᑐᓂᕐᕈᑎᓂᒡᓗ ᐊᔪᕐᓂᕐᓂᒃ ᐲᔧᑦᔪᑎᒃᓴᓂᒃ ᖁᕕᐊᓲᑎᖃᓐᖏᓚᑎᑦ.
7ᑕᕝᕙ ᐅᖃᕐᐳᖓ, ‘ᒎᑏᒃ ᑕᑯᒋᑦ, ᕾᓚᐅᕐᐳᖓ ᐱᓂᐊᕐᑕᐅᖁᔭᕐᓂᒃ
ᐱᓇᓱᐊᕆᐊᕐᑐᕐᓗᖓ,’ ᐊᒡᓚᖕᓂ ᑍᒫᒃ ᑎᑎᕋᕈᑕᐅᓯᒪᒐᒪ.”
8ᓯᕗᓪᓕᕐᒥᒃ ᐅᖃᕋᒥ, “ᑐᓂᕐᕈᑎᓂᒃ ᐃᑯᐊᓚᔭᒃᓴᓂᒃ ᑐᓂᕐᕈᓯᕐᓂᕐᒥᒡᓗ, ᐆᒪᔪᓂᒡᓗ ᐃᑯᐊᓚᒐᒃᓴᓂᒃ, ᑐᓂᕐᕈᓯᕐᓂᕐᒥᒡᓗ ᐊᔪᕐᓂᕐᓂᒃ ᐲᔧᑦᔪᑎᒃᓴᓂᒃ, ᐱᔪᒪᓐᖏᓚᑎᑦ ᖁᕕᐊᒋᓐᖏᓚᑎᓪᓘᓐᓃᑦ.” ᑕᒪᒃᑯᐊ ᑐᓂᕐᕈᓯᕐᓃᑦ ᒪᓕᒃᑕᐅᑐᐃᓐᓇᕋᓗᐊᕐᑎᓪᓗᒋᑦ ᐱᖁᔭᑎᒍᑦ, 9ᓱᓕ ᐅᖃᒃᑲᓐᓂᕐᐳᖅ, “ᑕᑯᒋᑦ ᕾᓚᐅᕐᐳᖓ ᐱᓂᐊᕐᑕᐅᖁᔭᕐᓂᒃ ᐱᓇᓱᐊᕆᐊᕐᑐᕐᓗᖓ.” ᑕᕝᕙ ᓯᕗᓪᓕᖅ ᐊᑐᕈᓐᓃᕐᑎᓚᐅᕐᐹ ᑭᖑᓪᓕᖅ ᐊᑐᖔᓕᖁᓪᓗᒍ. 10ᑕᕝᕙ ᑖᑦᓱᒪ ᐱᓂᐊᕐᑕᐅᖁᔭᖓᓄᑦ ᓴᓗᒻᒪᕐᑕᐅᕗᒍᑦ ᔩᓱᓯᐅᑉ ᙭ᔅᑑᓯᐅᑉ ᑎᒥᖓᑕ ᑐᓂᕐᕈᑕᐅᓂᖓᓄᑦ ᐊᑕᐅᓯᐊᕐᓗᓂ ᐱᒃᑲᓐᓂᕆᐊᖃᖏᑦᑐᒥᒃ.
11 #
ᒨᓯᓯ ᐂᑉᐸᖏᑦ 29:38. ᑕᒪᕐᒥᒡᓗ ᑐᓂᕐᕈᓯᕐᑎᑦᓯᔩᑦ ᖃᐅᑕᒫᑦ ᐱᖁᔭᐅᓚᐅᕐᐳᑦ ᐱᓇᓱᐊᕆᐊᓕᖕᒥᓂᒃ ᐱᓇᓱᐊᖁᓪᓗᒋᑦ, ᑐᓂᕐᕈᓯᕐᑎᑦᓯᓂᕐᒥᒃ ᑍᒫᑦᓮᓐᓇᖅ ᐱᓇᓱᐊᕐᓗᑎᒃ, ᑖᒃᑯᐊᓕ ᐊᔪᕐᓂᕐᓂᒃ ᐲᕐᓯᔪᓐᓇᖏᒻᒪᕆᒃᐳᑦ. 12#ᐃᓐᖏᕈᑦ 110:1.᙭ᔅᑑᓯᓕ ᐊᑕᐅᓯᐊᕐᓗᓂ ᑐᓂᕐᕈᓯᐅᑎᓚᐅᕐᐳᖅ ᑐᖁᑕᐅᖁᓪᓗᒍ ᐊᔪᕐᓃᑦ ᐱᓪᓗᒋᑦ, ᒫᓐᓇᓕ ᐃᒃᓯᕙᓕᕐᐳᖅ ᒎᑎᐅᑉ ᑕᓕᕐᐱᐊᓂ, 13ᑕᕝᕙᓂ ᐅᑕᖅᑭᓕᕐᐳᖅ ᐆᒥᒋᔨᖏᑕ ᐃᓕᔭᐅᓂᒃᓴᖏᓐᓂᒃ ᐃᑎᒐᖏᓐᓄᑦ ᐃᑯᕐᕋᓕᐅᑦᔭᐅᓗᑎᒃ. 14ᑐᓂᕐᕈᓯᕐᓂᕐᒧᑦ ᐊᑕᐅᓯᕐᒧᑦ ᐃᑦᔪᕐᓁᑎᑕᐅᓂᐊᕐᑐᑦ ᑕᐅᕗᖓᓕᒫᖅ ᓈᒻᒪᒃᓯᑎᓚᐅᕐᐰᑦ.
15ᑕᒪᑐᒥᖓᑦᑕᐅᖅ ᐊᓂᕐᓂᐅᑉ ᐃᑦᔪᕐᓁᑦᑑᑉ ᓇᓗᓁᕐᓯᕕᒋᕚᑎᒍᑦ; ᓯᕗᓪᓕᕐᒥᒃ ᐅᖃᕋᒥ,
16 #
ᔨᕆᒤᐊ 31:33. “ᑕᒪᑦᔭ ᐊᖏᖃᑎᒌᒍᑎᒋᔪᒫᕐᑕᕋ ᑖᒃᑯᓄᖓ
ᐅᓪᓗᐃᑦ ᑕᒪᒃᑯᐊ ᑭᖑᕐᖓᑦᑎᒍᑦ, ᐊᑕᓂᖅ ᐅᖃᕐᐳᖅ:
ᐱᖁᔭᒃᑲ ᐆᒻᒪᑎᖏᓐᓄᑦ ᐱᑎᑦᓱᒪᕙᒃᑲ,
ᐃᓱᒪᖏᓐᓄᓪᓗ ᑎᑎᕋᕈᒪᓪᓗᒋᑦ.”
17 #
ᔨᕆᒤᐊ 31:34. ᐊᒻᒪ ᐅᖃᒃᑲᓐᓂᕐᐳᖅ, “ᐊᔪᕐᓂᖏᑦ ᑕᒻᒪᕐᓂᖏᓪᓗ ᐃᓱᒪᒋᓂᐊᕈᓐᓃᕐᐸᒃᑲ.” 18ᑍᒤᒻᒪᑦ ᑖᒃᑯᐊ ᐊᔪᕐᓂᖏᓐᓂᒃ ᐃᓱᒪᒋᔭᐅᔪᓐᓁᕐᑐᑦ, ᑐᓂᕐᕈᓯᕐᓂᕐᒥᒃ ᐊᔪᕐᓃᑦ ᐲᔭᕐᑕᐅᑦᔪᑎᒃᓴᖏᓐᓄᑦ ᐊᑐᕆᐊᖃᕈᓐᓁᕐᐳᑦ.
ᒎᑎᒧᑦ ᖃᒡᓕᓕᕐᑕ
19ᑍᒤᒻᒪᑦ ᐅᒃᐱᖃᑎᒃᑲ, ᓯᕘᕋᖏᓪᓗᑕ ᐃᑎᕈᓐᓇᓕᕐᐳᒍᑦ ᐃᑦᔪᕐᓁᑦᑐᕕᖕᒧᑦ ᔩᓱᓯᐅᑉ ᐊᐅᖓ ᐊᖅᑯᑎᒋᓗᒍ. 20ᓄᑖᒥᒃ ᐊᖅᑯᓯᓚᐅᕐᒪᑎᒍᑦ ᐃᓅᓯᖃᕐᓇᕐᑐᒥᒡᓗ ᐅᒃᑯᐃᕈᑎᓚᐅᕐᒪᑎᒍᑦ ᑖᓗᑕᕐᔪᐊᒃᑯᑦ, ᑕᕝᕙ ᓇᖕᒥᓂᖅ ᑎᒥᒥᒍᑦ, 21ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᕐᔪᐊᖃᕋᑦᑕ ᒎᑎᐅᑉ ᐃᒡᓗᖓᓂ, 22#ᒨᓯᓯ ᐱᖓᔪᖏᑦ 8:30; ᐃᓯᑭᐊᓕ 36:25.ᑍᒤᒻᒪᑦ ᒎᑎᒧᑦ ᖃᒡᓕᓕᕐᑕ ᐆᒻᒪᑎᑦᑎᒍᑦ ᓱᓕᓂᖃᑦᓯᐊᕐᓗᑕ ᐅᒃᐱᕐᓂᖃᑦᓯᐊᕐᓗᑕ, ᐆᒻᒪᑎᕗᑦ ᓯᕐᐸᕐᓴᕐᕕᐅᓗᑎᒃ#10:22 ᓯᕿᔭᕐᕕᐅᓗᑎᒃ ᐅᕝᕙᓗ ᓯᕐᐸᕐᓴᕕᐅᓗᑎᒃ ᓴᓗᒻᒪᕐᑕᐅᖁᓪᓗᒋᑦ ᐃᓱᒪᒃᑯᑦ ᐱᐅᖏᑦᑐᒥᑦ ᐸᓯᔭᐅᓂᖃᕐᓂᕐᒥᑦ ᑎᒥᕗᓪᓗ ᐅᐊᓴᕐᑕᐅᓗᑎᒃ ᐃᒥᕐᒧᑦ ᓴᓗᒪᑦᓯᐊᕐᑐᒧᑦ. 23ᑍᒫᒃᑕᐅᖅ ᓂᕆᐅᖕᓂᕆᔭᑦᑎᓐᓂᒃ ᐅᖃᕆᒃᓴᐅᑦᔨᓂᕆᔭᕗᑦ ᐊᑕᕕᒌᓐᓇᕐᓚᕗᑦ ᒪᕐᕈᒍᓯᕈᑎᒋᖏᓪᓗᒍ, ᑖᓐᓇ ᐊᖏᕈᑎᒋᓯᒪᔭᒥᓂᒃ ᓴᖑᑎᑦᓯᓂᐅᓴᖏᒻᒪᑦ. 24ᐅᕙᑦᑎᓐᓄᓪᓗ ᑲᒪᒋᑦᓯᐊᖃᑦᑕᐅᑎᓚᐅᕐᑕ ᐃᑲᔪᖃᑦᑕᐅᑎᓗᑕᓗ ᓇᒡᓕᖕᓂᑦᑎᓐᓂᒃ ᓴᖅᑭᑎᑦᓯᖃᑦᑕᐅᑎᓗᑕ ᐱᐅᔪᒥᒡᓗ ᐱᓇᓱᐊᑦᓯᐊᕐᓗᑕ. 25ᑲᑎᒪᖃᑦᑕᕐᓂᕗᑦ ᓄᖅᑲᐅᑎᓂᐊᕐᓇᒋᑦ, ᓄᖅᑲᐅᑦᔨᕙᒃᑐᑎᑐᑦ, ᐅᕙᑦᑎᓐᓄᓪᓕ ᑲᔪᖏᕐᓴᕐᑎᒌᓕᕐᑕ, ᑍᒫᒡᓗ ᐱᔭᕆᐊᖃᓗᐊᓕᕐᐳᒍᑦ ᖃᐅᔨᒪᒐᑦᓯ ᐅᓪᓗᕐᔪᐊᖅ ᖃᒡᓕᓕᕐᒪᑦ.
26ᓱᓕᓂᕐᒥᒃ ᖃᐅᔨᓯᒪᓕᕐᓗᑕ ᐱᔮᕆᓗᑕ ᐊᔪᕐᑐᓕᒍᑦᑕ, ᑕᕝᕙ ᑐᓂᕐᕈᑎᒃᓴᖃᕈᓐᓃᕐᐳᒍᑦ ᐊᔪᕐᓃᑦ ᐲᔭᕐᑕᐅᑦᔪᑎᒃᓴᖏᓐᓄᑦ. 27#ᐂᓮᐊᓯ 26:11.ᓯᕘᕋᓇᕐᑐᕐᔪᐊᒥᒡᓕ ᓯᕗᓂᒃᓴᖃᓕᕐᐳᒍᑦ ᐃᖅᑲᕐᑐᕐᑕᐅᕕᖕᒥᒃ, ᐃᑯᒪᒥᒡᓗ ᑲᑉᐱᐊᓇᕐᑐᕐᔪᐊᒥᒃ ᐊᓯᕈᐃᓂᐊᕐᑐᒥᒃ ᐊᑭᕋᕐᑐᕐᑐᓂᒃ. 28#ᒨᓯᓯ ᑕᓪᓕᒪᖏᑦ 17:6; 19:15.ᓇᓪᓕᐊᑦ ᒨᓯᓯᐅᑉ ᐱᖁᔭᖏᓐᓂᒃ ᒪᓕᖏᑦᑐᖅ ᓂᑲᒋᔭᐅᓇᓂ ᑐᖁᑕᐅᖁᔭᐅᕗᖅ ᖃᐅᔨᓯᒪᔫᒃ ᒪᕐᕉᒃ ᐱᖓᓱᓪᓘᓐᓃᑦ ᓇᓗᓁᕐᓯᓂᖏᑦ ᒪᓕᒡᓗᒋᑦ. 29#ᒨᓯᓯ ᐂᑉᐸᖏᑦ 24:8.ᖃᓄᖅ ᓱᒋᐊᕐᑕᐅᔭᕆᐊᖃᕐᓂᕐᓴᐅᓇᓱᒋᕕᓯᐅᒃ? ᒎᑎᐅᑉ ᐃᕐᓂᖓᓂᒃ ᑐᓪᓕᕋᕐᑐᖅ, ᐊᖏᕈᑕᐅᓯᒪᔫᓪᓗ ᐊᐅᖓᓂᒃ ᓇᕐᕈᓇᕐᓯᑎᑦᓯᔪᖅ ᐃᑦᔪᕐᓁᑎᑕᐅᑦᔪᑎᒋᓚᐅᕐᑕᒥᓂᒃ, ᒥᑕᐅᑎᖃᕐᑐᕐᓗ ᐊᓂᕐᓂᐅᑉ ᐱᔪᓐᓇᕐᓯᑎᑦᓯᓂᖓᓂᒃ? 30#ᒨᓯᓯ ᑕᓪᓕᒪᖏᑦ 32:35; ᒨᓯᓯ ᑕᓪᓕᒪᖏᑦ 32:36.ᖃᐅᔨᒪᒐᑦᑎᒍᑦ ᑖᓐᓇ ᐅᖃᓚᐅᕐᑐᖅ, “ᐊᑭᓂᐊᕐᓂᖅ ᐱᒋᕙᕋ, ᐅᕙᖓ ᐊᑭᓂᐊᕈᒫᕐᐳᖓ.” ᐊᒻᒪ ᐅᖃᕐᒥᔪᖅ, “ᐊᑕᓂᐅᑉ ᐃᓄᖁᑎᓂ ᐃᖅᑲᕐᑐᕈᒫᕐᐰᑦ.” 31ᑲᑉᐱᐊᓇᕐᑐᐊᓘᕗᖅ ᒎᑎᐅᑉ ᑐᖁᓱᐃᑦᑑᑉ ᐊᒡᒐᖏᓐᓄᑦ ᐅᕐᕈᓗᓂ.
32ᐃᖅᑬᓚᐅᕆᑦᓯ ᐊᑐᓚᐅᕐᑕᑦᓯᓐᓂᒃ, ᑍᑦᓱᒪᓂ ᒎᑎᐅᑉ ᖃᐅᒪᓂᖓᓄᑦ ᑐᑭᓯᑎᑕᐅᓯᒪᓕᕐᑎᓪᓗᓯ, ᖃᓄᑐᐃᓐᓈᓗᒃ ᐅᖁᒤᒃᓴᕐᑎᑕᐅᓚᐅᕋᑦᓯ ᐋᓐᓂᐊᑎᑕᐅᓪᓗᓯᓗ, 33ᐃᓚᖓᒍᑦ ᑲᑎᒪᔪᓂ ᒥᑕᐅᑎᒋᔭᐅᖃᑦᑕᓚᐅᕋᑦᓯ ᐱᑦᓯᐊᕐᑕᐅᓇᓯᓗ, ᐃᓛᓯᒍᓪᓗ ᐃᓚᐅᓚᐅᕋᑦᓯ ᑍᒤᑦᑐᑎᒍᑦ ᐊᒃᓱᕈᕐᑎᑕᐅᔪᓄᑦ. 34ᐃᓚᑦᓱᒍᓱᓚᐅᕐᐳᓯᓗ ᑎᒍᔭᐅᓯᒪᕕᖕᒦᑦᑐᓂᒃ, ᐱᖁᑎᑦᓯᓐᓂᒡᓗ ᐊᕐᓵᕐᑕᐅᒐᓗᐊᕋᑦᓯ ᖁᕕᐊᓱᒡᓗᓯ ᐊᑐᕈᓐᓇᓚᐅᕐᐸᓯ, ᖃᐅᔨᒪᒐᑦᓯ ᓇᖕᒥᓂᖅ ᐱᖁᑎᖃᕋᑦᓯ ᐱᐅᓂᕐᓴᒥᒃ ᓄᖑᓐᓂᐊᖏᑦᑐᒥᒡᓗ. 35ᑍᒤᒻᒪᑦ ᓴᐱᓕᕐᑍᓕᒋᑦᓯ ᑕᑎᖃᕐᓂᑦᓯᓐᓂᒃ, ᑕᒪᓐᓇ ᐊᖏᔪᒥᒃ ᐊᑭᓕᕐᑕᐅᓂᒃᓴᖃᕐᒪᑦ. 36ᕿᓄᐃᓵᕆᐊᖃᕐᐳᓯᓕ, ᒎᑎᐅᑉ ᐱᔪᒪᔭᖓᓂᒃ ᐊᑐᕈᓐᓇᖁᓪᓗᓯ ᐊᖏᕈᑕᐅᓯᒪᔪᒥᒡᓗ ᐃᓚᖏᐅᑎᑎᑕᐅᔪᓐᓇᖁᓪᓗᓯ. 37#ᕼᐊᐸᑲ 2:3,4.ᐊᒡᓔᑦ ᐅᖃᕐᒪᑕ,
“ᐊᑯᓂᐅᖏᑦᑐᖅ, ᑎᑭᑦᑐᒃᓴᖅ ᑎᑭᓐᓂᐊᕐᒪᑦ ᑭᖑᕙᕐᓂᐊᕋᓂᓗ;
38ᐃᓗᐊᕐᑐᓕᔪᖁᑎᒐ ᐃᓅᔪᒫᕐᐳᖅ ᐅᒃᐱᕐᓂᕐᒥᓄᑦ,
ᓴᐱᓕᕐᓂᐊᕐᑐᕐᓗ ᑖᓐᓇ,
ᑕᕐᓂᕐᒪ ᖁᕕᐊᓲᑎᒋᓂᐊᓐᖏᓛ.”
39ᐅᕙᒍᓪᓕ ᐃᓚᒋᓐᖏᓚᕗᑦ ᓴᐱᓕᖃᑦᑕᕐᑐᑦ ᓱᒋᐊᕐᑕᐅᔪᒫᓕᕐᑐᓪᓗ, ᐃᓚᒋᕙᕗᓪᓕ ᐅᒃᐱᕐᓂᖃᕐᑐᑦ ᑕᕐᓂᖏᑕ ᐱᐅᓕᔭᐅᑦᔪᑎᒋᔭᖓᓂᒃ.
Currently Selected:
ᐄᑉᕈᐃᓄᑦ 10: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
