ᒐᓔᑎᐊᒥᐅᓄᑦ 1
1
ᐱᒋᐊᕈᑎᑦ
1ᐸᐅᓗᓯᒥᑦ ᐋᐴᓯᑕᓕᓐᖑᕐᑎᑕᐅᓯᒪᔪᒥᑦ ᐃᓄᖕᓂᐅᖏᑦᑐᖅ ᐃᓄᒃᑎᒎᖏᑦᑐᕐᓘᓐᓃᑦ, ᔩᓱᓯ ᙭ᔅᑑᓯᒥᓪᓕ ᒎᑎᒥᓪᓗ ᐊᑖᑕᒥᑦ, ᑖᓐᓇ ᔩᓱᓯᒥᒃ ᒪᑭᑎᑦᓯᓚᐅᕐᑐᖅ ᑐᖁᖓᔪᓂᑦ. 2᙭ᔅᑑᓯᒥᐅᑕᐅᖃᑎᒌᓕᒫᓪᓗ ᓇᔪᕐᑎᒋᔭᒃᑲ, ᐃᓚᒋᓪᓗᒋᑦ ᓂᓪᓕᐅᑦᔨᕗᒍᑦ ᐅᒃᐱᕐᑑᖃᑎᒌᓄᑦ ᒐᓔᑎᐊᒦᑦᑐᓄᑦ:
3ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓄᑦ ᑐᓂᓯᕕᐅᒋᑦᓯ ᓮᓕᑦᓯᐊᕐᓂᕐᒥᒃ ᒎᑎᒥᑦ ᐊᑖᑕᑦᑎᓐᓂᑦ ᐊᑕᓂᕐᒥᓪᓗ ᔩᓱᓯ ᙭ᔅᑑᓯᒥᑦ.
4ᑖᓐᓇ ᐃᒻᒥᓂᒃ ᑐᓂᓚᐅᕐᐳᖅ ᐊᔪᕐᓂᑦᑎᓐᓂᑦ ᐱᐅᓕᔪᒪᓪᓗᑕ ᒫᓐᓇ ᐱᐅᖏᑦᑐᒥᑦ ᐊᑐᕐᑕᑦᑎᓐᓂᑦ, ᒎᑎᐅᑉ ᐊᑖᑕᑦᑕ ᐱᖁᔨᓂᖓᒍᑦ; 5ᑖᓐᓇ ᓂᕐᑐᕐᑕᐅᓕ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. ᐋᒥᓐ.
ᐅᖃᐅᓰᑦ ᑐᓴᕈᒥᓇᕐᑐᑦ ᐊᑕᐅᓯᐅᓂᖓ
6ᑲᒪᓂᐊᕈᑎᒋᕙᑦᓯ ᕿᒤᓯᒪᓕᕇᕋᑦᓯ ᕾᖁᔭᐅᓂᕆᓚᐅᕐᑕᑦᓯᓐᓂᒃ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᐊᓯᖏᓐᓂᒡᓗ ᐅᖃᐅᓯᕐᓂᒃ ᑐᓴᕈᒥᓇᕐᑑᓂᕋᕐᑕᐅᖕᒥᔪᓂᒃ ᐃᓚᓕᐅᕐᓯᓪᓗᓯ. 7ᐅᖃᐅᓰᑦ ᑐᓴᕈᒥᓇᕐᑐᑦ ᐊᓯᖃᓐᖏᒃᑲᓗᐊᕐᑎᓪᓗᒋᑦ, ᐃᓄᖃᑎᑦᓯᓕ ᐃᓚᖏᓐᓄᑦ ᐃᓱᒪᔮᕐᑎᑕᐅᕗᓯ ᙭ᔅᑑᓯᒥ ᑐᓴᕈᒥᓇᕐᑐᑦ ᓇᕐᕈᓇᕐᓯᑎᓐᓇᓱᐊᕐᓗᒋᑦ. 8ᐅᕙᒍᓪᓘᓐᓃᑦ, ᐂᖏᓕᒥᒡᓘᓐᓃᑦ ᕿᓚᖕᒥᑦ ᑎᑭᑦᑐᖃᕐᓗᓂ, ᐊᔪᕆᕐᑐᐃᔪᖃᕋᔭᕐᐸᑦ ᐃᓕᑦᓯᓐᓄᑦ ᐊᔪᕆᕐᑐᐃᑦᔪᑎᒋᓯᒪᔭᑦᑎᓐᓄᑦ ᐊᑭᕋᕐᑐᕐᑐᓂᒃ, ᑍᒫᒃ ᐊᔪᕆᑦᑐᐃᔪᑦ ᐃᒋᑕᒃᓴᓐᖑᕐᑐᒃᓴᐅᕗᖅ. 9ᓯᕗᓂᖓᒍᑦ ᐅᖃᓚᐅᕐᓯᒪᒐᓗᐊᕐᑐᒍᑦ, ᒫᓐᓇ ᐅᖃᒃᑲᓐᓂᓕᕆᕙᕋ, ᐊᔪᕆᕐᑐᐃᔪᖃᕐᐸᑦ ᐅᖃᐅᓯᕐᓄᑦ ᑐᓴᕈᒥᓇᕐᑐᓄᑦ ᐃᓚᓕᐅᓚᐅᕐᑕᑦᓯᓐᓄᑦ ᐊᑭᕋᕐᑐᕐᑐᓂᒃ, ᑖᓐᓇ ᐃᒋᑕᒃᓴᓐᖑᕐᑐᒃᓴᐅᕗᖅ.
10ᑍᒤᓕᐅᕐᐳᖔ ᐃᓄᖕᓄᑦ ᓈᒻᒪᒋᔭᐅᓇᓱᐊᕐᑐᑎᑐᑦ ᒎᑎᒧᓪᓘᓐᓃᑦ ᓈᒻᒪᒋᔭᐅᓇᓱᐊᕐᑐᑎᑐᑦ? ᐃᓄᖕᓂᒡᓘᓐᓃᑦ ᖁᕕᐊᓱᒃᑎᑦᓯᓇᓱᐊᕐᐳᖔ? ᓱᓕ ᐃᓄᖕᓂᒃ ᖁᕕᐊᓱᒃᑎᑦᓯᓇᓱᐊᕋᔭᕈᒪ, ᙭ᔅᑑᓯᒧᑦ ᐱᔨᒋᔭᐅᒐᔭᓐᖏᓚᖓ.
ᐸᐅᓗᓯᐅᑉ ᐋᐴᓯᑕᓕᓐᖑᕐᑎᑕᐅᓯᒪᓂᖓ
11ᖃᐅᔨᒪᖁᕙᑦᓯ, ᙭ᔅᑑᓯᒥᐅᑕᐅᖃᑎᒃᑲ, ᐅᖃᐅᓰᑦ ᑐᓴᕈᒥᓇᕐᑐᑦ ᐊᔪᕆᕐᑐᐃᑦᔪᑎᒋᓯᒪᔭᒃᑲ ᐃᓄᖕᓂᑦ ᐱᒋᐊᕐᑎᑕᐅᓯᒪᓐᖏᓚᑦ. 12ᐃᓄᖕᒥᑦ ᓇᓪᓕᐊᓐᓂᓪᓘᓐᓃᑦ ᐱᓯᒪᓐᖏᓚᒃᑲ, ᐃᓄᖕᒥᓪᓘᓐᓃᑦ ᐊᔪᕆᕐᑐᐃᑦᔪᑕᐅᓚᐅᓐᖏᓚᑦ ᐅᕙᓐᓄᑦ, ᔩᓱᓯ ᙭ᔅᑑᓯᐅᓪᓕ ᑕᑯᑎᑦᓯᑦᔪᑎᒋᓯᒪᕔᑦ ᐅᕙᓐᓄᑦ.
13 #
ᐋᐴᓯᑕᓖᑦ 8:3; 22:4,5; 26:9-11. ᖁᓚᕐᓇᓐᖏᓚᖅ ᑐᓴᐅᒪᒐᑦᓯ ᐃᓅᓯᕆᓚᐅᕐᑕᓐᓂᒃ ᔫᑎᑦ ᐅᒃᐱᕐᓂᖓᓄᑦ ᐃᓚᒋᔭᐅᓪᓚᕆᒃᑎᓪᓗᖓ. ᒎᑎᐅᑉ ᐅᒃᐱᕐᑐᖁᑎᖏᑦ ᐊᑭᕋᕐᑐᓚᐅᕋᒃᑭᑦ ᓂᑲᒋᓇᒋᑦ ᐊᒃᓱᕉᑎᓪᓗᒋᑦ ᓄᖅᑲᕐᑎᓐᓇᓱᓚᐅᕐᐸᒃᑲ; 14#ᐋᐴᓯᑕᓖᑦ 22:3.ᔫᑎᓂᓪᓗ ᑍᒤᓪᓗᐊᖃᑎᒋᔭᓐᓂᑦ ᐃᓕᓯᒪᓂᕐᓴᐅᓚᐅᕐᐳᖓ ᔫᑎᑦ ᐅᒃᐱᕐᓂᖓᓐᓂᒃ, ᓯᕗᓕᕕᓂᑦᑕᓗ ᐅᒃᐱᕐᓂᕐᒥ ᐱᐅᓯᕕᓂᖏᑦ ᓯᕐᓂᒋᓂᕐᓴᕆᓚᐅᕐᐸᒃᑲ.
15 #
ᐋᐴᓯᑕᓖᑦ 9:3-6; 22:6-10; 26:13-18. ᒎᑎᐅᓪᓕ ᓂᕈᐊᕐᓯᒪᓚᐅᕐᐹᖓ ᐃᓅᓕᓚᐅᕐᑎᓐᓇᖓ ᓱᓕ, ᐱᑦᓯᐊᕐᓂᒥ ᐱᔪᓐᓇᕐᑎᑦᓯᓂᕐᒥᒍᑦ ᕾᖁᓚᐅᕐᐹᖓ, 16ᐃᕐᓂᕐᒥᓂᒡᓗ ᖁᕕᐊᓱᒡᓗᓂ ᑕᑯᑎᑦᓱᒪᓚᐅᕐᐹᖓ, ᐊᔪᕆᕐᑐᐃᔪᓐᓇᖁᓪᓗᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᔫᑎᐅᖏᑦᑐᓄᑦ, ᑭᓇᒥᒡᓘᓐᓃᑦ ᑕᒪᑐᒥᖓ ᖃᐅᔨᓇᓱᒡᕕᖃᓚᐅᓐᖏᓚᖓ. 17ᔨᕉᓴᓕᒻᒧᓪᓘᓐᓃᑦ ᐂᖅᑳᓚᐅᓐᖏᓚᖓ ᓯᕗᓪᓕᐅᓪᓗᑎᒃ ᐋᐴᓯᑕᓕᓐᖑᖅᑳᕐᑐᕕᓃᑦ ᑕᑯᔭᕐᑐᕐᓗᒋᑦ, ᐊᕅᐱᐊᒧᐊᓚᐅᕐᐳᖓᓕ; ᑭᖑᓂᖓᒍᓪᓗ ᑕᒫᓯᑰᓯᒧᑦ ᐅᑎᕆᓪᓗᖓ. 18#ᐋᐴᓯᑕᓖᑦ 9:26-30.ᐊᕐᕌᒍᑦ ᐱᖓᓱᑦ ᐊᓂᒍᕐᓯᒪᓕᕐᒪᑕ ᑭᓯᐊᓂ ᔨᕉᓴᓕᒻᒧᑦ ᐂᓕᓚᐅᕐᐳᖓ ᓰᐸᓯᒥᒃ ᐳᓛᕆᐊᕐᓗᖓ, ᓇᔪᓚᐅᕐᐸᕋ ᐅᓪᓗᓂᒃ 15ᓂᒃ. 19ᐋᐴᓯᑕᓕᐅᖃᑎᖏᓐᓂᒃ ᑕᑯᓚᐅᓐᖏᓚᖓ ᔧᒥᓯᐅᑉ ᐊᑕᓂᐅᑉ ᓄᑲᖓᑕ ᐊᓯᐊᓂᒃ.
20ᑎᑎᕋᕐᑕᒃᑲ ᐃᓕᑦᓯᓐᓄᑦ ᒎᑎᐅᑉ ᖃᐅᔨᒪᕔᑦ, ᓴᒡᓗᖏᓐᓇᒪ.
21ᑭᖑᓂᖓᒍᑦ ᑕᕝᕙ ᓯᕆᐊᑉ ᑲᓂᖏᔭᖓᓃᓚᐅᑉᐳᖓ ᓯᓕᓯᐊᓪᓗ ᓄᓇᓕᖏᓐᓄᐊᓕᓚᐅᕐᐳᖓ. 22ᓱᓕ ᑍᑦᓱᒪᓂ ᐅᒃᐱᕐᑑᖃᑎᒌᓄᑦ ᙭ᔅᑑᓯᒥ ᖃᐅᔨᒪᔭᐅᓚᐅᓐᖏᓚᖓ ᔫᑎᐊᒥ. 23ᐅᖃᐅᓯᑐᐃᓐᓇᕐᑎᒍᓪᓕ ᖃᐅᔨᒪᔭᐅᓚᐅᕐᐳᖓ ᐅᖃᕐᑐᖃᖃᑦᑕᓚᐅᕐᒪᑦ, “ᐅᕙᑦᑎᓐᓂᒃ ᐊᑭᕋᕐᑐᓚᐅᕐᑐᖅ ᒫᓐᓇ ᐊᔪᕆᕐᑐᐃᕙᓕᕆᕗᖅ ᐅᒃᐱᕐᓂᕐᒥᒃ ᓄᖅᑲᕐᑎᓐᓇᓱᐊᓚᐅᕐᑕᒥᓂᒃ.” 24ᑍᒤᒻᒪᑦ ᐅᕙᓐᓂᒃ ᐱᑦᔪᑎᖃᕐᓗᑎᒃ ᒎᑎᒥᒃ ᓂᕐᑐᐃᖃᑦᑕᕐᐳᑦ.
Currently Selected:
ᒐᓔᑎᐊᒥᐅᓄᑦ 1: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
