ᐃᓯᑭᐊᓕᐅᑉ ᐊᒡᓚᖏᑦ 44
44
ᐃᑎᕐᑕᕐᕕᐅᑉ ᐊᑐᕐᑕᐅᓂᒃᓴᖓ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ
1ᑕᕝᕙ ᐃᑎᕐᑕᕐᕕᒧᐊᕐᑎᑉᐹᖓ ᓯᓚᓪᓕᕐᒧᑦ ᑐᒃᓯᐊᕐᕕᒡᔪᐊᕐᒦᑦᑐᒧᑦ, ᓯᕿᓂᐅᑉ ᓄᐃᕕᐊᓄᑦ ᓵᓐᖓᔪᒧᑦ; ᑖᓐᓇᓗ ᐅᒃᑯᐊᕐᓯᒪᕗᖅ. 2ᐊᑕᓂᐅᓪᓗ ᐅᖃᐅᑎᕚᖓ, “ᑖᓐᓇ ᐃᑎᕐᑕᕐᕕᒃ ᐅᒃᑯᐊᕐᓯᒤᓐᓇᕐᑐᒃᓴᐅᕗᖅ; ᐅᒃᑯᐃᕐᑕᐅᔪᒃᓴᐅᓇᓂᓗ, ᓇᓪᓕᐊᓐᓄᓪᓘᓐᓃᑦ ᐃᑎᕐᑕᐅᔪᒃᓴᐅᓐᖏᓚᖅ, ᐊᑕᓂᐅᑉ ᐃᓴᕆᐊᓕᐅᑉ ᒎᑎᖓᑦᑕ ᐃᑎᕐᑕᕐᕕᒋᖕᒪᒍ; ᑍᒤᒻᒪᑦ ᐅᒃᑯᐊᕐᓯᒤᓐᓇᕐᑐᒃᓴᐅᕗᖅ. 3ᐊᖓᔪᖅᑳᕐᔪᐊᖅ ᑕᕝᕙᓂ ᓂᕆᔪᓐᓇᕐᑐᑑᕗᖅ ᐊᑕᓂᐅᑉ ᓵᖓᓂ; ᐃᑎᕐᑐᒃᓴᐅᕗᖅ ᐃᑎᕐᑕᕐᕕᐅᑉ ᑐᕐᓲᖑᔭᖓᑕ ᐃᒡᓗᕈᓯᖓᒍᑦ ᐃᓱᐊᓃᑦᑐᒃᑯᑦ, ᑕᕝᕘᓇᓗ ᐊᓂᖕᒥᓗᓂ.”
ᑐᒃᓯᐊᕐᕕᒡᔪᐊᑉ ᐃᑎᕐᑕᐅᖃᑦᑕᕐᓂᒃᓴᖓᑕ ᒪᓕᒐᖏᑦ
4ᐊᒻᒪ ᐃᑎᕐᑕᕐᕕᖕᒧᐊᕐᑎᑉᐹᖓ ᐅᓐᓄᐊᓪᓗᐊᑉ ᓇᓛᓃᑦᑐᒧᑦ ᑐᒃᓯᐊᕐᕕᒡᔪᐊᑉ ᓯᕗᕌᓃᑦᑐᒧᑦ; ᑕᑯᓴᕋᒪᓗ ᑕᑯᕗᖓ, ᐊᑕᓂᐅᑉ ᓂᕐᑐᕐᓇᕐᓂᕐᔪᐊᖓᓄᑦ ᑐᒃᓯᐊᕐᕕᒡᔪᐊᖅ ᑕᑕᑕᐅᓯᒪᔪᖅ; ᒪᓂᖅᑲᒧᓪᓗ ᐹᒻᒪᒃᐳᖓ. 5ᐊᑕᓂᐅᓪᓗ ᐅᖃᐅᑎᕚᖓ, “ᐃᓅᑉ ᐃᕐᓂᖓ, ᑕᑯᔭᑎᑦ ᐅᑦᔨᕆᑦᓯᐊᒃᑭᑦ, ᑐᓴᑦᓯᐊᕐᓗᒋᓪᓗ ᓯᐅᑎᖕᓄᑦ ᐅᖃᐅᓯᕆᓂᐊᕐᑕᓕᒫᒃᑲ ᐃᓕᖕᓄᑦ ᐊᑕᓂᐅᑉ ᑐᒃᓯᐊᕐᕕᒡᔪᐊᖓᑕ ᒪᓕᒐᖏᑦ ᐱᖁᔭᖏᓪᓗ; ᐃᒃᐱᒋᑦᓯᐊᕐᓗᒋᓪᓗ ᑐᒃᓯᐊᕐᕕᒡᔪᐊᕐᒥ ᑎᓕᔭᐅᖃᑦᑕᕈᒫᕐᑐᑦ ᑭᓇᒃᑯᓪᓗ ᐃᑦᔪᕐᓁᑦᑐᕕᖕᒧᑦ ᐃᑎᕈᓐᓇᕐᑎᑕᐅᔭᕆᐊᖃᖏᒻᒪᖔᑕ.
6“ᐃᓴᕆᐊᓕᐅᑉ ᑭᖑᕚᖏᑦ ᓈᓚᒍᓐᓇᖏᑦᑐᑦ ᐅᖃᐅᑎᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᓴᕆᐊᓕᐅᑉ ᑭᖑᕚᖏᑦ, ᓇᕐᕈᓇᕐᑐᒥᒃ ᐱᓇᓱᐊᖃᑦᑕᕐᓂᓕᒫᓯ ᓄᖅᑲᕐᑎᓕᕐᓯᐅᒃ. 7ᓄᓇᓕᑐᖃᐅᖏᑦᑐᓂᒃ ᐃᑎᕐᑎᑦᓯᓯᒪᒐᑦᓯ ᐆᒻᒪᑎᒃᑯᑦ ᑎᒥᒃᑯᓪᓗ ᑭᐱᒪᖏᑦᑐᓂᒃ, ᐃᑦᔪᕐᓁᑦᑐᕕᖁᑎᓐᓂᒃ ᓇᕐᕈᓇᕐᓯᑎᑦᓯᓚᐅᕐᐳᓯ, ᐆᒪᔪᓂᒃ ᐅᕙᓐᓄᑦ ᓂᕿᒃᓴᐅᖁᓪᓗᒋᑦ ᑐᓂᕐᕈᓯᕐᓯᒪᒐᑦᓯ, ᑐᓐᓄᖏᓐᓂᒃ ᐊᐅᖏᓐᓂᒡᓗ. ᐊᖏᖃᑎᒌᒍᑎᒋᓯᒪᔭᒃᑲ ᓯᖁᒥᓚᐅᕐᐸᓯ, ᓇᕐᕈᓇᕐᑐᓂᒃ ᐱᓇᓱᐊᕐᓯᒪᓂᑦᓯᓐᓄᑦ ᐃᓚᓕᐅᑎᓪᓗᒋᑦ. 8ᐰᕐᓯᑦᓯᐊᓚᐅᓐᖏᓚᓯᓗ ᐃᑦᔪᕐᓁᑦᑐᖁᑎᓐᓂᒃ; ᐊᐅᓚᑦᓯᔨᖃᓕᓚᐅᕐᐳᓯᓕ ᓄᓇᖃᕐᑐᑐᖃᐅᖏᑦᑐᓂᒃ ᐃᑦᔪᕐᓁᑦᑐᖁᑎᓐᓂ.
9“ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᓄᓇᖃᕐᑐᑐᖃᐅᖏᑦᑐᖅ ᑭᐱᔭᐅᓯᒪᖏᒃᑯᓂ ᐆᒻᒪᑎᒃᑯᑦ ᑎᒥᒃᑯᓪᓗ, ᐃᓅᖃᑎᒋᔭᐅᔪᓕᒫᑦ ᐃᓴᕆᐊᓕᒥᐅᓄᑦ, ᐃᑦᔪᕐᓁᑦᑐᕕᖁᑎᓐᓄᑦ ᐃᑎᕐᑐᒃᓴᐅᓐᖏᓚᖅ.”
ᓕᕔᑎᑦ ᑐᓂᕐᕈᓯᕐᑎᑦᓯᔨᓄᑦ ᐃᓚᐅᖁᔭᐅᖏᓐᓂᖓᑦ
10“ᓕᕔᑎᓪᓕ ᐅᕙᓐᓂᑦ ᐅᖓᓯᒃᓯᓚᐅᕐᐳᑦ, ᐅᕙᓐᓂᒃ ᕿᒤᓪᓗᑎᒃ ᒎᑎᓐᖑᐊᓄᑦ ᓵᖔᓕᕐᓗᑎᒃ ᐃᓴᕆᐊᓕᒥᐅᑦ ᐃᓚᒋᓪᓗᒋᑦ, ᑖᒃᑯᐊ ᓱᒋᐊᕐᑕᐅᓂᒃᓴᒥᖕᓂᒃ ᓇᔪᕐᑎᖃᓕᕐᐳᑦ. 11ᐃᑦᔪᕐᓁᑦᑐᕕᖁᑎᓐᓂ ᐱᔨᑦᓯᕈᓐᓇᕐᓂᐊᕋᓗᐊᕐᐹᖓ, ᑐᒃᓯᐊᕐᕕᒡᔪᐊᑉ ᐃᑎᕐᑕᕐᕕᖓᓂ ᑲᒪᔨᐅᓗᑎᒃ, ᑐᒃᓯᐊᕐᕕᒡᔪᐊᒥᓗ ᐱᓇᓱᐊᕐᑎᐅᓗᑎᒃ; ᑐᖅᑯᕅᔨᐅᓗᑎᒡᓗ ᑐᓂᕐᕈᑎᒃᓴᓂᒃ ᐃᑯᐊᓚᑎᑕᐅᔪᒃᓴᓂᒃ ᑐᓂᕐᕈᑕᐅᓂᐊᕐᑐᓂᒡᓗ ᐃᓄᐃᑦ ᐱᑦᔪᑎᒋᓗᒋᑦ, ᐃᓄᖕᓄᑦ ᐃᓚᐅᔪᒃᓴᐅᕗᑦ, ᑖᒃᑯᓂᖓ ᐱᔨᑦᓯᕐᓗᑎᒃ. 12ᐱᔨᑦᓯᖃᑦᑕᓚᐅᕐᒪᑕ ᒎᑎᓐᖑᐊᓄᑦ ᐊᒡᕕᐊᕈᑎᒃᓴᐅᓕᕐᓗᑎᒡᓗ ᐊᔪᕐᑐᓕᑎᑦᓯᓯᒪᓂᕐᒥᖕᓄᑦ ᐃᓴᕆᐊᓕᐅᑉ ᑭᖑᕚᖏᓐᓂᒃ, ᑍᒤᒻᒪᑦ ᐅᖃᕕᓚᐅᕐᐳᖓ ᑖᒃᑯᐊ ᐱᓪᓗᒋᑦ, ᐊᑕᓂᖅ ᒎᑎ ᐅᖃᕐᐳᖅ, ᓱᒋᐊᕐᑕᐅᓂᒃᓴᒥᖕᓂᒃ ᓇᔪᕐᑎᖃᓕᕐᐳᑦ. 13ᐅᕙᓐᓂᒃ ᐱᔨᑦᓯᕐᑐᒃᓴᐅᔪᓐᓁᕐᐳᑦ ᑐᓂᕐᕈᓯᕐᑎᑦᓯᔨᐅᓗᑎᒃ, ᐃᑦᔪᕐᓁᑦᑐᖁᑎᓐᓄᓪᓗ ᓇᓪᓕᐊᓐᓄᓪᓘᓐᓃᑦ ᖃᒡᓕᔪᒃᓴᐅᔪᓐᓁᕐᐳᑦ ᐃᑦᔪᕐᓁᓐᓂᕐᐹᒧᓪᓗ ᐃᑎᕐᑐᒃᓴᐅᔪᓐᓁᕐᓗᑎᒃ; ᑲᓐᖑᓲᑎᒃᓴᒥᖕᓂᒡᓕ ᓇᔪᕐᑎᖃᓕᕐᐳᑦ, ᓇᕐᕈᓇᕐᑐᓂᒃ ᐱᓇᓱᐊᕐᐸᓚᐅᕐᓂᕐᒥᖕᓄᑦ. 14ᓱᓕᓕ ᑎᓕᓂᐊᕐᐸᒃᑲ ᑐᒃᓯᐊᕐᕕᒡᔪᐊᑉ ᐃᓗᐊᓂ ᐱᔭᕆᐊᓕᖕᓂᒃ ᑲᒪᔨᐅᖁᓪᓗᒋᑦ, ᐱᔨᑦᓯᕆᐊᓕᖕᓂᒡᓗ ᐱᔨᑦᓯᕐᑎᐅᖁᓪᓗᒋᑦ ᐱᓇᓱᐊᕐᑕᐅᔭᕆᐊᓕᓕᒫᓂᒃ.”
ᑐᓂᕐᕈᓯᕐᑎᑦᓯᔩᑦ
15“ᑐᓂᕐᕈᓯᕐᑎᑦᓯᔩᓪᓕ ᓕᕔᒃᑯᑦ ᐃᓚᒌᖕᓂᖏᓐᓂᑦ ᐱᓯᒪᔪᑦ ᔭᑑᑭᐅᑉ ᑭᖑᕚᖏᓐᓂᓐᖔᕐᑐᑦ, ᓱᕐᕋᔪᐃᑦᑑᓪᓗᑎᒃ ᑐᒃᓯᐊᕐᕕᒡᔪᐊᕐᒥ ᐱᔨᑦᓯᓚᐅᕐᒪᖓ ᐊᓯᓕᒫᖏᑦ ᐃᓴᕆᐊᓕᒥᐅᑦ ᐅᕙᓐᓂᒃ ᕿᒤᒐᓗᐊᕐᑎᓪᓗᒋᑦ, ᑖᒃᑯᐊᑐᐊᑦ ᐅᕙᓐᓂᒃ ᐱᔨᑦᓯᕐᑐᒃᓴᐅᕗᑦ ᓇᔪᕐᑕᓐᓄᓪᓗ ᑐᓂᕐᕈᓯᕆᐊᕐᑐᕈᓐᓇᕐᓗᑎᒃ ᑐᓂᕐᕈᑎᑦ ᑐᓐᓄᖏᓐᓂᒃ ᐊᐅᖏᓐᓂᒡᓗ, ᐊᑕᓂᖅ ᒎᑎ ᐅᖃᕐᐳᖅ. 16ᑖᒃᑯᐊᑐᐊᖅ ᐃᑦᔪᕐᓁᑦᑐᕕᖁᑎᓐᓄᑦ ᐃᑎᕈᓐᓇᕐᑐᒃᓴᐅᕗᑦ, ᑐᓂᕐᕈᓯᕐᕕᖕᒥᓗ ᓵᒥ ᐱᓇᓱᐊᕈᓐᓇᕐᓗᑎᒃ ᐅᕙᓐᓄᑦ, ᑕᕝᕙᓂᓗ ᑲᒪᔨᐅᓗᑎᒃ. 17#ᒨᓯᓯ ᐂᑉᐸᖏᑦ 28:39-43; ᒨᓯᓯ ᐱᖓᔪᖏᑦ 16:4.ᐃᑎᕐᑕᕐᕕᖕᒧᑦ ᐃᓗᓪᓕᕐᒧᑦ ᐃᑎᓕᕈᑎᒃ, ᑐᕐᓲᖑᔭᕐᒥ ᐃᓗᕙᓯᖕᓂᕐᓴᒥ ᐊᓐᓄᕌᓂᒃ ᓵᑦᑐᓂᒃ ᐊᑎᔪᒃᓴᐅᕗᑦ; ᐃᑦᔪᓂᕐᓴᓂᒃ ᓄᕕᕐᓵᒃᓴᓂᒃ ᐊᑐᕐᑐᒃᓴᐅᓐᖏᓚᑦ, ᐱᓇᓱᐊᕐᓂᕐᒥᖕᓂ ᑐᒃᓯᐊᕐᕕᒡᔪᐊᕐᒥ ᐃᓗᕙᓯᖕᓂᕐᓴᒥ ᐃᓗᐊᓃᓪᓗᑎᒡᓘᓐᓃᑦ. 18ᓵᑦᑐᓂᒃ ᓂᐊᖁᖏᑦ ᓂᒥᕐᓯᒪᔪᒃᓴᐅᕗᑦ, ᓵᑦᑐᓂᒡᓗ ᖃᒡᓕᒃᓯᒪᓗᑎᒃ; ᑕᑦᓯᕈᓯᔭᕐᑐᒃᓴᐅᓐᖏᓚᑦ ᐊᐅᒃᑲᕐᓂᖓᒍᑕᐅᒐᔭᕐᑐᒥᒃ. 19#ᒨᓯᓯ ᐱᖓᔪᖏᑦ 16:23.ᐊᓂᓕᕈᑎᒃ ᑐᕐᓲᖑᔭᕐᒧᑦ ᓯᓚᕙᓯᖕᓂᕐᓴᒧᑦ ᐃᓄᐃᑦ ᓇᔪᒐᖓᓐᓄᑦ, ᐊᓐᓄᕌᑦ ᐊᑐᕋᑖᕐᑕᑎᒃ ᐱᓇᓱᐊᕐᓗᑎᒃ ᐲᕐᑕᒃᓴᕆᕔᑦ, ᐃᒡᓗᕈᓯᕐᒧᑦ ᐃᑦᔪᕐᓁᑦᑐᒃᑯᕕᖕᒧᑦ ᐃᓕᓗᒋᑦ; ᐊᓯᖏᓐᓂᒃ ᐊᓐᓄᕌᕐᑐᒃᓴᐅᕗᑦ, ᐃᑦᔪᕐᓁᑦᑐᒥᒃ ᐱᓇᓱᐊᕈᕆᑎᒋᓚᐅᕐᑕᖏᑦ ᐃᓄᖕᓂᒃ ᖃᓄᐃᓕᑎᑦᓯᖁᓇᒋᑦ.
20 #
ᒨᓯᓯ ᐱᖓᔪᖏᑦ 21:5. “ᓂᐊᖁᖏᑦ ᓴᓕᓗᑎᒃ ᓄᔭᖃᖏᑦᑑᔪᒃᓴᐅᓐᖏᓚᑦ ᓄᔭᕐᒥᖕᓂᒡᓘᓐᓃᑦ ᑕᑭᓕᑎᑦᓯᔪᒃᓴᐅᓇᑎᒃ; ᓈᒻᒪᒃᑐᒥᒡᓕ ᓄᔭᖏᑦ ᑭᑦᔭᕐᓯᒪᔪᒃᓴᐅᕗᑦ. 21#ᒨᓯᓯ ᐱᖓᔪᖏᑦ 10:9.ᑐᓂᕐᕈᓯᕐᑎᑦᓯᔩᑦ ᕔᓂᒥᒃ ᐃᒥᕐᑐᒃᓴᐅᓐᖏᓚᑦ, ᐃᓗᕙᓯᖕᓂᕐᓴᒧᑦ ᑐᕐᓲᖑᔭᕐᒧᐊᕐᓂᐊᕈᑎᒃ. 22#ᒨᓯᓯ ᐱᖓᔪᖏᑦ 21:7,13,14.ᓄᓕᐊᓂᒃᑐᒃᓴᐅᓐᖏᓚᓪᓗ ᐅᐃᒡᒐᕐᓂᑯᒥᒃ, ᐊᕕᑦᑎᓯᒪᔪᒥᒡᓘᓐᓃᑦ, ᐊᖑᒻᒧᓪᓕ ᐊᒃᑐᕐᑕᐅᓚᐅᕐᓯᒪᖏᑦᑐᒥᒃ ᓄᓕᐊᓂᒃᑐᒃᓴᐅᕗᑦ ᐃᓴᕆᐊᓕᒥᐅᑦ ᑭᖑᕚᖏᓐᓂᑦ, ᐅᕝᕙᓗ ᐅᐃᒡᒐᕐᓂᕐᒥᒃ ᑐᓂᕐᕈᓯᕐᑎᑦᓯᔨᐅᑉ ᓄᓕᐊᕕᓂᖓᓂᒃ.
23 #
ᒨᓯᓯ ᐱᖓᔪᖏᑦ 10:10. “ᐃᓄᖁᑎᓐᓂᒃ ᐊᔪᕆᕐᑐᐃᖃᑦᑕᕐᑐᒃᓴᐅᕗᑦ ᓱᓇᑦ ᐃᑦᔪᕐᓁᒻᒪᖔᑕ ᓱᓁᓪᓗ ᐃᑦᔪᕐᓁᑦᑑᖏᒻᒪᖔᑕ, ᓱᓁᓪᓗ ᐅᒃᐱᕐᓂᒃᑯᑦ ᓇᕐᕈᓇᕐᒪᖔᑕ ᓱᓁᓪᓗ ᓇᕐᕈᓇᖏᒻᒪᖔᑕ. 24ᑲᒪᒋᔭᐅᔭᕆᐊᖃᕐᑐᒥᒃ ᐃᓱᐊᖏᑦᔪᑎᒃᓴᖃᕐᑐᖃᓕᕐᐸᑦ ᐃᖅᑲᕐᑐᐃᔪᓐᓇᕐᐳᑦ, ᑲᒪᔪᒃᓴᐅᕗᓪᓗ ᐃᖅᑲᕐᑐᐃᓂᕋ ᒪᓕᒡᓗᒍ. ᐱᖁᔭᒃᑲ ᒪᓕᒃᑕᐅᖁᔭᒃᑲᓗ ᓇᓪᓕᐅᓐᓂᕐᓯᐅᕕᐅᑎᑕᒃᑲᓗ ᒪᓕᑦᓯᐊᕐᑕᒃᓴᕆᕔᑦ, ᓴᐸᑎᖁᑎᒃᑲᓗ ᐃᑦᔪᕐᓁᑎᑕᒃᓴᕆᕔᑦ.
25 #
ᒨᓯᓯ ᐱᖓᔪᖏᑦ 21:1-4. “ᐃᒻᒥᖕᓂᒃ ᓴᓗᒤᓕᑎᕐᑐᒃᓴᐅᓐᖏᓚᑦ ᑐᖁᖓᔪᒥᒃ ᐊᒃᑐᕐᓯᓂᕐᒥᖕᓄᑦ; ᑭᓯᐊᓂᓕ, ᐊᑖᑕᒋᒍᓂᐅᒃ ᐊᓈᓇᒋᒍᓂᐅᒡᓘᓐᓃᑦ, ᕿᑐᕐᖓᕆᒍᓂᐅᒡᓘᓐᓃᑦ, ᖃᑕᓐᖑᑎᒋᒍᓂᐅᒡᓗ ᓇᔭᒋᒍᓂᐅᒡᓘᓐᓃᑦ ᐂᑉᐸᕐᑖᓚᐅᕐᓯᒪᖏᑉᐸᑦ ᐊᒃᑐᕐᓯᔪᓐᓇᕐᐳᑦ, ᓴᓗᒤᓕᑎᕋᓗᐊᕐᓗᓂ. 26ᓴᓗᒤᓕᑎᕐᑐᕕᓂᐅᒍᓂ ᐊᒃᑐᕐᓯᓂᕐᒥᓄᑦ, ᐅᑕᖅᑭᔪᒃᓴᐅᕗᖅ ᐅᓪᓗᓂᑦ 7ᓂᒃ, ᑖᒃᑯᐊᓗ ᐊᓂᒍᕐᐸᑕ ᓴᓗᒻᒪᕋᔭᕆᕗᖅ. 27ᐅᓪᓗᖅ ᐃᑦᔪᕐᓁᑦᑐᕕᖕᒧᑦ ᐃᑎᕐᕕᒃᓴᖓ ᓇᓪᓕᐅᑎᒃᐸᑦ, ᑐᕐᓲᖑᔭᕐᒧᑦ ᐃᓗᕙᓯᖕᓂᕐᓴᒧᑦ, ᐱᔨᑦᓯᕐᓂᐊᕐᓗᓂ ᐃᑦᔪᕐᓁᑦᑐᓂᒃ, ᐊᔪᕐᓂᕐᒥᓄᑦ ᓴᓗᒻᒪᕐᑕᐅᑦᔪᑎᒥᒃ ᑐᓂᕐᕈᓯᕐᑐᒃᓴᐅᕗᖅ, ᐊᑕᓂᖅ ᒎᑎ ᐅᖃᕐᐳᖅ.
28 #
ᒨᓯᓯ ᓯᑕᒪᖏᑦ 18:20. “ᑭᖑᕐᖑᑎᔭᒃᓴᖃᕐᑐᒃᓴᐅᓐᖏᓚᑦ; ᐅᕙᖓ ᑖᒃᑯᓄᖓ ᑭᖑᕐᖑᑎᔭᒃᓴᕆᔭᐅᒐᒪ; ᓄᓇᖁᑎᑖᕐᑎᑕᒃᓴᕆᓐᖏᓚᑎᑦ ᐃᓴᕆᐊᓕᒥᐅᑦ ᓄᓇᖓᓂ; ᐅᕙᖓ ᑖᒃᑯᓇᓐᖓᑦ ᐱᖁᑎᒋᔭᐅᒐᒪ. 29#ᒨᓯᓯ ᓯᑕᒪᖏᑦ 18:8-19.ᑐᓂᕐᕈᑎᕕᓂᕐᓂᒃ ᓂᕆᖃᑦᑕᕐᑐᒃᓴᐅᕗᑦ ᓂᐊᖂᔭᒃᓴᓂᒃ, ᐊᔪᕐᑐᓕᓂᖅ ᐱᓪᓗᒍ ᑐᓂᕐᕈᑎᕕᓂᕐᓂᒃ, ᐸᓯᔭᒃᓴᐅᓂᕐᒧᓪᓗ ᐊᑭᓕᐅᑎᒃᓴᓄᑦ ᑐᓂᕐᕈᑎᕕᓂᕐᓂᒃ; ᐱᑖᖃᑦᑕᕐᑐᒃᓴᐅᕗᓪᓗ ᐃᓴᕆᐊᓕᒥᐅᓄᑦ ᐅᕙᓐᓄᑦ ᑐᓂᕐᕈᑕᐅᓯᒪᔪᓕᒫᓂᒃ. 30ᑲᑎᕐᓱᕐᑕᐅᔪᓕᒫᑦ ᓯᕗᓪᓕᕐᐹᖏᑕ ᐱᐅᓂᖏᓐᓂᒃ, ᐅᕙᓐᓄᓪᓗ ᑐᓂᔭᐅᔪᓕᒫᓂᒃ ᐊᑦᔨᒌᖏᑦᑐᓂᒃ, ᑐᓂᕐᕈᓯᕐᑎᑦᓯᔩᑦ ᐱᖃᕐᑐᒃᓴᐅᕗᑦ; ᓂᐊᖂᔭᓕᐅᕐᑕᐅᔪᓪᓗ ᓯᕗᓪᓕᕐᐹᖅ ᐆᑕᐅᔪᖅ, ᐊᖏᕐᕋᓯ ᓮᒻᒪᕐᑎᑕᐅᓯᒪᖁᓪᓗᒍ. 31#ᒨᓯᓯ ᐱᖓᔪᖏᑦ 22:8.ᑐᓂᕐᕈᓯᕐᑎᑦᓯᔩᑦ ᓂᕆᔪᒃᓴᐅᓐᖏᓚᑦ ᖃᓄᐃᑦᑐᑐᐃᓐᓇᓂᒃ, ᑎᖕᒥᐊᕕᓂᕐᒥᒃ ᐆᒪᔪᕕᓂᕐᒥᒡᓘᓐᓃᑦ ᓇᖕᒥᓂᖅ ᑐᖁᑐᐃᓐᓇᕐᑐᕕᓂᕐᒥᒃ, ᐅᕝᕙᓗ ᐆᒪᔫᖃᑎᖓᓄᑦ ᑐᖁᑕᕕᓂᕐᒥᒃ.”
Currently Selected:
ᐃᓯᑭᐊᓕᐅᑉ ᐊᒡᓚᖏᑦ 44: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
