ᐃᓯᑭᐊᓕᐅᑉ ᐊᒡᓚᖏᑦ 45
45
ᐊᑕᓂᐅᑉ ᓄᓇᖁᑎᑖᕐᑎᑕᐅᓂᖓ
1“ᐃᓚᒌᓈᕐᑎᕐᑐᑦ ᓄᓇᖁᑎᑖᕐᑐᓕᕐᐸᑕ ᓴᓂᕐᕔᔪᖃᕆᐊᖃᕐᐳᖅ ᐊᑕᓂᐅᑉ ᓄᓇᖁᑎᒃᓴᖓᓂᒃ ᐃᑦᔪᕐᓁᑦᑐᒧᑦ ᑐᕌᖓᓂᐊᕐᑐᒥᒃ, ᐊᖏᓂᖃᕐᓗᓂ ᑐᑭᒧᑦ 10ᒤᓕᒥᒃ; ᓴᓂᒧᑐᓂᖃᕐᓗᓂᓗ 8ᒤᓕᒥᒃ; ᑖᓐᓇᓕᒫᖅ ᓄᓇᖓᑕ ᑭᒡᓕᖓᓄᑦ ᑎᑭᓪᓗᒍ ᐃᑦᔪᕐᓁᑦᑑᔪᒃᓴᐅᕗᖅ. 2ᑕᕝᕙᓂ ᐊᑕᓂᐅᑉ ᓄᓇᖁᑎᖓᑕ ᐃᓗᐊᓂ ᓇᓗᓁᕐᓯᒪᔪᖃᕐᑐᒃᓴᐅᕗᖅ ᑐᒃᓯᐊᕐᕕᒡᔪᐊᖃᕐᕕᒃᓴᒥᒃ, 840ᓂᒃ ᐃᑎᒐᖕᓂᒃ ᐊᖏᓂᖃᕐᓗᓂ; ᐊᕙᑖᒍᑦ ᓱᓇᑕᖃᖏᓐᓂᖓ 84ᓂᒃ ᐃᑎᒐᖕᓂᒃ ᐊᖏᓂᖃᕐᓗᓂ. 3ᑖᑦᓱᒪᓗ ᓄᓇᐅᑉ ᐃᑦᔪᕐᓁᑦᑐᒧᑦ ᑐᕌᖓᔫᑉ ᐃᓗᐊᓂ 10ᒤᓕᒥᒃ ᑕᑭᓂᓕᖕᒥ 4ᒤᓕᒥᒃ ᐊᖏᓂᓕᖕᒥᒃ ᐆᒃᑐᕋᕐᑕᐅᓯᒪᔪᖃᕐᑐᒃᓴᐅᕗᖅ ᐃᑦᔪᕐᓁᑦᑐᕕᖕᒧᑦ ᐃᓂᒃᓴᒥᒃ, ᑖᓐᓇᓗ ᐃᑦᔪᕐᓁᓐᓂᕐᐹᖑᓂᐊᕐᐳᖅ. 4ᓄᓇᒥ ᐃᑦᔪᕐᓁᓐᓂᕐᐹᖑᓗᓂ; ᑐᓂᕐᕈᓯᕐᑎᑦᓯᔨᓄᑦ ᐃᓂᒋᔭᐅᓗᓂ, ᐊᑕᓂᕐᒥᒃ ᐱᔨᑦᓯᕐᑎᓄᑦ ᐃᑦᔪᕐᓁᑦᑐᕕᖕᒥ; ᑕᕝᕙᓂ ᐃᒡᓗᖃᕐᑐᒃᓴᐅᕗᑦ ᐃᓚᖓᓗ ᐃᑦᔪᕐᓁᑎᑕᐅᓯᒪᓗᓂ ᐃᑦᔪᕐᓁᑦᑐᕕᖕᒧᑦ ᐃᓂᒃᓴᐅᖁᓪᓗᒍ. 5ᐃᓚᖓ ᓴᓂᕐᕙᒃᑕᐅᓯᒪᔪᒃᓴᐅᕗᖅ 10ᒤᓕᒥᒃ ᑕᑭᓂᖃᕐᓗᓂ 2ᒤᓕᒥᒡᓗ ᓴᓂᒧᑐᓂᖃᕐᓗᓂ, ᓄᓇᖁᑎᒃᓴᐅᖁᓪᓗᒍ ᓕᕔᑎᓄᑦ ᑐᒃᓯᐊᕐᕕᒡᔪᐊᕐᒥ ᐱᓇᓱᐊᖃᑦᑕᕐᑐᓄᑦ, ᑕᕝᕙᓂ ᐃᒡᓗᖃᕐᑐᒃᓴᐅᕗᑦ ᓄᓇᒋᓗᒍ.
6“ᐃᑦᔪᕐᓁᑎᑕᐅᓯᒪᔫᓪᓗ ᓄᓇᐅᑉ ᑭᒡᓕᖓᑕ ᖃᓂᒋᔮᓂ ᓴᓂᕐᕙᒃᑕᐅᓯᒪᔪᖃᕐᑐᒃᓴᐅᕗᖅ ᓄᓇᒥᒃ ᑕᑭᓂᖃᕐᓗᓂ 10ᒤᓕᓂᒃ, ᓴᓂᒧᑐᓂᖃᕐᓗᓂᓗ 2ᒤᓕᒥᒃ; ᑕᒪᓐᓇ ᐃᒡᓗᒐᓴᒡᔪᐊᖃᕐᕕᐅᔪᒃᓴᐅᕗᖅ ᐃᓴᕆᐊᓕᒥᐅᑦ ᑭᖑᕚᓕᒫᖏᓐᓄᑦ ᑐᕌᖓᓗᓂ.”
ᐊᖓᔪᖅᑳᕐᔪᐊᑉ ᐃᕐᓂᖏᑕ ᓄᓇᖁᑎᒃᓴᖓ
7“ᓄᓇᒥᒃ ᓴᓂᕐᕙᒃᑕᐅᓯᒪᔪᖃᕆᐊᖃᕐᐳᖅ ᐊᖓᔪᖅᑳᓄᑦ ᓄᓇᒃᓴᒥᒃ ᐃᑦᔪᕐᓁᑎᑕᐅᓯᒪᔫᑉ ᑭᒡᓕᖓᓂ ᐃᒡᓗᒐᓮᓪᓗ ᑭᒡᓕᖓᓃᑦᑐᒥᒃ, ᐂᑉᐸᖓ ᓯᕿᓂᐅᑉ ᓂᐱᕕᐊᑕ ᓇᓛᓃᓪᓗᓂ; ᐂᑉᐸᖓᓗ ᓯᕿᓂᐅᑉ ᓄᐃᕕᐊᑕ ᓇᓛᓃᓗᓂ ᐃᑦᔪᕐᓁᑎᑕᐅᓯᒪᔫᑉ ᑭᒡᓕᖓᓂ ᐃᓴᕆᐊᓕᒥᐅᑦ ᓄᓇᖁᑎᖏᑕ ᑭᒡᓕᖓ ᑎᑭᓪᓗᒍ, ᑕᑭᓂᖓ ᐊᑦᔨᒋᔭᐅᖁᓪᓗᒍ ᐃᓴᕆᐊᓕᒥᐅᑦ ᓄᓇᖁᑎᖓᓄᑦ. 8ᑕᒪᓐᓇ ᓄᓇᖁᑎᒋᔭᐅᔪᒃᓴᐅᕗᖅ ᐊᖓᔪᖅᑳᓄᑦ ᐃᓴᕆᐊᓕᒥ, ᐃᓄᖁᑎᓐᓂᒃ ᐅᖁᒤᒃᓴᕐᑎᑦᓯᔪᓐᓁᖁᓪᓗᒋᑦ; ᐃᓴᕆᐊᓕᒥᐅᓂᒡᓕ ᓄᓇᖁᑎᖃᕐᑎᑦᓯᔪᒃᓴᐅᕗᑦ ᐃᓚᒌᖕᓂᖏᑕ ᐋᖅᑭᒃᓯᒪᓂᖏᑦ ᒪᓕᒡᓗᒋᑦ.”
ᐊᖓᔪᖅᑳᑦ ᐊᐅᓚᑦᓯᓂᖏᑕ ᒪᓕᒐᒃᓴᖏᑦ
9“ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐊᑯᓂᓗᐊᖅ ᐃᓴᕆᐊᓕᒥᐅᓄᑦ ᐊᖓᔪᖅᑲᐅᔪᓯ ᐱᕋᔭᒃᑐᓂᒃ ᐊᓂᒍᑐᐃᓐᓇᕐᑎᑦᓯᖃᑦᑕᕋᑦᓯ ᐊᒃᓱᕈᕐᑎᑦᓯᓪᓗᓯᓗ, ᓈᒻᒪᓈᕐᑐᒥᒃ ᐃᓱᐊᕐᑐᒥᒡᓗ ᐱᓇᓱᐊᓕᕆᑦᓯ; ᐃᓄᖁᑎᓐᓂᒃ ᐊᕐᓵᕐᑎᕆᖃᑦᑕᕈᓐᓃᕆᑦᓯ, ᐊᑕᓂᖅ ᒎᑎ ᐅᖃᕐᐳᖅ.
10 #
ᒨᓯᓯ ᐱᖓᔪᖏᑦ 19:36. “ᓂᕿᓄᑦ ᐆᒃᑐᕋᐅᑎᓂᒃ ᐅᖁᒤᓐᓂᕐᓂᐊᕈᑎᓂᒡᓗ ᓈᒻᒪᓈᕐᓯᒪᔪᓂᒃ ᐊᑐᕐᑐᒃᓴᐅᕗᓯ, ᐆᒃᑐᕋᐅᑦ ᐄᐸ ᐊᑐᑦᓯᐊᕐᓗᒍ, ᐹᓯᓗ ᐊᑐᑦᓯᐊᕐᒥᓗᒍ.
11“ᐆᒃᑐᕋᐅᑦ ᓂᕿᓄᑦ ᐄᐸ ᐆᒃᑐᕋᐅᓪᓗ ᐹᓯᒧᑦ ᐃᒪᕐᒧᑦ ᐊᑦᔨᒌᒡᓗᑎᒃ ᑍᒤᓪᓗᐊᕐᑐᒃᓴᐅᕘᒃ, ᐆᒃᑐᕋᐅᑦ ᐊᑐᕐᑕᐅᔪᒃᓴᐅᕗᑦ; ᐊᑕᐅᓯᖅ ᕼᐆᒪᕆ ᐄᐸᐅᑉ ᑕᓪᓕᒪᐅᔪᕆᓗᓂᐅᒃ; ᐹᓯ-ᕼᐆᒪᕆᐅᑉ ᑕᓪᓕᒪᐅᔪᕆᖕᒥᓗᓂᐅᒃ; ᕼᐆᒪᕆ ᐊᑐᕐᑕᐅᒐᔪᒡᓗᓂ ᒪᓕᒐᕆᔭᐅᔪᒃᓴᐅᕗᖅ.
12“ᐅᖁᒤᓐᓂᕐᓂᐊᕈᑎᓯ ᐃᒤᓕᖓᔪᒃᓴᐅᕗᑦ:
ᓴᑯᓪ ᐊᑕᐅᓯᖅ 20ᒋᕋᔅᑦ-ᖑᔪᒃᓴᐅᕗᖅ;
ᒤᓇ ᐊᑕᐅᓯᖅ 50ᓴᑰᓪᔪᒃᓴᐅᕗᖅ.
13“ᑐᓂᕐᕈᑎᒃᓴᓂᒃ ᑐᓂᓯᓕᕈᑦᓯ ᐃᒫᒃ ᐋᖅᑭᒃᓯᒪᔪᒃᓴᐅᕗᑦ:
ᓂᐊᖂᔭᒃᓴᓂᑦ ᐄᐸᐅᑦᔪᑎᓕᒫᖏᑕ 1/6ᖓ ᑐᓂᔭᒃᓴᕆᕙᓯ,
ᐹᕐᓕᓂᑦ ᕼᐆᒪᕆᐅᑦᔪᑎᖏᑕ ᐄᐸᐅᑦᔪᑎᓕᒫᖏᑕ 1/6ᖓ ᑐᓂᔭᒃᓴᕆᕙᓯ.
14ᐸᐅᕐᖎᑦ ᐅᕐᓱᖓᓂᒃ ᐋᖅᑭᒃᓯᒪᓂᒃᓴᖓ ᒪᓕᒡᓗᒍ ᐋᖅᑭᒃᓯᒪᔪᒃᓴᐅᕗᖅ,
ᐹᓯ ᐊᑐᕐᓗᒍ ᑕᓪᓕᒪᐅᔪᖓᓂᒃ ᑐᓂᓯᔪᒃᓴᐅᕗᓯ ᐊᑐᓂᑦ ᑰᕆᒥᑦ ᐊᑕᐅᓯᕐᒥᑦ ᐱᔪᒥᒃ.
(ᑰᕆ, ᕼᐆᒪᕆᑎᑐᑦ ᐊᑕᐅᓯᖅ ᐃᓗᓕᖃᕐᒪᑦ ᖁᓕᓂᒃ ᐹᓯᓂᒃ.)
15ᓰᐱᒥᒃ ᐊᑕᐅᓯᕐᒥᒃ ᑐᓂᓯᔪᒃᓴᐅᕗᓯ ᐊᑐᓂᑦ 200ᐅᑦᔪᑎᖏᓐᓂᑦ,
ᐃᓴᕆᐊᓕᒥᐅᑦ ᐃᓚᒌᖕᓂᖏᓐᓂᑦ.
“ᐱᕈᕐᑐᕕᓂᕐᓂᑦ ᑐᓂᕐᕈᓯᕐᓃᑦ ᑍᒤᓕᖓᔪᒃᓴᐅᕗᑦ, ᐃᑯᐊᓚᑦᓯᓂᒃᑯᓪᓗ, ᐃᓅᖃᑎᖃᑦᓯᐊᕐᓂᕐᒧᓪᓗ ᑐᓂᕐᕈᓯᕐᓃᑦ, ᑐᓂᕐᕈᓯᕐᑐᒃᓴᐅᕗᓯ ᐊᔪᕐᓃᑦ ᐃᓱᒪᒋᔪᓐᓁᕐᑕᐅᖁᓪᓗᒋᑦ, ᐊᑕᓂᖅ ᒎᑎ ᐅᖃᕐᐳᖅ.
16“ᐃᓄᓕᒫᑦ ᓄᓇᓕᖕᓂ ᑍᒫᒃ ᑐᓂᕐᕈᓯᖃᑦᑕᕐᑐᒃᓴᐅᕗᑦ ᐊᖓᔪᖅᑳᓄᑦ ᐃᓴᕆᐊᓕᒥᐅᓂ ᐊᐅᓚᑦᓯᔨᓄᑦ. 17ᑖᑦᓱᒪᓕ ᐃᑯᐊᓪᓚᒐᒃᓮᑦ ᑐᓂᕐᕈᓯᐅᑎᒋᔭᕆᐊᖃᕐᐰᑦ, ᐱᕈᕐᑐᕕᓃᑦ, ᕔᓃᓪᓗ ᑐᓂᕐᕈᑎᒃᓮᑦ, ᓇᓪᓕᐅᓐᓂᕐᓯᐅᕐᕕᒃ ᐊᑐᓕᕌᖓᑦ ᑕᖅᑭᓂᕋᑖᒥᒃ, ᓴᐸᑎᓂᓗ, ᐊᓯᖏᓐᓂᓗ ᓇᓪᓕᐅᓐᓂᕐᓯᐅᕐᕕᖕᓂ ᐃᓴᕆᐊᓕᐅᑉ ᑭᖑᕚᖏᓐᓄᑦ: ᐊᔪᕐᓂᕐᒧᑦ ᑐᓂᕐᕈᑎᒃᓴᓂᒃ ᐊᑐᐃᓐᓇᖃᕐᑎᑦᓯᔪᒃᓴᐅᕗᖅ, ᑐᓂᕐᕈᑎᒃᓴᓂᒃ ᓂᐊᖂᔭᒃᓴᓂᒃ, ᐃᑯᐊᓚᑎᑕᒃᓴᓂᒡᓗ, ᐃᓅᖃᑎᖃᑦᓯᐊᕐᓂᕐᒧᓪᓗ ᑐᓂᕐᕈᑎᒃᓴᓂᒃ, ᐃᓴᕆᐊᓕᐅᑉ ᑭᖑᕚᖏᑕ ᐊᔪᕐᓂᖏᑦ ᐃᓱᒪᒋᔪᓐᓁᕐᑕᐅᖁᓪᓗᒋᑦ.”
ᓇᓪᓕᐅᓐᓂᕐᓯᐅᕐᓃᑦ
ᒨᓯᓯ ᐂᑉᐸᖏᑦ 12:1-20; ᒨᓯᓯ ᐱᖓᔪᖏᑦ 23:33-43
18“ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᖅᑮᑦ ᓯᕗᓪᓕᕐᐸᖓᓐᓂ, ᐅᓪᓗᖏᑕ ᓯᕗᓪᓕᕐᐹᖓᓐᓂ, ᑐᓂᕐᕈᓯᕐᑐᒃᓴᐅᕗᓯ ᐃᒻᒧᒃᓯᐅᒊᑦ ᐊᖑᓴᓪᓗᖓᓂᒃ ᐃᓅᓱᒃᑐᒥᒃ ᖃᓄᐃᑦᔪᑎᖃᖏᑦᑐᒥᒃ, ᐃᑦᔪᕐᓁᑦᑐᕕᒃ ᐃᑦᔪᕐᓁᑎᑕᐅᖁᓪᓗᒍ. 19ᑐᓂᕐᕈᓯᕐᑎᑦᓯᔨ ᐊᔪᕐᓃᑦ ᐱᓪᓗᒋᑦ ᑐᓂᕐᕈᑎᐅᔫᑉ ᐊᐅᖓᓂᒃ ᐱᓗᓂ ᑐᒃᓯᐊᕐᕕᒡᔪᐊᑉ ᐅᒃᑯᐊᖓᑕ ᐊᕙᓗᖏᓐᓂᒃ ᐊᐅᒥᑎᕆᔪᒃᓴᐅᕗᖅ, ᑐᓂᕐᕈᓯᕐᕕᐅᓪᓗ ᑎᕆᖅᑯᖏᑦ ᓯᑕᒪᑦ, ᐃᓗᕙᓯᖕᓂᕐᓴᐅᓪᓗ ᑐᕐᓲᖑᔭᐅᑉ ᐃᑎᕐᑕᕐᕕᖓᑕ ᓇᐸᔪᖏᓐᓂᒃ. 20ᑕᖅᑭᐅᑉ ᐅᓪᓗᖏᑕ 7ᖓᓐᓂ ᑍᒫᑦᓮᓐᓇᖅ ᐱᓇᓱᐊᕐᑐᒃᓴᐅᕗᓯ ᑕᒻᒪᕈᑎᕕᓃᑦ ᓇᓗᓂᕐᒧᓪᓘᓐᓃᑦ ᐊᔪᕐᑐᓕᓂᕕᓃᑦ ᐱᑦᔪᑎᒋᓗᒋᑦ; ᑍᒤᓕᐅᕐᓗᓯ ᑕᕝᕙ ᑐᒃᓯᐊᕐᕕᒡᔪᐊᖅ ᐃᑦᔪᕐᓁᑎᑕᒃᓴᕆᕙᓯ.
21 #
ᒨᓯᓯ ᐂᑉᐸᖏᑦ 12:1-20; ᒨᓯᓯ ᓯᑕᒪᖏᑦ 28:16-25. “ᑕᖅᑭᐅᑉ ᓯᕗᓪᓕᕐᐹᑉ ᐅᓪᓗᖏᑕ 14ᖓᓐᓂ, ᖄᖏᕐᑕᐅᕕᒃ ᓇᓪᓕᐅᓐᓂᕐᓯᐅᒐᒃᓴᕆᕙᓯ, ᐅᓪᓗᓂᒡᓗ 7ᓂᒃ ᓂᕆᖃᑦᑕᕐᑐᒃᓴᐅᕗᓯ ᓂᐊᖂᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ. 22ᓇᓪᓕᐅᓐᓂᕐᓯᐅᕐᓂᐅᑉ ᐅᓪᓗᖓᓂ ᐊᖓᔪᖅᑳᖅ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᓂᒃ ᐊᑐᐃᓐᓇᕈᐃᔪᒃᓴᐅᕗᖅ ᐃᒻᒥᓄᑦ ᐃᓄᓕᒫᓪᓗ ᐊᔪᕐᓂᖏᑦ ᐱᑦᔪᑎᒋᓗᓂᒋᑦ. 23ᐅᓪᓗᐃᓪᓗ 7 ᐊᑐᕐᑎᓪᓗᒋᑦ ᓇᓪᓕᐅᓐᓂᕐᓯᐅᕐᕕᖕᒥ ᐊᑕᓂᕐᒧᑦ ᑐᓂᕐᕈᑎᒃᓴᓂᒃ ᐊᑐᐃᓐᓇᐅᑎᑦᓯᔪᒃᓴᐅᕗᖅ ᐊᖑᓴᓪᓗᕐᓂᒃ 7ᓂᒃ ᓰᐲᓪᓗ ᐊᖑᓴᓪᓗᖏᓐᓂᑦ 7ᓂᒃ ᖃᓄᐃᑦᔪᑎᖃᖏᑦᑐᓂᒃ, ᖃᐅᑕᒫᑦ ᐅᓪᓗᓂᒃ 7ᓂᒃ ᐊᑐᓂᑦ ᑐᓂᕐᕈᓯᖃᑦᑕᕐᓗᑎᒃ; ᒎᑦᓰᓪᓗ ᐊᖑᓴᓪᓗᖓᓂᒃ ᖃᐅᑕᒫᑦ ᑐᓂᕐᕈᓯᖃᑦᑕᕐᑐᒃᓴᐅᕗᑦ ᐊᔪᕐᓃᑦ ᐱᑦᔪᑎᒋᓗᒋᑦ. 24ᓂᐊᖂᔭᒃᓴᒥᒡᓗ ᐊᑐᐃᓐᓇᐅᑎᑦᓯᔪᒃᓴᐅᒋᕗᖅ ᐄᐸᑎᑐᑦ ᐊᖏᓂᖃᕐᓗᑎᒃ ᐊᑐᓂᑦ ᐊᖑᓴᓪᓗᕐᒧᑦ ᐊᑕᐅᓯᕐᒧᑦ, ᓰᐱᐅᓪᓗ ᐊᖑᓴᓪᓗᖓᓄᑦ ᐊᑕᐅᓯᕐᒧᑦ ᐄᐸᒥᒃ ᐊᑕᐅᓯᕐᒥᒃ, ᐸᐅᕐᖎᓪᓗ ᐅᕐᓱᖏᓐᓂᒃ ᕼᐃᓐᒥᒃ ᐊᖏᓂᖃᕐᑐᓂᒃ ᐄᐸᒧᑦ ᐊᑕᐅᓯᕐᒧᑦ.
25 #
ᒨᓯᓯ ᐱᖓᔪᖏᑦ 23:33-36; ᒨᓯᓯ ᓯᑕᒪᖏᑦ 29:12-38. “ᑕᖅᑮᑦ 7ᖓᓐᓂ, ᐅᓪᓗᖏᑕ 15ᖓᓐᓂ ᐱᒋᐊᖃᑦᑕᕐᑐᒃᓴᐅᕗᑦ ᓇᓪᓕᐅᓐᓂᕐᓯᐅᕐᓂᕐᒥᒃ ᐅᓪᓗᓂᒃ 7ᓂᒃ, ᐊᖓᔪᖅᑳᖅ ᐊᑐᐃᓐᓇᖃᕐᑎᑦᓯᔪᒃᓴᐅᕗᖅ ᐊᔪᕐᓂᕐᒧᑦ ᑐᓂᕐᕈᓯᐅᑕᐅᔪᒃᓴᓂᒃ, ᐃᑯᐊᓚᓗᒋᑦ ᑐᓂᕐᕈᑎᒃᓴᓂᒃ, ᓂᐊᖂᔭᒃᓴᓂᒃ ᑐᓂᕐᕈᑎᒃᓴᓂᒃ, ᐸᐅᕐᖎᓪᓗ ᐅᕐᓱᖏᓐᓂᒃ.”
Currently Selected:
ᐃᓯᑭᐊᓕᐅᑉ ᐊᒡᓚᖏᑦ 45: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
